ដោយៈគង់ សូរិយា
ភ្នំពេញៈ រដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិនៃប្រទេ សជប៉ុន(JICA) បាននិងកំពុងជួយរៀបចំផែនការមេ ទីក្រុងសៀមរាប ជាទីក្រុងឆ្លាតវៃឬSmart City។
រដ្ឋាភិបាលជប៉ុនកំពុងជួយរៀបចំផែនការមេកសាងទីក្រុងសៀមរាបជាSmart City
គំរោងកសាងទីក្រុងវៃឆ្លាត (Smart City) នេះរួមមានការ សិក្សាគម្រោងសាងសងប្រព័ន្ធ ចម្រោះទឹកកខ្វក់ និងប្រព័ន្ធគ្រប់គ្រងអនាម័យស្ដង់ដា នៅភូមិសាស្រ្តក្រុងសៀមរាបប៉ែកខាងកើត។ ប្រព័ន្ឋទីក្រុងឆ្លាតវៃសំដៅដល់ទីក្រុង ដែលមានការរៀបចំហេ ដ្ឋារចនាសម្ព័ន្ឋក្រោមដី ដោយមានការបែងចែកដាច់ពីគ្នារវាងទឹកភ្លៀង និងទឹកកខ្វក់ រៀបចំដាំដើមឈើ បំពាក់អំពូលLED ជាដើម។
កន្លងមកភាគីជប៉ុនបានជួយជ្រោមជ្រែង លើការងារនេះមួយរយៈហើយ ដោយកាលពីថ្ងៃ២៨ ខែកក្កដា កន្លងទៅនេះ ភាគីទាំង២ ទើបបានជួយពិភាក្សាគ្នាម្ដងទៀត ដើម្បីតាមដាន និងពន្លឿនការងារ។
លោកកឹម បូរី អនុរដ្ឋលេខាធិការ ក្រសួងសាធារណការ និងដឹកជញ្ជូន បានឱ្យដឹងថា កិច្ចប្រជុំមន្រ្តីពាក់ព័ន្ឋបានពិភាក្សាបន្ថែម អំពីវិធីសាស្ត្រ និងស្ថានភាពនៃការគ្រប់គ្រងទឹកកខ្វក់ និងអនាម័យ ដែលមានភាពចាំបាច់ណាស់ មុននឹងឈានទៅរកការបង្កើតទីក្រុងឆ្លាតវៃ។
យោងតាមផែនការដែលក្រសួងសាធារណៈការ និងដឹកជញ្ជូនបានឲ្យដឹងកាលពីពេលកន្លងមកថា គំរោងនេះត្រូវបែងចែកក្រុងសៀមរាបជាបីតំបន់ រួមមាន ក្រុងសៀមរាប តំបន់បេតិកភណ្ឌ និងតំបន់ទន្លេសាប នឹងត្រូវជ្រើសដើម្បីអភិវឌ្ឍជាទីក្រុងឆ្លាតវៃ ដោយរួមបញ្ចូលទាំងការងារកម្ពស់សន្តិសុខ ការដឹកជញ្ជូន ការគ្រប់គ្រងសំរាម និងទេសចរណ៍ ផងដែរ។
តាមផែនការ ការងារទាំងនេះគ្រោងនឹងសម្រេចឱ្យបានទាំងស្រុងនៅឆ្នាំ ២០៣១។
ទោះបីខេត្តសៀមរាបកំពុងរងសម្ពាធយ៉ាងខ្លាំង ពីការធ្លាក់ចុះនៃវិស័យទេសចរណ៍ក្ដី រដ្ឋាភិបាលនៅតែបន្តអភិវឌ្ឍហេដ្ឋារចនាសម្ព័ន្ធក្នុងខេត្តនេះ តួយ៉ាងដូចជា គម្រោងផ្លូវ ៣៨ខ្សែ ដែលសម្រេចបានប្រមាណ ៦៣,៨៧ភាគរយរួចហើយ៕
