ដោយៈគង់ សូរិយា
ភ្នំពេញៈ លេខាធិការដ្ឋានមូលនិធិអភិវឌ្ឍន៍សហគ្រិនភាព (Enterpreneuship Development Fund) កម្ពុជាបានជ្រើសរើសយកផលិតផលគ្រាប់ស្វាយចន្ទី និងម្រេចកំពត (GI)សម្រាប់ការដាក់លក់នៅលើផ្លេតហ្វមរបស់ក្រុមហ៊ុនយក្សរបស់ចិន ( Alibaba)នៅទីផ្សាររបស់ប្រទេសចិន។
មូលនិធិអភិវឌ្ឍន៍សហគ្រិនភាព (Enterpreneuship Development Fund) នៃក្រសួងសេដ្ឋកិច្ច និងហិរញ្ញវត្ថុកាលពីថ្ងៃទី៣ ខែ សីហាកន្លងមកនេះ បានដឹកនាំកិច្ចប្រជុំតាមប្រព័ន្ធអនឡាញ ជាមួយតំណាងក្រុមហ៊ុន Alibaba.com ស្តីពីការស្វែងយល់ពីប្រព័ន្ធអេកូឡូស៊ី E-commerce និងលទ្ធភាពក្នុងការទទួលបានការដាក់លក់ទំនិញរបស់កម្ពុជានៅលើ Platform របស់ក្រុមហ៊ុន Alibaba ពិសេសសម្រាប់ទីផ្សារប្រទេសចិន។
ប្រធានលេខាធិការដ្ឋានមូលនិធិអភិវឌ្ឍន៍សហគ្រិនភាពលោកជា កុកហេងបានឲ្យដឹងថា ក្នុងកិច្ចប្រជុំនេះភាគីទាំង២ បានលើកពិភាក្សាអំពីបញ្ហាឡូជីស្ទិក និងការធ្វើសាមញ្ញកម្ម នីតិវិធីគយនៃប្រទេសទាំង២ដើម្បីអាចស្វែងរកដៃគូយុទ្ធសាស្ត្រ និងចេះធ្វើទីផ្សារបែបឌីជីថលផលិតផលសម្រាប់ទីផ្សារប្រទេសចិន។
ជាលទ្ធផលផលិតផលស្វាយចន្ទីនិងម្រេចកំពត GI ត្រូវបានជ្រើសរើសត្រៀមលក្ខណៈធ្វើការសាកល្បងដាក់លក់នៅលើ Platform របស់ក្រុមហ៊ុន Alibaba។
ផលិតផលគ្រាប់ស្វាយចន្ទីនិងម្រេចកំពត GI ជាផលិតផលគំរូផ្តល់ឱ្យភាគីក្រុមហ៊ុន Alibaba។ ដោយសារផលិតផលទាំង២នេះ មានសក្តានុពលខ្លាំង ពីព្រោះការនាំចេញគ្រាប់ស្វាយចន្ទីមានកំណើនខ្ពស់ ដូចនេះបើកំណើននេះស្រូបទាញទីផ្សារចិនបានមួយចំនួនធ នឹងអាចជំរុញសកម្មភាពផលិតកម្មកាន់តែច្រើនថែមទៀត ហើយម្រេចក៏ដូចគ្នាដែរ ហើយនេះជាការជួយដល់កសិករកម្ពុជា ។
យោងតាមរបាយការណ៍ក្រសួងកសិកម្ម រុក្ខាប្រមាញ់ និងនេសាទបង្ហាញថា ក្នុងរយៈពេល ៧ខែដំបូង ដើមឆ្នាំ២០២១នេះ កម្ពុជាសម្រេចការនាំចេញម្រេចទៅកាន់ទីផ្សារអន្តរជាតិប្រមាណជាង ២២,០០០តោនមានការកើនឡើងជាង៥០០ភាគរយ ធៀបនឹងរយៈពេលដូចគ្នាឆ្នាំ២០២០ ក្នុងនោះបរិមាណនាំចេញម្រេច ទៅកាន់ប្រទេសវៀតណាម មានចំនួនច្រើនជាងគេបំផុត។
លោកងួន ឡាយ ប្រធានសមាគមលើកកម្ពស់ម្រេចកំពតបានស្វាគមន៍ ចំពោះរដ្ឋាភិបាលក្នុងការជួយជំរុញឱ្យផលិតផលម្រេចកំពត GI ចូលទៅផ្លេតហ្វមក្រុមហ៊ុន Alibaba។ លោកបានសំដែងការរីករាយ និងចូលរួមសហការលើកិច្ចការនេះ ដើម្បីរួមគ្នារកទីផ្សារឱ្យម្រេចកំពត៕
