ដោយៈគង់ សូរិយា
ព្រះវិហារៈ រដ្ឋាភិបាលកម្ពុជាតាមរយៈអាជ្ញាធរជាតិព្រះវិហារ បានបើកការដ្ឋានសាងសង់មជ្ឈមណ្ឌលបដិសណ្ឋារកិច្ចខ្នាតធំមួយ នៅឯតំបន់ប្រាសាទព្រះវិហារ សម្រាប់ត្រៀមទទួលភ្ញៀវទេសចរជាតិ និងអន្តរជាតិនាពេលខាងមុខ។
ខេត្តព្រះវិហារត្រៀមស្វាគមន៍មជ្ឈមណ្ឌលសម្រាប់បដិសណ្ឋារកិច្ចភ្ញៀវទេសចរណ៍កម្រិតតំបន់មួយ
តាមការឲ្យដឹងពីមន្រ្តីជាន់ខ្ពស់ក្រសួងវប្បធ៌ម និងវិចិត្រសិល្បៈបានឲ្យដឹងថា មណ្ឌលបដិសណ្ឋារកិច្ចនេះ មានទីតាំងស្ថិតនៅទល់មុខសារមន្ទីរធម្មជាតិសកលស ម្ដេចតេជោ ហ៊ុន សែនព្រះវិហារ ស្ថិតនៅក្នុងភូមិស្រអែម ឃុំស្រអែម ស្រុកជាំក្សាន្ត។
ការសាងសង់មជ្ឈមណ្ឌលនេះ ត្រូវសាងសង់ឡើងដោយក្រុមហ៊ុន ខេភី ខនស្ត្រាក់សិន និងដេគ័រ ដោយគ្រោងនឹងបញ្ចប់នៅពាក់កណ្តាលឆ្នាំ២០២២ ខាងមុខនេះ។
មណ្ឌលបដិសណ្ឋារកិច្ចនេះ រួមមាន អគារផ្តល់សំបុត្រ អគារព័ត៌មានទេសចរណ៍ អគាររង់ចាំ ចំណតរថយន្យសាធារណៈ ចំណតសហគមន៍ និងបន្ទប់ទឹក។
ក្រោយពេលសាងសង់រួច មណ្ឌលបដិសណ្ឋារកិច្ចត្រូវបានរំពឹងទុកថា នឹងក្លាយជាគោលដៅទេសចរណ៍មួយ សម្រាប់ភ្ញៀវទេសចរមកទស្សនាប្រាសាទព្រះវិហារ ហើយក៏អាចតភ្ជាប់ ទៅនឹងគោលដៅទេសចរណ៍ផ្សេងៗទៀតក្នុងតំបន់ផងដែរ៕
