ដោយៈសុជាតា
ឌូបៃៈ ជាមួយនឹងវិធានការវីសាថ្មីនិង អត្រាការចាក់វាក់សាំងប្រឆាំង Covid 19 បានល្អប្រសើរ កំពុងលើកទឹកចិត្តអ្នកវិនិយោគបរទេស ចាប់អារម្មណ៍ក្នុងការទិញ លក់វីឡានិង អាផាតម៉ិនលំដាប់ខ្ពស់នៅទីក្រុងឌូបៃ។
លោក Calvin Lee Campbell ដែលធ្វើការនៅតំបន់ឧស្សហកម្មមួយនៅទីក្រុងឌូ បៃបាននិយាយថា ឱកាសបានបន្តកើនឡើងម្តងទៀត ដោយអាជីវកម្មរបស់យើងបានកើនឡើង ក្រុមការងារបានកើនឡើង ហើយឱកាសជាច្រើនបានចាប់ផ្តើមល្អឡើងវិញ។
បើយោងតាមក្រុមប្រឹក្សាទេសចរណ៍ និងធ្វើដំណើរពិភពលោក បានបង្ហាញអោយដឹងថា វិបត្តិសកលបានធ្វើអោយប៉ះពាល់ ដល់សេដ្ឋកិច្ចនៅទីក្រុងឌូបៃ ជាពិសេសវិស័យទេសចរណ៍ ដែលតំណាងអោយ១១.៥ភាគរយនៃផលិតផលទុនសរុប។ អ្នកទេសចរបានមកកាន់ទីក្រុងឌូបៃ បានធ្លាក់ចុះប្រមាណ១៦.៧លាននាក់នៅឆ្នាំ ២០១៩ មកត្រឹម ៥,៥លាននៅឆ្នាំ២០២០។
ខណៈដែរតំរូវការគេហដ្ឋានបានធ្លាក់ចុះ ការជួលក៏បានធ្លាក់ចុះ ដោយតម្លៃជួលនៅទីក្រុងឌូបៃបានធ្លាក់ចុះអស់១២ភាគរយប្រចាំឆ្នាំ សម្រាប់រយៈពេល ប្រាំមួយខែ ឆ្នាំ ២០២០កន្លទៅ ។នេះបើយោងតាមភ្នាក់ងារអចលនទ្រព្យ Knight Frank បានលើកឡើង។
ជាដំណោះស្រាយទីក្រុងឌូបៃ បានឆ្លើយតបយ៉ាងរហ័ស ដោយបានចាក់វាក់សាំងប្រមាណ១៨៥ដូស រៀងរាល់១០០គ្រួសារ។ ហើយចាប់ពីចុងខែ សីហា មក រៀងរាល់អ្នកទេសចរបានចាក់វាក់សាំងប្រឆាំងកូវីត១៩ ដែលទទួលស្គាល់ដោយអង្គការសុខភាពពិភពលោកមក អាចស្នើសុំវិសាទេសចរណ៍បាន។
ដើម្បីប្រសិទ្ធិភាព ក្នុងការដោះស្រាយវិបត្តិសកលនេះ រដ្ឋាភិបាលបានកាត់បន្ថយការរឹតបន្តឹង ដោយខែកញ្ញា រដ្ឋាភិបាលបានណែនាំវីសា ចូលនិវត្តប្រាំឆ្នាំ សម្រាប់អ្នកមានអាយុ ៥៥ ឆ្នាំ។នៅខែតុលា រដ្ឋាភិបាលបានណែនាំវីសារយៈពេល១ឆ្នាំ ហើយនៅខែធ្នូ បានណែនាំវិសារយៈពេល១០ឆ្នាំសម្រាប់តាំងទីលំនៅ។
លោកScott Livemore សេដ្ឋវិទូ Oxford ប្រចាំទីក្រុងឌូបៃ បានលើកឡើងថា វាជាជំហានច្បាស់លាស់ ក្នុងការវិនិយោគអចលនទ្រព្យ បន្ថែមទៅកាន់សេដ្ឋកិច្ចឌុយបៃ ជាជាងការស្នាក់នៅបណ្តោះអាសន្ន មុននឹងត្រឡប់ទៅកាន់មាតុភូមិខ្លួនវិញ។
ជាមួយនឹងផ្សារទំនើប និងទីកន្លែងបដិសណ្ឋាកិច្ចជាច្រើន ដែលឥឡូវបានបើកដំណើរខ្លះៗ បានធ្វើអោយទីក្រុងឌូបៃ បានទាក់ទាញអ្នកវិនិយោគពីអាស៊ីខាងត្បូង អ៊ីស្រាអែល និងបណ្តាប្រទេសនៅអឺរ៉ុប។
យោងតាមរបាយការណ៍ពីទីផ្សារអចលនទ្រព្យបានលើកឡើងថា តម្លៃអចលនទ្រព្យជាមធ្យមនៅទីក្រុងឌុយបៃ កើនឡើង៣២ភាគរយ ពោលគឺកើនឡើងតិចតួចបើប្រៀបធៀបនឹងរយៈពេលដូចគ្នាកាលពីឆ្នាំមុន ប៉ុន្តែតម្លៃនេះស្ថិតនៅក្រោមតម្លៃខ្ពស់បំផុតកាលពីឆ្នាំ២០១៤៕
