ដោយៈ ខេត្តកោះកុងដែលពីមុនជាខេត្តឆ្ងាយដាច់អាល័យ បានត្រៀមស្វាគមន៍តំបន់វិស្សមកាលទំហំជាង១០០០ហិកតាជាលើកដំបុង ដែលគំរោងនេះនឹងរៀបចំឡើងដោយក្រសួងការពារជាតិ។
តាមប្រភពព៌តមានពីមន្រ្តីក្រសួងការពារជាតិ បានឲ្យដឹងកាលពីពេលថ្មីៗនេះថា គំរោងនេះ នឹងចាប់ផ្តើមស្ថាបនា តំបន់អភិវឌ្ឍន៍សម្តេចពិជ័យសេនា លើដីជាង១០០០ហិកតា នៅខេត្តកោះកុងនាពេលឆាប់ៗខាងមុខនេះ បន្ទាប់ពីបានកំណត់ព្រំដីនៃគម្រោងត្រូវបានធ្វើឡើងរួចរាល់ហើយ។
យោងតាមសេចក្តីប្រកាសរបស់រដ្ឋបាលខេត្តកោះកុងបានឲ្យដឹងកាលពីសប្តាហ៍មុនថា ការចុះពិនិត្យទីតាំងដី ត្រូវបានធ្វើឡើងកាលពីថ្មីៗនេះ ក្រោមការដឹកនាំរបស់លោកសុខ សុទ្ធី អភិបាលរងខេត្តកោះកុង និងនាយឧត្តមសេនីយ៍ឯកសឿន រឿតទីប្រឹក្សាសម្តេចពិជ័យសេនា ទៀ បាញ់ឧបនាយករដ្ឋមន្រ្តី និងជារដ្ឋមន្រ្តីក្រសួងការពារជាតិ។
លោកសុខ សុទ្ធីបានមានប្រសាសន៍ឲ្យដឹងថា ការចុះពិនិត្យទីតាំង គឺដើម្បីចង្អុលបង្ហាញ និងអនុញ្ញាតឱ្យគ្រឿងចក្រ នៃកងវិស្វកម្មក្រសួងការពារជាតិ ចាប់ផ្តើមឈូសឆាយព្រំដី និងបោះបង្គោលព្រំដីតាមនិយាមកាដែលបានកំណត់រួចហើយ៕
តំបន់អភិវឌ្ឍរមណីយដ្ឋានវិស្សមកាលនេះ មានទីតាំងស្ថិតនៅ ឃុំជ្រោយប្រស់ ស្រុកកោះកុង ខេត្តកោះកុង៕
