ដោយៈគង់ សូរិយា
ភ្នំពេញៈ ការកំណត់គម្លាតពីព្រុំដីរបស់ខ្លូន នៅពេលសាងសង់លំនៅដ្ឋានឬអាគារខ្ពស់ៗណាមួយ មានការចែងយ៉ាងច្បាស់លាស់ តាមលិខិតបទដ្ឋានគតិយុត្តិដូចជាអនុក្រិត ឬច្បាប់សំណង់។
តើអ្នកអភិវឌ្ឍន៍ត្រូវកំណត់គម្លាតប៉ុន្មានពីព្រុំដី នៅពេលអ្នកសាងសង់លំនៅដ្ឋាន និងអគារខ្ពស់កប់ពពក
យោងតាមអនុក្រឹត្យលេខ ៤២ អនក្រ.បក ស្តីពីនគរូបនីយកម្ម រាជធានី ក្រុង និងទីប្រជុំជន បានកំណត់គម្លាតរវាងព្រំដី និងសំណង់អគារ ដូចជា
ទី១. អគារកម្ពស់ទាប
រាប់ចាប់ជាន់ផ្ទាល់ដី ដល់ជាន់ទី២ ទុកធ្លាគម្លាតខាងមុខយ៉ាងតិច៤ម៉ែត្រ (អាចត្រឹម២ ម៉ែត្រ ក្នុងករណីចាំបាច់នៃតំបន់ពាណិជ្ជកម្ម និងតំបន់ចម្រុះ) ដោយឡែក ត្រូវទុកធ្លាគម្លាតខាងក្រោយ និងចំហៀងសងខាងយ៉ាងតិច២ម៉ែត្រ។
២. អគារកម្ពស់មធ្យម
សំរាប់អគារ កម្ពស់ចាប់ពីជាន់ទី៣ ដល់ជាន់ទី៨៖ ទុកធ្លាគម្លាតខាងមុខយ៉ាងតិច៤ ម៉ែត្រ (អាចត្រឹម២ម៉ែត្រ ក្នុងករណីចាំបាច់នៃតំបន់ពាណិជ្ជកម្ម និងតំបន់ចម្រុះ)។ ដោយឡែក ធ្លាគម្លាតខាងក្រោយ និងចំហៀងសងខាងត្រូវទូកយ៉ាងតិច២ម៉ែត្រ។
-កម្ពស់ចាប់ពីជាន់ទី៩ ដល់ជាន់ទី១១៖ ត្រូវទុកធ្លាគម្លាតខាងមុខយ៉ាងតិច៥ ម៉ែត្រ (អាចត្រឹម២,៥ ម៉ែត្រ ក្នុងករណីចាំបាច់នៃតំបន់ពាណិជ្ជកម្ម និងតំបន់ចម្រុះ) ខណៈ ធ្លាគម្លាតខាងក្រោយ និងចំហៀងសងខាងត្រូវទុកយ៉ាងតិច២,៥ម៉ែត្រ។
៣. អគារកម្ពស់ខ្ពស់
សំរាប់អគារកម្ពស់ចាប់ពីជាន់ទី១២ ដល់ជាន់ទី២០៖ ត្រូវទុកធ្លាគម្លាតខាងមុខយ៉ាងតិច៦ម៉ែត្រ ខណៈធ្លាគម្លាតខាងក្រោយ និងចំហៀងសងខាងត្រូវទុកយ៉ាងតិច៣ ម៉ែត្រ។
-កម្ពស់ចាប់ពីជាន់ទី២១ ដល់ជាន់ទី៣០៖ ធ្លាគម្លាតខាងមុខយ៉ាងតិច៨ម៉ែត្រ ខណៈធ្លាគម្លាតខាងក្រោយ និងចំហៀងសងខាងយ៉ាងតិច៣,៥ ម៉ែត្រ។
ចំណែក-កម្ពស់ចាប់ពី៣១ជាន់ឡើងទៅ៖ ទុកធ្លាគម្លាតខាងមុខយ៉ាងតិច១០ ម៉ែត្រ ខណៈធ្លាគម្លាតខាងក្រោយ និងចំហៀងសងខាងត្រូវទុកយ៉ាងតិច៤ម៉ែត្រ។
អនុក្រឹត្យនេះ ក៏បានកំណត់ឱ្យតំបន់ពាណិជ្ជកម្ម និងតំបន់ចម្រុះ ត្រូវមានច្រកដើរក្នុងអគារ ឬក្រៅអគារទុកទទឹងយ៉ាងតិច២ម៉ែត្រ ហើយត្រូវមានដំបូល ដើម្បីបង្កលក្ខណៈងាយស្រួលដល់អ្នកថ្មើរជើងផងដែរ។
ចំពោះអគារក្នុងដីឡូតិ៍ ដែលមានប្លង់ធ្លាគម្លាតស្រាប់វិញ (ប្លង់ដែលអនុម័តដោយក្រសួងរួចរាល់) ត្រូវប្រើប្រាស់ដីតាមការកំណត់នៃប្លង់ដែលមានស្រាប់នោះ ។
មូលហេតុដែលច្បាប់តម្រូវឱ្យមានគម្លាត រវាងព្រំដី និងសំណង់អគារនេះ គឺជាការត្រៀមសម្រាប់លទ្ធភាព ពង្រីកផ្លូវនាពេលអនាគត ពិសេសនៅរាជធានី ក្រុង និងទីប្រជុំជន៕
