ដោយៈវឌ្ឍនៈ
ភ្នំពេញៈ ប្រមុខរដ្ឋាភិបាលកម្ពុជាសម្តេចតេជោហ៊ុន សែននាយករដ្ឋមន្រ្តីនៃកម្ពុជាបានថ្លែងថា ចិនបានផ្ដល់ជំនួយដល់កម្ពុជាជាច្រើនហើយ ជាពិសេសនោះគ្រាន់តែស្ពាន ចិនបានផ្ដល់ជំនួយចំនួន៧រួចហើយ និងកំពុងស្នើសុំឥណទានដើម្បីធ្វើស្ពានទី៨។
សម្តេចតេជោៈកម្ពុជាកំពុងដាក់សំណើរសាងសង់ស្ពានទី៨ពីមិត្តចិន ស្របពេលដំណើរទស្សនកិច្ចរបស់លោកវ៉ាង យីមកកម្ពុជា
អ្វីដែលកាន់តែពិសេសនោះ ក្នុងដំណើរទស្សនកិច្ចនេះ ប្រទេសប្រមុខកាទូត ចិនបានចុះហត្ថលេខាផ្ដល់ជំនួយឥតសំណងដល់កម្ពុជា ក្នុងទឹកប្រាក់ប្រមាណ២៥០លានដុល្លារផងដែរ។
សម្តេចតេជោបានមានប្រសាសន៍ក្នុងពិធីប្រគល់ និងទទួលពហុកីឡដ្ឋានមរតកតេជោអំឡូងដំណើរទស្សនកិច្ចបស់លោកវ៉ាង យី ទីប្រឹក្សារដ្ឋ និងជារដ្ឋមន្ត្រីការបរទេសចិនកាលពីថ្ងៃទី១២ កញ្ញាកន្លងមកថា “សមិទ្ធផលដែលជាជំនួយ និងឥណទានរបស់ចិនជាច្រើននៅកម្ពុជា ប្រហែលជាមិនអាចកើតមានទេ បើសិនជាគ្មានទំនាក់ទំនងល្អរវាងកម្ពុជានិងចិន ជាក់ស្ដែងសមិទ្ធផលមួយដែលជាជំនួយរបស់ចិន ក៏បានលេចរូបរាងឡើងនិងមានតម្លៃជាង១១០០លានយន់ ស្មើនឹង១៥០លានដុល្លារ ហើយក្នុងដំណើរទស្សនកិច្ចរបស់ឯកឧត្តមវ៉ាង យី បានចុះហត្ថលេខាក្រោមជំនួយឥតសំណង ចំនួន១៧៥០លានយន់ ឬប្រហាក់ប្រហែលនឹង២៥០លានដុល្លារអាមេរិក”។
សម្ដេចបានបន្ថែមថា ខ្លួនសម្ដេចផ្ទាល់ក៏មិននឹកស្មានថា កម្ពុជាអាចមានសមិទ្ធផលដ៏អស្ចារ្យដូចពហុកីឡដ្ឋានជាតិនេះដែរ ហើយបើពុំមានចិនក៏ពិបាក ក្នុងការសម្រេចបាននូវសមិទ្ធផលជាច្រើនដូចនេះដែរ ។ ចិននឹងនៅតែជាដៃគូរបស់កម្ពុជា និងជាមិត្តដែកថែបដូចអ្វីដែលរដ្ឋមន្ត្រីការបរទេសវ៉ាង យីបានមានប្រសាសន៍នេះដែរ ។
ក្រៅពីជំនួយ និងឥណទានដែលចិនបានផ្ដល់ជូនកម្ពុជា ចិនក៏ជាប្រទេសដែលមានវិនិយោគិនច្រើនជាងគេ បណ្ដាក់ទុនវិនិយោគនៅក្នុងប្រទេសកម្ពុជា ដោយអគារធំៗខ្ពស់ និងគម្រោងវិនិយោគជាច្រើនទៀត ក៏ជាគម្រោងរបស់វិនិយោគិនចិនផងដែរ។
សម្តេចបន្តថា “ចិននៅតែបន្តដាក់ទុនវិនិយោគ នៅក្នុងវិបត្តិកូវីដ១៩ ដោយក្រុមហ៊ុនខ្លះ មានគម្រោងដាក់ទុនរាប់ពាន់លានដុល្លារអាមេរិក បង្កើតគម្រោងទីក្រុងរណប អគារពាណិជ្ជកម្ម ខុនដូជាដើម”៕
