ដោយវុត្ថា
ភ្នំពេញ៖ ក្រុមហ៊ុនផ្គត់ផ្គង់លំនៅដ្ឋានហ្វីលីពីន Revolution Precrafted បានចុះហត្ថលេខាលើកិច្ចព្រមព្រៀងលើថវិកាចំនួន២១០លានដុល្លារ ជាមួយក្រុមហ៊ុនអចលនទ្រព្យអាមេរិក Imperial Heights LLC ដើម្បីសាងសាងនូវវីឡាដ៏ប្រណីតនៅក្នុងរដ្ឋកាលីហ្វ័រនីញ៉ា។
បើយោងតាមសេចក្តីប្រកាសរបស់ Revolution Precraft ចេញផ្សាយកាលពីពេលថ្មីៗនេះបានអោយដឹងថា វីឡាចំនួន៦០ ដែលមានតម្លៃ៣,៥លានដុល្លារ ដែលមានទំហំអប្បបរមា៤៥០ម៉ែត្រការ៉េ នឹងត្រូវសាងសង់លើទំហំដី២៤ហិកតា ស្ថិតនៅក្នុងតំបន់ Imperial Heights Estates នៅក្នុងសង្កាត់ San Bernardino។
-->
បើតាមកិច្ចសន្យានេះ គឺជាគម្រោងដំបូងរបស់ក្រុមហ៊ុន ដែលមានមូលដ្ឋាននៅទីក្រុងម៉ានីល ដែលមានតម្លៃជាង១ពាន់លានដុល្លារនៅឆ្នាំ ២០១៧។
លោក Robbie Antonio នាយកប្រតិបត្តិក្រុមហ៊ុន Revolution Precraft និងជាស្ថាបនិកក្រុមហ៊ុន Revolution Precraft បានអោយដឹងថា យើងមានមោទនភាពក្នុងការពង្រីកបណ្តាញដៃគូរបស់យើង ទៅតាមបណ្តាប្រទេសនានានៅក្នុងពិភពលោក ជាពិសេសប្រទេសសហរដ្ឋអាមេរិក ដែលជាប្រទេសគោលដៅចម្បងរបស់យើង ក្នុងការអភិវឌ្ឍន៍អចលនទ្រព្យ។ នេះគឺជាការអភិវឌ្ឍន៍ល្អបំផុតរបស់យើង ក្នុងចំណោមការអភិវឌ្ឍន៍ផ្សេងទៀត ហើយក្រុមហ៊ុនយើងនឹងចាប់ផ្តើម អភិវឌ្ឍនៅត្រីមាសទីមួយក្នុង២០១៩ ខាងមុខនេះ ក្រោយពីក្រុមហ៊ុនរចនាប្លង់រួចរាល់។
លោក Tru Lee នាយកប្រតិបត្តិរបស់ក្រុមហ៊ុន Imperial Heights LLC បានអោយដឹងដែរថា ក្រុមហ៊ុនមានជំនឿងថា នឹងទទួលបាននូវការរចនាប្លែកដែលល្អ និងមានគុណភាព ដើម្បីទាក់ទាញអ្នកទិញលំនៅដ្ឋានពីប្រជាពលរដ្ឋក្នុងរដ្ឋកាលីហ្វ័រនីញ៉ា ព្រោះក្រុមហ៊ុន Revolution Crafted ជាក្រុមហ៊ុនអចលនទ្រព្យដ៏ល្អបំផុតមួយនៅក្នុងពិភពលោក។
ក្រុមហ៊ុន Revolution Precraft បានរីកលូតលាសយ៉ាងឆាប់រហ័សចាប់តាំងពីឆ្នាំ២០១៥ ដោយទទួលបានភាពជាដៃគូនិងរកប្រាក់ចំណេញបានយ៉ាងច្រើន រួមទាំងកិច្ចព្រមព្រៀង៣,២ពាន់លានដុល្លារពីក្រុមហ៊ុន The World Islands នៅទីក្រុងឌូបៃ៕
