ដោយៈសហសេវិក
អន្តរជាតិៈ មហាសេដ្ឋីចិន លោក Jack Ma ផ្លាស់ប្ដូរពីពាណិជ្ជកម្មអេឡិចត្រូនិក ទៅកសិកម្មវិញ ដោយនៅពាក់កណ្ដាលខែមករាឆ្នាំនេះ។
លោក Jack Ma បានបង្ហាញខ្លួនជាសាធារណៈសារជាថ្មី ក្នុងការថ្លែងសុន្ទរកថាទៅកាន់គ្រូបង្រៀន១០០នាក់ នៅតំបន់ដាច់ស្រយាលនៃប្រទេសចិន។
ក្នុងសន្ទរកថានោះលោកម៉ានិយាយថា “សព្វថ្ងៃនេះ ប្រទេសចិនបានលុបបំបាត់ភាពក្រីក្រ និងកំពុងជំរុញយុទ្ធសាស្ត្រអភិវឌ្ឍន៍ជនបទរបស់ខ្លួន ហើយឈានចូលដំណាក់កាលថ្មីមួយនៃវិបុលភាពរួម”។ លោកបន្ថែមថា “ការគាំទ្រគ្រូបង្រៀននៅតាមជនបទ ការបំពេញបន្ថែមក្រសួងអប់រំ ក្នុងការអភិវឌ្ឍវិស័យអប់រំជនបទ ការធ្វើការឆ្ពោះទៅរកភាពរស់រវើករបស់ភូមិ-ឃុំ និងការសម្រេចបាននូវវិបុលភាពរួម ខ្ញុំគិតថាទាំងនេះជាទំនួលខុសត្រូវ និងកាតព្វកិច្ចរបស់ម្ចាស់អាជីវកម្មជំនាន់នេះ”។
ក្រុមអ្នកវិភាគមួយចំនួនគិតថា សំដីនេះបង្ហាញថាលោក Jack Ma នឹងងាកទៅរកសកម្មភាពសប្បុរសធម៌ និងបង្ហាញពីការចុះចាញ់របស់លោក ចំពោះសម្ពាធពីរដ្ឋាភិបាលក្រុងប៉េកាំង ដែលថ្មីៗនេះបានជំរុញឱ្យក្រុមមហាសេដ្ឋីចិន ជួយរួមចំណែកក្នុងការលុបបំបាត់ភាពក្រីក្រ។
កាលពីដើមខែកញ្ញា លោក Jack Ma បានទៅកសិដ្ឋានមួយនៅខេត្តជឺជាំង។ ក្រុមហ៊ុន Alibaba ក៏បានប្រកាសប្ដេជ្ញាវិនិយោគប្រាក់១៥ពាន់លានដុល្លារត្រឹមឆ្នាំ២០២៥ លើបច្ចេកវិទ្យា និងឧស្សាហូបនីយកម្មកសិកម្ម។
អំឡុងខែតុលា មានការរាយការណ៍ថា លោក Jack Ma បំពេញទស្សនកិច្ចលើផ្នែកកសិកម្ម និងបច្ចេកវិទ្យាឧស្សាហកម្មនៅអេស្ប៉ាញ និងហូឡង់។
លោក Jack Ma នឹងបន្តដំណើរនៅទ្វីបអឺរ៉ុប ដើម្បីទស្សនាក្រុមហ៊ុន និងស្ថាប័នស្រាវជ្រាវជាច្រើនទៀត ដែលពាក់ព័ន្ធនឹងហេដ្ឋារចនាសម្ព័ន្ធកសិកម្ម ការបង្កាត់ពូជរុក្ខជាតិ និងការបណ្តុះបណ្ដាលជំនាញក្នុងវិស័យនេះ។
លោក Jack Ma ជឿជាក់ថាការរួមបញ្ចូលបច្ចេកវិទ្យារបស់ Alibaba ដូចជាការគណនាតាមអ៊ីនធឺណិត ការវិភាគទិន្នន័យធំ និងបញ្ញាសិប្បនិម្មិត នឹងបង្កើតសក្ដានុពលយ៉ាងខ្លាំងសម្រាប់ទំនើបកម្មកសិកម្មនៅក្នុងប្រទេសចិន៕
