ដោយៈគង់ សូរិយា
ភ្នំពេញៈ រដ្ឋលេខាធិការក្រសួងព៌តមាន លោកជុំ កុសលបានលើកឡើងពីផលលំបាក នៃការទទួលបានព៌តមានប្រកបដោយតុល្យភាព ដែលលោកស្នើឲ្យមន្រ្តីពាក់ព័ន្ឋឆ្លើយតប ការសុំពន្យល់ពីអ្នកសារព៌តមាន។
លោកជុំ កុសលដែលជាទីប្រឹក្សាផ្ទាល់សម្តេចតេជោហ៊ុន សែននាយករដ្ឋមន្រ្តីកម្ពុជាផងដែរនោះបានសរសេរលើបណ្តាញទំនាក់ទំនំសង្គមរបស់ខ្លួន នាព្រឹកថ្ងៃទី១៦ វិច្ឆិកានេះថា ចង់បានព៌តមានតុល្យភាពបាន លុះត្រាតែគូភាគីក្នុងសាច់រឿងផ្តល់ព័ត៌មាន ជូនដល់អ្នកសារព័ត៎មានបានគ្រប់ជ្រុងជ្រោយ។ លោកបន្តថា ពេលខ្លះអ្នកសារព័ត៌មានពិតជាមានការលំបាក ដោយសារតែទាក់ទងទៅកាន់ភាគីពាក់ព័ន្ធក្នុងសាច់រឿងគេ មិនបានសហការក្នុងការផ្តល់ព័ត៌មាន ទើបសម្រេចចិត្តផ្សាយចេញ ហើយរង់ចាំការបកស្រាយពីភាគីម្ខាងទៀតតាមក្រោយ ។
-->
លោកបានបន្តទៀតថា សាច់រឿងខ្លះបើមានការពាក់ព័ន្ធជាមួយ នឹងមន្ត្រីអាជ្ញាធរ អស់លោកមន្ត្រីខ្លះ ពេលអ្នកសារព័ត៌មានហៅទូរស័ព្ទ ទៅសួរនាំសុំការបកស្រាយបំភ្លឺ គាត់បែរជាមិនជាមិនឆ្លើយតប ឬក៏ឆ្លើយទាំងពាក្យសំដីមិនសមរម្យ។ល។ នេះហើយដែលជាផលលំបាក របស់អ្នកសារព័ត៌មានបានជួបប្រទះ ។
លោកជុំ កុសលបានបន្តថា “មិនដាក់ការបន្ទោសខាងមន្ត្រីទេ ជួនកាលមកពីអ្នកសារព័ត៌មានខ្លះ គាត់បង្កការរំខានដល់មន្ត្រីច្រើនពេក ធ្វើឲ្យមន្ត្រីមានការធុញទ្រាន់”។ លោកបន្ថែមថា “បែបហ្នឹងច្រើនតែអ្នកសារព័ត៌មានខ្វះវិជ្ជាជីវ: ខ្លះបានយកតួនាទីជាអ្នកសារព័ត៌មានទៅប្រើខុសសាច់រឿង”។ សូមអ្នកសារព័ត៌មានប្រកបការងាររបស់ខ្លួន ដោយឈរលើក្រមសីលធម៌ និងវិជ្ជាជីវ:ឲ្យបានត្រឹមត្រូវ ហើយសូមមន្ត្រីអាជ្ញាធរ ចាត់ទុកអ្នកសារព័ត៌មានជាដៃគូសហការដ៏ល្អ មិនអាចខ្វះបានក្នុងការផ្សព្វផ្សាយជូនសាធារណជនបានដឹងឮ។
លោកជុំ កុសលក៏ជាឧត្តមទីប្រឹក្សាគេហទំព័រ Propertyarea.asia និងគេហទំព័រព៌តមានហិរញ្ញវត្ថុឈានមុខគេ Cambodiafinancialtimes.com ផងដែរ៕
