ដោយស៊ីវ ម៉េង
ភ្នំពេញ៖ ជាប្រវត្តិសាស្រ្តថ្មីមួយ ដែលរដ្ឋសភាជាតិនិតិកាលទី៦បានបើកដំណើរការជាផ្លូវការ ក្រោមព្រះរាជវត្តមានព្រះមហាក្សត្រសម្តេចព្រំបរមនាថ នរោត្តម សីហមុនី ដែលបានថ្លែងនូវព្រះរាជសារប្រកបដោយអត្ថន័យមួយ។
ក្នុងឳកាសបើកកិច្ចប្រជុំរដ្ឋសភាលើកតំបូង នាព្រឹកថ្ងៃទី៥ កញ្ញានេះ ដោយមានការចូលរួមពីសម្តេចសេនាវិបុលសាយ ឈុំប្រធានព្រឹទ្ឋសភា សម្តេចអគ្គមហាបញ្ញាចក្រហេង សំរិនព្រឹទ្ឋសមាជិកនៃរដ្ឋសភា និងសម្តេចតេជោហ៊ុន សែននាយករដ្ឋមន្រ្តីនៃកម្ពុជា ព្រមទាំងសមាជិកសភាដទៃទៀត ព្រះមហាក្សត្រសម្តេចព្រះបរមនាថ នរោត្តម សីហមុនីបានមានព្រះរាជបន្ទូលថា ចាប់តាំងពីរដ្ឋសភាបានចាប់បដិសន្ឋិជាថ្មីនៅឆ្នាំ១៩៩៣ រហូតមកទល់ពេលនេះ មានរយៈពេល២៥ឆ្នាំកន្លងមកហើយ កម្ពុជាបានប្រែក្លាយពីការបែកបាក់ជាតិ និងបែងចែកទឹកដី ទៅជាប្រទេសដែលមានសន្តិភាព ស្ថិរភាព ប្រជាធិបតេយ្យ និងអភិវឌ្ឍន៍គ្រប់វិស័យ ដែលធ្វើឲ្យប្រជាពលរដ្ឋបានរស់ ប្រកបដោយក្តីសង្ឃឹម និងសុខក្សេមក្សាន្ត។
-->
ព្រះមហាក្សត្របានបន្តថា “រដ្ឋសភាដែលជាតំណាងអង្គការ មានអំណាចនិតិប្ប ញ្ញត្តិ នឹងបន្តបំពេញភារកិច្ចរបស់ខ្លួន ដូចមានកំណត់ក្នុងរដ្ឋធម្មនុញ្ញ និងច្បាប់ជាធរមាន ដើម្បីនិរន្តរភាពនយោបាយ សេដ្ឋកិច្ច សង្គមវប្បធ៌ម កសាងព្រះរាជាណាចក្រកម្ពុជា ជារដ្ឋរ៉ឹងមាំនិងជឿនលឿន ដោយផ្អែកលើច្បាប់ ដោយស្មើភាពសម្រាប់ប្រជាពលរដ្ឋគ្រប់រូប”។សម្តេចបានបន្តថា “តំណាងរាស្រ្តក្នុងរដ្ឋសភា ជាតំណាងប្រជាជាតិខ្មែរទាំងមូល ធ្វើយ៉ាងណាខិតខំប្រឹងប្រែងបន្ថែមទៀត ជួយប្រជាពលរដ្ឋឲ្យរស់នៅស្មើភាពគ្នា ក្នុងជំនឿសាសនា ការសិក្សារៀនសូត្រ និងការមានការងារធ្វើសមរម្យ ទៅតាមកំលាំងសមត្ថភាពនិងកម្រិតវិជ្ជារបស់ខ្លួន”។
សម្តេចព្រះបរមនាថ នរោត្តមសីហមុនីបានបន្តថា “ដើម្បីសម្រេចភារកិច្ចដ៏ឧត្តុងឧត្តមនេះ ប្រជាជាតិកម្ពុជាត្រូវមានឯកភាព សាមគ្គីភាពជាតិខ្ពស់ ដោយឈរលើស្មារតីបង្រួបបង្រួមជាតិ និងប្រកាន់ខ្ជាប់នូវព្រហ្មវិហារធ៌ម៤ គឺមេត្តា ករុណា មុទិតា និងឧបេក្ខា”។
ជាមួយគ្នានេះ សម្តេចក៏បានសម្តែងសុទិដ្ឋិនិយមថា រាជរដ្ឋាភិបាលអាណត្តិថ្មីដែលនឹងទទួលបានការទុកចិត្តពីរដ្ឋសភា នឹងបំពេញភារកិច្ចតាមគោលនយោបាយ បន្តជំរុញកំនើនសេដ្ឋកិច្ច លើកកំពស់ជីវភាពប្រជាពលរដ្ឋ បន្តអភិវឌ្ឍន៍ និងពង្រឹងប្រព័ន្ឋការពារសង្គមដែលមានវិសាលភាពគ្របដណ្តប់ និងការអភិវឌ្ឍវប្បធ៌មដោយចីរភាព ដើម្បីធានាអត្ថិភាពដ៏រ៉ឹងមាំនៃអត្តសញ្ញាណជាតិ ជំរុញការអភិវឌ្ឍសេដ្ឋកិច្ចសង្គម ស្របគ្នានឹងការលើកកំពស់សីលធ៌ម សម្រាប់ភាពសុខដុមនៃសង្គមជាតិ”៕
