ដោយដែន ចែងចាំង
ភ្នំពេញ ប្រជាជនកម្ពុជាស្ទើរគ្រប់រូបបានស្គាល់លោកឧកញ៉ាម៉ុង រិទ្ឋីជាអ្នកណាហើយ លោកជាមហាសេដ្ឋីកម្ពុជាមួយរូប និងមានមុខជំនួញយ៉ាងច្រើន ហេតុនេះការរៀបចំពេលវេលារវាងការងារ និងការងារគ្រួសារទំនងជាស្មុគ្រស្មាញមួយ។
តើមហាសេដ្ឋីរូបនេះរវល់ការងារបែបណា? និងមានពេលវេលាសម្រាប់គ្រួសារដែរឬទេ បើលោកមានជំនួញច្រើនបែបនេះ?។
ទាក់ទងនឹងបញ្ហានេះ លោកឧកញ៉ាម៉ុង រិទ្ឋីបានថ្លែងឲ្យដឹងកាលពីពេលថ្មីៗនេះថា រវាងការងារជំនួញ និងការថែរទាំភរិយា ឬសុភមង្គលក្នុងគ្រួសារ មិនមានអ្វីគួរឲ្យស្មុគ្រស្មាញទេ សម្រាប់លោក ព្រោះភរិយារបស់លោកមិនបានទាមទារថាថ្ងៃសៅរ៍ ឬអាទិត្យជាពេលវេលារបស់គាត់ឡើយ ហើយលោកទៅណាក៏ភរិយាមិនដែលសួរនាំដែរ។ សំខាន់រស់នៅជាមួយគ្នាត្រូវទុកចិត្តគ្នា”។ លោកបន្តថា “បើលោកទៅព្រៃ នៅចំការដូងប្រេង ភរិយាលោកទៅព្រៃជាមួយលោក មិនដែលទារទៅផ្សារទំនើប ឬទាមទារថ្ងៃសៅរ៍ឬអាទិត្យពីលោកឡើយ”។
លោកបន្តថា យុវជនបច្ចុប្បន្នមានសំណាង ព្រោះមានសិទ្ឋ និងពេលវេលាជ្រើសរើសគូស្វាមីភរិយាដោយខ្លួនឯងបាន ខុសពីលោករៀបការ គឺពួកអាពតរៀបការឲ្យទាំងហ្វូង ដែលរហូតមកទល់ពេលនេះអ្នករៀបការជាមួយលោក បានលែងលះគ្នាស្ទើរអស់ទៅហើយ។លោកបន្តថា ការមានគូស្រករដោយជ្រើសរើសបានដោយខ្លួនឯង ពិតជាពិសេសណាស់ ហើយបើរើសខុសទៀត នោះជាកំហុសរបស់យើង មិនមែនកំហុសឪពុកម្តាយឬត្រូវបន្ទោសអ្នកណាឡើយ។
ឧកញ៉ាដ៏មានប្រជាប្រិយភាពរូបនេះបានបន្ត ដោយលើកជាសំណួរថា ហេតុអីត្រូវមានថ្ងៃសៅរ៍ឬអាទិត្យ សម្រាប់គ្នា? ខ្ញុំមិនគិតចឹងទេ ព្រោះប្រពន្ឋខ្ញុំស្រួលដែរ ពេលខ្ញុំទៅណាគាត់ទៅតាម ប៉ុន្តែមិនមែនចេះតែតាមគ្រប់ពេលវេលា មិនរករឿង ប្រច័ណ្ឌខុសពេលវេលាទេ។លោកបន្តថា បើរវល់តែចង់បានថ្ងៃសៅរ៍ឬអាទិត្យ ឬតាមដាន ប្រច័ណ្ឌគ្រប់ពេលវេលា យើងមិនអាចធ្វើអ្វីកើតនោះទេ”៕
