ដោយៈ គង់ សូរិយា
ព្រះសីហនុៈ ប្រតិភូអន្តរក្រសួងបានចុះពិនិត្យវឌ្ឈនភាព នៃគំរោងអភិវឌ្ឍន៍នៅតាមបណ្តាកោះនានា ក្នុងខេត្តព្រះសីហនុ ដើម្បីរៀបចំរបាយការណ៍ទៅប្រមុខរដ្ឋាភិបាល។
អ្នកនាំពាក្យរដ្ឋបាលខេត្តព្រះសីហនុ លោកឃាង ភារម្យបានមានប្រសាសន៍ឲ្យដឹងកាលពីរសៀលថ្ងៃទី២៥ មករាកន្លងមកថា ក្រុមប្រតិភូអន្តរក្រសួង ចុះពិនិត្យគំរោងអភិវឌ្ឍន៍កោះ និងឆ្នេរចំនួន១២ទីតាំងរួមមានកោះរ៉ុង កោះរ៉យសន្លឹមមានក្រុមហ៊ុនអភិវឌ្ឍន៍ចំនួនពីរ កោះត្រេះ កោះប្រើស កោះក្របី កោះឬស្សី ដែលមានក្រុមហ៊ុនអភិវឌ្ឍន៍ចំនួនពីរ កោះតាគៀវ កោះស្រមោច កោះថ្មី កោះពស់ និងឆ្នេរជ័យជំនះ។
លោកបន្តថា “លទ្ឋផលនៃការចុះត្រួតពិនិត្យនេះ ក្រុមការងារអន្តរក្រសួងកំពុងបូកសរុប លើគំោរងអភិវឌ្ឍន៍នៅតាមបណ្តាកោះ និងទីតាំងនិមួយៗ”។លោកបន្តថា “ការចុះត្រួតពិនិត្យនេះ ដើម្បីដឹងថាក្រុមហ៊ុនបានទទួលសិទ្ឋសម្បទានពីរដ្ឋាភិបាល បានអភិវឌ្ឍន៍គំរោងដល់កម្រិតណា ជួបបញ្ហាប្រឈមអ្វីខ្លះ និងស្របតាមផែនការមេ ដែលក្រុមហ៊ុនទទួលបានការអនុម័តពីក្រុមប្រឹក្សាអភិវឌ្ឍន៍ឬអត់”។
លោកឃាង ភារម្យ បានបន្តថា បើក្រុមហ៊ុនអភិវឌ្ឈន៍ធ្វើខុសពីផែនការមេ ដែលបានអនុម័តក្រុមប្រតិភូអន្តរក្រសួង នឹងធ្វើរបាយការណ៍៍ជូនយោបល់ដល់ថ្នាក់ដឹកនាំ ហើយការសម្រេចបែបណា អាស្រ័យលើថ្នាក់ដឹកនាំពិនិត្យជាក់ស្តែង។
ខេត្តព្រះសីហនុ មានកោះសរុបចំនួន៥៦កោះ ដែលកោះល្បីៗជាច្រើន សុទ្ឋតែទទួលបានការអភិវឌ្ឈន៍ពីក្រុមហ៊ុនឯកជន៕
