ដោយ៖ វឌ្ឍនៈ
ភ្នំពេញ ៖ កម្ពុជាចាប់ផ្ដើមអភិវឌ្ឍខុនដូដំបូងបង្អស់នៅអំឡុងឆ្នាំ២០០៦ ដោយពឹងផ្អែកស្ទើរទាំងស្រុងទៅលើជនបរទេស ហើយរហូតដល់ឆ្នាំ២០១៨និង២០១៩ វិស័យខុនដូនៅកម្ពុជាចាប់ផ្ដើមមានសន្ទុះងើបឡើងខ្ពស់និងមានអតិថិជនក្នុងស្រុកចាប់ផ្ដើមយល់ដឹងនិងទិញខុនដូសម្រាប់រស់នៅនិងការវិនិយោគ។
លោក ខន គង្គា អគ្គនាយកនៃក្រុមហ៊ុន ERA Cambodia បានឱ្យដឹងថាកត្តាផ្លូវ និងតម្លៃដីនៅកណ្ដាលក្រុងបានឡើងខ្ពស់ធ្វើឱ្យពលរដ្ឋមួយចំនួនបែរទៅរស់នៅក្នុងខុនដូ ហើយចំនួនពលរដ្ឋខ្មែរទៅរស់នៅក្នុងខុនដូក្នុងប្រទេសកម្ពុជាក៏មានចំនួនកាន់តែច្រើនឡើងៗពីមួយឆ្នាំទៅមួយឆ្នាំ។
លោកថា ”យើងក្រលេកទៅមើលផ្លូវនៅក្នុងរាជធានីភ្នំពេញមានការកកស្ទះចរាចរណ៍ ហើយពលរដ្ឋដែលទិញផ្ទះនៅជាយក្រុងស្នាក់នៅត្រូវធ្វើដំណើរមកបំពេញការងារនៅកណ្ដាលក្រុង ដោយប្រើពេលវេលាយូរនៅលើដងផ្លូវ កើតអារម្មណ៍ស្ត្រេសមួរម៉ៅ ដូច្នេះមួយចំនួនក៏បានរកទិញខុនដូតម្លៃសមរម្យសម្រាប់ស្នាក់នៅ និងធ្វើការ ហើយទៅលេងផ្ទះនៅជាយក្រុងនៅថ្ងៃឈប់សម្រាកចុងសប្ដាហ៍ម្ដងម្កាល”។
លោកបន្តថា សម្រាប់តម្លៃនៅកណ្ដាលក្រុងភ្នំពេញ ក៏ឃើញថាបានកើនឡើងថ្លៃកាន់តែខ្ពស់ ដូច្នេះអ្នកដែលចង់បានដីឬផ្ទះនៅកណ្ដាលក្រុងត្រូវចំណាយរាប់លានដុល្លារអាមេរិកដើម្បីទិញដីសង់ផ្ទះឬទិញផ្ទះនៅលើដីនោះតែម្ដង ។ យ៉ាងណាក្ដី មិនមានពលរដ្ឋកម្ពុជាច្រើននោះទេ ដែលចំណាយលុយរាប់លានទិញផ្ទះនៅកណ្ដាលក្រុង តែពួកគាត់នឹងទិញខុនដូននៅកណ្ដាលក្រុងរស់នៅវិញ ហើយដីនោះក៏ទុកសម្រាប់អភិវឌ្ឍន៍អគារខ្ពស់ជំនួសវិញ ដែលអាចសង់បានច្រើនជាន់សម្រាប់លក់ជូនអ្នកមានតម្រូវការ។
លោកគង្គាបានធ្វើការប្រៀបធៀបការអភិវឌ្ឍខុនដូនៅកម្ពុជាជាមួយនឹងប្រទេសក្នុងតំបន់អាស៊ានផងដែរថា ប្រទេសថៃបានចាប់ផ្ដើមអភិវឌ្ឍន៍ខុនដូមុនកម្ពុជាប្រមាណ៣០ឆ្នាំ ហើយប្រទេសសិង្ហបុរីបានអភិវឌ្ឍន៍មុនកម្ពុជាប្រមាណ៥០ឆ្នាំ ដូច្នេះ អនាគតវិស័យខុនដូនៅកម្ពុជាក៏នឹងរត់ទៅតាមរបត់នៃប្រទេសទាំងនោះដែរ។ ជាក់ស្ដែងពេលនេះ ប្រជាពលរដ្ឋកម្ពុជាកាន់តែច្រើនបានងាកទៅរស់នៅក្នុងខុនដូ ក្នុងអគារសហកម្មសិទ្ធិជាបណ្ដើរៗ។
តាមការសិក្សារបស់ក្រុមហ៊ុនCBRE បានបង្ហាញថា ក្នុងចំណោមគម្រោងអភិវឌ្ឍន៍ខុនដូក្នុងប្រទេសកម្ពុជាក្នុងឆ្នាំ២០២២នេះភាគច្រើនគឺជាគម្រោងអភិវឌ្ឍន៍ដោយវិនិយោគិនក្នុងស្រុកដោយសារតែកូវីដ១៩នៅតែជាឧបសគ្គក្នុងការរារាំងដល់ការមកដល់នៃជនបរទេសក្នុងប្រទេសកម្ពុជាដដែល។ ក្នុងឆ្នាំ២០២២នេះដែរ ក្រុមហ៊ុននេះ រំពឹងថាការផ្គត់ផ្គង់ខុនដូក្នុងប្រទេសកម្ពុជាមានតែជាង១៣០០០យូនីតប៉ុណ្ណោះ ហើយនឹងមិនមានការប្រកាសសាង់សង់គម្រោងខុនដូធំថ្មីណាមួយទៀតនោះទេ៕
