ដោយៈគង់ សូរិយា
ភ្នំពេញៈ ឯកអគ្គរដ្ឋទូតអាល្លឺម៉ង់ លោក Christian Berger បានកោតសរសើរពីការរីកចម្រើន សោភ័ណភាពខេត្តបាត់ដំបងថា មានលក្ខណៈពិសេសខុសប្លែកពីបណ្តាខេត្តដទៃ។
ទូតអាល្លឺម៉ង់កោតសរសើរពីសោភ័ណភាពខេត្តបាត់ដំបងថាមានលក្ខណៈពិសេស
ក្នុងជំនួបជាមួយលោកសុខ លូអភិបាល នៃគណៈអភិបាលខេត្តបាត់ដំបងកាលពីថ្ងៃម្សិលម៉ិញ លោក Christian Berger បានមានប្រសាសន៍ថា រដ្ឋាភិបាលអាល្លឺម៉ង់ តាមរយៈអង្គការ GIZ បានធ្វើការងារជាច្រើននៅក្នុងខេត្តបាត់ដំបង ក្នុងនោះក៏មានកម្មវិធី វិមជ្ឈការ និងវិសហមជ្ឈការ និងការផ្តល់សេវាជូនប្រជាពលរដ្ឋ។
លោកបានសម្តែថការចាប់អារម្មណ៍ ទៅការៀបចំសោភ័ណភាព ក្នុងក្រុង ព្រោះខេត្តបាត់ដំបង មានលក្ខណៈពិសេសជាងខត្តដទៃ តាមខេត្តដែលឯកឧត្តមធ្លាប់ទៅដល់ ហើយខេត្តបាត់ដំបងនេះ ជាខេត្តមរតក។
ក្នុងជំនួបនេះ លោកសុខ លូ បានជម្រុញឲ្យឯកអគ្គរដ្ឋទូតនៃសាធារណរដ្ឋសហព័ន្ធអាល្លឺម៉ង់ប្រចាំនៅប្រទេសកម្ពុជា ជួយជំរុញផ្សព្វផ្សាយដល់អ្នកវិនិយោគទុន ឱ្យមកធ្វើការវិនិយោគទុន មកខេត្តបាត់ដំបង និងបន្តជួយ លើគំរោងផ្សេងទៀតនៅខត្តបាត់ដំបង។
លោកបន្តទៀតថា ទោះបីខេត្តបាត់ដំបង ជាខេត្តកសិកម្មពិតមែន តែក៏នៅមានបញ្ហាផងដែរ គឺមានការខ្វះខាតរោងចក្រ ឬសិប្បកម្មកែឆ្នៃផលិតផលកសិកម្ម ហើយនេះជាកង្វល់របស់ខេត្ត៕
