ដោយៈសុខុម
រីយ៉ាដៈ ក្រុមហ៊ុន Doosan Heavy Industries & Construction របស់កូរ៉េខាងត្បូង ទទួលបានកិច្ចសន្យាតម្លៃ៨៣៤លានដុល្លារអាមេរិក ដើម្បីសាងសង់ចក្រ ផលិតដែកមួយនៅអារ៉ាប៊ីសាអូឌីត ដែលមានសមត្ថភាពផលិតដែក បាន៦០.០០០តោនក្នុងមួយឆ្នាំ។ នេះបើយោងតាមសារព័ត៌មាន Arab News ចុះផ្សាយកាលពីថ្ងៃអង្គារ ទី១៥ កុម្ភៈ។
ទីភ្នាក់ងារព័ត៌មានកូរ៉េ Yonhap News Agency ចុះផ្សាយថា ក្រោមកិច្ចសន្យានេះ ការសាងសង់រោងចក្រនៅសួនឧស្សាហកម្ម King Salman Global Maritime Industries Complex ក្នុងតំបន់ Ras Al-Khair នេះនឹងចាប់ផ្តើមក្នុងឆ្នាំ២០២២នេះ ហើយគ្រោងនឹងបញ្ចប់ នៅត្រីមាសទី១ ដើមឆ្នាំ២០២៥។
កិច្ចសន្យានេះ ទទួលបានពីក្រុមហ៊ុន Saudi Tuwaiq Casting & Forging Co. ជាការបណ្តាក់ទុនរួមគ្នាមួយ ដែលបានបង្កើតឡើងកាលពីខែមុនរវាងក្រុមហ៊ុន Doosan ក្រុមហ៊ុនSaudi Dussur Industrial Investments Co. និងក្រុមហ៊ុន Saudi Aramco Development Co។
ក្រុមហ៊ុនសិក្សាស្រាវជ្រាវទីផ្សារ Frost & Sullivan និយាយថា ការបញ្ជាទិញរោងចក្រ ក្នុងប្រទេសអារ៉ាប៊ីសាអូឌីត និងពិភពអារ៉ាប់ ត្រូវបានរំពឹងថា នឹងកើនឡើងប្រមាណ១,៧ពាន់លានដុល្លារអាមេរិក ក្នុងមួយឆ្នាំក្នុងឆ្នាំ២០២៨។
បង្កើតឡើងក្នុងឆ្នាំ១៩៦២ ក្រុមហ៊ុន Doosan Heavy Industries & Construction Co. គឺជាក្រុមហ៊ុនឧស្សាហកម្មធុនធ្ងន់ ដែលមានឯកទេសខាងបង្កើត និងសាងសង់រោងចក្រថាមពល ដើរដោយនុយក្លេអ៊ែរ ស្ថានីយថាមពលបំប្លែងចេញពីកម្ដៅ ទួរប៊ីន ម៉ាស៊ីនភ្លើង និងរោងចក្រផលិតដែកជាដើម៕ Arab News៕
