ដោយ វុត្ថា
ភ្នំពេញ៖ រដ្ឋមន្ត្រីក្រសួងទេសចរណ៍ លោកថោង ខុនបានឲ្យដឹងថា កម្ពុជាកំពុងខិតខំទាក់ទាញអ្នកវិនិយោគក្នុងស្រុក និងក្រៅស្រុក បង្កើតផលិតផលទេសចរណ៍ថ្មីៗ អោយបានច្រើនដើម្បីបំរើទេសចរជាតិនិងអន្តរជាតិ។
ជាមួយគ្នានេះការអនុញ្ញាតឱ្យវិស័យឯកជន ធ្វើការវិនិយោគបង្កើតផលិងផលទេសចរណ៍ដ៏ទាក់ទាញនៅតំបន់ឆ្នេរសមុទ្រ នោះគឺស្របនឹងនយោបាយយុទ្ធសាស្ត្រអភិវឌ្ឈន៏ ទេសចរណ៍២០១២ ២០២០របស់រាជរដ្ឋាបាល។ រាល់គំរោងអភិវឌ្ឍន៏ណាក៏ដោយ ដែលគោរពអនុវត្តន៏តាមគោលការណ៍ណែនាំ នៃការគ្រប់គ្រងឆ្នេរសមុទ្ររបស់រាជរដ្ឋាភិបាល គួរត្រូវបានលើកទឹកចិត្ត។
លោករដ្ឋមន្ត្រីបន្តថា “នៅតំបន់សមុទ្រ ទន្ទឹមនឹងការខឹតខំថែរក្សាឆ្នេរខ្សាច់ អោយបានស្អាត ដើម្បីការកំសាន្តរបស់ទេសចរ និងកែសំរួលការអភិវឌ្ឍន៍ខុសឆ្គងកន្លងមកដែលកំពុងមានគឺជាកិច្ចការដែលយើងកំពុងខិតខំធ្វើ។ លោកបន្តថា “ព្រមជាមូយនេះក៏ត្រូវខិតខំសិក្សារកវិធី ទាក់ទាញអោយមានការវិនិយោគ ជារមណីយដ្ឋានសំរាកលំហែ កំសាន្ត ការកសាងឲ្យមានចំណតទូក ក្តោង Marina ។ល។ ទីតាំងពយកំពេញនេះគឺសមស្របណាស់នឹងផែនការយុទ្ធសាស្ត្រនេះ។
តំបន់ឆ្នេរសមុទ្រ ដែលរួមមាន៤ខេត្ត មានកោះជាង៦០ ឆ្នេរខ្សាច់ ឆ្នេរ ថ្មធំ ថ្មតូច ប្រវែង ៤៤០គម ក៏ពិតមែន តែកន្លែងទាំងនោះក៏នៅពុំទាន់បានអភិវឌ្ឍន៍ជាកន្លែងកំសាន្តសំរាប់ទេសចរទាំងអស់នៅឡើយ ដោយកន្លែងខ្លះពុំទាន់មានហេដ្ឋារចនាសម្ពន្ធផ្លូវថ្នល់ចូលទៅបាន។ ផ្ទុយទៅវិញកន្លែងខ្លះមានផ្លូវចូលទៅហើយ តែពុំទាន់មានការវិនិយោគ ដែលចាំបាច់ត្រូវមានអ្នកវិនិយោគ ដែលមានស្នាដៃជំនាញ និងប្រវត្តិយល់ដឹងពីការកាពារ បរិស្ថានឆ្នេរសមុទ្រច្បាស់លាស់ល្អទើបអនុញ្ញាត្តិបាន។
កន្លែងខ្លះដែលពុំមានឆ្នេរខ្សាច់ ក៏ត្រូវសិក្សាបង្កើតអោយមានឆ្នេរខ្សាច់ ដូចនៅខេត្តកែបឆ្នេរខ្សាច់ ដែលមាននៅក្នុងទីក្រុងកែបបច្ចុប្បន្នឺមិនមែនជាឆ្នេរខ្សាច់ធម្មជាតិ នោះទេ គឹជាឆ្នេរខ្សាច់សិប្បនិម្មិត ដែលលោកអភិបាលក្រុងកែបជំនាន់មុនឆ្នាំ១៩៧០ យកខ្សាច់ទៅចាក់បំពេញដើម្បីបង្កើតឡើង (ហើយក្រោយមកយើង ក៏បន្តថែរក្សាចាក់បំពេញរហូតមក )ខណៈពេលដែលឆ្នេរខ្សាច់អង្កោល ដ៏វែងមានក្នុងខេត្តនេះ ក៏មិនទានអាចរៀបចំបាន។ដូចនេះនៅតំបន់ឆ្នេរសមុទ្រ គោលដៅដែលត្រូវយកចិត្តទុកដាក់ ថែរក្សា និងអភិវឌ្ឍន៏មាន៣ គឺ កោះ ឆ្នេរខ្សាច់ និងទីក្រុងជាប់ឆ្នេរ។
លោករដ្ឋមន្ត្រីថោង ខុនបានរំលឹកឡើងនូវទស្សនទាននៃការអភិវឌ្ឍ ប្រកបដោយនិរន្តរភាពមួយឃ្លាថា «អភិរក្សបម្រើឱ្យការអភិវឌ្ឍ ការអភិវឌ្ឍបម្រើឱ្យការអភិវឌ្ឍ» ដោយប្រទេសកម្ពុជាសម្បូរដោយ សក្តានុពល បេតិកភណ្ឌ វប្បធម៌ និងធម្មជាតិដ៏ល្អស្អាតជាច្រើនកន្លែង (ប្រាសាទបុរាណ ឆ្នេរសមុទ្រដ៏ស្រស់ស្អាត តំបន់ទេសចរណ៍ធម្មជាតិ /អេកូទេសចរណ៍ជាដើម) ដែលអាចបង្កើតជាផលិតផលទេសចរណ៍ដ៏ទាក់ទាញបានយ៉ាងច្រើន សម្រាប់បច្ចុប្បន្ន និងទៅអនាគត ហើយផលិតផលទេសចរណ៍ទាំងនោះ នឹងនាំមកនូវចំណូលយ៉ាងច្រើនដល់សេដ្ឋកិច្ចជាតិ បង្កើតឱ្យមាននូវឱកាសការងារ រួមចំណែកក្នុងការកាត់បន្តយភាពក្រីក្រ កាត់បន្ថយចំណាកស្រុកលើកកម្ពស់ជីវភាពរស់នៅរបស់ប្រជាពលរដ្ឋ។
លោកបន្តថា “ដូច្នេះរាល់គំរោងអភិវឌ្ឍលើវិស័យទេសចរណ៍ ទោះបីជានៅក្នុងកម្រិតតូច មធ្យម ធំ ឬទោះបីនៅទីកន្លែងណាក៏ដោយ ក៏ត្រូវបានគិតគូរយកចិត្តទុកដាក់ដល់ការអភិរក្សជាមុន ប៉ុន្តែការអភិរក្សមិនមែនមានន័យថា ជាការរារាំងដល់ការអភិវឌ្ឍនោះទេ ខណៈដែលគំរោងអភិវឌ្ឍន៏ទាំងឡាយនោៈ ត្រូវបានបម្រើឱ្យការអភិរក្ស”៕
