ដោយ ដែន ចែងចាំង
ភ្នំពេញ៖ អ្នកជំនាញផ្នែកអប់រំនៃសាលា Cambridge International School of Cambodia បានលើកឡើងថា ភាសាពិតជាមានសារៈសំខាន់ ក្នុងការជំរុញឲ្យកុមារអាចប្រឡូកទីផ្សារការងារ និងអភិវឌ្ឍន៍ខ្លួនលំដាប់សាកលនាពេលអនាគត។
មានប្រសាសន៍ក្នុងសន្និសីទសារព៌តមានទាក់ទងកម្មវិធីអប់រំបីភាសា នៃសាលាខាងលើ កញ្ញា XU YUEQIN គ្រូភាសាចិនជំនាញផ្នែកអប់រំកុមារតូច និងគ្រប់គ្រងពាណិជ្ជកម្មបានមានប្រសាសន៍ឲ្យដឹងនាព្រឹកថ្ងៃទី២៩ កញ្ញានេះថា សមត្ថភាពខាងភាសាអាចជួយផ្លាស់ប្តូរផ្នត់គំនិត និងវិធីសាស្ត្រសមរម្យបំផុតក្នុងការប្រាស្រ័យ ទាក់ទងតាមអារម្មណ៍។ ដោយមានការវិនិយោគទុន ពីអ្នកវិនិយោគចិនកាន់តែច្រើន ធ្វើឲ្យភាសាចិនកាន់តែពេញនិយមបណ្តើរៗ ក្នុងពាណិជ្ជកម្មចិន។
-->
កញ្ញាបន្តថា “កុមារដែលរៀនភាសាចិនតាំងពីតូច នឹងមានគុណសម្បត្តិប្រកួតប្រជែងខ្លាំងនាពេលអនាគត។កញ្ញាបន្តថា “ភាសាចិននឹងជួយដល់ការអភិវឌ្ឍកុមារនាពេលអនាគត ថែមទាំងអភិវឌ្ឍន៍ទស្សនវិស័យ នឹងផ្សារភ្ជាប់ជាមួយវប្បធ៌មដ៏សម្បូរបែបរបស់ចិន។
កម្មវិធីសិក្សាបីភាសារបស់ Cambridge International school of Cambodiaនឹងផ្តោតលើភាសាខ្មែរ ភាសាចិន និងភាសាអង់គ្លេស។
លោកស្រី LILET PEPITO នាយិកា Cambridge International School of Cambodia បានថ្លែងថា យើងជឿជាក់ថាភាសាទាំងបីនេះ ជាច្រកទៅកាន់ឳកាសឥតដែនកំណត់ទៅថ្ងៃអនាគត ទោះក្នុងវិស័យការងារទាំងថ្នាក់ជាតិ និងកម្រិតអន្តរជាតិ។
លោកស្រីបន្តថា ដោយសារសាលាមានគោលបំណងចម្បង ក្នុងការស្ថាបនាអ្នកដឹកនាំនិងសហគ្រិននាពេលអនាគត ការសិក្សាភាសាអង់គ្លេសនិងភាសាចិន បន្ថែមលើភាសាខ្មែរកាន់តែបង្ខិតពួកគេឲ្យចូលដល់ពិភពពាណិជ្ជកម្មសាកល។
លោកស្រីបន្តថា “ឧទាហរណ៍ជាក់ស្តែងមួយ លោក Mark Zuckerburg អគ្គនាយកfacebook ក៏រៀនភាសាចិនជាភាសាទី២ របស់គាត់ដែរ”៕
