ដោយ វុត្ថា
ភ្នំពេញ៖ លោកថោង ខុន រដ្ឋមន្ត្រីក្រសួងទេសចរណ៍ បានឱ្យដឹងថា មកដល់ពេលនេះមានស្ដង់ ប្រមាណ១៧៣ស្ដង់ហើយ ដែលសម្រេចចូលរួមក្នុងព្រឹត្តិការណ៍នេះ ហើយបើគិតទាំងប្រតិភូជាអ្នកទិញ អ្នកសារព័ត៌មាន និងអ្នកពាក់ព័ន្ធដទៃទៀតផងនោះ ឃើញថា CTM លើកទី២ មានអ្នកចូលរួមច្រើនជាង CTM លើកទី១ ដល់ទៅជិត ៥៦% ឯណោះ។
នៅក្នុងកិច្ចប្រជុំត្រៀមរៀបចំពិព័រណ៍ទេសចរកម្ពុជាអន្តរជាតិ (CTM) លើកទី២ នៅទីស្តីការក្រសួងទេសចរណ៍ លោក ថោង ខុនបញ្ជាក់ថាពិព័រណ៍ទេសចរកម្ពុជាអន្តរជាតិ (Cambodia Travel Mart= CTM) លើកទី២ ឆ្នាំ២០១៨នេះ នឹងបើកជាផ្លូវការនឹងប្រារព្ធឡើនៅថ្ងៃទី១១ ខែតុលា ឆ្នាំ២០១៨ ខាងមុខ នៅកោះពេជ្រ រាជធានីភ្នំពេញ។
-->
លោកបន្តថា ក្នុងចំណោមស្ដង់ផលិតផលទេសចរណ៍ទាំង១៧៣ស្ដង់ខាងលើ មានស្ដង់របស់ប្រត្តិបត្តិករទេសចរណ៍ក្នុងស្រុក ៧៦% និងស្តង់របស់ដៃគូអន្តរជាតិ ២៤% ដែលសរុបជារួមមានការកើនឡើង ៥៥.៩% បើធៀបនឹងព្រឹត្តិការណ៍ CTM លើកទី១ កាលពីឆ្នាំ២០១៧ នៅខេត្តសៀមរាប។
សម្រាប់ស្ដង់ក្នុងស្រុក នឹងមានការបង្ហាញពីផលិតផលទេសចរណ៍ជាច្រើន ដូចជា សណ្ឋាគារមានចំនួន ២០ស្ដង់ ភ្នាក់ងារ និងប្រតិបត្តិករទេសចរណ៍មានចំនួន ៣៥ស្ដង់ អាកាសចរណ៍មានចំនួន ១៨ស្ដង់ សហគមន៍មានចំនួន ៣ស្ដង់ និងរមណីយដ្ឋាន បញ្ជរទេសចរណ៍ និងផលិតផលទេសចរណ៍ដទៃ ២៦ស្ដង់។ សម្រាប់ដៃគូអន្តរជាតិមានមកពី កូរ៉េខាងត្បូង ថៃ មីយ៉ាន់ម៉ា ហ្វីលីពីន ចិន ឥណ្ឌូណេស៊ីជាដើម។
ចំណែកប្រតិភូជាអ្នកទិញអន្តរជាតិ ដែលនឹងចូលរួមក្នុងពិព័រណ៍ CTM លើកទី២ មានចំនួន ១០០នាក់ មកពី ៦០ប្រទេស និងប្រព័ន្ធផ្សព្វផ្សាយមានសារព័ត៌មានចំនួន ២២នាក់ មកពី១៩ប្រទេស បើគិតត្រឹមថ្ងៃទី២៦ ខែកញ្ញា។
លោករដ្ឋមន្ត្រីក៏បានអំពាវនាវដល់អ្នកពាក់ព័ន្ធទាំងអស់ ដែលមានផលិតផលទេសចរណ៍ និងសេវាទេសចរណ៍ អញ្ជើញមកចូលរួមពិព័រណ៍អន្តរជាតិនេះបន្ថែមទៀត ដើម្បីបង្ហាញពីផលិតផលរបស់ខ្លួន ទៅកាន់ភ្ញៀវទេសចរអន្តរជាតិឱ្យកាន់តែទូលំទូលាយ។
គួរបញ្ជាក់ថា ពិព័រណ៍ទេសចរណ៍កម្ពុជាអន្តរជាតិនេះ ត្រូវបានធ្វើឡើងម្ដងរួចមកហើយ កាលពីឆ្នាំ២០១៧ នៅខេត្តសៀមរាប ជាមួយវត្តមានឯកឧត្តម យឹម ឆៃលី ឧបនាយករដ្ឋមន្ត្រី និងជាប្រធានក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទ, ឯកឧត្តមរដ្ឋមន្ត្រី ថោង ខុន, រដ្ឋមន្ត្រីក្រសួងសណ្ឋាគារ និងទេសចរណ៍មីយ៉ាន់ម៉ា, អភិបាលខេត្តសៀមរាប, ស្ថាប័នទេសចរណ៍ជាតិ, អ្នកទិញ, អ្នកលក់ ភ្នាក់ងារសារព័ត៌មានជាតិ មកពី៦០ប្រទេស៕
