ដោយៈគង់ សូរិយា
ភ្នំពេញៈ រដ្ឋមន្ត្រីក្រសួងទេសចរណ៍ លោកថោង ខុនបានអះអាងថា បុណ្យចូលឆ្នាំថ្មី៣ថ្ងៃ មានភ្ញៀវជិត ៤,៦លាននាក់ បានចេញដើរកម្សាន្តទូទាំងប្រទេស ខណៈអ្នកខ្លះនៅបង្ហើយថ្ងៃអាទិត្យ១ថ្ងៃទៀត។
ប្រសិនជាគិតពីការចំណាយរបស់មនុស្សម្នាក់ ត្រឹម ៥០ដុល្លារក្នុងរយៈពេល៥ថ្ងៃ (រាប់ទាំងថ្ងៃអាទិត្យ) គឺប្រជាជនកម្ពុជាបានចំណាយប្រាក់រហូតដល់ ២៣០លានដុល្លារអាមេរិក ដែលលំហូរសាច់ប្រាក់នេះបានចាក់ចូលគ្រប់ចរន្តនៃសេដ្ឋកិច្ចជាតិ ប៉ុន្តែអ្នកវិភាគមួយចំំនួនបានឲ្យដឹងថា ប្រជាជនកម្ពុជាម្នាក់ចំណាយជាមធ្យមក្នុងរយៈពេល ៤ថ្ងៃនេះ មានទំហំច្រើនជាងនេះ។
-->
យោងតាមរបាយការណ៍របស់ក្រសួងទេសចរណ៍បានបង្ហាញថា ក្នុងនោះតួលេខប្រចាំថ្ងៃ រួមមាន
* ថ្ងៃទី១៖ ភ្ញៀវមានចំនួន៨៦២,៨៩៧នាក់
* ថ្ងៃទី២៖ ភ្ញៀវមានចំនួន១,៥៧៩,២៥១នាក់
* ថ្ងៃទី៣៖ ភ្ញៀវមានចំនួន២,១៤៨,១៧៨នាក់។
គោលដៅទេសចរណ៍សំខាន់ៗរយៈពេល៣ថ្ងៃនេះ រួមមាន៖
* ខេត្តបាត់ដំបង ៥៦៥,៦១៨នាក់
* ខេត្តកំពង់ចាម ៥១៤,៤៤៧នាក់
* ខេត្តសៀមរាប ៤០០,៥៩១នាក់
* ខេត្តបន្ទាយមានជ័យ ៣៨៨,២៧៣នាក់
* ខេត្តព្រៃវែង ៣៨២,៨៦៧នាក់
* ខេត្តកំពង់ស្ពឺ ៣៣១,៨០៩នាក់
* ខេត្តពោធិ៍សាត់ ២៩៨,០៣៧នាក់
* ខេត្តកំពង់ឆ្នាំង ២៧៥,៤០០នាក់
* ខេត្តកំពត ២៥៤,២៧០នាក់
* ខេត្តព្រះសីហនុ ២៣២,២៦៤នាក់
* រាជធានីភ្នំពេញ ២២២,២២០នាក់។
លោកថោង ខុន បានបន្តថា ចរន្តភ្ញៀវនាថ្ងៃចូលឆ្នាំប្រពៃណីជាតិថ្ងៃទី៣នេះ នៅបន្តមានភាពផុសផល និងកុះករកាន់តែច្រើនធៀបនឹងថ្ងៃទី២ម្សិលម៉ិញ។ ជាក់ស្តែង តួលេខថ្ងៃទី៣នេះ បន្តកើនឡើងរហូតដល់ប្រមាណ ៣៦.០២% ធៀបនឹងថ្ងៃទី២។
សរុបថ្ងៃទី១ និងទី២ ចរន្តភ្ញៀវនាពេលចូលឆ្នាំនេះ មានចំនួនច្រើនជាងឆ្នាំ២០១៩ ដែលមិនទាន់មានជំងឺកូវីដ ប៉ុន្តែសម្រាប់ថ្ងៃទី៣នេះ ដោយសារមានភ្លៀងធ្លាក់ពីតិច ទៅច្រើននៅគ្រប់ខេត្ត បានធ្វើឲ្យភ្ញៀវមានចំនួនតិចជាងឆ្នាំ២០១៩។ ដូច្នេះសរុបរយៈពេល៣ថ្ងៃ នៃថ្ងៃចូលឆ្នាំប្រពៃណីជាតិ ឆ្នាំខាល ពុទ្ធសករាជ២៥៦៥ ( ជិតឈានចូល២៥៦៦) មហាសករាជ១៩៤៤ ចុល្លសករាជ១៣៨៤នេះ មានភ្ញៀវប្រហាក់ប្រហែលនឹង៣ថ្ងៃនៃថ្ងៃចូលឆ្នាំប្រពៃណីជាតិខ្មែរកាលពីឆ្នាំ២០១៩ (ដែលមានចំនួនប្រមាណ៤,៧២៦,៦០២នាក់)។
លោកបន្តទៀតថា បណ្តាខេត្តដែលមានរៀបចំ ព្រឹត្តិការណ៍សង្រ្កាន្ត កម្មវិធីកម្សាន្តសប្បាយទាំងពេលថ្ងៃ និងពេលយប់ និងគោលដៅទេសចរណ៍ទាំងអស់បានបើកដំណើរការច្រើន ទទួលភ្ញៀវទេសចរយ៉ាងច្រើនកុះករដូចបានរៀបរាប់ខាងលើ។
លោកថោង ខុន បានបញ្ជាក់ថា តួលេខខាងលើមិនបានរាប់បញ្ចូលប្រជាពលរដ្ឋ ដែលទៅជួបជុំទទួលអាហារ ជាលក្ខណៈក្រុមគ្រួសារនៅតាមអាហារដ្ឋាន និងកន្លែងដែលមានរៀបចំជាខ្យុស (Kiosque) អង្គុយលេងញ៉ាំអាហារ និងចំនួនប្រជាពលរដ្ឋជាច្រើនផ្សេងទៀត ដែលបានរៀបចំជាកម្មវិធីជួបជុំនៅរាំលេងកម្សាន្ត ជះទឹក លាបម្សៅតាមគេហដ្ឋាន និងតាមភូមិស្រុកផងដែរ។
ទោះបីចរន្តភ្ញៀវមានភាពកកកុញយ៉ាងណាក៏ដោយ ប៉ុន្តែកម្លាំងមានសមត្ថកិច្ចទាំងនៅថ្នាក់ជាតិ និងគណៈបញ្ជាការឯកភាពរាជធានីខេត្ត រួមជាមួយកម្លាំងប្រជាការពារ នៅតាមភូមិ ឃុំបានខិតខំប្រឹងប្រែងមិនខ្លាចនឿយហត់ក្នុងការធានាសន្តិសុខ សុវត្ថិភាព សណ្តាប់ធា្នប់ និងចរាចរណ៍ទាំងនៅតាមផ្លូវជាតិ ទីប្រជុំជនក្នុងទីរួមខេត្ត កន្លែងប្រារព្ធកម្មវិធីសង្រ្កាន្ត រួមទាំងគោលដៅទេសចរណ៍នានា ទោះបីប្រឈមនឹងអាកាសធាតុក្តៅ និងហាលភ្លៀងពេលខ្លះក៏ដោយ។
មន្ទីរទេសចរណ៍សហការជាមួយមន្ទីរជំនាញ នៃរដ្ឋបាលរាជធានីខេត្តបានចាត់តាំង ក្រុមការងារចុះប្រចាំការ នៅតាមគោលដៅទេសចរណ៍សំខាន់ៗ ដើម្បីគ្រប់គ្រងចរន្តភ្ញៀវ ការពង្រឹងការអនុវត្តវិធានសុវត្ថិភាព និង SOP ក្នុងការទប់ស្កាត់ការរាលដាលជំងឺកូវីដ-១៩ និងបញ្ចៀសការលក់ឡើងថ្លៃហួសហេតុ និងបញ្ហាបរិស្ថានអនាម័យជាដើម ដែលក្នុងរយៈពេល៣ថ្ងៃនេះហាក់មិនមានបាតុភាពធំដុំណាមួយកើតឡើងទេ។
ជារួម ក្រោមម្លប់នៃសន្តិភាព និងសន្តិសុខពេញលេញលើផ្ទៃប្រទេស និងការអភិវឌ្ឍរីកចម្រើន ឥតឈប់ឈរផ្នែកហេដ្ឋារចនាសម្ពន និងភាពជឿជាក់លើប្រសិទ្ធភាព នៃការចាក់វ៉ាក់សាំង បានធ្វើឲ្យប្រជាពលរដ្ឋមានឱកាសដើរកម្សាន្ត នៅគ្រប់គោលដៅទេសចរណ៍ ទូទាំងប្រទេសនាឱកាស ពិធីបុណ្យចូលឆ្នាំថ្មីនេះ បើទោះបីតំបន់ខ្លះស្ថិតនៅដាច់ស្រយាល ឬនៅឆ្ងាយពីទីប្រជុំជនក្នុងបរិបទ ដែលពិភពលោក នៅបន្តប្រឈមនឹងជំងឺកូវីដ-១៩នៅឡើយ៕
