ដោយៈសុផារី
កោះកុងៈ អាកាសយានដ្ឋានអន្តរជាតិតារាសាគរ ក្នុងស្រុកបុទុមសាគរ ខេត្តកោះកុង បានចាប់ផ្តើមហោះហើរសាកល្បង (Flight validation) ចាប់ពីថ្ងៃទី១៩ខែមេសា រហូតដល់ថ្ងៃទី២៦ ខែមេសាឆ្នាំ២០២២។
អាកាសយានដ្ឋានអន្តរជាតិតារាសាគរចាប់ផ្តើមហោះហើរសាកល្បង ៧ថ្ងៃ
នេះបើតាមការចេញផ្សាយ របស់គម្រោងអាកាសយានដ្ឋានអន្តរជាតិតារាសាគរនៅថ្ងៃទី២១ ខែមេសា ឆ្នាំ២០២២នេះ។
ការសាកល្បងនេះ នឹងនាំឲ្យសេវាហោះហើរពាណិជ្ជកម្មចាប់ផ្តើម ក៏ដូចជារួមចំណែក ដល់ការធ្វើដំណើររបស់អ្នកដំណើរ តាមផ្លូវអាកាសទៅកាន់ខេត្តតំបន់ឆ្នេរមួយនេះ។
កាលពីចុងឆ្នាំកន្លងមក ក្រុមហ៊ុនសាងសង់បានអះអាងថា អាកាសយានដ្ឋាននេះ នឹងត្រៀមខ្លួនរួចរាល់ ដើម្បីចាប់ផ្តើមប្រតិបត្តិការពាណិជ្ជកម្មនៅពាក់កណ្តាលឆ្នាំ២០២២ ហើយអគារស្ថានីយនេះ មានសមត្ថភាពអាចគ្រប់គ្រងចលនាអ្នកដំណើររហូតដល់កន្លះលាននាក់។
គម្រោងព្រលានយន្តហោះនេះ បានវិនិយោគក្នុងទំហំទឹកប្រាក់៣៥០លានដុល្លារ ដោយក្រុមហ៊ុនចិន Tianjin Union Development Group (UDG)។
គម្រោងនេះ គ្របដណ្តប់លើផ្ទៃដី ៤៥០ហិចតា នៅស្រុកបទុមសាគរ ក្បែរឈូងសមុទ្រថៃ រួមទាំងផ្លូវរត់ប្រវែង៣.៨០០ម៉ែត្រ និងផ្លូវរត់ពីរ ៣.២០០ម៉ែត្រ។
ផែនការទាំងមូលនៃព្រលាននេះ ចែកចេញជាបួនដំណាក់កាល នៃការអភិវឌ្ឍន៍ និងការសាងសង់ ហើយនៅពេលអនាគត វានឹងសម្រេចបាននូវកម្រិតជើងហោះហើរអន្តរជាតិខ្ពស់បំផុត4F រួមទាំងយន្តហោះ Boeing 777 និង Airbus A340 ផងដែរ៕
