ដោយ វុត្ថា
ភ្នំពេញ៖ ក្នុងគោលដៅបន្តឧត្តមភាពរបស់ខ្លួន ប្រទេសម៉ាឡេស៊ីកំពុងសាងសង់អគារពាណិជ្ជកម្មខ្ពស់កប់ពពកមួយទៀត នៅចំណ្តាលទីក្រុង Kuala Lumpur ដែលមានកំពស់រហូតដល់៦០៨ ម៉ែត្រ ស្មើនឹង១១០ជាន់ ដែលជាអគារខ្ពស់បំផុតនៅក្នុងតំបន់អាស៊ាន។
អគារនេះមានឈ្មោះថា Trade winds Square Tower A ត្រូវបានគេចាប់ផ្តើមបុកគ្រឹះសាងសង់នៅក្នុងឆ្នាំ២០១៦ គ្រោងនឹងបញ្ចប់សាងសង់នៅក្នុងឆ្នាំ២០២០ ឬ ២០២២ខាងមុនេះ ។ អគារនេះត្រូវបានស្នើរសាងសង់ ដោយក្រុមហ៊ុនTradewinds Corporation Sdn Bhd ។ តាមគម្រោងអគារនេះ សម្រាប់ប្រើប្រាស់ចម្រុះដូចជា ការិយាល័យ សណ្ឋាគារ និងផ្សារទំនើបជាដើម។
-->
បន្ថែមពីនេះ ទីក្រុងកូឡាឡាំពួរ ក៏បាននិងកំពុងសាងសង់គម្រោងសាងសង់អគារខ្ពស់កប់ពពក ដែលបានស្នើរឡើង និងកំពុងសាងសាងសង់ជាច្រើនផងដែរ ដូចជាមជ្ឈមណ្ឌលPlaza Rakyat មានកំពស់៤០០ម៉ែត្រ។ គម្រោងមជ្ឈមណ្ឌល Butkit Bintang City Center កំពស់ ៤០០ ម៉ែត្រជាប្រភេទ ការិយាល័យ សណ្ឋាគារ និងកន្លែងស្នាក់នៅ ដូចគ្នា គម្រោង សាងសង់អគារ Landmark Tower មានកំពស់៤០០ម៉ែត្រ និងគម្រោងមជ្ឍមណ្ឌលពាណិជ្ជកម្ម EkoPark Place ជាដើម។
ទីក្រុង Kuala Lumpur គឺជាទីក្រុងដែលមានអគារខ្ពស់កពពក លូតលាស់ជាច្រើន ក្នុងរយៈពេលប៉ុន្មានឆ្នាំចុងក្រោយនេះ ដោយមិនចាញ់ទីក្រុងមួយចំនួននៅក្នុងតំបន់អាស៊ាន ដូចជាទីកក្រុងបាងកក ទីក្រុងហូជីមិញ ទីក្រុងហ្សាកាតា និងទីក្រុង សឹង្ហបុរីជាដើម។
ចាប់តាំងពីឆ្នាំ ២០១០កន្លងមក ទីក្រុងកូឡាឡាំពួរ គឺជាកន្លែងដែលមានសំណង់អគារខ្ពស់កប់ពពករីកលូតលាស់កើនឡើង ដែលមានកំពស់បំផុត៦០០ម៉ែត្រ ។ ទិសដៅសំខាន់របស់ទីក្រុងកូឡាឡាំពួរ គឺក្រោយឆ្នាំ២០២០ខាងមុខនេះ ទីក្រុងនេះនឹងមានអគារខ្ពស់កពពកដុះច្រូងច្រាង ខណៈមានគម្រោងជាច្រើនកំពុងតែសាងសង់ ពោលគឺមិនចាញ់ទីក្រុងឌុបៃ ដែលគេចាត់ទុកថា ជាទីក្រុងដែលមានអគារខ្ពស់កប់ពពកដុះច្រើនជាងគេនៅក្នុងពិភពលោកនោះទេ៕
