ដោយៈ ម៉ាណា

    ព្រះសីហនុៈ លោកអភិបាលរងខេត្តព្រះសីហនុ បានលើកឡើងថា ដោយផ្អែកលើសក្តានុពលដ៏ពិសេសរបស់ខេត្ត លោកមានជំនឿយ៉ាងមុតមាំថា ខេត្តព្រះសីហនុនឹងបន្តពង្រឹងតួនាទីរបស់ខ្លួន ជាមជ្ឈ​មណ្ឌលវិនិយោគ ពាណិជ្ជកម្ម ដឹកជញ្ជូន និងសេវាកម្មដ៏សំខាន់ ទាំងក្នុងប្រទេស និងក្នុងតំបន់។

កត្តាទាំងនេះ នឹងជំរុញបង្កើតបរិយាកាសប្រកួតប្រជែងខ្ពស់ និងអំណោយផលសម្រាប់វិនិយោគិនលើគ្រប់វិស័យ។

លោកឯម ភាព អភិបាលរងខេត្ត បានលើកឡើងដូចនេះ នៅក្នុងកម្មវិធីដំណើរទេសចរណ៍ ស្វែងរកឱកាសវិនិយោគ កម្ពុជា-ចិន នៅខេត្តព្រះសីហនុ ស្របពេលដែលរាជរដ្ឋាភិបាលកម្ពុជា បានសម្រេចបន្តអនុវត្ត “កម្មវិធីពិសេសជំរុញការវិនិយោគ ក្នុងខេត្តព្រះសីហនុ”។

រហូតដល់បំណាច់ឆ្នាំ២០២៧ ដើម្បីបន្តលើកទឹកចិត្ត និងទាក់ទាញវិនិយោគិនបន្ថែមមកកាន់ខេត្ត។ កម្មវិធីនេះត្រូវបានរៀបចំឡើង នារសៀលថ្ងៃទី១៨ ខែមីនា ឆ្នាំ២០២៦ នៅសណ្ឋាគារ អាជូណា សូលីទ័រ៕

ដោយៈ ម៉ាណា

    កំពង់ឆ្នាំងៈ មានចម្ងាយប្រមាណ៩០គីឡូម៉ែត្រពីរាជធានីភ្នំពេញ ខេត្តកំពង់ឆ្នាំងពីមុនមក គ្រាន់តែជាតំបន់ឆ្លងកាត់នៃបណ្តាញផ្លូវវែងជាងគេនៅកម្ពុជាប៉ុណ្ណោះ។

    ប៉ុន្តែខេត្តនេះធ្លាប់ត្រូវបានអ្នកជំនាញការជប៉ុនសិក្សា និងរកឃើញថា វាជាHubនៃការធ្វើពាណិជ្ជកម្ម និងស្តុកទំនិញដ៏មានសក្តានុពលមួយរបស់កម្ពុជា។

ដោយឆ្លើយតបនឹងការសិក្សានេះ រដ្ឋាភិបាលសម្រេចបង្កើត “កំពង់ផែពហុបំណង និងមណ្ឌលភស្តុភាកម្មកំពង់ឆ្នាំង” ដើម្បីបម្រើសេវាកម្មដឹកជញ្ជូនតាមផ្លូវទឹក និងការផ្ទេរផ្ទុកទំនិញសម្រាប់នាវាចរណ៍អន្តរជាតិ។ កំពង់ផែនេះ មានសមត្ថភាពផ្តល់សេវាកម្មសម្រាប់ទំនិញឆ្លងកាត់ប្រមាណ២លានតោនក្នុងមួយឆ្នាំ។

កំពង់ផែថ្មីនេះ មានទីតាំងនៅភូមិចំបក់ខ្ពស់ ឃុំស្វាយរំពារ ស្រុកកំពង់លែង ខេត្តកំពង់ឆ្នាំង។

យោងតាមអនុក្រឹត្យ ចុះហត្ថលេខាដោយនាយករដ្ឋមន្ត្រី ហ៊ុន ម៉ាណែត នាថ្ងៃទី១៣ ខែមីនា បានបញ្ជាក់ថា​​ កំពង់ផែពហុបំណង និងមណ្ឌលភស្តុភាកម្មកំពង់ឆ្នាំង ត្រូវបានបង្កើតឡើង ដើម្បីបម្រើឱ្យនាវាដែលធ្វើនាវាចរណ៍ ជាលក្ខណៈអន្តរជាតិអាចចូលចេញ បោះយុថ្កា ផ្ទេរផ្ទុក និងលើកដាក់ទំនិញទូទៅ រួមទាំងកុងតឺន័រ និងទំនិញចាក់ធារ។

តាមអនុក្រឹត្យដដែល កំពង់ផែនេះ មានទាំងដែនទឹក និងដីគោក។ ដែនទឹកនៃកំពង់ផែ ត្រូវបានកំណត់ជាពីរផ្នែក ដែលជាទ្រព្យសម្បត្តិសាធារណៈរបស់រដ្ឋ។ ផ្នែកទី១មានទំហំ៩០,៤៧១,៨៦ ម៉ែត្រការ៉េ ស្ថិតតាមច្រាំងទន្លេ ដែលជ្រុងសងខាងនីមួយៗមានប្រវែង១០០ ម៉ែត្រ និងមានប្រវែងសរុប៩២៩,៤៦ម៉ែត្រ តាមបណ្តោយទន្លេ។

ចំណែកផ្នែកទី២ មានទំហំ ១៣២,០០០,៧៧ ម៉ែត្រការ៉េ ស្ថិតជាប់កោះឫស្សី ដែលជ្រុងសងខាងនីមួយៗមានប្រវែង១២០ម៉ែត្រ និងមានប្រវែង១១០០ម៉ែត្រ តាមបណ្តោយកោះ។

ដីគោកនៃកំពង់ផែនេះ ក៏ត្រូវបានបែងចែកជាពីរផ្នែកផងដែរ។ ផ្នែកទី១ ជាកម្មសិទ្ធិឯកជនរបស់ក្រុមហ៊ុនខេអិលភី.ធី ត្រេនស្ទ័រថេសិន ឯ.ក មានទំហំ២២០,៧២៣,៣០ម៉ែត្រការ៉េ។ ផ្នែកទី២ ជាទ្រព្យសម្បត្តិសាធារណៈរបស់រដ្ឋ ស្ថិតនៅលើដីកោះឫស្សី ក្នុងទន្លេសាប មានទំហំ ១៣៨,០១៣,៨៦ ម៉ែត្រការ៉េ។នៅក្នុងគម្រោងនេះ ក៏មានស្ពានតភ្ជាប់រវាងដីគោក និងកោះ ដើម្បីធានាការតភ្ជាប់ និងប្រតិបត្តិការដឹកជញ្ជូនឱ្យមានប្រសិទ្ធភាពផងដែរ។

ហេដ្ឋារចនាសម្ព័ន្ធកំពង់ផែរួមមាន ចំណតនាវា ទីលានស្តុកទំនិញ ទីលានស្តុកកុងតឺន័រ ឃ្លាំងស្តុកទំនិញ អគាររដ្ឋបាល អគារត្រួតពិនិត្យទំនិញ ជញ្ជីងថ្លឹងរថយន្ត និងប្រព័ន្ធសុវត្ថិភាពផ្សេងៗ។ កំពង់ផែពហុបំណងកំពង់ឆ្នាំងនេះ ក៏មានកន្លែងបោះយុថ្កា កន្លែងបត់នាវា និងសញ្ញាជំនួយនាវាចរណ៍ ដើម្បីធានាសុវត្ថិភាព សន្តិសុខ និងការការពា របរិស្ថាន សម្រាប់ប្រតិបត្តិការនាវាចរណ៍នៅក្នុងតំបន់។

ក្នុងការគ្រប់គ្រង និងដំណើរការកំពង់ផែនេះ រាជរដ្ឋាភិបាលបានកំណត់ឱ្យក្រុមហ៊ុន ខេអិលភី.ធី ត្រេនស្ទ័រថេសិន ឯ.ក ធ្វើជាអង្គគ្រប់គ្រង ដែលមានភារកិច្ចរៀបចំផែនការអភិវឌ្ឍ ការសាងសង់ ឬជួសជុលកំពង់ផែ ការគ្រប់គ្រងហេដ្ឋារចនាសម្ព័ន្ធ និងការប្រមូលថ្លៃសេវាកម្មកំពង់ផែស្របតាមបទប្បញ្ញត្តិជាធរមាន។

ជាមួយគ្នានេះ កំពង់ផែពហុបំណង និងមណ្ឌលភស្តុភាកម្មកំពង់ឆ្នាំង នឹងមានមន្ត្រីមានសមត្ថកិច្ចប្រចាំការផងដែរ ដូចជា មន្ត្រីចត្តាឡីស័ក មន្ត្រីនគរបាលអន្តោប្រវេសន៍ មន្ត្រីគយ និងរដ្ឋាករកម្ពុជា ព្រមទាំងមន្ត្រីរដ្ឋបាលខេត្ត និងមេបញ្ជាការផែ ដើម្បីអនុវត្តច្បាប់ និងគ្រប់​គ្រងប្រតិបត្តិការដឹកជញ្ជូនតាមផ្លូវទឹក។

ការបង្កើតកំពង់ផែពហុបំណងនេះ ត្រូវបានរំពឹងថា នឹងរួមចំណែ​កពង្រឹងប្រព័ន្ធដឹកជញ្ជូនតាមផ្លូវទឹកនៅកម្ពុជា និងបង្កើនសមត្ថភាពដឹកជញ្ជូនទំនិញនៅតំបន់ទន្លេសាប ក៏ដូចជាជំរុញសកម្មភាពសេដ្ឋកិច្ច និងភស្តុភាកម្មនៅក្នុងតំបន់កំពង់ឆ្នាំង និងតំបន់ជិតខាង៕

​

ដោយៈ ចំណាន

    ភ្នំពេញៈ មន្រ្តីជាន់ខ្ពស់រដ្ឋាភិបាលបានបញ្ជាក់ថា យើងអាចវាយតម្លៃប្រកបដោយការជឿជាក់ថា ប្រព័ន្ធហិរញ្ញវត្ថុសាធារណៈរបស់កម្ពុជា បាននិងកំពុងមានការវិវឌ្ឍរីកចម្រើនល្អ និងស្ថិតលើមាគ៌ាដ៏ត្រឹមត្រូវ។

ការសម្រេចបាននេះអនុលោមភាពកាន់តែខ្ពស់ ឆ្លើយតបទៅតាមស្តង់ដាអន្តរជាតិ ដែលធានាបានកាន់តែប្រសើរនូវប្រសិទ្ធភាព ស័ក្តិសិ​ទ្ធិភាព តម្លាភាព និង គណនេយ្យភាព ក្នុងបរិបទកម្ពុជា ហើយមានភាពបត់បែន និងធន់ទៅនឹងការប្រែប្រួលនៃស្ថានភាពសង្គម-សេដ្ឋកិច្ច ក្នុងតំបន់ និងលើសកលលោក។

ព័ត៌មាននេះត្រូវបានលើកឡើង នៅក្នុងឱកាសលោកអគ្គបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងជាប្រធានគណៈកម្មាធិការដឹកនាំ ការងារកែទម្រង់ការគ្រប់គ្រងហិរញ្ញវត្ថុសាធារណៈ (គ.ហ.ស.) បានចូលរួមជាអធិបតីដ៏ខ្ពង់ខ្ពស់ ក្នុងកម្មវិធីបើកកិច្ចប្រជុំត្រួតពិនិត្យប្រចាំឆ្នាំ២០២៥ នៃការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី៤ “គណ​នេយ្យភាពសមិទ្ធកម្ម”៕

ដោយ: សហសេវិក
អន្តរជាតិ: រដ្ឋមន្ត្រីសម្របសម្រួលកិច្ចការសេដ្ឋកិច្ច លោក Airlangga Hartarto បានលើកឡើងថា ឥណ្ឌូនេស៊ីអាចក្លាយជាប្រទេសមួយក្នុងចំណោមប្រទេសដែលមានសេដ្ឋកិច្ចធំជាងគេទាំង៥ របស់ពិភពលោកនៅឆ្នាំ២០៥០ ប្រសិនបើប្រទេសនេះរក្សាបាននូវសន្ទុះកំណើនសេដ្ឋកិច្ចបច្ចុប្បន្ន និងកំណែទម្រង់។

លោក Airlangga បានបង្ហាញសុទិដ្ឋិនិយមចំពោះកំណើនសេដ្ឋកិច្ចរបស់ប្រទេសឥណ្ឌូនេស៊ីនៅឆ្នាំ២០២៦ ដោយអាចកើនឡើងប្រហែល៥,៤ភាគរយ។ មូលដ្ឋានគ្រឹះនៃសេដ្ឋកិច្ចនៅតែមានស្ថិរភាព ដែលបានបង្ហាញឱ្យឃើញដោយអតិរេកពាណិជ្ជកម្មរយៈពេល៦៩ខែជាប់ៗគ្នា ទុនបម្រុងអន្តរជាតិ និងការគ្រប់គ្រងបាននូវអតិផរណា។

រដ្ឋាភិបាលឥណ្ឌូនេស៊ីកំពុងពន្លឿនយុទ្ធសាស្ត្រមួយដើម្បីពង្រឹងការសម្របសម្រួលរវាងវិស័យសាធារណៈ និងឯកជន ដោយលើកកម្ពស់ឧស្សាហូបនីយកម្ម បរិវត្តកម្មឌីជីថល និងការអភិវឌ្ឍសេដ្ឋកិច្ចបៃតង។

អាទិភាពគោលនយោបាយសំខាន់ៗ រួមមានហេដ្ឋារចនាសម្ព័ន្ធយុទ្ធសាស្ត្រ ធនធានរ៉ែ ការអភិវឌ្ឍយានយន្តអគ្គិសនី ថាមពលកកើតឡើងវិញ និងការពង្រឹងខ្សែសង្វាក់ផ្គត់ផ្គង់ក្នុងស្រុក។

លោក Airlangga បានសង្កត់ធ្ងន់ថា ប្រទេសឥណ្ឌូនេស៊ីបានត្រៀមខ្លួនរួចជាស្រេចដើម្បីពង្រីកកិច្ចសហប្រតិបត្តិការជាមួយដៃគូក្នុងតំបន់ ជាពិសេសនៅក្នុងក្របខ័ណ្ឌអាស៊ាន និងកិច្ចព្រមព្រៀងពាណិជ្ជកម្មសេរី ដើម្បីបង្កើនភាពធន់នៃសេដ្ឋកិច្ចពិភពលោក ស្របពេលមានការប្រែប្រួលភូមិសាស្ត្រនយោបាយ។

លោក​អះអាង​ថា ទ្វីបអាស៊ី​អាចឈានទៅក្លាយ​ជា​មហាអំណាច​សេដ្ឋកិច្ច​ដ៏ចម្បង​របស់​ពិភពលោក ប្រសិនបើ​អាសុីបន្ត​ប្តេជ្ញា​ចិត្ត​ចំពោះ​កិច្ច​សហប្រតិបត្តិការ​ក្នុង​តំបន់​ប្រកបដោយភាព​បើកចំហ ​និង​បរិយាបន្ន។ តំបន់​នេះ​ត្រូវ​បាន​ព្យាករ​ថា​ នឹង​ចូល​រួម​ចំណែក​ប្រហែល៥២ភាគរយនៃ​ផលទុនជាតិ​សរុប​របស់ពិភពលោក​នៅ​ត្រឹម​ឆ្នាំ២០៥០។

លោកបានបញ្ជាក់ថា នៅឆ្នាំ២០៥០ ប្រទេសចិនអាចសម្រេចបានទំហំ GDP ចំនួន ៥៨ទ្រីលានដុល្លារ ឥណ្ឌា ចំនួន ៤៤ទ្រីលានដុល្លារ ខណៈឥណ្ឌូនេស៊ីត្រូវបានគេរំពឹងថា នឹងសម្រេចបានទំហំ GDP ចន្លោះពី ១០ទៅ១១ ទ្រីលានដុល្លារ៕ប្រភព: VNA៕

ដោយៈ ចំណាន

    ភ្នំពេញៈ ក្រុមហ៊ុនOlam Food Ingredients (OFI) ប្រចាំប្រទេសវៀតណាម បានមកសិក្សានិងស្វែងរកឱកាសវិនិយោគលើការកែច្នៃគ្រាប់ស្វាយចន្ទីរនៅកម្ពុជា។

ព័ត៌មាននេះ ត្រូវបានលើកឡើងក្នុងឱកាសលោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម អនុញ្ញាតជូន ​ លោក Gaurav Patil  អនុប្រធានជាន់ខ្ពស់ និងជានាយកក្រុមហ៊ុន Olam Food Ingredients (OFI) ប្រចាំប្រទេសវៀតណាម ចូល​ជួប​សម្តែងការ​គួរសម​ និង​ពិភាក្សាការងារ។

ក្នុងកិច្ចជំនួបនេះ លោក Gaurav Patil  អនុប្រធានជាន់ខ្ពស់ និងជានាយកក្រុមហ៊ុន Olam Food Ingredients (OFI) ប្រចាំប្រទេសវៀតណាម បាន​ជម្រាប​ជូន​ថា ក្រុមហ៊ុន Olam Food Ingredients (OFI) ប្រចាំប្រទេសវៀតណាម គឺជា​បុត្រសម្ព័ន្ធ​របស់​ក្រុមហ៊ុន​ Olam Group ដែលជា​ក្រុមហ៊ុន​ដ៏ធំមួយ​ មាន​ទីស្នាក់ការ​កណ្តាល​​នៅ​ប្រទេស​សិង្ហបុរី​ និង​​កំពុងមាន​ប្រតិបត្តិការ​ជាង​៦០ប្រទេស​ ដោយ​មាន​ជំនាញអាជីវកម្មម្ហូបអាហារ និងកសិ-ពាណិជ្ជកម្មឈានមុខគេ ដែលបានផ្គត់ផ្គង់ដល់អតិថិជននៅទូទាំងពិភពលោក។

បន្ថែមពីនេះ ក្រុមហ៊ុន​ Olam Group ក៏បានចុះបញ្ជីបង្កើតក្រុមហ៊ុន​ Olam Outspan (Cambodia) នៅកម្ពុជាផងដែរ តាំងពីឆ្នាំ២០១៧ ក្នុង​ទិសដៅ​​បន្ត​​ជំរុញ និង​ពង្រីក​វិសាល​ភាព​វិនិយោគ​បន្ថែម​ទៅលើការកែច្នៃ​ស្វាយចន្ទីកម្ពុជា​ និង​​ដំណាំ​សក្តានុពល​កម្ពុជា​បន្ថែម​ទៀត រួមមាន​ ស្វាយ​ ទុរេន​ ម្នាស់ជាដើម​​។

លោក​បានបន្ថែមថា ដោយពិនិត្យឃើញអំពីសក្តានុពលដ៏សម្បូរបែបនៅកម្ពុជា ជាមួយនឹងស្ថិរភាពនៃស្ថានភាពសេដ្ឋកិច្ច និងនយោ​បាយ ក្រុមហ៊ុន​OFI មាន​បំណង​ពង្រីកការវិនិយោគបន្ថែមនៅក្នុងព្រះរាជាណាចក្រកម្ពុជា ជាពិសេសការកែច្នៃស្វាយចន្ទីនេះផ្ទាល់ ព្រមទាំងបានស្នើសុំពង្រឹង​កិច្ច​សហការ ​ជាមួយ​ក្រសួង​ពាណិជ្ជកម្ម ​ដើម្បី​ពិនិត្យលទ្ធភាព ក្នុង​ការបង្កើតយន្តការអំណោយផល ដើម្បី​ជំរុញ​ការ​កែច្នៃ​ផលិត​ផល​សក្តានុពល​កម្ពុជា ​ឱ្យ​កាន់តែ​សម្បូរបែបជាបន្តបន្ទាប់​នាពេល​អនាគតផងដែរ​​។​

ជាកិច្ចឆ្លើយតប លោកជំទាវរដ្ឋមន្ត្រី បានស្វាគមន៍ លោក Gaurav Patil  អនុប្រធានជាន់ខ្ពស់ និងជានាយកក្រុមហ៊ុនOlam Food Ingredients (OFI) ប្រចាំប្រទេសវៀតណាម ចំពោះទំនុកចិត្តក្នុងការវិនិយោគ និងពង្រីកសកម្មភាពអាជីវកម្មនៅកម្ពុជា និងបានឯកភាពបន្តកិច្ចសហប្រតិបត្តិការជិតស្និទ្ធ ក្នុងការលើកកម្ពស់ជំរុញ និងអភិ​វឌ្ឍវិស័យកែច្នៃស្វាយចន្ទីកម្ពុជា និងផលិតផលសក្តានុពលផ្សេងទៀតឱ្យកាន់តែរីកចម្រើនបន្ថែមទៀត៕