ដោយៈ គង់ សូរិយា
កណ្តាលៈ រមណីយដ្ឋានភូមិផ្កាត្រកួន ដែលជាបណ្តុះសហគមន៍បែបស៊ីវិល័យមួយ នាជាយរាជធានីភ្នំពេញ កំពុងចាប់ផ្តើមរៀបចំស្វាគមន៍ភ្ញៀវទេសចរណ៍មកសម្រាកកំសាន្ត និងអាចរៀបចំពិធីជប់លៀងនានាបានផងដែរ។
រមណីយដ្ឋាននេះ មានភាពល្បីល្បាញ ដោយសារការរៀបចំហេដ្ឋារចនាសម្ព័ន្ឋ នគរូបនីយកម្មបែបសហសម័យ មានបឹងធម្មជាតិ កន្លែងស្ទូចត្រី កន្លែងញាំអាហារពោរពេញ ដោយភាពមនោរម្យ ស្របពេលអ្នកមានជីវភាពធូរធារកាន់តែច្រើន បានទិញដី និងសាងសង់ផ្ទះលំហែរនៅភូមិនេះយ៉ាងព្រោងព្រាត។
ម្ចាស់រមណីយដ្ឋានភូមិផ្កាត្រកួន លោកឌិន សុមេធារិទ្ឋបានមានប្រសាសន៍ឲ្យដឹងតាមបណ្តាញតេឡេក្រាម នៅរសៀលថ្ងៃទី២១ កក្កដានេះថា កន្លងមក ភូមិបានចាប់ផ្តើមផ្តល់សេវាកម្មស្នាក់នៅជាថ្មី ដោយយើងមានអាគារស្នាក់នៅរួម ដែលអាចឲ្យមនុស្សគេងបានជាង១០០នាក់ មានវីឡាជួលជាលក្ខណៈគ្រួសារ ដែលមាន៦វីឡា ដែលវីឡានិមួយៗមានពីរ ទៅបីបន្ទប់។
ជាមួយគ្នានេះ រមណីយដ្ឋានក៏ផ្តល់សេវាកម្ម រៀបចំពិធីជប់លៀង តូច ធំបានផងដែរ។
លោកបន្តថា លើសពីនេះ យើងមានសាលប្រជុំតូច និងធំ ដែលអាចដាក់មនុស្សបានជាង៣០០នាក់ ពិសេសយើងមានកន្លែងអាចរៀបចំរត់ម៉ារ៉ាតុង ដែលមានចម្ងាយប្រមាណ១០គីឡូម៉ែត្រទៀតផង។
រមណីយដ្ឋានភូមិផ្កាត្រកួន បាននិងកំពុងក្លាយជាកន្លែងទាក់ទាញភ្ញៀវទេសចរណ៍ជាតិ អន្តរជាតិទៅទស្សនា និងសំរាកលំហែរជាបន្តបន្ទាប់ ស្របពេលសាលប្រជុំ ក៏បានបើកទ្វារស្វាគមន៍សហគ្រិននានា ដើម្បីរៀបចំកម្មវិធីប្រជុំ និងសិក្ខាសាលាផ្សេងៗផងដែរ។
រមណីយដ្ឋានភូមិផ្កាត្រកួន ស្ថិតនៅក្នុងស្រុកស្អាង ខេត្តកណ្តាល មានចម្ងាយប្រមាណ២៥គីឡូម៉ែត្រ ភាគខាងត្បូងរាជធានីភ្នំពេញ។ ប្រជាពលរដ្ឋចង់ទៅទស្សនា ឬសំរាកលំហែរនៅភូមិនេះ អាចស្វែងរក តាមរយៈgoogle Map បានយ៉ាងងាយ៕
