ដោយៈ សុផារី

បាត់ដំបងៈ ផ្ទៃដីជាង១ម៉ឺនហិកតា នៃផ្នែកខ្លះនៃស្រុកកំរៀង និងស្រុកសំឡូត ខេត្តបាត់ដំបង ត្រូវបានកាត់ឱ្យស្ថិតនៅក្រោមការគ្រប់គ្រង របស់រដ្ឋបាលខេត្តប៉ៃលិនវិញ ក្រោយពីសម្តេចតេជោ ហ៊ុន សែន បានណែនាំនិងទុកពេលឲ្យចំនួន២សប្តាហ៍ រឿងព្រំប្រទល់មិនច្បាស់លាស់ រវាងខេត្តប៉ៃលិន និងខេត្តបាត់ដំបង។

អភិបាលខេត្តប៉ៃលិន លោកស្រី បាន ស្រីមុំ និងក្រុមការងារអញ្ជើញដឹកនាំមន្ត្រីជំនាញចូលរួម ក្នុងកិច្ចប្រជុំពិភាក្សាស្តីពី សំណើសុំកែសម្រួលព្រំប្រទល់រដ្ឋបាលរវាងខេត្តប៉ៃលិន និងខេត្តបាត់ដំបង កាលពីថ្ងៃទី១៩ ខែតុលា ដោយមានការចូលរួមពីលោក សក់ សេដ្ឋា រដ្ឋលេខាធិការប្រចាំការ ក្រសួងមហាផ្ទៃ។

ក្នុងកិច្ចប្រជុំនេះ បានកំណត់យ៉ាងច្បាស់លាស់ រវាងព្រំប្រទល់ខេត្តទាំងពីរ មិនឱ្យស្រពិចស្រពិលដូចមុនទៀតឡើយ គឺដើម្បីបំរើដល់ផលប្រ​យោជន៍ប្រជាពលរដ្ឋ កុំឱ្យមានការលំបាកដូចមុនទៀត ដោយបានឯកភាពគ្នា កាត់ដីជាង១ម៉ឺនហិកតា នៃផ្នែកខ្លះនៃស្រុកកំរៀង និងស្រុកសំឡូត ខេត្តបាត់ដំបងឱ្យស្ថិតនៅក្រោមការគ្រប់គ្រង របស់រដ្ឋបាលខេត្តប៉ៃលិនវិញ។

លោកស្រីបាន ស្រីមុំ អភិបាលខេត្តប៉ៃលិន បានមានប្រសាសន៍ឲ្យអ្នកយកព័ត៌មានដឹងនៅល្ងាចថ្ងៃទី១៩ ខែតុលាកន្លងមកថា ព្រំប្រទល់ ដែលខេត្តប៉ៃលិន បានស្នើសុំកែសម្រួលលើចំណុចមួយចំនួនដូចជា ទី១.ត្រង់ចំណុចភូមិឡាក់ហុកពីរ និងភូមិបឹងអូរជាង ឃុំកំរៀង ចូលព្រំដីនៅក្នុងខេត្តបាត់ដំបង មានទំហំ១.៣៧៦ហិកតា។ ទី២ ស្នើសុំកែសម្រួលត្រង់ចំណុចភូមិកំពង់ចម្លងក្រោម ឃុំតាក្រី ចូលព្រំដី ក្នុងខេត្តបាត់ដំបង មានទំហំ៣.៦១៨ហិកតា និងទី៣ ស្នើសុំកែសម្រួលតាមគោលធម្មជាតិ (ស្ទឹង) ត្រង់ចំណុចភ្នំដំបង និងអូរស្លេវ ឃុំមានជ័យ ស្រុកសំឡូត ចូលព្រំដីក្នុងខេត្តបាត់ដំបង មានទំហំ៦.៦៨៥ហិកតាផងដែរ។

លោកស្រី បាន ស្រីមុំ បានបញ្ជាក់ដែរថា ការកែសម្រួលព្រំប្រទល់រដ្ឋបាលរវាងខេត្តប៉ៃលិន និងខេត្តបាត់ដំបង គឺដើម្បីប្រសិទ្ធភាពក្នុងការគ្រប់​គ្រងសន្តិសុខ សណ្ដាប់ធ្នាប់ ការផ្ដល់សេវារដ្ឋបាល សេវាសាធារណៈ និងការអភិវឌ្ឍមូលដ្ឋាន របស់ខ្លួននីមួយៗ ហើយចំពោះនីតិវិធីនៃការកែសម្រួលព្រំប្រទល់នេះ គឺត្រូវធ្វើឡើងដោយព្រះរាជក្រឹត្យ ស្របតាមច្បាប់កំណត់ និងយកគោលធម្មជាតិដែលមានស្ទឹងសង្កែ និងស្ទឹងមង្គលបូរី ក្នុងការកំណត់ជាព្រំប្រទល់រដ្ឋបាល រវាងខេត្តប៉ៃលិន និងខេត្តបាត់ដំបង។

ផ្ទៃដីដែលត្រូវកែសម្រួលផ្ទៀងផ្ទាត់កាត់តម្រឹម ព្រំប្រទល់រដ្ឋបាលជាក់លាក់ជាថ្មីឡើងវិញ រវាងខេត្តបាត់ដំបង និងខេត្តប៉ៃលិន ក្នុងនោះយ៉ាងហោ​ចណាស់ផ្ទៃដីប្រមាណជាង១ម៉ឺនហិកតា ដែលស្ថិតនៅក្នុងភូមិសាស្ត្ររដ្ឋបាលខេត្តបាត់ដំបង ត្រូវផ្ទេរប្រគល់ទៅខាងរដ្ឋបាលខេត្តប៉ៃលិន កាន់កាប់វិញចំនួន៣ទីតាំងនិង៣ស្រុក ក្រោយពីចុះហត្ថលេខាទទួលស្គាល់ព្រំប្រទល់កែសម្រួលរួចហើយនោះ៕

ដោយ៖ សុផារី

សៀមរាប៖ សម្តេចតេជោ ហ៊ុន សែន ណែនាំឱ្យរើសាលាស្រុកបន្ទាយស្រី មកដាក់នៅតំបន់អភិវឌ្ឍន៍រុនតាឯក ចំណែកសាលាស្រុកអង្គរធំ ទៅនៅតំបន់អភិវឌ្ឍន៍ពាក់ស្នែង។

សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងក្នុងឱកាសជួបសំណេះសំណាលជាលើកទី៣ ជាមួយប្រជាពលរដ្ឋ ដែលបានស្ម័គ្រចិត្តរើលំនៅឋាន និងសំណង់ផ្សេងៗចេញពីតំបន់រមណីយដ្ឋានអង្គរ និងតំបន់ ស្ថិតក្រោមការគ្រប់គ្រងរបស់អាជ្ញាធរជាតិអប្សរា ទៅតាំងទីលំនៅនៅតំបន់អភិវឌ្ឍន៍រុនតាឯក នៅព្រឹកថ្ងៃសុក្រ ទី២១ ខែតុលា ឆ្នាំ២០២២នេះ។

ការផ្លាស់ប្តូរទីតាំងនេះធ្វើឡើងដោយមានការសំណូមពរពីអាជ្ញាធរខេត្ត និងស្រុក ដោយសារតែប្រជាជនបានចាកចេញរួចរាល់ហើយ តែអាជ្ញាធរនៅមិនទាន់បានចាកចេញពីតំបន់ ដែលត្រូវការពារ។

សម្តេចតេជោ បានមានប្រសាសន៍ថា “សាលាស្រុកបន្ទាយស្រីត្រូវរើមកនៅតំបន់អភិវឌ្ឍន៍រុនតាឯក។ […] នេះជាសំណូមពររបស់អាជ្ញាធរខេត្ត និងស្រុក ឥឡូវ​ឲ្យតែប្រជាជនចេញហើយអាជ្ញាធរអត់ព្រមចេញយើងធ្វើម៉េច? មិនអាចឲ្យប្រជាជនចេញ ហើយអាជ្ញាធរមិនព្រមចេញអញ្ចឹងត្រូវចេញមក”។

​            យោងតាមការបញ្ជាក់របស់សម្តេចតេជោ សម្រាប់សាលាស្រុកអង្គរធំក៏ត្រូវលើកទៅធ្វើនៅឃុំពាក់ស្នែងដែរ ​ព្រោះតំបន់នេះជាកន្លែង ដែលរាជរដ្ឋាភិបាល​ត្រូវដោះស្រាយ​ បើមិនដូច្នោះទេ ​យើងពិបាករាយការណ៍ទៅអង្គការយូនេស្កូ៕

ដោយ៖ សុផារី

សៀមរាប៖ សម្តេចតេជោ ហ៊ុន សែន ប្រកាសផ្តល់ប័ណ្ណកម្មសិទ្ធិ (ប័ណ្ណរឹង) ដល់ប្រជាពលរដ្ឋ ទាំងអស់នៅតំបន់អភិវឌ្ឍន៍រុនតាឯក និងពាក់ស្នែង ដើម្បីជាកេរដំណែលមួយ សម្រាប់គ្រួសារ និងអាចឱ្យប្រជាពលរដ្ឋយកទៅប្រើប្រាស់តាមលទ្ធភាព។

សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានបន្តជួបសំណេះសំណាលជាលើកទី៣ ជាមួយប្រជាពលរដ្ឋ ដែលបានស្ម័គ្រចិត្តរើលំនៅឋាន និងសំណង់ផ្សេងៗចេញពីតំបន់រមណីយដ្ឋានអង្គរ និងតំបន់ ស្ថិតក្រោមការគ្រប់គ្រងរបស់អាជ្ញាធរជាតិអប្សរា ទៅតាំងទីលំនៅនៅតំបន់អភិវឌ្ឍន៍រុនតាឯក នៅព្រឹកថ្ងៃសុក្រ ទី២១ ខែតុលា ឆ្នាំ២០២២នេះ។

សម្តេចតេជោមានប្រសាសន៍ថា “ខ្ញុំគិត បន្ទាប់ពីនេះ ទៅត្រូវចេញប័ណ្ណកម្មសិទ្ធិឲ្យបងប្អូនតែម្តងទៅ ព្រោះបងប្អូនត្រូវការយកទៅដាក់នៅធនាគារ ដើម្បីខ្ចីប្រាក់ពីគេ។ ចំពោះដីសម្បទានសង្គមកិច្ច គឺបងប្អូនមិនអាចខ្ចីប្រាក់ធនាគារបានទេ ព្រោះយើងមិនទាន់បានចេញប្លង់ឲ្យ”។

សម្តេចបានថ្លែងបន្តថា “ខ្ញុំបញ្ជាក់ថា នៅពេលបងប្អូនមកនៅទីនេះ ចាំបងប្អូនមករស់នៅសិន ឥលូវផ្គត់ផ្គង់តែប្រាក់សង្គមទេ ប៉ុន្តែសម្រាប់ការចេញប័ណ្ណកម្មសិទ្ធិទាល់តែមករស់នៅសិន។ ហើយរៀបចំជា ការចុះបញ្ជីដីធ្លីជាប្រព័ន្ធ ដើម្បីបង្កើតជាមូលដ្ឋានរឹងមាំ”។

កាលពីពេលថ្មីៗនេះ សម្តេចតេជោបានអំពាវនាវដល់គ្រឹះស្ថានធនាគារ និងមីក្រូហិញ្ញវត្ថុ បានសម្រេចផ្តល់ការអនុគ្រោះ តាមរយៈការពន្យារសង បន្ថយអត្រាការប្រាក់ រៀបចំឥណទានឡើងវិញ និងមិនការរឹបអូសទ្រព្យសម្បត្តិ ពីប្រជាពលរដ្ឋដែលទទួលផលប៉ះពាល់ ដោយទឹកជំនន់ឡើយ៕

ដោយ៖ សុផារី

ភ្នំពេញ៖ គម្រោងស្ពានអាកាស ដែលកំពុងសាងសង់នៅតំបន់ផ្លូវ៦០ម៉ែត្រ ក្លាយជាចំណែកមួយយ៉ាងសំខាន់ ក្នុងការជំរុញការប្រើប្រាស់ដីធ្លី និងតម្លៃដីធ្លី ដោយអ្នកជំនាញមើលឃើញថា តាមរយៈការអភិវឌ្ឍដែលមានស្រាប់ រួមផ្សំនិងគម្រោងស្ពានអាកាសថ្មីនេះនឹងនាំមកនូវការកែប្រែតំបន់នេះជាតំបន់លំនៅឋាន និងការិយាល័យថ្មី នាពេលអនាគត។

​            លោក​ប៉ូ​ អ៊ា​វ​គង់​ អគ្គនាយក​ក្រុមហ៊ុន​អចលនទ្រព្យ​ Advance​ បានប្រាប់ Property Area Asia ឱ្យ​ដឹង​នៅចុងសប្តាហ៍មុនថា គម្រោងសាងសង់ស្ពានអាកាសថ្មី នៅផ្លូវ៦០ម៉ែត្រនឹងជួយសម្រួលចរាចរណ៍ ព្រមទាំងបានជួយបង្កើនសក្តានុពលអចលនទ្រព្យនៅក្នុងតំបន់ខាងលើ ដោយសារកន្លងមក ប្រព័ន្ធចរាចរណ៍មានភាពរញ៉េរញ៉ៃ និងចំណាយពេលច្រើនក្នុងការធ្វើដំណើរ។ សព្វថ្ងៃនេះ គម្រោងលំនៅឋានបុរី ផ្សារទំនើប កំពុងកើនមានឡើងនៅតាមបណ្តោយផ្លូវមួយនេះជាច្រើន។

លោកបានមានប្រសាសន៍ថា “នៅពេលដែលគម្រោងស្ពាននេះត្រូវបានសាងសង់បញ្ចប់ នោះសក្តានុពលដែលកាន់តែឃើញច្បាស់មួយនោះ គឺវិស័យលំនៅឋាន ព្រោះដីធ្លីនៅក្នុងតំបន់នេះមានភាពទូលាយ និងមានទំហំធំ សម្រាប់ការសាងសង់បុរី”។

លោកបន្តថា នៅជំហានបន្ទាប់ តំបន់ផ្លូវ៦០ម៉ែត្រក៏អាចវិវត្តទៅជាតំបន់ប្រមូលផ្តុំអាគារការិយាល័យ សម្រាប់ជួល នាពេលអានាគតយ៉ាងខ្លីនេះផងដែរ។

លោកអ៊ាវគង់មានប្រសាសន៍បន្ថែមថា ផ្លូវ៦០ម៉ែត្រមិនត្រឹមតែជាផ្លូវសំខាន់ដែលតភ្ជាប់នឹងផ្លូវធំៗជាច្រើន រួមមានផ្លូវមុនីវង្ស ផ្លូវ២៧១ ជាដើម តែវាក៏ស្ថិតនៅក្នុងគម្រោងទីក្រុងរណប ING CITY ផងដែរ។ លើសពីនេះ ផ្លូវនេះក៏តភ្ជាប់ទៅកាន់តំបន់ព្រលានយន្តហោះថ្មី នៅក្នុងខេត្តកណ្តាលផងដែរ។ នេះ​ជាសក្តានុពល ដែលនឹងជំរុញឱ្យតំបន់នេះ​មានកំណើនតម្លៃដីធ្លី ព្រមទាំងកាន់តែទាក់ទាញគម្រោងអភិវឌ្ឍន៍បន្ថែមទៀត។

ជាមួយគ្នានេះដែរ លោក សន សៀប ជា​ស្ថាបនិក និង​ជា​អគ្គនាយក​ក្រុមហ៊ុន ឃី រៀល អ៊ីស្ទេត មានប្រសាសន៍ថា ចាប់ពីឆ្នាំ២០១៨ រហូតមកដល់បច្ចុប្បន្ននេះ ការរីកចម្រើនបំផុតកើតមានឡើងនៅភាគខាងត្បូងនៃទីក្រុងភ្នំពេញ ជាពិសេសក្នុងតំបន់ផ្លូវ៦០ម៉ែត្រ ដោយសារផ្លូវនេះជាផ្លូវថ្មី ដីធ្លីនៅមានទំហំធំ ផ្លូវធំ ការអភិវឌ្ឍភ្ជាប់ជាមួយព្រលានយន្តហោះថ្មី។

លោកបន្តថា “ក្នុងរយៈពេល៤ ៥ឆ្នាំចុងក្រោយនេះ ប្រសិនបើមិនមានកូវីដ១៩ទេ ភាគខាងត្បូងមនាការរីកចម្រើនខ្លាំង ហើយជាតំបន់មានការអភិវឌ្ឍខ្លាំងមែនទែន”៕