ដោយ: គង់ លាងហួរ

ក្រុងដាវ៉ូស: ប្រធានាធិបតីកូរ៉េខាងត្បូង លោក Yoon Suk Yeol បានស្នើដល់នាយកប្រតិបត្តិ នៃក្រុមហ៊ុនឈានមុខគេលើពិភពលោក រួមមាន IBM Qualcomm Intel និង Blackstone មកបណ្តាក់ទុនវិនិយោគនៅក្នុងប្រទេសរបស់ខ្លួន។

លោក Yoon បានធ្វើសំណើនេះ ក្នុងអំឡុងពេលអាហារថ្ងៃត្រង់ជាមួ យនាយកប្រតិបត្តិ នៃក្រុមហ៊ុនពិភពលោកចំនួន១៥រូប និងប្រធានអាជីវកម្មកូរ៉េធំៗចំនួន៦ នៅឯសណ្ឋាគារមួយក្នុងទីក្រុងDavos ប្រទេសស្វីស ជាកន្លែង ដែលពួកគេបានចែករំលែកមតិគ្នា លើខ្សែសង្វាក់ផ្គត់ផ្គង់ដែលមានស្ថេរភាព និងការផ្លាស់ប្តូរឌីជីថល។

លោក Yoon បានជំរុញឱ្យក្រុមថ្នាក់ដឹកនាំ លើពិភពលោករួបរួមគ្នាដើម្បីជួសជុលខ្សែសង្វាក់ផ្គត់ផ្គង់ និងបញ្ហាអាកាសធាតុនៅវេទិកា Davos ផងដែរ។

ពិធីជប់លៀងអាហារថ្ងៃត្រង់ ត្រូវបានរៀបចំឡើងជាផ្នែកមួយ នៃការ  ប្តេជ្ញាចិត្តរបស់លោកYoon ក្នុងការប្រើប្រាស់ដំណើរចេញ ក្រៅប្រទេសរបស់លោកជាឱកាសមួយ ដើម្បីជួយដល់គោលដៅនាំចេញរបស់ក្រុមហ៊ុនកូរ៉េនានា និងទាក់ទាញការវិនិយោគពីបរទេស។

លោក Yoon បានមានប្រសាសន៍ថា ដើម្បីដោះស្រាយវិបត្តិដ៏ស្មុគស្មាញ ដែលយើងកំពុងប្រឈមមុខ នាពេលសព្វថ្ងៃនេះ សាមគ្គីភាព និងកិច្ចសហប្រតិបត្តិការរវាងប្រទេស និងក្រុមហ៊ុននានាគឺមានសារៈសំខាន់ណាស់។

លោកបានបន្តថា “ខណៈពេលដែលក្រុមហ៊ុននានា កំពុងស្វែងរកកំណើនប្រកបដោយនិរន្តរភាព និងការច្នៃប្រឌិតបច្ចេកវិទ្យា ដើម្បីដោះស្រា យបញ្ហាសកលលោក រដ្ឋាភិបាលក៏គួរតែជួយដល់ពួកគេ តាមរយៈការធ្វើឱ្យទីផ្សារ​ដំណើរការ​ដោយ​យុត្តិធម៌ និង​មាន​ប្រសិទ្ធភាព”។

លោក Yoon ក៏បានកត់សម្គាល់ផងដែរថា គោលនយោបាយរបស់រដ្ឋបាលរបស់លោក គឺមានគោលបំណងអនុញ្ញាតឱ្យវិស័យឯកជន ដឹកនាំកំណើនសេដ្ឋកិច្ច ដោយសារប្រទេសកូរ៉េខាងត្បូង មានបណ្តាញកិច្ចព្រមព្រៀងពាណិជ្ជកម្មសេរីកម្រិតកំពូល សមត្ថភាពឧស្សាហកម្ម និងកម្លាំងពលកម្មដ៏មានទេពកោសល្យ។

ក្នុងអំឡុងពេលអាហារថ្ងៃត្រង់ លោក Yoon ត្រូវបានគេរាយការណ៍ថា លោកបានបង្ហាញពីការប្តេជ្ញាចិត្ត របស់រដ្ឋាភិបាលកូរ៉េ ក្នុងការធ្វើកំណែទម្រង់ទីផ្សារការងារដ៏តឹងរឹងរបស់ខ្លួន ដែលជាបញ្ហាមួយក្នុងចំណោមបញ្ហាជាច្រើន ដែលត្រូវបានលើកឡើងជាញឹកញាប់បំផុត និងបានធ្វើឱ្យក្រុមហ៊ុនបរទេសស្ទាក់ស្ទើរ ក្នុងការបោះទុនវិនិយោគ នៅក្នុងប្រទេសកូរ៉េខាងត្បូងផងដែរ៕

ដោយៈ សុខុម

ញូវយ៉ក: រដ្ឋាភិបាលសហរដ្ឋអាមេរិក បានឈានដល់ពិដានបំណុល (Debt ceiling) ខ្ចីបន្ថែមទៀតលែងបាន ហើយស្ថានភាពនេះ គឺជាក្ដីបារម្ភមួយទៀតរបស់បណ្ដាវិនិយោគិន សម្រាប់ទីផ្សារក្នុងឆ្នាំ២០២៣នេះ។

សហរដ្ឋអាមេរិក បានឈានដល់កម្រិតកំណត់ នៃការខ្ចីបុលរបស់ខ្លួនក្នុងចំនួន៣១,៤ទ្រីលានដុល្លារ កាលពីថ្ងៃព្រហស្បតិ៍ ទី១៩ ខែមករា ដោយបង្ខំឱ្យក្រសួងរតនាគារ ដាក់ចេញវិធានការបន្ទាន់ ដើម្បីគ្រប់គ្រងសាច់ប្រាក់ ដែលទំនងជាទប់ស្កាត់ ការខកខានសងបំណុលរហូតដល់ដើមខែមិថុនា។

ការឈានដល់ពិដានបំណុលនេះកើតឡើង ស្របពេលមានការប្រ​ឈមមុខដាក់គ្នា រវាងសភាជាន់ទាបដែលគ្រប់គ្រង ដោយគណបក្សសា​ធារណរដ្ឋ និងក្រុមប្រជាធិបតេយ្យរបស់ប្រធានាធិបតី ចូ បៃឌិន ដែលអាចឈានទៅដល់វិបត្តិសារពើពន្ធនៅប៉ុន្មានខែខាងមុខ។

វិនិយោគិនមួយចំនួនព្រួយបារម្ភថា សំឡេងភាគច្រើនដែលលើសខ្វះគ្នាដ៏តិចតួច របស់គណបក្សសាធារណរដ្ឋ នៅក្នុងសភាជាន់ទាប អាចធ្វើឱ្យកាន់តែពិបាក ឈានទៅដល់ការសម្របសម្រួលក្នុងពេលនេះ។

*តើអ្វីទៅជាពិដានបំណុល ឬ Debt ceiling?

ពិដានបំណុលគឺជាចំនួនអតិបរមា ដែលរដ្ឋាភិបាលសហរដ្ឋអាមេរិក អាចខ្ចីបាន ដើម្បីបំពេញកាតព្វកិច្ចហិរញ្ញវត្ថុរបស់ខ្លួន។ ហើយនៅពេលឈានដល់ពិដាន ក្រសួងរតនាគារមិនអាចចេញសេចក្ដីព្រាថវិកា បោះផ្សា​យមូលបត្របំណុល ឬធនបត្រ (ក្រដាសប្រាក់) បន្ថែមទៀតបានឡើយ។

ស្ថិតក្នុងស្ថានភាពបែបនេះ រដ្ឋាភិបាលអាមេរិក អាចត្រឹមតែទូទាត់វិក្កយបត្រចំណាយ តាមរយៈចំណូលពន្ធប៉ុណ្ណោះ។ បច្ចុប្បន្ន ពិដានបំណុលរបស់សហរដ្ឋអាមេរិក គឺស្មើនឹងប្រមាណ១២០% នៃទិន្នផលសេដ្ឋកិច្ចប្រចាំឆ្នាំរបស់ប្រទេសនេះ៕ Reuters៕

ដោយៈគង់ សូរិយា

       ភ្នំពេញៈ មន្រ្តីជាន់ខ្ពស់ក្រសួងឧស្សាហកម្មបានអះអាងថា គិតត្រឹមដំណាច់ឆ្នាំ២០២២ កម្ពុជាមានចំនួនរោងចក្រ សហគ្រា​កំពុងបើកដំណើរការ ចំនួន១៩៨២ និងមានទុនវិនិយោគសរុប១៦,៦៩០លានដុល្លារអាមេរិក។

យោងតាមរបាយការណ៍ពីក្រសួងឧស្សាហកម្ម បច្ចេកវិទ្យា វិទ្យាសាស្រ្ត និងនវានុវត្តន៍បានបង្ហាញឲ្យដឹងកាលពីដើមសប្តាហ៍នេះថា បើចាប់ពីខែមករា ដល់ខែធ្នូ ឆ្នាំ២០២២ ក្រសួងឧស្សាហកម្ម​​ ចុះបញ្ជីរោងចក្រសហគ្រាសថ្មី ចំនួន១៨៦រោងចក្រ ខណៈរោងចក្របើកថ្មីក្នុងឆ្នាំ២០២១ មានតែ ១៦៨រោងចក្រ។

ចំណែក​រោងចក្របិទទ្វារ មានចំនួន៨៣រោងចក្រ ក្នុងឆ្នាំ២០២២ ដែល​ការបិទទ្វារនេះ មានចំនួនទាបជាងចំនួនរោងចក្របិទទ្វារ ក្នុង២០២១ ដែលមានរហូតដល់១៤៣រោងចក្រ។​

ក្រសួងឧស្សាហកម្មបានបញ្ជាក់ទៀតថា ទុនវិនិយោគសរុបនៃរោងចក្រសហគ្រាស មានចំនួន១៦,៦៩០ លានដុល្លារ កើនឡើងពី១៣,៨១១ លានដុល្លារ​ក្នុងឆ្នាំ២០២១។​

រដ្ឋលេខាធិការ និងជាអ្នកនាំពាក្យក្រសួងឧស្សាហកម្ម បច្ចេកវិទ្យា វិទ្យាសាស្រ្ត និងនវានុវត្តន៍ លោកហេង សុខគង់ បានមានប្រសាសន៍ថា ការគ្រប់គ្រងប្រកបដោយប្រសិទ្ធភាព លើការរីករាលជំងឺកូវីដ១៩ របស់រាជរដ្ឋាភិបាល ជាគន្លឹះសំខាន់ កសាងទំនុកចិត្តដល់ការវិនិយោគនៅកម្ពុជា។​

លោកបន្តថា “កម្ពុជាអាចគ្រប់គ្រង និងអាចរស់នៅបានយ៉ាងល្អប្រសើរជាមួយនឹងកូវីដ១៩ ដែលធ្វើឱ្យយើងមានលទ្ធភាព បើកសង្គមសេដ្ឋកិច្ច បានល្អប្រសើរ”៕

  ដោយៈ គង់ សូរិយា

      ភ្នំពេញៈក្រុមហ៊ុនGolden Tree ដែលជាក្រុមហ៊ុនអចលនទ្រព្យឈា​នមុខគេមួយនៅកម្ពុជា ដោយផ្តោតលើការផ្តល់សេវាកម្មជួលអគារការរិយាល័យ គ្រប់គ្រង និងប្រឹក្សាយោបល់ផ្នែកអចលនទ្រព្យ បានប្រកាសរៀបចំកម្មវិធីចុះបញ្ជីជាផ្លូវការ នៅផ្សារមូលបត្រកម្ពុជា (CSX) លើការបោះផ្សាយសញ្ញាបណ្ណបៃតង ឬមូលបត្របំណុលបៃតងដំបូងគេនៅកម្ពុជា។

ក្រុមហ៊ុននេះ បានកៀរគរមូលនិធិប្រមាណ១,៥​ លានដុល្លារអាមេរិក ដោយជោគជ័យ ពីការបោះផ្សាយសញ្ញាបណ្ណបៃតង ក្នុងគោលដៅពង្រីកអាជីវកម្មរបស់ខ្លួន ខណៈដែលការបោះផ្សាយនេះ ត្រូវបានគេចាត់ទុកថាជាការរួមចំណែកដ៏សំខាន់ ជាមួយរដ្ឋាភិបាលនៅក្នុងបេសកកម្ម បង្កផលវិជ្ជ​មានដល់បរិស្ថាន និងជំរុញការអភិវឌ្ឍសេដ្ឋកិច្ចប្រកបដោយចីរភាព។

កម្មវិធីនេះត្រូវបានរៀបចំធ្វើឡើងនៅថ្ងៃទី ១៩ មករា ឆ្នាំ២០២៣ នៅអគារផ្សារមូលបត្រកម្ពុជា ដោយមានការអញ្ជើញចូលរួមក្រោមអធិបតីភាពពី លោកបណ្ឌិត​ សុភាចារ្យ ហ៊ាង សាហ៊ីប រដ្ឋមន្ត្រីប្រតិភូអមនាយករដ្ឋម  ន្ត្រី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាលនៃផ្សារមូលបត្រកមម្ពុជា លោកស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា និងលោកហុង សុហួរ ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃផ្សារមូលបត្រកម្ពុជា។

កម្មវិធីនេះក៏មានការអញ្ជើញចូលរួម ពីតំណាងសាជីវកម្មអន្តរជាតិ (IFC), ធនាគារអភិវឌ្ឍន៍អាស៊ី (ADB) ក្រុមហ៊ុន Grand Cathay Investment Trust និងតំណាងស្ថាប័នពាក់ពន្ធជាច្រើនទៀតផងដែរ។

លោក អ៊ុំ ដេវីដ ប្រធាននាយកដ្ឋានហិរញ្ញវត្ថុនៃក្រុមហ៊ុន ហ្គោលដេនទ្រី​បានលើកឡើងថា ការបោះផ្សាយបំណុលបៃតងនេះ នឹងជួយបង្កើនទំនុកចិត្តពីវិនិយោគិនជាតិ និងអន្តរជាតិទៅលើធុរកិច្ច របស់ក្រុមហ៊ុនហ្គោ​លដេនទ្រី ហើយក៏ជាការបើកលទ្ធភាពដ៏សំខាន់មួយ ក្នុងការទទួលបាននូវ​ប្រភពទុនសម្រាប់ការពង្រីកអាជីវកម្ម ព្រមទាំងចូលរួមបង្កើនសក្តានុពលនៃវិស័យហិរញ្ញវត្ថុនិរន្តរភាពនៅកម្ពុជាផងដែរ​។

លោកថ្លែងថា “យើងជឿជាក់ថាការគាំពារបរិស្ថាន គឺជាកាតព្វកិច្ចដែលត្រូវការចូលរួមទាំងអស់គ្នា ទាំងស្ថាប័នរដ្ឋ ឯកជន​ និងសាធារណជន”។ លោកបន្តថា “ការបោះផ្សាយសញ្ញាបណ្ណនេះ គឺជាជំហ៊ានមួយធ្វើ ឱ្យវិនិយោគិនរបស់យើង អាចយល់ដឹងមួយកម្រិតបន្ថែមទៀត ទៅលើការវិនិយោគក្នុងវិស័យមូលបត្រនិរន្តរភាព ដែលពួកគេអាចទទួលបានទាំងផលចំណេញ និងគាំពារបរិស្ថានក្នុងពេលតែមួយ”។

សញ្ញាបណ្ណបៃតងប្រមាណ៦០,០០០ សញ្ញាបណ្ណរបស់ក្រុមហ៊ុន   ហ្គោលដេនទ្រី ត្រូវបានបោះផ្សាយលក់ទៅ​ដល់សាធារណជន ដោយក្នុងមួយសញ្ញាបណ្ណ ឬមួយឯកតា មានតម្លៃ១០ម៉ឺនរៀល (២៥ដុល្លារអាមេរិក)។

សញ្ញាបណ្ណបៃតងនេះគឺមានរយៈពេល​៥ឆ្នាំ ដោយមានអត្រាការប្រាក់​ ៧ ភាគរយក្នុងមួយឆ្នាំ ហើយការប្រាក់នឹងត្រូវទូទាត់នៅរៀងរាល់ប្រចាំឆមាស។ ក្រុមហ៊ុន SBI Royal Securities Plc និងក្រុមហ៊ុនCambodia Securities Plc ត្រូវបានជ្រើសយកជា​ទីប្រឹក្សា​ហិរញ្ញវត្ថុ និងក្រុមហ៊ុនធានា​ទិញមូលបត្រសម្រាប់ការបោះផ្សាយនេះ។​

អគ្គនាយកផ្សារមូលបត្រកម្ពុជា លោកហុង សុហួរ មានប្រសាសន៍ថា ការបោះផ្សាយ​សញ្ញា​បណ្ណ​បៃតង ​នឹង​ធ្វើ​ឡើង​ដូច​ការបោះ​ផ្សាយ​សញ្ញាបណ្ណ​ធម្មតា​ដែរ ប៉ុន្តែ​ក្រុមហ៊ុន​ដែល​បោះផ្សាយ​គឺ​ទាមទារឱ្យមានការ​អនុលោ​ម​គោរព​លើ​ការវិនិយោគ​ ដែល​មិន​ប៉ះពាល់​បរិស្ថាន និង​ការប៉ះពាល់​អាកា​សធាតុ​។

លោក​ថ្លែង​ថា “ការបោះផ្សាយ និងការចុះបញ្ជីសញ្ញាបណ្ណបៃតងរបស់ក្រុមហ៊ុនហ្គោលដេនទ្រីនៅថ្ងៃនេះ សបញ្ជាក់ឱ្យឃើញថា វិស័យមូលបត្រកំពុងតែចូលរួមយ៉ាងសកម្មក្នុងការគាំទ្រ និងលើកកម្ពស់បរិស្ថាន ដើម្បីជំរុញការអភិវឌ្ឍសេដ្ឋកិច្ច ប្រកបដោយនិរន្តរភាពនៅកម្ពុជា”។

លោកហុង សុហួរ រហូតមកដល់បច្ចុប្បន្ន មាន១៨ ក្រុមហ៊ុនហើយ ដែលទទួលបានការចុះបញ្ជី នៅលើផ្សារមូលបត្រកម្ពុជា។ ក្នុងនោះមានចំនួន៩ ក្រុមហ៊ុនបានសម្រេចការចុះបញ្ជីជាមូលបត្រកម្មសិទ្ធ និង៩ផ្សេងទៀតចុះបញ្ជីជាសញ្ញាបណ្ណ ដោយក្រុមហ៊ុនទាំងអស់នេះ បានប្រមូលទុនពីទីផ្សារមូលបត្រកម្ពុជា មានទំហំទឹកប្រាក់ប្រមាណ៣២៧លានដុល្លារអាមេរិក។

សញ្ញាបណ្ណបៃតង របស់ក្រុមហ៊ុនហ្គោលដេនទ្រី គឺទទួលបានជំនួយបច្ចេកទេសពីធានាគារអភិវឌ្ឍន៍អាស៊ី ដើម្បីបោះផ្សាយឱ្យស្របតាមស្តង់ដាសញ្ញាបត្របៃតងអាស៊ាន។

លោកដេវីដបានមានប្រសាសន៍ថា ការបោះផ្សាយសញ្ញាបណ្ណបៃតងនេះ គឺស្របទៅតាមទស្សនៈ​ និងចក្ខុវិស័យប្រកបដោយយុទ្ធសាស្រ្ត​ យូរអង្វែង ដើម្បីក្លាយជាក្រុមហ៊ុនអចលនទ្រព្យ ឈានមុខគេមួយនៅកម្ពុជា ដោយធ្វើអោយបានរឹងមាំ នូវអភិបាលកិច្ចសាជីវកម្ម តម្លាភាពលើប្រព័ន្ធហិរញ្ញវត្ថុ និងយកចិត្តទុកដាក់លើបញ្ហាស្តង់ដា បរិស្ថាន សង្គម និងអភិបាលកិច្ចល្អ។

លោកបញ្ជាក់ទៀតថា គោលការណ៍ទាំងអស់នេះ នឹងធានាក្រុមហ៊ុនហ្គោដេនទ្រី បាននូវកំណើនធុរកិច្ចប្រកបដោយនិរន្តភាព និងជាកាលានុវត្តន៍ភាព សម្រាប់ក្រុមហ៊ុនធ្វើការសហការជាមួយដៃគូរជាតិ និងអន្តរជាតិក្នុងការអភិវឌ្ឍគម្រោងបៃតងថ្មីៗ ដែលមានចំពោះបរិស្ថាននៅកម្ពុជា។

ជាមួយគ្នានេះ ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា បានបង្ហាញការគាំទ្រ និងកោតសរសើរចំពោះក្រុមហ៊ុនហ្គោលដេនទ្រី ដែលបានសម្រេចនូវការចុះបញ្ជីលើការបោះផ្សាយសញ្ញាបណ្ណបៃតងដំបូងគេនៅកម្ពុជា។

លោកបន្តថា “ការបោះផ្សាយសញ្ញាបណ្ណបៃតង របស់ក្រុមហ៊ុន      ហ្គោ​លដេនទ្រី គឺ​ជាការបោះជំហាន និងផ្តល់គំរូល្អមួយដល់វិស័យឯកជន ក្នុងការចូលរួមជាមួយវិស័យមូលបត្រ ដើម្បីកៀរគរប្រភពទុនពង្រីកអាជីវកម្ម”។​លោកថ្លែងថា៖ “​ទុនដែលប្រមូលបាន ពីការបោះផ្សាយសញ្ញាប  ណ្ណបៃតង​ គឺត្រូវយកទៅអភិវឌ្ឍន៍អាជីវកម្ម ដោយក្រុមអ្នកជំនាញ​នឹងធ្វើការវាយតម្លៃជារៀងរាល់ឆ្នាំ ដើម្បីឱ្យស្របទៅតាមបទដ្ឋានបៃតង ដែលកត្តានេះគឺជាការរួមចំណែករបស់វិស័យមូលបត្រ ដើម្បីប្រយុទ្ធប្រឆាំងនូវការប្រែប្រួលអាកាសធាតុ”។

កាលពីខែ តុលា ឆ្នាំ២០២២  សាជីវ​កម្ម​ហិរញ្ញ​វត្ថុ​អន្តរ​ជាតិ ​(IFC)​ ដែល​ជា​ក្រុម​ហ៊ុន ​បុត្រ​សម្ព័ន្ធ​របស់​ធនាគារ​ពិភព​លោក ​បាន​ទទួល​ស្គាល់​អគារ​ការិ​យាល័យ ​VTrust​ Tower​ គ្រប់​គ្រង​ដោយ​ក្រុម​ហ៊ុនហ្គោលដេន  ទ្រី​ សម្រាប់​អគារ​ការិ​យាល័យពាណិជ្ជ​កម្ម​បៃតង​ដំបូងគេ ក្នុង​ប្រទេស​កម្ពុជាតាមប្រព័ន្ធ​Edge ​ដែល​ជា​ប្រព័ន្ធ​ផ្តល់​វិញ្ញា​បនបត្រ​អគារ​បៃតង​មួយ​ដែល​មាន​ការ​​ទទួល​ស្គាល់​ជា​អន្តរជាតិ។ ការទទួលស្គាល់នេះ គឺដោយសារអគារ VTrust​ Tower សម្រេចការសន្សំប្រើប្រាស់ទឹកបាន52% ការសន្សំថាម​ពល 24%, និង 84% នៃវត្ថុធាតុដើមទាំងអស់ប្រើប្រាស់ ក្នុងអគារបង្កការរំខានតិចតូចដល់បរិស្ថាន ព្រមទាំងការរួមចំណែកដល់ការកាត់បន្ថយបំភាយឧស្ម័នកាបូនិច (CO2) ប្រមាណ២៣០ តោនប្រចាំឆ្នាំ។

ឧបករណ៍ហិរញ្ញវត្ថុនិរន្តរភាព កំពុងត្រូវបានយកចិត្តទុកដាក់ និងគាំទ្រយ៉ាងខ្លាំងពីស្ថាប័នអន្តរជាតិធំៗ ដូចជា ធនាគារអភិវឌ្ឍន៍អាស៊ីនិងធនាគារពិភពលោក ដើម្បីគាំទ្រដល់រដ្ឋាភិបាលក្នុងការលើកទឹកចិត្ត និងជំរុញវិស័យឯកជននានា តាមរយៈការកៀរ​គរទុនសម្រាប់ដំណើរការអាជីវកម្ម ឬគម្រោងវិនិយោគណា ដែលហុចផលវិជ្ជមានដល់បរិស្ថាន និងការរួមចំណែ​កអភិវឌ្ឍន៍សេដ្ឋកិច្ចប្រកបដោយចីរភាព៕