ដោយៈ វឌ្ឍនៈ

ភ្នំពេញៈ ខេត្តពីរដែលជាតំបន់ទេសចរណ៍ សំខាន់របស់កម្ពុជាគឺសៀម​រាប និងខេត្តព្រះសីហនុ ក្នុងរយៈពេលប៉ុន្មានខែចុងក្រោយនេះ ទទួលបានកំណើនភ្ញៀវទេសចរច្រើនឡើងវិញ ប៉ុន្តែការកើនឡើងនៃភ្ញៀវទេសចរនេះ មិនជួយឱ្យមានការទិញ លក់ ជួល អចលនទ្រព្យច្រើននោះទេ ផ្ទុយទៅវិញសកម្មភាពនៃការទិញលក់បានថមថយជាងមុនទៅទៀត។

ប្រធានសាខានៃក្រុមហ៊ុនអចលនទ្រព្យ Century 21 Zillion Holdingលោកសំ សីហា បានមានប្រសាសន៍តាមទូរសព្ទឱ្យដឹងថា ក្នុង      រយៈពេលចុងក្រោយនេះ ការដោះដូរអចលនទ្រព្យ ដែលសំដៅលើការទិញលក់នៅក្នុងខេត្តសៀមរាប មានការថមថយ និងស្ងប់ស្ងាត់ជាងមុនទៅទៀត ។ បច្ចុប្បន្ននេះ សំបូរអ្នកលក់តែមិនសូវមានអ្នកទិញ ដូច្នេះហើយទើបធ្វើឱ្យការដោះដូរ ម្ចាស់អចលនទ្រព្យនៅក្នុងខេត្តសៀមរាប ហាក់មានស្ថានភាព ស្ងប់ស្ងាត់។

លោកបន្តថា “យើងឃើញថាផ្លូវចំនួន៣៨ខ្សែ នៅក្នុងខេត្តសៀមរាប បានធ្វើរួចរាល់ និងបានដាក់ដំណើរការឱ្យប្រើប្រាស់ផងដែរ ហើយតាមរយៈផ្លូវទាំង៣៨ខ្សែនេះ បានធ្វើឱ្យភ្ញៀវទេសចរមកលេង ខេត្តសៀមរាបច្រើនឡើងវិញក្រោយពីវិបត្តិកូវីដ១៩ បានស្ងប់ស្ងាត់បន្តិច”។លោកបន្តថា “ប៉ុន្តែទោះបីជាផ្លូវនេះ សាងសង់រួចហើយមានភ្ញៀវទេសចរ មកលេងច្រើនពិតមែន ការវិនិយោគនិងការទិញ លក់ អចលនទ្រព្យក្នុងខេត្តសៀមរាបមិនមានកំណើនច្រើនទេ”។

លោកបន្តថា មិនថាតែក្រុមហ៊ុនឬក្រុមហ៊ុនដទៃទេ គឺមានភាពស្ងប់ស្ងាត់ មិនសូវមានភ្ញៀវរកទិញអចលនទ្រព្យទេ តែបែរជាមានអ្នកលក់ច្រើនទៅវិញ ។ ទោះបីជាមានអ្នកលក់ច្រើនក៏ពិតមែន ក៏មិនធ្វើឱ្យតម្លៃអចលនទ្រព្យនៅក្នុងខេត្តនេះធ្លាក់ចុះនោះទេ ផ្ទុយទៅវិញមានតែកើនឡើងជាងមុនទៅទៀត ដែលអាចធ្វើឱ្យភ្ញៀវស្វែងរកទិញមិនចង់ទិញ។

លោកសំ សីហាបានបន្ថែមថា ដូចយើងបានដឹងហើយ បច្ចុប្បន្ននេះ វិបត្តិមិនមែនកើតមាន តែក្នុងប្រទេសកម្ពុជានោះទេ គឺ ពិភពលោកកំពុងតែជួបវិបត្តិដូចគ្នាទាំងវិបត្តិកូវីដ១៩ និងវិបត្តិនៃសង្គ្រាមរវាងរុស្ស៊ី និងអ៊ុយក្រែន ដែលធ្វើឱ្យវិនិយោគិនបរទេស មិនអាចចេញក្រៅប្រទេសស្វែងរកការវិនិយោគដូចមុនកើតវិបត្តិបានឡើយ ហើយអចលនទ្រព្យក្នុងប្រទេសកម្ពុជា ក៏អាស្រ័យទៅលើការវិនិយោគពីបរទេសដែរ ។

ក្រលេកទៅមើលសកម្មនៃការដោះដូរអចលនទ្រព្យនៅក្នុងខេត្តព្រះសីហ

នៅក្រុងព្រះសីហនុឯណោះវិញ ក៏មិនខុសពីសកម្មភាពនៃការវិនិយោគនៅក្នុងខេត្តសៀមរាបប៉ុន្មានដែរ ទោះបីជាខេត្តនេះទទួលបានកំណើនភ្ញៀវទេសចរច្រើន ក្រោយពេលបើកដំណើរការផ្លូវល្បឿនលឿនក្ដី។

គម្រោងអគារមួយចំនួន ដែលបានផ្អាកការសាងសង់បណ្ដោះអាសន្ននៅតែមិនទាន់បានដំណើរការ សាងសង់ឡើងវិញនៅឡើយ ខណៈអគារសាងសង់រួចមួយចំនួនក៏នៅទំនេរ រង់ចាំវិនិយោគិន ធុរជនមកពីខាងក្រៅមកជួលឬដំណើរការអាជីវកម្ម ។

លោកឃាង ភារម្យ អ្នកនាំពាក្យសាលាខេត្តព្រះសីហនុមានប្រសា​សន៍ថា ការអភិវឌ្ឍវិស័យអចលនទ្រព្យ ក្នុងខេត្តព្រះសីហនុ ឬក្នុងប្រទេសកម្ពុជារីកចម្រើនទៅបាន ក៏អាស្រ័យទៅលើស្ថានភាព សេដ្ឋកិច្ចពិភពលោកដែរ ។ បើសិនជាស្ថានភាពសេដ្ឋកិច្ចពិភពលោក នៅពេលនេះបន្តមានបញ្ហាយើងក៏មិនអាចរីកចម្រើនខ្លាំង ឬដំណើរការខ្លាំងបានឡើយ ។

មន្រ្តីជាន់ខ្ពស់របស់រដ្ឋាភិបាល ដែលបាននិងកំពុងរៀបចំទីក្រុងព្រះសីហនុជាទីក្រុងពហុបំណង បានមានប្រសាសន៍ឲ្យដឹង កាលពីរសៀលថ្ងៃទី២០ តុលានេះថា នៅក្នុងអំឡុងពេលមានវិបត្តិបែបនេះ ប្រជាជននៅក្នុងក្រុងព្រះសីហនុនៅតែបន្តទាមទារតម្លៃដីខ្លួនខ្ពស់ និងឡើងថ្លៃបន្ថែម នៅពេលមានអ្នកវិនិយោគថ្មីចូលទៅ ដែលនេះនឹងបង្កឲ្យមានវិបត្តិបន្តនៅក្នុងទីក្រុងនេះ។

លោកបន្តថា “បញ្ហាប្រឈមរបស់យើង គឺទាំងអស់គ្នាគួរដោះស្រាយរួមគ្នា មិនមែនចេះតែទាមទារតាមការនឹកឃើញ និងលោភលន់របស់ខ្លួនោះទេ”។លោកបន្ថែមថា “បទពិសោធន៍ជាក់ស្តែង ខ្ញុំបានជួបករណីនេះផ្ទាល់ ពេលនាំអ្នកវិនិយោគបរទេសស្វែងរកទិញដី ពួកគេបែរជាដំឡើងថ្លៃដីរបស់ខ្លួន”៕

ដោយៈ សុផារី

ភ្នំពេញៈ ការចាកចេញរបស់វិនិយោគិនចិន ព្រោះតែការបិទហ្គេមអនឡាញ និងវិបត្តិកូវីដ-១៩ នារយៈពេល៣ឆ្នាំមកនេះ បានបន្សល់នូវការជាប់គាំងការដ្ឋានសំណង់តូច-ធំជាច្រើនកន្លែង ដែលរាយប៉ាយជុំវិញក្រុងព្រះសីហនុ។

អាគារជាប់គាំងជាង១២០០ កំពុងរង់ចាំដំណោះស្រាយ ដែលទាម​ទារការចូលរួមពីសំណាក់គ្រប់ភាគីពាក់ព័ន្ធ។

អ្នកជំនាញអន្តរជាតិជាន់ខ្ពស់ពីររូប លើកឡើងថា ដើម្បីឈានទៅដោះស្រាយបញ្ហានេះឱ្យមានប្រសិទ្ធិភាព ទាមទារការដាក់ចេញច្បាប់ និងគោលនយោបាយច្បាស់លាស់ និងមានការចូលរួមពីសំណាក់ រាជរដ្ឋាភិបាលកម្ពុជា និងវិស័យឯកជន។

លោក Lawrence Lennon នាយកគ្រប់គ្រង CBRE Cambodia បានមានប្រសាសន៍កាលពីពេលថ្មីៗនេះថា លោកមើលឃើញថា ក្រុងព្រះសីហនុ ជាសក្តានុពលមិនទាន់កែច្នៃ (Raw Potential) ព្រោះវាមានធាតុផ្សំ ដើម្បីកែច្នៃចេញទៅជាទីក្រុងជាប់ឆ្នេរដ៏អស្ចារ្យមួយ។ ក្នុងរយៈពេលប៉ុន្មានឆ្នាំចុងក្រោយនេះ ប្រព័ន្ធហេដ្ឋារចនាសម្ព័ន្ធផ្លូវថ្នល់ ត្រូវបានកែប្រែមុខមាត់គួរឱ្យកត់សម្គាល់ ជាក់ស្តែងផ្លូវ៣៩ខ្សែតភ្ជាប់គ្នាក្នុងទីក្រុងមួយនេះ។

លោកគូសបញ្ជាក់ថា “ធាតុផ្សំសំខាន់មួយ ក្នុងចំណោមសក្តានុពលនោះ គឺអចលនទ្រព្យ ហើយយើងមានហេដ្ឋារចនាសម្ព័ន្ធហើយ”។លោកបន្ថែមថា “ដូច្នេះ ខ្ញុំគិតថា អ្វីដែលជាជំហានបន្ទាប់សំខាន់បំផុត គឺទាមទារឱ្យមានផែនការមេសម្រាប់ការកែច្នៃ និងអនុវត្តន៍”។

លោក Lawrence លើកឡើងថា ផែនការមេមួយនេះមានសារៈសំខា​ន់ខ្លាំងណាស់ សម្រាប់បរិបទក្រុងព្រះសីហនុ ព្រោះថាទោះបីស្ថិតក្នុងការផ្តល់ ឬទទួលយក វានឹងជួយការពារតម្លៃ (Value) អចលនទ្រព្យ និងអភិវឌ្ឍន៍សក្តានុពលទីតាំងបន្ថែមទៀត។ សម្រាប់ក្រុងព្រះសីហនុ ដើម្បីឈានទៅកាន់ជំហានបន្ទាប់ គឺត្រូវកែច្នៃអាគារទាំងនោះ ដើម្បីធានាឱ្យបានថា ទីតាំងសាធារណៈ និងធានាការផ្គត់ផ្គង់ក្នុងកម្រិតមួយដ៏ត្រឹមត្រូវ ប្រៀបធៀបនឹងតម្រូវការជាក់ស្តែង។

លោកបានបន្តថា “យើងបានដឹងហើយថា អាគារជាង១០០០បានជាប់គាំង។ ដូចនេះ អ្វីដែលយើងអាចឆ្លងផុតដំណាក់កាលនេះ ទាមទារការចំណាត់ការពីរាជរដ្ឋាភិបាល ដែលជាការចូលរួមរវាងឯកជននិងរដ្ឋ ដើម្បីឈានទៅនាំយកសក្តានុពល ដ៏អស្ចារ្យនៃទីក្រុងមួយនេះ”។លោកបន្តថា “គោលការណ៍នេះ ទាមទារឱ្យមានការចូលរួមពីថ្នាក់ដឹកនាំជាន់ខ្ពស់ ដោយផែនការមេនេះ ត្រូវដាក់ចេញដោយរដ្ឋបាលខេត្ត និងក្រុមហ៊ុនអភិវឌ្ឍន៍ផែនការស៊ិនជិន។ ហើយអ្វីដែលសំខាន់នោះ យើងត្រូវការ “ចុងភៅ” មកជួយរួមបញ្ចូលធាតុផ្សំមិនទាន់កែច្នៃទាំងឡាយ”។

លោក Phillip Tan ទីប្រឹក្សាជាន់ខ្ពស់នៃក្រុមហ៊ុនអចលនទ្រព្យជាតិ និងអន្តរជាតិជាច្រើន បានមានប្រសាសន៍ នៅក្នុងកិច្ចសម្ភាសពិសេសជាមួយគេហទំព័រ Property Area Asia នៅថ្ងៃទី១៨ ខែតុលា ឆ្នាំ២០២២ថា រាជរដ្ឋាភិបាលបាន និងកំពុងព្យាយាម ដាក់ចេញគោលនយោបាយ ដើម្បីធានាឱ្យបាននូវស្តង់ដារសំណង់ សុវត្តិភាព ជាដើម។

អ្នកជំនាញរូបនេះលើកឡើងថា អ្វីដែលសំខាន់ជាងនេះទៅទៀតនោះ រាជរដ្ឋាភិបាលកម្ពុជា គួរសម្លឹងមើលជម្រើស នៃការអភិវឌ្ឍដោយប្រើប្រាស់គោលការណ៍ ESG ដែលគិតគូរលើបរិស្ថាន លក្ខខណ្ឌសង្គម និងអភិបាលកិច្ច។

ការសិក្សាស្រាវជ្រាវមួយរបស់វិទ្យាស្ថាន Yusof Ishak បានកំណត់សូចនាករសំខាន់ៗនៃ ESG រួមមាន  បរិស្ថាន៖ បំរែបំរួលអាកាសធាតុ ឧស្ម័នផ្ទះកញ្ចក់ ការបំភាយឧស្ម័ន កាកសំណល់ និងការបំពុល ការបំផ្លិចបំផ្លាញធនធាន ការប្រើប្រាស់ដី និងជីវចម្រុះ លក្ខខណ្ឌសង្គម៖ ស្តង់ដារការងារ ភាពផ្សេងគ្នា និងការរួមបញ្ចូល សុខភាព និងសុវត្ថិភាព ភាពឯកជននៃទិន្នន័យ សុវត្ថិភាពផលិតផល និងការទទួលខុសត្រូវ ការរៀនសូត្រ និងការអភិវឌ្ឍន៍និងអភិបាលកិច្ច៖ ភាពចម្រុះនៃក្រុមប្រឹក្សាភិបាល ការស៊ីសំណូក និងអំពើពុករលួយ សំណងប្រតិបត្តិ សិទ្ធិម្ចាស់ភាគហ៊ុន និងក្រមសីលធម៌អាជីវកម្ម។

បន្ថែមលើសនេះ លោក Phillip លើកឡើងថា អ្នកអភិវឌ្ឍន៍គួរតែចងចាំថា ពួកគាត់គួរតែសាងសង់នូវអ្វី គាត់អាចលក់ចេញបាន។ ភាគច្រើននៃគម្រោងដែលជាប់គាំង នៅក្នុងក្រុងព្រះសីហនុ ភាគច្រើនជាគម្រោងដែលមិនមានទុនសាងសង់បន្ត។

យ៉ាងណាក្តី លោកថា “យើងគួរតែមានផែនការ ដ៏ច្បាស់លាស់មួយ មុនពេលមានការសាងសង់”៕

ដោយៈ សហការី
ភ្នំពេញៈ ចុងសប្ដាហ៍នេះ តើលោកអ្នកមានគម្រោងទៅកម្សាន្ត នៅទីណាដែរឬទេ? ប្រសិនបើមិនទាន់មានគម្រោងទេ បុរី ប៉េង ហួត សូមអញ្ជើញលោក អ្នកចូលរួមកម្មវិធីជួបជុំលក្ខណៈគ្រួសារ ដ៏សប្បាយរីករាយ WEEKEND LIFESTYLE ដែលរៀបចំឡើងនៅការិយាល័យលក់គម្រោង បុរី ប៉េង ហួត ដឹស្តា មេរាហ្កាដិន ស្ថិតនៅតាមបណ្ដោយផ្លូវក្រវាត់ក្រុងទី2 (ផ្លូវ50ម៉ែត្រ)។
នៅក្នុងកម្មវិធីនេះ លោកអ្នកនឹងបានរីករាយ ជាមួយតារាចម្រៀងល្បីឈ្មោះគឺលោក ដួង វីរៈសិទ្ធ អ្នកនាង ពេជ្រ សូលីកា និងលោក ប៉ែន ចំរុង ដែលជាពិធីករមានវោហាស័ព្ទមិនចេះរីងស្ងួត ការលេងហ្គេមកម្សាន្តសប្បាយៗ សកម្មភាពរបស់កុមារតូចៗ ការតាំងពិព័រណ៍ផលិតផលចម្រុះ រួមទាំងឱកាសចំណេញដ៏ច្រើនសន្ធឹកសន្ធាប់សម្រាប់ការទិញផ្ទះក្នុងថ្ងៃកម្មវិធីនេះទៀតផង។
កម្មវិធី WEEKEND LIFESTYLE នឹងរៀបចំឡើងរយៈពេល 02ថ្ងៃ គឺថ្ងៃទី22-23 ខែតុលា ឆ្នាំ2022 ចាប់ពីម៉ោង09:00 ព្រឹក – 08:00 យប់ នៅការិយាល័យលក់ គម្រោងដឹស្តាមេរាហ្កាដិន (ផ្លូវ50ម៉ែត្រ)។
ដើម្បីជ្រាបកាន់តែច្បាស់អំពីកម្មវិធីដ៏វិសេសនេះ លោកអ្នកអាចសាកសួរព័ត៌មានបន្ថែម តាមរយៈលេខទូរសព្ទ 𝟎𝟗𝟖 / 𝟎𝟏𝟔 / 𝟎𝟏𝟕 𝟓𝟗𝟔 𝟕𝟖𝟗 ៕

  ដោយៈ គង់ សូរិយា

       កំពតៈ ការសាងសង់ផ្លូវតភ្ជាប់ពីទីក្រុងបូកគោ ទៅកាន់ផ្លូវជាតិលេខ៤ បាននិងកំពុងពង្រីកកាន់តែសកម្ម ដោយបច្ចុប្បន្នក្រុមហ៊ុនសុខាអូតែល ដែលទទួលបានសម្បទានពីរដ្ឋាភិបាល ដើម្បីកសាងទីក្រុងបូកគោបាននិងកំពុងចាប់ផ្តើមការងារថ្មីមួយទៀត។

ប្រភពពីថ្នាក់ដឹកនាំជាន់ខ្ពស់ក្រុមហ៊ុនសុខា អូតែលបានឲ្យដឹងនាព្រឹកថ្ងៃទី២០ តុលានេះថា ការឈូសឆាយផ្កូវចេញពីចំណុចវាលស្រែ៥០០ ទៅកាន់ផ្លូវជាតិលេខ៤ ទើបសម្រេចបានប្រមាណ១៥គីឡូម៉ែត្រប៉ុណ្ណោះ មិនដូចការលើកឡើងរបស់សារព៌តមានមួយនោះទេ ប៉ុន្តែបច្ចុប្បន្នក្រុមហ៊ុនកំពុ​ងចាប់ផ្តើមឈូសឆាយផ្លូវ ចេញពីផ្លូវជាតិលេខ៤លើការដ្ឋានថ្មីមួយទៀត ដើម្បីតភ្ជាប់គ្នានឹងការដ្ឋាន ដែលបាននិងកំពុងឈូសឆាយ ចេញពីទីក្រុងបូកគោ ។

លោកបន្តថា ការឈូសឆាយផ្លូវថ្មីនេះ បាននិងកំពុងធ្វើយ៉ាងសកម្ម ដើម្បីសម្រេចបានតាមផែនការរបស់ក្រុមហ៊ុន ដែលបានគ្រោងទុក។

ផ្លូវមួយខ្សែនេះមានប្រវែងប្រមាណ១២០គីឡូម៉ែត្រ ដោយផ្លូវនេះមានការចំបែកជាពីរ បន្ទាប់ពីចេញពីចំណុចវាលស្រែ៥០០ នឹងមានការបំបែកជាពីរ ដោយខ្សែទី១ តភ្ជាប់ទៅកាន់ផ្លូវជាតិលេខ៤ កាត់ចំការដូងប្រេងរបស់អ្នកឧកញ៉ាម៉ុង រិទ្ឋី និងចេញនៅចំណុចគីឡូម៉ែត្រ១៥៨ នៃផ្លួវជាតិលេខ៤ និងខ្សែបំបែកទៀត គឺតភ្ជាប់ទៅកាន់តំបន់់ពេជ្រ និល។

អ្នកឧកញ៉ាសុខ គង់ប្រធានក្រុមហ៊ុនសុខាអូតែលបានមានប្រសាសន៍ឲ្យដឹងនាពេលកន្លងមកថា ការកសាងទីក្រុងបូកគោត្រូវចំំណាយប្រាក់ច្រើនណាស់ ដោយទំហំចំណាយត្រូវការប្រាក់រហូតដល់២០ ទៅ៣០ពាន់លានដុល្លារអាមេរិក និងត្រូវចំណាយពេលវិនិយោគរយៈពេលពី២០ទៅ៣០ឆ្នាំ។

អ្នកឧកញ៉ាបានបន្តថា “រហូតមកទល់ពេលនេះ ក្រុមហ៊ុនបានចំណា​យប្រាក់ចន្លោះពី៤០០ទៅ៥០០លានដុល្លាររួចហើយ ក្នុងការកសាងហេដ្ឋារចនាសម្ព័ន្ឋនានានៅលើទីក្រុងនេះ”។ អ្នកឧកញ៉ាបានបន្តថា “ក្រុមហ៊ុនស្នើសុំរដ្ឋាភិបាល ជួយបន្តគាំទ្រគំរោងកសាងទីក្រុងបូកគោ ដើម្បីរួមចំណែកអភិវឌ្ឍន៍សេដ្ឋកិច្ចរបស់ជាតិ”៕