ដោយៈ គង់ សូរិយា

       ព្រះសីហនុៈ អាជ្ញាធរខេត្តព្រះសីហនុ ដឹកនាំដោយលោកគួច ចំរើននិងលោកស សុខា បានដឹកនាំកិច្ចប្រជុំពិភាក្សាការងារ រៀបចំព្រឹត្តិការប្រកួតកីឡាម៉ូតូទឹក និងទូកក្តោង លើកទី៣ ឆ្នាំ២០២២។

ព្រឹត្តិការណ៍ជាតិលើកទី៣ ឆ្នាំ២០២២ នឹងចាប់ផ្តើមការប្រកួតថ្ងៃទី២៣ ដល់ថ្ងៃទី២៦ ខែវិច្ចិកា ឆ្នាំ២០២២ នៅខេត្តព្រះសីហនុ។

លោកស សុខា រដ្ឋលេខាធិការក្រសួងអប់រំយុវជន និងកីឡា បានបើកកិច្ចប្រជុំដោយគូសបញ្ជាក់ថា ដោយមានការចូលរួមសម្របសម្រួលពីរដ្ឋបាលខេត្ត ដើម្បីលើកស្ទួយវិស័យកីឡា និងការពឹងផ្អែកលើឆន្ទៈ របស់សហព័ន្ធកីឡាជាតិលើកទី៣ ឆ្នាំ២០២២ ចំពោះកីឡាម៉ូតូទឹកកម្ពុជា ជាកីឡាមួយដែលទទួលបានមេដាយមាសនាពេលខាងមុខ។

លោកបន្តថា អ្វីជាសំខាន់ការរៀបចំការប្រកួតកីឡា ស៊ីហ្គេមឆ្នាំ២០២៣ ដែលមានរាជធានីខេត្តមួយចំនួន ធ្វើជាកន្លែងប្រកួតមានដូចជា រាជធានីភ្នំពេញ ខេត្តសៀបរាម ខេត្តព្រះសីហនុ ខេត្តកំពត និងខេត្តកែប”។ លោកបន្តថា “ខេត្តព្រះសីហនុ ក៏ត្រូវរៀបចំព្រឹត្តិការកីឡានៅលើផ្ទៃទឹក ដែលមានកីឡាចូលរួមប្រកួតពីរប្រភេទ គឺការប្រកួតកីឡាស៊ីហ្គេម និងប៉ារ៉ាហ្គេម(សម្រាប់រាជធានីភ្នំពេញ)”។

លោកស សុខាបានលើកឡើងបន្តថា ទន្ទឹមនោះយើងត្រូវដាក់ចេញនូវវិធានការមួយចំនួនមានដូចជា ទី១ ការងារការពារសន្តិសុខសណ្តាប់ធ្នាប់សាធារណៈ ចំពោះគណប្រតិភូចូលរួម ក៏ដូចជា ប្រជាពលរដ្ឋចូលរួមការប្រកួត ទី២ ផ្សព្វផ្សាយឱ្យបានទូលំទូលាយ អំពីទីតាំងពាក់ព័ន្ធនៃការរៀបចំព្រឹត្តិការណ៍ប្រកួតកីឡាលើកទី៣ ឆ្នាំ២០២២ និងស៊ីហ្គេមឆ្នាំ២០២៣ ចាប់ពីពាក់កណ្តាលខែឧសភា ហើយខេត្តនិមួយៗត្រូវរៀបចំសង្ក្រានខេត្ត ដើម្បីឱ្យព្រឹត្តិការណ៍ នៃការប្រកួតកីឡាស៊ីហ្គេមរបស់យើង កាន់តែមានភាពទាក់ទាញ នឹងចូលរួមពីប្រជាពលរដ្ឋ និងភ្ញៀវទេសចរចូលរួមយ៉ាងច្រើនកុះករនាពេលខាងមុខ។

ជាមួយគ្នានេះ លោកគួច ចំរើន អភិបាលខេត្តព្រះសីហនុ សូមស្វាគមន៍ប្រតិភូសហព័ន្ធកីឡា ចូលរួមប្រជុំនៅខេត្តព្រះសីហនុ ស្តីពីការងាររៀបចំព្រឹត្តិការណ៍ប្រកួតកីឡាលើកទី៣ ឆ្នាំ២០២២នៅលើទឹកដីខេត្តព្រះសីហនុ ដែលលោក ស សុខា បានធ្វើការណែនាំនៃព្រឹត្តិការណ៍កីឡាលើកទី៣ ដើម្បីត្រៀមលក្ខណៈចូលរួម និងកិច្ចសហការក្នុងការប្រកួតកីឡាលើកទី៣ នៅខេត្តព្រះសីហនុឱ្យទទួលបានជោគជ័យ។

លោកបន្តថា “ការប្រកួតកីឡានេះមានវិញ្ញាសារម៉ូតូទឹក និងទូកក្តោង ហើយឆ្នេររបស់យើង មិនមានសណ្ឋានដូចគ្នា នៃស្ថានភាពភូមិសាស្ត្រ ត្រូវការជ្រើសរើសឆ្នេរណាមួយឱ្យបានជាក់លាក់ ក្នុងនោះត្រូវទាមទាការបញ្ជាក់ឱ្យបានច្បាស់លាស់ផងដែរ”។

លោកបានបន្តថា រដ្ឋបាលខេត្តមានផែ៥០២ សម្រាប់ឱ្យក្រុមការងារទូកក្តោងចូលចត ក្នុងការចូលរួមប្រកួតកីឡាជាតិលើកទី៣ និងឈានទៅការប្រើប្រាស់សម្រាប់ស៊ីហ្គេមឆ្នាំ២០២៣ខាងមុខ។ ដោយសារខេត្តព្រះសីហនុ មានទីតាំងលំហរសាធារណៈ ប្រកបដោយសោភ័ណភាព អនាម័យ បរិស្ថាន ហើយការរៀបចំព្រឹត្តិការកីឡាជាតិលើកទី៣ ឆ្នាំ២០២២ ជាឱកាសសម្រាប់ផ្សព្វផ្សាយ ពីសក្តានុពលទេសចរណ៍ វិនិយោគរបស់ខេត្តព្រះសីហនុ ពិសេសជាការលើកមុខមាត់របស់ខេត្តព្រះសីហនុ នៅពេលខាងមុខ។

ការរៀបចំព្រឹត្តិការណ៍កីឡាជាតិលើកទី៣ ឆ្នាំ២០២២នៅខេត្តព្រះសីហនុមានពីវិញ្ញាសារធំៗចំនួនពីរ ក្នុងនោះមានដូចជា កីឡាម៉ូតូទឹកមាន ៥វិញ្ញាសារ និងកីឡាទូកក្តោងមានចំនួន៤វិញ្ញាសារដូចជា ទី១ ទូកក្តោង Windsurfing បុរស ត្រូវប្រកួតចំនួន៦ជុំ  ទី២ ទូកក្តោង ILCA Boat Open ត្រូវប្រកួតចំនួន៦ជុំ  ទី៣ទូកក្តោង Byte Boat ត្រូវប្រកួតចំនួន៦ជុំ

និងទី៤ទូកក្តោង Optimist Boat Open ត្រូវប្រកួតចំនួន៦ជុំ៕

ដោយៈ សុផារី

ភ្នំពេញៈ ក្នុងកាលៈទេសៈប្រឈមនឹងវិបត្តិសេដ្ឋកិច្ច អ្នកជំនាញអចល​នទ្រព្យមើលឃើញថា ចំនួននៃអ្នកលក់ទ្រព្យ មានច្រើនជាងចំនួន នៃអ្នកទិញអចលនទ្រព្យ ដែលជំរុញឲ្យម្ចាស់ទ្រព្យមួយចំនួន បង្ខំចិត្តលក់ចេញ ក្រោមតម្លៃទីផ្សារ ចន្លោះ ២០ទៅ ៣០ភាគរយធ្វើយ៉ាងណា ដើម្បីងាយស្រួលក្នុងការលក់ទ្រព្យនោះចេញ។

អ្នកស្រី តាំង ហ៊ួរ អគ្គនាយិកាក្រុមហ៊ុនអចលនទ្រព្យ Amatak Property Service បានមានប្រសាសន៍ នៅក្នុងកិច្ចសម្ភាសពិសេសមួយជាមួយគេហទំព័រ Property Area Asia នៅដើមសប្តាហ៍នេះថា ក្នុងកំឡុងវិបត្តិរយៈពេល០២ឆ្នាំកន្លងមកនេះ តម្លៃទីផ្សារអចលនទ្រព្យមានការកើនឡើងមិនច្រើនទេ ដោយភាគច្រើនកើតឡើងនៅតាមតំបន់ ដែលមានការអភិវឌ្ឍខ្លាំងតែប៉ុណ្ណោះ។

លោកស្រីឱ្យដឹងថា “ក្នុងករណីដែលម្ចាស់ទ្រព្យ ត្រូវការសាច់ប្រាក់បន្ទាន់ ហើយមានបំណងចង់លក់ទ្រព្យឆាប់ចេញ គាត់ត្រូវសម្រេចចិត្តលក់ទ្រព្យនោះចេញ ក្នុងតម្លៃទាបជាងទីផ្សារកាលពីប៉ុន្មានឆ្នាំមុន ពេលមានវិបត្តិ”។លោកស្រីបញ្ជាក់ថា “ប្រសិនបើយើងត្រូវការលក់យកលុយលឿនដើម្បីបង្វិល ទាល់តែយើងលក់តម្លៃក្រោមទីផ្សារប្រមាណ២០ ទៅ៣០ភាគរយ”។

លោកស្រីបានបញ្ជាក់ឱ្យដឹងថា ក្នុងដំណាក់កាលនេះ សម្រាប់ដីធ្លីនៅតាមបណ្តាខេត្ត មានការនិយមសម្រាប់ប្រភេទដីធ្វើជាផ្ទះលំហែ ឬកន្លែងកំសាន្ត ច្រើនជាងប្រភេទអចលនទ្រព្យទូទៅ។ ចំណែកអចលនទ្រព្យនៅក្នុងក្រុងភ្នំពេញ នៅតែបន្តងាយស្រួលក្នុងការលក់ដូរ គ្រាន់តែម្ចាស់ទ្រព្យត្រូវទម្លាក់តម្លៃក្រោមទីផ្សារបន្តិចបន្តួច។

លោកស្រីតាំង ហួរបានបន្ថែមថា “ជាធម្មតា អ្នកលក់ចង់បានតម្លៃខ្ពស់ ឯអ្នកទិញចង់បានតម្លៃទាប។ ក្នុងករណីនេះ ទាមទារឲ្យមានអាជ្ញាកណ្តាល និងការសម្របសម្រួលគ្នា ដើម្បីសម្រេចការលក់ដូរទ្រព្យបាន”៕

ដោយៈ សុខុម

ហាណូយ: ទោះជាវិបត្តិសេដ្ឋកិច្ចកើនមានឡើង នៅទូទាំងពិភពលោកយ៉ាងណាក្ដី ក៏សេដ្ឋកិច្ចវៀតណាម បានស្ទុះងើបឡើងវិញយ៉ាងរហ័ស និងស្វាហាប់គួរឱ្យស្ញើចសរសើរក្នុងឆ្នាំនេះ ដែលកំណើននេះសម្រេចបានលើសពីការព្យាកររបស់ស្ថាប័នអន្តរជាតិជាច្រើន។

កត្តានេះបានធ្វើឱ្យប្រទេសវៀតណាម ក្លាយជាតារារះចែងចាំងយ៉ាងកម្រក្នុងពិភពលោក ហើយមានសក្តានុពលអាចនឹងក្លាយជា “ខ្លាសេដ្ឋកិច្ច” ថ្មីប្រចាំអាស៊ី។ នេះបើយោងតាមសារព័ត៌មាន Vietnam News ចុះផ្សាយកាលពីថ្ងៃអង្គារ ទី១៨ ខែតុលា។

របាយការណ៍ចុងក្រោយបំផុត ពីការិយាល័យស្ថិតិទូទៅ (GSO) របស់វៀតណាមបានបង្ហាញថា អត្រាកំណើនផលទុនជាតិសរុប (GDP) របស់ប្រទេសនេះ ក្នុងរយៈពេល៩ខែដើមឆ្នាំ២០២២ បានកើនឡើងដល់កម្រិតខ្ពស់បំផុតមិនធ្លាប់មាន ក្នុងរយៈពេល១២ឆ្នាំ ដោយឈានដល់៨,៨៣%។

អ្វីដែលគួរឱ្យកត់សម្គាល់ សេដ្ឋកិច្ចរបស់ប្រទេសនេះ សម្រេចបានកំណើន១៣,៧៦%ក្នុងត្រីមាសទី៣ ចុងឆ្នាំ២០២២ ធៀបនឹង៧,៧២​%ក្នុងត្រីមាសទី២ និង៥,០៥%ក្នុងត្រីមាសទី១ ឆ្នាំនេះ។

កំណើន GDP ១៣,៧%ក្នុងត្រីមាសទី៣ ចុងឆ្នាំ២០២២ គឺជាអត្រាកំណើនប្រចាំត្រីមាសខ្ពស់បំផុត មិនធ្លាប់មាននៅប្រទេសវៀតណាម ដោយខ្ពស់ជាង បើធៀបនឹងអត្រា១៣,៥%របស់ប្រទេសឥណ្ឌា ក្លាយជាអត្រាខ្ពស់បំផុតនៅអាស៊ីក្នុងឆ្នាំនេះ។

ធនាគារពិភពលោក (World Bank) បានលើកឡើងថា ការនាំចេញ និងតម្រូវការរបស់វៀតណាម បានស្ទុះងើបឡើងវិញ ក្រោយការដកចេញវិធានការរឹតបន្តឹងលើការចល័តរបស់មនុស្សដើម្បីទប់ស្កាត់ការរីករាលវិបត្តិកូវីដ-១៩ ហើយភ្ញៀវទេសចរបរទេសក៏វិលត្រលប់ទៅវិញបន្តិចម្ដងៗ។

កំណើនសេដ្ឋកិច្ចរបស់វៀតណាម ត្រូវបានរាយការណ៍នៅក្នុងវិស័យសំខាន់ៗទាំង៣ ដែលក្នុងនោះរួមមានវិស័យសេវាកម្មកើនឡើង១០,៥៧% ឧស្សាហកម្ម-សំណង់កើនឡើង៩,៦៣% និងកសិកម្ម-រុក្ខាប្រមាញ់-នេសាទកើនឡើង២,៩៩%។

ប្រាក់ចំណូលបានពីការនាំចូល-នាំចេញរបស់ប្រទេសវៀតណាម អំឡុងពេលនេះបានកើនឡើង១៥,១% ឈានដល់៥៥៨,៥ពាន់លានដុល្លារអាមេរិក ជាមួយនឹងអតិរេកពាណិជ្ជកម្ម៦,៥២ពាន់លានដុល្លារ ខណៈការលក់រាយសរុបនៃទំនិញប្រើប្រាស់ និងសេវាកម្មបានកើនឡើង២១%។

ក្រៅពីនេះ ស្ថានភាពអាជីវកម្មបាននិងកំពុងប្រសើរឡើងជាបន្តបន្ទាប់ ដោយចំនួនសហគ្រាសដែលទើបបង្កើតថ្មីបានកើនឡើង៣៨,៦% ឈានដល់ជាង១៦៣,០០០សហគ្រាស។

យោងតាមរបាយការណ៍របស់ទីភ្នាក់ងារវិនិយោគបរទេស FIA) នៃក្រសួងផែនការ និងវិនិយោគបង្ហាញថា ការវិនិយោគផ្ទាល់ពីបរទេស (FDI) ក្នុងរយៈពេល៩ខែដើមឆ្នាំនេះក៏បានកើនឡើង១៦,២%ផងដែរ ដោយឈានដល់១៥,៤ពាន់លានដុល្លារ ដែលជាកំណត់ត្រាខ្ពស់បំផុតមិនធ្លាប់មានក្នុងរយៈពេល៥ឆ្នាំ៕ Vietnam News៕

  ដោយៈ គង់ សូរិយា

       ខេត្តកែបៈ រដ្ឋាភិបាលជប៉ុន តាមរយៈស្ថានទូតរបស់ខ្លួនប្រចាំកម្ពុជាបាននិងកំពុងជួយលើកកំពស់ និងវិនិយោគហេដ្ឋារចនាសម្ព័ន្ឋជាច្រើននៅក្នុងខេត្តកែប។

គំរោងទាំងនោះរួមមាន ផ្លូវលេខ1KEK7 (អតីតផ្លូវ​១៣៣៣A) ប្រវែងសរុប៣,៥០០ម៉ែត្រ ដោយដីល្បាយថ្មភ្នំ និងគម្រោងគូសាណូណិ រួមមានការងារសាងសង់លូប្រអប់០១កន្លែង លូមូលទទឹងផ្លូវ០២កន្លែង ស្ថិតក្នុងឃុំពងទឹក ស្រុកដំណាក់ចង្អើរ ខេត្តកែប។

លោកម៉ម ទូច ប្រធានមន្ទីរសាធារណៈការ និងដឹកជញ្ជូនខេត្តកែប បានអោយដឹងថា ផ្លូវលេខ1KEP7 (អតីតផ្លូវ​១៣៣៣A) មានប្រវែងសរុប៣,៧៥០ម៉ែត្រ ដោយបំបែកចេញពីផ្លូវលេខ១៣៣៣ ត្រង់PK4+136 រហូតដល់ផ្លូវលេខ១៣៣៥ ត្រង់គ.ម១+៩៥០ ស្ថិតក្នុងភូមិអន្ទង់ស ឃុំពងទឹក ស្រុកដំណាក់ចង្អើរ ខេត្តកែប ផ្លូវនេះចែកជាពីរផ្នែក ទី១- រដ្ឋាភិបាល និងប្រជាជនជប៉ុន បានផ្តល់ជំនួយឥតសំណង នៃគម្រោងគូសាណូណិ ដោយចាក់ដីល្បាយថ្មប្រវែង២៥០ម ទទឹង៧ម, លូប្រអប់១កន្លែង ប្រវែង៣ម ទទឹង៧ម និងលូមូលកាត់ផ្លូវអង្កត់ផ្ចិត១ម ១ជួរ ប្រវែង១០ម ចំនួន ០២កន្លែង ចន្លោះគ.ម៣+០៥០ ដល់​ គ.ម៣+៣០០(លើខ្នងទំនប់) ជាលទ្ធផលសម្រេចបាន១០០%នៃគម្រោងការងារ។

ទី២-ផ្លូវដែលនៅសល់ប្រវែង៣,៥០០ម៉ែត្រទទឹង១០ម៉ែត្រ ចន្លោះគ.ម០+០០​ដល់​ គ.ម៣+០៥០និងគ.ម៣+៣០០​ដល់គ.ម៣+៧៥០​ ក្នុងគម្រោងផែនការប្រចាំឆ្នាំ របស់មន្ទីរសាធារណការ និងដឹកជញ្ជូនខេត្តកែប គឺជាគម្រោងដែលសម្តេចតេជោ នាយករដ្ឋមន្រ្តីបានផ្តល់ជូនខេត្តកែប តាមរយៈក្រសួងសាធារណការ និងដឹកជញ្ជូន ក្រសួងសេដ្ឋកិច្ច និងហិរញ្ញវត្ថុ និងរដ្ឋបាលខេត្ត ដោយត្រូវពង្រីក និងលើកកំពស់តួថ្នល់រួចចាក់ក្រាលដីល្បាយថ្ម ដែលមានរយៈពេលសាងសង់ចំនួន១២ខែ។

អភិបាលនៃគណៈអភិបាលខេត្ត​ លោកសោម ពិសិដ្ឋមានប្រសាសន៍ក្នុងពិធីសម្ភោធហេដ្ឋារចនាសម្ព័ន្ឋខាងលើ កាលពីថ្ងៃទី១៩ តុលាកន្លងមកថា  ផ្លូវខាងលើនេះ ជាផ្នែកមួយយ៉ាងសំខាន់ ដែលមានភាពប្រទាក់ក្រឡាគ្នា ពិសេសជាការតភ្ជាប់សៀគ្វីទេសចរណ៏ ពីតំបន់នានា មកកាន់តំបន់អេកូទេសចរណ៍ភ្នំវល្លិ៍ និងជាតំបន់កសិឧស្សាហកម្មដ៏មានសក្តានុពល។ ជាមួយគ្នានេះ​ ក៏បានជួយពង្រីកដល់មុខព្រួញវិស័យដទៃទៀត ក្នុងការរួមចំណែកអភិវឌ្ឍខេត្ត និងបង្កើតមុខរបរជូនប្រជាពលរដ្ឋ ក្នុងមូលដ្ឋានឲ្យមានជីវភាពកាន់តែធូរធាឆ្លងផុតពីបន្ទាត់ភាពក្រីក្រ។

លោកបន្តថា “សមិទ្ធផលខាងលើនេះ គឺកើតចេញពីនយោបាយ ឈ្នះ​ ឈ្នះ! របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដែលបានដាក់ចេញ និងដឹកនាំអនុវត្តប្រកបដោយ ជោគជ័យដ៏ត្រចះត្រចង់ ហើយបាននាំមកនូវសុខសន្តិភាពពេញលេញ ការឯកភាពជាតិ ស្ថេរភាពនយោបាយ សន្តិសុខ សណ្តាប់ធ្នាប់សង្គម លទ្ធិប្រជាធិបតេយ្យ និងការគោរពសិទ្ធិមនុស្ស ព្រមទាំងរក្សាបានទាំង ស្រុងនូវអធិបតេយ្យភាព និងបូរណភាពទឹកដី”។ លោកបន្តថា “កត្តាទាំងនេះ គឺជាបច្ច័យដ៏ល្អសម្រាប់ការអភិវឌ្ឍលើគ្រប់វិស័យ ពិសេសការដាក់ចេញ និងអនុវត្តនូវគោលនយោបាយជាតិ អភិវឌ្ឍន៍វិស័យឧស្សាហកម្មកម្ពុជា ឆ្នាំ២០១៥-២០២៥”៕

ដោយៈ វឌ្ឍនៈ

ភ្នំពេញៈ ការបើកដំណើរការផ្លូវល្បឿនលឿនភ្នំពេញ ព្រះសីហនុ ដែលជាផ្លូវប្រវត្តិសាស្រ្តនេះ បានផ្ដល់វិជ្ជមានជាច្រើនដល់សេដ្ឋកិច្ច និងអាជីវកម្មនៅក្នុងខេត្តព្រះសីហនុ ប៉ុន្តែយ៉ាងណាផ្លូវល្បឿនលឿននេះ មិនទាន់ទាក់ទាញការវិនិយោគបន្ថែម នៅក្នុងខេត្តនេះនៅឡើយទេ។

អ្នកនាំពាក្យរដ្ឋបាលខេត្តព្រះសីហនុ លោកឃាង ភារម្យ បានមានប្រសាសន៍ឲ្យដឹងតាមទូរស័ព្ទកាលពីថ្ងៃទី១៩ តុលាថា ផ្លូវល្បឿនលឿនតែមួយមុខមិនអាចទាក់ទាញ ឬបង្កើនការវិនិយោគ នៅក្នុងខេត្តព្រះសីហនុឬក៏ប្រទេសកកម្ពុជាទាំងមូលបានទេ តែយ៉ាងណាក៏ឃើញថា សកម្មភាពសេដ្ឋកិច្ចពាណិជ្ជកម្ម នៅក្នុងខេត្តព្រះសីហនុ ហាក់មានដំណើរការល្អឡើងវិញ ចាប់តាំងពីដំណើរការផ្លូវល្បឿនលឿននេះមក។

លោកបន្តថា “ទោះបីជាយើងមានផ្លូវល្បឿនលឿន តភ្ជាប់ពីភ្នំពេញមកក្រុងព្រះសីហនុមែន តែស្ថានភាពសេដ្ឋកិច្ចសកល ដែលបណ្ដាលមកពីវិបត្តិធំៗនៅមិនទាន់ចប់នៅឡើយ គឺវិបត្តិកូវីដ១៩ និងវិបត្តិនៃសង្គ្រាមរវាងរុស្ស៊ី និងអ៊ុយក្រែន ដែលបណ្ដាលឱ្យមានវិបត្តិកាន់តែអូសបន្លាយ”។

លោកបន្ថែមថា យ៉ាងណាកក្ដីគម្រោង ដែលបានផ្អាកដំណើរការសាងសង់បណ្ដោះអាសន្ន នៅខេត្តព្រះសីហនុនាពេលកន្លងមក ក៏ឃើញថាចាប់ផ្ដើមសាងសង់ឡើងវិញ រយៈពេលប៉ុន្មានខែកន្លងមកនេះ តែក្រោយពេលគម្រោងផ្លូវល្បឿនលឿនភ្នំពេញ បើកដំណើរការ សាកល្បងយើងមិនទាន់មានគម្រោងថ្មីៗច្រើន ចូលមកខេត្តព្រះសីហនុនៅឡើយ។ ប៉ុន្តែយ៉ាងណា យើងនៅតែមានក្ដីរំពឹងខ្ពស់ ពីការវិនិយោគពីបរទេស នៅពេលឆាប់ៗខាងមុខនេះដែរ ។

អ្នកនាងគឹម គិនកេសា នាយិការងផ្នែកស្រាវជ្រាវ និងវាយតម្លៃនៃក្រុមហ៊ុនអចលនទ្រព្យCBRE Cambodia បានលើកឡើងថា សកម្មភាពទេស​ចរណ៍ក្នុងស្រុកមានកំណើនឡើង ពិសេសនៅក្នុងខេត្តព្រះសីហនុ នឹងមិនជំរុញឱ្យមានសកម្មភាព វិនិយោគអចលនទ្រព្យខ្លាំងនោះទេ ។ សកម្មភាពនេះ នឹងចាប់ផ្ដើមល្អប្រសើរ នៅពេលស្ថានភាពសេដ្ឋកិច្ចសកលមានស្ថានភាពល្អ និងវិបត្តិសកលក៏លែងមានបញ្ហា ទើបជនបរទេសចេញស្វែងរកការវិនិយោគនៅក្រៅប្រទេសដូចមុនបាន៕

ដោយៈ វឌ្ឍនៈ

ភ្នំពេញៈ ប្រមុខរាជរដ្ឋាភិបាលកម្ពុជា បានបង្កើតគណៈកម្មការអន្តរក្រសួង ដើម្បីជម្រុញការងារសាងសង់ផ្លូវល្បឿនលឿនភ្នំពេញ បាវិតកាលពីពេលថ្មីៗនេះ និងរំពឹងថា ផ្លូវល្បឿនលឿនខ្សែទី២នេះ នឹងអាចបើកការដ្ឋាន​សាងសង់នាឆ្នាំក្រោយ។

យ៉ាងណាក្ដីខេត្តព្រៃវែង ដែលផ្លូវល្បឿនលឿន នឹងត្រូវរត់កាត់ខេត្តនេះផងដែរនោះ ក៏មិនបានធ្វើឲ្យទីផ្សារអចលនទ្រព្យ ក្នុងខេត្តនេះកំរើកនៅឡើយ។

ប្រធានសាខានៃក្រុមហ៊ុនអចលនទ្រព្យ Century 21 Zillion Holding លោកម៉ៅ មុនីរតនា បានប្រាប់Property Area នៅរសៀលថ្ងៃទី១៩ តុលា ២០២២នេះឱ្យដឹងថា  ក្នុងរយៈពេល៣ខែចុងក្រោយនេះ លោកមើលឃើញថាសកម្មភាព នៃការស្វែងរកទីតាំងវិនិយោគ ឬសកម្មភាពនៃការដោះដូរអចលនទ្រព្យ ក្នុងខេត្តព្រៃវែងកាន់តែស្ងាត់ ។

លោកបន្តថា “គម្រោងផ្លូវល្បឿនលឿនភ្នំពេញ បាវិតវានឹងផ្ដល់ផលអំណោយផលដល់ខេត្តព្រៃវែងនាពេលខាងមុខ”។លោកបន្តដោយសុទិ​ដ្ឋិនិ​យមថា “ប៉ុន្តែក្នុងពេលនេះ ដោយសារតែស្ថានភាពសេដ្ឋកិច្ចសកល ដែលបណ្ដាលមកពីវិបត្តិកូវីដ១៩ផង និងវិបត្តិនៃសង្គ្រាមរវាងរុស្ស៊ីនិងអ៊ុយក្រែនផង ទើបធ្វើឱ្យការវិនិយោគមកពីបរទេសបន្តថមថយ និងមានចំនួនតិចតួច ប៉ុន្តែបើសិនជាស្ថានភាពសេដ្ឋកិច្ចល្អប្រសើរនោះ  គម្រោងផ្លូវល្បឿនលឿនភ្នំពេញ បាវិតនឹងធ្វើឱ្យសក្ដានុពលខេត្ត ព្រៃវែងមានសន្ទុះខ្លាំង”។

លោកមុនីរតនាបានបន្តថា ក្នុងរយៈពេល៣ខែចុងក្រោយនេះ ពួកយើងបានដាក់ផ្លាកលក់ដី ឬអចលនទ្រព្យក្នុងខេត្ត កុំថាឡើយមានការទិញសូម្បីតែទូរសព្ទមកសួរនាំក៏អត់ដែរ ដែលបានមានន័យថាកាន់តែស្ងាត់មែនទែន។

លោកបន្ថែមថា ថ្វីត្បិតតែសកម្មភាពនៃការដោះដូរ ស្ងប់ស្ងាត់ជាងមុនពិតមែនតែតម្លៃអចលនទ្រព្យរួមមានដីធ្លី និងផ្ទះសំបែងជាដើមមិនមានការថមថយទេ ពោលគឺនៅរក្សាតម្លៃថេរដដែល គ្រាន់តែមិនមានអ្នកទិញ ហើយគម្រោងអភិវឌ្ឍន៍មួយចំនួន បានអនុវត្តន៍នាពេលកន្លងមក ក៏អត់ផ្អាកដំណើរការដែរ គឹនៅតែបន្តសកម្មភាពគម្រោងរបស់គេដដែល ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក​ច្រឹក​ សុខនីម បានលើកឡើងនាពេលកន្លងមកថា ដរាបណាវិនិយោគិនបរទេសមិនទាន់ចូលមកកម្ពុជាច្រើន ដូចមុនពេលវិបត្តិ ការវិនិយោគអចលនទ្រព្យ ឬក៏វិស័យអចលនទ្រព្យទាំងមូល នឹងប្រសើរដូចកាលមុនវិបត្តិនោះទេ។

លោកបន្តថា “ការវិនិយោគពីសំណាក់វិនិយោគិនក្នុងស្រុក ជាចំណែ​កមួយ ដែលជួយទប់មិនឱ្យវិស័យនេះធ្លាក់ចុះ ឬអាក្រក់កាន់តែខ្លាំង”។លោក​បន្ថែមថា “ចរន្តនៃការវិនិយោគរបស់វិនិយោគិន ក្នុងស្រុកក្នុងរយៈពេលជាង២ឆ្នាំកន្លងមកនេះឃើញថា កាន់តែមានកំណើនឡើង ដែលអាចនិយាយបានវាជាឱកាសមួយ សម្រាប់វិនិយោគិនក្នុងស្រុក ក្នុងការពង្រីកអាជីវកម្មអចលនទ្រព្យរបស់ខ្លួននៅក្នុងប្រទេសកម្ពុជា”៕

ដោយៈ គង់ សូរិយា

       ភ្នំពេញៈ មន្រ្តីជាន់ខ្ពស់ក្រសួងរៀបចំដែនដី នគរូបនីយកម្មនិងសំណង់បានដឹកនាំកិច្ចប្រជុំពិនិត្យប្លង់គោលប្រើប្រាស់ដី នៅមក្នុងក្រុងព្រះវិហារ ខេត្តព្រះវិហារ។

កិច្ចប្រជុំកាលពីព្រឹកថ្ងៃទី១៩ តុលាកន្លងមកនេះ ដឹកនាំដោយបណ្ឌិត ប៉ែន សុផល រដ្ឋលេខាធិការ​ ក្រសួង​រៀបចំដែនដីនគរូបនីយកម្ម និងសំណង់​ និងជាអគ្គលេខាធិការ គ.ដ.ន.ជ.​ បានដឹកនាំកិច្ចប្រជុំពិនិត្យប្លង់គោលប្រើប្រាស់ដីក្រុងព្រះវិហារ ខេត្តព្រះវិហារ​។

ប្លង់គោលប្រើប្រាស់ដីមានតួនាទី ដ៏មានសារៈសំខាន់ ដើម្បីរៀបចំផែនការអភិវឌ្ឍន៍ប្រកបដោយនិរន្តរភាព និងចីរភាព ដោយអាជ្ញាធរអាចមានផែនទីបង្ហាញផ្លូវច្បាស់លាស់ លើការរៀបចំហេដ្ឋារចនាសម្ព័ន្ឋ ហ្សូនអភិវឌ្ឈន៍វិស័យនិមួយៗមានភាពលំអិត ដែលធ្វើឲ្យផែនការអភិវឌ្ឍន៍ទីក្រុងអាចរៀបចំឡើងដោយសណ្តាប់ធ្នាប់ របៀបរៀបរយ និងសោភ័័ណភាព៕