ដោយ: លាងហួរ

បាងកក: គណៈរដ្ឋមន្ត្រី​ថៃ បាន​ផ្តល់ការឯកភាពដល់ក្រសួង​ដឹកជញ្ជូ ន​ ក្នុងការបន្ត​សាងសង់​ស្ពាន​ធំៗ​ចំនួន​២នៅ​ភាគខាងត្បូង​។

គម្រោងស្ពានចំនួន២ ដែលត្រូវបានអនុម័ត កាលពីថ្ងៃអង្គារម្សិលមិញនេះ គ្រោងនឹងចំណាយថវិកា សរុបចំនួន៦,៣៥ពាន់លានបាត(ប្រហែ ល១៦៦,៨១លានដុល្លារ)។

ក្នុងនោះស្ពានមួយខ្សែ នឹងតភ្ជាប់ពីស្រុកKrasae Sinក្នុងខេត្ត Songkhla ទៅកាន់ស្រុកChaison នៃខេត្តPhathalung ដែលនឹងចំណា យទឹកប្រាក់ប្រហែល៤,៥ពាន់លានបាត ខណៈដែលស្ពានតភ្ជាប់រវាងកោះ Ko Klangក្នុងខេត្តKrabi និងកោះ Koh Lanta Noi នឹងត្រូវចំណាយថវិកាអស់ប្រហែល១,៨៥ពាន់លានបាត។

របាយការណ៍វាយតម្លៃផលប៉ះពាល់បរិស្ថាន របស់គម្រោងត្រូវបានអនុម័ត ដោយការិយាល័យគោលនយោបាយ និងផែនការធនធានធម្មជាតិ និងបរិស្ថាន ហើយការសាងសង់អាចនឹងចាប់ផ្តើម នៅពាក់កណ្តាលឆ្នាំក្រោយ និងបញ្ចប់នៅឆ្នាំ២០២៦។

លោក Saksayam Chidchob រដ្ឋមន្ត្រីក្រសួងដឹកជញ្ជូន និងជាអគ្គលេខាធិការគណបក្ស Bhumjaithai បាននិយាយថា ស្ពាននេះនឹងត្រូវបានផ្តល់មូលនិធិ តាមរយៈប្រាក់កម្ចីពីបរទេស ក្នុងនោះថវិកាចំនួន៣០ភាគរយនឹងបានកម្ចីមកពីធនាគារពិភពលោក។

លោក​បន្ថែម​ថា គម្រោង​ទាំង​នោះ​នឹង​ត្រូវ​ដាក់​ដេញ​ថ្លៃ ​នៅ​ក្នុងខែ​ធ្នូខាងមុខនេះ៕

ដោយៈ សុផារី

ភ្នំពេញៈ ការប្រកួតប្រជែងខ្ពស់នៅក្នុងទីផ្សារបុរី បានជំរុញឱ្យអ្នកអភិវឌ្ឍន៍ធ្វើការសំរិតសំរាំងកាន់តែខ្លាំង លើគុណភាពសំណង់ និងសោភ័​ណភាពនៃគម្រោងរបស់ខ្លួន ដើម្បីដណ្តើមបានចំណែកទីផ្សារ ដែលកំពុងតែចង្អៀតនេះ។

យោងតាមរបាយការណ៍ប្រចាំត្រីមាសទី៣ ឆ្នាំ២០២២ របស់ក្រុមហ៊ុន CBRE Cambodia ចេញផ្សាយនៅដើមខែតុលានេះ បានឱ្យដឹងថា នៅក្នុងរយៈពេល៣ខែចុងក្រោយនេះ ទីផ្សារបុរីគ្រប់ប្រភេទ និងគ្រប់ទម្រង់កំពុងប្រឈមការប្រកួតប្រជែងខ្ពស់ ដែលជំរុញឱ្យមានការធ្លាក់ចុះតម្លៃគួរឱ្យកត់សម្គាល់។

របាយការណ៍នេះឱ្យដឹងថា នៅក្នុងត្រីមាសទី៣ មានគម្រោងអភិវឌ្ឍន៍ចំនួនជាង១៩០បាន និងកំពុងសាងសង់គម្រោងបុរី ដែលនាំឱ្យមានការផ្គត់ផ្គង់ថ្មីជិត៧ម៉ឺនយូនីត ទៅក្នុងទីផ្សារបុរីនៅក្នុងក្រុងភ្នំពេញ។

លោកឧកញ៉ា នួន រឹទ្ធី អគ្គនាយកក្រុមហ៊ុនអចលនទ្រព្យ KFA បានមានប្រសាសន៍ប្រាប់ Property Area Asia កាលពីដើមសប្តាហ៍ថា ថ្វីត្បិតតែមានការប្រកួតប្រជែងខ្ពស់ពិតមែន តែតម្លៃនៃលំនៅឋាននៅក្នុងប្រទេសមិនអាចធ្លាក់ចុះបានទេ ព្រោះការនាំចូលវត្ថុធាតុដើមពីបរទេស ការកើនឡើងនៃតម្លៃថាមពលប្រេងឥន្ធនៈ អតិផរណា និងតម្លៃពលកម្មដែលកើនឡើងផងដែរ។

លោកឧកញ៉ាបញ្ជាក់ថា ផ្ទុយទៅវិញ អ្នកអភិវឌ្ឍន៍ប្រកួតប្រជែងគ្នា ដោយព្យាយាម ក្នុងការបង្កើននូវតម្លៃបន្ថែម ដល់គម្រោងលក់របស់ខ្លួន តាមរយៈការបង្កើនគុណភាពសំណង់ ការរចនាប្លងស្ថាបត្យកម្មស្រស់ស្អាតខុសប្លែកពីគេ និងភាពជាក់លាក់នៃច្បាប់ទម្លាប់សាងសង់។

លោកឧកញ៉ាមានប្រសាសន៍ថា “ឥឡូវនេះ អ្នកអភិវឌ្ឍន៍ធ្វើអ្វីផ្ចិតផ្ចង់លើច្បាប់ទម្លាប់ ការបំពេញកាតព្វកិច្ចផ្សេងៗ ធ្វើបង្កើនគុណភាព និងសម្រស់”។ លោកបន្តថា “នេះជាផលចំណេញក្នុងការប្រកួតប្រជែង និងការផ្តល់ជម្រើសកាន់តែច្រើនដល់អ្នកទិញ”។

ចំណែកលោកឧកញ៉ា តេង រិទ្ធី ស្ថាបនិកក្រុមហ៊ុន R Investment Group បានលើកឡើងថា អ្នកសាងសង់លំនៅឋាន បុរី គួរបន្ថែមអ្វីថ្មី ដែលអាចយកឈ្នះលើដៃគួប្រកួតប្រជែង ដោយការស្វែងរកនូវទីតាំងដែលសមស្របមួយ ហើយអភិវឌ្ឍន៍ឱ្យត្រូវនឹងតម្រូវការជាក់ស្តែងរបស់អតិថិជន ដើម្បីបង្គើតជាតំបន់លំនៅឋាន ឬបុរី ប្រកបដោយនិរន្តភាព។

លោកបណ្ឌិតបន្ថែមថា អ្នកអភិវឌ្ឍន៍គួរយកចិត្តទុកដាក់លើការបង្កើនបរិយាកាស ខ្យល់អាកាសបរិសុទ្ធ សួនច្បារ សុវត្ថិភាព ប្រព័ន្ធទឹក ភ្លើង គុណភាពសំណង់ ជាដើម ដោយសារប្រជាជនកម្ពុជាបច្ចុប្បន្ននេះនិយមក្នុងការជ្រើសរើសប្រភេទលំនៅឋាន ដែលមានទីធ្លាធំ និងបរិយាកាសល្អ។

ជាមួយគ្នានេះ អ្នកនាង គឹម គិនកេសា អ្នកគ្រប់គ្រងជាន់ខ្ពស់នៃក្រុមហ៊ុនអចលនទ្រព្យ CBRE Cambodia បានមានប្រសាសន៍ថា ស្របពេលនិន្នាការនេះកំពុងបន្ត អ្នកអភិវឌ្ឍន៍មានការគិតគូរច្រើនជាងមុន អំពីការកំណត់តម្លៃ ដើម្បីផ្តល់ជូននូវតម្លៃប្រកួតប្រជែងល្អមួយដល់អតិថិជន ដែលនាំឱ្យពួកគាត់កាន់តែប្រយ័ត្នប្រយែង ក្នុងការជ្រើសរើសក្រុមហ៊ុនម៉ៅការសំណង់ និងសម្ភារសំណង់៕

ដោយៈ គង់ សូរិយា

       ភ្នំពេញៈ អ្នកជំនាញអចលនទ្រព្យជើងចាស់មួយរូប បានបង្ហាញផ្នែកសំខាន់ៗជាច្រើននៃវិស័យអចលនទ្រព្យ និងសេដ្ឋកិច្ចកម្ពុជានៅតែបន្តរីកចម្រើនសម្រាប់រយៈពេលវែងខាងមុខ។

អគ្គនាយិកាក្រុមហ៊ុនPropNex Cambodia អ្នកស្រីអាន សុធីតាបានមានប្រសាសន៍ឲ្យដឹងកាលពីចុងសប្តាហ៍មុនថា មានផ្នែកននិងវិស័យ​សំខាន់ៗជាច្រើន នឹងបន្តរីកចម្រើនសម្រាប់រយៈពេលវែងខាងមុខ ដោយក្នុងនោះទី១ តម្លៃដីធ្លីនៅកម្ពុជានឹងបន្តរីកចម្រើន រយៈពេលវែងបន្តទៀត ដោយរយៈពេល១០ឆ្នាំចុងក្រោយនេះ តម្លៃដីធ្លីនៅកម្ពុជាបានកើនឡើង១០ទៅ១២ភាគរយ ដោយសារការីកចម្រើនផ្នែកសេដ្ឋកិច្ច និងការវិនិយោគហេដ្ឋារចនាសម្ព័ន្ឋរបស់រដ្ឋាភិបាល។

អ្នកស្រីបន្តថា “ទោះបីជាមានបញ្ហាប្រឈមខ្លះក្តី ប៉ុន្តែវិស័យនេះនៅតែបន្តរីកចម្រើន ដោយតម្លៃដីធ្លីបានកើនឡើងចន្លោះពី៥ ទៅ១០ភាគរយ សម្រាប់ដីនៅតាមបណ្តាជាយក្រុង និងតំបន់អភិវឌ្ឍន៍នានា”។

ទី២ វិស័យឧស្សាហកម្មនឹងមានការរីកចម្រើន ដោយអ្នកវិនិយោគអន្តរជាតិបានផ្តោតលើកម្ពុជា ព្រោះពួកគេបានចាកចេញពីប្រទេសចិន វៀតណាម និងបណ្តាប្រទេសមួយចំនួនទៀត ដោយសារដីមានតម្លៃសមរម្យ កំលាំងពលកម្មទាប បើទោះជាមានបញ្ហាប្រឈមហេដ្ឋារចនាសម្ព័ន្ឋក្តី ប៉ុន្តែរដ្ឋាភិបាលបាននិងកំពុងធ្វើការងារនេះយ៉ាងសកម្ម ទី៣ វិស័យកសកម្ម នឹងមានការរីកចម្រើនខ្លាំង បើមានការវិនិយោគការគាំទ្រពីរដ្ឋាភិបាល និងបង្កើ​នការវិនិយោគផ្នែកបច្ចេកវិទ្យា។

ទី៤ ទីផ្សារការិយាល័័យ នឹងមានភាពប្រសើរឡើង ដែលបច្ចុប្បន្នមានស្ថានភាពល្អប្រសើរ ទី៥ វិស័យសណ្ឋាគារ និងទេសចរណ៍ដែលនឹងមានការរីកចម្រើនឡើងវិញ ដែលបច្ចុប្បន្នភ្ញៀវអន្តរជាតិបាន និងកំពុងកើនឡើង និងទី៦ ទីផ្សារលក់រាយនឹងបន្តកើនឡើង ស្របពេលការផ្គត់ផ្គង់និងតម្រូវការកើនឡើង ដោយសារកំណើនប្រាក់ចំណូលរបស់ប្រជាពលរដ្ឋ។

អនុប្រធានសភាពាណិជ្ជកម្មកម្ពុជា លោកឧកញ៉ាលឹម ហេងបានមានប្រសាសន៍ងឲ្យដឹងកាលពីសប្តាហ៍មុនថា លំហូរពាណិជ្ជកម្មកម្ពុជាកំពុងមានភាពប្រសើរឡើង បន្ទាប់ពីរដ្ឋាភិបាលបើកចំហប្រទេសឡើងវិញ ពិសេ​សការចូលជាធរមាន នៃកិច្ចព្រមព្រៀងពាណិជ្ជកម្មកម្ពុជា ចិន ការចូលជាធរមាននៃកិច្ចព្រមព្រៀងដៃគូសេដ្ឋកិច្ចគ្រប់ជ្រុងជ្រោយតំបន់ និងការត្រៀម​ចូលជាធរមាននៃកិច្ចព្រមព្រៀងពាណិជ្ជកម្មសេរីកម្ពុជា កូរ៉េ។

លោកបន្តថា “ទំនាក់ទំនងល្អរវាងរដ្ឋាភិបាលកម្ពុជា ចិន និងដៃគូដទៃទៀតបាននិងកំពុងធ្វើឲ្យលំហូរពាណិជ្ជកម្ម និងកំនើនសេដ្ឋកិច្ចកម្ពុជាមានភាពល្អប្រសើរ”។

តាមការព្យាករណ៍របស់លោកឧបនាយករដ្ឋមន្រ្តីអូន ព័ន្ឋមុនីរ័ត្នរដ្ឋមន្រ្តី​ក្រសួងសេដ្ឋកិច្ច និងហិរញ្ញវត្ថុបានឲ្យដឹងថា សេដ្ឋកិច្ចកម្ពុជានៅឆ្នាំ២០២២នេះ នឹងអាចសម្រេចបានកំនើន៥ភាគរយ និងឆ្នាំ២០២៣ខាងមុខ សេដ្ឋកិច្ចកម្ពុជានឹងអាចទទួលបានកំណើនរហូតដល់៦ភាគរយ៕

 ដោយៈគង់ សូរិយា

       ភ្នំពេញៈ លោបណ្ឌិត ចូហ្សេ ម៉ានូអែល រ៉ាមូស អរតា (Jose Ramos-Horta) ប្រធានាធិបតីទីម័រឡេស្តេ ដឹកនាំគណៈប្រតិភូជាន់ខ្ពស់ បានអញ្ជើញមកដល់រាជធានីភ្នំពេញហើយ ដើម្បីបំពេញទស្សនកិច្ចផ្លូវរដ្ឋនៅកម្ពុជា ចាប់ពីថ្ងៃទី ១៩ ដល់ថ្ងៃទី២១ ខែតុលា ឆ្នាំ២០២២។

ដំណើរទស្សនកិច្ចធ្វើឡើង តបតាមការអញ្ជើញរបស់ព្រះករុណា ព្រះបាទសម្តេច នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។

ក្នុងអំឡុងពេលទស្សនកិច្ចផ្លូវរដ្ឋនេះ លោកបណ្ឌិត Jose Ramos-Horta នឹងចូលក្រាបបង្គំគាល់ ព្រះករុណាជាអម្ចាស់ជីវិតលើត្បូង នៅព្រះបរមរាជវាំង។ លោកប្រធានាធិបតី ក៏នឹងមានជំនួបដោយឡែកពីគ្នាជាមួយ សម្តេចវិបុលសេនាភក្តីសាយ ឈុំ ប្រធានព្រឹទ្ធសភា សម្តេចពញាចក្រី ហេង សំរិន ប្រធានរដ្ឋសភា និងសម្តេចតេជោ ហ៊ុន សែន នាយករដ្ឋមន្ត្រីកម្ពុជា។

សម្តេចតេជោនាយករដ្ឋមន្ត្រី និង ឯកឧត្តមប្រធានាធិបតីទីម័រខាងកើត នឹងអញ្ជើញជាអធិបតីដ៏ខ្ពង់ខ្ពស់ ក្នុងពិធីចុះហត្ថលេខា លើឯកសារទ្វេភាគីដ៏មានសារសំខាន់ចំនួនពីរ រួមមាន កិច្ចព្រមព្រៀងសេវាកម្មអាកាសចរណ៍ និងអនុស្សរណៈនៃការយោគយល់ស្តីពី ពាណិជ្ជកម្មស្រូវរវាងប្រទេសទាំងពីរ។

លោកបណ្ឌិត Jose Ramos-Horta នឹងអញ្ជើញដាក់កម្រងផ្កាគោរពវិញ្ញាណក្ខន្ធ នៅវិមានឯករាជ្យ និងកន្រ្តកផ្កានៅមណ្ឌបព្រះបរមរូប ព្រះករុណា ព្រះបាទសម្តេច ព្រះនរោត្តម សីហនុ “ព្រះបរមរតនកោដ្ឋ” អតីតព្រះមហាក្សត្រនៃព្រះរាជាណាចក្រកម្ពុជាផងដែរ។

ដំណើរទស្សនកិច្ចផ្លូវរដ្ឋរបស់ឯកឧត្តម បណ្ឌិតចូហ្សេ ម៉ានូអែល រ៉ាមូស អរតា មកកាន់កម្ពុជា នឹងបន្តពង្រឹង និងធ្វើឱ្យកាន់តែស៊ីជម្រៅបន្ថែមទៀតនូវទំនាក់ទំនង និងកិច្ចសហប្រតិបត្តិការ ទាំងនៅក្នុងក្របខ័ណ្ឌទ្វេភាគី និងពហុភាគី ដើម្បីផលប្រយោជន៍ទៅវិញទៅមកនៃប្រទេសទាំងពីរ៕

ដោយ: លាងហួរ

វ៉ាស៊ីនតោន: មន្ត្រីជាន់ខ្ពស់អាមេរិកមួយរូបបានឱ្យដឹងថា ប្រធានាធិ​   បតីចូ បៃដិន នឹងប្រកាសនៅថ្ងៃពុធ ទី១៩ ខែតុលានេះអំពីការបញ្ចេញប្រេងពីស្តុកចំនួន១៥លានបារ៉ែលចុងក្រោយ ទៅលើទីផ្សារហើយសហរដ្ឋអាមេរិកនឹងអាចបញ្ចេញប្រេងបន្ថែមទៀត ប្រសិនបើតម្លៃថាមពលបន្តកើនឡើង។

មន្ត្រីជាន់ខ្ពស់អាមេរិកមួយរូបបាននិយាយថា ប្រេងថ្មីដែលបញ្ចេញពីស្តុកបម្រុងប្រេងយុទ្ធសាស្ត្រ នឹងមានចំនួន១៨០លានបារ៉ែល សម្រាប់និទាឃរដូវ ដើម្បីឆ្លើយតបទៅនឹងការឡើងថ្លៃប្រេង ដែលទាក់ទងនឹងការឈ្លានពានរបស់រុស្ស៊ីលើអ៊ុយក្រែន។

បទបញ្ជាដែលលោកបៃដិន នឹងប្រកាសនៅក្នុងសុន្ទរកថា មានន័យថាប្រធានាធិបតីនឹង បញ្ជាក់យ៉ាងច្បាស់ថារដ្ឋបាលសហរដ្ឋអាមេរិក ត្រូវបានរៀបចំ ដើម្បីលក់ប្រេងបន្ថែមនៅរដូវរងានេះ ប្រសិនបើមានតម្រូវការ ដោយសារតែរុស្ស៊ី ឬសកម្មភាពផ្សេងទៀតបានរំខាន ដល់ទីផ្សារពិភពលោក។

ក្រុមហ៊ុននាំចេញថាមពលដ៏ធំរបស់រុស្សី បានរងការវាយប្រហារដោយទណ្ឌកម្មរបស់សហរដ្ឋអាមេរិក និងអឺរ៉ុបភ្លាមៗបន្ទាប់ពីរុស្ស៊ី បានលុកលុយអ៊ុយក្រែនក្នុងខែកុម្ភៈ ដែលបង្កឱ្យមានភាពចលាចលលើទីផ្សារ។

លើសពីនេះ វិមានក្រឹមឡាំងបានគំរាម ប្រើប្រាស់ឥទ្ធិពលរបស់ខ្លួនលើការផ្គត់ផ្គង់ថាមពល ជាអាវុធសេដ្ឋកិច្ចប្រឆាំងនឹងលោកខាងលិច ដែលបានគាំទ្រដល់ការប្រយុទ្ធរបស់អ៊ុយក្រែន ដើម្បីទប់ទល់នឹងការឈ្លានពានរបស់ខ្លួន។

លោកចូ បៃដិនបានបង្ហាញការព្រួយបារម្ភយ៉ាងខ្លាំង ចំពោះបញ្ហាក្នុងប្រទេស ដោយតម្លៃសាំងស្ថិតនៅចំណុចមួយ ជាមធ្យមលើសពី៥ដុល្លារអាមេរិកក្នុង១ហ្គាឡុង(ប្រហែល៣,៧៨៥លីត្រ) ដែលបង្កឱ្យពលរដ្ឋមានកំហឹងទូទាំងប្រទេស។

ខណៈតម្លៃប្រេងមានកម្រិតល្មម ចាប់តាំងពីពេលនោះមក អតិផរណានៅតែជាកត្តាដ៏ធំបំផុត ដែលជំរុញឱ្យគណបក្សសាធារណរដ្ឋ មានសង្ឃឹមក្នុងការយកឈ្នះគណបក្សប្រជាធិបតេយ្យ នៅក្នុងការបោះឆ្នោតនីតិបញ្ញត្តិពាក់កណ្តាលអាណត្តិក្នុងខែវិច្ឆិកាខាងមុខ៕