ដោយៈ សុខុម

ម៉ូស្គូ: ប្រទេសរុស្ស៊ី គ្រោងនឹងចំណាយ២២,៧ពាន់លានដុល្លារអាមេរិក ដែលបានពីមូលនិធិSovereign Wealth Fund (SWF) របស់ខ្លួនដើម្បីទិញយន្តហោះថ្មីៗ មកជំនួសយន្តហោះអាមេរិក និងយន្តហោះអឺរ៉ុប។

ទោះជាយ៉ាងណា ការផ្លាស់ប្ដូរនេះមិនមែនមកពីរុស្ស៊ី មិនចូលចិត្តប្រើយន្តហោះ ដ៏មានគុណភាពផលិតដោយសហរដ្ឋអាមេរិក និងអឹរ៉ុបនោះទេ ប៉ុន្តែគឺដោយសារខ្លួនពិបាករកគ្រឿងបន្លាស់ សម្រាប់ជួសជុលយន្តហោះទាំងនោះ ខណៈខ្លួនកំពុងទទួលរងទណ្ឌកម្ម ជុំទិសពីសំណាក់លោកខាងលិច។ នេះបើយោងតាមទីភ្នាក់ងារព័ត៌មាន Reuters ចុះផ្សាយកាលពីថ្ងៃអង្គារ ទី១៨ ខែតុលា។

បណ្ដាក្រុមហ៊ុនជួលយន្តហោះ នឹងទទួលបានប្រាក់ទាំងនេះ ដើម្បីយកទៅទិញយន្តហោះថ្មីៗ ដែលផលិតដោយរុស្ស៊ី រួមទាំងយន្តហោះម៉ូឌែល Superjet New ផលិតដោយក្រុមហ៊ុន Sukhoi និងយន្តហោះម៉ូឌែល MS-21 ផលិតដោយក្រុមហ៊ុន Irkut ផងដែរ ដើម្បីជំនួសយន្តហោះផលិតដោយក្រុមហ៊ុនអាមេរិក Boeing និងយន្តហោះផលិតដោយក្រុមហ៊ុនអឺរ៉ុប Airbus។

រដ្ឋមន្ត្រីក្រសួងហិរញ្ញវត្ថុរុស្ស៊ី លោក Anton Siluanov បានលើកឡើងក្នុងកិច្ចប្រជុំគណៈកម្មាធិការ ទទួលបន្ទុកថវិកាកាលពីថ្ងៃច័ន្ទ ទី១៧ ខែតុលា នៅក្នុងសភាជាន់ទាបរុស្ស៊ី ថា “ក្រុមហ៊ុនផលិតយន្តហោះរបស់យើង នឹងត្រូវបានធានាទទួលបានតម្រូវការជួល ពីបណ្ដាក្រុមហ៊ុនអាកាសចរណ៍ក្នុងស្រុករបស់យើង”។

លុយដែលត្រូវចំណាយសម្រាប់គម្រោងប្ដូរយន្តថ្មីនេះ នឹងត្រូវបង្វែរចេញពីមូលនិធិ National Wealth Fund (NWF) ដែលកំពុងត្រូវបានប្រើប្រាស់កាន់តែខ្លាំងឡើង ដើម្បីជំរុញសេដ្ឋកិច្ចប្រឈមមុខនឹងការដាក់ទណ្ឌកម្មរបស់លោកខាងលិច ក្រោយពីរុស្ស៊ី បញ្ឆេះសង្គ្រាមចូលឈ្លានពានប្រទេសអ៊ុយក្រែន កាលពីថ្ងៃទី២៤ ខែកុម្ភៈ ដើមឆ្នាំនេះ។

តំណាងក្រសួងហិរញ្ញវត្ថុរុស្ស៊ី លើកឡើងថា តាមការរំពឹងទុកមូលនិធិនេះនឹងត្រូវចំណាយនៅឆ្នាំ២០៣០។

ក្រុមហ៊ុន Rostec ដែលគ្រប់គ្រងដោយរដ្ឋរុស្ស៊ី បាននិយាយកាលពីខែកញ្ញា ថា ឧស្សាហកម្មអាកាសចរណ៍របស់ប្រទេសរុស្ស៊ី មានបំណងផលិតយន្តហោះឱ្យបានចំនួន១.០០០គ្រឿង នៅឆ្នាំ២០៣០ ដើម្បីបញ្ចប់ការពឹងផ្អែករបស់ខ្លួន លើយន្តហោះដែលផលិតដោយលោកខាងលិច៕ Reuters៕

ដោយ: លាងហួរ

អាមេរិក: លោក Mark Zuckerberg នាយកប្រតិបត្តិនៃក្រុមហ៊ុនបច្ចេកវិទ្យាយក្សអាមេរិក Meta Platforms បានជួបជាមួយមន្ត្រីជាន់ខ្ពស់របស់ក្រុមហ៊ុន Samsung Electronics ដើម្បីពិភាក្សាអំពីវិធីសម្រាប់កិច្ចសហប្រតិបត្តិការអាជីវកម្មរវាងក្រុមហ៊ុនទាំងពីរ។

យោងតាមប្រភពមួយបានឱ្យដឹងថា លោកMark Zuckerberg បានអញ្ជើញទៅទស្សនាក្រុមហ៊ុន Samsung Research America នៅតំបន់ភាគខាងជើងរដ្ឋកាលីហ្វ័ញ៉ា(Silicon Valley)ហើយលោកបានជួបពិភា​ក្សាជាមួយលោក Han Jong-hee ប្រធានផ្នែកបទពិសោធន៍ឧបករណ៍របស់ក្រុមហ៊ុន Samsung និងលោក Roh Tae-moon ប្រធានផ្នែកអាជីវកម្មបទពិសោធន៍ទូរស័ព្ទ។

នាយកប្រតិបត្តិSamsung ទាំងពីររូប បានធ្វើដំណើរទៅកាន់សហរដ្ឋអាមេរិក​ ដើម្បីចូលរួមកិច្ចប្រជុំថ្នាក់ដឹកនាំ Samsung នៅទីក្រុង San Francisco។

ទោះបីជាប្រធានបទលម្អិត នៃកិច្ចប្រជុំត្រីភាគីនេះមិនទាន់បញ្ចេញឱ្យដឹងក៏ដោយ ប៉ុន្តែប្រភពមួយបានទម្លាយឱ្យដឹងថា លោក Mark Zuckerberg បានស្នើឱ្យ Samsung ស្វែងរកភាពជាដៃគូអាជីវកម្មដ៏ទូលំទូលាយ សម្រាប់ឧបករណ៍ការពិតនិម្មិត ជាមួយក្រុមហ៊ុន Meta Platforms របស់លោកដែលពីមុនមានឈ្មោះថា Facebook ។

ក្រុមហ៊ុនMeta Platforms បានដាក់បង្ហាញកាសស្តាប់ស៊េរីខ្ពស់របស់ខ្លួន គឺMeta Quest Pro នៅក្នុងកម្មវិធី Meta Connect២០២២ ដែលជាព្រឹត្តិការណ៍ប្រចាំឆ្នាំរបស់ក្រុមហ៊ុន។

លោក Mark Zuckerberg បានប្តូរឈ្មោះក្រុមហ៊ុនរបស់លោកពីFacebook ទៅជាMeta Platforms កាលពីខែតុលាឆ្នាំ២០២១ ដោយលោកនឹងផ្តោតលើការកសាងmetaverse៕

ដោយៈ សុខុម

រីយ៉ាដ: គម្រោងទីក្រុងឆ្លាតវៃដ៏ធំមហិមា ដែលមានតម្លៃ៥០០ពាន់លានដុល្លារអាមេរិក NEOM របស់អារ៉ាប៊ីសាអូឌីត បានចាប់ដៃគូសហការជាមួយក្រុមហ៊ុនអភិវឌ្ឍន៍សណ្ឋាគារ Ennismore ដើម្បីពន្លឿនការសាងសង់ គម្រោងគោលដៅទេសចរណ៍តំបន់ភ្នំTrojena របស់ខ្លួន។

ការចាប់ដៃគូសហការជាមួយ ក្រុមហ៊ុនអភិវឌ្ឍន៍សណ្ឋាគារដំបូងបង្អស់នេះ គឺដើម្បីពន្លឿនការសាងសង់ឱ្យទាន់ពេលវេលា ដើម្បីត្រៀមខ្លួនទទួលធ្វើជាម្ចាស់ផ្ទះ រៀបចំព្រឹត្តិការណ៍កីឡាអាស៊ីហ្គេម រដូវរងាឆ្នាំ២០២៩ (Asian Winter Games 2029)។ នេះបើយោងតាមសារព័ត៌មាន Arab News ចុះផ្សាយកាលពីថ្ងៃច័ន្ទ ទី១៧ ខែតុលា។

ក្រោមកិច្ចព្រមព្រៀងនេះ ក្រុមហ៊ុនអភិវឌ្ឍន៍ខាងលើនេះ នឹងបង្កើតម៉ាកយីហោ (Brand) ល្បីៗរបស់ខ្លួនរួមមានម៉ាកយីហោ 25hours Hotels និងម៉ាកយីហោ Morgans Originals នៅក្នុងគម្រោងគោលដៅទេសចរណ៍តំបន់ភ្នំ Trojena ដែលនឹងក្លាយជាភូមិស្គី នៅពេលការសាងសង់បញ្ចប់ជាស្ថាពរ។

កិច្ចព្រមព្រៀងជាមួយក្រុមហ៊ុនអភិវឌ្ឍន៍សណ្ឋាគារ Ennismore នេះគឺជាជាកិច្ចព្រមព្រៀងមួយ ក្នុងចំណោមកិច្ចព្រមព្រៀងជាច្រើន ដែលនឹងត្រូវចុះហត្ថលេខា ជាមួយបណ្ដាក្រុមហ៊ុនអភិវឌ្ឍន៍សណ្ឋាគារ ខណៈក្រុមហ៊ុន Hotel Development ដែលជាផ្នែកមួយរបស់ NEOM ទទួលបន្ទុកសាងសង់ប្រព័ន្ធអេកូបដិសណ្ឋារកិច្ច ដែលផ្តោតលើអនាគតកាល មានបំណងចាប់ដៃគូសហការជាមួយបណ្ដាក្រុមហ៊ុនឈានមុខគេ។

តាមការរំពឹងទុក គម្រោង Trojena នឹងត្រូវសាងសង់បញ្ចប់ជាស្ថាពរនៅឆ្នាំ២០២៦ ហើយវាជាតំបន់មួយដែលសីតុណ្ហភាព ក្នុងរដូវរងាធ្លាក់ចុះក្រោមសូន្យ ហើយសីតុណ្ហភាពពេញមួយឆ្នាំជាទូទៅ ត្រជាក់ជាងកន្លែងផ្សេងៗទៀតនៃតំបន់នោះដល់ទៅ១០អង្សាសេ។

គម្រោងនេះ លាតសន្ធឹងលើផ្ទៃដី៦០គីឡូម៉ែត្រការ៉េ នៅរយៈកម្ពស់ចន្លោះពី១.៥០០ម៉ែត្រ ទៅ២.៦០០ម៉ែត្រពីនីវ៉ូទឹកសមុទ្រ។

ក្នុងព្រឹត្តិការណ៍កីឡាអាស៊ីហ្គេមរដូវរងា ឆ្នាំ២០២៩ នៅ Trojena នេះនឹងមានព្រឹត្តិការណ៍ចំនួន៤៧ ដោយក្នុងនោះ២៨ព្រឹត្តិការណ៍ធ្វើឡើងនៅលើព្រិល និង១៩ព្រឹត្តិការណ៍ធ្វើឡើងនៅលើទឹកកក។

លោក Nadhmi Al-Nasr នាយកប្រតិបត្តិរបស់ NEOM លើកឡើងថា គម្រោងTrojena នឹងមានគ្រប់ហេដ្ឋារចនាសម្ព័ន្ធចាំបាច់ ដើម្បីធ្វើឱ្យព្រឹត្តិការណ៍កីឡាអាស៊ីហ្គេម រដូវរងាក្លាយជាព្រឹត្តិការណ៍កីឡាអាស៊ីហ្គេមរដូវរងាអស្ចារ្យបំផុត មិនធ្លាប់មានពីមុនមក៕  Arab News៕

 ដោយៈ គង់ សូរិយា

       ភ្នំពេញៈ បណ្តាប្រទេសនានាដែលកំពុងពឹងផ្អែកចិន បាននិងកំពុងសម្លឹង និងទន្ទឹងរង់ចាំមើលគោលនយោបាយសេដ្ឋកិច្ច ដែលនឹងដាក់ចេញដោយប្រធានាធិបតីចិនក្នុងសប្តាហ៍នេះ។

បញ្ហាឱនភាពសេដ្ឋកិច្ចប្រទេសចិន បានធ្វើឲ្យពិភពលោកព្រួយបារម្ភ ដោយសារប្រទេសនេះជាក្បាលម៉ាស៊ីនដ៏សំខាន់ ក្នុងការជម្រុញកំណើនសេដ្ឋកិច្ចពិភពលោក ប៉ុន្តែប្រទេសនេះបានដាក់ចេញ គោលនយោបាយមួយចំនួន ដែលបានធ្វើឲ្យសេដ្ឋកិច្ចរបស់ខ្លួនធ្លាក់ក្នុងឱនភាព ដែលគោល​នយោបាយនោះរួមមាន ការដាក់ចេញបទបញ្ញត្តិភ្លាមៗលើវិស័យអចលនទ្រព្យ ដែលរដ្ឋចិនមិនអនុញ្ញាត្តឲ្យប្រជាពលរដ្ឋទិញផ្ទះលើសពីមួយ ដែលទីបំផុតបានធ្វើឲ្យក្រុមហ៊ុន អចលនទ្រព្យលំដាប់យក្សរបស់ចិន ជួបបញ្ហាភ្លាម​ៗ។

ទី២ ការដាក់ចេញនូវគោលនយោបាយZero Covid19 ដែលបានធ្វើឲ្យប្រទេសរងគ្រោះ ដល់កំនើនសេដ្ឋកិច្ចរបស់ខ្លួន ទី៣ ការបិទមិនឲ្យមានលំហូរចេញមូលធន ក៏ជាផ្នែកសំខាន់ធ្វើឲ្យសេដ្ឋកិច្ចចិនមានបញ្ហាផងដែរ ទី៤ គោលនយោបាយប្រជានិយម ដោយកាត់បន្ថយគម្លាតរវាងអ្នកមាន និងអ្នកក្រក្នុងសង្គមចិន ក៏បង្កឲ្យមានបញ្ហាដល់ក្រុមហ៊ុនធំៗមួយចំនួនផងដែរ។

អ្នកវិភាគពីស្ថានភាពនយោបាយ នៃប្រទេសចិនបានលើកឡើងថា ក្រោមការដឹកនាំរបស់ប្រធានាធិបតីហ្ស៊ី ជីនពីងបានធ្វើឲ្សសេដ្ឋកិច្ចចិនមួយរយៈចុងក្រោយនេះជួបបញ្ហា ដែលជាលទ្ឋផលបញ្ហាផ្ទៃក្នុងរបស់បក្សក៏មានភាពរង្គោះរង្គើរផងដែរ ដែលបញ្ហារដ្ឋប្រហារ និងការចាប់ខ្លួនមេដឹកនាំចិនគឺបានលេចឡើង។

អ្នកវិភាគរូបនោះបានបន្តថា “ការបិទប្រទេសពីបញ្ហាកូវីដ១៩ និងបញ្ហាមួយចំនួនទៀត គឺជាគោលនយោបាយរបស់ប្រធានាធិបតីហ្ស៊ី ជីនពីង ដើម្បីរំងាប់ការតវ៉ាពីសាធារណៈជនចិន ខណៈបញ្ហាគោលនយោបាយ និងនិន្នាការសកលកំពុងវាយលុកសង្គមចិន”។ អ្នកវិភាគដដែលបានបន្តថា “ភាពតានតឹងផ្នែកភូមិសាស្រ្តនយោបាយរវាងចិន និងអាមេរិកបាននិងកំពុងធ្វើឲ្យចិនមានបញ្ហាផងដែរ ហេតុនេះការដាក់ចេញគោលនយោបាយជាតិនិយមឲ្យបានខ្លាំងជាងមុន ទំនងជាយុទ្ឋសាស្រ្តថ្មីមួយរបស់ប្រធានា​ធិបតីបច្ចុប្បន្ន ដែលគេរំពឹងលោកនឹងជាប់ការបោះឆ្នោត ជាប្រធានាធិបតីនាអាណត្តិថ្មី”។

ជាមួយនឹងបញ្ហានេះ ប្រទេសចិនពន្យារពេលការចេញផ្សាយ GDP និងទិន្នន័យសេដ្ឋកិច្ចចំពេលសមាជបក្សលើកទី២០។

ប្រទេសចិនបានពន្យារពេលភ្លាមៗ នូវការបោះពុម្ពទិន្នន័យសេដ្ឋកិច្ចសំខាន់ៗមួយថ្ងៃមុន ការចេញផ្សាយដែលបានកំណត់ ខណៈប្រទេសនេះកំពុងបើកសមាជបក្សលើកទី២០។

ការិយាល័យស្ថិតិជាតិរបស់ប្រទេសនេះ បានធ្វើបច្ចុប្បន្នភាពកាលវិភាគរបស់ខ្លួនកាលពីថ្ងៃចន្ទ ជាមួយនឹងកាលបរិច្ឆេទ សម្រាប់សូចនាករសេដ្ឋកិច្ចជាបន្តបន្ទាប់ រួមទាំងកំណើនផលិតផលក្នុងស្រុកសរុប ដែលត្រូវបានឃ្លាំមើលយ៉ាងដិតដល់។

សូចនាករដែលបានគ្រោង នឹងចេញផ្សាយនៅថ្ងៃអង្គារនេះ ក៏រួមបញ្ចូលផងដែរនូវការលក់រាយប្រចាំត្រីមាស ផលិតកម្មឧស្សាហកម្ម និងអត្រាគ្មានការងារធ្វើប្រចាំខែ។ ចំណែកការិយាល័យស្ថិតិ មិនបានផ្តល់ហេតុផលសម្រាប់ការពន្យារពេល ឬកំណត់កាលបរិច្ឆេទបោះពុម្ពទិន្នន័យថ្មីនោះទេ។

ដោយឡែក អាជ្ញាធរគយរបស់ប្រទេសចិន ក៏បានពន្យារពេលការចេញផ្សាយទិន្នន័យពាណិជ្ជកម្មប្រចាំខែផងដែរ ដែលដំបូងឡើយគ្រោងនឹងចេញនៅថ្ងៃសុក្រ។

ការពន្យារពេលនៃការចេញផ្សាយទិន្នន័យ ស្របពេលនឹងសមាជជាតិលើកទីឋ២០ របស់បក្សកុម្មុយនិស្តចិន ក្នុងទីក្រុងប៉េកាំង ដែលលោកស៊ី ជីនពីង ត្រូវបានគេរំពឹងថាលោកនឹងកាន់តំណែង ជាប្រធានាធិបតីនៅអា​ណត្តិទី៣បន្ត។

អាទិភាព​ដែល​បាន​បង្ហាញ​ នៅ​ក្នុង​សមាជបក្សនេះ​ក៏​នឹង​កំណត់​គន្លង​របស់​ប្រទេស​ចិន​យ៉ាង​ហោច​ណាស់ ​ក្នុង​រយៈពេល​ប្រាំ​ឆ្នាំ​ខាង​មុខ។

ការពន្យារពេលនេះបង្ហាញថា រដ្ឋាភិបាលជឿជាក់ថា សមាជបក្សលើកទី២០ គឺជារឿងសំខាន់បំផុត ដែលកើតឡើងនៅក្នុងប្រទេសចិននាពេលនេះ ហើយរដ្ឋាភិបាលចង់ជៀសវាង លំហូរព័ត៌មានផ្សេងទៀតដែលអាចបង្កើតសារចម្រុះកាន់តែច្រើន។ នេះ​បើ​តាម​ការ​លើក​ឡើង​របស់​លោកស្រី Iris Pang ប្រធាន​សេដ្ឋវិទូ​ប្រចាំ​ប្រទេស​ចិន​ នៅ​ក្រុមហ៊ុន ING Group។

មានប្រសាសន៍ក្នុងសមាជគណបក្សលើកទី២០ កាលពីថ្ងៃម្សិលម៉ិញ​នេះ ប្រធានាធិបតីចិន លោកស៊ី ជីនពីងកំណត់យកវិស័យធំ២ជាម៉ាស៊ីនកំណើនសេដ្ឋកិច្ចថ្មីសម្រាប់អនាគត។

ចំពេលមានភាពតានតឹងផ្នែកបច្ចេកវិទ្យា កាន់តែខ្លាំងឡើងរវាងប្រទេ​សចិន និងសហរដ្ឋអាមេរិក ប្រធានាធិបតីចិនស៊ី ជីនពីង បានផ្ញើសារគាំទ្រដល់វិស័យព័ត៌មានវិទ្យាIT បញ្ញាសិប្បនិមិត្ត (AI)និងវិស័យថាមពល ដោ​យកំណត់វិស័យទាំងនេះជាម៉ាស៊ីនថ្មី នៃកំណើនសេដ្ឋកិច្ចនាពេលអនាគត។

នៅក្នុងឯកសារដែលមានកម្រាស់៧២ទំព័រ ដែលបង្កើតជាមូលដ្ឋានសម្រាប់សុន្ទរកថា របស់លោកស៊ី ជីនពីង ទៅកាន់សមាជបក្សលើកទី២០កាលពីថ្ងៃអាទិត្យ លោកស៊ី ជីនពីងបាននិយាយថា ប្រទេសចិនត្រូវតែជំរុញការអភិវឌ្ឍន៍រួមបញ្ចូលគ្នានៃ “ឧស្សាហកម្មដែលកំពុងរីកចម្រើន ជាយុទ្ធសា​ស្រ្ត” និងបង្កើតម៉ាស៊ីនកំណើនសេដ្ឋកិច្ច ដែលរួមបញ្ចូលផងដែរនូវជីវបច្ចេកវិទ្យា សម្ភារ បរិក្ខារទំនើប និងផលិតផលបៃតង។

ខណៈពេលដែលមេដឹកនាំចិន មិនបានរៀបរាប់លម្អិតអំពីគោលនយោ​បាយគាំទ្រជាក់លាក់នោះ លោកស៊ីបានថ្លែងថា ប្រទេសចិននៅតែដើរលើផ្លូវដើម្បីលើកកម្ពស់ ប្រភេទថ្មីឧស្សាហូបនីយកម្ម ដើម្បីក្លាយជាប្រទេសដ៏មានឥទ្ធិពលមួយនៅក្នុង ការផលិតទំនិញគុណភាពខ្ពស់ ការរុករកអវកាស ការដឹកជញ្ជូន អ៊ីនធឺណែត និងឌីជីថលនីយកម្ម។

សារគាំទ្រនេះ បានកើតឡើងនៅពេល ដែលទីក្រុងវ៉ាស៊ីនតោនកំពុងជំរុញកិច្ចខិតខំប្រឹងប្រែងរបស់ខ្លួន ក្នុងការទប់ស្កាត់ការអភិវឌ្ឍន៍បច្ចេកវិទ្យារបស់ប្រទេសចិន ដោយរដ្ឋបាលចូ បៃដិន បានដាក់ចេញនូវបទប្បញ្ញត្តិថ្មីកាលពីដើមខែតុលានេះ ដើម្បីកំណត់ការចូលប្រើប្រាស់របស់ប្រទេសចិនចំពោះបច្ចេកវិទ្យាបន្ទះឈីបកម្រិតខ្ពស់៕