ដោយៈ គង់ សូរិយា

       ខេត្តកែបៈ ថ្នាក់ដឹកនាំខេត្តកែប បានប្រារពពិធីសម្ពោធរូបសំណាក “ព្រាប ស” ត្រង់ចំណុចផ្លូវលេខ ១៣៣៥ ចូលទៅកាន់តំបន់ភ្នំវល្លិ៍

ខេត្តកែប​ នៅព្រឹកថ្ងៃទី៦ ខែមករា ឆ្នាំ២០២៣​ នេះ។

លោកសំ សារីន ប្រធានក្រុមប្រឹក្សាខេត្ត និងឯកឧត្តមបណ្ឌិត សោម ពិសិដ្ឋ អភិបាល​ នៃគណ:អភិបាលខេត្ត បានអញ្ជើញសម្ពោធរូបសំណាក “ព្រាប ស” ត្រង់ចំណុចផ្លូវលេខ១៣៣៥​ ចូលទៅកាន់តំបន់ភ្នំវល្លិ៍។

យោងតាមរបាយការណ៍របស់លោក ឆាង ឆៃ​អភិបាលនៃណ:អភិបាលស្រុក ដំណាក់ចង្អើរបានអោយដឹងថា រូបសំណាក​ “​ព្រាប ស “​ នេះជាគំនិតផ្ដួចផ្ដើមរបស់​ លោកសួង ហេង រដ្ឋលេខាធិការក្រសួងសាធា​រណ:ការ​ និងដឹកជញ្ជូន នឹងជាប្រធានក្រុមការងាររាជរដ្ឋាភិបាល ចុះមូលដ្ឋានស្រុកដំណាក់ចង្អើរ និងលោកបណ្ឌិត សោម ពិសិដ្ឋ អភិបាលខេត្ត និងលោកជំទាវ ស ម៉ាលីដា។

សម្រាប់ការចាប់ផ្តើមដំណើរការសាងសង់ រូបសំណាកនេះគឺនៅថ្ងៃទី២០ ខែមេសា ឆ្នាំ២០២២ និងបញ្ចប់ការងារសាងសង់ជាស្ថាពរ នៅថ្ងៃទី១៩ ខែធ្នូ ឆ្នាំ២០២២ កន្លងទៅនេះ​ ដោយចំណាយថវិការសរុប ១៤,៣០០ដុល្លារគត់​។

លោកសោម ពិសិដ្ឋ បានមានប្រសាសន៍ថា ការសាងសង់រូបសំណាក​ “​ ព្រាបស “​ នៅលើទីតាំងនេះ គឺចង់បញ្ជាក់អំពីតម្លៃ និងនិមិត្តរូបនៃសន្តិភាព ដែលបង្កឱកាសឱ្យយើងទាំងអស់គ្នា អភិវឌ្ឍសហគមន៍​ ក៏ដូចជាប្រទេសជាតិយើងឱ្យមានការរីកចម្រើន។​

លោកបានរំលឹកថា តំបន់ភ្នំវល្លិ៍នេះធ្លាប់ជាទីតាំង សមរភូមិសង្គ្រាមដ៏ក្តៅគគុក និងជាកន្លែងលាក់ខ្លួន ធ្វើសកម្មភាពរបស់កងទ័ពខ្មែរក្រហម ប៉ុន្តែក្រោមនយោបាយ ឈ្នះ ឈ្នះ របស់សម្តេចតេជោ ហ៊ុន សែន នៅឆ្នាំ១៩៩៤ កម្លាំងទ័ពខ្មែរក្រហម បានធ្វើសមាហរណកម្ម ចូលរួមជាមួយរដ្ឋាភិបាល ភ្លើងសង្គ្រាមនៅទីតាំងនេះក៏បានរលត់ ប្រជាជនរស់នៅបានសុខសន្តិភាព ហើយបច្ចុប្បន្ន បានប្រែក្លាយជាតំបន់អភិវឌ្ឍកសិកម្ម ដ៏មានសក្តានុពលរបស់ខេត្តកែប។

លោកបានបន្ថែមថា រូបសំណាក​”​ ព្រាបស”​ ត្រដាងស្លាប នាដើមផ្លូវលេខ១៣៣៥នេះ នឹងធ្វើឱ្យអ្នកដំណើរតាមផ្លូវជាតិលេខ៣៣ ងាកមកចាប់អារម្មណ៍ទីតាំងនៃតំបន់អេកូទេសចរណ៍ និងកសិទេសចរណ៍ភ្នំវល្លិ៍ ដែលពោរពេញដោយ ទេសភាពដ៏ស្រស់បំព្រង ដែលគ្របដណ្តប់ទៅដោយដំណាំកសិកម្ម ព្រៃភ្នំដ៏ខៀវស្រងាត់ និងខ្យល់អាកាសបរិសុទ្ធ ហើយទៅថ្ងៃអនាគត ទីតាំងនេះ ក៏នឹងក្លាយទៅជាតំបន់កសិឧស្សហកម្មផងដែរ។

លោកសោម ពិសិដ្ឋបានបញ្ជាក់អះអាងថា លោកនឹងធ្វើការអភិវឌ្ឍហេដ្ឋារចនាសម្ព័ន្ធ តំបន់ភ្នំវល្លិ៍ឱ្យដូចជាសរសៃឈាម និងជាផ្នែកមួយនៃតំបន់ទេសចរណ៍របស់ខេត្តកែប ដែលភ្ញៀវទេសចរអាចមកលេង ទឹកសមុទ្រ ញ៉ាំអាហារសមុទ្រដ៏មានឱជារស ហើយបន្តដើរកំសាន្តអេកូទេសចរណ៍ លើខ្នងភ្នំវល្លិ៍ និងកសិទេសចរណ៍នៃតំបន់នេះថែមទៀត៕

ដោយៈ សុខុម

ហុងកុង: ភាគហ៊ុនរបស់បណ្ដាក្រុមហ៊ុនអភិវឌ្ឍន៍អចលនទ្រព្យ ក្នុងប្រទេសចិន បានហក់ឡើងស្រឺតៗកាលពីថ្ងៃសុក្រ ទី៦ ខែមករា ក្រោយពីរដ្ឋាភិបាលចិន បានដាក់ចេញវិធានការគាំទ្របន្ថែមទៀត ដើម្បីជំរុញវិស័យអចលនទ្រព្យ ដែលកំពុងជាប់ផុងក្នុងបំណុល ខណៈប្រទេសចិន ត្រៀមបើកសេដ្ឋកិច្ច ដែលរងគ្រោះដោយសារវិបត្តិកូវីដ-១៩ របស់ខ្លួនឡើងវិញ។

សន្ទស្សន៍ផ្សារហ៊ុនអចលនទ្រព្យចិនដីគោក ដែលចុះបញ្ជីនៅហុងកុង Hang Seng Mainland Properties Index បានហក់ឡើងស្រឺតៗជិតដល់៤%ភ្លាមៗ ក្រោយពីទីផ្សារបើកដំណើរការឡើងវិញ ដោយក្នុងនោះភាគហ៊ុននៃក្រុមហ៊ុនអចលនទ្រព្យ Logan Group បានហក់ឡើង១១% ចំណែកឯក្រុមហ៊ុន CIFI Holdings បានហក់ឡើង៦,៣%។

ធនាគារកណ្តាលចិន បាននិយាយកាលពីថ្ងៃព្រហស្បតិ៍ ទី៥ ខែមករា ថា សម្រាប់បណ្ដាទីក្រុង ដែលតម្លៃលក់ផ្ទះថ្មីធ្លាក់ថ្លៃរយៈពេល៣ខែជាប់គ្នា អត្រាការប្រាក់អប្បបរមា លើកម្ចីទិញផ្ទះអាចបញ្ចុះបន្ថែមទៀត ឬលុបតែម្ដង សម្រាប់អ្នកទិញផ្ទះដំបូងជាដំណាក់កាលៗ។

វិស័យអចលនទ្រព្យ ដែលគ្របដណ្ដប់រហូតដល់ទៅ១ភាគ៤ នៃសេដ្ឋកិច្ចដ៏ធំសម្បើមរបស់មហាយក្សចិន បានទទួលរងផលប៉ះពាល់យ៉ាងធ្ងន់ធ្ងរក្នុងឆ្នាំ២០២២ បន្ទាប់ពីបណ្ដាក្រុមហ៊ុនអភិវឌ្ឍន៍ អចលនទ្រព្យមិនអាចបញ្ច​​ប់គម្រោងសាងសង់ឱ្យទាន់ពេលវេលា ជាហេតុនាំឱ្យអ្នកទិញផ្ទះយ៉ាងច្រើនងើបឡើងបះបោរផ្អាកបង់កម្ចីទិញផ្ទះ។

ទន្ទឹមនេះ ការបិទខ្ទប់ និងវិធានការត្រួតពិនិត្យ ការចល័តរបស់ប្រជាជន ដើម្បីទប់ស្កាត់ការរីករាលដាលនៃវីរុសកូវីដ-១៩ ក៏បានធ្វើឱ្យប៉ះពាល់ទំនុកចិត្តរបស់អ្នកទិញផងដែរ ដែលធ្វើឱ្យវិបត្តិកាន់តែធ្ងន់ធ្ងរថែមទៀត។

អាជ្ញាធរលំនៅដ្ឋានក៏បានប្តេជ្ញាចិត្តខ្ពស់ដែរថា នឹងផ្តល់ការគាំទ្រយ៉ាងខ្លាំងដល់អ្នកទិញផ្ទះដំបូង តាមរយៈការអនុញ្ញាតឱ្យបង់លុយកក់ ឬ Down Payment តិចតួច និងបញ្ចុះអត្រាការប្រាក់កម្ចីទិញផ្ទះជាដើម។

លោក Ni Hong ប្រធាននិយ័តករលំនៅដ្ឋាននៃប្រទេសចិន បានប្រាប់ទូរទស្សន៍រដ្ឋ CCTV ថា ការគាំទ្រ “សមស្រប” ចាំបាច់ត្រូវផ្តល់ដល់អ្នកទិញផ្ទះទី២ ទោះបីជាមិនមែនសម្រាប់ការទិញផ្ទះ៣ ឬអ្នកទិញផ្ទះច្រើនជាងនេះយ៉ាងណាក្ដី៕ Reuters៕

ដោយៈ គង់ ម៉ាលីនណា

       បាត់ដំបងៈ អភិបាលនៃគណៈអភិបាលខេត្តបាត់ដំបង លោកសុខ លូបានដឹកនាំកិច្ចប្រជុំ ត្រួតពិនិត្យវឌ្ឍនភាពការអនុវត្ត ការងាររៀបចំសណ្ដា​ប់ធ្នាប់ សោភ័ណភាព របៀបរៀបរយក្នុងក្រុងបាត់ដំបង និងនៅតំបន់ទេស​ចរណ៍ភ្នំសំពៅ ស្រុកបាណន់ ខេត្តបាត់ដំបង។

កិច្ចប្រជុំនេះ ដែលមានការចូលរួមពីមន្រ្តីពាក់ព័ន្ឋ បានប្រព្រឹត្តទៅនៅថ្ងៃទី៦ មករា ម្សិលម៉ិញនេះ។

យោងតាមការរាយការណ៍ តាមរយៈក្រុមការងារទទួលបន្ទុករៀបចំសណ្ដាប់ធ្នាប់ក្នុងក្រុងបាត់ដំបងបានលើកឡើងថា ចំពោះផ្លូវលេខ១ និងលេខ១កន្លះ ផ្ទះដែលបានរុះរើសំយាបរួច បានចំនួនស្មើនឹង៩៩,៤៥% និងមិនទាន់បានរុះរើមានចំនួន២ខ្នង ដោយសារតែជាផ្ទះដែលមិនមានម្ចាស់រស់នៅ ហើយផ្ទះដែលបានដំឡើងសំយាបរួចមានចំនួន២៥ខ្នង (៦,៨៩%​) និងមិនដំឡើងសំយាបមានចំនួន ៣៣៨ខ្នង (៩៣,១១%) ។

ចំពោះបរិវេណជុំវិញផ្សាណាត់ ចំនួនផ្ទះសរុប៨២ផ្ទះ (ខាងជើងផ្សារ ៤២ផ្ទះ)ផ្ទះមួយចំនួនធំ បានរៀបចំសំយ៉ាបស្រប តាមគម្រូណែនាំរបស់រដ្ឋបាលខេត្តផងដែរ ។ សម្រាប់កំណាត់ផ្លូវលេខ២ និងផ្លូវលេខ២កន្លះ ម្ចាស់ផ្ទះទាំងអស់បានស្ម័គ្រចិត្ត រុះរើសំយ៉ាបបានរួចរាល់១០០%តែម្ដង។

ចំណែកបណ្ដោយផ្លូវលេខ៣ ចំនួនខ្នងផ្ទះមាន៣៥៥ខ្នង ផ្ទះបានរុះរើសំយាបរួចរាល់ និងមិនដំឡើងសំយាបមានចំនួន ២៥៩ខ្នង ផ្ទះដែលដំឡើងសំយាប តាមគម្រូរបស់រដ្ឋបាលខេត្តមានចំនួន៦៩ខ្នង ផ្ទះដែលមិនទាន់រុះរើសំយាប និងទុកសំយាបរវៃចេញមានចំនួន៧ខ្នង។ ចំពោះបណ្ដោ​យផ្លូវព្រះវិហា និងផ្លូវឡាអេ ផ្លូវកាត់ទទឹងផ្លូវព្រះវិហារ មានចំនួន ១១៣ខ្នងផ្ទះ ជាលទ្ធផលប្រជាពលរដ្ឋ ដែលម្ចាស់អាជីវកម្ម ក្រុមហ៊ុន ធនាគារ ប្រមា​ណ៩៥%គាំទ្រ និងចូលរួមអនុវត្តតាមការណែនាំរបស់រដ្ឋបាលខេត្ត ។

មានប្រសាសន៍នាឱកាសនោះ លោកសុខ លូ បានណែនាំដល់ក្រុមការងាររៀបចំសណ្ដាប់ធ្នាប់ ដែលទទួលបន្ទុកទៅតាមតំបន់នានាទាំងអស់នោះ ក៏ដូចជាចៅសង្កាត់ទាំងអស់ ត្រូវបន្តធ្វើការផ្សព្វផ្សាយ ណែនាំដល់ប្រជាពលរដ្ឋ ឱ្យមានការយល់ដឹងអំពីការរៀបចំសណ្ដាប់ធ្នាប់ និងគោលបំណងអំពីការរៀបចំសណ្ដាប់ធ្នាប់នេះ ពិសេសត្រូវទប់ស្កាត់ការងើបឡើងវិញនូវការសាងសង់សំយ៉ាបផ្ទះ ការលក់ដូរនៅលើចិញ្ចើមផ្លូវដោយមិនត្រូវព្រលែងដៃឡើយ។

លោកបន្តថា “ត្រូវធ្វើដូចភ្លៀងរលឹម និងត្រូវណែនាំដល់អាជីវករទាំងអស់ដែលដាក់តាំងលក់ផ្សេងៗ ត្រូវរៀបចំឱ្យមានការលក់នៅខាងក្នុងផ្ទះជំនួសវិញ”។

ក្នុងនោះដែរ លោកសុខ លូបានណែនាំដល់អង្គភាពអគ្គិសនីខេត្ត ពិនិត្យមើល និងសិក្សាអំពីលទ្ធភាព ដែលអាចដកបង្គោលភ្លើងចាស់ៗចោល ព្រោះបន្ទាប់ពីធ្វើការរៀបចំកាត់ខ្សែកាប ខ្សែអិនធឺណេតចេញអស់ហើយ គឺនៅសល់បង្គោលភ្លើងដែលនៅសល់ ហើយបើសិនជាអាចធ្វើការដកបានរដ្ឋបាលខេត្ត នឹងសិក្សាអំពីការដាំដើមឈើជំនួសវិញ ដើម្បីលើកកម្រិតសោ​ភ័ណភាពក្រុងឱ្យកាន់តែស្រស់ស្អាតទៀត។

លោកបានកោតសរសើរ និងថ្លែងអំណរគុណដល់ក្រុមការងារ ដែលបានខិតខំប្រឹងប្រែង ក្នុងការចុះរៀបចំសណ្ដាប់ធ្នាប់ក្នុងក្រុង ក៏ដូចជាប្រជាពលរដ្ឋ ដែលរស់នៅតំបន់អភិរក្សទាំងអស់ ដែលបានចូលរួមជាមួយរដ្ឋបាលខេត្តបាត់ដំបង ក្នុងការចូលរួមកាត់សំយ៉ាបផ្ទះ ការកាត់ផ្លាកសញ្ញាពាណិជ្ជកម្មធំៗចេញពីខាងមុខផ្ទះរបស់ខ្លួន និងយល់ដឹងអំពីគោលបំណងនៃការរៀបចំសណ្ដាប់ធ្នាប់នេះ ៕

ដោយ: សុផារី

សៀមរាបៈ ដោយទទួលបានការអភិវឌ្ឍប្រព័ន្ធហេដ្ឋារចនាសម្ព័ន្ធ និងស្ថានភាពល្អប្រសើរ នៃវិស័យទេសចរណ៍ បានជំរុញឱ្យអចលនទ្រព្យសៀមរាប ចាប់ផ្តើមមានការងើបឡើងវិញហើយ ជាពិសេសប្រភេទ ផ្ទះអាជីវកម្ម និងផ្ទះសម្រាប់ស្នាក់នៅតម្លៃមធ្យម។

លោកស៊ា សុផល ទីប្រឹក្សាជាន់ខ្ពស់នៃក្រុមហ៊ុនKW ប្រចាំខេត្តសៀ​មរាបបានមានប្រសាសន៍នៅថ្ងៃទី៦ ខែមករា ឆ្នាំ២០២៣នេះថា ចាប់ពីចុងឆ្នាំ២០២២ រហូតមកដល់ ដើមឆ្នាំ២០២៣ ចរន្តនៃការទិញលក់អចលនទ្រព្យពីរប្រភេទ ទទួលបានការគាំទ្រខ្លាំងជាងគេ រួមមាន ផ្ទះអាជីវកម្ម និងផ្ទះលំនៅឋាន។

លោកបន្តថា “ផ្ទះអាជីវកម្មហាក់មានសន្ទុះខ្លាំងជាងគេ ដែលជំរុញដោយកំណើនទេសចរជាតិ និងអន្តរជាតិ ដែលចូលមកទស្សនាខេត្តសៀម​រាប ចាប់តាំងពីពាក់កណ្តាលឆ្នាំ២០២២”។ លោកបន្ថែមថា “ចំណែក ផ្ទះលំនៅឋាន មានការស្វែងរកដីធ្លីទំហំមធ្យម ដើម្បីសាងសង់ថ្មីៗច្រើនផងដែរ”។

លោកបានបញ្ជាក់ប្រាប់ថា “ផ្ទះអាជីវកម្មមានគេស្វែងរកច្រើន។ ភាគច្រើនជាអតិថិជន ដែលមានថវិកាច្រើន មិនសូវទទួលផលប៉ះពាល់ខ្លាំងពីកូវីដ១៩ គេរកមើលតំបន់ទាំងឡាយណា នៅជាប់នឹងផ្លូវជាតិ ផ្លូវធំៗ ដើម្បីពង្រីកអាជីវកម្ម របស់គេ”។

ជាមួយគ្នានេះ លោក បាន ធារ៉ា ប្រធានផ្នែកលក់នៃក្រុមហ៊ុនអចលនទ្រព្យ SR Property បានមានប្រសាសន៍ឲ្យដឹងនៅដដែលថា លោកសង្គេតឃើញថា សកម្មភាពទិញ លក់ ជួល អចលនទ្រព្យគ្រប់ប្រភេទនៅក្នុងខេត្តសៀមរាប នាពេលប៉ុន្មានខែចុងក្រោយនេះ មានកំណើនល្អប្រសើរច្រើនជាងពេលមុនៗ។

លោកអះអាងថា “សន្ទុះល្អប្រសើរនេះ ចំពោះអចលនទ្រព្យនេះ ជំរុញដោយកំណើនទេសចរ និងការអភិវឌ្ឍហេដ្ឋារចនាសម្ព័ន្ធផ្លូវថ្នល់ នៅក្នុងខេត្ត”៕

ដោយ: គង់ លាងហួរ

បាងកក: អាជ្ញាធរ​អចលនទ្រព្យឧស្សាហកម្ម​នៃ​ប្រទេស​ថៃ (IEAT) កំពុង​ប្រើប្រាស់​យុទ្ធសាស្ត្រ​ទីផ្សារ ​នៅ​ក្នុង​តំបន់​ឧស្សាហកម្ម​អចលនទ្រព្យចំនួន​៤របស់​ខ្លួន ដើម្បី​ទាក់ទាញ​វិនិយោគិនថៃ និង​បរទេស​ឱ្យ​កាន់​តែ​ច្រើន។

កញ្ចប់ថ្មីនេះផ្តល់ការបញ្ចុះតម្លៃលើការលក់ដីឧស្សាហកម្ម និងការលើកលែងលើការជួលដី និងថ្លៃសេវា សម្រាប់ការប្រើប្រាស់គ្រឿងបរិក្ខារនៅលើអចលនទ្រព្យ សម្រាប់រយៈពេលជាក់លាក់មួយត្រូវបានដាក់ឱ្យដំណើរការ ក្នុងកិច្ចខិតខំប្រឹងប្រែង ដើម្បីទាក់ទាញការវិនិយោគបន្ថែមទៀត។

លោក Veeris Ammarapala អភិបាលនៃ IEAT បានមានប្រសាសន៍ថា “យើងរំពឹងថាកញ្ចប់ទាំងនេះនឹងជួយដល់វិនិយោគិន ក្នុងការធ្វើការសម្រេចចិត្តរបស់ពួកគេឱ្យកាន់តែងាយស្រួល ដើម្បីវិនិយោគនៅក្នុងប្រទេសថៃ”។ កញ្ចប់នេះមានសុពលភាពតាំងពីថ្ងៃទី១ ខែតុលា ឆ្នាំ២០២២ ហើយផុតកំណត់នៅថ្ងៃទី៣០ ខែកញ្ញា ឆ្នាំ២០២៣។

អចលនទ្រព្យឧស្សាហកម្មទាំង៤នោះ រួមមាន ឧស្សាហកម្មភូមិភាគខាងត្បូង និងតំបន់ឧស្សាហកម្មសុងក្លា ដែលតំបន់ទាំង២មានទីតាំងនៅភាគខាងត្បូងនៃខេត្តសុងក្លា ក៏ដូចជា ឧស្សាហកម្មស្រះកែវនៅភាគខាងកើត និងតំបន់ឧស្សាហកម្មភីឈីតនៅភាគខាងជើង។

លោក Veeris បានបន្តថា វិនិយោគិនថ្មី ដែលមានបំណងទិញដីឧស្សាហកម្មនៅក្នុងតំបន់ឧស្សាហកម្មភាគខាងត្បូង នឹងទទួលបានការបញ្ចុះតម្លៃពី១៥ ទៅ២០ភាគរយ។ ថ្លៃសេវាសម្រាប់ការប្រើប្រាស់គ្រឿងបរិក្ខារត្រូវបានលើកលែង សម្រាប់រយៈពេលមួយឆ្នាំ។

ក្រុមហ៊ុនផលិតដែលមានស្រាប់ និងបានជួលដីនៅតំបន់ឧស្សាហកម្មភាគខាងត្បូងក៏នឹងត្រូវបានលើកលែងផងដែរ លើការជួលដីសម្រាប់រយៈពេល២ឆ្នាំ និងសម្ភារៈប្រើប្រាស់៕

ដោយ៖ សុផារី

ស្ទឹងត្រែង៖ ដើមឆ្នាំ២០២៣ ចរន្តទិញលក់នៅខេត្តភាគខាងកើតចំនួនពីរ រួមមាន ខេត្តស្ទឹងត្រែង និងខេត្តកំពង់ចាម ចាប់ផ្តើមងើបឡើងវិញបណ្ដើរៗវិញ ស្របពេលមានការអភិវឌ្ឍប្រព័ន្ធហេដ្ឋារចនាសម្ព័ន្ធផ្លូវថ្នល់ ដែលជំរុញការទិញលក់អចលនទ្រព្យក្នុងតំបន់។ អ្នកជំនាញបង្ហាញក្តីរំពឹងថា ទីផ្សារនៅក្នុងឆ្នាំ២០២៣នឹងមានសញ្ញាវិជ្ជមានបន្ថែមទៀត។

លោក ជុំ វិចិត្រ ប្រធានសាខានៃក្រុមហ៊ុនអចលនទ្រព្យ Century 21 Zillion Holding ប្រចាំខេត្តស្ទឹងត្រែង បានមានប្រសាសន៍នៅថ្ងៃទី០៦ ខែមករា ឆ្នាំ២០២៣នេះថា “ការលក់អចលនទ្រព្យ ទិញលក់ដីធ្លីតម្លៃសមរម្យ មានចរន្តទិញលក់ងើបឡើងវិញខ្លះ។ ចំណែក តម្លៃដីធ្លីមានការកើនឡើងបន្តិចបន្តួច ប្រហែលជា១០ភាគរយ តំបន់ខ្លះនៅទ្រឹង”។

លោកបានបង្ហាញក្តីសង្ឃឹមចំពោះកំណើននិងការផ្លាស់ប្តូរនៃទីផ្សារអចលនទ្រព្យនៅក្នុងខេត្តស្ទឹងត្រែង នៅក្នុងឆ្នាំ២០២៣ ខណៈបច្ចុប្បន្ននេះសញ្ញាវិជ្ជមានចាប់ផ្តើមងើបឡើងបន្តិចម្តងៗហើយ ក្រោយប៉ះពាល់ខ្លាំងនាពេលកន្លងមក។

បើក្រលេកមើលខេត្តកំពង់ចាម ដែលទើបទទួលបានការយកចិត្តទុកដាក់លើហេដ្ឋារចនាសម្ព័ន្ធនានា គឺគម្រោងលើកកម្ពស់ និងធ្វើឱ្យប្រសើរឡើងផ្លូវជាតិលេខ៧ បានកំពុងបង្កើនភាពទាក់ទាញចំពោះតំបន់មួយចំនួននៅតាមបណ្តោយផ្លូវជាតិមួយនេះ។

លោកស្រី ក្រី ម៉ាយ៉ាន ប្រធានសាខានៃក្រុមហ៊ុនអចលនទ្រព្យ KW Cambodia បានមានប្រសាសន៍នៅថ្ងៃទី០៦ ខែមករា ឆ្នាំ២០២៣នេះថា បច្ចុប្បន្ននេះ គម្រោងប្រភេទតម្លៃសមរម្យទទួលបានការគាំទ្រខ្លាំង ពីសំណាក់អ្នកមានថវិកា និងស្វែងរកការវិនិយោគ នៅក្នុងខេត្តកំពង់ចាម ជាពិសេសក្នុងឃុំល្វា មកដល់ស្គន់។

លោកស្រីបញ្ជាក់ថា ដោយសារសក្តានុពលផ្លូវថ្នល់ និងការអភិវឌ្ឍបានជំរុញឱ្យមានគម្រោងវិនិយោគធំច្រើនចូលមកបោះទុន រួមមាន សកម្មភាពពាណិជ្ជកម្ម រោងចក្រ សហគ្រាស ។ល។

លោកស្រីបញ្ជាក់ថា “មានរោងចក្រមួយចំនួនធំ និងគម្រោងនានាបានចូលមក ធ្វើឲ្យមានចរន្តទិញលក់ និងអភិវឌ្ឍន៍បន្ថែមទៀតនៅក្នុងរយៈពេលប៉ុន្មានខែចុងក្រោយនេះ”។

រដ្ឋបាលខេត្តនីមួយៗ ក៏បានចាប់ផ្តើមជុសជុល និងកសាងហេដ្ឋារចនាសម្ព័ន្ធរូបវន្តសាធារណៈនានា ដើម្បីជំរុញការអភិវឌ្ឍ និងសម្រស់ខេត្ត ដើម្បីទាក់ទងការវិនិយោគពីសំណាក់អ្នកវិនិយោគពីគ្រប់ទិសទី៕