ដោយៈ សុផារី

ភ្នំពេញៈ ការអភិវឌ្ឍបុរីតម្លៃមធ្យម និងទាប នៅក្នុងរាជធានីភ្នំពេញ និងតំបន់ជាយក្រុង ត្រូវបានមើលឃើញថា មានភាពពេញនិយម និងរឹងមាំជាងទីផ្សារបុរីប្រភេទផ្សេង។

ប៉ុន្តែរយៈពេលប៉ុន្មានឆ្នាំចុងក្រោយនេះ ផលប៉ះពាល់ផ្នែកជីវភាពបាន​ធ្លាក់លើអ្នកមានជីវភាពមធ្យមចុះក្រោម ដែលបានធ្វើឱ្យមាននិន្នាការថ្មីមួយកើតមាននៅក្នុងទីផ្សារ។

នៅក្នុងទស្សនៈរបស់អ្នកអភិវឌ្ឍន៍ជោគជ័យ មួយរូបបានមើលឃើញថា ការលក់បុរីប្រណីតមានភាពងាយស្រួល ជាជាងការលក់បុរីតម្លៃមធ្យម នៅក្នុងកាលៈទេសៈ ដែលជីវភាពប្រជាជនមានចំណូលមធ្យម និងទាប ទទួលរងផលប៉ះពាល់ពីវិបត្តិជំងឺកូវីដ១៩ និងវិបត្តិសង្រ្គាមរុស្ស៊ីឈ្លានពានអ៊ុយក្រែន ។

លោកជំទាវឧកញ៉ា គង់ សំណាង អគ្គនាយិកាបុរីវិមានសំណាង ដែលជាបុរីប្រណីតមួយ មានទីតាំងនៅភាគខាងជើងនៃរាជធានីភ្នំពេញ បានមានប្រសាសន៍នៅក្នុងកិច្ចសម្ភាសន៍ពិសេសជាមួយគេហទំព័រ Property Area Asiaកាលពីថ្ងៃទី១៩ កញ្ញាថា សម្រាប់បទពិសោធន៍ នៃការអនុវត្តទីផ្សារជាក់ស្តែង យើងបានសង្កេតឃើញថា ការលក់បុរីប្រណីតមានភាពងាយស្រួល ក្នុងការលក់ជាជាងបុរីតម្លៃមធ្យម និងទាប។

ក្រៅពីគម្រោងបុរីប្រណីត “បុរីវិមានសំណាង” មួយនេះ លោកជំទាវក៏មានគម្រោងអភិវឌ្ឍន៍បុរី សម្រាប់អ្នកដែលមានចំណូលទាប និងមធ្យមមួយទៀត គឺគម្រោងបុរី KS Residence មានទីតាំងនៅតំបន់កៀនស្វាយ ខេត្តកណ្តាលផងដែរ។

លោកជំទាវមានប្រសាសន៍ថា “បើប្រៀបធៀបនៅក្នុងពេលឥលូវ បុរីសម្រាប់អ្នកមាន (បុរីប្រណីត) គឺមានភាពងាយស្រួលក្នុងការលក់ជាង”។

ដោយសារផលប៉ះពាល់ពីវិបត្តិជំងឺកូវីដ១៩ បានជះឥទ្ធិពលដល់សេដ្ឋកិច្ចប្រចាំថ្ងៃរបស់ប្រជាពលរដ្ឋមាន ចំណូលមធ្យមចុះក្រោមច្រើនជាងក្រុមអតិថិជន ដែលមានទ្រព្យសម្បត្តិច្រើន ជាហេតុធ្វើឱ្យអត្រាការលក់បុរីប្រណី​តហាក់មានភាពងាយស្រួលជាង។

លោកជំទាវបញ្ជាក់ថា “ក្នុងសម័យកាលនេះ ការលក់បុរីវិមានសំណា​ងមានភាពងាយស្រួល ជាងការលក់បុរីសម្រាប់ជីវភាពមធ្យមចុះក្រោម។ តាមការសម្គាល់ ដោយសារបញ្ហាជីវភាពកន្លងមក សម្រាប់អ្នកមានមិនសូវប៉ះពាល់សេដ្ឋកិច្ចប៉ុន្មានទេ ដោយពួកគាត់នៅតែមានលទ្ធភាពទិញបាន”។

លោកជំទាវគង់ សំណាងបានបន្ថែមថា “សម្រាប់អ្នកមានជីវភាពមធ្យមចុះក្រោម មានការប៉ះពាល់ជីវភាពប្រចាំថ្ងៃ ការទិញមានភាពយឺតយ៉ាវជាងបុរីសម្រាប់អតិថិជនអ្នកមាន”៕

 ដោយៈ គង់ សិរីជេស៊ីកា

ភ្នំពេញៈ ដោយសារតែបញ្ហារាតត្បាតនៃជំងឺកូវីដ១៩ បានរុញច្រានឲ្យមនុស្សជាច្រើន ធ្លាក់ចូលទៅក្នុងបញ្ហាវិបត្តិនៃហិរញ្ញវត្ថុ រហូតមានអ្នកខ្លះបានបង្ខំចិត្តសម្រេច ប្រកាសលក់ទ្រព្យសម្បត្តិ ព្រមទាំងអចលនវត្ថុរបស់ខ្លួននៅក្នុងតម្លៃទាបជាងទីផ្សារផងដែរ។

ជាក់ស្ដែង កាលពីពេលកន្លងទៅ ក៏ដូចជាបច្ចុប្បន្ននេះ ចំនួននៃការប្រកាសលក់អចលនវត្ថុ មានចំនួនកើនឡើងខ្លាំងជាងធម្មតា ធៀបទៅនឹងអត្រាដែលមានជារៀងរាល់ឆ្នាំ ប៉ុន្តែមិនអាចនិយាយបានទេថា ការប្រកាសលក់ទាំងអស់នោះ សុទ្ធតែអាចលក់ចេញ និងទទួលបានតម្លៃដូចការគ្រោងទុកនោះទេ។

តាមរយៈការកត់ត្រានៅក្នុងតម្រាទិញ- លក់អចលនទ្រព្យមានប្រសិទ្ធភាពខ្ពស់បានបញ្ជាក់ថា ការលក់អចលនវត្ថុ ដែលអាចទទួលបានតម្លៃថ្លៃលើទីផ្សារ ឬទាបជាងទីផ្សារ គឺអាស្រ័យទៅលើកត្តាសំខាន់ៗចំនួន៤ ដែលម្ចាស់អចលនវត្ថុ ប្រកាសលក់ត្រូវស្វែងយល់ឲ្យបានច្បាស់។ ចំណុចសំខាន់ទាំង៤នោះរួមមានដូចជា ៖

១.អាយុកាល

រូបរាងពណ៌សម្បុរនៃតួរអគាររបស់អ្នក ប្រៀបដូចពេលដែលអ្នកទៅជួបមនុស្សថ្មីជាលើកដំបូង ដែលគួរចាប់អារម្មណ៍ ឬគ្មានការចាប់អារម្មណ៍ ( Frist Impression) ដូចនេះ វាមានសារៈសំខាន់ណាស់ ក្នុងការចរចាត   ម្លៃ។ កញ្ចក់ទ្វារប្រេះស្រាំ បង្អួចចាស់ ជញ្ជាំងផ្ទះមានស្នាមស្លែជាដើម វានឹងអាចប្រាប់ពីអាយុកាលរបស់អគារអ្នក ទៅកាន់អតិថិជនជាក់ជាមិនខាន។

២.ការជួសជុល និងរចនាឡើងវិញ

ការឌីសាញ ឬរចនាផ្នែកខាងក្នុងនៃអគារ ក៏ជាកូនសោរមួយដ៏សំខាន់ផងដែរ ដែលម្ចាស់សំណង់ ឬម្ចាស់អគារគួរតែពិចារណា ពីព្រោះថាវាអាចបញ្ជាក់ពីបរិយាកាស ដែលមានតម្លៃសម្រាប់អ្នករស់នៅ ដូចនេះច្បាស់ណាស់ វានឹងជះឥទ្ធិពលខ្លាំងដូចគ្នាជាមិនខាន សម្រាប់ការផ្តល់នូវទំហំនៃតម្លៃចរចា។

៣.កេរ្តិ៍ឈ្មោះក្រុមហ៊ុនសាងសង់

តើអចលនវត្ថុរបស់អ្នក ត្រូវបានសាងសង់ឡើង ដោយក្រុមហ៊ុនណា និងអ្នកម៉ៅការណាមួយ។ កេរ្តិ៍ឈ្មោះក្រុមហ៊ុនសាងសង់ ក៏ជាកម្រិតនៃទំនុកចិត្តរបស់ពួកគេ ដែលវានឹងមានឥទ្ធិពលមកលើ តម្លៃអចលនវត្ថុរបស់អ្នកមានផលប៉ះពាល់ដូចគ្នា។

៤.ទីតាំង

បញ្ហាទាំង៣ចំណុចខាងលើនេះ ទោះជាបានប៉ះពាល់តិច ឬច្រើនក្តីទៅលើតម្លៃអចលនវត្ថុរបស់អ្នក ប៉ុន្តែបើទីតាំងរបស់អ្នក នៅតែមិនទាន់មានមនុស្សមករស់នៅច្រើន ឬមានសកម្មភាពពាណិជ្ជកម្មច្រើនទេនោះ ប្រាកដណាស់ថាតម្លៃរបស់វា ក៏នឹងមិនងាយលក់ចេញបានខ្ពស់ ដូចការគ្រោងទុករបស់អ្នកនោះដែរ៕

ដោយ៖ វឌ្ឍនៈ

ភ្នំពេញ ៖ ក្នុងឆ្នាំ២០២២នេះ កំណើនភ្ញៀវទេសចរផ្ទៃក្នុងប្រទេសកម្ពុជាបានកើនឡើងគួរឱ្យកត់សម្គាល់។ ជាក់ស្ដែង ក្នុងរយៈពេលប៉ុន្មានថ្ងៃក្នុងពិធីបុណ្យភ្ជុំបិណ្ឌកន្លងទៅនេះ មានភ្ញៀវទេសចរផ្ទៃក្នុងជាច្រើន បានចេញធ្វើដំណើរកម្សាន្ត នៅតាមរមណីយដ្ឋាននានាទូទាំងប្រទេស។

ប៉ុន្តែ អ្នកជំនាញនៃវិស័យអចលនទ្រព្យបានលើកឡើងថា ការកើនឡើងនៃភ្ញៀវទេសចរផ្ទៃក្នុងមិនសូវជួយច្រើន ដល់វិស័យអចលនទ្រព្យនោះឡើយ។

លោក កែវ សារ៉ន ប្រធានសាខានៃក្រុមហ៊ុនអចលនទ្រព្យ Century 21 Zillion Holding ប្រចាំខេត្តបាត់ដំបង បានឱ្យដឹងថា ក្នុងរយៈពេលបីថ្ងៃនេះពិធីបុណ្យភ្ជុំបិណ្ឌកន្លងទៅ ឃើញថាភ្ញៀវទេសចរមកកម្សាន្តនៅក្នុងខេត្តបាត់ដំបងមានចំនួនច្រើន ទាំងអ្នកមានស្រុកកំណើននៅខេត្តបាត់ដំបងផ្ទាល់ និងភ្ញៀវទេសចរមកកម្សាន្តនៅក្នុងខេត្តបាត់ដំបង។

លោកបន្តថា យ៉ាងណាក្ដី កំណើនភ្ញៀវទេសចរនៅក្នុងខេត្តនេះ មិនបានជួយដល់វិស័យអចលនទ្រព្យច្រើននោះទេ ពីព្រោះអ្នកទេសចរទាំងនោះមកតែមួយពេលៗប៉ុណ្ណោះ ដោយពួកគេមិនបានស្វែងរកអចលនទ្រព្យ នៅក្នុងខេត្តបាត់ដំបងឡើយ។ ជាក់ស្ដែង អ្នកអភិវឌ្ឍន៍អចលនទ្រព្យនៅតែបន្តជួបបញ្ហា លក់មិនចេញ ឬលក់បានចំនួនតិចតួចប៉ុណ្ណោះ។

លោកបន្ថែមថា អ្នកអភិវឌ្ឍន៍អចលនទ្រព្យក្នុងខេត្តមួយនេះ មិនថាដីឡូតិ៍ ឬលំនៅឋានជួបប្រទះនឹងការលក់ចេញ បុន្តែជាយុទ្ធសាស្ត្រទីផ្សារ ពួកគេតែងតែបំប៉ោង និងផ្សព្វផ្សាយថា គម្រោងរបស់ខ្លួនជិតអស់ហើយ ឬនៅសល់តែប៉ុន្មានឡូតិ៍ ឬល្វែងទៀតប៉ុណ្ណោះ នឹងអស់ហើយ តែតាមពិតគម្រោងរបស់ពួកគេនៅសល់ច្រើន និងមិនមានអ្នកទិញនោះទេ។

អ្នកនាង ជិន ច័ន្ទដាលុច្ស ប្រធានផ្នែកវាយតម្លៃ នៃក្រុមហ៊ុនCBRE Cambodia ក៏បានលើកឡើងថា កំណើនភ្ញៀវទេសចរផ្ទៃ ក្នុងនេះនឹងមិនជួយជំរុញ ឱ្យវិស័យអចលនទ្រព្យមានកំណើន ឬមិនជួយឱ្យមានការអភិវឌ្ឍ និងទិញអចលនទ្រព្យច្រើននោះទេ។ អចលនទ្រព្យក្នុងប្រទេសកម្ពុជា គឺពឹងទៅលើជនបរទេស បើសិនជាជនបរទេសមានកំណើនច្រើនឡើងវិញ នោះវិស័យនេះអាចនឹងទទួលបានកំណើន ឬវិវត្តន៍ទៅរកស្ថានភាពមុនកូវីដ១៩បានខ្លះ៕

ដោយ: លាងហួរ

សេអ៊ូល: ក្រសួងឧស្សាហកម្មបានឱ្យដឹងនៅថ្ងៃពុធនេះថា លំហូរវិនិយោគផ្ទាល់ពីបរទេស (FDI) ទៅកាន់ប្រទេសកូរ៉េខាងត្បូង បានកើនឡើង១៨,២ភាគរយ ធៀបនឹងរយៈពេល៩ខែដំបូងនៃឆ្នាំមុន ដោយសារកំណើនដ៏រឹងមាំ នៃការវិនិយោគក្នុងវិស័យកម្រិតខ្ពស់ ដូចជា បន្ទះឈីប និងថ្មអាគុយ។

យោងតាមទិន្នន័យ របស់ក្រសួងពាណិជ្ជកម្ម ឧស្សាហកម្ម និងថាមពល បានឱ្យដឹងថា ប្រទេសនេះបានទទួលលំហូរ FDI មានតម្លៃ២១,៥២ពាន់លានដុល្លារ ក្នុងអំឡុងខែមករាដល់ខែកញ្ញា បើធៀបនឹង១៨,២១ពាន់លានដុល្លារ ដែលបានកត់ត្រាកាលពីឆ្នាំមុន។ ទិន្នន័យបានបង្ហាញថា វាជាលើកទីមួយហើយ ដែលប្រទេសកូរ៉េខាងត្បូងទទួលបានលំហូរFDI ច្រើនជាង២០ពាន់លានដុល្លារ នៅត្រីមាសទីបី។

ប្រទេសនេះបានមើលឃើញការកើនឡើងនៃការវិនិយោគពីបរទេស នៅក្នុងវិស័យជឿនលឿនដូចជា semiconductor រថយន្តអគ្គិសនី និងថ្មអាគុយ។  មូលដ្ឋានផលិតកម្មមានស្ថេរភាព កម្លាំងពលកម្ម និងបច្ចេកវិទ្យាច្នៃប្រឌិត ក៏ដូចជាកិច្ចខិតខំប្រឹងប្រែងរបស់រដ្ឋាភិបាល បានទាក់ទាញការវិនិយោគពីបរទេស។

នៅក្នុងផ្នែកឧស្សាហកម្ម វិស័យផលិតកម្មបានទទួលការវិនិយោគចំនួន៧,៨ពាន់លានដុល្លារ ច្រើនជាងពីរដងធៀបនឹងឆ្នាំមុន។ យ៉ាងណាក្តី លំហូរFDI ហូរចូលវិស័យសេវាកម្មបានធ្លាក់ចុះ១១,៥ភាគរយមកត្រឹម១២,៦៧ពាន់លានដុល្លារក្នុងអំឡុងខែមករាដល់ខែកញ្ញា។

វិនិយោគិនសហរដ្ឋអាមេរិក បានសន្យាថា នឹងបោះទុនវិនិយោគក្នុងទំហំទឹកប្រាក់៧,១៣ពាន់លានដុល្លារ ក្នុងអំឡុងពេលដែលបានលើកឡើង កើនឡើង១១៥,៩ភាគរយពីមួយឆ្នាំទៅមួយឆ្នាំ។ តួ​លេខ​ពី​ប្រទេស​ជប៉ុន​ក៏​បាន​កើន​ឡើង៤២,៩ភាគរយ ​ដល់១,០៤ពាន់​លាន​ដុល្លារ។

ទិន្នន័យបានបង្ហាញថា ការវិនិយោគពីសហភាពអឺរ៉ុប និងចក្រភពអង់គ្លេស បានធ្លាក់ចុះ៥៥ភាគរយមកត្រឹម៣,៣ពាន់លានដុល្លារ ដោយសារតែឥទ្ធិពលមូលដ្ឋានខ្ពស់ ហើយលំហូរវិនិយោគពីប្រទេសចិន ហុងកុង សិង្ហបុរី តៃវ៉ាន់ និងម៉ាឡេស៊ី បានធ្លាក់ចុះ១៤,៩ភាគរយ កាលពីឆ្នាំមុន មកត្រឹម៤,៣៣ពាន់លានដុល្លារ៕

 ដោយៈ វឌ្ឍនៈ

ភ្នំពេញៈ ក្នុងរយៈពេល៩ខែចុងក្រោយនេះ​នៃឆ្នាំ ២០២២២ ក្រុមហ៊ុនអភិវឌ្ឍន៍អចលនទ្រព្យ នៅក្នុងប្រទេសកម្ពុជា ជាពិសេសក្រុមហ៊ុនអភិវឌ្ឍន៍លំនៅឋានតម្លៃសមរម្យ បានចូលទៅកាន់តំបន់ផ្លូវជាតិ៥១។

តំបន់អភិវឌ្ឍន៍នេះ ផ្តោតលើប៉ែកខាងលិចរាជធានីភ្នំពេញ ដែលគំរោងទាំងនេះធ្វើឡើង ដើម្បីអភិវឌ្ឍន៍លំនៅឋានជូនប្រជាពលរដ្ឋ ដែលមានតម្រូវការក្នុងនោះឃើញថា ការអភិវឌ្ឍលំនៅឋានតម្លៃសមរម្យ មានសន្ទុះកាន់តែច្រើន។

លោកង៉ឺយធី ជំនួយការអគ្គនាយកនៃក្រុមហ៊ុនអភិវឌ្ឍន៍ អចលនទ្រព្យ KH Land ដែលអភិវឌ្ឍន៍នៅតំបន់ប៉ែកខាងលិច រាជធានីភ្នំពេញបាននិយាយឲ្យដឹងនាព្រឹកថ្ងៃទី៥ តុលានេះថា ក្នុងរយៈពេល៩ខែចុងក្រោយនេះ លោកបានមើលឃើញថា មានក្រុមហ៊ុនអភិវឌ្ឍន៍អចលនទ្រព្យជាច្រើនបានចូលទៅកាន់តំបន់តាមបណ្ដោយផ្លូវក្រវ៉ាត់ក្រុង ( ផ្លូវ៥១) កាន់តែច្រើននិងបានធ្វើសកម្មភាពសាងសង់លំនៅឋាន សម្រាប់ផ្គត់ផ្គង់តាមតម្រូវការអតិថិជន ក្នុងនោះដែរលំនៅឋានតម្លៃសមរម្យឃើញថា មានទីផ្សារនិងសន្ទុះនៃការអភិវឌ្ឍច្រើននៅក្នុងតំបន់នោះ ។

លោកបន្តថា “ក្នុងវិបត្តិកូវីដ១៩ ទីផ្សារអចលនទ្រព្យទាំងដីឡូត៏ និងផ្ទះឃើញថាមានការថមថយមួយម្រិត ពីព្រោះតែអំឡុងពេលនេះ ប្រជាពលរដ្ឋមួយចំនួនមានបញ្ហានឹងហិរញ្ញវត្ថុ ដោយបាត់ចំណូលហើយចំណូល ដែលទទួលបាន គឺសម្រាប់ទុកចំណាយការចំាបាច់ប៉ុណ្ណោះ ដោយមិនមានការទិញលក់អចលនទ្រព្យខ្លាំងនោះទេ”។ លោកបន្តថា “ក្រោយមកទៀតនៅក្នុងឆ្នាំ២០២២ ដោយសារតែស្ថានភាពបានធូរស្រាលក៏ឃើញថា អាជីវកម្មជាច្រើន ចាប់ផ្ដើមមានសកម្មភាពកម្រើកឡើងវិញ ធ្វើឱ្យប្រាក់ចំណូលពលរដ្ឋក៏កើនឡើងទៅតាមនោះ នឹងធ្វើឱ្យការទិញលក់អចលនទ្រព្យក៏មានជាហូរហែរឡើងវិញ”។

លោកធីបានបន្តទៀតថា សម្រាប់គម្រោងអភិវឌ្ឍន៍លំនៅឋាន និងដីឡូត៏របស់ក្រុមហ៊ុន KH Land ក៏បានបន្តសកម្មភាពអភិវឌ្ឍន៍របស់ខ្លួនដើម្បីបំពេញតម្រូវការអតិថិជនផងដែរ ក្នុងនោះក្រុមហ៊ុនបានអភិវឌ្ឍន៍ហេ ដ្ឋារចនាសម្ព័ន្ធថ្មីៗ ទាំងក្នុងគម្រោងនិងក្បែរគម្រោង ដើម្បីឱ្យពលរដ្ឋដែលបានទិញគម្រោងពីក្រុមហ៊ុនកាន់តែមានទំនុកចិត្តខ្ពស់។

លោកបន្ថែមថា កត្តាដែលជំរុញឱ្យក្រុមហ៊ុនអភិវឌ្ឍន៍អចលនទ្រព្យជាច្រើន បានចូលមកកាន់តំបន់ផ្លូវជាតិ៥១ ដើម្បីអភិវឌ្ឍន៍គម្រោងរបស់ខ្លួននោះដោយយើងឃើញថា ក្រុមហ៊ុនវិនិយោគធំៗ ដូចជា ក្រុមហ៊ុនកាណាឌីយ៉ាបាន និងកំពុងមមាញឹកក្នុងការសាងសង់ឃ្លាំង រោងចក្រ ដោយរំពឹងថានៅពេលឆាប់ៗខាងមុខនេះ ពោលគឺនៅពេលរោងចក្រដំណើរការ នឹងមានមនុស្សមករស់នៅ និងធ្វើការនៅតំបន់នោះកាន់តែច្រើន ដែលនឹងធ្វើឱ្យការអភិវឌ្ឍនៅតំបន់កាន់តែមានសក្ដានុពលបន្ថែមទៀត ។

ចំណែកលោកបូ សេងហួរ ភ្នាក់ងារអចលនទ្រព្យមួយរូបប្រចាំខេត្តកំពង់ស្ពឺក៏បានឱ្យដឹងផងដែរថា តំបន់តាមបណ្ដោយផ្លូវលេខ៥១ បានក្លាយជាតំបន់ ដែលមានសក្ដានុពលទាក់ទាញ លើការអភិវឌ្ឍឧស្សាហកម្មនិងលំនៅឋានតម្លៃ ដោយមានក្រុមហ៊ុនថ្មីៗជាច្រើន បានចូលទៅកាន់តំបន់នោះដើម្បីអភិវឌ្ឍន៍ ហើយបានជំរុញឱ្យតម្លៃដីធ្លីនៅតំបន់នោះ កាន់តែមានកំណើន និងរក្សាបានកំណើនល្អ ទោះបីស្ថិតនៅក្នុងវិបត្តិនាពេលកន្លងមកក្ដី ។

តំបន់ផ្លូវជាតិលេខ៥១ និងផ្លូវជាតិលេខ៤១ ស្ថិតនៅក្នុងផែនការនិងគោលនយោបាយរបស់រដ្ឋាភិបាល រៀបចំជាតំបន់ឧស្សាហកម្ម ដោយរោងចក្រ សហគ្រាសជាច្រើននឹងរើចេញពីរាជធានីភ្នំពេញ ទៅកាន់តំបន់នោះកាន់តែច្រើននាពេលអនាគត៕