ដោយ៖ សុផារី

ភ្នំពេញ៖ សម្តេចតេជោ ហ៊ុន សែន បានថ្លែងនៅក្នុងសន្និសីទ “ចក្ខុវិស័យប្រទេសកម្ពុជា” នៅព្រឹកទី០៦ ខែតុលា ឆ្នាំ២០២២នេះថា ប្រទេសកម្ពុជា បាននិងកំពុងព្យាយាមប្រែក្លាយវិបត្តិឱ្យទៅជាកាលានុវត្តភាព តាមរយៈការពន្លឿនការកែទម្រង់ស៊ីជម្រៅ ដើម្បីលើកកម្ពស់បរិយាកាសធុរកិច្ច និងពង្រឹងភាព ប្រកួតប្រជែងរបស់កម្ពុជា។

សម្តេចតេជោ ហ៊ុន សែន បានមានប្រសាសន៍ថា “កម្ពុជាត្រូវបានចាត់ទុកថាជាប្រទេសឈានមុខមួយ ដែលបានគ្រប់គ្រង និងងើបចេញពីវិបត្តិនៃជំងឺកូវីដ-១៩ បានយ៉ាងល្អប្រសើរ។ ក្នុងបរិការណ៍ដែលប្រទេសជាច្រើននៅ ជុំវិញពិភពលោកនៅបន្តជួបប្រទះនឹងការឆ្លងរាលដាលនៅឡើយ រាជរដ្ឋាភិបាលបាននិងកំពុងព្យាយាមប្រែក្លាយវិបត្តិឱ្យទៅជាកាលានុវត្តភាព តាមរយៈការពន្លឿនការកែទម្រង់ស៊ីជម្រៅ ដើម្បីលើកកម្ពស់បរិយាកាសធុរកិច្ច និងពង្រឹងភាព ប្រកួតប្រជែងរបស់កម្ពុជា”។

សម្តេចតេជោ ហ៊ុន សែន បានថ្លែងថា “ក្នុងនោះកាលពីខែតុលា ឆ្នាំ២០២១ កម្ពុជាបានដាក់ចេញនូវច្បាប់ស្តីពីវិនិយោគនៃកម្ពុជា ដែលជាច្បាប់វិនិយោគថ្មី ដោយមានការកំណត់នូវការផ្តល់ការលើកទឹកចិត្ត និងការការពារដល់វិនិយោគិនជាក់លាក់ និងច្បាស់លាស់ ក្នុងបំណងបង្កើនការទាក់ទាញការវិនិយោគសម្រាប់កម្ពុជា”។

សម្តេចបានបន្ថែមថា រាជរដ្ឋាភិបាលក៏បានដាក់ចេញ និងបាននិងកំពុងជំរុញការអនុវត្ត ឯកសារគោលនយោបាយ និងយុទ្ធសាស្ត្រអភិវឌ្ឍន៍វិស័យសំខាន់ៗ ដូចជា វិស័យកាត់ដេរ យានយន្ត អេឡិចត្រូនិក កសិកម្ម ទេសចរណ៍ ប្រៃសណីយ៍ និងប្រសិទ្ធភាពថាមពលជាដើម។

នៅក្នុងក្របខណ្ឌពាណិជ្ជកម្មអន្ដរជាតិ កម្ពុជាក៏បានក្លាយជាប្រទេសហត្ថលេខីនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ដែលជាកិច្ចព្រមព្រៀងពាណិជ្ជកម្មសេរីធំជាងគេបង្អស់ក្នុងប្រវត្តិសាស្ត្រ សកល កិច្ចព្រមព្រៀងពាណិជ្ជកម្មសេរីរវាងកម្ពុជា និងសាធារណរដ្ឋប្រជាមានិតចិន និងកិច្ចព្រមព្រៀងពាណិជ្ជកម្មសេរីរវាងកម្ពុជា និងសាធារណរដ្ឋកូរ៉េ ។

សម្តេចតេជោលើកឡើងពីទិសដៅទៅមុខ ក្នុងបរិការណ៍ ដែលពោរពេញទៅដោយភាពស្មុគស្មាញ និងភាពមិនប្រាកដប្រជាខ្ពស់ថា រាជរដ្ឋាភិបាលនឹងផ្ដល់អាទិភាពដល់ការកសាងភាពធន់ន សេដ្ឋកិច្ចជាតិ ដូចបានកំណត់នៅក្នុង “ក្របខណ្ឌយុទ្ធសាស្ត និងកម្មវិធីស្តារ និងជំរុញកំណើនសេដ្ឋកិច្ចកម្ពុជា ក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មីសម្រាប់ឆ្នាំ២០២១-២០២៣”៕

ដោយ៖ សុផារី

ភ្នំពេញ៖  សម្តេចតេជោ ហ៊ុន សែន បានថ្លែងថា ដើម្បីតម្រង់ទិសដៅអភិវឌ្ឍសង្គម-សេដ្ឋកិច្ចកម្ពុជា រាជរដ្ឋាភិបាលបានដាក់ចេញ នូវយុទ្ធសាស្ត្រចតុកោណចំនួន៤ ដំណាក់កាលរួចមកហើយ។ នៅក្នុងគ្រប់ដំណាក់កាលនីមួយៗ រាជរដ្ឋាភិបាលតែងកំណត់ “មនុស្ស” ជាវិស័យអាទិភាពមួយ ក្នុងចំណោមវិស័យអាទិភាពទាំង៤ គឺ ផ្លូវ ទឹក ភ្លើង និងមនុស្ស។

សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងនៅក្នុងសន្និសីទ “ចក្ខុវិស័យកម្ពុជាឆ្នាំ២០២២” នៅព្រឹកទី០៦ ខែតុលា ឆ្នាំ២០២២នេះ ដែលជាវេទិកាដ៏មានសារៈសំខាន់ប្រមូលផ្តុំអ្នកជំនាញ បើកកិច្ចពិភាក្សាលើប្រធានបទនានា ពាក់ព័ន្ធបញ្ហាសេដ្ឋកិច្ច និងសង្គម ដើម្បីជាធាតុចូលសម្រាប់ដោះស្រាយបញ្ហាប្រឈម និងស្វែងរកកាលានុវត្តភាពសម្រាប់ជំរុញ ដល់ការអភិវឌ្ឍនៅកម្ពុជា។

សម្តេចតេជោបានបន្តថា “ជាពិសេសចាប់ពីដំណាក់កាលទី៣មក រាជរដ្ឋាភិបាលបានកំណត់ “មនុស្ស” ជាវិស័យអាទិភាពចម្បងបំផុត ដោយផ្តោតការយកចិត្តទុកដាក់លើការអភិវឌ្ឍធនធានមនុស្ស ការបង្កើតការងារ និងការកាត់បន្ថយភាពក្រីក្រ”។

សម្តេចតេជោបានគូសបញ្ជាក់ថា ការអភិវឌ្ឍប្រព័ន្ធគាំពារសង្គម គឺជាការវិនិយោគ លើប្រជាជន និងការផ្តល់សន្តិសុខសេដ្ឋកិច្ចជូន ប្រជាជនជាពិសេសគ្រួសារក្រីក្រ និងងាយរងគ្រោះ។ ក្នុងស្មារតីនេះ រាជរដ្ឋាភិបាលនឹងបន្តពង្រឹងប្រព័ន្ធជំនួយសង្គម និងសន្តិសុខសង្គម និងពង្រីកវិសាលភាពគ្របដណ្តប់ឱ្យកាន់តែចំទិសដៅ ជាពិសេសតាមរយៈការជំរុញ និងលើកទឹកចិត្តឱ្យប្រជាជន ដែលស្ថិតនៅក្នុងសេដ្ឋកិច្ចក្រៅប្រព័ន្ធឱ្យចូលក្នុងប្រព័ន្ធ ដើម្បីទទួលបានកិច្ចគាំពារផ្សេងៗ៕

 ដោយៈ គង់ ម៉ាលីនណា

       ភ្នំពេញៈ រដ្ឋលេខាធិការក្រសួងពាណិជ្ជកម្ម លោកជំទាវ តឹករ៉េត កំរងដឹកនាំកិច្ចប្រជុំអន្តរក្រសួង ដើម្បីត្រៀមលក្ខណៈចូលរួមនៅក្នុងពិធីសម្ភោធ និងការចាប់ផ្តើមការចរចាកិច្ចព្រមព្រៀងភាព ជាដៃគូសេដ្ឋកិច្ចគ្រប់ជ្រុងជ្រោយរវាងកម្ពុជា និងអេមីរ៉ាតអារ៉ាប់រួម។

លោកជំទាវរដ្ឋលេខាធិការ បានជម្រាបជូនអង្គប្រជុំ អំពីទំនាក់ទំនងសេដ្ឋកិច្ច-ពាណិជ្ជកម្ម និងវិនិយោគ រវាងកម្ពុជា-អេមីរ៉ាតអារ៉ាប់រួម ក៏ដូចជាអត្ថប្រយោជន៍ និងកាលានុវត្តន៍ភាព សម្រាប់វិស័យសំខាន់ៗទាំងនេះ នៃកិច្ចព្រមព្រៀងCEPA រវាងកម្ពុជា និងអេមីរ៉ាតអារ៉ាប់រួម ដែលជាកិច្ចព្រមព្រៀងពាណិជ្ជកម្មសេរី សំដៅពង្រីក និងពង្រឹងកិច្ចសហប្រតិបត្តិការទ្វេភាគីលើគ្រប់វិស័យ ជាពិសេសវិនិយោគ និងពាណិជ្ជកម្ម ឌីជីថលូបនីយកម្ម និងវិស័យសំខាន់ៗផ្សេងទៀត ឱ្យកាន់តែល្អប្រសើរថែមទៀត។

អង្គប្រជុំក៏បានចែករំលែក និងផ្លាស់ប្តូរជូនគ្នាទៅវិញទៅមកនូវបទពិសោធន៍ និងឧត្តមានុវត្តន៍ពាក់ព័ន្ធនានា ក្នុងការចរចាកិច្ចព្រមព្រៀងពាណិជ្ជកម្មសេរី ទាំងក្នុងក្របខ័ណ្ឌពហុភាគី និងទ្វេភាគី ដើម្បីជាធាតុចូលសម្រាប់ក្រុមការងារជំនាញតាមក្រសួង -ស្ថាប័ននីមួយៗ អាចយកទៅអនុវត្តក្នុងការពិនិត្យ លទ្ធភាពចរចាបង្កើតកិច្ចព្រមព្រៀង CEPA នាពេលខាងមុខ។

លោកជំទាវរដ្ឋលេខាធិការ ក៏បានជំរុញឱ្យក្រុមការងារជំនាញតាមក្រសួង-ស្ថាប័ននីមួយៗ បន្តធ្វើការសិក្សាស្រាវជ្រាវ ឱ្យបានលម្អិតអំពីកាលានុវត្តភាពផ្នែកសេដ្ឋកិច្ច បញ្ហាប្រឈម និងយុទ្ធសាស្រ្តនានា ក្នុងការទាញយកអត្ថប្រយោជន៍សេដ្ឋកិច្ច ពាណិជ្ជកម្ម និងទំនាក់ទំនងកិច្ចសហប្រតិបត្តិការទ្វេភាគីលើវិស័យពាក់ព័ន្ធ ឱ្យបានជាអតិបរមា ពីកិច្ចព្រមព្រៀង CEPA នេះ ព្រមទាំងរៀបចំផែនការ ក្នុងដំណើរការចរចាឱ្យបានគ្រប់ជ្រុងជ្រោយ។

មន្រ្តីពាក់ព័ន្ឋបានបង្ហាញនូវសុទិដ្ឋិនិយម លើអត្ថប្រយោជន៍សេដ្ឋកិច្ច ដែលអាចទទួលបានពីការបង្កើតកិច្ចព្រមព្រៀង និងចាប់ផ្តើមការចរចាកិច្ចព្រមព្រៀង CEPA រវាងកម្ពុជា និងអេមីរ៉ាតអារ៉ាប់រួមនេះ សំដៅបន្តធ្វើពិពិធកម្មទីផ្សារ, បង្កើតកាលានុវត្តភាពពាណិជ្ជកម្មថ្មីៗ និងទាក់ទាញការវិនិយោគផ្ទាល់បរទេស ឱ្យកាន់តែច្រើនបន្ថែមទៀត ក្នុងបុព្វហេតុបន្តលើកកម្ពស់កំណើនសេដ្ឋកិច្ចជាតិ ប្រកបដោយបរិយាប័ន្ន និងចីរភាព៕

ដោយៈ សុខុម

ហុងកុង: កំពូលមហាសេដ្ឋី Elon Musk បានបង្កការភ្ញាក់ផ្អើលជាថ្មីម្ដងទៀត នៅពេលលោកស្រាប់តែប្ដូរចិត្ត ព្រមទិញយកក្រុមហ៊ុនបណ្ដាញទំនាក់ទំនងសង្គម Twitter ហើយថែមទាំងបង្ហាញមហិច្ឆតា ចង់ស្រវាទិញយក WeChat របស់ប្រទេសចិន ថែមទៀត។

យោងតាមសារព័ត៌មាន CNN ចុះផ្សាយកាលពីថ្ងៃពុធ ទី៥ ខែតុលា ឱ្យដឹងថា ពេលនេះលោកElon Musk កំពុងមានគម្រោងទិញយក WeChat ដែលជាPlatform បណ្ដាញទំនាក់ទំនងសង្គមកំពូលរបស់ប្រទេ​សចិន ខណៈកំពុងរៀបចំផែនការអនាគត សម្រាប់ក្រុមហ៊ុនTwitter។

នាយកប្រតិបត្តិក្រុមហ៊ុនផលិតរថយន្តគ្គិសនី Tesla ដ៏ល្បីល្បាញរូបនេះបាននិយាយ កាលពីថ្ងៃអង្គារ ទី៤ ខែតុលា ថា លោកចង់បង្កើត App ថ្មីមួយឱ្យឈ្មោះថា “X” បន្ទាប់ពីទិញយកក្រុមហ៊ុន Twitter។

លោកបានសរសេរបង្ហោះលើគណនី Twitter ថា “ការទិញយកក្រុមហ៊ុន Twitter គឺជាការពន្លឿនផែនការ ដើម្បីឈានទៅដល់ការបង្កើត App ឈ្មោះ X ដែលមានគ្រប់យ៉ាង”។

ការអត្ថាធិប្បាយរបស់លោក Elon Musk ធ្វើឡើងក្រោយពីធ្លាយដំណឹងថា លោកបានប្ដូរចិត្តជាថ្មីម្ដងទៀត ដោយព្រមទិញយកក្រុមហ៊ុន Twitter ក្នុងតម្លៃពេញ៤៤ពាន់លានដុល្លារ ដូចដែលបានព្រមព្រៀងគ្នាកាលពីខែមេសា ដើមឆ្នាំនេះ។

កំពូលមហាសេដ្ឋីមានបំផុត ក្នុងពិភពលោករូបនេះ បានប្ដូរចិត្តទិញយកក្រុមហ៊ុន Twitter ដែលជាបណ្តាញទំនាក់ទំនងសង្គម ដ៏មានឥទ្ធិពលបំផុតមួយ បន្ទាប់ពីមានជម្លោះប្ដឹងផ្ដល់គ្នា ឡើងដល់តុលាការជាច្រើនខែដោយសារតែលោកលេបសម្ដីថាឈប់ទិញ៕ CNN៕

ដោយៈ គង់ សូរិយា

       ភ្នំពេញៈ ក្រុមមន្រ្តីជាន់ខ្ពស់អាស៊ាន បានជួបគ្នាក្នុងសន្និសីទលើកទី១៣ ស្តីពីការតភ្ជាប់អាស៊ានក្រោមអធិបតីភាព លោកតូច ចាន់កុសល រដ្ឋលេខាធិការប្រចាំការនៃក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់លោក ទេសរដ្ឋមន្ត្រី ស៊ុន ចាន់ថុល។

សន្និសីទស្តីពីការត ភ្ជាប់អាស៊ានលើកទី១៣ ដោយមានការចូលរួមពីតំណាងគណៈកម្មាធិការ សម្របសម្រួលការតភ្ជាប់អាស៊ាន(ACCC) MPAC 2025 Lead Implementing Bodies (LIBs) អ្នកសម្របសម្រួល និង មន្ត្រីបង្គោលថ្នាក់ជាតិMPAC 2025 ដៃគូសន្ទនា ដៃគូអភិវឌ្ឍន៍ អង្គការអន្តរជាតិ វិស័យឯកជន ប្រព័ន្ធផ្សព្វផ្សាយ និងលេខាធិការដ្ឋានអាស៊ាន។

សន្និសីទនេះ រៀបចំឡើងក្នុងគោលបំណង ពិភាក្សាអំពីការលើកកម្ពស់ការតភ្ជាប់ក្នុងតំបន់ សំដៅរួម ចំណែកដល់ការសម្រេចបាននូវចក្ខុវិស័យសហគមន៍អាស៊ានឆ្នាំ២០២៥ និងឆ្ពោះទៅកាន់ការកសាងចក្ខុវិស័យសហគមន៍អាស៊ានក្រោយឆ្នាំ២០២៥ ប្រកបដោយបរិយាបន្ន ចីរភាព និងភាពធន។

អង្គសន្និសីទបានពិភាក្សា លើប្រធានបទចំនួនបីរួមមាន ទី១ ចក្ខុវិស័យក្នុងការតភ្ជាប់អាស៊ានក្រោយ ឆ្នាំ២០២៥ (ASEAN Connectivity Post 2025 Vision) ទី២ ការកសាងហេដ្ឋារចនាសម្ព័ន្ធ ប្រកបដោយចីរភាព និងឌីជីថលភាវូបនីយកម្ម សម្រាប់ការពង្រឹងការតភ្ជាប់ ទី៣ ការពង្រឹងភាពជាដៃគូដើម្បីអនុវត្តផែន ការមេស្តីពីការតភ្ជាប់អាស៊ានឆ្នាំ២០២៥ (MPAC 2025)។

ថ្លែងនៅក្នុងពិធីបិទសន្និសីទនេះ លោកតូច ចាន់កុសល បានគូសបញ្ជាក់ពីសារៈសំខាន់នៃការ ពង្រឹងការតភ្ជាប់ក្នុងតំបន់ និងហេដ្ឋារចនាស ម្ព័ន្ធសម្រាប់អាស៊ាន ដើម្បីគាំទ្រដល់ការងើបឡើងវិញ ក្នុង តំបន់ និងជួយកសាងសហគមន៍អាស៊ាន ប្រកបដោយបរិយាបន្ន ចីរភាព និងភាពធន់។

លោកបានបន្ថែមថា ការងាររបស់អាស៊ាន តាមរយៈគណៈកម្មាធិការសម្របសម្រួលការតភ្ជាប់អាស៊ាន (ACCC) អាចជះឥទ្ធិ ពលដោយផ្ទាល់ និងដោយប្រយោល លើការគាំទ្រកិច្ចខិតខំប្រឹងប្រែង ក្នុងការជំរុញការតភ្ជាប់ និងហេដ្ឋា រចនាសម្ព័ន្ធរាជធានី-ខេត្តរបស់កម្ពុជា។

ឆ្លៀតក្នុងឱកាសនោះ លោករដ្ឋលេខាធិការ បានជម្រាបជូនផងដែរអំពីការបើកឱ្យសាធារណជនប្រើ ប្រាស់សាកល្បងផ្លូវ ល្បឿនលឿនភ្នំពេញ-ក្រុងព្រះសីហនុកាលពីថ្ងៃទី១ ខែតុលា ឆ្នាំ២០២២ ប្រវែង១៨៧,០៥គីឡូម៉ែត្រ ដែលជាផ្លូវល្បឿនលឿនលើកដំបូងបង្អស់ ក្នុងប្រវត្តិសាស្ត្រកម្ពុជា។ ផ្លូវនេះនឹងជួយកាត់បន្ថយរយៈពេលធ្វើដំណើរ រវាងក្រុងទាំងពីរពី៥ម៉ោងថយមកនៅត្រឹមប្រមាណ២ម៉ោងប៉ុណ្ណោះ៕

ដោយ៖ សុផារី

ភ្នំពេញ៖  សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងនៅក្នុងសន្និសីទ “ចក្ខុវិស័យកម្ពុជាឆ្នាំ២០២២” នៅព្រឹកទី០៦ ខែតុលា ឆ្នាំ២០២២នេះ ដោយផ្តល់ជាអនុសាសន៍ដ៏ខ្ពង់ខ្ពស់ ចំនួន៧ចំណុច ដើម្បីជាធាតុចូលបន្ថែម ក្នុងការដោះស្រាយបញ្ហាប្រឈម និងស្វែងរកកាលានុវត្តភាពសម្រាប់ជំរុញដល់ការអភិវឌ្ឍនៅកម្ពុជា។

សន្និសីទ “ចក្ខុវិស័យប្រទេសកម្ពុជា” គឺជាវេទិកាដ៏មានសារៈសំខាន់ប្រមូលផ្តុំអ្នកជំនាញ បើកកិច្ចពិភាក្សាលើប្រធានបទនានា ពាក់ព័ន្ធបញ្ហាសេដ្ឋកិច្ច និងសង្គម ដើម្បីជាធាតុចូលសម្រាប់ដោះស្រាយបញ្ហាប្រឈម និងស្វែងរកកាលានុវត្តភាពសម្រាប់ជំរុញដល់ការអភិវឌ្ឍនៅកម្ពុជា។

ដើម្បីជាធាតុចូលបន្ថែម សម្តេចតេជោ ហ៊ុន សែន បានផ្តល់ជាទស្សនទានការគិតគូរ និងទិសដៅរបស់រាជរដ្ឋាភិបាល ដូចខាងក្រោម ៖

ទី១ បន្ថែមពីលើការចាក់វ៉ាក់សាំង រាជរដ្ឋាភិបាលនឹង ជំរុញការវិនិយោគលើវិស័យសុខាភិបាល ដើម្បីរៀបចំប្រព័ន្ធសុខាភិបាលមួយដ៏រឹងមាំ ដែលអាចជួយ និងការពារប្រជាជនពីជំងឺកូវីដ-១៩ ក៏ដូចជាជំងឺរាតត្បាតផ្សេងទៀត ដែលអាចកើតមាន ឡើងជាយថាហេតុនាពេលអនាគត

ទី២. ការអភិវឌ្ឍប្រព័ន្ធគាំពារសង្គម គឺជាការវិនិយោគលើប្រជាជន និងការផ្តល់សន្តិសុខសេដ្ឋកិច្ចជូន ប្រជាជន ជាពិសេសគ្រួសារក្រីក្រ និងងាយរងគ្រោះ។ ក្នុងស្មារតីនេះ រាជរដ្ឋាភិបាលនឹងបន្ត ពង្រឹងប្រព័ន្ធជំនួយសង្គម និងសន្តិសុខសង្គម និងពង្រីកវិសាលភាពគ្របដណ្តប់ឱ្យកាន់តែចំទិសដៅ ជាពិសេសតាមរយៈការជំរុញ និងលើកទឹកចិត្តឱ្យប្រជាជន ដែលស្ថិតនៅក្នុងសេដ្ឋកិច្ច ក្រៅប្រព័ន្ធឱ្យចូលក្នុងប្រព័ន្ធ ដើម្បីទទួលបានកិច្ចគាំពារផ្សេងៗ។

ទី៣. ការអភិវឌ្ឍធនធានមនុស្ស ទាំងចំណេះនិង ជំនាញ គឺជាកត្តាចាំបាច់មិនអាចខ្វះបានក្នុងការ លើកកម្ពស់ផលិតភាពសេដ្ឋកិច្ច និងការផ្លាស់ប្តូរ រចនាសម្ព័ន្ធសេដ្ឋកិច្ច ពីសេដ្ឋកិច្ចដែលពឹងផ្អែកលើកម្លាំងពលកម្ម ដែលមានជំនាញទាបឱ្យទៅជាសេដ្ឋកិច្ច ដែលពឹងផ្អែកលើជំនាញ និងបច្ចេកវិទ្យា។

ទី៤. ថ្វីត្បិតតែសេដ្ឋកិច្ចកម្ពុជាពឹងផ្អែកខ្លាំងលើការវិនិយោគផ្ទាល់ពីបរទេស និងការនាំចេញសហគ្រាសធុនតូចនិងមធ្យម គឺជាឆ្អឹងខ្នងនៃសេដ្ឋកិច្ច ដែលចូលរួមចំណែកយ៉ាងសំខាន់ ក្នុងការបង្កើតមុខរបរ និងការងារជូនដល់ប្រជាជនកម្ពុជា។ ក្នុងន័យនេះ រាជរដ្ឋាភិបាលកំណត់យកការ អភិវឌ្ឍសហគ្រាសធុនតូច និងមធ្យម ជាអាទិភាព ចម្បងមួយ តាមរយៈការផ្ដល់ការគាំទ្រផ្នែកបច្ចេកទេសនិងហិរញ្ញវត្ថុ ការកែសម្រួលបរិយាកាសធុរកិច្ច និងការលើកទឹកចិត្តឱ្យមានការចូលរួម ក្នុងសេដ្ឋកិច្ចក្នុងប្រព័ន្ធ ជាដើម។

ទី៥. បច្ចេកវិទ្យាឌីជីថលបានបោះជំហានយ៉ាងលឿន ហើយបានក្លាយជាកាតាលីករក្នុងការជំរុញ កំណើនសេដ្ឋកិច្ច ។ មិនថាស្ថិតក្នុងកម្រិត អភិវឌ្ឍន៍បែបណានោះឡើយ បច្ចេកវិទ្យាឌីជីថល អាចមានសក្តានុពលខ្ពស់ និងទូលំទូលាយក្នុង ការផ្ដល់លទ្ធភាពឱ្យបណ្តាប្រទេស ដែលមានសេដ្ឋកិច្ចកំពុងលូតលាស់ ឬកំពុងអភិវឌ្ឍ អាចចាប់យកបច្ចេកវិទ្យាថ្មីៗ និងលោតផ្លោះពីឧស្សាហកម្មប្រពៃណីទៅឧស្សាហកម្មទំនើបបាន ក្នុងរយៈពេលដ៏ខ្លី។ ដូចនេះ កម្ពុជាត្រូវចាប់ យកឱ្យបាននូវកាលានុវត្តភាពដ៏ធំធេងនេះ តាមរយៈការជំរុញការអនុវត្តឱ្យបានល្អប្រសើរ នូវ “ក្របខណ្ឌគោលនយោបាយសេដ្ឋកិច្ច និង សង្គមឌីជីថលកម្ពុជា ២០២១-២០៣៥” “គោលនយោបាយរដ្ឋាភិបាលឌីជីថលកម្ពុជា ២០២២ – ២០៣៥” និងគោលនយោបាយ ពាក់ព័ន្ធផ្សេងទៀត។

ទី៦. ការលើកកម្ពស់ការអភិវឌ្ឍសេដ្ឋកិច្ចបៃតង និង ភាពធន់ទៅនឹងអាកាសធាតុ ក៏ជាផ្នែកមួយ ចាំបាច់សម្រាប់ទ្រទ្រង់កិច្ចអភិវឌ្ឍសង្គម សេដ្ឋកិច្ចប្រកបដោយចីរភាព តាមរយៈការគាំទ ការពង្រីកកិច្ចសហប្រតិបត្តិការលើការកសាង ហេដ្ឋារចនាសម្ព័ន្ធបៃតង ការជំរុញការធ្វើអន្តរ កាលថាមពល និងការប្រើប្រាស់បច្ចេកវិទ្យា បៃតងជាដើម។

ទី៧. ការបន្តពង្រឹងស្ថិរភាព ពិពិធកម្មវិស័យហិរញ្ញវត្ថុ ក៏ដូច ជាការអភិវឌ្ឍវិស័យហិរញ្ញវត្ថុទាំងមូលប្រកប ដោយភាពធន់ និងបរិយាបន្ន ដោយមានការ ចូលរួមពីវិស័យឯកជន គឺពិតជាមានសារៈសំខាន់។ ការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈបានទទួលលទ្ធផលល្អប្រសើរ ដែលបានអនុញ្ញាតឱ្យរាជរដ្ឋាភិបាលបង្ហូរថវិកាកាន់តែច្រើនទៅ កាន់វិស័យអាទិភាព បង្កើននូវធនធានវិនិយោគ សាធារណៈ អាចសន្សំ លើកស្ទួយឯករាជ្យភាព ផ្នែកថវិការបស់កម្ពុជានិងអនុវត្តគោលនយោបាយ និងវិធានការអន្តរាគមន៍ទាំងឡាយ ដើម្បីជួយ ប្រជាជន និងវិស័យឯកជនដែលបាននិងកំពុង បន្តទទួលរងនូវផលប៉ះពាល់ពីវិបត្តិកូវីដ-១៩៕

ដោយ: លាងហួរ

បាងកក: កិច្ចប្រជុំកំពូល Apec ដែលគ្រោងនឹងធ្វើឡើងនៅមជ្ឈ មណ្ឌលសន្និបាត Queen Sirikit ចាប់ពីថ្ងៃទី១៤ ដល់ទី១៩ខែវិច្ឆិកាក្រោមប្រធានបទ“Open. Connect. Balance”។

អ្នកនាំពាក្យក្រសួងការបរទេសថៃ លោក Tanee Sangrat បានមានប្រសាសន៍ឲ្យដឹងកាលពីថ្ងៃអង្គារថា ប្រទេសថៃនឹងដើរតួយ៉ាងសំខាន់ ក្នុងការជួយឱ្យសមាជិក នៃកិច្ចសហប្រតិបត្តិការសេដ្ឋកិច្ច អាស៊ីប៉ាស៊ីហ្វិក (Apec) ចរចាកិច្ចព្រមព្រៀងពាណិជ្ជកម្ម និងការវិនិយោគ។

លោកTanee បានបន្តថា សមាជិក Apec ក៏នឹងពិភាក្សាផងដែរអំពីបញ្ហានៃការលើកកម្ពស់គុណភាពជីវិត នៅក្នុងសម័យក្រោយកូវីដ និងការអភិរក្សបរិស្ថាន។

លោកបានចង្អុលបង្ហាញថា ទន្ទឹមនឹងនោះ កិច្ចប្រជុំកំពូលនេះ គឺជាឱកាសសម្រាប់សមាជិក Apec ដើម្បីពិភាក្សាអំពីបញ្ហាសកល ដូចជាភាពតានតឹងភូមិសាស្ត្រនយោបាយផងដែរ។

លោក Tanee បានឱ្យដឹងថា មេដឹកនាំមកពីប្រទេសសិង្ហបុរី កោះតៃវ៉ាន់ និងហុងកុងបានបញ្ជាក់ថា ពួកគេនឹងចូលរួមកិច្ចប្រជុំនេះ ប៉ុន្តែមេដឹកនាំនៃសមាជិកមួយចំនួនផ្សេងទៀត  មិន​ទាន់​បាន​បញ្ជាក់​ជា​ផ្លូវ​ការ​នៅ​ឡើយ​ទេ ដោយសារ​តែ​ភាព​មិន​ប្រាកដ​ប្រជា​លើ​សន្តិសុខ។

លោកបានបន្ថែមថា រដ្ឋមន្ត្រីការបរទេសចិន លោក វ៉ាង យីបានជូនដំណឹងដល់សមភាគីថៃ លោកDon Pramudwinaiថា លោកប្រធា​នាធិបតីចិនស៊ី ជីនពីងនឹងចូលរួមកិច្ចប្រជុំកំពូលនេះ។

លោកTanee បាននិយាយថា ក្នុងពេលជាមួយគ្នានេះ ក្រសួងការបរទេសកំពុងទាក់ទងទៅរុស្ស៊ី ដើម្បីរកមើលថាតើប្រធានាធិបតី Vladimir Putin នឹងចូលរួមកិច្ចប្រជុំកំពូលដែរឬទេ។

លោក​បាន​បញ្ជាក់​ថា ប្រទេស​ថៃ​បាន​ត្រៀម​ខ្លួន​ជា​ស្រេច ​ក្នុង​ការ​ដោះស្រាយ​រាល់​ភាព​ចលាចល ​ក្នុង​អំឡុង​ពេល​នៃ​កិច្ច​ប្រជុំ​កំពូល ​ដែល​សំខាន់​ទាំង​អស់៕

   ដោយៈ គង់ ម៉ាលីនណា

កោះកុងៈ ប្រជាពលរដ្ឋខិលខូចមួយចំនួន បានចូលទន្រ្ទាន និងធ្វើសកម្មភាពទិញ លក់ ដីរបស់ក្រសួងកសិកម្មដោយខុសច្បាប់ ប៉ុន្តែអាជ្ញាធរ​ខេត្តមិនទាន់រកឃើញដំណោះស្រាយនៅឡើយទេ។

ថ្នាក់ដឹកនាំខេត្តកោះកុងកាលពីថ្ងៃទី៤ រតុលាបានអញ្ជើញដឹកនាំកិច្ចប្រជុំពិភាក្សាដោះស្រាយករណីទំនាស់ដីធ្លី រវាងប្រជាពលរដ្ឋ ជាមួយមន្ទីរកសិកម្ម រុក្ខាប្រមាញ់ និងនេសាទខេត្តកោះកុង។

លោក សុខ សុទ្ធី អភិបាលរងខេត្តកោះកុង ដោយមានការអនុញ្ញាតពីលោកជំទាវ មិថុនា ភូថង អភិបាល នៃគណៈអភិបាលខេត្តកោះកុង បានអញ្ជើញដឹកនាំកិច្ចប្រជុំ ពិភាក្សាដោះស្រាយករណីទំនាស់ដីធ្លី រវាងប្រជាពលរដ្ឋ ជាមួយមន្ទីរកសិកម្ម រុក្ខាប្រមាញ់ និងនេសាទខេត្តកោះកុង ដែលដីមានទំនាស់នេះ ជាដីស្ថិតនៅក្នុងសង្កាត់ស្មាច់មានជ័យ និងសង្កាត់ស្ទឹងវែង ក្រុងខេមរភូមិន្ទ ខេត្តកោះកុង។

ទីតាំងដីដែលមានទំនាស់នេះ គឺជាដីឯកជនរបស់រដ្ឋ ដែលគ្រប់គ្រងដោយមន្ទីរកសិកម្ម រុក្ខាប្រមាញ់ និងនេសាទ ហើយត្រូវបានប្រជាពលរដ្ឋចូលទន្ទ្រានកាន់កាប់ ទិញ លក់ ខុសច្បាប់។

បន្ទាប់ពីកិច្ចប្រជុំពិភាក្សារួច អង្គប្រជុំនឹងធ្វើរបាយការណ៍ អំពីជម្រើសសម្រាប់ជាការដោះស្រាយករណីទំនាស់ដីធ្លីនេះ ជូនប្រធានគណៈកម្មាធិការគ្រប់គ្រងដីរដ្ឋ និងធ្វើរបាយការណ៍ ជូនលោកវេង សាខុនរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដើម្បីស្នើសូមអនុសាសន៍ណែនាំបន្ថែម សម្រាប់រដ្ឋបាលខេត្ត យកមកអនុវត្តបន្តតាមនីតិវិធី៕