ដោយៈ សុខុម

សិង្ហបុរី: ពលរដ្ឋចិន ដែលមានទ្រព្យសម្បត្តិស្តុកស្តម្ភ បានសម្រុកទិញលំនៅដ្ឋានឯកជនប្រណីតៗ នៅប្រទេសសិង្ហបុរីក្នុងឆ្នាំនេះ ពេលដែលប្រទេសនេះបើកទ្វារ ស្វាគមន៍ជនបរទេសឡើងវិញ និងដោយសាររូបិយប័ណ្ណឡើងថ្លៃ ទោះបីជារដ្ឋាភិបាលដំឡើងពន្ធយ៉ាងណាក្ដី។

អ្នកទិញមកពីប្រទេសចិន បានទិញប្រមាណ១ភាគ៥ នៃផ្ទះប្រណីតចំនួន៤២៥យូនីត ដែលលក់ចេញចាប់ពីខែមករា ដល់ខែសីហា ឆ្នាំនេះ។ បន្ទាប់ពីនេះ ផ្ទះដែលពលរដ្ឋអាមេរិក បានទិញមានចំនួន៣៤យូនីត ហើយផ្ទះដែលពលរដ្ឋឥណ្ឌូនេស៊ី បានទិញមានចំនួន២៨យូនីត។

យោងតាមសារព័ត៌មាន CNA ចុះផ្សាយកាលពីថ្ងៃព្រហស្បតិ៍ ទី៦ ខែតុលា ឱ្យដឹងថា ផ្ទះប្រណីត ត្រូវបានកំណត់តម្លៃចាប់ពី៣,៥២លានដុល្លារអាមេរិកឡើងទៅ។

ក្រុមអ្នកវិភាគនិយាយថា ប្រទេសសិង្ហបុរី ស្រូបទាញក្រុមមហាសេដ្ឋីបានយ៉ាងច្រើន ដោយសារប្រទេសនេះ មានស្ថិរភាពនយោបាយល្អ រូបិយប័ណ្ណឡើងថ្លៃ និងកេរ្តិ៍ឈ្មោះជាជម្រកសុវត្ថិភាព សម្រាប់រក្សាទុកទ្រព្យសក   ម្ម។ តម្លៃអចលនទ្រព្យនៅប្រទេសសិង្ហបុរី ក៏មានទំនោរហក់ឡើងសន្សឹមៗផងដែរ។

ទន្ទឹមនេះ ប្រទេសចិន កំពុងប្រឈមមុខនឹងវិបត្តិអចលនទ្រព្យ ដោយការលក់បានធ្លាក់ចុះខ្លាំង ហើយបណ្ដាក្រុមហ៊ុនអភិវឌ្ឍន៍ បានខកខានទូទាត់បំណុល ហើយទំនុកចិត្តរបស់អ្នកប្រើប្រាស់ ក៏បានធ្លាក់ចុះដោយសារការបិទខ្ទប់ម្ដងហើយម្ដងទៀត។

ចំនួនផ្ទះប្រណីត ដែលបានលក់ទៅឱ្យជនបរទេស នៅប្រទេសសិង្ហបុរី ក្នុងរយៈពេល៨ខែដើមឆ្នាំនេះ បានកើនឡើងខ្ពស់ បើធៀបនឹង២៨២យូនីតដែលលក់បាន ក្នុងរយៈពេលដូចគ្នាក្នុងឆ្នាំ២០១៩ និង៣២២យូនីតដែលលក់បានក្នុងឆ្នាំ២០១៨។

ទិន្នន័យពីអាជ្ញាធរអភិវឌ្ឍន៍ទីក្រុង(URA) និងក្រុមហ៊ុនប្រឹក្សាអចលនទ្រព្យ OrangeTee & Tie បង្ហាញថា អចលនទ្រព្យក្នុងប្រទេសសិង្ហបុរី នៅតែពេញនិយម ក្នុងចំណោមជនបរទេស ទោះបីជារដ្ឋាភិបាលដំឡើងពន្ធលើការទិញអចលនទ្រព្យកាលពីខែធ្នូ ឆ្នាំមុនយ៉ាងណាក្ដី៕

ដោយៈគង់ សូរិយា

       ភ្នំពេញៈ បន្ទាប់ពីមមាញឹកក្នុងការសាងសង់ ដើម្បីបង្ហាញដល់អតិថិជន ទីបំផុតបុរីបុស្បាបានសាងសង់ផ្ទះគំរូបញ្ចប់បណ្តើរៗហើយ ខណៈស្ថានភាពនៃការលក់មានភាពល្អប្រសើរ ដោយសារការវិនិយោគលំនៅដ្ឋាននៅក្នុងបុរីនេះមានឱកាសចំណេញខ្ពស់។

ជាទីតាំងស្ថិត នៅតំបន់ប្រសព្វនៃវិថីជាច្រើនដូចជា ផ្លូវក្រវ៉ាត់ក្រុងទី២ ផ្លូវ៦០ម៉ែត្រ ព័ន្ឋជុំវិញដោយផ្សារទំនើប និងមជ្ឈមណ្ឌលពាណិជ្ជកម្មនានា និងស្ថិតនៅតំបន់ដែលអាចតភ្ជាប់ជាមួយផ្លូវជាតិលេខ២ លេខ៣ និងលេខ៤បានយ៉ាងងាយស្រួល។ ចំណុចទាំងនេះជាផ្នែកដ៏សំខាន់ ដែលបានធ្វើឲ្យបុរីបុស្បាទទួលបានជោគជ័យ និងគាំទ្រពីអតិថិជនក្នុងនិងក្រៅ​ប្រទេស។

លោកអ៉ី ពិសិដ្ឋក្រុមប្រឹក្សាភិបាល និងជាអគ្គនាយកនៃគណៈកម្មការទី​ផ្សារបុរីបុស្បា បានមានប្រសាសន៍ឲ្យដឹង កាលពីដើមសប្តាហ៍នេះថា ការសាងសង់វីឡាភ្លោះបានបញ្ចប់ហើយ ដែលអតិថិជនអាចចូលទស្សនាបាន ។ ចំណែកវីឡាAngel បាននិងកំពុងពន្លឿនការសាងសង់ ដើម្បីបញ្ចប់នាពេ​លឆាប់ៗខាងមុខនេះ។

លោកបន្តថា “ដោយសារស្ថានភាពវិបត្តិកូវីដ១៩ និងវិបត្តិសង្រ្គាមរុស្ស៊ី អ៊ុយក្រែនបានធ្វើឲ្យការលក់របស់យើង មានសភាពយឺតជាងមុន ប៉ុ​ន្តែយើងនៅតែលក់បានជោគជ័យ និងសម្រេចបានតាមផែនការគ្រោងទុក”។​លោកបន្ថែមថា “យើងបានសិក្សាពីទីផ្សារ និងចំណង់ចំណូលចិត្តអតិថិជនច្បាស់លាស់ ទើបធ្វើឲ្យទីផ្សាររបស់យើងនៅតែមានសង្ឃឹម និងសុទិដ្ឋិ​និយ​មចំពោះមុខ”។

បុរីបុស្បាបានសាងសង់ឡើង ដោយឈរលើគុណតម្លៃពិសេសៗមួយចំនួនដូចជា ទី១ ផ្តោតលើហេដ្ឋារចនាសម្ព័ន្ឋធំទូលាយ ទី២ ផ្តោតលើគុណភាព ប្រណិតភាព នៃប្លង់ស្ថាបត្យកម្មនិមួយៗ ទី៣ ផ្តោតលើបរិស្ថានបៃតង​មានកន្លែងហាត់ប្រាណ ដើរកំសាន្ត ជាមួយសហគមន៍ដ៏ស្រស់បំព្រង និងទី៤ ប្លង់ស្ថាបត្យកម្មនៃផ្ទះនិមួយៗ បានគិតគូពីការសន្សំសំចៃអគ្គិសនី ដោយអនុញ្ញាត្តឲ្យមានពន្លឺថ្ងៃ និងខ្យល់អាកាសចេញចូលបានយ៉ាងមនោរម្យ៕

 ដោយៈ គង់ សូរិយា

       ភ្នំពេញៈ លោកទេសរដ្ឋមន្រ្តីស៊ុន ចាន់ថុលរដ្ឋមន្រ្តីក្រសួងសាធារណៈ​ការ និងដឹកជញ្ជូន បានដឹកនាំកិច្ចប្រជុំជាមួយក្រុមមន្រ្តី បានបើកកិច្ចប្រជុំលើកឡើងពីបញ្ហាប្រឈម និងដំណោះស្រាយ លើគំរោងហេដ្ឋារចនាសម្ព័ន្ឋសំខាន់ៗចំនួន៧។

គំរោងហេដ្ឋារចនាសម្ព័ន្ឋទាំងនោះ រួមមានដូចជា ទី១ បញ្ហាប្រឈមមួយចំនួន ដែលបានកើតឡើងក្នុងអំឡុងពេល នៃការបើកឱ្យប្រើប្រាស់សាកល្បងផ្លូវល្បឿនលឿនភ្នំពេញ -ក្រុងព្រះសីហនុ និងដំណោះស្រាយដើម្បីទប់ស្កាត់សកម្មភាពខុសច្បាប់ ក្នុងន័យជំរុញឱ្យការប្រើប្រាស់ផ្លូវល្បឿនលឿនអាចប្រព្រឹត្តទៅដោយរលូន និងប្រសិទ្ធភាព ទី២ ការធ្វើឱ្យប្រសើរឡើងការប្រមូលកម្រៃ ពីការប្រើប្រាស់ផ្លូវល្បឿនលឿន និងការចែករំលែកទិន្នន័យប្រតិបត្តិការ ធានាតម្លាភាពអាជីវកម្មក្រុមហ៊ុន និងសុវត្ថិភាពចរាចរណ៍ ជូនដល់ប្រជាពលរដ្ឋ តាមរយៈយន្តការបច្ចេកវិទ្យា DIP ដែលជាបច្ចេកវិទ្យាទំនើប ជួយកាត់បន្ថយពេលវេលា និងផ្តល់ភាពងាយស្រួលដល់អ្នកប្រើប្រាស់ផ្លូវល្បឿនលឿន។

ទី៣ វឌ្ឍនភាពគម្រោងសាងសង់កំពង់ផែ ទេសចរណ៍អន្តរជាតិខេត្តកំពត ដែលជាផ្នែកមួយជំរុញការដឹកជញ្ជូន និងឡូជីស្ទីកនៅកម្ពុជា ឱ្យកាន់តែមានលក្ខណៈល្អប្រសើរ ទី៤ វឌ្ឍនភាពការងារសាងសង់អាងប្រព្រឹត្តកម្មទឹកកខ្វក់ នៅក្រុងព្រះសីហនុ ដែលជាគម្រោងដ៏មានសារៈសំខាន់ ជួយកាត់បន្ថយការបំពុលបរិស្ថាន ដោយសារទឹកកខ្វក់ និងជួយលើកស្ទួយសោភ័ណភាព ក្រុងព្រះសីហនុឱ្យកាន់តែល្អប្រសើរ ទី៥ បញ្ហាស្ថានភាពកំណាត់ផ្លូវជាតិលេខ៣ (កំពត-វាលរេញ) ជាពិសេសកំណាត់ផ្លូវប្រវែង២០គីឡូម៉ែត្រ ដែលកំពុងរងការខូចខាតយ៉ាងខ្លាំង ដើម្បីរកដំណោះស្រាយ សម្រាប់ការធ្វើឱ្យប្រសើរឡើងវិញ តាមរយៈបច្ចេកទេសពិសេស។

ទី៦ ផលប៉ះពាល់ហេដ្ឋារចនាសម្ព័ន្ធផ្លូវថ្នល់ ដោយគ្រោះទឹកជំនន់នៅតាមបណ្តារាជធានី-ខេត្ត នៅក្នុងឆ្នាំ២០២២ ដោយសារគ្រោះទឹកជំនន់ និងជំនន់ទឹកភ្លៀង និងវិធានការបន្ទាន់សម្រាប់ការស្តារ ជួសជុលបន្ទាន់ឡើងវិញ ទី៧ វឌ្ឍនភាពការងារធ្វើឱ្យប្រសើរឡើងវិញ ផ្លូវជាតិលេខ៤ ដែលកំពុងធ្វើការជួសជុលឡើងវិញស្របតាមស្តង់ដារ និងលក្ខណៈបច្ចេកទេស។

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានលើកឡើង និងពិភាក្សាលើការងារសំខាន់ៗទាំងនេះ។

កិច្ចប្រជុំនេះ ក៏ដើម្បីពិនិត្យពិភាក្សាលើការងារសំខាន់ៗ ទាក់ទងនឹងការអនុវត្តគម្រោងហេដ្ឋារចនាសម្ព័ន្ធផ្លូវថ្នល់ ការងារដឹកជញ្ជូនតាមផ្លូវទឹក ការងារទឹកកខ្វក់ ការអភិវឌ្ឍគម្រោងបច្ចេកវិទ្យាថ្មីៗ វឌ្ឍនភាពនិងបញ្ហាប្រឈមមួយចំនួនពាក់ព័ន្ធ នឹងការបើកឱ្យប្រើប្រាស់សាកល្បងផ្លូវល្បឿនលឿនភ្នំពេញ-ព្រះសីហនុ ព្រមទាំងការបំពាក់មេដាយជូន ក្រុមការងារបច្ចេកទេសក្រុមហ៊ុនCambodian PPSHV Expressway Co., Ltd ដែលមានស្នាដៃល្អ ក្នុងការសាងសង់ផ្លូវល្បឿនលឿនភ្នំពេញ -ព្រះសីហនុ ផងដែរ។

លោកទេសរដ្ឋមន្ត្រី បានផ្តល់ជាមតិយោបល់ និងអនុសាសន៍ណែនាំល្អៗ ដើម្បីជាជំនួយក្នុងការយកទៅអនុវត្តន៍គម្រោង ការងារទាំងអស់ឱ្យកាន់តែមានប្រសិទ្ធភាព និងគុណភាពការងារខ្ពស់ផងដែរ។

ទន្ទឹមនឹងនេះ លោកទេសរដ្ឋមន្ត្រី បានណែនាំក្រុមការងារបច្ចេកទេស ក៏ដូចជាមន្ទីរសាធារណការ និងដឹកជញ្ជូនរាជធានី-ខេត្ត ឱ្យអនុវត្តការងាររបស់ខ្លួន ជាប់ជាប្រចាំទាក់ទង នឹងការចុះបិទជង្ហុកសំបុកមាន់នៅក្នុងរដូវវស្សា ដែលសំបូរទៅដោយទឹកភ្លៀងធ្លាក់ ជោគជាំនាឆ្នាំនេះ ដោយមិនត្រូវទុកផ្លូវនោះចោល បង្កការលំបាកដល់ការធ្វើដំណើរ របស់បងប្អូនប្រជាពលរដ្ឋ ជាពិសេសត្រូវសម្រួលការតភ្ជាប់ភ្លា មៗនូវខ្សែផ្លូវទាំងឡាយណាដែលត្រូវទឹកជំនន់ហូរកាត់ផ្តាច់៕

ដោយៈ វឌ្ឍនៈ

ភ្នំពេញៈ អ្នកជំនាញបាននិយាយថា ទីផ្សារខុនដូនៅក្នុងប្រទេសកម្ពុជា មកបច្ចុប្បន្ននេះ នៅតែបន្តជួបបញ្ហាសម្រាប់ទីផ្សារ ដែលផ្ដោតលើជនបរទេស ខណៈជនបរទេសចូលក្នុងប្រទេសកម្ពុជា ក្នុងឆ្នាំ២០២២នេះ បានចាប់ផ្ដើមកើនឡើងវិញធៀបនឹងឆ្នាំ២០២១កន្លងទៅ ។

អគ្គនាយកនៃក្រុមហ៊ុន ERA Cambodia លោកខន គង្គាបានមានប្រសាសន៍ឱ្យដឹងកាលពីសប្តាហ៍នេះថា រយៈពេល៩ខែ ដើមឆ្នាំ២០២២នេះ បើយើងធៀបនឹងឆ្នាំ ២០២១កន្លងទៅយើងឃើញថា ទីផ្សារខុនដូនៅក្នុងប្រទេសកម្ពុជាមានភាពប្រសើរឡើង ប៉ុន្តែបើយើងក្រលេកទៅមើលមុនកូវីដទីផ្សារខុនដូក្នុងពេលបច្ចុប្បន្ននេះ មិនទាន់បានប្រសើរឡើងនៅឡើយ ។

លោកបន្តថា “យើងបានឆ្លងកាត់នូវវិបត្តិអស់រយៈពេល២ឆ្នាំ គឺឆ្នាំ ២០២០ និងឆ្នាំ ២០២១ហើយចូលដល់ឆ្នាំ ២០២២ ទីផ្សារក៏ចាប់ផ្ដើមមានកំណើនឡើងវិញតែក្នុងនោះដែរ ភាគច្រើនផ្ដោតលើទីផ្សារក្នុងស្រុក “។លោក​បន្តថា “សម្រាប់គម្រោងខុនដូដែលផ្ដោតលើទីផ្សារបរទេស នៅតែបន្តមានជួបប្រទះនឹងបញ្ហា”។

លោកខន គង្គាបានបន្តថា ក្រោយពីវិបត្តិកូវីដ១៩បានធូរស្រាល កម្ពុជា ក៏ដូចជា ពិភពលោកទាំងមូល ក៏បានជួបនឹងវិបត្តិមួយទៀតគឺ វិបត្តិស   ង្គ្រាមរវាងរុស្ស៊ី និងអ៊ុយក្រែន ដែលធ្វើឱ្យសេដ្ឋកិច្ចពិភពលោកបន្តមានបញ្ហានិងថមថយ។

លោកបន្ថែមថា “ទីផ្សារខុនដូ ដែលអ្នកអភិវឌ្ឍន៍ ផ្ដោតលើទីផ្សារក្នុងស្រុកវាមិនសូវជាមានបញ្ហាប៉ុន្មាននោះទេ ប៉ុន្តែសម្រាប់គម្រោងដែលផ្ដោតលើទីផ្សារបរទេសដូចជាពីចិន ពីហុងកុងជាដើម អាចនឹងមានហានិភ័យ”។ លោកបន្ថែមថា “យ៉ាងណាក្ដីសម្រាប់គម្រោងខុនដូ ដែលម្ចាស់គម្រោងមានដើមទុនគ្រប់គ្រាន់ក្នុងការវិនិយោគ ហានិភ័យនៃទីផ្សារក៏មានតិចដែរ តែសម្រាប់ម្ចាស់គម្រោង ដែលមិនមានដើមទុនគ្រប់គ្រាន់ អាចនឹងមានហានិភ័យខ្ពស់”។

លោកគង្គាបានបន្ថែមទៀតថា តាមពិតទៅប្រទេសកម្ពុជាក៏ដូចជាពិភពលោកបានជួបវិបត្តិច្រើនមកហើយ ហើយពិភពលោកក៏បានដោះស្រាយបញ្ហាទាំងនោះ នឹងបានអភិវឌ្ឍន៍សេដ្ឋកិច្ចឱ្យល្អប្រសើរ ដូចជាវិបត្តិហិរញ្ញវត្ថុពិភពលោកក្នុងអំឡុងឆ្នាំ ២០០៨ ២០០៩ជាដើម ។

លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចល​នវត្ថុកម្ពុជាក៏បានមានប្រសាសន៍ផងដែរថា ក្នុងឆ្នាំ២០២៣ខាងមុខ យើងក៏មិនទាន់ប្រាកដថាជនបរទេស នឹងចូលមកក្នុងប្រទេសកម្ពុជាច្រើន ដូចមុនកូវីដ១៩នោះដែរ។ កត្តាមួយចំនួនបានធ្វើឱ្យជនបរទេស បន្តជាឧបសគ្គដល់ការមកដល់នៃ ជនបរទេសក្នុងនោះមានស្ថានភាពកូវីដ១៩ នៅប្រទេសរបស់ពួកគេមិនទាន់ប្រសើរ  បញ្ហាសង្គ្រាម និងភាពតានតឹងរវាងចិន និងអាមេរិកពាក់ព័ន្ធនឹងបញ្ហាកោះតៃវ៉ាន់ ជាពិសេសវិនិយោគិនបរទេសនៅតែបន្តអភិវឌ្ឍន៍ប្រទេសគេសិន ទើបអាចចេញក្រៅស្វែងរកការវិនិយោគបាន ៕

   ដោយៈ គង់ សូរិយា

       ភ្នំពេញៈ ខណៈលំហូរទុនវិនិយោគផ្ទាល់ពីបរទេសបានធ្លាក់ចុះ អ្នកវិនិយោគក្នុងស្រុកបានដើរតួនាទីជំនួស ដោយពួកគេបានបោះទុនរហូតដល់ជាង១៧០០លានដុល្លារ ក្នុងដំណាច់ត្រីមាសទី៣ឆ្នាំនេះ។

ទំហំទុនវិនិយោគជាង១.៧ពាន់លានដុល្លារគ្របដណ្តប់៦០% នៃទុនវិនិយោគសរុបនៅកម្ពុជា ​ខណៈលំហូរទុនវិនិយោគចិន ស្ថិតក្នុងលេខរៀងទី២។ នេះបើតាមតួលេខដែលកក់ត្រា ដោយក្រុមប្រឹក្សាអភិវឌ្ឍន៍កម្ពុជា(CDC)។

បើគិតពី​ខែមករា ដល់ខែកញ្ញា ឆ្នាំ២០២២ ​CDC បានអនុម័តគម្រោងវិនិយោគសរុបចំនួន១៥០គម្រោង ក្រោមទុនវិនិយោគ​៣៥០០លានដុល្លារ ក្នុងនោះវិនិយោគិនកម្ពុជា បានឈានមុខគេក្នុងការបោះទុនវិនិយោគ ក្នុងទំហំទឹកប្រាក់ជាង១​៧០០​លានដុល្លារអាមេរិក មានចំណែក៥០.៩៤% នៃការវិនិយោគសរុប កើនឡើងទេ្វដង បើធៀបនឹងរយៈពេលដូចគ្នាកាលពីឆ្នាំ២០២១ ដែលមានទឹកប្រាក់វិនិយោគជិត៧០០លានដុល្លារ និងមានចំណែកវិនិយោគ២០.៧៤%ប៉ុណ្ណោះ។

ប្រទេសចិនដែលធ្លាប់នាំមុខគេ ក្នុងការវិនិយោគនៅកម្ពុជា បានស្ថិតក្នុងលំដាប់ទី២វិញ ដែលបានមកវិនិយោគក្នុងទំហំទឹកប្រាក់ ជាង១៥០០លានដុល្លារ មានចំណែកវិនិយោគ៤៣.៩៨%។

តាមពីក្រោយចិន គឺប្រទេសថៃ ដែលមានទុនវិនិយោគប្រមាណ៤៤លានដុល្លារ មានចំណែកវិនិយោគ១.២៧% ។ ចំណែកប្រទេសជប៉ុន ស្ថិតចំណាត់ថ្នាក់ទី៤ ដែលបាននាំទុនវិនយោគបានប្រមាណ៤០លានដុល្លារ មានចំណែក១.១៤%នៃវិនិយោគសរុប។

លោកសុខ ចិន្ដាសោភា រដ្ឋមន្រ្ដីប្រតិភូអមនាយករដ្ឋមន្រ្ដី អគ្គលេខា​ធិការCDC បានមានប្រសាសន៍ឲ្យដឹងថា ក្រុមប្រឹក្សាអភិវឌ្ឍន៍កម្ពុជា នឹងបន្តខិតខំជំរុញ និងទាក់ទាញការវិនិយោគ តាមរយៈបន្តពង្រឹងយន្តការថែទាំវិនិយោគ និងការបន្តចូលរួមអនុវត្តនូវវិធានការកែទម្រង់នានា របស់រាជរដ្ឋាភិបាល ពិសេសវិធានការទាំងឡាយ ដែលសម្រួលដល់ការវិនិយោគសម្រាប់វិនិយោគិនក្នុង និងក្រៅប្រទេស​។

​ក្នុងរយៈពេល៩ខែនេះ ការវិនិយោគលើវិស័យកសិកម្ម និងកសិ-ឧស្សាហកម្ម មានចំនួន៧គម្រោង​មានទុនជាង១០៤លានដុល្លារ វិស័យឧស្សាហកម្ម មានចំនួន១៣២គម្រោង មានទុនជិត១៤០០លានដុល្លារ វិស័យទេសចរណ៍មាន៣គម្រោង​ ដោយទទួលបានទុនជាង១៦៤លានដុល្លារ និងហេដ្ឋារចនាសម្ព័ន្ធ និងផ្សេងៗមាន៨គម្រោង ទទួលបានទុនជិត១.៨ពាន់លានដុល្លារ៕

ដោយៈ ជេស៊ីកា

ភ្នំពេញៈ រាជរដ្ឋាភិបាលកម្ពុជា បានសម្រេចកាត់ឃុំចំនួន20 នៃស្រុកមួយចំនួនរបស់ខេត្តកណ្តាល ឱ្យធ្វើជាចំណុះនៃខណ្ឌចំនួន៤ របស់រាជធានីភ្នំពេញ ក្នុងផែនការពង្រីកក្រុងឱ្យកាន់តែមានទំហំធំ ដើម្បីឆ្លើយតបទៅនឹងកំណើនប្រជាសាស្ត្រ និងសេដ្ឋកិច្ចសង្គម។

យោងតាមរដ្ឋបាលរាជធានីភ្នំពេញបានឱ្យដឹងថា ខណ្ឌសែនសុខ មានចំនួន3ឃុំ ដែលត្រូវបានកាត់ចេញពីស្រុកពញាព្ញ ឱ្យធ្វើជាចំណុះរបស់ខ្លួន រួមមានឃុំពញាពន់ ឃុំព្រែកព្នៅ និងឃុំសំរោង។ ដោយឡែក ខណ្ឌឫស្សីកែវមានចំនួន2ឃុំ ត្រូវបានកាត់ចេញពីស្រុកមុខកំពូល រួមមាន ឃុំកោះដាច់  និងឃុំបាក់ខែង។

សម្រាប់ខ័ណ្ឌច្បារអំពៅមាន4ឃុំ ដែលត្រូវបានកាត់ចេញពីស្រុកកៀន​ស្វាយ រួមមាន  ឃុំវាលស្បូវ ឃុំព្រែកឯង ឃុំក្បាលកោះ និង ឃុំព្រែកថ្មី។  ជាមួយគ្នានេះ ខណ្ឌដង្កោ មានចំនួន 11ឃុំ ដែលត្រូវបាន កាត់ពីស្រុកក ណ្តាលស្ទឹង រួមមាន ឃុំព្រែកកំពឹស ឃុំស្ពានថ្ម ឃុំទៀន ឃុំរលួស និង ឃុំគងនយ និងបាន កាត់ពីស្រុកអង្គស្នួលចំនួន 6 ឃុំ រួមមាន  ឃុំពន្សាំង ឃុំស្នោ ឃុំឪឡឹក ឃុំបឹងធំ ឃុំកំបូល  និង ឃុំកន្ទោក។

នៅក្នុងផែនការអភិវឌ្ឍ និងក្នុងប្លង់គោលប្រើប្រាស់ដី រាជធានីភ្នំពេញ ឆ្នាំ2035 ផ្ទៃដីមួយផ្នែកធំរបស់ខេត្តកណ្តាល នឹងបន្តកាត់ចូលមកជាចំណុះរដ្ឋបាលរាជធានីភ្នំពេញ ។ ដូច្នេះ ផ្ទៃដីរបស់រាជធានីភ្នំពេញ នឹងកាន់តែមានទំហំ ខណៈបច្ចុបន្ននេះ មានផ្ទៃដីទំហំប្រមាណ700 គីឡូម៉ែត្រក្រឡា ។

សម្តេចតេជោហ៊ុន សែន នាយករដ្ឋមន្ត្រីនៃកម្ពុជា ធ្លាប់បានមានប្រសា​សន៍ថា ទីក្រុងភ្នំពេញកាលពីមុនមានត្រឹមតែ300 គីឡូម៉ែត្រក្រឡាប៉ុណ្ណោះ ប៉ុន្តែក្រោយប្រទេសមានសុខសន្តិភាព និងការអភិឌ្ឍន៍លើគ្រប់វិស័យ បានធ្វើឱ្យដីរាជធានីភ្នំពេញ ត្រូវបានពង្រីកជាបន្តបន្ទាប់ និងបានធ្វើឱ្យជីវភាពរបស់ប្រជាពលរដ្ឋកាន់តែធូរធាជាងមុន។

តាមរយៈការពង្រីកក្រុងនេះ បានធ្វើឱ្យអ្នកអភិវឌ្ឍន៍លំនៅឋាន និងអចលនវត្ថុ ក៏បានពង្រីកខ្លួនទៅតាមជាយក្រុង និងមួយផ្នែកនៃខេត្តកណ្តាល  ដើម្បីឆ្លើយតបទៅនឹងកំណើនសេដ្ឋកិច្ច និងប្រជាសាស្រ្ត រួមជាមួយនឹងចលនាមករស់នៅ និងធ្វើការរបស់ប្រជាពលរដ្ឋ មកពីតាមបណ្តាខេត្តចូលមកក្នុងទីក្រុងភ្នំពេញ៕

ដោយ៖ សុផារី

ភ្នំពេញ៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានណែនាំដល់ក្រុមការងារបច្ចេកទេស​ បន្តអនុវត្តការងាររបស់ខ្លួន​ឱ្យ​ជាប់ជាប្រចាំ​ ទាក់ទងនឹងការចុះបិទជង្ហុកសំបុកមាន់នៅក្នុងរដូវវស្សា ដែលសំបូរទៅដោយទឹកភ្លៀងធ្លាក់ជោគជាំនាឆ្នាំនេះ ដោយមិនត្រូវទុកផ្លូវនោះចោល បង្កការលំបាកដល់ការធ្វើដំណើររបស់ប្រជាពលរដ្ឋនោះឡើយ។

លោកទេសរដ្ឋមន្ត្រី ស៊ុន ចាន់ថុល បានណែនាំដូច្នេះ នៅថ្ងៃទី០៥ ខែតុលា ឆ្នាំ២០២២ នៅទីស្តីការក្រសួង ក្នុងឱកាសដឹកនាំកិច្ចប្រជុំប្រចាំសប្តាហ៍ទី១ ខែតុលា ឆ្នាំ២០២២។

កិច្ចប្រជុំនេះក៏ដើម្បីពិនិត្យពិភាក្សាលើការងារសំខាន់ៗ​ទាក់ទងនឹងការអនុវត្ត​គម្រោងហេដ្ឋារចនាសម្ព័ន្ធផ្លូវថ្នល់ ការងារដឹកជញ្ជូនតាមផ្លូវទឹក ការងារទឹកកខ្វក់ ការអភិវឌ្ឍគម្រោងបច្ចេកវិទ្យាថ្មីៗ វឌ្ឍនភាព និងបញ្ហាប្រឈមមួយចំនួនពាក់ព័ន្ធនឹងការបើកឱ្យប្រើប្រាស់សាកល្បងផ្លូវល្បឿនលឿនភ្នំពេញ-ព្រះសីហនុ ព្រមទាំងការ​បំពាក់មេដាយ​ជូនក្រុមការងារបច្ចេកទេសក្រុមហ៊ុន Cambodian PPSHV Expressway Co., Ltd ដែលមានស្នាដៃល្អក្នុងការសាងសង់ផ្លូវល្បឿនលឿន​ភ្នំពេញ-ព្រះសីហនុ។

អង្គប្រជុំបានពិភាក្សាដោយផ្តោតជាសំខាន់លើការងារ រួមមាន ដូចជា បញ្ហាប្រឈមមួយចំនួនដែលបានកើតឡើងក្នុងអំឡុងពេលនៃការបើកឱ្យប្រើប្រាស់សាកល្បងផ្លូវល្បឿនលឿនភ្នំពេញ-ក្រុងព្រះសីហនុ និងដំណោះស្រាយដើម្បីទប់ស្កាត់សកម្មភាពខុសច្បាប់ ការធ្វើឱ្យប្រសើរឡើងការប្រមូលកម្រៃពីការប្រើប្រាស់ផ្លូវល្បឿនលឿន និងការចែករំលែកទិន្នន័យប្រតិបត្តិការ ធានាតម្លាភាពអាជីវកម្មក្រុមហ៊ុន និងសុវត្ថិភាពចរាចរណ៍តាមរយៈយន្តការបច្ចេកវិទ្យា DIP គម្រោងសាងសង់កំពង់ផែទេសចរណ៍អន្តរជាតិខេត្តកំពត ការងារសាងសង់អាងប្រព្រឹត្តកម្មទឹកកខ្វក់នៅក្រុងព្រះសីហនុ បញ្ហាស្ថានភាពកំណាត់ផ្លូវជាតិលេខ៣ (កំពត-វាលរេញ) ប្រវែង២០គីឡូម៉ែត្រ និងវឌ្ឍនភាពការងារធ្វើឱ្យប្រសើរឡើងវិញផ្លូវជាតិលេខ៤៕