ដោយ៖ សុផារី

ភ្នំពេញ៖ វិបត្តិសេដ្ឋកិច្ចសកល និងវិបត្តិជំងឺកូវីដ១៩ តែងតែបង្កផលប៉ះពាល់ដល់ជីវភាព និងសេដ្ឋកិច្ចជៀសមិនផុត។ អ្នកវិនិយោគឆ្លាតវៃ ត្រូវចេះប្រើប្រាស់សាច់ប្រាក់ ដែលខ្លួនមាន ក្នុងការវិនិយោគឱ្យត្រូវទិសដៅស្របនឹងបរិបទសង្គម-សេដ្ឋកិច្ច ដើម្បីបញ្ជៀសហានិភ័យនៃការខាតបង់។

លោកឧកញ៉ាបណ្ឌិត គីម ហ៊ាង ប្រធាន KW Cambodia បានមានប្រសាសន៍ក្នុងកិច្ចសម្ភាសពិសេសជាមួយ Property Area Asia នៅក្នុងសប្តាហ៍នេះថា ប្រសិនបើយើងចង់វិនិយោគ ហើយយើងមានលុយ នោះការប្រើប្រាស់លុយធ្វើអ្វីក៏បានដែរ។ ប៉ុន្តែ អ្វីដែលសំខាន់គឺ យើងត្រូវស្គាល់ពីសមត្ថភាព និងបទពិសោធន៍របស់យើង ដើម្បីវិនិយោគឱ្យចំទិសដៅ។

អ្នកជំនាញអចលនទ្រព្យជើងចាស់រូបនេះបានផ្តល់ជាយោបល់ថា សម្រាប់អ្នកវិនិយោគថ្មីថ្មោង ការវិនិយោគលើដីឡូត៍ ជាជម្រើសមួយល្អបំផុត សម្រាប់ការប្រើប្រាស់លុយដែលខ្លួនមាន។

លោកបណ្ឌិតបញ្ជាក់ថា ” ប្រសិនបើយើងជាជើងថ្មី ដើមទុនមានកម្រិត បទពិសោធន៍នៅស្ទើរ ខ្ញុំមិនណែនាំឱ្យសាងសង់សណ្ឋាគារផ្កាយប្រាំ ឬវីឡាតម្លៃរាប់លានទេ។ ធ្វើដីឡូត៍ទៅ”។

ក្រោយប្រលូកក្នុងវិស័យនេះរួចរាល់ហើយ ជំហានបន្ទាប់ សម្រាប់អ្នក ដែលមានថវិកាល្មមគ្រប់គ្រាន់ និងបទពិសោធន៍សមរម្យក្នុងវិស័យដីឡូតិ៍ហើយនោះ អ្នកវិនិយោគអាចឈានជើងចូលទៅប្រលូកក្នុងវិស័យលំនៅឋាន ប្រភេទផ្ទះល្វែង ដោយចាប់ផ្តើមពីទំហំតូចល្មមសិន មុននឹងចាប់ផ្តើមការវិនិយោគបន្ថែមលើគម្រោងលំនៅឋានទំហំធំជាងមុន ឬលើអាគារខុនដូ។

លោកបណ្ឌិតបន្តថា “ប្រសិនបើបទពិសោធន៍យើងល្មម លុយយើងសមរម្យហើយ យើងចង់ក្លាយជាអ្នកអភិវឌ្ឍន៍សមរម្យមួយ សាងសង់ផ្ទះ១០ទៅ២០ល្វែងសិនទៅ។ មិនបាច់ទៅវីឡារាប់រយផ្ទះទេ”។

លោកបណ្ឌិតឱ្យដឹងទៀតថា “បើយើងឆ្លងកាត់បទពិសោធន៍យូរហើយ សាងសង់បុរី២០០ ៣០០ផ្ទះ ក៏វាមិនខុសដែរ។ តំណាលគ្នា សូមកុំភ្លេចថា ខុនដូក៏នៅអាចលក់បាន”។

ជាយោបល់រួម លោកបណ្ឌិតបញ្ជាក់ថា “ដីឡូត៍ក៏ធ្វើបាន គម្រោងបុរីក៏ធ្វើបាន ផ្ទះ២០ ឬ៣០ល្វែងក៏ធ្វើបាន ខុនដូក៏ធ្វើបាន វាសំខាន់លើយើងតើ ថាតើយើងជានរណា? ស្គាល់ខ្លួនឯងហើយ រកស៊ីតាមសមត្ថភាព និងលទ្ធផលដែលខ្លួនមាន នោះយើងជោគជ័យហើយ”៕

ដោយ៖ សហការី

ភ្នំពេញ៖ លោក ថាន់ ចាន់ណា ម្ចាស់បុរីចាន់ណាលែន បានរៀបរាប់ខ្សែរជីវិតតស៊ូរៀនសូត្រឆ្លងកាត់ព្យុះភ្លៀងរយៈពេល០៥ឆ្នាំ ដើម្បីផ្លាស់ប្ដូរខ្សែរជីវិតពីកូនអ្នកស្រែជនបទម្នាក់ រហូតសម្រេចក្ដីសុបិនក្លាយជាម្ចាស់បុរីដ៏ល្បីឈ្មោះ។

លោក ថាន់ ចាន់ណា មានស្រុកកំណើតជាកូនអ្នកខេត្តក្រចេះ ជានិស្សិតបញ្ចប់បរិញ្ញាប័ត្រវិស្វកម្មសំណង់ស៊ីវិល នៅសាកលវិទ្យាល័យបៀលប្រាយ។ កាលពីមុន លោកជានិស្សិតមកពីជនបទមករៀននៅភ្នំពេញ ដោយសារចង់ផ្លាស់ប្តូរខ្សែរជីវិត កាលនោះមានក្តីស្រមៃចង់ក្លាយជាអ្នកម្ចាស់អចលនទ្រព្យមួយ ក្នុងការសាងសង់ ម្ចាស់បុរី ឬម្ចាស់ក្រុមហ៊ុនសាងសងផ្ទះល្វែងលក់។

ដោយមានក្តីសុបិន្តដ៏ធំមួយនេះ លោកក៏សម្រេចចិត្តលាឱពុកម្តាយមកភ្នំពេញ ដើម្បីរៀនបន្តនៅក្នុងភ្នំពេញ។ លោកមានប្រសាសន៍ថា “ដំណើរជីវិតនិស្សិតស្រុកស្រែជួបព្យុះភ្លៀងមិនស្ទើរនោះទេ។ តាំងពីឆ្នាំទី១ រហូតដល់ឆ្នាំទី៥ ក្រោយបានបញ្ចប់បរិញ្ញាប័ត្រ៥ឆ្នាំមក ខ្ញុំក៏បន្តគោលដៅ និងក្តីស្រមៃរបស់ខ្លួន ដោយសិក្សា និងរៀនបន្ថែមលើជំនាញអចលនៈទ្រព្យ”។

លោកបានរៀបរាប់បន្តថា ក្រោយពីលោកបានចាប់ផ្តើមដើរលើវិស័យអចលនទ្រព្យ អស់រយៈពេល៣ឆ្នាំរហូតដល់ឆ្នាំ២០២០ លោកក៏មានលទ្ធភាពបើកក្រុមហ៊ុនផ្ទាល់ខ្លួន ព្រមទាំងបើកសាងសង់បុរីដ៏ធំមួយលក់ ដែលមានឈ្មោះថា​ “បុរី ចាន់ណា លែន”។

លោករៀបរាប់បន្តថា “ពិតជាអស្ចារ្យណាស់! ក្តីស្រមៃខ្ញុំបានដូចបំណងហើយ។ វាដូចជាទើបភ្ញាក់ពីសុបិន្តចឹងពេលយកដៃមកក្តិចសាច់ខ្លួនឯង ទើបដឹងថាវាជាការពិតមែន ខ្ញុំពិតជាមានមោទភាពខ្លាំងណាស់ ប៉ាម៉ាកកូនធ្វើបានហើយ”។

លោកបានលើកទឹកចិត្តដល់សិស្សនិស្សិតទាំងអស់ ដែលមកពីជនបទ ដើម្បីរៀនបន្តនៅទីក្រុង សូមសួរទៅខ្លួនឯងថាខ្លួនចង់ក្លាយទៅជាអ្វី ហើយយើងត្រូវតែធ្វើអ្វីខ្លះ ដើម្បីសម្រេចក្តីប្រាថ្នារបស់ខ្លួន។

លោកបញ្ជាក់ថា “បច្ចុប្បន្ន យើងជានរណាមិនសំខាន់ សំខាន់ក្តីស្រមៃយើងចង់ក្លាយទៅជាអ្វី ហើយបន្តធ្វើសកម្មភាពរបស់យើងថ្ងៃនេះ ដើម្បីសម្រេចគោលដៅ និងក្តីស្រមៃដែលបានដៅទុកនៅថ្ងៃអនាគត”។

ក្រោយពីខិតខំប្រឹងប្រែងតស៊ូអស់រយៈពេល០៥ឆ្នាំ ក្នុងការបញ្ចប់បរិញ្ញាបត្រផ្នែកវិស្វកម្មសំណង់ស៊ីវិល នៅសាកលវិទ្យាល័យបៀលប្រាយ លោកថាន់ ចាន់ណា មានក្ដីស្រមៃរបស់ខ្លួន ក្នុងការសិក្សាបន្ថែមផ្នែកជំនាញអចលទ្រព្យ។

ក្រោយពីដើរលើវិថីអចលនទ្រព្យរយៈពេល៣ឆ្នាំ នៅថ្ងៃទី០៨ ខែកញ្ញា ឆ្នាំ២០២០ លោក ថាន់ ចាន់ណា សម្រេចចិត្តចុះបញ្ចីក្រុមហ៊ុន ចាន់ណាលែន ដែលមានទីតាំងបុរីស្ថិតនៅភូមិព្រៃចាស់ ឃុំវិហារសួគ៌ ស្រុកខ្សាច់កណ្តាល ខេត្តកណ្តាល។

សព្វថ្ងៃ លោកកំពុងបន្តអាជីវកម្មដំណើរការយ៉ាងរលូន នៅលើវិស័យអចលនទ្រព្យ នៅក្នុងគម្រោងបុរីដីឡូតិ៍ “ចាន់ណា លែន” ដែលមានបុគ្គលិកប្រឹក្សាយោបល់ផ្នែកលក់ជាច្រើននាក់។ មកដល់បច្ចុប្បន្ននេះ លោកថាន់ ចាន់ណាមានគោលបំណងរួមចំណែក ដល់សេដ្ឋកិច្ចជាតិ និងជួយឱ្យកូនខ្មែរទទួលនូវចំណេះដឹងលើវិស័យអចនទ្រព្យ និងទទួលបានប្រាក់ចំណូលសមរម្យ ផងដែរ៕

ដោយ៖ សហការី

ភ្នំពេញ៖ ប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន អនុម័តពាក្យស្នើសុំអាជីវកម្ម សរុបចំនួន១៤.៦៧៦ក្រុមហ៊ុន មានទុនវិនិយោគសរុប៤.៦៧០លានដុល្លារ ក្នុងរយៈពេលពីរឆ្នាំនៃការដាក់ដំណើរការ។
យោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ ទំហំវិនិយោគតាមវិស័យការសាងសង់ មាន២១,៦ភាគរយ ឬប្រមាណ​១ពាន់លានដុល្លារ នៃទំហំវិនិយោគចុះបញ្ជីសរុប។​

ដោយឡែក ក្រុមហ៊ុនទាក់ទងនឹងសកម្មភាពអចលនទ្រព្យ មានទំហំវិនិយោគសរុប៦៨១​លានដុល្លារ ឬស្នើនឹង១៤,៦ភាគរយនៃទំហំវិនិយោគចុះបញ្ជីសរុប។​

សេចក្តីប្រកាសព័ត៌មានដដែល បញ្ជាក់ថា ភាគរយអាជីវកម្មដែលបានចុះបញ្ជីតាមវិស័យ សកម្មភាពអចលនទ្រព្យ មានប្រមាណ ៨.៧ភាគរយ នៃចំនួនក្រុមហ៊ុនចុះបញ្ជីសរុប ១៤,៦៧៦ ក្រុមហ៊ុន។​

ប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន គឺជាវិធានការកែទម្រង់មុតស្រួចជាកញ្ចប់​ របស់រាជរដ្ឋាភិបាលកម្ពុជា ក្នុងគោលបំណងលើស្ទួយភាពប្រកួតប្រជែង និងលើកកម្ពស់បរិយាកាសធុរកិច្ច និងវិនិយោគនៅកម្ពុជា។

រាជរដ្ឋាភិបាល បានដាក់ដំណើរការប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន ដំណាក់កាលទី១ នៅថ្ងៃទី១៥ ខែមិថុនា ២០២០ និងដំណាក់កាលពីទីពីរ នៅថ្ងៃទី១៥ ខែកញ្ញា ឆ្នាំ២០២១៕