ដោយៈ វឌ្ឈនៈ

ភ្នំពេញៈ ផែនការពង្រីកទីក្រុងរបស់រដ្ឋាភិបាល ជាពិសេសក្រុងភ្នំពេញ នឹងនាំមកនូវអត្ថប្រយោជន៍ជាច្រើន ដល់វិស័យអចលនវត្ថុកម្ពុជា ជាក់ស្ដែងនៅពេលការពង្រីកក្រុងកាន់តែធំ នឹងធ្វើឱ្យតម្រូវការដីធ្លីប្រើប្រាស់កាន់តែច្រើនដែលនាំឱ្យតម្លៃដីធ្លីកាន់តែមានសន្ទុះផងដែរ។

លោកច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអច​លនវត្ថុកម្ពុជាបានថ្លែងឲ្យដឹង នាព្រឹកថ្ងៃទី១៤ មិថុនានេះថា ការពង្រីកទីក្រុងកាន់តែធំ នឹងធ្វើឱ្យការប្រើប្រាស់ដីកាន់តែច្រើន ហើយដីដែលកាត់ចូលទីក្រុងថ្មីៗ នៅមានតម្លៃធូរថ្លៃ ដែលអាចឱ្យអ្នកវិនិយោគ អាចទិញដីទាំងនោះសម្រាប់អភិវឌ្ឍន៍នៅពេលអនាគត។

លោកបន្តថា “ការកាត់ដីធ្លីចូលមកក្រោមការគ្រប់គ្រង របស់រដ្ឋបាលរាជធានីភ្នំពេញ នឹងធ្វើឱ្យអ្នកវិនិយោគកាន់តែចាប់អារម្មណ៍ និងអាចទញសម្រាប់សង់ផ្ទះ សង់អគារខ្ពស់ទៅតាមតំបន់ដែលមានសក្ដានុពល”។លោក​បន្តថា “ម្យ៉ាងទៀតប្រជាពលរដ្ឋ នឹងចូលទៅរស់នៅក្នុងតំបន់ ដែលទើបកាត់ចូលក្រុងថ្មី ជាបន្តបន្ទាប់ដែលធ្វើឱ្យតំបន់នោះ នឹងកាន់តែមានមមាញឹក”។

លោកសុខនីមបានបន្ថែមថា អ្នកវិនិយោគក៏អាចទិញដីធ្លីនៅតំបន់ដីដែលទើបកាត់ចូលក្រុងថ្មីៗនោះ សម្រាប់ទុកលក់ចំណេញនៅពេលអនាគត។  លោកច្រឹក សុខនីម បានបន្ថែមទៀតថា កម្ពុជាជាប្រទេសនៅចំនុចកណ្ដាលអាស៊ាន ហើយបរិយាកាសវិនិយោគ នៅក្នុងប្រទេសកកម្ពុជាក៏ឃើញថាមានភាពល្អប្រសើរ ដូច្នេះនៅពេលអនាគតនេះ ការវិនិយោគនៅកម្ពុជានឹងមានសន្ទុះបន្ថែមទៀត។

លោកបន្តថា “អ្វីដែលសំខាន់នោះតាមការព្យាករបង្ហាញថា តម្រូវការលំនៅឋាននៅកម្ពុជា មានចំនួន៥ម៉ឺនខ្នងក្នុងមួយឆ្នាំ ហើយបច្ចុប្បន្ននេះ ការផ្គត់ផ្គង់មិនទាន់បំពេញតម្រូវការបាននៅឡើយ”។

ជាមួយគ្នានេះ លោកសន សៀប នាយកប្រតិបត្តិក្រុមហ៊ុនអចលនទ្រព្យឃី រៀលអ៊ីស្ទេតបានឱ្យដឹងថា វិនិយោគិនដីធ្លីដែលចង់រកប្រាក់ចំណេញនៅពេលអនាគត និងប្រើពេលខ្លី នោះអាចទិញដីនៅតំបន់ជាយក្រុង ពីព្រោះដីនៅជាយក្រុង ឬដីដែលមិនទាន់កាត់ចូលក្រុង នៅមានតម្លៃទាប តែបើសិនជាពួកគេទិញដីនៅកណ្ដាលក្រុង ដីនោះវាបានឡើងថ្លៃរួចទៅហើយ។

លោកបន្តថា “នៅពេលអ្នកវិនិយោគទិញ គឺពួកគាត់មិនមែនវិនិយោគសម្រាប់លក់ចំណេញបន្តទៀតទេ គេនឹងអភិវឌ្ឍន៍តែម្ដងតែម្ដង”៕

 ដោយៈគង់ សូរិយា

       ភ្នំពេញៈ គំរោងដីឡូត៍លំហែរកាយបូកគោលែន៣ បាននិងកំពុងសម្រេ​ចបានវឌ្ឍនភាពយ៉ាងល្អប្រសើរ ជាមួយនឹងល្បឿននៃការសាងសង់ហេដ្ឋារចនាសម្ព័ន្ឋ ខ្លោងទ្វារ និងទទួលបានជោគជ័យ លើការលក់ជូនអតិថិជន។

ជាមួយនឹងភាពអំណោយផលនៃទីតាំងភូមិសាស្រ្ត ដោយមានភ្នំជាប់ពីក្រោយ និងរលកភ្នំពត់ពេននៅខាងមុខ គំរោងបូកគោលែន៣បាននិងកំពុងទាក់ទាញការចាប់អារម្មណ៍ យ៉ាងច្រើនពីអតិថិជន ដោយរហូតមកទល់ពេលនេះ ការលក់សម្រេចបាន៧០ភាគរយ ជាល្បឿនមួយលឿនជាងផែនការដែលបានគ្រោងទុក។

អ្នកនាងម៉ីម៉ី ប្រធានផ្នែកទីផ្សារនៃគំរោងបូកគោលែន៣ បានមានប្រ​សាសន៍ឲ្យដឹងតាមបណ្តាញតេឡេក្រាម នៅព្រឹកថ្ងៃទី១៤ មិថុនានេះថា ជាមួយនឹងទំនុកចិត្ត លើការរៀបចំផែនការអភិវឌ្ឍរបស់ម្ចាស់គំរោង រាប់ចាប់តាំងពីគំរោងបូកគោលែន១ បូកគោលែន២ បានធ្វើឲ្យគំរោងបូកគោលែន៣ ទទួលបានការគាំទ្រយ៉ាងខ្លាំងពីអតិថិជនរបស់យើង។

អ្នកនាងបន្តថា“អតិថិជនរបស់យើង មិនត្រឹមតែជាអ្នកនៅក្នុងប្រទេសប៉ុណ្ណោះទេ ប៉ុន្តែមានអតិថិជនពីបារាំង អូស្រ្តាលី អាមេរិកជាច្រើនបានមកទិញនៅគំរោងរបស់យើង”។ អ្នកនាងបន្តថា “ការរីកចម្រើននៃជីវភាពរបស់​ប្រជាពលរដ្ឋបានធ្វើឲ្យដីឡូត៍លំហែរកាយ មានតម្រូវការកើនឡើងនៅកម្ពុជា ស្របនឹងការអភិវឌ្ឍគំរោងបូកគោលែន បានធ្វើច្បាស់លាស់ និងស្របតាមស្តង់ដាអន្តរជាតិ”។

គំរោងបូកគោលែន៣ ដែលបានអភិវឌ្ឍន៍លើផ្ទៃដី១៥ហិកតា បាននិងកំពុងរៀបចំ ជារមណីយដ្ឋានលំហែរកាយកម្រិតខ្ពស់ ដោយក្នុងគំរោងនេះមានដាំផ្កាសាគូរ៉ាចំនួន៤០០ដើម មានអាងទឹកដ៏ស្រស់ស្អាត មានផ្លូវដើរនៅជើងភ្នំប្រវែងងា៥០០ម៉ែត្រ ដែលផ្លូវនេះរៀបចំឡើងពត់ពេនដូចពស់ នៅកណ្តាលព្រៃលើចង្កេះភ្នំ ពិសេសការរៀបចំហេដ្ឋារចនាសម្ព័ន្ឋមានភាពធំទូលាយ និងស្របតាមស្តង់ដាអន្តរជាតិ។

លោកCooler Tanអគ្គនាយកក្រុមហ៊ុនYoungsia Real Estateដែលបាននិងកំពុងអភិវឌ្ឈន៍គំរោងបូកគោលែនបានមានប្រសាសន៍ថា ជាមួយនឹងល្បឿននៃការសាងសង់ និងប្រភពទុនរ៉ឹងមាំ បានធ្វើឲ្យការអភិវឌ្ឍរបស់យើងសម្រេ​ចបានលឿន និងជោគជ័យតាមផែនការ ពិសេសគំរោងបូកគោលែន៣ ដែលលោកមានផែនការរៀបចំទីតាំងនេះ ជាតំបន់ទេសចរណ៍មួយ ដែលអ្នកទៅលេងកំសាន្តនៅខេត្តកំពត ខេត្តកែបអាចចូលសម្រាកកំសាន្ត ញាំកាហ្វេ និងស្រូបយកខ្យល់អាកាសបរិសុទ្ឋពីគំរោងនេះ។

លោកបន្តថា “អ្វីយើងបាននិងកំពុងរៀបចំ គឺផ្តល់ឲ្យអ្នករស់នៅក្នុងគំរោងនេះ ទទួលបានអារម្មណ៍ស្រស់ស្រាយពិតប្រាកដ ហើយបើអ្នកវិនិយោ​គគម្រោងនេះយកចំណេញ ពួកគាត់នឹងទទួលបានផលចំណេញពិត”។​លោកបន្តថា “ទស្សនវិស័យរបស់យើង គឺផ្តល់ឲ្យអ្នកលក់ងាយស្រួលលក់ មិនពិបាកពន្យល់ភ្ញៀវ និងឲ្យអ្នករស់នៅទទួលបានការលំហែរ ពិតប្រាកដ និងទទួលបានលើសពីអ្វីដែលគាត់ចង់បាន”៕

ដោយៈ សុខុម

សេអ៊ូល: ពលរដ្ឋវ័យក្មេងនៅប្រទេសកូរ៉េខាងត្បូង កំពុងសម្រុកទិញផ្ទះដោយមិនខ្វល់នឹងអត្រាការប្រាក់ ដែលហក់ឡើងកាន់តែខ្ពស់។ នេះបើយោងតាមសារព័ត៌មាន CNA ចុះផ្សាយកាលពីថ្ងៃច័ន្ទ ទី១៣ ខែមិថុនា។

ស្ថានភាពនេះឆ្លុះបញ្ចាំងឱ្យឃើញថា វិបត្តិកង្វះលំនៅដ្ឋានកាន់តែធ្ងន់ធ្ងរឡើង ដែលធ្វើឱ្យប្រធានាធិបតី ទើបឡើងកាន់តំណែងថ្មី លោក Yoon Suk-yeol កាន់តែជួបភាពស្មុគស្មាញ ក្នុងផែនការរបស់លោក ដើម្បីសម្រាលវិបត្តិអចលនទ្រព្យ ដែលហក់ឡើងថ្លៃខ្ពស់ ក្នុងប្រទេសកូរ៉េខាងត្បូង ដែលជាសេដ្ឋកិច្ចធំបំផុតទី៤នៅអាស៊ី។

ស្ត្រីម្នាក់ឈ្មោះ Oh Ye-seul អាយុ២៦ឆ្នាំ ដែលបម្រើការងារនៅក្រុមហ៊ុនទើបបង្កើតថ្មី (Start-up) មួយក្នុងសង្កាត់ Gangnam នៃក្រុងសេអ៊ូល បានបញ្ចេញទស្សនៈយល់ឃើញថា ខ្លួនជឿជាក់លើការសន្យារបស់ប្រធានាធិបតី Yoon Suk-yeol តិចតួចណាស់ ឬក៏គ្មានសោះតែម្ដង។

នៅខែមីនា ដើមឆ្នាំ២០២២ ជាពេលដែលលោក Yoon Suk-yeol ចូលកាន់តំណែង ស្របពេលពលរដ្ឋមិនសប្បាយចិត្តយ៉ាងខ្លាំង ចំពោះអតីតប្រធានាធិបតី Moon Jae-in ដែលបរាជ័យ នៅក្នុងការធ្វើឱ្យតម្លៃផ្ទះធ្លាក់ចុះ កញ្ញា Oh Ye-seul បានទិញអាផាតម៉ិនមួយក្នុងតម្លៃក្រោម៦០០លានវ៉ុន (៤៦៦.២៣៦ដុល្លារអាមេរិក) ដែលនាងត្រូវចំណាយពេលធ្វើដំណើរប្រហែលកន្លះម៉ោង ពីការិយាល័យដែលនាងធ្វើការ។

ពលរដ្ឋកូរ៉េ វ័យក្មេងកាន់តែច្រើនឡើងៗ កំពុងបន្តសម្រុកទិញផ្ទះក្នុងស្ថានភាពបែបនេះ ទោះបីជាធនាគារកណ្ដាលកូរ៉េ (Bank of Korea) បានដំឡើងអត្រាការប្រាក់ យ៉ាងឆាប់រហ័សយ៉ាងណាក្ដី ហើយនេះឆ្លុះបញ្ចាំងឱ្យឃើញថា សាធារណជនមិនសូវមានជំនឿចិត្ត លើការប្ដេជ្ញាចិត្តរបស់ប្រធានាធិបតី Yoon Suk-yeol ដែលថានឹងសម្រាលវិបត្តិផ្ទះឡើងថ្លៃ។

ជាងនេះទៅទៀត ស្ថានភាពនេះ ក៏បង្កើនផលប៉ះពាល់សេដ្ឋកិច្ចកាន់​តែធំផងដែរ ខណៈអត្រាប្រាក់លើកម្ចីទិញផ្ទះ បានកើនឡើងដល់កម្រិតខ្ពស់បំផុតមិនធ្លាប់មានក្នុងរយៈពេល៩ឆ្នាំ និងស្របពេលឡើងថ្លៃទំនិញសព្វសារពើរាប់ប្រេងឥន្ធនៈ ស្បៀងអាហារ រហូតដល់ទំនិញប្រើប្រាស់។

មូលហេតុចម្បងដែលពលរដ្ឋកូរ៉េ វ័យក្មេងសម្រុកទិញផ្ទះទាំងក្នុងស្ថានភាពបែបនេះ ដោយសារពួកគេបារម្ភខ្លាចខកខាន ឱកាសទិញលែងបាន ខណៈតម្លៃផ្ទះចេះតែហក់ឡើងថ្លៃឥតឈប់ឈរ៕ Reuters៕