ដោយៈ សុខុម

ប៉េកាំង: រដ្ឋាភិបាលចិន គ្រោងនឹងផ្តល់ប្រាក់កម្ចីពិសេស រហូតដល់ទៅ២០០ពាន់លានយ័ន (២៩,១ពាន់លានដុល្លារអាមេរិក) ដើម្បីជួយស្រោចស្រង់ បណ្ដាក្រុមហ៊ុនអភិវឌ្ឍន៍ដែលកំពុងជួបបញ្ហា ខណៈទីផ្សារអចលនទ្រព្យចិន កំពុងធ្លាក់ក្នុងវិបត្តិ។

នេះបើយោងតាមសារព័ត៌មានដ៏ល្បីល្បាញ Bloomberg ដែលបានចុះផ្សាយកាលពីថ្ងៃច័ន្ទ ទី២២ ខែសីហា ដោយដកស្រង់ប្រភពដែលស្និទ្ធនឹងបញ្ហានេះ។

កាលពីថ្ងៃសុក្រ ទី១៩ ខែសីហា ប្រព័ន្ធផ្សព្វផ្សាយរដ្ឋរបស់ប្រទេសចិនបានផ្សាយថា ប្រទេសចិន នឹងជួយគាំទ្រដល់ការសាងសង់ និងការប្រគល់ផ្ទះជូនអ្នកទិញ ក្នុងគម្រោងលំនៅដ្ឋាន ដែលជាប់គាំងពាក់កណ្ដាលទីតាមរយៈកម្មវិធីប្រាក់កម្ចីពិសេស ពីបណ្ដាធនាគារគោលនយោបាយ។

ទោះជាយ៉ាងណា ចំនួនប្រាក់កម្ចីពិសេសនោះ មិនត្រូវបានបង្ហាញឱ្យដឹងជាសាធារណៈឡើយ ហើយក៏គ្មានការបញ្ជាក់ថា ប្រាក់កម្ចីពិសេសនេះនឹងផ្ដល់ឱ្យនៅពេលជាក់លាក់ណាមួយនោះដែរ។

ក្រុមនិយ័តករចិន កាលពីខែមុនបានសន្យាថា នឹងជួយរដ្ឋាភិបាលថ្នាក់មូលដ្ឋានប្រគល់ផ្ទះជូនអ្នកទិញ ក្នុងគម្រោងលំនៅដ្ឋាននានាឱ្យទាន់ពេលវេលា បន្ទាប់ពីអ្នកទិញផ្ទះយ៉ាងច្រើន បានគំរាមឈប់បង់ប្រាក់រំលស់សម្រាប់អាផាតម៉ិន ក្នុងគម្រោងដែលសាងសង់មិនទាន់រួចរាល់៕ Reuters៕

ដោយៈ ជេស៊ីកា

ភ្នំពេញៈ វាគ្មិនជាតិ និងអន្តរជាតិចំនួន៤រូប នឹងចែករំលែកចំណេះដឹងក្នុងសិក្ខាសាលាស្តីពី “​ឱកាសនៃការវិនិយោគក្នុងវិស័យអចលនទ្រព្យ”។

សិក្ខាសាលានេះ នឹងរៀបចំឡើងនៅសមាគមអ្នកអភិវឌ្ឍន៍ដីឡូត៍កម្ពុជា ដែលមានទីតាំងនៅជិតផ្សារទំនើបAEON Mall2 ស្ថិតនៅក្នុងបុរីThe Premiures។

វាគ្មិនដែលមានជំនាញក្នុងវិស័យអចលនទ្រព្យជាច្រើនឆ្នាំ ដែលនឹងចែករំលែក្នុងសិក្ខាសាលានោះរួមមាន លោកឧកញ៉ា ម៉ន​ សុខា ប្រធានសមាគមអ្នកអភិវឌ្ឍន៍ដីឡូត៍កម្ពុជា។

លោក រស់ សុវណ្ណថា អគ្គលេខាធិការសមាគមអ្នកអភិវឌ្ឍន៍ដីឡូត៍កម្ពុជា។ លោក Yoshi Takita ទូតសុឆន្ទៈ នៃសមាគម Long Island Board of REALTORS (LIBOR) និងជាសមាជិកសមាគម National Association of REALTORS®។

លោកឧកញ៉ា ម៉ាន់ ច័ន្ឌ ឌី ទីប្រឹក្សាសមាគមអ្នកអភិវឌ្ឍន៍ដីឡូត៍កម្ពុជា និងជាអគ្គនាយកក្រុមហ៊ុន IQI Cambodia។

សិក្ខាសាលាដ៏មានសារៈសំខាន់នេះ នឹងប្រារពធ្វើឡើងនៅថ្ងៃទី៣ កញ្ញាខាងមុខនេះ៕

ដោយៈ ស៊ីវ ម៉េង

ភ្នំពេញៈ កំនើននគរូបនីយកម្មមានជាប់ពាក់ព័ន្ឋនឹងប្រជាសាស្រ្ត ហេដ្ឋារចនាសម្ព័ន្ឋ ទាក់ទងផងដែរនឹងផែនការអភិវឌ្ឍន៍នានា។

ហេតុនេះសំណួរគឺថា តើកំណើននគរូបនីយកម្មនៅកម្ពុជាបច្ចុប្បន្នបណ្តាលមកពីកត្តាអ្វីខ្លះ?

លោកឃឹម សារិទ្ឋ ជាសាស្រ្តាចារ្យបានលើកឡើង នូវចម្លើយមួយចំនួនដូចជា កំណើននគរូបនីយកម្ម មានកម្រិតខ្ពស់នៅកម្ពុជាបណ្តាមកពីកត្តាមួយចំនួនដូចជា ទី១ កំណើនប្រជាជនមានកម្រិតខ្ពស់ទី២ ប្រជាជនជនបទផ្លាស់ទីចូលក្នុងទីក្រុងដើម្បីរកការងារធ្វើ ទី៣ ការកើនឡើងនៃតម្រូវការសេវាសាធារណៈ។

ទី៤ ការរៀបចំទីក្រុងតាមស្តង់ដារអន្តរជាតិ ទី៥ មានស្ថេរភាពនយោបាយ សន្តិសុខសង្គម ទី៦ គោលនយោបាយ ការរៀបចំទីក្រុងនិងទី៨ គឺជាប់ទាក់ទងនឹងគោលនយោបាយដីធ្លី៕

 ដោយៈ ជេស៊ីកា

       ភ្នំពេញៈ មន្ទីសាធារណការ រាជធានីភ្នំពេញបានឱ្យដឹងថា រាជរដ្ឋាភិបាល កម្ពុជា បានយល់ព្រមទៅលើសំណើរគម្រោងសាងសង់ស្ពានអាកាសចំនួនពីរទីតាំងបន្ថែមទៀតហើយ។

គំរោងស្ពានអាកាសទី១ នឹងសាងសង់ស្ពានអាកាស នៅទីតាំងប្រស​ព្វរវាងមហាវិថី សម្តេចអគ្គមហាសេនាបតីតេជោ ហ៊ុន សែន មហាវិថី ព្រះមុនី្នវង្ស និងវិថី កងយោធពលខេមរភូមិន្ទ (ផ្លូវលេខ ២៧១)។

២-ស្ពានអាកាសទី២ នឹងសាងសង់ស្ពានអាកាសនៅទីតាំងស្តុបស៊ិនជូរីប្លាស្សា ប្រសព្វរវាងមហាវិថី សហព័ន្ឋរុស្ស៊ី មហាវិថីសម្តេចចៅហ្វាវាំងវរវៀងជ័យអធិបតីស្រឹង្គារគង់ សំអុល (ផ្លូវលេខ ២០០៤) និងផ្លូវលេខ ២០១១។

ទោះជាយ៉ាងណាមន្ទីរសាធារណៈការ និងអាជ្ញាធរពាក់ព័ន្ឋមិនទាន់បញ្ជាក់ពីពេលវេលា ដែលរដ្ឋាភិបាលបើកការដ្ឋានសាងសង់ ស្ពានទាំងពីរនៅពេលណានៅឡើយទេ៕

ដោយ: លាងហួរ

វៀតណាម: ក្រសួងសំណង់បានផ្ញើទៅធនាគាររដ្ឋវៀតណាម នូវបញ្ជីគម្រោងលំនៅដ្ឋានសង្គមកិច្ចរបស់កម្មករ និយោជិត និងអគារអាផាតម៉ិនចាស់ៗដែលត្រូវជួសជុល ដែលអ្នកអភិវឌ្ឍន៍មានសិទ្ធិទទួលបាន កម្ចីឧបត្ថម្ភក្រោមក្រិត្យលេខ៣១/២០២២/NĐ-CP របស់រដ្ឋាភិបាល។

យោងតាមក្រឹត្យនេះបានឲ្យដឹងថា អ្នកអភិវឌ្ឍន៍នឹងទទួលបានប្រាក់ឧបត្ថម្ភចំនួន២ភាគរយ លើការប្រាក់ដែលពួកគេត្រូវបង់ នៅពេលខ្ចីពីធនាគារ។

ដោយផ្អែកលើការផ្ដល់យោបល់របស់អាជ្ញាធរមូលដ្ឋាន និងការត្រួតពិនិត្យដោយខ្លួនឯង លើលក្ខណៈវិនិច្ឆ័យនៃក្រឹត្យនេះ ក្រសួងបានអនុម័តគម្រោងចំនួន៦ នៅក្នុងទីក្រុងហូជីម៉ិញ និង៥គម្រោងនៅក្នុងខេត្តBinh Định សម្រាប់ឧបត្ថម្ភ។

គម្រោងទាំង១១ត្រូវបានគេប៉ាន់ប្រមាណថា នឹងត្រូវចំណាយប្រាក់អស់៩,៦៥ពាន់ពាន់លានដុង(៤១១,៦លានដុល្លារអាមេរិក) ដោយអ្នកអភិវឌ្ឍន៍បានខ្ចីប្រាក់ចំនួន១៨៣,៤លានដុល្លារ។

គម្រោងទីក្រុងហូជីម៉ិញទាំងប្រាំមួយ រួមមាន លំនៅដ្ឋានសង្គមនៅក្នុងសង្កាត់ Long Truong Ward នៃទីក្រុង Thủ Đứcក្រោមប្រាក់កម្ចីចំនួន៣៦៥ពាន់លានដុង ដើម្បីសាងសង់ផ្ទះល្វែងចំនួន៥៥៨ និងនៅផ្លូវ Lý Thường Kiệt ក្នុងសង្កាត់១០ ជាមួយនឹងប្រាក់កម្ចីចំនួន៥៧០ពាន់លានដុង និងគម្រោងផ្ទះល្វែងចំនួន១២៤៥ និងផ្ទះជួលសម្រាប់កម្មករនៅ សង្កាត់ Thạnh Mỹ Lợi នៃ ទីក្រុង Thủ Đức ជាមួយ នឹង កម្ចី៧០០ពាន់ លាន ដុង និង អាផាតម៉ិនចំនួន១០៤០។

ក្រៅពីនេះ អាផាតម៉ិនថ្មីនឹងត្រូវសាងសង់ ដើម្បីជំនួសផ្ទះដែលធ្លាក់ចុះនៅ២៣Lý Tự Trọng និង១២៨Hai Bà Trưng ក្នុងសង្កាត់១និងនៅ៣៥០Hoàng Văn Thụ ក្នុងស្រុក Tân Bình ដោយអ្នកអភិវឌ្ឍន៍របស់ពួកគេមានសិទ្ធិទទួលបានប្រាក់កម្ចី លើសពី១ពាន់ពាន់លានដុង។

មុននេះ ក្នុងដំណាក់កាលដំបូងនៃកម្មវិធី ក្រសួងបានប្រកាសគម្រោងលំនៅដ្ឋានសង្គម និងកម្មករចំនួនបួននៅខេត្ត Lào Cai, Hòa Bình, Tây Ninh និងខេត្ត Tiền Giang ដែលអ្នកអភិវឌ្ឍន៍មានសិទ្ធិទទួលបានប្រាក់កម្ចី៕

ដោយៈ សុផារី

ភ្នំពេញៈ ក្នុងរយៈពេលប៉ុន្មានឆ្នាំចុងក្រោយនេះ គម្រោងខុនដូជាច្រើនបាននិងកំពុងតែរីកដុះដាល នៅក្នុងប្រទេសកម្ពុជា ជាពិសេសក្នុងរាជធានីភ្នំពេញ។

ការផ្គត់ផ្គង់ដ៏ច្រើនបាន និងបន្តកើនឡើង ដែលធ្វើឱ្យមានការចោទជាសំណួរថា តើការផ្គត់ផ្គង់នាពេលបច្ចុប្បន្ននេះ បានឆ្លើយតបនឹងតម្រូវការជាក់ស្តែងរបស់អតិថិជនដែរឬទេ?។

លោកខន គង្គា អគ្គនាយកក្រុមហ៊ុនERA  Cambodia បានមានប្រសាសន៍នៅថ្ងៃទី២២ ខែសីហា ឆ្នាំ២០២២នេះថា ទាំងតម្រូវការក្នុងស្រុក និងក្រៅស្រុក ការផ្គត់ផ្គង់ខុនដូនៅកម្ពុជា នាពេលបច្ចុប្បន្ននេះ មិនទាន់គ្របគ្រាន់នៅឡើយទេ។

លោកគង្គាបានលើកឡើងថា សម្រាប់តម្រូវការក្នុងស្រុក ជាទិដ្ឋភាពរួម ប្រសិនបើប្រជាជនកម្ពុជាមានលទ្ធភាពគ្រប់គ្នា តម្រូវការជាក់ស្តែង និងការផ្គត់ផ្គង់ នៅមិនទាន់គ្រប់គ្រាន់នោះទេ ដោយសារប្រជាជនកម្ពុជាមានរហូតដល់ទៅជាង១៦លាននាក់ ខណៈការផ្គត់ផ្គង់ខុនដូមានត្រឹមតែប៉ុន្មានម៉ឺនយូនីតតែប៉ុណ្ណោះ។

សម្រាប់តម្រូវការក្រៅប្រទេសវិញ លោកអះអាងថា លើកពីនេះទៅទៀត ប្រទេសកម្ពុជាយើងជាប្រទេសបើកចំហរ ដែលអនុញ្ញាតិឱ្យជនជាតិបរទេសផ្សេងទៀតចូលមករស់នៅ និងវិនិយោគបាន ដែលចំនួននៃលំហូរអ្នកវិនិយោគទាំងនោះក៏មានចំនួនច្រើនផងដែរ ដែលសម្លឹងមើលការស្នាក់នៅ និងវិនិយោគក្នុងខុនដូ។

លោកបញ្ជាក់ថា “ជាក់ស្តែង ប្រជាជនកម្ពុជាជាង១៦លាននាក់ ខុនដូយើងមានតែប៉ុន្មានម៉ឺនយូនីតទេ។ វាមិនទាន់គ្រប់នោះទេ ប្រសិនបើប្រជាជនយើងមានលទ្ធភាពគ្របគ្នា”។ លោកបន្តថា “ប្រទេសកម្ពុជាជាទីផ្សារបើកចំហរជាសកល។ ប្រជាជនក្នុងពិភពលោក មានប៉ុន្មានពាន់លាននាក់ ច្រើនណាស់។ […] ប្រជាជននៅក្នុងតំបន់ និងក្នុងពិភពលោកអាចមកវិនិយោគបាន”។

នៅពេលអនាគត អ្នកជំនាញរូបនេះអះអាងថា ទីផ្សារខុនដូនឹងកើនឡើង ហើយបន្តកើនឡើងច្រើនទៀត ព្រោះសម្រាប់បរិបទរាជធានីភ្នំពេញ ខុនដូជាជម្រើស នៃការដោះស្រាយបញ្ហាលំនៅឋានដ៏សំខាន់មួយ។

លោកមានប្រសាសន៍ថា ដីកណ្តាលក្រុងតម្លៃថ្លៃខ្លាំង អ្នកអភិវឌ្ឍនឹងមិនជ្រើសរើសយកមកវិនិយោគ ក្នុងការសាងសង់ផ្ទះល្វែង វីឡានោះទេ តែអាចសាងសង់ជាខុនដូ អាផាតមិន ឬការិយាល័យ ដែលជាជម្រើសល្អបំផុត។

ចំណែកអ្នកនាង គឹម គិនកេសា អ្នកគ្រប់គ្រងក្រុមហ៊ុនអចលនទ្រព្យCBRE Cambodia បានមានប្រសាសន៍ថ្មីៗនេះថា គិតត្រឹមចុងឆមាសទី១ នៃឆ្នាំ២០២២នេះ ចំនួនខុនដូដែលត្រូវបានផ្គត់ផ្គង់នេះ មានតិចតួច ដោ​យ​ទីផ្សារមួយនេះបាន និងកំពុងពេញនិយមបំផុត ក្នុងចំណោមអតិថិជនសម័យថ្មី។

អ្នកនាងបានបន្តថា “នាពេលអនាគត តម្រូវការខុនដូនឹងមានការកើនឡើងខ្ពស់ ក្នុងចំណោមអតិថិជនជំនាន់ក្រោយ ដោយសារពួកគេបើកទូលា​យ ក្នុងការទទួលយកការផ្លាស់ប្តូរនៃរបៀបរស់នៅសម័យថ្មី”៕