ដោយៈ សុខុម

ហុងកុង: ប្រភពទម្លាយថា ក្រុមហ៊ុនអភិវឌ្ឍន៍អចលនទ្រព្យចិន China Evergrande Group កំពុងទាក់ទងម្ចាស់បំណុលរបស់ខ្លួន នៅឯនាយសមុទ្រ ឱ្យជួយគាំទ្រខ្លួនទប់ទល់ នឹងបណ្តឹងក្នុងតុលាការនៅក្រុងហុងកុង ដែលដាក់ប្ដឹងក្នុងគោលបំណងរំលាយក្រុមហ៊ុននេះចោល។

យោងតាមសារព័ត៌មាន CNA ចុះផ្សាយកាលពីថ្ងៃច័ន្ទ ទី៤ ខែកក្កដា ឱ្យដឹងថា ក្រុមហ៊ុន Evergrande ដែលខកខានទូទាត់បំណុលរបស់ខ្លួននៅឯនាយសមុទ្រ រហូតដល់ទៅជិត២៣ពាន់លានដុល្លារ និងកំពុងខ្នះខ្នែងរៀបចំឥណទានឡើងវិញ មានបំណងដាក់ញត្តិសុំការជួយគាំទ្រ ពីម្ចាស់បំណុលរបស់ខ្លួន ដើម្បីទុកធ្វើជាភ័ស្តុតាងបង្ហាញដល់តុលាការ នៅមុនសវនាការដំបូងនៅថ្ងៃទី៣១ ខែសីហា ខាងមុខនេះ។

កាលពីសប្តាហ៍មុន ក្រុមហ៊ុន Top Shine Global Ltd ជាវិនិយោគិនមួយ នៅក្នុងក្រុមហ៊ុនFangchebao ដែលជាបុត្រសម្ព័ន្ធរបស់ Evergrande បានអះអាងថា ខ្លួនបានដាក់ពាក្យបណ្ដឹងប្ដឹង ក្រុមហ៊ុនអភិវឌ្ឍន៍នេះ ដោយសារតែក្រុមហ៊ុននេះ មិនគោរពតាមកិច្ចសន្យាទិញយកវិញ នូវភាគហ៊ុនពីក្រុមហ៊ុនTop Shine ដែលមាននៅក្នុងក្រុមហ៊ុន Fangchebao។

ប្រសិនបើពាក្យបណ្ដឹងនេះ ទទួលបានលទ្ធផលជោគជ័យ វាអាចបង្កផលប៉ះពាល់ដល់ ផែនការរៀបចំឥណទានឡើងវិញ របស់ក្រុមហ៊ុន Evergrande ដែលធ្វើឱ្យចុះនូវតម្លៃទ្រព្យសកម្មនៅបរទេស ដែលមានសារៈសំខាន់ ចំពោះផលប្រយោជន៍របស់ម្ចាស់បំណុលនៅឯនាយសមុទ្រ។

ប្រភពដដែលនិយាយថា ក្រុមហ៊ុនអភិវឌ្ឍន៍នេះ មិនបានពិចារណាការដោះស្រាយក្រៅប្រព័ន្ធតុលាការ ជាមួយក្រុមហ៊ុន Top Shine នោះទេនៅពេលនេះ។

ជុំវិញបញ្ហានេះ ក្រុមហ៊ុន Evergrande ដែលជំពាក់បំណុលសរុបរហូតដល់៣៥០ពាន់លានដុល្លារអាមេរិក បានបដិសេធមិនធ្វើអត្ថាធិប្បាយទេ ហើយក្រុមហ៊ុនTop Shine ក៏មិនអាចទាក់ទង ដើម្បីសុំការឆ្លើយបំភ្លឺបានទេ៕ Reuters៕

ដោយៈ ជេស៊ីកា

ព្រះសីហនុៈ ទីក្រុងរាមដែលមានផ្ទៃដី៨៨០ហិកតា និងគ្រោងបោះទុន​វិនិយោគតម្លៃ១៦ពាន់លានដុល្លារ ដោយក្រុមហ៊ុនPrince Holding Group បាននិងកំពុងចាក់បំពេញខ្សាច់ និងត្រៀមបញ្ចប់ដំណាក់កាលទី១។

គំរោងដែលបាន និងកំពុងចាក់ខ្សាច់ដំណាក់កាលទី១នេះ មានទំហំផ្ទៃដីសរុប៥០ហិកតា ដែលទីក្រុងនេះត្រូវបានចាក់ខ្សាច់បំពេញ នៅលើផ្ទៃសមុទ្រ ក្នុងតំបន់រាម ដែលជាទីតាំងមួយ ស្ថិតនៅក្បែរព្រលានយន្តហោះអន្តរជាតិកងកេង ក្រុងព្រះសីហនុ។

ស្ថាបត្យករលំដាប់អន្តរជាតិមួយរូប បានមានប្រសាសន៍ឲ្យដឹងក្នុងលក្ខខ័ណ្ឌមិនបញ្ចេញឈ្មោះ ដោយសារជាកិច្ចការផ្ទៃក្នុងរបស់ក្រុមហ៊ុនបានឲ្យដឹងកាលពីសប្តាហ៍មុនថា ការចាក់ខ្សាច់បំពេញផ្ទៃដីទីក្រុងនេះ បាននិងកំពុងបន្តធ្វើយ៉ាងសកម្ម ដោយជំហ៊ានដំបូងក្រុមហ៊ុន នឹងធ្វើការអភិវឌ្ឍ​លើផ្ទៃដីក្នុងទំហំនេះជាមុនសិន ប៉ុន្តែការចាក់ខ្សាច់បំពេញគំរោងដំណាក់កាលបន្ទាប់នៅតែបន្តធ្វើ។

លោកបន្តថា “ខ្ញុំមិនអាចនិយាយបានថា តើគំរោងនេះនឹងអភិវឌ្ឍន៍អ្វីខ្លះនោះទេ ដោយសារវាជារឿងសំងាត់នៅឡើយ”។

យោងតាមផែនការមេរបស់ក្រុមហ៊ុនPrince Holding Groupបាន ឲ្យដឹងកន្លងមកថា ទីក្រុងរាមនឹងសាងសង់ឡើង ជាទីក្រុងលំដាប់អន្តរជាតិ ដែលអាចឲ្យប្រជាពលរដ្ឋរស់នៅរាប់ម៉ឺននាក់ ជាមួយនឹងហេដ្ឋារចនាសម្ព័ន្ឋដ៏សម្បូរបែប ស័ក្តិសមជាទីក្រុងដ៏ស៊ីវិល័យមួយនាពេលអនាគត ដែលមិនត្រឹមតែទាក់ទាញ លំហូរទុនវិនិយោគពីបរទេសនោះទេ ប៉ុន្តែវានឹងក្លាយជាទីតាំងទាក់ទាញភ្ញៀវទេសចរណ៍ជាតិ អន្តរជាតិមកកំសាន្ត​និងស្នាក់នៅរយៈពេលវែងនៅកម្ពុជាផងដែរ។

អ្នកនាំពាក្យរដ្ឋបាលខេត្តព្រះសីហនុ លោកឃាង ភារម្យធ្លាប់បានមានប្រសាសន៍ឲ្យដឹងកន្លងមកថា តាមអ្វីដែលលោកបានដឹង និងទទួលព៌តមានគឺគំរោងនេះបាន និងកំពុងបន្តវិវត្តន៍ទៅមុខយ៉ាងប្រសើរ ព្រោះក្រុមហ៊ុន វិនិយោគសាងសង់ទីក្រុងនេះ មិនប្រឈមបញ្ហាកង្វះទុនវិនិយោគឡើយ៕

ដោយៈគង់ ម៉ាលីនណា

ភ្នំពេញៈ ការមិនទាន់ផុតរលត់នៃវិបត្តិជំងឺកូវីដ១៩ ការកើនឡើងថ្លៃប្រេងឥន្ឋនៈ សម្ភារៈសំណង់បណ្តាលមកពីសង្រ្គាមរុស្ស៊ី អ៊ុយក្រែនទំនងមិនជាជាហេតុផលគ្រប់គ្រាន់ទេ ដែលធ្វើឲ្យវិស័យសំណង់ងើបឡើងយឺត។

លំហូរចូលនៃវិនិយោគិនបរទេសពីប្រទេសចិន ដោយសារការរឹតបន្តឹងលំហូរទុនវិនិយោគ គោលនយោបាយកូវីដសូន្យ និងវិបត្តិអចលនទ្រព្យនៅប្រទេសសេដ្ឋកិច្ចធំទី២លើពិភពលោកនេះ ក៏ជាមូលហេតុចម្បងធ្វើឲ្យវិស័យនេះងើបឡើងក្នុងល្បឿនយឺតៗផងដែរ។

យោងតាមរបាយការណ៍របស់ក្រសួងសេដ្ឋកិច្ច និងហិរញ្ញវត្ថុបានបង្ហាញថា ក្នុងត្រីមាសទី១ ឆ្នាំ២០២២  គម្រោងសំណង់ដែលទទួលបានការអនុម័តមានសរុប១,០០១គម្រោង ធ្លាក់ចុះ៦,១ភាគរយ បើធៀបនឹងរយៈពេលដូចគ្នានៅឆ្នាំមុន

ល្បឿនយឺតយ៉ាវនេះ គឺគ្របដណ្តប់គ្រប់់ទិដ្ឋភាពសាងសង់សំណង់ដូចជា សំណង់សាធារណៈ សំណង់លំនៅឋាន ភូមិគ្រឹះ សំណង់ពាណិជ្ជកម្ម សំណង់ឧស្សាហកម្ម និងសំណងស់ទេសចរណ៍ជាដើម។

ក្រសួងសេដ្ឋកិច្ចរំពឹងថា វិស័យសំណង់អាចនឹងងើបឡើងវិញ ក្នុងអត្រា២,៨ភាគរយប៉ុណ្ណោះ ក្នុងឆ្នាំនេះនិងរំពឹងកើនខ្ពស់ជាងនេះ នៅឆ្នាំបន្ទាប់​ខាងមុខ។

យ៉ាងណាក៏ដោយ វិស័យសំណង់ក៏នៅតែមានសក្ដានុពល សម្រាប់ជម្រុញកំណើនសេដ្ឋកិច្ចផងដែរ ដោយកំណើនឥណទានផ្ដល់ឱ្យវិស័យនេះ មានទំហំទឹកប្រាក់១៣,៧ពាន់លានដុល្លារ។

ក្រសួងរៀបចំដែនដី នគរូបនីយកម្ម និងសំណង់​ កាលពីថ្មីៗនេះ បានកែប្រែខ្លឹមសារមួយចំនួននៃបែបបទ ក្នុងការផ្ដល់លិខិតអនុញ្ញាតសាងសង់ ដើម្បីសម្រួលដល់នីតិវីធីស្នើសុំលិខិតអនុញ្ញាតសាងសង់។

អ្នកជំនាញអន្តរជាតិ លោកTom Osuliivanនាយកប្រតិបត្តិគេហ​ទំព័រ ដែលផ្តល់សេវាកម្មទិញលក់អចលនទ្រព្យពីកម្ពុជា ទៅកាន់ពិភពលោកRealestate.com.khបានមានប្រសាសន៍ថា បើទោះជាវិស័យនេះងើបឡើងយឺតបន្តិចក្តី ប៉ុន្តែស្ថានភាពទីផ្សារក្នុងឧស្សាហកម្មនេះ នៅតែមានភាពរ៉ឹងមាំ ធៀបជាមួយនឹងបណ្តាប្រទេសនានាក្នុងតំបន់អាស៊ាន។

លោកបន្តថា “កម្ពុជានៅតែជាប្រទេសទាក់ទាញ ការវិនិយោគច្រើនពីបរទេស ដោយសារពួកគេអាចរកប្រាក់ចំណេញពីទីនេះ ខុសពីប្រទេសមួយចំនួន អ្នកទិញអចលនទ្រព្យគឺផ្តោតសំខាន់តែលើការស្នាក់នៅ”។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានមានប្រសាសន៍ឲ្យដឹងផងដែរថា កម្ពុជានៅតែទទួលបានផលចំណេញពីការវិនិយោគខ្ពស់ បើធៀបនឹងប្រទេសដទៃក្នុងតំបន់ ហេតុនេះវិស័យនេះ នឹងងើបឡើងវិញលឿននាពេលខាងមុខ ព្រោះតម្លៃអចលនទ្រព្យនៅទីនេះទាប ធៀបនឹងប្រទេសក្នុងតំបន់ ការគាំទ្រគោលនយោបាយពីរដ្ឋាភិបាល និងការលើកទឹកចិត្តជាច្រើនទៀត កម្ពុជានៅតែជាដែនដីដែល​បន្តទាក់ទាញ។

លោកបន្តថា “ដោយសារយើងជាប្រទេសកំពុងអភិវឌ្ឍន៍ ដីធ្លីនៅមានតម្លៃទាប កំលាំងពលកម្មនៅមានតម្លៃទាប ប្រជាជនវ័យក្មេងច្រើន ការចាយវាយប្រាក់ដុល្លារយ៉ាងទូលំទូលាយ ជាហេតុផលសំខាន់ដែលធ្វើឲ្យវិស័យនេះនឹងងើបឡើងវិញក្នុងរយៈពេលវែងបន្តទៀត”៕

ដោយៈ វឌ្ឍនៈ

ភ្នំពេញៈ វិស័យអចលនទ្រព្យក្នុងប្រទេសកម្ពុជា ចាប់ផ្ដើមមានសន្ទុះក្នុងរយៈពេលជាងទសវត្សរ៍ចុងក្រោយនេះ ហើយកម្ពុជាក៏ចាប់ផ្ដើមរៀបចំច្បាប់ទម្លាប់ឱ្យបានត្រឹមត្រូវ ពាក់ព័ន្ធនឹងវិស័យនេះផងដែរ។

រដ្ឋាភិបាលបានបង្កើតនិយ័តករ ដើម្បីគ្រប់គ្រងប្រតិបត្តិករវិស័យមួយនេះឱ្យបានត្រឹមត្រូវផងដែរ ។ គិតត្រឹមត្រីមាសទី២ឆ្នាំ២០២២នេះ និយ័តករអចលនទ្រព្យ និងបញ្ចាំ បានផ្ដល់អាជ្ញាប័ណ្ណជូនក្រុមហ៊ុនចំនួន២៧០ក្រុមហ៊ុន ដើម្បីធ្វើប្រតិបត្តិការនៅក្នុងប្រទេសកម្ពុជា។

លោកជូ វណ្ណៈ អគ្គនាយកនៃនិយ័តករអាជីវកម្មអចលនទ្រព្យវត្ថុ និងបញ្ចាំ នៃក្រសួងសេដ្ឋកិច្ច និងហិរញ្ញវត្ថុបានមានប្រសាន៍ថា នៅក្នុងពិធីបើកពិព័រណ៍អចលនទ្រព្យ កាលពីដើមសប្តាហ៍នេះថា គិតត្រឹមត្រីមាសទី ២ ឆ្នាំ២០២២នេះ និយ័តករអចលនវត្ថុ និងបញ្ចាំបានផ្ដល់អាជ្ញាបណ្ណជូនក្រុមហ៊ុនវាយតម្លៃ និងសេវាកម្មចំនួនជាង២៧០ក្រុមហ៊ុន។

ក្នុងនោះមានក្រុមហ៊ុនភ្នាក់ងារ អចលនវត្ថុមានចំនួន១៦៨ ក្រុមហ៊ុន ក្រុមហ៊ុនវាយតម្លៃមានចំនួន៧ក្រុមហ៊ុន ក្រុមហ៊ុនជាភ្នាក់ងារនិងវាយតម្លៃផងមានចំនួន៤២ក្រុមហ៊ុន។ ក្រុមហ៊ុនគ្រប់គ្រងអចលនវត្ថុមានចំនួន១៧ក្រុមហ៊ុន ក្រុមហ៊ុនភ្នាក់ងារ និងអចលនវត្ថុមានចំនួន១០ក្រុមហ៊ុន និងក្រុមហ៊ុនភ្នាក់ងារ វាយតម្លៃនិងគ្រប់គ្រងអចលនវត្ថុមានចំនួន៥ក្រុមហ៊ុន។

លោកជូ វណ្ណៈបានបន្តថា ក្រៅពីនេះដែរ និយ័តករក៏បានចេញអាជ្ញាបណ្ណធ្វើអាជីវកម្ម ដល់ក្រុមហ៊ុនអភិវឌ្ឍន៍អចលនវត្ថុ ចំនួន១២ក្រុមហ៊ុន ដែលមានគម្រោងអភិវឌ្ឍន៍ចំនួន៤៣៦គម្រោង ដោយក្នុងនោះមានផ្ទះល្វែងចំនួន២៦គម្រោង បុរីមានចំនួន២៣៣គម្រោង អគារសហកម្មសិទ្ធិខុនដូ មានចំនួន១៥៤គម្រោង ផ្សារមានចំនួន២គម្រោង គម្រោងចំរុះមានចំនួន២៤គម្រោង និងគម្រោងដីឡូត៏មានចំនួន២គម្រោង ។

លោកបន្ថែមថា អស់រយៈពេលជាង២ឆ្នាំមកហើយ ដែលកម្ពុជាបានជួបនឹងវិបត្តិកូវីដ១៩ និងបានធ្វើឱ្យសកម្មភាពសេដ្ឋកិច្ច និងអាជីវកម្មមួយចំនួន រួមទាំងអចលនវត្ថុផងដែរនោះត្រូវថមថយល្បឿន។ តែដោយមានការដាក់ចេញនូវវិធានការ ជាបន្តបន្ទាប់របស់រាជរដ្ឋាភិបាល ទើបធ្វើឱ្យរដ្ឋភិបាលគ្រប់គ្រងស្ថានភាពកូវីដ១៩ បានល្អឡើងវិញ និងបានជំរុញឱ្យវិស័យអចលនវត្ថុ ក៏ចាប់ផ្ដើមមានសកម្មភាពវិនិយោគជាបន្តបន្ទាប់វិញផងដែរ។

ជាមួយគ្នានេះ លោកច្រឹក សុខនីមប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជាបានមានប្រសាសន៍ថា ក្នុងប្រទេសកម្ពុជា មានភ្នាក់ងារអចលនវត្ថុច្រើនណាស់ ប៉ុន្តែក្នុងចំណោមភ្នាក់ងារទាំងនោះ ភាគតិចណាស់ ដែលមានអាជ្ញាប័ណ្ណ និងចុះបញ្ជីនៅក្រសួងបានត្រឹមត្រូវ។

លោកបន្តថា “ដូច្នេះដើម្បីឱ្យការរកស៊ីដោយស្មើភាពគ្នា អ្នកកំពុងរកទទួលទានរបរនេះ គួរតែចុះបញ្ជីឱ្យបានត្រឹមត្រូវ និងទទួលបានការបណ្ដុះបណ្ដាលពីក្រមសីលធម៌នេះ ត្រឹមត្រូវផងដែរ។ ធ្វើដូចនេះ គឺអាចទាក់ទាញនិងផ្ដល់ទំនុកចិត្តដល់អ្នកវិនិយោគមកពីបរទេសផងដែរ”៕