ដោយ៖ សុផារី

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងថា ប្រទេសកម្ពុជាបានបង្កកថវិកាចំនួនចំនួន៣០ពាន់លានរៀល ក្នុងរយៈពេលបួនឆ្នាំ ដោយសរុបចំនួន១២០ពាន់លានរៀល ស្មើនឹង៤០លានដុល្លារអាមេរិក ដើម្បីត្រៀមការប្រកួតមហាព្រឹត្តិការណ៍កីឡាស៊ីហ្គេម ឆ្នាំ២០២៣។

ក្នុងឱកាសអញ្ជើញជួបសំណេះសំណាល និងផ្តល់អនុសាសន៍ដល់កីឡាករ កីឡាការិនី និងអត្តពលិក មុនពេលចេញទៅប្រកួតកីឡាស៊ីហ្គេម (SEA Games) លើកទី៣១ នៅប្រទេសវៀតណាម នៅថ្ងៃទី២៨ ខែមេសា ឆ្នាំ២០២២នេះ សម្តេចតេជោបានមានប្រសាសន៍ថា “សម្រាប់ឆ្នាំក្រោយនេះ យើងបានបង្កកថវិកាចំនួនបួនឆ្នាំហើយ ប៉ុន្មានថ្ងៃមុន ខ្ញុំចាប់ផ្តើមបង្កកបន្ថែមចំនួន៣០ពាន់លានរៀល អញ្ជើញបួនឆ្នាំ តម្រូវការរបស់យើងគឺ១២០ពាន់លានរៀល ស្មើនឹង៤០លានដុល្លារអាមេរិក ដើម្បីត្រៀមការប្រកួតកីឡាឆ្នាំក្រោយ ដែលត្រូវចាយលុយ។ មិនមែនយកលុយសម្រាប់តែឆ្នាំ២០២៣ទេ នេះជាឆ្នាំទី៣ហើយ។ ឆ្នាំក្រោយត្រូវដាក់៣០ពាន់លានរៀលបន្ថែមទៀត បម្រើឱ្យការប្រកួត”។

សម្តេចតេជោបានលើកឡើងពីមូលហេតុ ដែលកម្ពុជាមិនទាន់បានត្រៀមខ្លួន ក្នុងការទទួលរៀបចំព្រឹត្តិការណ៍ស៊ីហ្គេម ក្នុងរយៈពេលប៉ុន្មានឆ្នាំចុងក្រោយនេះ ថា ដោយសារប្រទេសកម្ពុជាត្រូវការយកថវិការទៅប្រើប្រាស់ នៅក្នុងការអភិវឌ្ឍលើវិស័យអាទិភាពផ្សេងៗ ជាពិសេសលើហេដ្ឋារចនាសម្ព័ន្ធ ដើម្បីជំរុញកំណើនសេដ្ឋកិច្ច និងកាត់បន្ថយភាពក្រីក្រ។ សម្តេចថ្លែងថា “ខ្ញុំបានស្នើឱ្យមេដឹកនាំអាស៊ានធ្វើការយោគយល់ដល់កម្ពុជា កម្ពុជាត្រូវការថវិកាដើម្បីបម្រើឱ្យការអភិវឌ្ឍ ជាពិសេសហេដ្ឋារចនាសម្ព័ន្ធ ដើម្បីជំរុញកំណើនសេដ្ឋកិច្ច និងកាត់បន្ថយភាពក្រីក្រ”។

សម្តេចបានថ្លែងបន្តថា នៅក្នុងឆ្នាំ២០២៣នេះ ប្រទេសកម្ពុជាមានមូលដ្ឋាន និងបានត្រៀមខ្លួនសម្រាប់មហាព្រឹត្តិការណ៍កីឡាស៊ីហ្គេម ឆ្នាំ២០២៣ ដោយសារតែប្រទេសចិនបានជួយពហុកីឡដ្ឋានមរតកតេជោដ៏ធំសម្រាប់ការប្រកួត ជាមួយនឹងមូលដ្ឋានដែលយើងបានរៀបចំមួយចំនួនរួចមកហើយ បូកផ្សំនឹងសមិទ្ធផល ដូចជា ពហុកីឡាដ្ឋានអូឡាំពិក ដែលជាកេរមរតករបស់ព្រះករុណាព្រះបរមរតនកោដ្ឋ៕

ដោយៈ សហសេវិក

អន្តរជាតិៈ ភាពស្រពេញស្រពិលអំពីការបញ្ចប់សង្រ្គាមនាពេលណា មិនទាន់កំណត់បាននៅឡើយ ខណៈបណ្តាលោកខាងលិចបាននិងកំពុងមានចេតនាអូសបន្លាយសង្រ្គាមនេះ ដើម្បីបំបាក់រុស្ស៊ី។

បើសង្រ្គាមនៅតែបន្តអូសបន្លាយ កិច្ចចរចាស្វែងរកសន្តិភាពរវាងរុស្ស៉ី និងអ៊ុយក្រែន ក៏កាន់តែមិនច្បាស់លាស់ផងដែរ។ អ៊ុយក្រែន កាលពីពេល ថ្មីៗនេះបានព្រមានថា នឹងដើរចេញពីកិច្ចចរចា ប្រសិនបើទាហានរបស់ខ្លួនដែលកំពុងជាប់គាំង នៅឯរោងចក្រដែកថែប ក្នុងទីក្រុងម៉ារីយូប៉ូល ត្រូវបានសម្លាប់។

ចំណែកឯ វិមានក្រឹមឡាំងបានបញ្ចេញប្រតិកម្មភា្លមៗ ដោយចោទថាអ៊ុយក្រែន គឺជាអ្នកបង្កការរាំងស្ទះដល់កិច្ចចរចា ប៉ុន្តែព្រមពេលជាមួយគ្នា ក្រុមមន្ត្រីការទូតរុស្ស៉ី បានលើកឡើងជាថ្មីនូវសំណើមួយចំនួន ដើម្បីបិទបញ្ចប់សង្រ្គាម ក្នុងនោះរួមមានអព្យាក្រឹតភាព និងការធ្វើវិយោធកម្មរបស់អ៊ុយក្រែន ដោយត្រូវធានាឱ្យបានថា អ៊ុយក្រែននឹងមិនចូល NATO សំដៅកុំឱ្យបក្សសម្ព័ន្ធយោធា លោកខាងលិចមួយនេះ ប្រើប្រាស់អ៊ុយក្រែន មកគំរាមកំហែងប្រឆាំងនឹងរុស្ស៉ី។

ការធ្វើវិយោធកម្ម ឬការរំសាយយោធា និងអព្យាក្រឹតភាពរបស់អ៊ុយក្រែន គឺជាសំណើដ៏សំខាន់របស់រុស្ស៉ី ដែលអាចឱ្យលោក ពូទីន ប្រើវាជាការឃោសនា ប្រកាសពីជ័យជម្នះនៃសង្រ្គាមរបស់លោកនៅអ៊ុយក្រែន។ បានន័យថាបុរសខ្លាំង នៃវិមានក្រឹមឡាំងរូបនេះ ចង់យកវាទៅប្រាប់ប្រជាជន និងអ្នកនយោបាយ រុស្ស៉ីថា “ឃើញទេ! ប្រតិបត្តិការយោធារបស់យើង បានលុបបំបាត់ការគំរាមកំហែង នៃការពង្រីកឥទ្ធិពលពីសំណាក់ NATO មកលើតំបន់ព្រំដែនភាគខាងត្បូងរបស់យើង”។

សម្រាប់លោក ពូទីន អព្យាក្រឹត្យភាពអ៊ុយក្រែន គឺគ្រាន់តែជាចំណែកតូចមួយ នៃមហិច្ឆតារបស់លោកតែប៉ុណ្ណោះ ហើយរឿងដែលសំខាន់បំផុត នោះ គឺលោកចង់ឱ្យអ៊ុយក្រែន ស្ថិតនៅក្រោមដែនឥទ្ធិពលរបស់រុស្ស៉ីជារៀងរហូត ដូចដែលលោកបានប្រកាសជាសាធារណៈថា ប្រជាជនរុស្ស៉ី និងអ៊ុយក្រែន “ជាប្រជាជនតែមួយ”។

កាលពីខែធ្នូ ឆ្នាំ២០២១, រុស្ស៉ីបានដាក់សំណើសន្តិសុខ ទៅកាន់សហរដ្ឋអាមេរិក និង NATO ដោយដឹងជាមុនរួចទៅហើយថា លោកខាងលិចនឹងមិនអាច ធ្វើតាមសំណើទាំងនោះឡើយ ហើយលោក ពូទីនក៏ដឹងដែរថាយុទ្ធសាស្ត្របែបនេះ មិនអាចជោគជ័យទេ នៅលើឆាកអន្តរជាតិ ប៉ុន្តែលោកចង់ប្រើ ដើម្បីបញ្ជាក់ពីភាពត្រឹមត្រូវ នៃការសម្រេចចិត្តធ្វើសង្រ្គាមនៅអ៊ុយក្រែន និងឱ្យប្រជាជនរុស្ស៉ីជឿថាអាមេរិក និង NATO ជាអ្នកទទួលខុសត្រូវ ដោយសារតែ ពួកគេមិនអើពើនឹងសំណើសន្តិសុខរបស់រុស្ស៉ី។

ដូចគ្នានេះដែរ នៅក្នុងកិច្ចចរចាសន្តិភាព លើកចុងក្រោយបំផុត រុស្ស៉ីបានស្នើសុំជាថ្មី នូវលក្ខខណ្ឌជាច្រើនក្នុងនោះ រួមមាន អ៊ុយក្រែនត្រូវតែក្លាយជាប្រទេស អព្យាក្រឹត ជាមួយការបោះបង់ចោលគំនិតចង់ចូល NATO, រំសាយយោធា ព្រមទាំងទទួលស្គាល់តំបន់ដូណេត និងលូហានគ្រប់គ្រងដោយក្រុមឧទ្ទាម ផ្ដាច់ទឹកដីគាំទ្ររុស្ស៉ី ជារដ្ឋឯករាជ្យដូចដែលលោក ពូទីនបានប្រកាសទទួលស្គាល់។

និយាយពីរឿងអធិបតេយ្យភាព និងបូរណភាពទឹកដី ប្រធានាធិបតីអ៊ុយក្រែន លោក ហ្សេលេនស្គី ហាក់ដូចជាមានជំហរម៉ឺងម៉ាត់ ប៉ុន្តែលោកបានបង្ហាញពីចំណាប់អារម្មណ៍ ចង់ពិភាក្សាពីអព្យាក្រឹតភាពជាមួយ លោក ពូទីន។

តួយ៉ាងកាលពីថ្ងៃទី១៥ ខែមីនា លោក ហ្សេលេនស្គីបានកត់សម្គាល់ថាទោះបីជា NATO នៅតែបើកចំហទ្វារក៏ដោយ តែលោកជឿជាក់ថា អ៊ុយក្រែន មិនអាចដើរចូលតាមទ្វារនេះបានឡើយ ហើយការបង្ហាញការខកចិត្តនេះ គឺជារឿងត្រឹមត្រូវ ពីព្រោះថា NATO ខ្លួនឯងបានបដិសេធទទួលយកអ៊ុយក្រែន និងហ្ស៊កហ្ស៉ីជាសមាជិកកាលពីឆ្នាំ២០០៨ ដោយទុកឱ្យប្រទេសទាំង២ នៅក្រៅបក្សសម្ព័ន្ធយោធា ដើម្បីបញ្ចៀសជម្លោះជាមួយរុ ស្ស៉ី។

ក៏ប៉ុន្តែ “អព្យាក្រឹតភាព” របស់ហ្ស៊កហ្ស៊ី ឬអ៊ុយក្រែនមិនអាចទប់ស្កាត់ការឈ្លានពានរបស់រុស្ស៉ីបានឡើយ ហើយជារឿយៗវាតែងតែត្រូវបានលោកពូទីន ប្រើជាថ្នាំ ដើម្បីបន្សាបឥទ្ធិពលលោកខាងលិច។ នៅពេលនិយាយដល់អព្យាក្រឹតភាព គេនឹកឃើញមុនគេដល់ប្រទេស២ នៅអឺរ៉ុប នោះគឺស្វីស និងអូទ្រីស ដែលជាប្រទេសអព្យាក្រឹត។

តែករណីអ៊ុយក្រែន មិនដូចប្រទេសទំាង២នេះទេ។ អូទ្រីស និងស្វីស មានសមត្ថភាពអភិវឌ្ឍសេដ្ឋកិច្ច និងប្រជាធិបតេយ្យ ឱ្យរីកចម្រើនដោយខ្លួនឯង ខណៈបន្តស្ថិតនៅក្រៅបក្សសម្ព័ន្ធយោធា NATO។ ប៉ុន្តែ សម្រាប់លោក ពូទីន អព្យាក្រឹតភាពរបស់អ៊ុយក្រែន មិនមែនសំដៅតែ ទៅលើការធានាមិនឱ្យទីក្រុងកៀវចូល NATO នោះទេ ពោលគឺលោកចង់ឱ្យបានអ៊ុយក្រែនទាំងមូលតែម្ដង។

អ៊ុយក្រែនក៏ធ្លាប់បានព្យាយាម ស្ថិតនៅជាប្រទេសអព្យាក្រឹតមួយផងដែរ ក្រោយទទួលបានឯករាជ្យភាព ពីអតីតសហភាពសូវៀត។ តែទោះជាបែបនេះក្ដី អព្យាក្រឹតភាពមិនអាចរារាំងរុស្ស៉ីបានឡើយ ដោយកាលពីឆ្នាំ២០១៤ រុស្ស៉ីបានក្រសោបយកឧបទ្វីបគ្រីមៀ និងតំបន់ដុនបាស់ពីអ៊ុយក្រែន និងចុងក្រោយគេបំផុត គឺសង្រ្គាមរបស់លោក ពូទីនក្នុងពេលបច្ចុប្បន្ន។

លោក ហ្សេលេនស្គី ធ្លាប់បានបញ្ជាក់រួចហើយថា អ៊ុយក្រែនអាចនឹងមិនចូល NATO តែអ៊ុយក្រែនចង់បានការធានាមួយ ពីបរទេសខាងក្រៅដូចជា អាមេរិក អង់គ្លេស ឬសហភាពអឺរ៉ុប ដែលប្ដេជ្ញាចិត្តថាធ្វើអន្តរាគមន៍ជួយអ៊ុយក្រែនដោយផ្ទាល់ នៅក្នុងករណីមានការវាយប្រហារណាមួយពីរុ ស្ស៉ីនៅពេលអនាគត។

តែរឿងបែបនេះ វាគឺអាស្រ័យថា តើមេដឹកនាំលោកខាងលិចមានភាពក្លាហានប៉ុនណា ក្នុងការប្រឈមមុខជាមួយរុស្ស៉ី ព្រោះថាលោកពូទីន ប្រហែលជា នឹងមិនអាចទទួលយកសំណើបែបនេះទេ។

សង្រ្គាមរបស់លោក ពូទីន នៅអ៊ុយក្រែនបានចូលដំណាក់កាលទី២ ដោយកងទ័ពរុស្ស៉ី កំពុងផ្ដោតលើតំបន់ភាគខាងកើត និងភាគខាងត្បូង អ៊ុយក្រែន ហើយវាក៏ជាដំណាក់មួយដ៏គ្រោះថ្នាក់ និងកំណត់អ្នកឈ្នះអ្នកចាញ់នៅក្នុងសង្រ្គាមនេះដែរ។

ក្រុមមន្ត្រីអាមេរិកបានបង្ហាញការព្រួយបារម្ភថា នៅចំពោះមុខការផ្ដល់ជំនួយយោធា ដូចទឹកបាក់ទំនប់ ពីបណ្ដាប្រទេសលោកខាងលិច លោក ពូទីនអាចនឹងប្រើប្រាស់អាវុធគីមី ឬក៏អាវុធនុយក្លេអ៊ែរតាក់ទិក វាយផ្ដាច់ព្រ័ត្រតែម្ដង ខណៈអ្នកជំនាញជាច្រើនយល់ថា លោក ពូទីនត្រូវការជ័យជម្នះឱ្យបានមុនថ្ងៃទី៩ ខែឧសភាក្រោយនេះ ដែលជាថ្ងៃបុណ្យជាតិរុស្ស៉ី នោះគឺទិវាជ័យជម្នះរបស់កងទ័ពរុស្ស៉ី លើកងទ័ពណាហ្ស៉ីរបស់ហ៊ីត្លែរ ក្នុងសង្រ្គាមលោកលើកទី២៕

ដោយៈសុខុម

រុស្ស៊ី: មានការព្យាករណ៍យ៉ាងទូលំទូលាយថា មិនយូរទេសេដ្ឋកិច្ចរុស្ស៊ី នឹងឈានដល់ការដួលរលំជាមិនខាន ដោយសារទទួលរងទណ្ឌកម្មជុំទិសដែលធ្ងន់ធ្ងរបំផុត មិនធ្លាប់មានក្នុងប្រវត្តិសាស្ត្រ ក្រោយបុរសខ្លាំង វ៉្លាឌីមៀ ពូទីន បញ្ឆេះសង្គ្រាមចូលឈ្លានពានប្រទេសអ៊ុយក្រែន នៅថ្ងៃទី២៤ ខែកុម្ភៈ។

ទោះជាយ៉ាងណា បើគិតមកទល់នឹងថ្ងៃព្រហស្បតិ៍ ទី២៨ ខែមេសា នេះ វាមានរយៈពេល២ខែនិង៤ថ្ងៃហើយ ប៉ុន្តែសេដ្ឋកិច្ចរុស្ស៊ី ហាក់នៅតែរឹងមាំដដែល។

តើសេដ្ឋកិច្ចរុស្ស៊ី ពឹងផ្អែកលើអ្វីនៅពេលនេះ ទើបបានជាមិនដួលរលំសោះ? តោះ មកស្វែងយល់ទាំងអស់គ្នា។
យោងតាមសារព័ត៌មាន Foreign Policy ចុះផ្សាយកាលពីថ្ងៃសុក្រ ទី២២ ខែមេសា ឱ្យដឹងថា ការនាំចេញប្រេងរបស់ប្រទេសរុស្ស៊ី ទៅកាន់អឺរ៉ុប និងប្រទេសនានាដូចជា ឥណ្ឌា ប្រទេសចិន និងតួកគី ជាដើម ពិតជាបានកើនឡើងយ៉ាងគំហុក ហើយវិស័យហិរញ្ញវត្ថុរបស់ប្រទេសនេះ មកទល់ពេលនេះ កំពុងជៀសផុតឆ្ងាយ ពីវិបត្តិសាច់ប្រាក់ធ្ងន់ធ្ងរគួរឱ្យភ្ញាក់ផ្អើល។

ក្រុមអ្នកជំនាញលើកឡើងថា ទណ្ឌកម្មនឹងបញ្ចេញឥទ្ធិពលរបស់វា ក្នុងរយៈពេលវែង ប៉ុន្តែសម្រាប់ពេលនេះ ប្រទេសជាច្រើនដែលកំពុងដាក់ទណ្ឌកម្មលើរុស្ស៊ី នៅតែបន្តទិញថាមពលពីប្រទេសនេះ ដោយជៀសមិនរួច ហើយថែមទាំងទិញច្រើនជាងមុនទៀតផង នៅក្នុងខែមេសា នេះបើធៀបនឹងមីនា។

លោក Edward Fishman អតីតអ្នកឯកទេសផ្នែកកិច្ចការអឺរ៉ុប នៅក្រសួងការបរទេសអាមេរិក បាននិយាយថា “លោក ពូទីន កំពុងបន្តរកប្រាក់ចំណូល បានយ៉ាងហោចណាស់១ពាន់លានដុល្លារ ក្នុងមួយថ្ងៃពីការលក់ប្រេង និងឧស្ម័ន ហើយមួយផ្នែកធំនៃប្រាក់ចំណូលនេះ គឺបានពីអឺរ៉ុប”។

អ្នកជំនាញរូបនេះបានបន្ថែមទៀតថា “ប្រទេសអឺរ៉ុប មួយចំនួនកំពុងបញ្ជូនជំនួយយោធាទៅអ៊ុយក្រែន ទាំងដែលខ្លួនកំពុងទិញប្រេង និងឧស្ម័នរុស្ស៊ី ហើយទូទាត់លុយឱ្យរុស្ស៊ី”។

លោក Matt Smith អ្នកជំនាញមកពី Kpler ដែលជាក្រុមហ៊ុនតាមដានកប៉ាល់ ដឹកទំនិញប្រេងនិយាយថា ទោះបីជាលោកខាងលិច រឹតបន្តឹងលើវិស័យហិរញ្ញវត្ថុរបស់រុស្ស៊ី កាន់តែខ្លាំងយ៉ាងណាក្ដី ក៏ការនាំចេញប្រេងរបស់ប្រទេសនេះ បានឈានដល់៣,៦លានបារ៉ែល ក្នុងមួយថ្ងៃក្នុងខែមេសា បើធៀបនឹង៣,៣លានបារ៉ែលក្នុងមួយថ្ងៃក្នុងខែមុន។

លោក Matt Smith បានបន្ថែមទៀតថា “ការនាំចេញប្រេងឆៅរបស់រុស្ស៊ី ក្នុងខែនេះពិតជាខ្ពស់ ជាងខែមុនឆ្ងាយណាស់។ វាពិតជាគួរឱ្យភ្ញាក់ផ្អើលមែនទែន”។

វិទ្យាស្ថានហិរញ្ញវត្ថុអន្តរជាតិ (Institute of International Finance) បានចេញរបាយការណ៍ក្នុងសប្តាហ៍នេះថា ការនាំចេញប្រេងរបស់រុស្ស៊ី ក្នុងខែមេសា មកទល់ពេលនេះ កំពុងមានសន្ទុះខ្លាំងមិនធ្លាប់មាន។ សូម្បីប្រេងឆៅរុស្ស៊ី លក់បញ្ចុះតម្លៃច្រើនយ៉ាងណាក្ដី ក៏ “ប្រាក់ចំណូលបានពីការនាំចេញប្រេង ទំនងជាកើនលើសច្រើន បើធៀបនឹងខែដូចគ្នាក្នុងឆ្នាំមុនៗ”។

ប្រាក់ចំណូលទាំងនោះ បានជំរុញឱ្យអតិរេកគណនី ចរន្តរបស់រុស្ស៊ី កើនឡើងដល់កម្រិតខ្ពស់ជាថ្មី។
សម្រាប់រយៈពេល៣ខែដំបូងនៃឆ្នាំនេះ អតិរេកគណនីចរន្តមានចំនួន៦០ពាន់លានដុល្លារ បើធៀបនឹងចំនួន១២០ពាន់លានដុល្លារ សម្រាប់ពេញមួយឆ្នាំក្នុងឆ្នាំ២០២១ ដែលធ្វើឱ្យវិមានក្រឹមឡាំង មានប្រាក់ចំណូលថ្មីៗដើម្បីទប់ទល់នឹងទណ្ឌកម្មរបស់លោកខាងលិច។

ប្រទេសរុស្ស៊ី គឺជាប្រទេសផលិតប្រេងឆៅធំជាងគេបំផុតទី៣ របស់ពិភពលោក បន្ទាប់ពីសហរដ្ឋអាមេរិក និងប្រទេសអារ៉ាប៊ីសាអូឌីត៕ Foreign Policy៕

ដោយៈសុខុម

ញូវយ៉ក: ធនាគារដ៏ធំឈានមុខគេរបស់អាល្លឺម៉ង់ Deutsche Bank បានបង្កការភ្ញាក់ផ្អើលយ៉ាងខ្លាំង កាលពីដើមខែនេះ ដោយក្លាយជាធនាគារទី១ ដែលបានព្យាករណ៍ថា សហរដ្ឋអាមេរិក ប្រឈមវិបត្តិសេដ្ឋកិច្ចនៅពេលខាងមុខ។

ពេលនេះធនាគារនេះបានព្រមានថា សេដ្ឋកិច្ចអាមេរិក នឹងដាំក្បាលចុះកាន់តែជ្រៅ ដែលបណ្តាលមកពីធនាគារកណ្ដាលអាមេរិក Federal Reserve ចាត់វិធានការទប់អតិផរណា ដែលហក់ឡើងខ្ពស់។

ក្រុមអ្នកជំនាញសេដ្ឋកិច្ចនៅធនាគារ Deutsche Bank បានសរសេរក្នុងរបាយការណ៍មួយ ផ្ញើទៅកាន់អតិថិជនកាលពីថ្ងៃអង្គារ ទី២៦ ខែមេសា ថា “យើងនឹងជួបប្រទះវិបត្តិសេដ្ឋកិច្ចដ៏ធំមួយ”។

យោងតាមធនាគារដដែលឱ្យដឹងថា បញ្ហាស្ថិតនៅត្រង់ថា អតិផរណានៅសហរដ្ឋអាមេរិក អាចនឹងហក់ឡើងឈានដល់កម្រិតកំពូល ហើយវានឹងត្រូវការពេលវេលាយូរ ទម្រាំតែធ្លាក់ចុះមកនៅត្រឹមគោលដៅ២% ដែលធនាគារកណ្ដាលអាមេរិកបានកំណត់។

នោះបង្ហាញថា ធនាគារកណ្តាលអាមេរិក នឹងដំឡើងអត្រាការប្រាក់កាន់តែខ្ពស់ ដែលនឹងជះផលប៉ះពាល់មកលើសេដ្ឋកិច្ចកាន់តែខ្លាំង។

តម្លៃទំនិញប្រើប្រាស់នៅក្នុងប្រទេសនេះ បានហក់ឡើងថ្លៃ៨,៥%កាលពីខែមីនា ដែលជាការហក់ឡើងលឿនបំផុត មិនធ្លាប់មានក្នុងរយៈពេល៤០ឆ្នាំ។ ទន្ទឹមនេះ ទីផ្សារការងារកំពុងជួបវិបត្តិនៅឡើយ ដោយក្រុមហ៊ុនវិភាគហានិភ័យសេដ្ឋកិច្ច Moody’s Analytics បានព្យាករថា មិនយូរទេអត្រាគ្មានការងារធ្វើ នឹងកើនឡើងដល់កម្រិតខ្ពស់បំផុតមិនធ្លាប់មានចាប់តាំងពីទសវត្សរ៍ឆ្នាំ១៩៥០ មក៕ CNN៕

ដោយៈគង់ សូរិយា

ភ្នំពេញៈ សម្ដេចតេជោ ហ៊ុន សែន ទទួលជួបអតីតមេបញ្ជាការរបស់កងកម្លាំងអន្តរជាតិ នៃអាជ្ញាធរបណ្តោះអាសន្ន អង្គការសហប្រជាជាតិប្រចាំកម្ពុជា (UNTAC) នៅក្នុងដំណើរការសន្តិភាពនៅកម្ពុជា។

សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃកម្ពុជា បានទទួលជួប លោកឧត្តមសេនីយឯក ចនសេន ដឺសុន (Jonh Sanderson) អតីតមេបញ្ជាការរបស់កងកម្លាំងអន្តរជាតិ នៃអាជ្ញាធរបណ្តោះអាសន្ន អង្គការសហប្រជាជាតិប្រចាំកម្ពុជា(UNTAC) នៅក្នុងដំណើរការសន្តិភាពនៅកម្ពុជា នាព្រឹកថ្ងៃទី២៧ ខែមេសា ឆ្នាំ២០២២ នៅវិមានសន្តិភាព ។

នៅក្នុងជំនួបនេះ លោកចនសេន ដឺសុន បានគោរពជម្រាបជូនសម្តេចតេជោថា ឯកឧត្តមពិតជាមានសេចក្ដីរំភើប ដែលបានវិលត្រឡប់មកកម្ពុជាវិញ និងជាប្រទេសដែល លោកមានអនុស្សាវរីយ៍យ៉ាងច្រើន និងមិត្តភ័ក្រ្តយ៉ាងច្រើន ស្របពេលជាមួយខួប៣០ឆ្នាំ នៃប្រតិបត្តិការស្វែងរកសន្តិភាពនៅកម្ពុជា និងខួប៧០ឆ្នាំ នៃទំនាក់ទំនងការទូតរវាងកម្ពុជា និងអូស្ត្រាលី។

លោកចនសេន ដឺសុន បានគោរពជម្រាបជូនសម្ដេចតេជោផងដែរថា កម្ពុជាមានការផ្លាស់ប្ដូរដ៏អស្ចារ្យ ជាពិសេសរាជធានីភ្នំពេញ ដែលមានការអភិវឌ្ឍដ៏ស្រស់បំព្រង ស្របគ្នានឹងការអភិវឌ្ឍយ៉ាងឆាប់រហ័ស របស់កម្ពុជានៅទូទាំងប្រទេស។ លោកបន្ថែមថា ជាមួយការចូលរួមចំណែកក្នុងកិច្ចការពិភពលោក កិច្ចការតំបន់ និងជាពិសេស ប្រធានអាស៊ាន ទាំងនេះជាវឌ្ឍនភាព និងជោគជ័យដ៏ធំធេងរបស់កម្ពុជា។

ជាការឆ្លើយតប សម្តេចតេជោ ហ៊ុន សែន បានថ្លែងអំណរគុណឯកឧ ត្តមរដ្ឋាភិបាលអូស្ត្រាលី ដែលបានចូលរួមចំណែកក្នុងការស្វែងរកសន្តិភាពរបស់កម្ពុជា ការទទួលស្គាល់កម្ពុជា មុនកម្ពុជាទទួលបានឯករាជ្យ និងបោះបង់ការទទួលស្គាល់ខ្មែរក្រហម នៅអង្គការសហប្រជាជាតិមុនគេ។

សម្ដេ​ចតេជោបានមានប្រសាសន៍ថា “ប្រទេសអូស្ត្រាលី ជាប្រទេសបានទទួលស្គាល់កម្ពុជា មុនកម្ពុជាទទួលបានឯករាជ្យ ជាប្រទេសដែលជួយកម្ពុជាឲ្យទទួលបានឯករាជ្យ”។

ជាមួយគ្នានោះដែរ សម្តេចតេជោនាយករដ្ឋមន្ត្រី ក៏បានជម្រាបជូនលោកចនសេន ដឺសុន អំពីចក្ខុវិស័យ និងយុទ្ធសាស្ត្រដែលនាំឲ្យកម្ពុជា ទទួលបានសន្តិភាពពេញលេញ រួមជាមួយយុទ្ធសាស្ត្រគ្រប់គ្រងការរីករាលដាលជំងឺកូវីដ-១៩៕