ដោយៈគង់ សូរិយា

        ភ្នំពេញៈ ក្នុងគោលដៅលើកទឹកចិត្តអតិថិជនបានទទួលដីសំរាប់សាងសង់លំនៅដ្ឋាន និងទិញផ្ទះលំហែរកាយនៅតំបន់ជាយក្រុង ក្រុមហ៊ុនUTRUST Investment Co, Ltdបានផ្តល់នូវលក្ខខ័ណ្ឌបង់ប្រាក់ពិសេសដល់អតិថិជន។

លោកឧកញ៉ាម៉ន សុខាប្រធានក្រុមប្រឹក្សាភិបាលនៃក្រុមហ៊ុនUTRUST Investment Co, Ltdបានសរសេរលើបណ្តាញទំនាក់ទំនងសង្គមរបស់ខ្លួនកាលពីម្សិលម៉ិញនេះថា ក្រុមហ៊ុនកំពុងផ្តល់នូវសេវាកម្មពិសេស តាមរយៈ​លក្ខខ័ណ្ឌបង់ប្រាក់ងាយស្រួល ដោយអតិថិជនទិញដីឡូត៍ អាចបង់រំលស់  ១០០ដុល្លារក្នុងមួយខែ ដោយគ្មានប្រាក់កក់ និងគ្មានការប្រាក់ ពិសេសផ្តល់ជូនការបញ្ចុះតម្លៃរហូតដល់៣០៩៩ដុល្លារអាមេរិក និងថែមជូនទូរស័ព្ទ  Iphone13Proមួយគ្រឿងថែមទៀតផង។

ជាមួយគ្នានេះអតិថិជនអាចទិញ ផ្ទះវីឡាលំហរកាយ ដោយបង់ត្រឹមតែ១០០០ដុល្លារ និងបង់រំលស់៣០០ដុល្លារក្នុងមួយខែ ដោយគ្មានការប្រាក់ និងអ្វីកាន់តែពិសេសក្រុមហ៊ុនផ្តល់ជូននូវការបញ្ចុះតម្លៃរ្ហូតដល់៦០០០ដុល្លារអាមេរិក និងថែមជូនឧបករណ៍អេឡិចត្រូនិកជាច្រើនក្នុងផ្ទះផងដែរ។

ចង់ទិញបង់រំសល់ក៏បាន  ចង់ទិញបង់ប្រាក់ ផ្តាច់ក៏បានចង់ជួយលក់ ក៏បាន។ ពត៌មាន បន្ថែម សូម ទាក់ទង តាម  Telegram  087  600  999៕

ដោយៈសុខុម

គូឡាឡាំពួ: អគារភ្លោះ Petronas Towers ដ៏ល្បីល្បាញនៅក្នុងទីក្រុងគូឡាឡាំពួ គឺជាអគារខ្ពស់បំផុតប្រចាំប្រទេសម៉ាឡេស៊ី ប៉ុន្តែប្រទេសកាន់សាសនាឥស្លាមមួយនេះ បាននិងកំពុងឈានមួយជំហ៊ានទៀត ដោយបាននិងកំពុងសាងសង់ អាគារពាណិជ្ជកម្មកប់ពពកលំដាប់ទី២លើពិភពលោក។

ទោះជាយ៉ាងណា អគារថ្មី Merdeka 118 ដែលស្ថិតនៅក្នុងទីក្រុងគូឡាឡាំពួ នឹងវ៉ាឈ្នះអគារភ្លោះ Petronas Towers ក្លាយជាអគារខ្ពស់បំផុត ប្រចាំប្រទេសម៉ាឡេស៊ី និងខ្ពស់បំផុតទី២ក្នុងពិភពលោកជាផ្លូវការ នៅពេលសាងសង់បញ្ចប់ជាស្ថាពរនៅឆ្នាំ២០២២​ខាងមុខនេះ។

នេះសរបង្ហាញពីការរីកចម្រើនឥតឈប់ឈរ ក្នុងវិស័យសំណង់របស់ម៉ាឡេស៊ី ដែលជាសមាជិកមួយ របស់សមាគមប្រជាជាតិអាស៊ីអាគ្នេយ៍ (អាស៊ាន) ហើយក៏ជាមុខមាត់ថ្មីគួរឱ្យស្ញប់ស្ញែង សម្រាប់ប្រទេសកាន់សាសនាអ៊ីស្លាមភាគច្រើន ដែលមានប្រជាជនសរុបជាង ៣២,៧លាននាក់មួយនេះផងដែរ។

អគារ១១៨ជាន់ Merdeka 118 ឬ PNB 118 ដែលមានកម្ពស់៦៤៤ម៉ែត្រជាមួយនឹងរចនាប័ទ្ម ស្អាតប្លែកអស្ចារ្យបែបថ្ងៃអនាគតនេះ ត្រូវបានចាប់ផ្ដើមការសាងសង់នៅក្នុងឆ្នាំ២០១៤ ហើយកំពុងស្ថិតក្នុងដំណាក់កាលសាងសង់នៅឡើយ គិតត្រឹមខែកញ្ញា ឆ្នាំ២០២១នេះ។

យោងតាមសារព័ត៌មាន The Star ដែលបានចុះផ្សាយកាលពីពេលថ្មីៗនេះឱ្យដឹងថា ការងារសាងសង់អគារខ្ពស់កប់ពពកនេះ សម្រេចបានប្រមាណជាង៨០ភាគរយ ហើយគ្រោងនឹងរួចរាល់ជាស្ថាពរនៅត្រីមាសទី២ ឆ្នាំ២០២២។

អគារដែលចំណាយអស់ទឹកប្រាក់១,៥ពាន់លានដុល្លារអាមេរិក របស់ក្រុមហ៊ុន PNB Merdeka Ventures Sdn Bhd ខាងលើនេះ ត្រូវបានឌីហ្សាញឡើងដោយក្រុមហ៊ុនស្ថាបត្យកម្មអូស្ត្រាលី Fender Katsalidis សហការជាមួយក្រុមហ៊ុនស្ថាបត្យកម្មម៉ាឡេស៊ី RSP KL និងទទួលសាងសង់ ដោយក្រុមហ៊ុនម៉ៅការកូរ៉េខាងត្បូង Samsung C&T និងក្រុមហ៊ុនម៉ៅការម៉ាឡេស៊ី UEM Group។

ដោយមានផ្ទៃក្រឡាសរុប២៩២.០០០ម៉ែត្រការ៉េ អគារនេះគឺជាអគារបំរើសេវាកម្មពហុគោលបំណង ដែលនឹងមានលំនៅដ្ឋានសម្រាប់ពួកអភិជន ការិយាល័យកម្រិត A សណ្ឋាគារប្រណីត និងកន្លែងគយគន់ទេសភាពដ៏អស្ចារ្យ៕ The Star៕

ដោយៈ វឌ្ឍនៈ

ភ្នំពេញៈ រដ្ឋាភិបាលគ្រោង នឹងសាងសង់ផ្លូវល្បឿនលឿនតភ្ជាប់ពីភ្នំពេញ ទៅកាន់ក្រុងបាវិត ខេត្តស្វាយរៀង ជាប់ព្រំដែនកម្ពុជាវៀតណាម ដោយគ្រោងនឹងចំណាយ ទឹកប្រមាណរាប់រយលានដុល្លារអាមេរិក។

គម្រោងផ្លូវល្បឿននេះ គឺជាក្ដីសង្ឃឹមសម្រាប់អភិវឌ្ឍន៍វិស័យអចលនទ្រព្យក្នុងក្រុងបាវិត ដែលមានសភាពស្ងប់ស្ងាត់ចាប់តាំងពី វិបត្តិនៃការរបិទហ្គេមអនឡាញ និងការមកដល់នៃវិបត្តិកូវីដ១៩ រយៈពេលជាង២ឆ្នាំមកនេះ។

លោកឧកញ៉ានួន រឹទ្ធី អគ្គនាយកក្រុមហ៊ុន  Khmer Foundation Appraisal បានមានប្រសាសន៍តាមទូរសព្ទ កាលពីពេលថ្មីៗៗនេះថា បើសិនជាផ្លូវល្បឿនលឿនភ្នំពេញ បាវិតចេញជារូបរាងនៅពេលណានោះ វានឹងផ្ដល់ក្ដីសង្ឃឹមដល់ការអភិវឌ្ឍក្រុងបាវិត និងខេត្តមួយចំនួនស្ថិតនៅតាម​ដងផ្លូវនេះ ពីព្រោះថាផ្លូវល្បឿនលឿនភ្នំពេញ បាវិតនឹងត្រូវកាត់តាមខេត្តមួយចំនួន ការធ្វើដំណើរទៅកាន់ព្រៃវែងរបស់វិនិយោគិន នឹងកាន់តែមានភាពងាយស្រួល ជាមួយការសាងសង់ហេដ្ឋារចនាសម្ព័ន្ធ មួយចំនួនទៀតផងដែរ ។

លោកឧកញ៉ាបន្តថា បើសិនជាគម្រោងសាងសង់ផ្លូវល្បឿនលឿនភ្នំពេញ បាវិតបានជោគជ័យ ការធ្វើដំណើររបស់ពលរដ្ឋ វិនិយោគិន ទេសចរ កាន់តែប្រើពេលខ្លី ចំណេញពេលវេលានិងថវិកា ពីព្រោះថាផ្លូវល្បឿនលឿននឹងកាត់បន្ថយចំងាយផ្លូវ ការបើកបរក៏បានលឿនជាង ការបើកបរតាមផ្លូវធម្មតា។

លោកបន្ថែមថា បច្ចុប្បន្ននេះការអភិវឌ្ឍចេញពីរាជធានី ទៅកាន់តំបន់ប៉ែកខាងកើតភ្នំពេញ កាន់តែមានការរីកលូតលាស់ ជាបន្តបន្ទាប់ហើយដែរ ។ជាក់ស្ដែងយើងឃើញគម្រោងវិនិយោគ របស់វិនិយោគិនបរទេស និងវិនិយោគិនក្នុងស្រុក នៅតំបន់តាមផ្លូវជាតិលេខជាតិលេខ១ ក៏កាន់តែរីកដុះដាលបន្តបន្ទាប់និងកាន់តែចេញពីភ្នំពេញ ។

ការអភិវឌ្ឍហេដ្ឋារចនាសម្ព័ន្ធនានា ក៏មានការជាប់ទាក់ទងនឹងការអភិ​វឌ្ឍអចលនទ្រព្យផងដែរ ហើយបើតាមបទពិសោធន៍កន្លងមកឃើញថា នៅពេលដែលរដ្ឋាភិបាល ចេញគម្រោងអភិវឌ្ឍន៍ហេដ្ឋារចនាសម្ព័ន្ធ នៅទីណា ទីនោះតែងតែទទួលបាន ការអភិវឌ្ឍអចលនទ្រព្យថ្មីៗជាបន្តបន្ទាប់។

ដូច្នេះរដ្ឋាភិបាល ក៏បានខិតខំសន្សំថវិការបស់ខ្លួន ដើម្បីប្រើប្រាស់ទៅលើការកសាងហេដ្ឋារចនាសម្ព័ន្ធ។ មិនតែប៉ុណ្ណោះ កម្ចីភាគច្រើនដែលរដ្ឋាភិបាលទទួលបានពីដៃគូអភិវឌ្ឍន៍ ក៏យកទៅសាងសង់ហេដ្ឋារចនាសម្ព័ន្ធនេះដែរ។

លោកទេសរដ្ឋមន្រ្តីស៊ុន ចាន់ថុលរដ្ឋមន្រ្តីក្រសួងសាធារណៈការ និងដឹកជញ្ជូនបានមានប្រសាសន៍ឲ្យដឹងកាលពីពេលថ្មីៗនេះថា គំរោងសិក្សាពីផ្លូវល្បឿនលឿនភ្នំពេញ បាវិត ដែលធ្វើឡើងដោយក្រុមហ៊ុនចិន នឹងបង្ហាញលទ្ឋផលនៅចុងឆ្នាំ២០២១ ប៉ុន្តែលទ្ឋផលបែបណា ការសិក្សាចំណាយអស់ប៉ុណ្ណា រដ្ឋាភិបាលនឹងពិចារណា ដើម្បីរកប្រភពថវិកាមកសាងសង់នាពេលខាងមុខឬយ៉ាងណា អាស្រ័យលើទំហំចំណាយជាក់ស្តែង។

ទីភ្នាក់ងារសហប្រតិបត្តិការអន្តរជាតិ នៃរដ្ឋាភិបាលជប៉ុន (JICA) ធ្លាប់បានសិក្សាពីការសាងសង់ផ្លូវនេះរួចហើយ ដោយត្រូវចំណាយថវិការហូតដល់៣៨០០លានដុល្លារអាមរិក ខណៈផ្លូវនេះមានចម្ងាយខ្លីជាងផ្លូវល្បឿនលឿនភ្នំពេញ ព្រះសីហនុ៕

ដោយៈស៊ីវ ម៉េង

ភ្នំពេញៈ នៅពេលអ្នកដើរទៅចូលទៅកាន់ផ្សារទំនើប The Bridge អ្នកអាចមានអារម្មណ៍៍ភ័យខ្លាច ហើយបើអ្នកខ្លាចខ្មោចលងវិញ អ្នកអាចនឹងព្រឺក្បាល ដោយសារភាពស្ងប់ស្ងាត់ នៅក្នុងបរិវេវណផ្សារទំនើប The Bridge ដែលមានកំពស់បីជាន់ និងស្ថិតនៅខាងក្រោមអាគារខុនដូ កំពស់ ៤៥ជាន់របស់គំរោង The Bridge។

ស្តង់ផ្សារទំនើបដែលមានកំពស់ពីរជាន់ គឺជាន់ទី១ ទី២ និងជាន់ទី៣នេះ ស្តង់ទាំងអស់ត្រូវបានបិទ លើកលែងតែបន្ទប់ផ្នែកខាងមុខ ដែលបានជួល និងបើកដំណើរការដោយជនជាតិចិនភាគច្រើន និងនៅចំហៀងផ្នែក
ខាងលិចជាហាងកាហ្វេ ដែលបានបើកដំណើរការមកដល់សព្វថ្ងៃនេះ។

បុគ្គលិកហាងទូរស័ព្ទ Hauwei ជាហាងតែមួយគត់ដដែលបានបើកដំណើរការ និងត្រូវបានសាកសួរកាលពីសប្តាហ៍មុន បាននិយាយឲ្យដឹងថា ផ្សារនេះមិនដំណើរការនោះទេ លើកលែងតែផ្នែកខាងមុខ ហើយស្តង់ទាំងអស់នៅផ្នែកខាងក្នុង បានបិទទ្វារអស់ជាយូរមកហើយ។

និយាយបណ្តើរលើកដៃចង្អុលទៅកាន់ជណ្តើរយន្តបណ្តើរ យុវតីដែលជាបុគ្គលិកហាងលក់ទូរស័ព្ទបានបន្តថា សូម្បីតែជណ្តើេយន្តក៏បានបិទ លែងដំណើរការជាយូតរមកហើយ ហើយគ្មានអ្នកណាហ៊ានដើរឡើងទៅលើទេ ព្រោះមានសភាពងងឹតគួរឲ្យខ្លាច។

អគារលំនៅដ្ឋាន និងពាណិជ្ជកម្មប្រភេទ SOHO (ការិយាល័័យបូកខុនដូ) ត្រូវបានវិនិយោគរួមគ្នារវាងក្រុមហ៊ុន World Bridge Land Group និងក្រុមហ៊ុន Oxley Holding ដែលជាក្រុមហ៊ុនលំដាប់យក្សមួយ របស់ប្រទេសសឹង្ហបុរី ដែលបានបោះទុនវិនិយោគ ប្រមាណ៣០០លានដុល្លារអាមេរិក។

ការផ្គត់ផ្គង់ផ្សារទំនើបនៅរាជធានីភ្នំពេញ បានកើនដល់ទំហំប្រមាណ​៨០០,០០០ម៉ែត្រការ៉េហើយ។ កំនើននេះ បានធ្វើឲ្យការប្រកួតប្រជែងកើនឡើង ជាលទ្ឋផលផ្សារទំនើបស្តង់ដា ក្នុងស្រុកមួយចំនូនបានបិទទ្វារ ដូចជាផ្សារសុវណ្ណា ផ្សារទំនើប Paragorn, City Mall បានបិទផ្នែកភាគច្រើន ខណៈផ្សារមួយចំនួនទៀត បានបិទទ្វារ និងប្រឈមការបិទទ្វារផងដែរ។

ជាមួយគ្នានេះ ផ្សារទំនើបក្នុងគំរោង The Bridge ក៏ហាក់មិនបានសិក្សាពីស្តង់ដាច្បាស់លាស់ និងមិនបំពេញបានតាមតម្រូវការ រសនិយម និងស្តង់ដានៃការលំហែរ ឲ្យបានគ្រប់គ្រាន់តាមស្តង់ដាអន្តរជាតិនៅឡើយ។

ងាកទៅកាន់គំរោងដ៏ខ្ពស់ស្កឹមស្កៃ ដែលបានពន្យាពេលសាងសង់យឺតជាង១ឆ្នាំ គឺគំរោង The Peak កំពស់ ៥៥ជាន់ និងចំណាយទុនវិនិយោគ៥៥០លានដុល្លារ និងវិនិយោគដោយក្រុមហ៊ុនសាងសង់គំរោង The Bridge ផងដែរនោះ ក៏កំពុងដោះស្រាយបញ្ហាសំណង​ដល់អ្នកទិញខុនដូ ស្តង់ក្នុងផ្សារទំនើប និងអ្នកទិញការិយាល័័យនៅក្នុងគំរោងនេះផងដែរ។

The Capital ដែលជាក្រុមហ៊ុនគ្រប់គ្រងផ្សារទំនើប លំដាប់អន្តរជាតិរបស់សឹង្ហបុរី បានដកខ្លួនចេញពីគំរោងនេះ និងជំនួសមកវិញដោយក្រុមហ៊ុន Blue Bell Group ដែលមានការគ្រប់គ្រងជាលក្ខណៈគ្រួសារទៅវិញ។

អ្នកជំនាញផ្នែកផ្សារទំនើបលំដាប់អន្តរជាតិ ដែលគ្រាន់តែប្រាប់ខ្លួនឯងងថា ឈ្មោះ Sunny បានលើកឡើងថា ផ្សារទំនើបក្នុងគំរោង The PeAk អាចនឹងពិបាកទទួលបានជោគជ័យផងដែរ ដោយសារបញ្ហាទី១ គឺចំណតមិនគ្រប់គ្រាន់ និងតូចចង្អៀតនៅផ្នែកខាងមុខ ទី២ ដោយសារស្តង់របស់ផ្សារនេះ ត្រូវបានលក់ឲ្យអតិថិជន ដែលធ្វើឲ្យក្រុមហ៊ុនមកគ្រប់គ្រងផ្សារទំនើបនេះ ពិបាកនឹងធ្វើការជាមួយពួកគេ ព្រោះអ្នកទិញចង់មានភាពឯករាជ្យ លើការរៀបចំស្តង់របស់ពួកគេ។

បញ្ហាប្រឈមថ្មីមួយទៀតរបស់ The PeAk គឺក្រុមហ៊ិន EAON Mall Group បាននិងកំពុងចំណាយទុនប្រមាណ៦០លានដុល្លារ ដើម្បីកែលំអរ និងពង្រីកកន្លែងលក់រាយរបស់ពួកគេ នៅផ្សារទំនើប AEON Mall1 ដែលនៅក្បែរនោះផងដែរ។

ជាមួយនឹងបញ្ហាជម្លោះជាមួយក្រុមហ៊ុនសាងសង់ គំរោង The PeAk បានពន្យាពេលបញ្ចប់រយៈពេលប្រមាណ២ឆ្នាំ ដែលរហូតមកទល់ពេលនេះ ការសាងសង់មានសភាពយឺតៗ និងអាចចំណាយពេលកាន់តែយូរថែមទៀត ដែលល្បឿននៃការរៀបចំនេះ អាចនឹងបញ្ចប់នៅចុងឆ្នាំនេះ ឬបើអាច ពន្យាពេលរហូតដល់ឆ្នាំ២០២៣។

អ្នកឧកញ៉ាសៀ រិទ្ធី អគ្គនាយកក្រុមហ៊ុន World Bridge Land Group បានមានប្រសាសន៍ឲ្យដឹងកាលពីឆ្នាំមុនថា គំរោង The PeAk នឹងបញ្ចប់តាមផែនការដែលបានគ្រោងទុក ប៉ុន្តែជាលទ្ឋផលគំរោងនេះ មិនបានបញ្ចប់តាមការលើកឡើងរបស់លោកឡើយ។

លោកបាននិយាយជាមួយស្ថាបនិក និងអគ្គនាយកគេហទំព័រ Propertyarea.asia នាពេលកន្លងមកថា លោកមិនមានភាពចាំបាច់ ត្រូវនិយាយជាមួយសារព៌តមានក្នុងស្រុកទេ ព្រោះវាអាចធ្វើឲ្យទម្លាក់ស្តង់ដារបស់លោក។

លោកបន្តថា “សារព៌តមានអន្តរជាតិ លោកស្វាគមន៍ ព្រោះវាជួយលើកកំពស់កេរ្ត៍ឈ្មោះរបស់លោក ប៉ុន្តែការនិយាយជាមួយអ្នកសារព៌តមានក្នុងស្រុកគឺទាញទម្លាក់រូបភាពរបស់លោកទៅវិញ”។

អ្នកស្រីអាន សុធីតា អគ្គនាយិកកាក្រុមហ៊ុន PropNex Cambodia ធ្លាប់បានលើកឡើងថា ការវិនិយោគផ្សារទំនើប ផ្តល់ផលចំណេញពីការវិនិយោគលឿន ប៉ុន្តែអ្នកវិនិយោគចាំបាច់ត្រូវធ្វើការកែលំអរ រៀងរាល់បីទៅ៥ឆ្នាំម្តង ដើម្បីធ្វើឲ្យមានភាពទាន់សម័យ និងទាក់ទាញ។

អ្នកស្រីបន្តថា “ទោះជាយ៉ាងណាបច្ចុប្បន្នទំហំផ្សារទំនើប បានកើនឡើងលើសតម្រូវការរួចទៅហើយ ដែលធ្វើឲ្យទំហំនៃការផ្គត់ផ្គង់បានលើសពីអ្វី ដែលទីផ្សារអាចស្រូបយកបានហើយ”។

អ្នកជំនាញអចលនទ្រព្យជើងចាស់មួយរូប ដែលសុំមិនបញ្ចេញឈ្មោះបាននិយាយថា ផ្សារទំនើបនៅកម្ពុជាភាគច្រើន មិនមានស្តង់ដានោះទេ ហើ​យចរន្តនៃការប្រកួតប្រជែងកំពុងកើនឡើង ហេតុនេះផ្សារទំនើបទំហំតូចៗឬកម្រិតមធ្យម គួរផ្តោតលើការលក់ផលិតផលអ្វីមួយផ្តាច់មុខ ដូចជាសម្លៀកបំពាក់ ឬគ្រឿងអេឡិកត្រូនិកជាដើម៕

ដោយៈសុផារី

ភ្នំពេញៈ ស្របពេលប្រទេសកម្ពុជាមានការអភិវឌ្ឍ ហើយទីក្រុងភ្នំ​ពេ​ញកាន់តែរីកធំឡើងៗ តម្រូវការលំនៅដ្ឋាន រួមមាន បុរីនិងខុនដូ ក៏កំពុងតែកើនឡើងខ្ពស់ខ្លាំងផងដែរ ដែលធ្វើឲ្យតម្រូវការខុនដូ នឹងក្លាយជាតម្រូវការប្រជាជនកម្ពុជាចម្បង របស់ប្រជាជនកម្ពុជានាពេលអនាគត។

អ្នកជំនាញពីទីផ្សារខុនដូបានលើកឡើងថា សម្រាប់ប្រជាពលរដ្ឋកម្ពុជា ដែលមានចំណូលមធ្យម នឺងមាននិន្នាការទិញផ្ទះរស់នៅតែម្ដង ដោយ​សារគាត់នឹងទទួលបានទាំងដី ទាំងផ្ទះ។ ប៉ុន្តែនៅពេលដែលគាត់ចង់បានផ្ទះ ផ្ទះនៅក្នុងក្រុងមានតម្លៃថ្លៃទៅហើយ។ ដូច្នេះប្រសិនបើគាត់ចង់រស់នៅក្នុងក្រុង គាត់ត្រូវដូរនិន្នាការមករស់នៅខុនដូ។

អ្នកជំនាញដដែលបានលើកឡើងថា “អញ្ចឹងតម្រូវការនៅពេលអនាគត ខ្ញុំជឿថាបើទោះបីជាពេលបច្ចុប្បន្នខុនដូ មិនមែនជាតម្រូវការធំ នៅក្នុងប្រទេសកម្ពុជាយើងក្តី ប៉ុន្តែនាពេលអនាគតខុនដូ នឹងក្លាយទៅជាតម្រូវការខ្ពស់ នៅក្នុងប្រទេសកម្ពុជាយើង”។

តម្រូវការរបស់ប្រជាពលរដ្ឋយើង គឺត្រូវការខុនដូនាពេលអនាគត ដោយសារប្រទេសកាន់តែរីកចម្រើន ទីក្រុងកាន់តែធំ ការកកស្ទះកាន់តែខ្លាំង មនុស្សយើងមិនចង់ខាតបង់ពេលវេលា ធ្វើដំណើរឆ្ងាយជាយក្រុងមកកាន់រាជធានីភ្នំពេញ ចំណាយពេលមួយម៉ោងពីរម៉ោង។

យោងតាមការសិក្សារបស់ក្រុមហ៊ុន Urban Living Solution បានរកឃើញថា នៅឆ្នាំ២០៣០ប្រជាពលរដ្ឋរស់នៅរាជធានីភ្នំពេញ នឹងកើនឡើង​ដល់៤,៥ទៅ៥លាននាក់ ដែលធ្វើឲ្យមានការប្រែប្រួលលើផ្នែកសំខាន់ៗជាច្រើនរួមមាន ទី១ កំណើនតម្លៃអចលនទ្រព្យនឹងកើនខ្ពស់ នៅក្នុងទីក្រុង ដែលអ្នកមានចំណូលមធ្យម ពិបាកស្វែងរកលទ្ឋភាពទិញផ្ទះក្នុងទីក្រុង ទី២ កំណើននៃការកកស្ទះចរាចរណ៍ នឹងកើនឡើង ដែលធ្វើឲ្យការចំណាយពេលលើការធ្វើដំណើរកាន់តែយូរ។

ទី៣ ការរីកចម្រើនបច្ចេកវិទ្យា នឹងធ្វើឲ្យគុណភាពជី​វិតប្រសើរឡើង ពិសេសទីផ្សារខុនដូនឹងមានតម្រូវការខ្ពស់ ដោយសារខុនដូមានសេវាកម្មពេញលេញ ដែលផ្តល់ភាពងាយស្រួលក្នុងការរស់នៅ។

ជាមួយគ្នានេះ លោកច្រឹក សុខនីម ប្រធានសមាគមអ្នកវាយតម្លៃនិងភ្នាក់ងារអចលវត្ថុកម្ពុជា បានមានប្រសាសន៍លើកទឹកចិត្ដ ឱ្យអ្នកវិនិយោគផ្ទះឬខុនដូ ដោយសារផ្ទះនិងខុនដូ ផ្តល់នូវលំហូរសាច់ប្រាក់ប្រចាំខែ ដោយលោកបានណែនាំថា ប្រសិនបើយើងមិននៅ យើងអាចជួយបាន ដោយមិនមានការប្រឈមមុខនឹងហានិភ័យធំ កុំឱ្យការវិនិយោគលើអចលនទ្រព្យជារឿងដែលធ្វើឱ្យប៉ះពាល់ដល់បញ្ហាជីវភាព។

លោកថា “អត្ថប្រយោជន៍នៃការរង់នៅខុនដូ មានដូចជាការរស់នៅក្នុងសហគមន៍ប្រជាជន ដែលមានជីវភាពប្រហាក់ប្រហែលគ្នា បរិយាកាសល្អ ទីធ្លាទូលាយ មានអាងហែលទឹក កន្លែងហាត់ប្រាណ និងផ្តល់ភាពងាយស្រួលផ្សេងៗ ជាដើម”។

ជាមួយគ្នានេះ អ្នកស្រី អាន សុធីតា អគ្គនាយិកាក្រុមហ៊ុន PropNex Cambodia យល់ឃើញថា និន្នាការរបស់ប្រជាជនខ្មែរ ចាប់ផ្ដើមវិនិយោគទៅលើខុនដូច្រើន។

លោកស្រីបន្តថា ដោយសារឥឡូវទីផ្សារខុនដូ ផ្ដោតទៅលើប្រជាជនខ្មែរ ដូច្នេះអ្នកអភិវឌ្ឍន៍ចាប់ផ្តើម រៀបចំផែនការឱ្យអតិថិជនខ្មែរនិងវិនិយោគិ​នខ្មែរទិញខុនដូបាន មានដូចជា ការបង់ប្រាក់ដែលមានភាពងាយស្រួល ការជួយសម្រួលកម្ចីពីធនាគារ អញ្ចឹងឥឡូវអ្នកវិនិយោគ ទៅលើខុនដូអាចទទួលបាននូវកម្ចីពីធនាគារ ដែលវាខុសពីកាលពីរបីឆ្នាំមុន ដែលខុនដូមិនមានកម្ចីពីធនាគារទេ។

មូលហេតុផ្សេងៗទៀតមាន ដូចជា ទីក្រុងនឹងត្រូវពង្រីក ការរស់នៅក្នុងខុនដូមានភាពងាយស្រួល ដោយសារខុនដូភាគច្រើន មានទីតាំងនៅក្នុងក្រុង ទំនើប តម្លៃសមរម្យ ដែលយើងអាចរកទិញបាន ក្នុងចន្លោះតម្លៃ៥ ម៉ឺនទៅ ១៥ម៉ឺនសម្រាប់ខុនដូមួយបន្ទប់ ដែលតម្លៃនេះមិនអាចស្វែងរកផ្ទះលំនៅដ្ឋានជាប់ដីក្នុងក្រុងបានទេ។

ការចេញចូលមានភាពងាយស្រួល មានបរិក្ខារស់នៅសព្វមុខនៅក្នុងខុនដូ មានភាពងាយស្រួលថែទាំ។ បើប្រៀបធៀបខុនដូជាមួយនឹងផ្ទាល់ដី គឺវាមានការចំណាយ ក្នុងការថែទាំតិចជាង មានភាពងាយស្រួលជាពិសេសសម្រាប់គ្រួសារថ្មី។

ជាមួយគ្នានេះ លោកខន គង្គា អគ្គនាយកក្រុមហ៊ុនអចលនទ្រព្យ ERA ក៏មានប្រសាសន៍ថា ប្រជាជនកម្ពុជាចាប់ផ្តើម មានការពេញនិយមទាំងការរស់នៅនិងការវិនិយោគ ដោយសារគាត់សម្លឹងមើលផលចំណេញបានពីការវិនិយោគលើខុនដូ និងភាពងាយស្រួលក្នុងការរស់នៅ ព្រោះខុនដូភាគច្រើន ត្រូវបានសាងសង់ក្នុងទីតាំងល្អ ដែលបានជួយសម្រួលនិងផ្តល់ភាពដល់ការធ្វើដំណើរ ព្រមទាំងមាន Facility amenity ដែលផ្តល់ភាពងាយស្រួលដល់ការរស់នៅ៕