លោកឡេននី វង់ ជាប់ឆ្នោតជាប្រធានសាខាសភាពាណិជ្ជកម្មប្រចាំទីក្រុងតូរ៉ុនតូ ប្រទេសកាណាដា

ដោយៈគង់ ម៉ាលីនណា
ភ្នំពេញៈ ជាលទ្ឋផលបន្ទាប់ពីការបោះឆ្នោតជ្រើសរើស និងផ្តល់សេចក្តីទុកចិត្តពីអង្គបោះឆ្នោត លោកឡេននី វង់បានជាប់ឆ្នោតជាប្រធានសាខា សភាពាណិជ្ជកម្មប្រចាំទីក្រុងតូរ៉ុនតូ ប្រទេសកាណាដា។

លោក ឡេននី វង់ ជាជនជាតិខ្មែរ-កាណាដា ជាអគ្គនាយកក្រុមហ៊ុន Ocean Packers Inc ( Canada), TG Fishery Holdings Corporation ( Viet Nam) និង Canson Canada Investments (Canada) Ltd បានជាប់ឆ្នោតជាប្រធាន និង៨រូបផ្សេងទៀត ជាប់ជាសមាជិកការិយាល័យ តំណាងសភាពាណិជ្ជកម្មកម្ពុជា នៅទីក្រុងតូរ៉ុនតូ ខេត្តអុនតារីយ៉ូ ប្រទេសកាណាដា សម្រាប់អាណត្តិទី១ លើកទី១។

លោកម៉ៅ ថូរ៉ា រដ្ឋលេខាធិការក្រសួងពាណិជ្ជកម្ម និងជាប្រធានគណៈកម្មការរៀបចំការបោះឆ្នោត បង្កើតការិយាល័យតំណាងសភាពាណិជ្ជកម្មកម្ពុជានៅទីក្រុងតូរ៉ុនតូ ខេត្តអុនតារីយ៉ូ ប្រទេសកាណាដា បានចូលរួមជាគណៈអធិបតីក្នុងពិធីបោះឆ្នោតជ្រើសរើស ប្រធាន និងសមាជិក ការិយាល័យតំណាងសភាពាណិជ្ជកម្មកម្ពុជា នៅទីក្រុងតូរ៉ុនតូ តាមប្រព័ន្ធវីដេអូ។

លោកបន្តថា កម្មវិធីបោះឆ្នោតនេះ គឺដើម្បីជ្រើសរើសបេក្ខភាពចំនួន ៩រូប ដែលនឹងត្រូវក្លាយទៅជាសមាជិក ការិយាល័យតំណាងសភាពាណិជ្ជកម្មកម្ពុជានៅទីក្រុងតូរ៉ុនតូ ខេត្តអុនតារីយ៉ូ ប្រទេសកាណាដា ហើយក៏ជាការិយាល័យតំណាង ឱ្យសភាពាណិជ្ជកម្មកម្ពុជាទី១ ដែលមានស្នាក់ការនៅក្រៅប្រទេសផងដែរ។

លោកបន្តថា “ការិយាល័យតំណាងសភាពាណិជ្ជកម្មកម្ពុជា នៅទីក្រុងតូរ៉ុនតូនេះ នឹងដើរតួនាទីយ៉ាងសំខាន់ នៅក្នុងការសម្របសម្រួលកិច្ចពាណិជ្ជកម្មរវាងកម្ពុជា និងកាណាដា ក៏ដូចជាជួយជំរុញ និងទាក់ទាញវិនិយោគិនកាណាដា មកវិនិយោគនៅក្នុងប្រទេសកម្ពុជា ឱ្យកាន់តែច្រើនឡើង”៕

ចង់វិនិយោគដីឡូត៏លំហែត្រូវមានលក្ខណៈសម្បត្តិអ្វីខ្លះ?

ដោយៈវឌ្ឍនៈ

ភ្នំពេញៈ ដីឡូត៏ និងផ្ទះលំហែកាយគឺជាផ្នែកមួយនេះ នៃវិស័យអច​ល​នទ្រព្យកម្ពុជា និងមានការវិនិយោគជាបន្តបន្ទាប់ ពីវិនិយោគិនក្នុងនិងក្រៅប្រទេស តែអ្នកអភិវឌ្ឍន៍ខ្លះក៏ជោគជ័យ ខ្លះទៀតក៏មិនជោគជ័យ ។

តើហតុអ្វីត្រូវវិនិយោគលើដីឡូត៏លំហែកាយ និងផ្ទះលំហែកាយនៅក្នុងប្រទេសកម្ពុជា និងត្រូវត្រៀមលក្ខណៈយ៉ាងណា ដើម្បីទទួលបានជោគ​ជ័យ ? ។

លោក Cooler Tan ម្ចាស់គម្រោងវិនិយោគលើដីឡូត៏លំហែកាយបូកគោលែននៅក្នុងខេត្តកំពតបានលើកឡើងថា តាមពិតទៅលោកគឺជាអ្នកវិនិយោគលើវិស័យផ្សេងទេ កាលពីមុននេះបន្តិច ប៉ុន្តែដោយសំលឹងមើលឃើញថា វិស័យអចលនទ្រព្យ កំពុងតែមានការពេញនិយម និងមានតម្រូវការខ្ពស់ ហើយវិស័យនេះដែរ ក៏បានចូលរួមចំណែកធំក្នុងសេដ្ឋកិច្ច លោកក៏បានសម្រេចចិត្ត ក្នុងការបណ្ដាក់ទុនវិនិយោគ លើវិស័យអចលនទ្រព្យនិងបានជ្រើសរើស យកការអភិវឌ្ឍលើដីឡូត៏លំហែកាយនៅក្នុងខេត្តកំពត។

លោកបន្តថា “អ្នកដែលចង់វិនិយោគដីឡូត៏ផ្នែកលំហែនេះ គឺត្រូវមានទុនគ្រប់គ្រាន់ ដោយមួយចំណែកត្រូវរកទិញដីឱ្យបានសិន ពេលដែលទិញបានហើយ គឺត្រូវការទុនមួយចំណែកទៀត សម្រាប់ទុកអភិវឌ្ឍន៍ និងត្រូវមានទុនមួយកញ្ចប់ទៀត សម្រាប់ទុកទិញដីអភិវឌ្ឍន៍គម្រោងបន្តបន្ទាប់”។

លោកបន្តថា “ទោះបីជាយើងមានទុនទាំងអស់នេះហើយ ក៏មិនប្រាកដថាអាចទទួលបានជោគជ័យនោះទេ ។ ជាក់ស្ដែង នៅក្នុងប្រទេសកម្ពុជាអ្នកមានធនធាន និងមានដីច្រើនណាស់ ដោយអ្នកខ្លះមិនធ្វើខាងផ្នែកលំហែនេះទេ ហើយអ្នកខ្លះទៀត ធ្វើដែរតែក៏មិនទទួលបានជោគជ័យ អ្វីដែលសំខាន់គឺផ្នត់គំនិត ពោលគឺត្រូវមានឆន្ទៈខ្ពស់ក្នុងការអភិវឌ្ឍ”។

លោក Cooler Tan បានបន្តទៀតថា សម្រាប់គម្រោងបូកគោលែនដ៏របស់លោក ដែលទទួលបានការគាំទ្រ ពីអតិថិជនក្នុងប្រទេសកម្ពុជា គឺបានសិក្សាស្វែងយល់ ពីតម្រូវការទីផ្សាររបស់អតិថិជន ធ្វើយ៉ាងណាឱ្យអតិថិជនស្រលាញ់ពេញចិត្តនូវគម្រោងនីមួយៗ ដូចជា ការគូប្លង់ រចនាគម្រោង ទាក់ទាញអតិថិជន ។ ក្រៅពីនេះ ដើម្បីឱ្យគម្រោងទទួលបានជោគជ័យ ត្រូវអ្នកដែលមានទីផ្សារ រកអ្នកដែលមានចំណេះដឹងផ្នែកទីផ្សារ មកលក់គម្រោងរបស់យើង ។

លោកបន្ថែមថា សម្រាប់រូបលោកដែលជាអ្នកអភិវឌ្ឍន៍ គម្រោងលំហែបូកគោលែនដ៍ មិនត្រឹមតែគូសប្លង់ រចនាគម្រោងបានស្អាត និងរកទីផ្សារហើយ គ្រប់គ្រាន់ទេ តែលោកត្រូវអភិវឌ្ឍន៍គម្រោងនោះ ឱ្យបានស្អាតជាងគេ ទាក់ទាញជាងគេ ។ គម្រោងដែលជោគជ័យ មិនមែនជាគម្រោងដែលលក់ឱ្យអតិថិជនដាច់អស់លឿន ហើយគ្រប់គ្រាន់តែទេ តែធ្វើយ៉ាងណាទាក់ទាញឱ្យអតិថិជនមកអភិវឌ្ឍន៍ មកសង់ផ្ទះ និងមករស់នៅ ។

លោកថា “យើងមានផែនការអភិវឌ្ឍឱ្យស្អាត ល្អទាក់ទាញ និងធ្វើឱ្យ​លឿន ដើម្បិឱ្យអតិថិជនដែលចង់សង់ផ្ទះ នៅក្នុងគម្រោងដែលបានទិញអាចសង់បានភ្លាមៗលឿនរហ័ស”។ លោកបន្តថា “គម្រោងខ្លះអភិវឌ្ឍន៍ពីរបីឆ្នាំហើយ តែទោះចង់មកអភិវឌ្ឍន៍ក៏មិនអាចធ្វើទៅបាន ខ្វះប្រព័ន្ធទឹក ភ្លើង ផ្លូវជាដើម តែសម្រាប់គម្រោងរបស់យើង អតិថិជនទិញហើយ មិនឱ្យរង់ចាំយូរនោះទេ ”។

លោកបញ្ជាក់ថា ដីដែលដែលមានគុណតម្លៃគឺដី ដែលមានមនុស្សរស់នៅច្រើន ហើយដីដែលកាន់តែមានគុណតម្លៃទៅទៀតនោះ គឺគម្រោងដែលទាក់ទាញអ្នកមានៗ កាន់តែច្រើនទៅរស់នៅ។ ជាក់ស្ដែងដីនៅតំបន់បឹងកេងកងមួយម៉ែត្រការ៉េ ឡើងដល់៥០០០ដុល្លារអាមេរិក និងខ្ពស់ជាងនេះទៅទៀត ពីព្រោះតំបន់បឹងកេងកង១ ជាតំបន់ដែលសំបូរទៅដោយអ្នកមានរស់នៅ។

លោក Cooler បានបញ្ជាក់ថា សម្រាប់វិស័យដីឡូត៏លំហែ លោកមើលឃើញថា មិនទាន់មានការប្រកួតប្រជែងគ្នាខ្លាំងនោះទេ បើធៀបជា​មួយនឹងការអភិវឌ្ឍលំនៅឋាន។ ប៉ុន្តែលោកជឿថា ចាប់ពីឆ្នាំ២០២៣ឡើងវិញ ទីផ្សារដីឡូត៏លំហែ នឹងកាន់តែមានការប្រកួតប្រជែងគ្នាខ្លាំងឡើង ។ អ្វីដែលអ្នកទិញដីឡូត៏ត្រូវប្រយ័ត្ន និងពិចារណាមុននឹងទិញដីឡូត៏លំហែ គឺត្រូវមើលថា តើគម្រោងនោះធ្វើពិតប្រាកដឬអត់ គម្រោងអភិវឌ្ឍន៍ពិតដែរទេ ។បើសិនជាត្រឹមទិញហើយទុកចោល ឬត្រូវប្រើពេលវេលាបួនដប់ឆ្នាំក្រោយ​ទើបអាចមកចូលនៅបាន វាអត់ន័យនោះទេ៕

ជប៉ុនបោះទុនវិនិយោគដល់ទៅ ៧២ពាន់លានដុល្លារលើគម្រោងផ្លូវដែកល្បឿនលឿន

ដោយៈសុខុម

តូក្យូ: ប្រទេសជប៉ុន ដែលជាសេដ្ឋកិច្ចធំបំផុតទី៣ របស់ពិភពលោកបន្ទាប់មហាយក្សចិន ដែលជាសេដ្ឋកិច្ចធំបំផុតលេខ២ បានបោះទុនវិនិយោ​គរហូតដល់ទៅ៧២ពាន់លានដុល្លារអាមេរិក លើគម្រោងផ្លូវដែកល្បឿនលឿន Chuo Shinkansen។

យោងតាមសារព័តមាន CNN ចុះផ្សាយកាលពីថ្ងៃច័ន្ទ ទី៣០ ខែឧសភាបានឱ្យដឹងថា ការវិនិយោគយ៉ាងច្រើនសន្ធឹកសន្ធាប់នេះ បានធ្វើឡើង ក្រោយពីចំណាយពេលជាង៤០ឆ្នាំ នៅក្នុងការអភិវឌ្ឍរថភ្លើងល្បឿនលឿន (Maglev) ដែលអាចរត់បានក្នុងល្បឿន អតិបរមា៦០០គីឡូម៉ែត្រក្នុងមួយម៉ោង។

គម្រោងផ្លូវដែកល្បឿនលឿន ប្រវែង២៨៦គីឡូម៉ែត្រនេះ នឹងជួយកាត់បន្ថយពេលធ្វើដំណើរបានច្រើនគួរឱ្យភ្ញាក់ផ្អើល ដោយការធ្វើដំណើរពីទីក្រុងតូក្យូ ឆ្ពោះទៅទីក្រុង Nagoya គឺចំណាយពេលត្រឹមតែ៤០នាទីប៉ុណ្ណោះ។ ហើយនៅទីបំផុតការធ្វើដំណើរពីក្រុងតូក្យូ ឆ្ពោះទៅក្រុង Osaka ក្នុងចម្ងាយផ្លូវប្រមាណ៥០០គីឡូម៉ែត្រ នឹងត្រូវប្រើពេលត្រឹមតែ៦៧នាទីប៉ុណ្ណោះ។

ការកសាងគម្រោងផ្លូវដែកនេះ បានចាប់ផ្ដើមក្នុងឆ្នាំ២០១៤ ហើយដំបូងឡើយគេរំពឹងថា នឹងបញ្ចប់ជាស្ថាពរនៅត្រឹមឆ្នាំ២០២៧ ប៉ុន្តែដោយ​សារមានបញ្ហា ក្នុងការទទួលបានការអនុញ្ញាត សម្រាប់កសាងមួយកំណាត់នៃផ្លូវដែកល្បឿនលឿននេះ បានធ្វើឱ្យកាលបរិច្ឆេទ សម្ពោធដាក់ឱ្យប្រើប្រា​ស់​ជាផ្លូវការ ស្ថិតក្នុងភាពស្រពេចស្រពិលរហូតមកទល់ពេលនេះ។

ការពន្យារពេល និងការកើនឡើងខ្លាំងនូវការចំណាយ ក្នុងគម្រោងនេះបានធ្វើឱ្យមជ្ឈដ្ឋានមហាជន ចោទសួរអំពីតម្លៃសេដ្ឋកិច្ច ដែលគម្រោងនេះនឹងផ្ដល់ឱ្យត្រលប់មកវិញ៕ CNN៕

អ្នកជំនាញដីធ្លីមកពីប្រទេសថៃ និងវៀតណាបង្ហាញសញ្ញាល្អក្នុងការវិនិយោគនៅកម្ពុជា

ដោយៈវឌ្ឍនៈ

ភ្នំពេញៈ អ្នកជំនាញ នៃវិស័យដីធ្លី២រូបមកពីប្រទេសថៃ និងវៀតណាមបានមកដល់កម្ពុជា និងបានបង្ហាញពីសញ្ញាល្អ នៃការវិនិយោគអចលនទ្រព្យនៅកម្ពុជាជាពិសេសទៅលើវិស័យដីធ្លី ក្នុងពេលបច្ចុប្បនិងអនាគត។

នៅក្នុងកិច្ចសម្ភាសន៍មួយ កាលចុងសប្ដាហ៍កន្លងទៅនេះ លោកឡុង ចាហ៊ង តំណាងក្រុមហ៊ុន KW Vietnam បានមានប្រសាសន៍ក្នុងគ្រាដែលលោកមកដល់កម្ពុជាដំបូង ដោយលោកបានមានប្រសាសន៍ថា លោកពិតជាមានអារម្មណ៍ភ្ញាក់ផ្អើល មិននឹកស្មានថាកម្ពុជា មានការអភិវឌ្ឍបែបនេះ ហើយលោកក៏បានមើលឃើញ ពីឱកាសនៃការវិនិយោគនៅក្នុងប្រទេសកម្ពុជាច្រើនផងដែរ ។

លោកបន្តថា “តាមរយៈការជជែកជាមួយមិត្តភក្ដិកម្ពុជា ឃើញថាកម្ពុជាពិតជាមានសក្ដានុពល និងទាក់ទាញខ្លាំង ក្នុងនោះដែរច្បាប់វិនិយោគថ្មីរបស់កម្ពុជា អាចធ្វើឱ្យវិនិយោគិនបរទេស មានទំនុកកាន់តែខ្លាំងទៅលើការវិនិយោគអចលនទ្រព្យ”។

លោកឡុង ចាហ៊ងបានបន្តថា ក្រៅពីនេះស្ថេរភាពនៃសេដ្ឋកិច្ច ក៏ជាកត្តាសំខាន់មួយ ក្នុងការទាក់ទាញការបណ្ដាក់ទុនវិនិយោគពីប្រទេស ជាមួយកំលាំងពលកម្ម ក្នុងស្រុកក៏មានសក្ដានុពល ខ្ពស់បន្ថែមទៀតនោះនឹងជំរុញឱ្យកម្ពុជា មានកំណើនសេដ្ឋកិច្ចល្អប្រសើរ ក្នុងរយៈពេលពីរទៅបីឆ្នាំខាងមុខនេះ ។

លោកជឿជាក់ថា “កម្ពុជានឹងទទួលបាននូវការវិនិយោគ លើវិស័យដីធ្លីនិងអចលនទ្រព្យទាំងមូល ពីវិនិយោគិនមកពីគ្រប់ទិសទី ជាពិសេសវិនិយោ​គិនមកពីប្រទេសសមាជិកអាស៊ាន”។

ដោយឡែកអ្នកជំនាញដីធ្លីមកពីប្រទេសថៃ លោក Vit Kultanvipas តំណាង KW Thailand ក៏បានឱ្យដឹងថា កំណើនអ្នកវិនិយោគនៅក្នុងប្រទេសកម្ពុជា ជាពិសេសនៅរាជធានីភ្នំពេញ រយៈពេល១០ឆ្នាំចុងក្រោយនេះ លោកមើលឃើញថា មានកើនឡើងគួរឱ្យកត់សម្គាល់ ជាមួយនឹងកំណើន GDP ជាមធ្យម៧ភាគរយក្នុងមួយឆ្នាំ បានធ្វើឱ្យកម្ពុជាកាន់តែមានភាពទាក់ទាញ និងមានអ្នកចង់មកបណ្ដាក់ទុនវិនិយោគកាន់តែច្រើន។

លោកបន្តថា នៅពេលខាងមុខនេះ កម្ពុជានិងប្រទេសថៃ នឹងមានកិច្ចសហប្រតិបត្តិការ កាន់តែច្រើនជិតស្និទ្ធ ជាពិសេសនោះគឺការធ្វើពាណិជ្ជកម្មតាមព្រំដែនរវាងកម្ពុជា និងថៃ។ លោកបន្តថា បច្ចុប្បន្ននេះដែរ រដ្ឋាភិបាលទាំងពីរក៏បាន និងកំពុងបង្កើនទំនាក់ទំនង កាន់តែខ្លាំងថែមទៀតរួចហើយ តាមរយៈការបើកច្រកព្រំដែន ការតភ្ជាប់ផ្លូវដឹកជញ្ជូនទាំងផ្លូវគោក និងផ្លូវដែក ដើម្បីឱ្យការដឹកជញ្ជូនកាន់តែលឿន ហើយនៅពេលនោះដែរវិនិយោ​គិនបរទេស អាចនឹងចូលមកកម្ពុជាបន្ថែមទៀត ក្នុងការស្វែងរកការវិនិយោគនានាដែលមានសក្ដានុពលខ្ពស់៕

លោក ពៅ លីដា ផ្តើមជីវិតពីកូនកសិករក្លាយជាសហគ្រិនវ័យក្មេងលើវិស័យអចលនទ្រព្យជោគជ័យមួយរូប

ដោយៈ គង់ សូរិយា

ភ្នំពេញៈ ផ្តើមជីវិតពីកូនកសិករមួយរូប នៅព្រំដែនកម្ពុជា វៀតណាម មុនពេលចូលមករស់នៅ រាជធានីភ្នំពេញទាំងវ័យក្មេង លោកពៅ លីដា បានតស៊ូ ខិតខំរៀនសូត្រ រហូតក្លាយជាសហគ្រិនមួយរូប ទទួលបានជោគជ័យក្នុងវិស័យអចលនទ្រព្យ។

ចាប់កំណើតនៅស្រុកគិរីវង្ស ខេត្តតាកែវ លោកជាកូនច្បង ក្នុងចំណោ មបងប្អូន៥នាក់។ លោកបានចូលសិក្សា នៅសាលាបឋមសិក្សាសុភមង្គល មុនបន្តមកកាន់អនុ និងវិទ្យាល័យសម្តេចតេជោភ្នំពេញថ្មី ហើយបន្តសិក្សាថ្នាក់បរិញ្ញាប័ត្រនៅសាកលវិទ្យាល័យជាតិគ្រប់គ្រង។

អតីតសិស្សពូកែ
ជាកុមារ និងយុវជនមួយរូប ដែលស្រលាញ់ចូលចិត្តការសិក្សា និងអភិវឌ្ឍន៍ខ្លួនឯង លោកតែងតែជាប់ឈ្មោះជា សិស្សរៀនពូកែប្រចាំថ្នាក់ចំណាត់ថ្នាក់លេខ១~៥ តាំងពីកម្រិតបឋមសិក្សា រហូតដល់មហាវិទ្យាល័យ។

លោកបានមានប្រសាសន៍ថា “ខ្ញុំជាប់ជាសិស្សពូកែចំណាត់ថ្នាក់លេខ១ ដល់លេខ៥ជាប្រចាំ នៅពេលសិក្សានៅសាលាបឋមសិក្សា និងរហូតដល់កម្រិតមហាវិទ្យាល័យ ព្រោះការសិក្សាជាមូលដ្ឋានមិនអាចខ្វះបាន និងមានសារៈសំខាន់បំផុតសម្រាប់ជីវិតរបស់ខ្ញុំ”។

ការអភិវឌ្ឍខ្លួនឯង
ការចាប់យកឱកាស និងបង្កើតឱកាសសម្រាប់ខ្លួនឯង មានសារៈសំខាន់ណាស់សំរាប់មនុស្សម្នាក់ៗ តែឱកាសមិនចេះតែមាននោះទេ ប៉ុន្តែការសិក្សា និងធ្វើការបណ្តើរ និងធ្វើឲ្យជីវិតមានភាពរ៉ឹងមាំ និងគុណតម្លៃ។

ដោយសារខ្លួនឯង ត្រូវទទួលខុសត្រូវលើគ្រួសារ ក្នុងនាមជាកូនច្បង បានធ្វើឲ្យលោក តែងតែខិតខំប្រឹងប្រែង គិតពីការអភិវឌ្ឈខ្លួនជាប្រចាំ និងឆ្លៀតធ្វើការជាបុគ្គលិកផ្នែកទីផ្សារ នៅសាលាឯកជនមួយ មុនពេលលោកផ្លាស់ប្តូរការងារ ក្លាយជាអ្នកលក់ផលិតផលថែររក្សាសុខភាព និងបន្តបន្ទាប់ប្រឡូកក្នុងក្រុមហ៊ុនលក់ផ្សេងទៀត។

ជាមួយគ្នានេះ លោកក៏ធ្លាប់ធ្វើការងារនៅរោងចក្រ បើកហាងអាហារដោយខ្លួនឯង និងចាប់ផ្តើមប្រឡូក ក្នុងវិស័យអចលនទ្រព្យនៅឆ្នាំ២០១៦ បន្ទាប់ពីលោកមើលឃើញថា វិស័យនេះ ជាវិស័យដែលលោកស្រលាញ់ចូលចិត្ត និងអាចមានលទ្ឋភាពផ្តល់ការងារដល់យុវជនជាច្រើន។

ការចេញក្រៅប្រទេសញឹកញាប់ ជាមូលដ្ឋាននៃការក្រេបជញ្ជក់ចំណេះដឹង និងបទពិសោធន៍ បានធ្វើឲ្យគុណភាពនៃការគិត និងគុណភាពជីវិតរបស់លោក ពៅ លីដា កាន់តែមានភាពប្រសើរឡើងពីមួយថ្ងៃទៅមួយថ្ងៃ។

ជាក់ស្តែងបច្ចុប្បន្ននេះ លោកបានបង្កើតក្រុមហ៊ុនបីនៅក្នុងដៃ និងមានភាគហ៊ុនមួយចំនួនទៀតជាមួយដៃគូរ និងទទួលបានតួនាទីជាអនុប្រធានសមាគមអ្នកអភិវឌ្ឍដីឡូត៍កម្ពុជា និងជាសមាជិកទីប្រឹក្សាសភាពាណិជ្ជកម្មក្នុងខេត្តកំពង់ស្ពឺ ហើយលោកក៏ធ្លាប់ជាប្រធាន BNI Chapter ផងដែររហូតទទួលបាន បញ្ញតិគោរម្យ៍ងារ (ធម្មចន្រ្ទាជារាមេឃមហាឧបាសកពុទ្ធសាសនូបត្ថម្ភក៍) ជាទីប្រឹក្សាផ្ទាល់ របស់សម្ដេចមហាសង្ឃរាជ បួរ គ្រី។
អ្វីជាមូលដ្ឋាននៃការឈានឡើង

ការឈានឡើងរបស់បុគ្គលជោគជ័យ ឬសហគ្រិនជោគជ័យលើមុខជំនួញនានា តែងតែមានភាពខុសគ្នា អាស្រ័យលើពេលវេលា កាលៈទេសៈ និងមូលដ្ឋានគ្រួសាររបស់ខ្លួន។

ដូចគ្នានេះដែរ លោក ពៅ លីដា បានឈានពីកូនកសិករ ពីបុគ្គលិកលក់សាមញ្ញមួយរូប និងពីបុគ្គលិកផ្នែកលក់អចលនទ្រព្យឲ្យគេរយៈពេលពីរឆ្នាំ មុនពេលក្លាយជាអ្នកអភិវឌ្ឍន៍៍អចលនទ្រព្យដោយខ្លួនឯង គឺលោកបានប្រើប្រាស់នូវមូលដ្ឋានជាច្រើន ដើម្បីឈានឡើង ប៉ុន្តែចំណេះដឹង និងមូល ដ្ឋានទំនាក់ទំនង ជាអ្វីដែលលោកបានផ្តល់អាទិភាពក្នុងជីវិត។

លោកបានមានប្រសាសន៍ថា “កត្តាសំខាន់ដើម្បីឈានឡើង គឺការរៀនសូត្រជាប្រចាំ ដែលខ្ញុំបាននិងកំពុងបន្តរៀនសូត្រ មិនដែលបោះបង់នោះទេ ទាំងការអានសៀវភៅ ស្តាប់ ចូលរួមវគ្គបណ្តុះបណ្តាលក្នុង និងក្រៅប្រទេស”។ លោកបន្តថា “ជាមួយគ្នានេះ ការទំនាក់ទំនងល្អក្នុងសង្គម ក៏ជាផ្នែកមួយដែលមិនអាចខ្វះបាន និងខ្ញុំបានផ្តល់អាទិភាពទៅលើវាជាប្រចាំ ព្រោះពេលយើងមានទំនាក់ទំនងល្អ ជាមួយមនុស្សជាច្រើន យើងអាចរៀនសូត្របានច្រើន និងអាចកសាងបណ្តាញជំនួញបានដោយជោគជ័យ”។

ជាមួយនឹងការកសាងបណ្តាញ និងទំនាក់ទំនងល្អបែបនេះហើយ ទើបលោកបានកសាងឱកាស បង្កើតជំនួញជាមួយដៃគូលើគំរោងជាច្រើនទៀតផងដែរ។

មូលដ្ឋានជំនួញទទួលបានជោគជ័យ លោកពៅ លីដា ក៏ទទួលបានជោគជ័យ និងសុភមង្គលក្នុងគ្រួសារផងដែរ ដោយលោកបានរៀបការជាមួយអ្នកស្រីស្វាយ កូលាប និងទទួលបានកូនស្រីចំនួន២នាក់ជាចំណងអាពាហ៍ពិពាហ៍ផងដែរ៕

រដ្ឋាភិបាលថៃពិចារណាពន្យារពេលប្រមូល និងបញ្ចុះអត្រាពន្ធលើដីធ្លីនិងពន្ធលើសំណង់អគារ

ដោយៈសុខុម

បាងកក: ក្រសួងហិរញ្ញវត្ថុថៃ កំពុងពិចារណាលើសំណើរបស់វិស័យឯកជនដែលស្នើសុំពន្យារពេលប្រមូល និងបញ្ចុះពន្ធលើដីធ្លី និងពន្ធលើសំណង់អគារ ពីព្រោះអាជីវកម្មនានាកំពុងជួបទ្វេគ្រោះ។

អ្វីជាទ្វេរគ្រោះ? ចម្លើយគឺ ទី១ គឺវិបត្តិកូវីដ-១៩ ហើយទី២ គឺសង្គ្រាមរុស្ស៊ី-អ៊ុយក្រែន។ នេះបើយោងតាមកាសែត Bangkok Post ចុះផ្សាយនៅថ្ងៃច័ន្ទ ទី៣០ ខែឧសភា។

ក្នុងឆ្នាំ២០២០ រដ្ឋាភិបាលថៃ បានចេញវិធានការបញ្ចុះពន្ធលើដីធ្លី និងពន្ធលើសំណង់អគាររហូតដល់ទៅ៩០% ដើម្បីជួយសម្រាលបន្ទុករបស់ម្ចាស់ដី និងម្ចាស់សំណង់អគារ ដោយសារពួកគេបានទទួលរងផលប៉ះពាល់ធ្ងន់ធ្ងរពីវិបត្តិកូវីដ-១៩។

ការបញ្ចុះអត្រាពន្ធនេះ បានចូលជាធរមានចាប់ពីឆ្នាំ២០២០-២០២១ ប៉ុន្តែក្រសួងហិរញ្ញវត្ថុថៃ បានបដិសេធមិនព្រមបន្តវាឱ្យហួសពីឆ្នាំ២០២១។

លោក Arkhom Termpittayapaisith រដ្ឋមន្ត្រីក្រសួងហិរញ្ញវត្ថុថៃ បញ្ជាក់ថា លោកបានចាត់តាំងឱ្យការិយាល័យ គោលនយោបាយសារពើពន្ធ ធ្វើការវិភាគលើការប្រមូលពន្ធរួចហើយ បន្ទាប់ពីវិស័យឯកជនបានស្នើសុំពន្យារពេលប្រមូល និងបញ្ចុះអត្រាពន្ធ។

ជាធម្មតា ម្ចាស់ដីត្រូវបង់ពន្ធនេះក្នុងខែមេសា។ រដ្ឋបាលក្រុងមួយចំនួនដូចជា ក្រុងបាងកក ជាដើមបានពន្យារពេលប្រមូលពន្ធ ពីខែមេសា មកដល់ខែកក្កដា ដើម្បីបន្ធូរបន្ថយការលំបាករបស់ប្រជាជន។

ប្រភពមួយដែលសុំមិនបញ្ចេញឈ្មោះ បានទម្លាយឱ្យដឹងថា ក្រសួងហិរញ្ញវត្ថុបារម្ភខ្លាចការពន្យារពេល ឬការបញ្ចុះអត្រាពន្ធនេះ ធ្វើឱ្យប៉ះពាល់ខ្លាំងដល់ចំណូលរបស់រដ្ឋបាលមូលដ្ឋាន។

ទិន្នន័យបង្ហាញថា ការបញ្ចុះពន្ធនេះចំនួន៩០ អំឡុងឆ្នាំ២០២០-២០២១ បានធ្វើឱ្យរដ្ឋបាលមូលដ្ឋាន ខាតបង់សរុបជិត១.០០០ពាន់លានដុល្លារអាមេរិក ហើយរដ្ឋាភិបាលគ្មានលទ្ធភាពរកប្រាក់ចំណូលថ្មី ដើម្បីទូទា​ត់ការខាតបង់ទាំងនេះបានឡើយ៕ Bangkok Post៕

លោកអ៉ី ពិសិដ្ឋផ្តើមពីនិស្សិតក្រីក្រទទួលបានអាហារូបករណ៍ពីរក្នុងពេលតែមួយក្លាយជាសហគ្រិនជោគជ័យ

ដោយៈ គង់ សូរិយា

ភ្នំពេញៈ ការឈានឡើងរបស់មនុស្សម្នាក់ៗ មានភាពខុសគ្នា អាស្រ័​យ​លើពេលវេលា កាលៈទេសៈ ចំណេះដឹងជាមូលដ្ឋាន និងបទពិសោធន៍ក្នុងជីវិត។

ចាប់កំណើតនៅលើកោះ ស្ថិតនៅភូមិវត្ត ឃុំកោះច្រែង ស្រុកក្រចេះ ខេត្តក្រចេះ កុមារអ៉ឺ ពិសិដ្ឋបានធំធាត់ និងដឹងក្តី ក្នុងទឹកដីខេត្តក្រចេះ ដែលជាទឹកដីសម្បូរដោយធនធានធម្មជាតិ។

លោកជាកូនពៅ ក្នុងចំណោមបងប្អូន៧នាក់ ដែលមានស្រី២នាក់ ប្រុស៥នាក់ ក្នុងគ្រួសារជាអ្នកចំការ។

ជីវិតនិងការសិក្សា
ចម្រើនវ័យវឌ្ឍនាការ លោកអ៉ី ពិសិដ្ឋបានចាប់ផ្តើមសិក្សា នៅសាលាបឋមសិក្សាភូមិព្រែក មុនពេលផ្លោះមកសិក្សានៅអនុវិទ្យាល័យកោះច្រែង និងវិទ្យាល័យសិលាទេវីគាត ឈន់ ស្ថិតក្នុងស្រុកឆ្លូង ខេត្តក្រចេះ។

បន្ទាប់ពីបញ្ចប់ការសិក្សា ក្នុងនាមជាសិស្សពូកែនៅកម្រិតវិទ្យាល័យ លោកទទួលបានអាហារូបករណ៍ពីរ ក្នុងពេលតែមួយ គឺអាហារូបករណ៍ថ្នាក់បរិញ្ញាបត្រភាសាអង់គ្លេស និងបរិញ្ញាបត្រទីផ្សារនៅសាកលវិទ្យាល័យអាស៊ី អឺរ៉ុប។

ជាមួយនឹងនិស្ស័យស្រលាញ់ការសិក្សា និងជាប់ឈ្មោះជាសិស្សពូកែ នៅកម្រិតបឋមសិក្សា ដល់មហាវិទ្យាល័យ លោកអ៉ី ពិសិដ្ឋក៏បានទទួលអាហារូបករណ៍ទៅសិក្សា ជំនាញគ្រប់គ្រងឧស្សាហកម្ម នៅប្រទេសហ្វីលីពីន រយៈពេល២ឆ្នាំ មុនពេលលោកត្រលប់មករាជធានីភ្នំពេញវិញ និងបានចាប់ផ្តើមប្រឡូក្នុងអាជីពការងារ។

មូលដ្ឋានគ្រឹះនៃការសិក្សានេះហើយ បានធ្វើឲ្យគុណភាពជីវិតរបស់លោកកាន់តែមានភាពប្រសើរឡើង ពីមួយថ្ងៃទៅមួយថ្ងៃ និងរហូតដល់ក្លាយជាសហគ្រិនវិនិយោគអចលនទ្រព្យជោគជ័យមួយរូប។

ជីវិត និងការងារ
ផ្តើមចេញពីចំណេះដឹងជាមូលដ្ឋាន ភាពឆ្លាតវៃ និងបទពិសោធន៍៍ លោកអ៉ី ពិសិដ្ឋ បានត្រលប់ពីការសិក្សានៅក្រៅប្រទេស មកប្រឡូកការងារជាលើកដំបូងក្នុងជីវិត ដោយលោកបានបំពេញការងារ នៅគ្រឹះស្ថាន​មីក្រូហិរញ្ញវត្ថុPrime MF បន្ទាប់មកលោកបានប្តូរការងារ មកធ្វើការនៅធនាគារហ្វីលីព និងចាប់ផ្តើមនូវមុខជំនួញខ្លួនឯងជាលើកដំបូង ដោយលោកបានបើកដំណើរការនូវគ្រឹះស្ថាន “មាតាប្រតិបត្តិករឥណទាន”។

ជាអ្នកនិយមការសិក្សារៀនសូត្រ និងអភិវឌ្ឍន៍ខ្លួនជាប្រចាំ លោកអ៉ី ពិសិដ្ឋ បានបន្តឈានឡើងមួយកម្រិតទៀត ដោយលោកបានចាប់ផ្តើមប្រឡូកក្នុងវិ​ស័យអចលនទ្រព្យ ដោយដើរតួនាទីជាភ្នាក់ងារលក់ ហើយក្រោយមកលោក​បានកាត់ស្តុកអចលនទ្រព្យ ពីក្រុមហ៊ុនផ្សេងៗយកមកលក់ខ្លួនឯង ដោយទទួលបានជោគជ័យលើសការរំពឹងទុក។៉

ពីភ្នាក់ងារក្លាយជាអ្នកអភិវឌ្ឍន៍អចលនទ្រព្យ
ជាមួយនឹងបទពិសោធន៍ និងសម្លឹងមើលឃើញឱកាសកាន់តែធំជាងមុន លោកអ៉ី ពិសិដ្ឋមិនបានរង់ចាំឱកាសទៀតទេ ដោយលោកបានចាប់​ បង្កើតឱកាសដោយខ្លួនឯង ដើម្បីឈរជើងកាន់តែរ៉ឹងមាំក្នុងវិស័យនេះ។

លោកអ៉ី ពិសិដ្ឋបានចាប់ផ្តើមវិនិយោគគំរោងលំនៅដ្ឋានឈ្មោះ “បុរី TV Stars” ស្ថិតនៅក្នុងខ័ណ្ឌដង្កោ វិនិយោគដីឡូត៍ វិនិយោគបុរីរតនៈ បុរីឡូង នី និងក្លាយជាអ្នកតំណាងចែកចាយធំផលិតផល របស់ក្រុមហ៊ុនសម្រស់ធម្មជាតិប្រចាំពោធិចិនតុង។

បច្ចុប្បន្នលោកអ៉ី ពិសិដ្ឋបាននិងកំពុងវិនិយោគបុរីថ្មីមួយទៀត គឺ “បុរី បុស្បា” ជាមួយតួនាទីជាក្រុមប្រឹក្សាភិបាល និងជាអគ្គនាយកប្រធានគណៈកម្មការទីផ្សាររបស់បុរីដ៏ស្រស់ស្អាត និងទាក់ទាញមួយនេះ។
តួនាទី និងកិត្តិនាម និងការចូលរួមសកម្មភាពសង្គម ដោយសារចំណេះដឹង ជំនាញ បទពិសោធន៍ ពិសេសភាពជាអ្នកដឹកនាំរបស់លោក បានធ្វើឲ្យលោកអ៉ី ពិសិដ្ឋត្រូវបានតែងតាំងជាអនុប្រធាន​សមាគមអ្នកអភិវឌ្ឍន៍ដីឡូត៍កម្ពុជា ជាសមាជិកសភាពាណិជ្ជកម្ម និងទើបត្រូវបានសម្ដេចព្រះអភិសេរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត សម្តេចព្រះមហាសង្ឃរាជ នៃគណៈធម្មយុត្តិកនិកាយ នៃព្រះរាជាណាចក្រកម្ពុជា និងជាព្រះប្រធានគណៈសង្ឃនាយក នៃគណៈធម្មយុត្តិកនិកាយ នៃព្រះរាជាណាចក្រកម្ពុជា បួរ គ្រី ដែលបានសព្វព្រះរាជហឫទ័យព្រះប្រទាននូវគោរមងារ មានសក្ត័ជា ទីប្រឹក្សាផ្ទាល់បញ្ញាតិគោរម្យ៍ងារ (ធម្មវិសេសទេវរក្សាមហាឧបាសកពុទ្ធសាសនូបត្ថមក៍) នៅថ្ងៃទី30 ខែឧសភា ឆ្នាំ2022ននេះ។

ជាមួយគ្នានេះ លោកអ៉ី ពិសិដ្ឋក៏ជាសាសនូវបត្ថម្ភមួយរូប ដែលតែងតែគិតគូជួយលើកិច្ចការពុទ្ឋចក្រ និងអាណាចក្រផងដែរ ដោយលោកបាន​កសាងផ្លូវបេតុងមួយខ្សែប្រវែង១០០០ម៉ែត្រ នៅស្រុកកំណើត និងបាន​ចូលរួមលើកិច្ចការជាច្រើនទៀត លើការជួយសង្រ្គោះប្រជាពលរដ្ឋរងគ្រោះដោយទឹកជំនន់នៅខេត្តពោធិសាត់ ដែលរួមមានការឧបត្ថម្ភអង្ករ មី ទឹកត្រី ទឹកស៊ីអ៊ីវជាដើម ពិសេសលោកបានចូលរួមកសាងខ្លោងទ្វារវត្តមួយផងដែរ។

ក្រៅពីសកម្មភាពទាំងអស់នេះ លោកក៏បានផ្តល់នូវចំណេះដឹងតាមរយៈការចូលររួមជាវាគ្មិន ក្នុងវគ្គបណ្តុះបណ្តាលនានា ដល់សិស្ស និស្សិត និងអ្នកចង់ក្លាយជាសហគ្រិនជាដើម។

អនុសាសន៍
ភ្ជាប់ជាមួយនូវបទពិសោធន៍ជោគជ័យលើការសិក្សា ការងារ និងកិច្ចការជំនួញ លោកអ៉ី ពិសិដ្ឋបានលើកឡើងថា យើងត្រូវស្គាល់ខ្លួនឯង មានជំ​នាញអ្វី អ្វីដែលខ្វះខាត យើងត្រូវចេះបំពេញបន្ថែម ពិសេសមុនសម្រេច​ចិត្តធ្វើអ្វីមួយត្រូវតែមានភាពច្បាស់លាស់ ហ៊ានសម្រេចចិត្តដោយមានការទទួ​លខុសត្រូវខ្ពស់ ពិសេសត្រូវមានទំនាក់ទំនងល្អក្នុងសង្គម ជាមួយមហាជនទូទៅ ជាមួយសហគ្រិនក្នុងវិស័យអប់រំ ដែលផ្តោតលើការសិក្សារៀនសូត្រជាប់ជាប្រចាំ ពិសេសលើការងារអចលនទ្រព្យ និងមានទំនាក់ទំនងក្នុងកម្រិតជាតិ និងអន្តរជាតិឲ្យបានល្អតាមដែលអាចធ្វើទៅបាន។

លោកអ៉ី ពិសិដ្ឋបានសម្រេចចិត្តរៀបការនៅឆ្នាំ២០១៥ ជាមួយអ្នកស្រីសារុំ ពុទ្ឋិកា ដោយមានកូនស្រីគួរឲ្យស្រលាញ់ពីរនាក់។ បច្ចុប្បន្នអ្នកស្រី សារុំ ពុទ្ឋិកាជាអគ្គនាយិកាក្រុមហ៊ុនតំណាងចែកចាយ ផលិតផលសម្រស់ធម្មជាតិធំជាងគេ នៅតំបន់ពោធិ៍ចិនតុង៕

បុរីប៉េង ហួតបង្ហាញគំរោងដឹស្តាមេរា ហ្កាដិនលើទំហំដី៤០ហិកតាផ្តល់ការរស់នៅបែបធម្មជាតិ

ដោយៈរ៉ាម៉េត

ភ្នំពេញៈ ស្របតាមការអភិវឌ្ឍឥតឈប់ឈរ តាមផែនការមេឆ្នាំ2035 នៅជុំវិញរាជធានីភ្នំពេញ ត្រូវបានគេមើលឃើញថា ភាគខាងត្បូងកំពុងតែមមាញឹកអភិវឌ្ឍ ជាមួយនឹងសន្ទុះយ៉ាងលឿន មានទាំងហេដ្ឋារចនាសម្ព័ន្ធផ្លូវថ្នល់ គម្រោងអភិវឌ្ឍអចលនទ្រព្យ ពាណិជ្ជកម្ម ផ្សារទំនើប សាលារៀនអន្តរជាតិ មន្ទីរពេទ្យអន្តរជាតិ ដើម្បីក្លាយជាទីក្រុងរណបក្នុងពេលឆាប់ៗនេះ។

ស្ថិតនៅតាមបណ្តោយផ្លូវក្រវ៉ាត់ក្រុងទី2 (ផ្លូវ50ម៉ែត្រ) ចំងាយ៣នាទីប៉ុណ្ណោះ ពីមហាវិថីសម្តេចតេជោហ៊ុន សែន (ផ្លូវ 60ម៉ែត្រ) ដឹស្តា មេរាហ្កាដិន ជាគម្រោងអភិវឌ្ឍលើផ្ទៃដីរហូតដល់40​ហិចតា ដែលពោពេញទៅដោយសក្តានុពលនៃលំហបៃតង ក្រោមការអភិវឌ្ឍរបស់បុរី ប៉េង ហួត បានក្លាយជាចំណែកមួយនៃការអភិវឌ្ឍភាគខាងត្បូងនេះផងដែរ។

គម្រោងនេះផ្ទាល់ ជាគម្រោងអភិវឌ្ឍបែបធម្មជាតិ លេចធ្លោជាងគេ ក្នុងតំបន់ ដែលកំពុងតែទទួលបាននូវការអភិវឌ្ឍចម្រុះឥតឈប់ឈរ ជាមួយនឹងហេដ្ឋារចនាសម្ព័ន្ធធំទូលាយ រៀបចំឡើងតាមស្តង់ដារនៃការរស់នៅ រួមមានសួនច្បារធំជាងគេ អមដោយដើមឈើធំៗ បណ្តុំទៅដោយរុក្ខជាតិដ៏ស្រស់បំព្រង ជាពិសេសផ្កាចម្រុះពណ៌ជាច្រើនប្រភេទ រីកគ្រប់រដូវកាល វេទិកាសិល្បៈ និងសាលប្រគុំតន្រ្តីកណ្តាលសួនច្បារ ទីធ្លាកីឡា ក្លឹបហាត់ប្រាណដ៏ទំនើបទាន់សម័យ ទីតាំងពិចនិចជួបជុំសម្រាប់គ្រួសារ និងសួនកុមារដែលមានឧបករណ៌ប្លែកៗជាច្រើនប្រភេទ សម្រាប់ការកម្សាន្តចម្រុះ ផ្តល់ជូននូវបរិយាកាសបរិសុទ្ធ ប្រកបដោយកិត្យានុភាព ផាសុកភាព ភាពរីករាយ និងភាពស្រស់ថ្លាទ្វេដង ក្នុងការរស់នៅជាមួយឧត្តមភាពបែបធម្មជាតិ។

ក្រៅពីការអភិវឌ្ឍផ្សារភ្ជាប់បែបធម្មជាតិ ដឹស្តា មេរាហ្កាដិន បានបន្ថែមនូវតំបន់ពាណិជ្ជកម្ម ពោរពេញទៅដោយហាងទំនិញ សេវាកម្ម និងអគារពាណិជ្ជកម្ម សម្រាប់ផ្គត់ផ្គង់តម្រូវការក្នុងគម្រោង ក៏ដូចជាក្នុងតំបន់ បានក្លាយជាសហគមន៍រស់នៅទំនើបចម្រុះ។

ក្នុងគម្រោងនេះទៀតសោត បានផ្តល់ជូននូវវីឡាស៊ីវិល័យជាច្រើនប្រភេទ ដែលរួមមាន៖ វីឡាទោល វីឡាភ្លោះ វីឡាកូនកាត់ និងហ្សបហោស៍ ត្រូវបានរចនាឡើង ប្រកបដោយភាពច្នៃប្រឌិតខ្ពស់ គុណភាពសំណង់រឹងមាំ និងសោភ័ណភាពដ៏ល្អឥតខ្ចោះ ផ្តោត់សំខាន់ទៅលើការរស់នៅសម័យទំនើប ដើម្បីផ្ដល់នូវជម្រើសកាន់តែសម្បូរបែបដល់អតិថិជន។

អតិថិជន ដែលមានបំណងចង់បានគេហដ្ឋាន ក្នុងគម្រោងដឹ​ស្តា មេរាហ្កាដិន លោកអ្នកនឹងទទួលបានការផ្តល់ជូនប្រូម៉ូសិន ពិសេសជាមួយនឹងការបង់ប្រាក់កាន់តែមានភាពងាយស្រួល។ លើសពីនេះទៅទៀត លោកអ្នកអាចធ្វើការបង់រំលស់ ជាមួយនឹងធនាគារដៃគូ ដែលមានអត្រាការប្រាក់សមរម្យចាប់ពី 4.39% ឡើងទៅ ទំហំកម្ចីរហូតដល់ 100% ថែមទៀតផង។

សម្រាប់ព័ត៌មានបន្ថែម សូមទាក់ទងទូរសព្ទលេខ 015 90 6789 Email: [email protected] ឬចូលទៅកាន់គេហទំព័រ Facebook: www.facebook.com/boreypenghuoth ឬអាចអញ្ជើញមកសាកសួរព័ត៌មាន ពីគ្រប់ការិយាល័យលក់ ដែលមានទីតាំងក្បែរលោកអ្នក រៀងរាល់ម៉ោងធ្វើការ៕

លោកជា សុផារ៉ា ផ្តល់អនុសាសន៍ ៥ចំណុច ក្នុងការអភិវឌ្ឍតំបន់ឆ្នេរសមុទ្រ ដើម្បីទាក់ទាញភ្ញៀវទេសចរ

ដោយៈ សុផារី

ភ្នំពេញៈ លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា បានផ្តល់នូវអនុសាសន៍៥ចំណុ​ច ក្នុងការគ្រប់គ្រងនិងអភិវឌ្ឍតំបន់ឆ្នេរសមុទ្រ ដើម្បីទាក់ទាញភ្ញៀវទេសច​រណ៍ជាតិ និងអន្តរជាតិ។

ក្នុងសិក្ខាសាលាផ្សព្វផ្សាយ ស្ដីពីបទដ្ឋានគតិយុត្តនានា ក្នុងការគ្រប់គ្រងនិងអភិវឌ្ឍតំបន់ឆ្នេរសមុទ្រ នាថ្ងៃទី៣០ ខែឧសភា ឆ្នាំ២០២២ នៅសាលាខេត្តកែប រៀបចំដោយគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា មានការចូលរួមពីលោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាអនុប្រធានអចិន្ត្រៃយ៍ គ.អ.ឆ.ក.។

ដើម្បីធានាការគ្រប់គ្រងការអភិវឌ្ឍ និងការអភិរក្សតំបន់ឆ្នេរសមុទ្រកម្ពុជា ប្រកបដោយចីរភាពនិងបរិយាបន្ន រដ្ឋបាលខេត្ត ព្រះសីហនុ ខេត្តកំពត ខេត្តកែប និងខេត្តកោះកុង ដើម្បីទាក់ទាញភ្ញៀវទេសចរណ៍ជាតិ អន្តរជាតិចូលមកលេងកម្សាន្ត លោកឧបនាយករដ្ឋមន្ត្រី ជា សុផារ៉ា បានផ្តល់អនុសាសន៍ការងារគោលដៅ៥ចំណុច រួមមាន ទី១ ការពារ និងថែរក្សាឆ្នេរសមុទ្រ ដីចំណីឆ្នេរសមុទ្រ និងអភិវឌ្ឍផ្លូវសាធារណៈ និងបណ្តាញបៃតងតាមបណ្ដោយឆ្នេរ ដើម្បីជាលំហសាធារណៈប្រកបដោយសុខដុមរមនា និងទាក់ទាញទេសចរណ៍នៅតំបន់ឆ្នេរសមុទ្រ តាមរយៈការរៀបចំផែនការប្រើប្រាស់ដី និងប្លង់លម្អិតនគរូបនីយកម្ម។

ទី២ ការពារ និងថែរក្សាដៃសមុទ្រ ស្ទឹង ព្រែក និងផ្លូវទឹកដែលតភ្ជាប់ទៅនឹងសមុទ្រដែលជាទ្រព្យសម្បត្តិសាធារណៈរបស់រដ្ឋ តាមរយៈការរៀបចំផែនការប្រើប្រាស់ និងប្លង់លម្អិតនគរូបនីយកម្ម ដើម្បីគ្រប់គ្រងការអភិរក្ស និងការអភិវឌ្ឍប្រកប ដោយចីរភាព និងសុខដុមរមនា។

ទី៣ ធានាការគ្រប់គ្រង ថែរក្សាការពារស្រែអំបិល ដែលជាសម្បត្តិវប្បធម៌ប្រវត្តិសាស្ត្រ និងប្រភព នៃសន្តិសុខស្បៀងរបស់ប្រទេសកម្ពុជា តាមរយៈការគ្រប់គ្រងការអភិវឌ្ឍដី ស្របតាមបទប្បញ្ញត្តិនគរូបនីយកម្ម និងប្រើប្រាស់ដីជាធរមាន។

ទី៤ ការពារ និងថែរក្សាភ្នំ ព្រៃឈើ និងទេសភាពធម្មជាតិ នៃតំបន់ឆ្នេរសមុទ្រដែលជាមរតកប្រវត្តិសាស្ត្រធម្មជាតិ និងបរិស្ថាន សម្រាប់គាំទ្រដល់ការអភិវឌ្ឍអេកូទេសចរណ៍ ប្រកបដោយចីរភាព និងសុខដុមរមនានៅតំបន់ឆ្នេរសមុទ្រកម្ពុជា តាមរយៈការលើកវិធានការ ផែនការគ្រប់គ្រង និងតាមដានការអភិវឌ្ឍ ការអភិរក្សជាក់លាក់ និងជាប្រចាំ។

ទី៥ លើកកម្ពស់ការគ្រប់គ្រងការអភិវឌ្ឍ និងការអភិរក្សកោះនិងប្រជុំកោះ ដោយធានាបាននូវធនធានធម្មជាតិ ទេសភាព និងជីវៈចម្រុះនៅលើកោះ និងជុំវិញកោះ ប្រកបដោយប្រសិទ្ធភាពខ្ពស់ ដោយមានផែនការត្រួតពិនិត្យច្បាស់លាស់៕

ក្រុមហ៊ុនធំៗរបស់កូរ៉េខាងត្បូង គ្រោងបោះទុនវិនិយោគរហូតដល់ទៅជិត ៤០០ពាន់លានដុល្លារអាមរិក

ដោយៈសុខុម

សេអ៊ូល: បន្ទាប់ពីក្រុមហ៊ុនSamsung Group និងក្រុមហ៊ុន Hyundai Motor Group បានបង្ហាញផែនការវិនិយោគច្រើនសម្បើមរួចមក ក្រុមហ៊ុនគ្រាក់ៗផ្សេងទៀតរបស់កូរ៉េខាងត្បូង រួមមានក្រុមហ៊ុន SK ក្រុមហ៊ុនLG ក្រុមហ៊ុន GS ក្រុមហ៊ុន POSCO និងក្រុមហ៊ុន Hyundai Heavy Industries កាលពីថ្ងៃព្រហស្បតិ៍ សប្ដាហ៍មុនបានបង្ហាញផែនការវិនិយោគទ្រង់ទ្រាយធំគួរឱ្យភ្ញាក់ផ្អើល។

អ្នកជំនាញមើលឃើញថា ផែនការវិនិយោគយ៉ាងច្រើនសម្បើមនេះ គឺដើម្បីស្វែងរកឱកាស សម្រេចបានកំណើនបន្ថែមទៀត នៅពេលអនាគត និងដើម្បីឆ្លើយតប ទៅនឹងការសន្យារបស់ប្រធានាធិបតី Yoon Suk-yeol ថានឹងបង្កើតបរិយាកាស ដែលអំណោយផលសម្រាប់អាជីវកម្ម។ នេះបើយោងតាមសារព័ត៌មាន Korea Times ចុះផ្សាយនៅថ្ងៃច័ន្ទ ទី៣០ ខែឧសភា នេះ។

ផែនការវិនិយោគរបស់ពួកគេ គឺផ្តោតលើការបង្កើតការងារបន្ថែមទៀត និងជំរុញអាជីវកម្ម ដែលកាក់កបខ្លាំងដូចជា បន្ទះឈីប ជីវឧស្ម័ន អាគុយរថយន្តអគ្គិសនី ថាមពលដែលមិនប៉ះពាល់ដល់បរិស្ថាន និងបញ្ញាសិប្បនិម្មិត (IA) ជាដើមដែលពួកគេរំពឹងថា នឹងជំរុញឱ្យសេដ្ឋកិច្ចកូរ៉េខាងត្បូង មានសន្ទុះហក់ឡើងខ្លាំងវិញ។

តួយ៉ាងក្រុមហ៊ុន SK Group និយាយថា ខ្លួននឹងវិនិយោគសរុបចំនួន១៩៤,៨ពាន់លានដុល្លាររហូតដល់ឆ្នាំ២០២៦ ដែលនឹងបង្កើតការងារថ្មីបាន៥០.០០០កន្លែង។

ទន្ទឹមនេះ ក្រុមហ៊ុន LG Group ក៏បានប្រកាសដែរថា ខ្លួននឹងវិនិយោគ៨៦ពាន់លានដុល្លារ នៅក្នុងប្រទេសកូរ៉េខាងត្បូង សុទ្ធសាធរហូតដល់ឆ្នាំ២០២៦ ដែលនឹងបង្កើតការងារថ្មីបានចន្លោះពី៥០.០០០កន្លែងទៅ១០.០០០កន្លែង។

ចំំណែកក្រុមហ៊ុន GS Group ដែលដំណើរការអាជីវកម្មប្រេង សំណង់ និងអាជីវកម្មចែកចាយក៏បានប្រកាសដែរថា ខ្លួននឹងវិនិយោគ១៧ពាន់លានដុល្លារ រហូតដល់ឆ្នាំ២០២៦ ដែលនឹងបង្កើតការងារថ្មីបាន២២.០០០កន្លែង។

រីឯក្រុមហ៊ុន POSCO Group បានប្រកាសថា ខ្លួននឹងវិនិយោគចំនួន៤៣ពាន់លានដុល្លាររហូតដល់ឆ្នាំ២០២៦ ដោយផ្តោតលើការប្រកួតប្រជែងក្នុងអាជីវកម្មស្នូលដូចជាដែកថែប អ៊ីដ្រូសែន ហេដ្ឋារចនាសម្ព័ន្ធដែលមិនប៉ះពាល់ដល់បរិស្ថាន និងបច្ចេកវិទ្យានាពេលអនាគតជាដើម ដែលនឹងបង្កើ​តការងារថ្មីបាន២៥.០០០កន្លែង។

ចុងក្រោយ ក្រុមហ៊ុន Hyundai Heavy Industries Group បានប្រកាសថា ខ្លួននឹងវិនិយោគ១៧ពាន់លានដុល្លារ នៅរយៈពេល៥ឆ្នាំក្រោយរហូតដល់ឆ្នាំ២០២៦ ដែលនឹងបង្កើតការងារថ្មីបាន១០.០០០កន្លែង។

ដូចនេះ ទំហំទុនវិនិយោគសរុប ដែលគ្រោងចំណាយដោយក្រុមហ៊ុនគ្រាក់ៗទាំងនេះ មានចំនួនដល់ទៅ៣៥៧,៨ពាន់លានដុល្លារ៕ Korea Times៕