អ្នកជំនាញបង្ហាញគន្លឹះសំខាន់ៗមុនសម្រេចចិត្តវិនិយោគខេត្តព្រះសីហនុនិងសៀមរាប

ដោយ៖ វឌ្ឍនៈ

ភ្នំពេញ៖ ខេត្តតំបន់ទេសចរណ៍ពីរនៅកម្ពុជាគឺខេត្តព្រះសីហនុ និងខេត្តសៀមរាប ជាខេត្តដែលរាជរដ្ឋាភិបាលបានយកចិត្តទុកដាក់ក្នុងការអភិវឌ្ឍ និងជាទិសដៅសម្រាប់វិនិយោគិនក្នុងការបណ្ដាក់ទុនវិនិយោគ។

យ៉ាងណាក្តី សក្ដានុពលនៃខេត្តទាំងពីរនេះក៏ត្រូវបានមើលឃើញថា មានភាពខុសៗគ្នា ដូច្នេះអ្នកជំនាញអចលនទ្រព្យមួយរូបក៏បានបង្ហាញគន្លឹះ មុនសម្រេចចិត្តបណ្ដាក់ទុនវិនិយោគ។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍ក្នុងកិច្ចសម្ភាសន៍តាមទូរសព្ទ កាលពីថ្ងៃទី៤ ខែមេសានេះថា ខេត្តទាំងពីរសុទ្ធតែមានសក្ដានុពលដូចៗគ្នា តែវាអាស្រ័យទៅលើប្រភេទនៃការវិនិយោគរបស់គាត់។

លោកលើកឧទាហរណ៍ថា បើសិនជាគាត់ចង់វិនិយោគដីធ្លីដើម្បីធ្វើការសាងសង់ឃ្លាំង ឬរោងចក្រ ឬក៏ជាប្រភេទតំបន់ពាណិជ្ជកម្ម គាត់អាចទៅរកទីតាំងនៅខេត្តព្រះសីហនុ និងផ្ដល់ឱកាសខ្ពស់សម្រាប់ពួកគាត់។

លោកបន្ថែមថា ខេត្តព្រះសីហនុជាខេត្តមួយ ដែលតម្លៃដីធ្លីបានឡើងដល់កម្រិតមួយខ្ពស់ទៅហើយ ឬអាចនិយាយបានថាជាខេត្តអភិវឌ្ឍន៍។ យ៉ាងណាក្ដី ខេត្តនេះនៅតែមានសក្ដានុពល និងផលប្រយោជន៍ដល់វិនិយោគិនក្នុងការអភិវឌ្ឍអចលនទ្រព្យនៅក្នុងតំបន់។

លោកបន្តថា “បើសិនជាវិនិយោគិនចង់វិនិយោគទៅលើសណ្ឋាគារ និងបដិសណ្ឋារកិច្ច ដែលបម្រើដល់វិស័យទេសចរណ៍ ពួកគាត់អាចទៅរកតំបន់នៃខេត្តសៀមរាប ដែលនឹងផ្ដល់ឱកាសល្អសម្រាប់ពួកគាត់ ពីព្រោះខេត្តសៀមរាប ជាខេត្តមានសក្ដានុពលលើវិស័យទេសចរណ៍ និងជាទិសដៅទេសចរណ៍ធំជាងគេបំផុតនៅក្នុងកម្ពុជា”។

លោកបន្ថែមផងដែរថា តាមពិតទៅតាមបណ្ដាខេត្តនានាទូទាំងប្រទេសកម្ពុជាកំពុងតែហុចសក្ដានុពលដល់ការអភិវឌ្ឍ គ្រាន់តែខេត្តខ្លះមានសក្ដានុពលខ្ពស់ ខេត្តខ្លះមិនទាន់ទទួលបានការវិនិយោគ តែសម្រាប់តម្លៃដីធ្លី និងការអភិវឌ្ឍរបស់រដ្ឋក៏ឃើញថាមានការរីកចម្រើនជាបន្តបន្ទាប់ផងដែរ។


លោកឌឹត ចណ្ណា អគ្គនាយកក្រុមហ៊ុនអចលនទ្រព្យឡាក់គី ក៏បានមានប្រសាសន៍ឱ្យដឹងថា សម្រាប់ខេត្តព្រះសីហនុ ត្បិតតែវាមានការអភិវឌ្ឍខ្លាំងរួចហើយក្ដី តែខេត្តព្រះសីហនុនៅតែជាតំបន់ ដែលមានការទាក់ទាញទៅលើការអភិវឌ្ឍបន្ថែមទៀត ខណៈរដ្ឋាភិបាលក៏បានកំណត់យកខេត្តនេះជាគោលដៅអភិវឌ្ឍន៍មួយក្នុងចំណោមគោលដៅផ្សេងៗទៀត។

ខេត្តទាំងពីរដែលសុទ្ធតែមានសក្ដានុពលខ្ពស់ទៅលើវិស័យទេសចរណ៍ ព្រះសីហនុ និងសៀមរាបត្រូវបានរាជរដ្ឋាភិបាលអភិវឌ្ឍន៍និងសាងសង់ហេដ្ឋារចនាសម្ព័ន្ធ កាន់តែទំនើប កាន់តែស្អាត ដែលធ្វើឱ្យតំបន់ទាំងនោះកំពុងកែប្រែមុខមាត់ថ្មី ទាក់ទាញដល់វិនិយោគិនក្នុងនិងក្រៅប្រទេសបន្ថែម៕

មហាយក្សចិន ផលិតយន្តហោះល្បឿនលឿនជាងសំឡេងដែលហោះពីសៀងហៃទៅញូវយ៉កប្រើពេលត្រឹមតែ២ម៉ោង

ដោយៈសុខុម

អន្តរជាតិ: តើវាអាចទៅរួចឬទេ ដែលការធ្វើដំណើរពីក្រុងសៀងហៃ ប្រទេសចិន ឆ្ពោះទៅកាន់ក្រុងញូវយ៉ក សហរដ្ឋអាមេរិក ក្នុងចម្ងាយផ្លូវរហូតដល់ទៅ១១.៨៥១គីឡូម៉ែត្រ ដោយប្រើពលត្រឹមតែ២ម៉ោង?។

ចម្លើយគឺអាចទៅរួច នៅពេលអ្នកធ្វើដំណើរតាមយន្តហោះ ដែលមានល្បឿនលឿនជាងសំឡេង។

យោងតាមសារព័ត៌មានCNN ចុះផ្សាយនៅថ្ងៃអង្គារ ទី៥ ខែមេសា នេះឱ្យដឹងថា ក្រុមហ៊ុនដឹកជញ្ជូនទៅកាន់អវកាស Space Transportation (ចិនហៅថា Lingkong Tianxing) ដែលមានមូលដ្ឋាននៅទីក្រុងប៉េកាំង ប្រទេសចិន មានមហិច្ឆតាធំ ចង់ធ្វើឱ្យការរំពឹងទុកនេះក្លាយជាការពិត តាមរយៈការអភិវឌ្ឍយន្តហោះដឹកអ្នកដំណើរ ល្បឿនលឿនជាងសំឡេង ដែលលឿនជាងយន្តហោះបារាំង-អង់គ្លេស Concorde លើស២ដង។

ក្រុមហ៊ុននេះបានបញ្ចេញវីដេអួគំនូរជីវចល (Animated Video) បង្ហាញពីសកម្មភាពអ្នកដំណើរ ដែលមិនតម្រូវឱ្យពាក់មួកសុវត្ថិភាព ឬអាវអវកាស) ជិះក្នុងយន្តហោះអវកាស (Space Plane) ១២កៅអីដែលមានរ៉ុក្កែតជំរុញល្បឿនយ៉ាងធំ២។

យន្តហោះនេះ គឺត្រូវបាញ់បង្ហោះក្នុងសណ្ឋានបញ្ឈរ ចូលទៅក្នុងបរិ យាកាសដូចយានអវកាសដែរ ហើយនៅពេលទៅដល់រយៈកម្ពស់ ដែលយន្តហោះដឹកអ្នកដំណើរទូទៅហោះហើរ យន្តហោះនេះនឹងបំបែកខ្លួនចេញពីរ៉ុក្កែតជំរុញល្បឿន ហើយវានឹងបង្កើនល្បឿនហោះហើរ ដល់ទៅ៧.០០០គីឡូម៉ែត្រក្នុងមួយម៉ោង។ នៅពេលទៅដល់គោលដៅ វានឹងចុះចតក្នុងសណ្ឋានបញ្ឈរ ដោយមានជំនួយពីជើងទម្រ ដែលមានជើង៣ដូចជើងកាមេរ៉ា។

យោងតាមគេហទំព័ររបស់ក្រុមហ៊ុន Space Transportation បានឲ្យដឹងថា ក្រុមហ៊ុននេះមានគោលបំណងបាញ់បង្ហោះយន្តហោះអវកាសនេះ សាកល្បងជាលើកដំបូងរបស់ខ្លួន សម្រាប់គោលបំណងទេសចរណ៍នៅត្រឹមឆ្នាំ២០២៥ មុននឹងឈានដល់ការហោះហើរពេញលេញ សម្រាប់គោលបំណងអាជីវកម្មនៅត្រឹមឆ្នាំ២០៣០។

ប្រសិនបើអ្វីៗបានសម្រេចដូចការគ្រោងទុកមែន គំនិតផ្តួចផ្តើមនេះនឹងជួយជំរុញមហិច្ឆតារបស់ប្រទេសចិន នៅក្នុងការដណ្ដើមចំណែកទីផ្សារទេសចរណ៍ទៅកាន់អវកាស ដែលទទួលបានប្រាក់ចំណូលយ៉ាងច្រើនក្រាស់ក្រែល ព្រមទាំងប្រើយន្តហោះល្បឿនលឿន ជាងសំឡេងសម្រាប់ដឹកអ្នកដំណើរជាពាណិជ្ជករផងដែរ ហើយមហិច្ឆតានេះត្រូវបានគាំទ្រពីបណ្ដាវិនិយោគិនធំៗនៅក្នុងប្រទេសចិន៕  CNN៕

ផ្សារលក់ទំនិញម៉ាក្រូពង្រីកសាខាចំនួនពីរបន្ថែមទៀតក្រោយជោគជ័យលើសាខាទី១នៅកម្ពុជា

ដោយ៖ សុផារី

ភ្នំពេញ៖ ក្រុមហ៊ុន Siam Makro Plc បានប្រកាសផែនការវិនិយោគ១១ពាន់លានបាតក្នុងការពង្រីកអាជីវកម្មនៅឆ្នាំ២០២២នេះ ក្នុងនោះក្រុមហ៊ុននឹងពង្រីកបន្ថែមហាងថ្មីចំនួនពីរនៅកម្ពុជា។

យោងតាមនាយកប្រតិបត្តិលោក Suchada Ithijarukul ការវិនិយោគនេះនឹងផ្តោតលើការបើកផ្សារ Makro ថ្មីចំនួន៣០នៅក្នុងប្រទេសថៃ បីនៅឥណ្ឌា និងពីរនៅក្នុងប្រទេសកម្ពុជា។

ផែនការពង្រីកបានធ្វើឱ្យចំនួនផ្សារ Makro សរុបមាន១៨៤នៅឆ្នាំនេះ។ ក្នុងចំណោមចំនួនផ្សារសរុប មាន១៧២ផ្សារមានទីតាំងនៅក្នុងប្រទេសថៃ ហើយ១២ កន្លែងទៀតស្ថិតនៅទីផ្សារបរទេស។

នាយកប្រតិបត្តិ Makro ក៏បានបញ្ជាក់ផងដែរថា ក្រុមហ៊ុនគ្រោងនឹងពង្រីកប្រតិបត្តិការរបស់ Siam Food Services Ltd ដែលជាអ្នកចែកចាយផលិតផលម្ហូបកករបស់ខ្លួននៅត្រីមាសទី២នៃឆ្នាំនេះ ដើម្បីបើកដំណើរការទីផ្សារ “maknet” ដែលជាទីផ្សារអាជីវកម្ម(B2B)ថ្មីមួយ ដើម្បីឆ្លើយតបទៅនឹងការផ្លាស់ប្តូរឥរិយាបទការទិញរបស់អតិថិជន B2B ដែលទាមទារដំណោះស្រាយប្រកបដោយប្រសិទ្ធភាពសម្រាប់ផលិតផល និងសេវាកម្ម ក៏ដូចជាភាពងាយស្រួល និងប្រសិទ្ធភាពក្នុងការទិញ។

Siam Makro បានចូលរួមក្នុងអាជីវកម្មតាំងពីឆ្នាំ២០១៩ ដោយចាប់ផ្តើមជាមួយ MakroClick ដែលផ្តល់ជូនផលិតផលទាំងអស់ដែលបានលក់នៅក្នុងហាងទំនិញរបស់ Makro តាមប្រព័ន្ធអនឡាញ ទាំងតាមរយៈគេហទំព័រ និងកម្មវិធីលើទូរស័ព្ទ។

យោងតាមលោក Suchada វេទិកានេះមានមុខងារជាទីផ្សារលក់ដុំតាមអនឡាញដោយផ្តល់ជូនម្ចាស់ភោជនីយដ្ឋាននូវដំណោះស្រាយផលិតផល និងសេវាកម្មដែលអនុញ្ញាតឱ្យពួកគេទិញទំនិញដែលមាននៅក្នុងហាង Makro ឬហាងដៃគូជាង១,០០០ ក៏ដូចជាភោជនីយដ្ឋានផ្សេងទៀតផងដែរ និងសេវាកម្មពាក់ព័ន្ធផ្សេងទៀត៕

សង្ក្រានឆ្នាំថ្មី! ចំណេញផ្ទួនៗ ក្នុងពេលតែមួយ ពីបុរី ប៉េង ហួត រហូតដល់រាប់ម៉ឺនដុល្លារ

សង្ក្រានឆ្នាំថ្មី ផ្លាស់ប្តូរក្តីស្រមៃគេហដ្ឋានរបស់លោកអ្នក អោយក្លាយជាការពិត ជាមួយបុរី ប៉េង ហួត! ដើម្បីអបអរសាទរ ក្នុងឱកាសឆ្នាំចាស់ផ្លាស់ចូលឆ្នាំថ្មី បុរី ប៉េង ហួត សូមផ្តល់ជូនប្រូម៉ូសិនដ៏អស្ចារ្យ ផ្ទួនៗក្នុងពេលតែមួយ ដែលមានដូចជា

  • បញ្ចុះតម្លៃរហូតដល់ 8%
  • ចំណេញបន្ថែមរហូតដល់ 3ម៉ឺនដុល្លារ
  • បន្ថែមជូនពិសេសនូវ ឡានអាគុយ2កៅអីដ៏ទំនើប ម៉ូតូអាគុយ និង ឈុតកង់ Giant ព្រមទាំងវត្ថុអនុស្សាវរីយ៍ជាច្រើនទៀត។

ការផ្ដល់ជូននេះមានសុពលភាពចាប់ពីថ្ងៃនេះ រហូតដល់ដំណាច់ខែមេសាតែប៉ុណ្ណោះ។ បន្ថែមលើសពីនេះទៀត អតិថិជននឹងទទួលបានជម្រើសការបង់រំលស់កាន់តែងាយស្រួល និងឆាប់រហ័ស ជាមួយធនាគារដៃគូសហការ ដោយអត្រាការប្រាក់ចាប់ពី 4.39% ឡើងទៅ និងទំហំកម្ចីរហូតដល់ 100% ថែមទៀតផង។

សូមបញ្ជាក់ផងដែរថាគ្រប់គម្រោងទាំងអស់របស់បុរី ប៉េង ហួត សុទ្ធសឹងតែជាបណ្តុំសហគមន៍ទំនើប ដែលពោរពេញដោយសោភ័ណភាព បែបធម្មជាតិពណ៌បៃតង ក្លឹបហាត់ប្រាណ អាងហែលទឹក អមទៅដោយសួនច្បារ ដ៏ស្រស់បំព្រងផ្តល់ជូននូវបរិយាកាសស្រស់ស្រាយ ប្រកបដោយភាពស្ងប់ស្ងាត់ សម្រាប់ការរស់នៅដ៏ល្អប្រសើរបំផុត ។

លោកអ្នកអាចធ្វើការ​ជ្រើសរើសនូវវីឡាជាច្រើនប្រភេទ ដែលមានដូចជា វីឡាទោល វីឡាភ្លោះ វីឡាកូនកាត់ និងហ្សបហោស៍ ដែលគ្រប់ប្រភេទវីឡាខាងលើ សុទ្ធសឹងតែ រចនាម៉ូដឡើងយ៉ាងល្អឯកដែលផ្អែកទៅលើគុណតម្លៃនៃសោភ័ណភាព ភាពសម្បូរបែប​ ជាមួយភាពសមស្របឥតខ្ចោះនៃការរួមបញ្ចូលរចនាបថខ្មែរ និង អឺរ៉ុប ដោយផ្តល់ជូននូវភាពប្រណីតទាន់សម័យ និងផាសុកភាពក្នុងការស់នៅធ្វើអោយជីវិតលោកអ្នកកាន់តែមានន័យ។

ឆ្លៀតក្នុងឱកាសឆ្នាំថ្មី ប្រពៃណីប្រពៃណីជាតិខ្មែរ បុរី ប៉េង ហួត សូមថ្លែងអំណរគុណ និងប្រសិទ្ធិពរជ័យ ជូនដល់អតិថិជនទាំងអស់ សូមអោយមានសុខភាពល្អ រកស៊ីទទួលទានមានបាន សម្រេចភារកិច្ចថ្មី ជោគជ័យថ្មី សេចក្តីសុខសុភមង្គល គ្រប់ៗក្រុមគ្រួសារ។

ដូច្នេះសូមរួសរាន់ឡើងដើម្បីកុំឱ្យឱកាសចំណេញដ៏ច្រើនសន្ធឹកសន្ធាប់នេះកន្លងផុតទៅ!

ដើម្បីជ្រាបព័ត៌មានកាន់តែច្បាស់ សូមទាក់ទងទៅបុគ្គលិកផ្នែកលក់របស់បុរី ប៉េង ហួត តាមរយៈលេខទូរសព្ទ៖ 098 / 016 / 017 596 789 ឬចូលរួមជាមួយ Telegram Channel https://t.me/boreypenghuoth ៕

 

[youtube https://www.youtube.com/watch?v=YvwfwZ2lW9U&w=560&h=315]

លោកកាំង នីន ផ្តើមពីបុគ្គលិកផ្នែកលក់ពាណិជ្ជកម្មកាសែតរហូតក្លាយជានាយកក្រុមហ៊ុនអចលនទ្រព្យមួយ

ដោយ: ម៉ាលីស

ភ្នំពេញ: វិស័យអចលនទ្រព្យ បានធ្វើមនុស្សជាច្រើនផ្លាស់ប្តូរជីវភាពនិងមុខមាត់គួរឱ្យកត់សម្គាល់ ហើយក៏មានបុគ្គលជាច្រើនជោគជ័យ និងទទួលបានផលប្រយោជន៍ពីវិស័យនេះដែរ។

លោកកាំង នីន នាយកនៃក្រុមហ៊ុន GC Realty បានផ្តល់កិច្ចសម្ភាសន៍ជាមួយគេហទំព័រ Property Area កាលពីថ្ងៃ៤ ខែមេសា ឆ្នាំ២០២២ អោយដឹងថា ដំបូងឡើយលោក គឺជាអ្នកលក់ពាណិជ្ជកម្មជូនកាសែតក្នុងស្រុកមួយជាភាសាចិន ជាពិសេសលក់ជូនភ្ញៀវជនជាតិចិន  ហើយលោកត្រូវជិះម៉ូតូទៅជួបភ្ញៀវ និងប្រមូលលុយពីភ្ញៀវ នៅតាមរោងចក្រ ពីព្រោះអតិថិជនរបស់លោកជាថៅកែរោងចក្រ។
   

លោកបន្តថា “កាលពីប្រហែល១០ឆ្នាំមុន ខ្ញុំចូលប្រលោកក្នុងវិស័យការងា​រដំបូងត្រឹមជាបុគ្គលិកផ្នែកលក់ ដែលមានប្រាក់ខែត្រឹមតែ១៥០ដុល្លារ “។លោកបន្តថា “ការងាររបស់ខ្ញុំពេលនោះ គឺធ្វើនៅខាងវិស័យសារពត៍មានចិន គឺផ្នែករកទីផ្សារ ដើម្បីដាក់ពាណិជ្ជកម្មឲ្យកាសែតចិនមួយ ហើយខណៈនោះលោកមានត្រឹមម៉ូតូជិះទៅជួបភ្ញៀវ ទាំងហាលខ្យល់ហាលភ្លៀងប៉ុណ្ណោះ”។

លោកកាំង នីនបានបន្តថា នៅក្នុងអំឡុងឆ្នាំ២០១៧ ឬ២០១៨ វិស័យអចលនទ្រព្យ ជាពិសេសវិស័យខុនដូបានរីកកាន់តែខ្លាំង លោកក៏បានមើលឃើញឱកាសនៅក្នុងវិស័យអចលនទ្រព្យ និងចាប់ផ្ដើមជាអ្នកលក់និងបន្តអភិវឌ្ឍន៍ខ្លួន ដោយបានចាប់ផ្ដើមអាជីពក្នុងវិស័យខុនដូ ។

ដោយសារតែ លោកជាអ្នកតស៊ូ និងជាអ្នកលក់ដ៏ពូកែ ដែលកាលនោះ ៨០%នៃចំណូលក្រុមហ៊ុនទាំងមូល គឺលោកជាអ្នករកជូនក្រុមហ៊ុន រហូតដល់ម្ចាស់ក្រុមហ៊ុនបានចែកហ៊ុនមួយ ចំណែកមកអោយលោកកាន់ផងដែរ។

រហូតដល់ឆ្នាំ២០២០ លោកក៏បានជួបជាមួយនឹងម្ចាស់ក្រុមហ៊ុន GCCហើយក៏បានផ្អាកការងារពីកន្លែងចាស់ និងបានជួបជាមួយប្រធានក្រុមប្រឹក្សាភិបាលនិងម្ចាស់ក្រុមហ៊ុន គ្រោងនឹងក៏បានបង្កើតក្រុមហ៊ុនអចលនទ្រព្យមួយដូចសព្វថ្ងៃ។

លោក កាំង នីន បានផ្លាស់ប្តូរនូវតួនាទី មុខដំណែងក្នុងសង្គម យ៉ាងលឿន គឺពីបុគ្គលិកផ្នែកលក់សេវាផ្សព្វផ្សាយ ពាណិជ្ជកម្មលើកាសែត ទៅជានាយកនៃក្រុមហ៊ុនអចលនទ្រព្យ ហើយលោកនៅតែបន្តអភិវឌ្ឍន៍ខ្លួនទៅមុខបន្ថែមទៀតឥតឈប់ឈរ។

លោកបន្ថែមថា “បុគ្គលដែលចង់ជោគជ័យ គួរតែចេះអភិវឌ្ឍន៍ខ្លួន មិនគួរនៅនឹងមួយកន្លែងនោះទេ ហើយបើសិនយើងមិនអភិវឌ្ឍន៍ មិនផ្លាស់ប្តូរ នោះ យើងក៏មិនមានការរីកចម្រើន មិនទទួលបានផ្លែផ្កានោះដែរ”៕

គុណតម្លៃចំនួន៥បាននិងកំពុងផ្តល់ជូនអតិថិជនពីបុរីបុស្បា

     ដោយៈជេស៊ីកា

        ភ្នំពេញៈ ការផ្តល់ជូននូវគុណតម្លៃពិសេសចំនួន៥ បាននិងកំពុងធ្វើឲ្យបុរីបុស្បា ទាក់ទាញការចាប់អារម្មណ៍ និងជាវពីសំណាក់ប្រជាពលរដ្ឋ ពិសេ​សក្រុមតារាល្បីៗនៅកម្ពុជា។

គុណតម្លៃដែលបុរីនេះផ្តល់ជូន រួមមាន ទី១ គុណភាព និងសោភ័ណភាពសំណង់ ទី២ ហេដ្ឋារចនាសម្ព័ន្ឋធំទូលាយ និងផ្សារភ្ជាប់ជាមួយសហគមន៍បៃតង ទី៣ សំណង់ត្រូវបានរចនាឡើង ស្របតាមនិន្នាការប្រែប្រួលអាកា​សធាតុ ដែលផ្តល់នូវខ្យល់ និងពន្លឺចេញចូលគ្រប់គ្រាន់ កាត់បន្ថយការប្រើប្រាស់អគ្កិសនី។

ទី៤ ទីតាំងមានភាពប្រទាក់ក្រឡាគ្នា ជាមួយបណ្តាញផ្លូួវជាតិសំខាន់ៗ រួមមាន ផ្លូវជាតិលេខ៣ ផ្លូវជាតិលេខ២ ផ្លូវក្រវ៉ាត់ក្រុងទី៣ និងទី៥ ទីតាំងព័ទ្ឋជុំវិញ ដោយមជ្ឈមណ្ឌលពាណិជ្ជកម្ម ដូចជាផ្សារទំនើបAEON Mall3 ព្រលានយន្តហោះអន្តរជាតិចតេជោក្រុងតាខ្មៅ និងផ្សារសហគមន៍ជាច្រើនទៀត។

លោកអ៉ី ពិសិដ្ឋក្រុមប្រឹក្សាភិបាល និងជានាយកផ្នែកទីផ្សារនៃបុរីបុស្បាបានមានប្រសាសន៍ឲ្យដឹងថា ការរីកចម្រើននៃរាជធានីភ្នំពេញ បាននិងកំពុងធ្វើឲ្យជីវភាពប្រជាពលរដ្ឋប្រសើរឡើង ដែលធ្វើឲ្យតម្រូវការបុរីលំនៅដ្ឋានកើនឡើងជាប្រចាំ ពិសេសនៅទឹកដីខ័ណ្ឌដង្កោ ដែលជាតំបន់មានប្រជាពលរដ្ឋរស់នៅច្រើន និងជាទីតាំងដែលមានការរីកចម្រើនលឿននាពេលអនាគត។

លោកបន្តថា “ដោយមើលឃើញបែបនេះ ទើបបុរីបុសប្បាបានជ្រើសរើសទីតាំងនេះ សម្រាប់អភិវឌ្ឍន៍ជំហ៊ានដំបូងលើផ្ទៃដី១០ហិកតា និងពង្រីកកាន់តែធំថែមទៀតនាពេលឆាប់ៗនេះ”។ លោកបន្តថា  “ស្តង់ដាបុរីរបស់យើង គឺផ្តោតលើសុខមាលភាពរបស់អ្នករស់នៅ ដែលមានទាំងសួនច្បារបៃតង ហេដ្ឋារចនាសម្ព័ន្ឋធំទូលាយ និងការរចនាម៉ូតផ្ទះទាន់សម័យ និងស្របតាមលក្ខខ័ណ្ឌអាកាសធាតុ”។

លោកអ៉ី ពិសិដ្ឋបានបន្តទៀតថា ជាមួយនឹងផែនការ និងចក្ចុវិស័យចំពោះមុខ ក្រុមហ៊ុនបានវិនិយោគបុរីនេះឡើង ដោយគិតពីគុណតម្លៃរបស់អតិថិជន ដែលមានន័យថា យើងលក់តម្លៃសមរម្យ ទាបជាងទីផ្សារ ប៉ុន្តែហេដ្ឋារចនាសម្ព័ន្ឋ ការឌីសាញគំរោងរបស់យើង មិនចាញ់បុរីល្បីៗនៅកម្ពុជានោះទេ។


លោកបន្តថា “ការសិក្សាពីតម្រូវការ ចំណង់ចំណូលចិត្តរបស់អតិថិជន គឺជាស្នូលនៃគុណតម្លៃ ដែលយើងផ្តល់ជូនអតិថិជន នូវស្នាមញញឹម បរិយា​កាសរស់នៅប្រកបដោយផាសុខភាព និងមានភាពស៊ីវិល័យ”។

អតិថិជនចាប់អារម្មណ៍សូមទំនាក់ទំនង តាមរយៈលេខទូរស័ព្ទ០៨១ ២៣០ ៧៨៩, ០៦៧ ២៣០ ៧៨៩, ០៩៩ ២៣០៧៨៩៕



ហេដ្ឋារចនាសម័ន្ធនិងគម្រោងធំៗបីជាកម្លាំងចលករជម្រុញសន្ទុះការអភិវឌ្ឍចម្រុះនៃខេត្តសៀមរាប

ដោយៈ សុផារី

សៀមរាបៈ គម្រោងផ្លូវ៣៨ខ្សែ ដែលទើបបើកសម្ភោធដាក់ឱ្យប្រើប្រាស់ គម្រោងព្រលានយន្តហោះសៀមរាប អង្គរថ្មី និងការប្រកាសពីលទ្ធភាព នៃការបង្កើតក្រុងថ្មីមួយ នៅភាគខាងជើងនៃស្រុកសូត្រនិគម ត្រូវបានអ្នកជំនាញមើលឃើញថា ជាកម្លាំងចលករជម្រុញសក្តានុពលលើគ្រប់វិស័យ ជាពិសេសវិស័យសេដ្ឋកិច្ច អចលនទ្រព្យ ពាណិជ្ជកម្ម ទេសចរណ៍ ជាដើម។

លោក កែវ សុធារ៉ា នាយកប្រតិបត្តិ KW សៀមរាប បានមានប្រសាសន៍ប្រាប់ Property Area Asia កាលពីថ្ងៃទី៤ ខែមេសាកន្លងមកថា ស្រុកសូទ្រនិគម ជាទីតាំងមានហេដ្ឋរចនាសម័ន្ធពិសេសគឺទីតាំង “ព្រលានយន្តហោះសៀមរាបអង្គរថ្មី” ខេត្តសៀមរាប ដែលជាប្រភេទព្រលានយន្តហោះលំដាប់4Eអាច   ឱ្យយន្តហោះឆ្លងទី្វបគ្រប់ប្រភេទចុះចតបាន។

លោកបានលើកឡើងថា “គម្រោងព្រលានយន្តហោះថ្មីនេះ នឹងប្រែតំបន់ជុំវិញព្រលានយន្តហោះ ទៅជាកូនទីក្រុងអភិវឌ្ឍន៍ពាណិជ្ចកម្មដ៏រីកចំម្រើនមួយនាពេលអនាគត ជាពិសេសស្រុកសូត្រនិគមនឹងមានសក្តានុពល តាមរយៈព្រលានយន្តហោះថ្មី ក្នុងការទាក់ទាញលំហូរការវិនិយោគ ពាណិជ្ជកម្ម និងការដឹកជញ្ចូន”។

មួយវិញទៀត សម្រាប់វិស័យទេសចរណ៍ លោកថា ទីតាំងរមណីយដ្ឋានទេសចរណ៍នានា នឹងផុសឡើងនៅតំបន់ជុំវិញនេះ    ច្រើន ជាពិសេស នៅក្នុងស្រុកសូទ្រនិគម ជាទីតាំងជាប់បឹងទន្លេសាប និងជាទីតាំងរបស់សហគមន៍ នៅលើទឹកធំជាងគេបំផុតតាមមាត់បឹងទន្លេសាប គឺ “សហគមន៍កំពង់ឃ្លាំង”។

លោកបន្តថា តាមរយៈ“សហគមន៍កំពង់ឃ្លាំង” ដែលជារមណី​យដ្ឋាន ដ៏មានសក្តានុពលបែបធម្មជាតិ វប្បធម៌ សហគមន៍ ដែលគួរឱ្យគយគន់ដ៏ធំនេះ នឹងទទួលបានប្រជាប្រិយភាព កាន់តែច្រើនពីភ្ញៀវទេសចរណ៍ អាចមកទស្សនាកំសាន្ត ជិះទូក ទស្សនាជីវភាពរស់នៅព្រៃលិចទឹកនិងសត្វស្លាប ជាដើម។

កាលពីថ្ងៃទី៣ ខែមេសា ឆ្នាំ២០២២នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានបញ្ជាក់ថា អាចនឹងមានក្រុងរណបថ្មីមួយនៅភាគខាងជើង នៃតំបន់ព្រលានយន្តហោះ សៀមរាប អង្គរថ្មី ដែលគម្រោងអភិវឌ្ឍន៍នានា ដូចជា លំនៅដ្ឋាន ពាណិជ្ជកម្ម ទេសចរណ៍ នឹងអាចកើតមានឡើងនាពេលអនាគត។

លោកសុធារ៉ា បានមានប្រសាសន៍ថា “បើការបង្កើតទីក្រុងថ្មីនៅស្រុកនេះអាចកើតឡើងមែន វានឹងធ្វើអោយវិស័យអចលនទ្រព្យក្នុងខេត្តសៀមរាបទាំងមូល មានសន្ទុះឡើងខ្លាំង ដោយវានឹងក្លាយជាចំនុចរួមផ្សំបន្ថែមទៀត ក្នុងការទាក់ទាញអ្នកវិនិយោគជាតិ និង អន្តរជាតិអោយមកវិនិយោគ ក្នុងទឹកដីដ៏អច្ឆរិយៈមួយនេះ បន្ថែមពីផ្លូវ៣៨ខ្សែ ដែលទើបតែសម្ភោធរួចរាល់ហើយ កាលពីថ្ងៃទី០៤ ខែមេសានេះ”។

សម្តេចតេជោបានថ្លែងថា ហេដ្ឋារចនាសម្ព័ន្ធផ្លូវចំនួន ៣៨ខ្សែនេះ គឺជាបណ្ដុំបណ្ដាញផ្លូវមេដ៏មានសារៈសំខាន់ ក្នុងការតភ្ជាប់ប្រទាក់ក្រឡាពីទីប្រជុំជនក្រុងសៀមរាប ទៅកាន់តំបន់ដាច់ស្រយា​លនៅជាយក្រុង និងតភ្ជាប់ទៅកាន់តំបន់ទេសចរណ៍សំខាន់ៗ និងបណ្តាញខ្សែផ្លូវជាតិនានា ដែលនឹងជួយសម្រួលដល់ការធ្វើដំណើរបស់ប្រជាពលរដ្ឋ និងភ្ញៀវទេសចរណ៍ក្នុងខេត្ត សំដៅកាត់បន្ថយការកកស្ទះចរាចរណ៍ក្នុងទីក្រុង និងកាត់បន្ថយពេលវេលាក្នុងការដឹកជញ្ជូន និងចរាចរណ៍ទំនិញគ្រប់ប្រភេទ។

បន្ថែមលើសនេះ ហេដ្ឋារចនាសម្ព័ន្ធថ្មីនេះ ក៏បានចូលរួមលើកកម្ពស់មុខមាត់ខេត្តសៀមរាប ដែលត្រូវបានកំណត់ជាតំបន់ស្នូលក្នុងប៉ូលសេដ្ឋកិច្ចទី៣ រួមមាន ខេត្តសៀមរាប ខេត្តព្រះវិហារ ខេត្តបន្ទាយមានជ័យ និងខេត្តឧត្តរមានជ័យ ដែលជាគោលដៅទេសចរ​ណ៍វប្បធម៌ បូជនីយដ្ឋានប្រវត្តិសាស្រ្ត និងធម្មជាតិ ប្រកបដោយ សក្តានុពលសេដ្ឋកិច្ច សម្បូរណ៍បែប និងអាចទាក់ទាញទេសចរណ៍ជាតិ និងអន្តរជាតិជាច្រើនចូលមកទស្សនា៕

ទឹកពិសាឋានសួគ៌បូកគោ ទឹកពិសាគុណភាពខ្ពស់សម្រាប់សុខភាពនិងសម្រស់មនុស្សគ្រប់វ័យ

ដោយៈ សុផារី

ភ្នំពេញៈ ការរក្សាសំណើមក្នុងខ្លួន មានសារៈសំខាន់សម្រាប់សុខភាពនិងសុខុមាលភាព ព្រោះវាជួយរក្សាកម្រិតថាមពល បង្កើនសមត្ថភាពផ្លូវចិត្តនិងរាងកាយ ជួយដល់ការរំលាយអាហារ បង្កើនសុខភាពស្បែកនិងសម្រស់របស់លោកអ្នក។

ទឹកពិសាឋានសួគ៌បូកគោត្រូវបានផលិត និងវេចខ្ចប់នៅក្នុងសហគ្រាសផលិតទឹកពិសានៅលើភ្នំបូកគោ ដែលមានរយៈកម្ពស់១,០៧៥ម៉ែត្រពីនីវ៉ូទឹកសមុទ្រ ជាប្រភពទឹកស្អាតមិនមានសារធាតុពុលនិងមេរោគផ្សេងៗ ហើយល្អចំពោះសុខភាពមនុស្សគ្រប់វ័យ។

លោកសៅ សារិននាយកចាត់ការទូទៅសណ្ឋាគារឋានសួគ៌  សុខា បានមានប្រសាសន៍ឲ្យដឹង នាព្រឹកថ្ងៃទី២៥ មិនានេះថា “លក្ខណៈពិសេសរបស់ “ទឹកពិសាឋានសួគ៌បូកគោ ជាទឹកធម្មជាតិ នៅលើកំពូលភ្នំបូកគោ ដែលមានរយៈកម្ពស់១.០៧៥ម៉ែត្រពីនីវ៉ូទឹកសមុទ្រ ខ្ពស់ជាងទឹកស្ទឹង អូរ អណ្តូង ទន្លេ ជាដើម”។

លោកបានបន្តថា “ប្រសិនបើទឹកពិសារចេញ ពីប្រភពទឹកស្ទឹង អូរ អណ្តូង ទន្លេរ គេត្រូវប្រើប្រាស់សារធាតុគីមី ដើម្បីបំបាត់ក្លិននិងធ្វើឱ្យថ្លា។ ប៉ុន្តែសម្រាប់ទឹកពិសាឋានសួគ៌បូកគោ ជាទឹកធម្មជាតិ ដែលមិនមានសារធាតុគីមីឡើយ”។

លោកសៅ សារិនបានបន្តឱ្យដឹងថា តាមការសិក្សារបស់អ្នកជំនាញការមកពីប្រទេសម៉ាឡេស៊ី បានការកោតសរសើរ និងទទួលស្គាល់ចំពោះគុណភាព នៃទឹកពិសាឋានសួគ៌បូកគោយ៉ាងខ្លាំង ដោយសារតែទឹកពិសាររបស់យើង មានប្រភពមកពីប្រភពទឹកដែលមាននីវ៉ូខ្ពស់ មិនមានសារធាតុគីមីនានាហូរចូលឡើយ។ លោកបន្តថា ដោយសារភ្នំបូកគោមានកំពស់ខ្ពស់ ហេតុនេះផ្ទៃបឹងផ្ទុកទឹករបស់យើងស្រូបយកដំណក់ទឹកភ្ញៀងស្អាត ដែលជាទឹកមិនរងការបំពុលពីផ្សែងបំពុល និងសារធាតុគីមីផ្សេងៗឡើយ។

កម្រិតPH៨របស់ទឹកពិសាឋានសួគ៌បូកគោ ជួយពង្រឹងជាតិអាល់កាឡាំង ដែលប្រឆាំងនឹងជំងឺបេះដូង ប្រឆាំងនឹងជាតិអាស៊ីតក្នុងរាងកាយ ជាពិសេសជួយឱ្យសម្ពាធឈាមដំណើរបានល្អ។ តាមការសិក្សា កម្រិតPHលើសពី៧ ត្រូវបានគេទទួលស្គាល់ថា ជាទឹកអាល់កាលីន ដែលល្អសម្រាប់សុខភាព ព្រោះវាអាចជួយក្នុងការបន្សាបជាតិអាស៊ីតនៅក្នុងខ្លួនយើង។

ទឹកពិសាឋានសួគ៌បូកគោជាទឹកពិសា ដែលទទួលស្គាល់ពីអង្គភាពអន្តរជាតិ ដែលបញ្ជាក់ពីសុវត្ថិភាពចំណីអាហារ មិនមានផលប៉ះពាល់ដល់សុខភាពអ្នកពិសា។

គ្រប់ជំហាននៃការផលិត ត្រូវបានដំណើរការដោយយ៉ាងល្អនិងមានការយកចិត្តទុកដាក់ខ្ពស់បំផុត ដោយត្រូវបានផលិតដោយដោយប្រព័ន្ធចម្រុះ Reverse Osmosis និងសម្លាប់មេរោគដោយ UV និងOzone និងតាមការតម្រូវនៃស្តង់ដារកម្ពុជា CS 009:2005 សម្រាប់ទឹកពិសារប្រកប ដោយអនាម័យនិងគុណភាពខ្ពស់ ISO 9001-2015 ជាទឹកពិសាដែលមានគុណភាពទទួលស្គាល់តាមកម្រិតស្តង់ដារអន្តជាតិHACCP។

ទឹកពិសាឋានសួគ៌បូកគោមានបួនចំណុះ គឺចំណុះ៣៣០មីលីលីត្រ ៥០០មីលីលីត្រ១៥០០មីលីលីត្រ និង២០លីត្រ។

រោងចក្រផលិតទឹក ត្រូវបានសាងសង់នៅលើភ្នំបូកគោ ស្រុកទឹកឈូ ខេត្តកំពត ដោយប្រើប្រាស់នូវខ្សែចង្វាក់ផលិតកម្ម ទំនើបនិងបច្ចេកវិទ្យាខ្ពស់បំផុត។

លោកសៅ សារិនបានឲ្យដឹងទៀតថា ខែ្សចង្វាក់ផលិតកម្មនេះបានចាប់ផ្តើមនៅក្នុងខែធ្នូ ឆ្នាំ២០១៧ មានសមត្ថភាពផលិតទឹកពិសារបានជាមធ្យម ចំនួន១.២០០កេសក្នុងមួយថ្ងៃ សម្រាប់ចំណុះ៥០០មលនិង៣៣០មល។ សម្រាប់ចំណុះ១៥០០មល ជាមធ្យមផលិតបានចំនួន១.២០០ដបក្នុងមួយថ្ងៃ។

លោក អ្នកអាចរកទិញទឹកពិសាឋានសួគ៌បូកគោ ពីក្រុមហ៊ុនដោយផ្ទាល់សម្រាប់ការប្រើប្រាស់ ក្នុងការិយាល័យ គេហដ្ឋាន ឬហាងលក់ទំនិញរបស់លោកអ្នកតាមរយៈលេខ088 94 94 614។

ទឹកពិសាឋានសួគ៌បូកគោ ទឹកពិសាគុណភាពខ្ពស់! សក្កិសមបំផុតសម្រាប់កុមារនិងមនុស្សពេញវ័យ៕

ធនាគារពិភពលោកបង្ហាញការព្យាករជាថ្មីពីកំនើនសេដ្ឋកិច្ចកម្ពុជា

ដោយៈវឌ្ឍនៈ

ភ្នំពេញៈ សេដ្ឋកិច្ចកម្ពុជាត្រូវបានព្យាករណ៍ជាថ្មី ដោយធនាគារពិភពលោក ដែលអាចរក្សាបានកំនើនចន្លោះពី៣,៨ភាគរយ ទៅ៤,៥ភាគរយនៅ ឆ្នាំនេះ។

យោងតាមរបាយការណ៍របស់ធនាគារពិភពលោក ដែលបានចេញផ្សាយនៅថ្ងៃទី៥ មេសា ២០២២នេះ បានឱ្យដឹងថា  ទោះជាមានការធ្លាក់ចុះជាទូទៅ នៃតម្រូវការសកលយ៉ាងណាក៏ដោយ ក៏ការព្យាករណ៍កំណើនសម្រាប់កម្ពុជា គឺស្នើ៤,៥ភាគរយក្នុងឆ្នាំនេះ ដោយផ្អែកលើសេណារីយ៉ូដើមគ្រា ដោយសារតែមានការលុបចោល នូវការដាក់កំហិតលើការធ្វើដំណើរ ព្រោះកម្ពុជាមានអត្រាចាក់វ៉ាក់សាំងកូវីដ១៩ ខ្ពស់។

គេរំពឹងថា “ការស្ដារសេដ្ឋកិច្ចឡើងវិញ នៅតែពឹងផ្អែកលើសកម្មភាពសេដ្ឋកិច្ចក្នុងស្រុក និងការនាំចេញផលិតផលកម្ម”។

របាយការណ៍ដដែលបង្ហាញថា ស្ថិតក្រោមសេណារីយ៉ូទាបជាង ក៏គេបានព្យាករណ៍ថា កំណើនអាចសម្រេចបានត្រឹម៣,៨ភាគរយ ក្នុងឆ្នា២០២២។ សេណារីយ៉ូទាបជាងនេះ គឺគេសន្មតថា មានការធ្លាក់ចុះនៃលក្ខ​ខណ្ឌសេដ្ឋកិច្ចក្នុងស្រុក ដោយសារអត្រាអតិផរណាកើនឡើងខ្ពស់ ខណៈដែលលក្ខខណ្ឌខាងក្រៅកាន់តែអាក្រក់ ដោយសារការធ្លាក់ចុះនៃតម្រូវការខាងក្រៅ ។

អ្នកជំនាញរំពឹងថា វិស័យកម្មន្តសាល សម្រាប់នាំចេញរបស់កម្ពុជា នឹងជួបព្យុះភ្លៀងនាពេលប៉ុន្មានខែខាងមុខ ដោយសារបរិយាកាសខាងក្រៅមិនសូវអំណោយផល បណ្ដាលមកពីការធ្លាក់ចុះ តម្រូវការនៅសហរដ្ឋអាមេរិក និងការធ្លាក់ចុះតម្រូវការនៅសហរដ្ឋអាមេរិក និងការធ្លាក់ចុះជារចនាសម្ព័ន្ធទូទៅនៅក្នុងប្រទេសចិន។

លើសពីនេះការកើនឡើង នៃតម្រូវការថាមពល និងស្បៀងអាហារ គឺដោយសារសង្គ្រាមនៅអ៊ុយក្រែន ដែលធ្វើឱ្យការកាត់បន្ថយភាពក្រីក្រ មានយឺតយ៉ាវ ព្រោះវាបានដាក់បន្ទុកលើការចំណាយកាន់តែខ្ពស់របស់គ្រួសារ ។

របាយការណ៍ពិភពលោកបង្ហាញថា ក្នុងរយៈពេលមធ្យម គេរំពឹងថាសេដ្ឋកិច្ចមាននិន្នាការវិល ត្រលប់មករកសក្ដានុពលខ្ពស់ ដែលមានកំណើនប្រមាណ៦ភាគរយ ។ ច្បាប់វិនិយោគថ្មី កិច្ចព្រមព្រៀងពាណិជ្ជកម្មសេរីរវាងកម្ពុជា ចិន និងកម្ពុជា សាធារណរដ្ឋកូរ៉េ និងភាពជាដៃគូសេដ្ឋកិច្ចគ្រប់ជ្រុងជ្រោយថ្នាក់តំបន់ នឹងជួយជំរុញការវិនិយោគ និងពាណិជ្ជកម្មនាប៉ុន្មានឆ្នាំខាងមុខ ។ ចំពោះចំណុចវិជ្ជមានវិញ គឺកម្ពុជាមានភាពធន់នឹងវិបត្តិសកលប្រសើរខាងមុខ ។

ទោះជាយ៉ាងនេះក្ដី ផលជះអវិជ្ជមានរបស់មេរោគកូវីដ១៩ មកលើការងារ និងសុខុមាលភាពត្រូវបានគេរំពឹងថា នៅបន្តមានក្នុងពេលដែលវិស័យសេវាកម្ម ជាពិសេសវិស័យធ្វើដំណើរ ទេសចរណ៍ និងបដិសណ្ឋារកិច្ចនៅបន្តជួបព្យុះភ្លៀងនៅឡើយ៕

ភាគហ៊ុនហក់ឡើងស្រឺតៗដល់ទៅ២៦% ក្រោយធ្លាយដំណឹងថា Elon Musk កាន់កាប់ភាគហ៊ុនច្រើននៅ Twitter

ដោយ សុខុម

អន្តរជាតិ: កំពូលមហាសេដ្ឋី Elon Musk នាយកប្រតិបត្តិក្រុមហ៊ុនផលិតរថយន្តអគ្គិសនី Tesla បានកាន់កាប់ភាគហ៊ុន៩,២%ក្នុងក្រុមហ៊ុន Twitter ដែលអាចធ្វើឱ្យលោកក្លាយជាម្ចាស់ភាគហ៊ុនធំបំផុតនៅក្នុងក្រុមហ៊ុនបណ្ដាញទំនាក់ទំនងសង្គមមួយនេះ។ នេះបើយោងតាមឯកសារនិយ័តកម្មមួយបានបង្ហាញកាលពីថ្ងៃច័ន្ទ ទី៤ ខែមេសា។

ភាគហ៊ុនរបស់ក្រុមហ៊ុន Twitter បានហក់ឡើងស្រឺតៗរហូតដល់ទៅ២៦%នៅក្នុងការជួញដូរ ក្រោយធ្លាយដំណឹងដ៏គួរឱ្យភ្ញាក់ផ្អើលនេះ។ ការបែកធ្លាយដំណឹងនេះកើតមានឡើង បន្ទាប់ពីលោក Elon Musk បានសរសេរបង្ហោះលើបណ្ដាញទំនាក់ទំនងសង្គម Twitter កាលពីពេលថ្មីៗនេះថា លោកកំពុងពិចារណាបង្កើត Platform បណ្ដាញទំនាក់ទំនងសង្គមថ្មីមួយ។

ភាគហ៊ុនរបស់ក្រុមហ៊ុនបណ្ដាញទំនាក់ទំនងសង្គមផ្សេងៗទៀតរួមទាំង Platform របស់ក្រុមហ៊ុន Meta (ក្រុមហ៊ុនមេរបស់ Facebook) និងក្រុមហ៊ុន Snap ដែលជាក្រុមហ៊ុនមេរបស់ Snapchat Snap ផងក៏បានហក់ឡើងដែរនៅក្នុងការជួញដូរ។

លោក Elon Musk កាន់កាប់ភាគហ៊ុនរបស់ក្រុមហ៊ុន Twitter រហូតដល់ទៅ៧៣,៥លានភាគហ៊ុនដែលមានតម្លៃសរុបរហូតដល់ទៅ២,៩ពាន់លានដុល្លារ នេះបើផ្អែកលើលទ្ធផលបិទការជួញដូរកាលពីថ្ងៃសុក្រ សប្ដាហ៍កន្លងទៅ។

លោក Elon Musk គឺជាអ្នកប្រើប្រាស់បណ្ដាញទំនាក់ទំនងសង្គម Twitter ដ៏ល្បីល្បាញម្នាក់ដែលមានអ្នកតាមដាន (Follower) រហូតដល់ទៅជាង៨០លាននាក់ចាប់តាំងពីលោកប្រើប្រាស់បណ្ដាញទំនាក់ទំនងសង្គមនេះក្នុងឆ្នាំ២០០៩ និងធ្លាប់បានប្រើប្រាស់វាដើម្បីធ្វើការប្រកាសដែលបង្កការភ្ញាក់ផ្អើលជាច្រើនលើក។

ទោះជាយ៉ាងណា លោកក៏បានរិះគន់បណ្ដាញទំនាក់ទំនងសង្គមមួយនេះ និងគោលការណ៍នានារបស់វាជាញឹកញាប់ ហើយបានលើកឡើងថា ក្រុមហ៊ុននេះកំពុងធ្វើឱ្យខូចលទ្ធិប្រជាធិបតេយ្យតាមរយៈការមិនប្រកាន់ខ្ជាប់នូវគោលការណ៍សេរីភាពនៃការបញ្ចេញមតិ។

លោក Elon Musk ក៏ជាស្ថាបនិក និងជានាយកប្រតិបត្តិក្រុមហ៊ុន SpaceX និងជាអ្នកដឹកនាំក្រុមហ៊ុន Neuralink ដែលជាក្រុមហ៊ុនផលិតបន្ទះឈីបខួរក្បាល (brain-chip) ទើបបង្កើតថ្មី និងក្រុមហ៊ុនហេដ្ឋារចនាសម្ព័ន្ធ The Boring Company ផងដែរ៕ Reuters៕