ដោយៈយិន លាងគង់ ស្ថាបនិក និងជាអគ្គនាយកគេហទំព័រ Propertyarea.asia

ព្រះសីហនុៈ សម្លេងព្រះសង្ឃសូត្រធ៌មនៅវត្តលើ ក្រុងព្រះសីហនុនៅតែលាន់ឮរងំដដែល ហើយទិដ្ឋភាពជាក់ស្តែងនៃទីក្រុងនេះបាននិងកំពុងវិលមកកាន់សភាពដើមបន្តិចម្តងៗ ប៉ុន្តែវាទាមទារឲ្យអ្នកអត់ធ្មត់បន្តិច។

ប៉ុន្តែបើធៀបនឹងកាលពីឆ្នាំ២០១៦ អ្នកគួរទទួលនូវការអបអរសាទរ នូវអ្វីដែលជាសមិទ្ឋផលនាថ្ងៃនេះ ដែលប្រជាពលរដ្ឋកម្ពុជាស្ទើរ១០០ភាគរយ មិនដែលជឿថា ក្រុងជាប់មាត់សមុទ្រមួយនេះបានផ្លាស់ប្តូរលឿនបែបនេះឡើយ។

ប៉ុន្តែទីបំផុតអ្វីៗបានមកដល់ ហើយអ្វីដែលពលរដ្ឋកម្ពុជាមិនជឿ បានជឿ និងឃើញយ៉ាងប្រត្យក្រ។

ជាទីក្រុងធ្លាប់ស្ងប់ស្ងាត់ ក៏បានចាប់ផ្តើមមានភាពអ៊ូរអរបណ្តើរៗ ជាមួយកំនើនប្រជាពលរដ្ឋក្នុងស្រុក ពិសស​លំហូរជនជាតិចិន ដែលជាអ្នកជំនាញ និងអ្នកវិនិយោគ។ ប៉ុន្មានឆ្នាំជាបន្តបន្ទាប់ទីក្រុងនេះ កាន់តែមានសភាពគគ្រឹកគគ្រេង ផ្លូវដែលមិនដែលកកស្ទះចរាចរណ៍ មកជាកកស្ទះ ផ្ទះសំណាក់ សណ្ឋាគារបានឡើងថ្លៃ ចរន្តនៃការទិញលក់ដីធ្លីបានកើនឡើងយ៉ាងគំហុក ដែលធ្វើឲ្យតម្លៃព្រះធរណីក្នុងទីក្រុង និងតំបន់ជុំវិញទីក្រុងនេះ កើនឡើងខ្ពស់រហូតដល់១០០០ភាគរយឬលើសពីនេះ។

ព្រះអាទិត្យលិចនៅក្រុងព្រះសីហនុ និងត្រៀមរះឡើងវិញ
ជាមួយលំហូរជនជាតិចិន មានទាំងអ្នកល្អ និងក្រុមអ្នកលេងបានធ្វើ ឲ្យរដ្ឋាភិបាល សម្រេចចិត្តយ៉ាងតក់ក្រហល់ ដើម្បីបិទហ្គេមឡនឡាញ ជាអាជីវកម្មកាស៊ីណូ ដែលបានធ្វើឲ្យទីក្រុងនេះលេចឡើង នូវពន្លឺភ្លើងព៌ណ ប្រៀបដូចជាទីក្រុងម៉ាកាវ ប្រទេសចិន ស្របពេលវត្តមានអាគារខ្ពស់ៗកើនឡើងដូចផ្សិត និងលូតទៅលើមេឃជារៀងរាល់ថ្ងៃ។

សម្លេងកម្មករ និងឧបករណ៍ទំនើបនានា ដើម្បីលើកដែក ស៊ីម៉ងត៍នៅតាមការដ្ឋានសំណង់ បានលាន់លឺពេញទីក្រុងនេះ ខណៈប្រជាជនមូលដ្ឋាន អ្នកវិនិយោគក្នុងស្រុក កម្មករ អ្នករត់តុក តុក និងប្រជាពលរដ្ឋធ្លាប់ក្រីក្រ បានក្លាយជាអ្នកមានយ៉ាងឆាប់់រហ័ស ដោយសារលក់ដីរបស់ពួកគេ។

៥ឆ្នាំអ្វីៗបានផ្លាស់ប្តូរទាំងស្រុង
ទីក្រុងដែលធ្លាប់តែមានអាគារខ្ពស់បំផុត១០ជាន់នេះ បានផ្លាស់ប្តូរមុខមាត់ទាំង​ស្រុង ជាមួយនឹងវត្តមានអាគារកប់ពពកកំពស់ពី៥ជាន់ ដល់៥៣ជាន់កើនឡើងដល់៦០៤អគារ ដោយទាក់ទាញលំហូរទុនវិនិយោគពីអ្នកវិនិយោគជាតិ អន្តរជាតិ ពិសេសអ្នកវិនិយោគចិនប្រមាណ៨០០០លានដុល្លារអាមេរិក។

អភិបាលខេត្តព្រះសីហនុ លោក គួច ចំរើន ដែលបានទៅកាន់ដំណែងជាថ្នាក់ដឹកនាំខេត្តនេះ បន្ទាប់ពីអគារសាងសង់គ្មានស្តង់ដាបច្ចេកទេសមួយបានដួលរលំ បានមានប្រសាសន៍ថា ការគ្រប់គ្រង និងអភិវឌ្ឍន៍លើវិស័យសំណង់ នៅទូទាំងខេត្តព្រះសីហនុ គឺមានភាពរីកចម្រើនខ្លាំងគួរឱ្យកត់សម្គាល់ ជាពិសេសបានទាក់ទាញលំហូរទុនវិនិយោគ នៅក្នុងវិស័យនេះបានរហូតដល់ជិត៨០០០លានដុល្លារ។

លោកបញ្ជាក់ថា “គិតចាប់ពីឆ្នាំ២០១៧ រហូតដល់ខែឧសភា ឆ្នាំ២០២០កន្លងទៅនេះ កំនើនគម្រោងសាងសង់នៅទូទាំងខេត្ត ដែលទទួលបានលិខិតអនុញ្ញាត មានចំនួន១៣៥៥គម្រោង នៅលើផ្ទៃក្រឡាសំណង់សរុប១៣.១០៧.២០៩ ម៉ែត្រការ៉េ ដែលមានទុនវិនិយោគសរុប៧០៩៩លានដុល្លារសហរដ្ឋអាមេរិក។

ស្វាគមន៍ទេសចរណ៍ និងវិនិយោគិនជាមួយហេដ្ឋារចនាសម្ព័ន្ឋថ្មីទាំងស្រុង ជាមួយនឹងគោលដៅប្រែក្លាយទីក្រុងនេះ ជាទីក្រុងនៃការអភិវឌ្ឍបែបពហុបំណង តាមលំនាំទីក្រុងស៊ិនជិន ប្រទេសចិន ប្រមុខនៃរាជរដ្ឋាភិបាលកម្ពុជា បានធ្វើវិភាជន៍ថវិកា ប្រមាណ៣០០លានដុល្លារអាមេរិក ដើម្បីសាងសង់ផ្លូវចំនួន៣៤ខ្សែ នៅទូទាំងក្រុងព្រះសីហនុ ប៉ុន្តែគំរោងនេះមិនគ្រប់គ្រាន់ទេ ដោយរាជរដ្ឋាភិបាល តាមរយៈក្រសួងសាធារណៈការ និងដឹកជញ្ជូន បានបន្ថែម​ការស្ថាបនាផ្លូវថ្មីចំនូន១២ខ្សែបន្ថែមទៀត ដើម្បីប្រែក្លាយ និងពង្រីកសក្តានុពលខេត្តនេះឲ្យបានពេញលេញ។

ជាលទ្ឋផលរហូតមកទល់ពេលនេះ ក្រុងព្រះសីហនុ បានផ្លាស់ប្តូរមុខមាត់ទាំង​ស្រុង ទាំងហេដ្ឋារចនាសម្ព័ន្ឋ ទាំងវត្តមានអាគារកប់ពពក ទាំងការផ្លាស់ប្តូរជីវភាពរបស់ប្រជាពលរដ្ឋ និងផែនការអភិវឌ្ឍថ្មី បន្ទាប់ពីប្រមុខរាជរដ្ឋាភិបាលសម្តេចតេជោហ៊ុន សែន​បានបង្កើតគណៈកម្មាធិការអន្តរក្រសួង ដើម្បីរៀបចំធ្វើឲ្យទីក្រុងនេះ ក្លាយជាទីក្រុងទំនើ​ប ស៊ីវិល័យ និងទាក់ទាញអ្នកវិនិយោគជាតិ អន្តរជាតិកាន់តែច្រើនថែមទៀតនាពេលអនាគត។

ត្រលប់ទៅកាន់អតីតកាល កាលពីឆ្នាំ២០១៥ រាជរដ្ឋាភិបាលបានដាក់ទីក្រុងនេះ ទៅក្នុងគោលនយោបាយអភិវឌ្ឍន៍ វិស័យឧស្សាហកម្មឆ្នាំ២០១៥ ២០២៥ជាលើកដំបូង ហើយទីក្រុងនេះបានស្ថិត​នៅក្នុងគោលនយោបាយអភិវឌ្ឍន៍ នៃគំនិតផ្តួចផ្តើមខ្សែក្រវ៉ាត់១ និងផ្លូវ១ របស់រដ្ឋាភិ​បាលចិន។

មូលដ្ឋាននៃបណ្តុំមូលដ្ឋានសក្តានុពលសេដ្ឋកិច្ច
តាមរយៈគោលនយោបាយ និងចក្ខុវិស័យដ៏មុតស្រួច របស់ប្រមុខរាជរដ្ឋាភិបាលកម្ពុជា ហេដ្ឋារចនាសម្ព័ន្ឋធំៗលំដាប់អន្តរជាតិ បានចាប់ផ្តើមវិនិយោគ ជាក់ស្តែងផ្លូវរថភ្លើ​ង​ត្រូវបាន ដាក់ឲ្យដំណើរការយ៉ាងលឿន ពិសេសហេដ្ឋារចនាសម្ព័ន្ឋធំៗជាច្រើនបានបញ្ចប់ និងកំពុងសាងសង់ ដូចជា ព្រលានយន្តហោះអន្តរជាតិខេត្តព្រះសីហនុ ដែលបានពង្រីករហូតដល់៣២០០ម៉ែត្រ សំរាប់ផ្លូវរត់របស់យ​ន្តហោះ ដែលអនុញញ្ញាត្តឲ្យយន្តហោះ​ខ្នាតធំអាចចុះចតបាន និងផ្លូវល្បឿនលឿនជាប្រវត្តិសាស្រ្តភ្នំពេញ ខេត្តព្រះសីហនុបាននិងកំពុងសាងសង់យ៉ាងសកម្ម។

អ្វីកាន់តែពិខសេសរដ្ឋាភិបាល ក៏បានអនុញ្ញាត្តឲ្យក្រុមហ៊ុនចិន សិក្សាលទ្ឋភាព ដើម្បីស្ថាបនាផ្លូវរថភ្លើងល្បឿនលឿន តភ្ជាប់ពីភ្នំពេញ ទៅកាន់ខេត្តនេះផងដែរ។

កំពង់ផែទឹកជ្រៅតែមួយគត់ នឹងត្រូវអភិវឌ្ឍន៍នៅជំហ៊ានទី៣ នៅឆ្នាំ២០២២ខាងមុខ ដែលមានជម្រៅទឹក១៨ម៉ែត្រ និងអាចអនុញ្ញាត្តឲ្យកប៉ាល់ដឹកទំនិញធំៗ លំដាប់ពិភព​លោកអាចចូលចតបាន ដែលធ្វើឲ្យកម្ពុជាកាន់តែមានឯករាជ្យភាពផ្នែកសេដ្ឋកិច្ច ដោយកាត់បន្ថយការពឹងផ្អែកប្រទេ​សជិតខាង។

តារារះនាទិសនារតី
ក្រៅពីផែនការអភិវឌ្ឍន៍របស់រដ្ឋាភិបាល និងការគាំទ្ររបស់វិស័យឯកជន ខេត្តព្រះសីហនុក៏មានគ្រាប់ពេជ្រដ៏អស្ចារ្យ ដូចខេត្តជាប់តំបន់ឆ្នេរដទៃទៀត គឺឆ្នេរសមុទ្រដ៏ស្រស់ស្អាត ដែលត្រូវបានដាក់បញ្ចូលក្នុងក្លឹប “ឆ្នេរស្អាតជាងគេលើពិភពលោក”ផងដែរ ដោយ​សារតំបន់ឆ្នេរកម្ពុជា ពិសេសកោះរ៉ុង និងកោះរ៉ុងសន្លឹម កោះសន្យា កោះក្របី កោះតាគៀវ កោះឬស្សីជាដើម សុទ្ឋតែស្ថិតក្នុងបញ្ជីរឆ្នេរស្អាត និងល្បីល្បាញលើពិភពលោក។

សម្បត្តិធម្មជាតិ ដែលចាយមិនចេះអស់នេះ មិនទាន់ប្រើប្រាស់អស់លទ្ឋភាពនៅឡើយ ដោយសារការផ្សព្វផ្សាយ និងធនធានមនុស្សនៅមានកម្រិត។

ព្រះសូរិយាត្រៀមនឹងរះចែងចាំងឡើងវិញ

ព្រះអាទិត្យថ្មី ត្រៀមរះនៅក្រុងព្រះសីហនុជាថ្មី បន្ទាប់ពីវិបត្តិសេដ្ឋកិច្ចសកល ដែលបណ្តាលមកពីជំងឺកូវីដ១៩ ប៉ុន្តែការគ្របដណ្តប់លើការចាក់វ៉ាក់សាំងយ៉ាងលឿន បានធ្វើឲ្យកម្ពុជាលើកពានថ្មីមួយ ដែលអាចចាក់វ៉ាក់សាំងបានលឿនជាងគេក្នុងតំបន់ បើទោះបីប្រទេសនេះស្ថិតនៅក្នុងនាមជាប្រទេស មានប្រាក់ចំណូលមធ្យមកម្រិតទាបក្តី។

អ្នកវិនិយោគចិន និងអន្តរជាតិដទៃទៀត ដែលបានចាក់លុយរបស់ពូកគេនៅទីក្រុងនេះ រាប់រយលានដុល្លារបានត្រៀមវេចបង្វិច មកមើលគំរោងរបស់ពូកគេ និងទាញលុយត្រលប់ទៅវិញ (Return of Investment) ខណៈគោលនយោបាយរបស់កម្ពុជា កាន់តែបើកចំហរ ទំនាក់ទំនងរវាងរដ្ឋាភិបាលកម្ពុជា ចិនកាន់តែស្អីតរមួត បន្ទាប់ពីប្រទេសទាំងពីរបានផ្លាស់ប្តូរពីមិត្តភាពធម្មតា មកជាដៃគូយុទ្ឋសាស្រ្តគ្រប់ជ្រុងជ្រោយ និងកំពុងប្រែក្លាយជា “សហគមន៍ពីរ វាសនាតែមួយ”។

ការរីកចម្រើនរបស់កម្ពុជា មិនអាចកាត់ផ្តាច់ពីចិនឡើយ ដោយរដ្ឋាភិបាល និងអ្នក​វិនិយោគចិនបាន និងកំពុងពង្រីកមូលដ្ឋាន នៃការយល់ដឹងពីគ្នាទៅវិញទៅមក និងផ្តល់ផលប្រយោជន៍ឲ្យគ្នាទៅវិញទៅមក ក្នុងនាមជាមិត្តដែកថែប ដែលមិនអាចបំបែកបាន។

សម្លេងភ្លេងការចាប់ផ្តើមប្រគុំឡើងវិញហើយ ក្រោយពេលកម្ពុជាទទួ​ល​បានជោគជ័យ ក្នុងការប្រយុទ្ឋនឹងជំងឺកូវីដ១៩ ដែលធ្វើឲ្យប្រទេសនេះក្លាយជាប្រទេសឈានមុខគេនៅតំបន់អាស៊ី ក្នុងនាមជាដែនដីមួយដែលមានភាពបើកចំហ ជាលើកដំបូងដោយទទួលភ្ញៀវអន្តរជាតិ ចូលមកកាន់ប្រទេសនេះ ដោយមិនចាំបាច់ធ្វើចត្តាឡីស័ក។

បទបាយខុនចងដៃ ហាក់បាននិងកំពុងអន្ទងទឹកចិត្ត អ្នកវិនិយោគជាតិ អន្តរជាតិសម្លឹងមកកាន់ទីនេះ ខណៈវិនិយោគិនចិនមួយចំនួនបាន វេចបង្វិចមកដល់ក្រុងនេះបណ្តើរៗឡើងវិញហើយ ដើម្បីមកប្រគុំសូរសៀងដែលច្របាច់បញ្ចូលគ្នារវាងសម្លេងពិន និងឃឹមខ្មែរ ដែលមានសូរសៀងប្រហាក់ប្រហែលគ្នា៕

ដោយៈស៊ីវ ម៉េង

ភ្នំពេញៈ រដ្ឋាភិបាលបានដាក់ផែនការ ក្នុងការពង្រីកផ្ទៃរាជធានីភ្នំពេ​ញ ក្នុងកាំរងង្វង់៣០គីឡូម៉ែត្រក្រឡា នៅត្រឹមឆ្នាំ២០៣៥ខាងមុខ ដែលធ្វើឲ្យអ្នករស់នៅជាយរាជធានី ដែលជាដែនដីគ្រោងកាត់ចូល ដែនរដ្ឋបាលក្រុងលេបទឹកមាត់។

ហេតុអ្វីត្រូវលេបទឹកមាត់? មូលហេតុគឺដោយសារកត្តាសំខាន់ៗមួយចំនួនដូចជា ទី១ ការកើនឡើងតម្លៃដីធ្លីជាស្វ័យប្រវត្តិ​ ទី២ ហេដ្ឋារចនាស ម្ព័ន្ឋសំខាន់ៗ នឹងទៅដល់មាត់ទ្វារផ្ទះរបស់ពួកគេ ទី៣ ការរីកចម្រើនសេដ្ឋកិច្ចមូលដ្ឋាន នឹងមានភាពល្អប្រសើរឡើង និងទី៤ ពួកគេក្លាយជាប្រជាពលរដ្ឋរស់នៅក្នុងទីក្រុងមួយ ដែលកាន់តែធ្វើឲ្យគុណភាពជីវិតរបស់ពួកគេប្រសើរឡើង និងរស់នៅប្រកបដោយភាពស៊ីវិល័យ។

អ្នកជំនាញបានមើលឃើញរួចហើយថា តម្លៃដីធ្លីបានហក់ឡើ​ងខ្ពស់ នៅពេលរដ្ឋាភិបាលប្រកាសពីផែនការ ប្រើប្រាស់ប្លង់គោលដីធ្លី សម្រាប់ឆ្នាំ២០៣៥ខាងមុខ ដែលផែនការនេះនឹងកាត់បញ្ចូល ភាគខាងជើងនៃខេត្តកណ្តាល ស្ទើរតែទាំងអស់ចូលមកក្នុងផែនរដ្ឋបាលរាជធានី។

ទោះជាយ៉ាងណា លោកប៉ូ អ៊ាវគង់ នាយកប្រតិបត្តិក្រុមហ៊ុនអចលនទ្រព្យ Advance មិនសូវមានសុទិដ្ឋិនិយមពីល្បឿន នៃ​ការរីកចម្រើននោះទេ ដោយលោកបានមានប្រសាសន៍ថា ការពង្រីកក្រុងភ្នំពេញ វាអាចលឿនរហ័ស អាស្រ័យលើកំណើនប្រជាជនលឿន ឬយឺតដូចគ្នា។ បើសិនជាកំនើនលឿន លទ្ធភាពនៃការពង្រីកក៏កាន់តែលឿនដែរ តែបើសិនជាកំណើនប្រជាជន នៅរាជធានីភ្នំពេញកើនយឺត ក៏លទ្ធភាពនៃការពង្រីករាជធានីក៏យឺតដូចគ្នាដែរ ។

លោកបន្តថា “ក្នុងរយៈពេល៥ឆ្នាំទៅមុខទៀត ខ្ញុំគិតថា ទឹកដីរាជធានីវាមិនអាចពង្រី​កឱ្យផុតទឹកដីខេត្តកណ្ដាលទេ បើយើងគិតតាមប្រជាសាស្ត្រ ពីព្រោះការពង្រីក ការពង្រីកក្រុង ដើម្បីឱ្យវាមានប្រសិទ្ធភាព គឺទាមទារឱ្យមានការរៀបចំរចនាសម្ព័ន្ធ និងការរៀបចំប្លង់មេត្រឹមត្រូវ”។ លោកបន្ថែមថា “បើពុំមានផែនការច្បាស់លាស់ទេ ការបង្កើតក្រុងមានឈ្មោះតែនៅក្នុងក្រុងភ្នំពេញ តែការរស់នៅវិញគឺមិនខុសពីនៅខេត្តទេ”។

ជាមួយគ្នានេះ លោកឧកញ៉ាកាង សុធី អគ្គនាយកក្រុមហ៊ុនអចលនទ្រព្យ Century 21 Land Station ក៏បានលើកឡើងផងដែរថា ការពង្រីករាជធានីភ្នំពេញ អាចធ្វើទៅបានគឺមានតែការកាត់យកដី ខេត្តនៅជាប់រាជធានីភ្នំពេញ មកស្ថិតនៅក្រោមការគ្រប់គ្រង របស់រដ្ឋបាលរាជធានីភ្នំពេញប៉ុណ្ណោះ ។

លោកបន្តថា “នៅពេលរដ្ឋាភិបាលពង្រីកទីក្រុងភ្នំពេញ ជាបន្តបន្ទាប់ នឹងធ្វើឱ្យសក្ដានុពលដីធ្លី នៅតំបន់ជាប់រាជធានីភ្នំពេញ ស្ទុះងើបមួយកម្រិតទៀតផងដែរ”។

ខេត្តជាប់រាជធានីភ្នំពេញ នៅពេលនេះគេអាចរកទិញបានក្នុងតម្លៃមួយទាប ប៉ុន្តែនៅពេលដែលមានការពង្រីករាជធានីភ្នំពេញ តម្លៃដីធ្លីនឹងមានការកើនឡើងទ្វេដង ឬអាចច្រើនជាងនេះបន្ថែមទៀត អាស្រ័យទៅលើ​សក្ដានុនៃតំបន់ទាំងនោះ។

ជាក់ស្ដែងតម្លៃដីធ្លី នៅតំបន់ព្រលានយន្តហោះអន្តរជាតិភ្នំពេញ កាលពីមុនគេឃើញថា ក្នុងកម្រិតមួយទាប ហើយក៏មិនសូវមានអ្នកចាប់អារម្មណ៍ដែរ តែពេលដែលមានការអភិវឌ្ឍឡើង តម្លៃដីធ្លីក៏ហក់ងើបឡើងជាមុនគួរឱ្យកត់សម្គាល់ផងដែរ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានមានប្រសាសន៍ថា ជានិន្នាការធម្មតា ដែលរដ្ឋាភិបាលត្រូវពង្រីកទីក្រុងបន្ថែម ព្រោះពីមុនរដ្ឋាភិបាលធ្វើយ៉ាងណាទាក់ទាញ ប្រជាពល​រដ្ឋមករស់នៅទីក្រុងចាស់ (ដែនដីបច្ចុប្បន្ននៃរាជធានីភ្នំពេញ) ដើម្បីឲ្យប្រជាពលរដ្ឋមករស់នៅច្រើន ដើម្បីជំរុញសកម្មភាបសេដ្ឋកិច្ច។

លោកបន្តថា ប៉ុន្តែបច្ចុប្បន្នរាជធានីភ្នំពេញ មានមនុស្សរស់នៅច្រើនហើយ ការកកស្ទះចរាចរណ៍កាន់តែអាក្រក់ ហេតុនេះរដ្ឋាភិបាលចាំាំបាច់ត្រូវផ្លាស់ប្តូររោងចក្រ សហគ្រាសទៅតំបន់ជាយក្រុង ហើយត្រូវពង្រីករាជធានីភ្នំពេញបន្ថែមទៀត ដើម្បីឆ្លើយតបនឹងការរីកចម្រើន ផ្នែកនគរូបនីយកម្មផង និងឆ្លើយតបនឹងកំនើនប្រជាពលរដ្ឋផង។

ទោះជាយ៉ាងណាអ្នកជំនាញដទៃទៀត បានមើលឃើញផងដែរថា ការពង្រីករាជធានីជារឿងល្អប្រសើរមួយ ប៉ុន្តែរាជរដ្ឋាភិបាលនឹងរងសម្ពាធខ្លាំងផងដែរ ដែលត្រូវវិភាជន៍ថវិកាជាតិ សាងសង់ហេដ្ឋារចនាសម្ព័ន្ឋនានាទាំងទឹកស្អាត អគ្គិសនី និងបណ្តាញផ្លូវថ្នល់ ពិសេសបើសិនជាមិនបានរៀបចំផែនទីប្រើប្រាស់ដីបានលំអិតទេ ការអភិវឌ្ឍន៍រាជធានី នឹងមិនទទួលបានសោភ័ណភាព និងររបៀបរៀបរយ សមស្របនឹងនិន្នាការអភិវឌ្ឍន៍ទីក្រុងប្រកបដោយភាពស៊ីវិល័យនោះទេ៕

ដោយៈគង់ សូរិយា

ភ្នំពេញៈ តំបន់ស្ថិតនៅជាប់់មហាវិថីឈ្នះ ឈ្នះបាននិងកំពុងក្លាយជាទីតាំងអភិវឌ្ឍន៍ សាងសង់បុរីយ៉ាងសកម្ម ខណៈសកម្មភាពរថយន្តដឹកដីបាននិងកំពុងធ្វើសកម្មភាពចាក់ដីយ៉ាងសកម្មនៅតំបន់នេះ។

តំបន់ស្ថិតនៅសងខាងមហាវិថីនេះ ពីមុនសុទ្ឋតែជាផ្ទៃបឹង ប៉ុន្តែបច្ចុ​ប្បន្នផ្ទៃបឹងកប់ស្រូវ ឬបឹងតាមោឃ ស្ថិតនៅចំណុចនៃគម្រោងសាងសង់ផ្សារដើមគរ ដើម្បីធ្វើជាទីតាំបោះដុំបន្លែ បាននិងកំពុងក្លាយជាទីតាំងសាងសង់បុរីយ៉ាងសកម្ម ប៉ុន្តែធូរលីដីបាននិងកំពុងរំខាន ដល់ការរស់នៅតំបន់នេះផងដែរ។

ជាមួយគ្នានេះ បុរីវិមានសំណាងទំហំជាង២០ហិកតា បាននិងកំពុងលេចវត្តមាននៅតំបន់នេះផងដែរ ដែលបុរីនេះសាងសង់លំនៅដ្ឋានសម្រាប់អ្នកមានប្រាក់ចំណូលមធ្យមកម្រិតខ្ពស់ រហូតដល់កម្រិតអភិជន។

សហស្ថាបនិក និងជាអគ្គនាយកគេហទំព័រ Propertyarea.asia ដែលបានធ្វើដំណើរឆ្លងកាត់មហាវិថីឈ្នះ ឈ្នះពីចំណុចប្រសព្វមហាវិថីហាណូ​យ រហូតដល់ផ្លូវជាតិលេខ៤ កាលពីពេលថ្មីៗនេះ បានមានប្រសាសន៍ ឲ្យដឹងកាលពីថ្ងៃទី៣១ មករាកន្លងមកថា ដោយសារការរីកចម្រើននៃរាជធានីភ្នំពេញ និងកំណើនប្រជាពលរដ្ឋប្រចាំឆ្នាំ ចូលមករស់នៅទីក្រុងនេះចន្លោះពី២៥ ទៅ៣០ម៉ឺននាក់ជារៀងរាល់ឆ្នាំ បានធ្វើឲ្យរាជធានីភ្នំពេញត្រូវពង្រីកជាប្រចាំ ហេតុនេះការពង្រីកការអភិវឌ្ឍន៍៍របស់ផ្នែកឯកជន ទៅកាន់តំបន់នេះ មិនមែនជារឿងចៃដន្យនោះទេ។

លោកបន្តថា “កំណើនប្រជាសាស្រ្ត បានផ្សារភ្ជាប់ជាមួយនឹងការរីកចម្រើនផ្នែកនគរូបនីយកម្ម ហេតុនេះការរីកចម្រើននៃរាជធានីភ្នំពេញ ទៅកាន់ទិសទាំងបួន នឹងកាន់តែធំធាត់ឡើង”។ លោកបន្តថា “ហេតុនេះហើយទើបរាជរដ្ឋាភិបាល នឹងពង្រីករាជធានីភ្នំពេញ ក្នុងកាំរង្វង់ ៣០គីឡូម៉ែត្រក្រឡានៅឆ្នាំ២០៣៥ខាងមុខនេះ”។

លោកយិន លាងគង់បានបន្តថា ការរីកចម្រើនក្រុងភ្នំពេញ និងការអភិវឌ្ឍន៍ហេដ្ឋារចនាសម្ព័ន្ឋរបស់រដ្ឋាភិបាល ពិសេសការរុញក្រសួង និងស្ថាប័នជាតិមួយចំនួនទៅកាន់តំបន់កប់ស្រូវ នឹងធ្វើឲ្យតំបន់នេះ មានការរីកចម្រើនយ៉ាងឆាប់រហ័ស នៅរយៈពេល៣ទី៥ឆ្នាំខាងមុខនេះ ពិសេសតំបន់នេះនឹងក្លាយជា CBD (តំបន់អភិវឌ្ឍន៍មជ្ឈមណ្ឌលពាណិជ្ជកម្ម) ថ្មីមួយនាពេលអនាគត៕