ពិធីចុះហត្ថលេខាជាផ្លូវការ អនុស្សរណៈនៃការយោគយល់អំពីកិច្ចសហការពាណិជ្ជកម្ម និងអត្ថប្រយោជន៍បុគ្គលិក រវាងក្រុមហ៊ុន អ័រគីដេ ឌីវែឡុបម៉ិន និងធនាគារពាណិជ្ជកម្មក្រៅប្រទេស នៃកម្ពុជា

ដោយ សហការី

រាជធានីភ្នំពេញ៖ ទន្ទឹមនឹងការវិនិយោគលើវិស័យអចលនទ្រព្យកាន់តែរីកចម្រើនឥតឈប់ឈរនៅព្រះរាជាណាចក្រកម្ពុជា វិស័យធនាគារក៏បានដើរតួនាទីយ៉ាងសំខាន់ក្នុងការផ្តល់សេវាកម្មធនាគារ និងហិរញ្ញវត្ថុផ្សេងៗ កម្ចីលើការវិនិយោគលើធុរកិច្ច អាជីវកម្ម និងគម្រោងអភិវឌ្ឍន៍ផ្សេងៗរបស់សហគ្រាសឯកជន ក៏ដូចជាការផ្តល់ឥណទានជាលក្ខណៈឯកត្តជនជូនដល់ប្រជាពលរដ្ឋផងដែរ ។

ដើម្បីឆ្លើយតបទៅនឹងកំណើនតម្រូវការសេវាកម្ម និងឥណទានលំនៅឋានរបស់ប្រជាពលរដ្ឋកម្ពុជា និយោជិតក្រុមហ៊ុន ក៏ដូចជាអតិថិជន ក្រុមហ៊ុន អ័រគីដេ ឌីវែឡុបម៉ិន បាននិងកំពុងសហការជាមួយធនាគារនានា​ក្នុងនោះមាន ធនាគារពាណិជ្ជកម្មក្រៅប្រទេស នៃកម្ពុជា ហៅកាត់ថា FTB ជាធនាគារពាណិជ្ជទី១នៅកម្ពុជាដែលទទួលបានការទុកចិត្តចាប់តាំងពីឆ្នាំ១៩៧៩​ និងជាដៃគូធុរកិច្ចដ៏សំខាន់ និងយូរអង្វែងមួយរបស់ក្រុមហ៊ុន។

កិច្ចសហការនេះត្រូវបានពង្រីកមួយកម្រិតថែមទៀតតាមរយៈ ពិធីចុះហត្ថលេខាជាផ្លូវការ អនុស្សរណៈនៃការយោគយល់ អំពីកិច្ចសហការពាណិជ្ជកម្ម និងអត្ថប្រយោជន៍បុគ្គលិក រវាងក្រុមហ៊ុន អ័រគីដេ ឌីវែឡុបម៉ិន ជាមួយ ធនាគារពាណិជ្ជកម្មក្រៅប្រទេស​ នៃកម្ពុជា ដែលត្រូវបានប្រារព្ធឡើងកាលពីថ្ងៃទី៣១ ខែមីនា ឆ្នាំ២០២២ នៅ(ទីកន្លែងចុះហត្ថលេខា) ដើម្បីផ្តល់ភាពងាយស្រួលជាពិសេសជូនដល់បុគ្គលិកធនាគារ FTB ដែលមានបំណងចង់វិនិយោគ ទិញលំនៅឋានពីគម្រោងណាមួយរបស់ ក្រុមហ៊ុនអ័រគីដេ ។


កិច្ចសហការដៃគូពាណិជ្ជកម្មនេះ គឺអតិថិជនដែលទិញផ្ទះពី ក្រុមហ៊ុនអ័រគីដេ ឌីវែឡុបម៉ិន អាចស្នើប្រាក់កម្ចី ពីធនាគារពាណិជ្ជកម្មក្រៅប្រទេស នៃកម្ពុជា រហូតដល់ ៨០% ក្នុងទំហំទឹកប្រាក់សរុបនៃតម្លៃអចលនទ្រព្យ រីឯរយៈពេលកម្ចីគឺបានរហូតដល់ ២០ឆ្នាំ ក្នុងអត្រាការប្រាក់ប្រចាំឆ្នាំត្រឹមតែ ៩,៣៥% សម្រាប់ប្រាក់ដុល្លារ និងត្រឹមតែ ៨,៧៥% សម្រាប់ប្រាក់រៀល ស្ថិតក្នុងលក្ខខណ្ឌងាយស្រួលក្នុងការអនុម័តប្រាក់កម្ចី និងមានកម្មវិធីពិសេសសម្រាប់អតិថិជន​ ក៏ដូចជាបុគ្គលិកធនាគារផងដែរ។

ថ្លែងនៅក្នុងពិធីចុះហត្ថលេខានេះផងដែរ លោកជំទាវ ខៀវ សស៊ីលៀប នាយិកាប្រតិបត្តិទូទៅ ក្រុមហ៊ុន អ័រគីដេ ឌីវែឡុបម៉ិន មានប្រសាសន៍ថា “យើងមានមោទនភាពដែលបានសហការជាមួយ FTB ជាធនាគារពាណិជ្ជទី១នៅកម្ពុជាដែលទទួលបានការទុកចិត្តចាប់តាំងពីឆ្នាំ១៩៧៩ និងជាដៃគូធុរកិច្ចដ៏សំខាន់ និងយូរអង្វែងមួយរបស់ក្រុមហ៊ុន។ កិច្ចសហការមួយនេះផ្តល់ទំនុកចិត្ត ភាពងាយស្រួល និងសេវាឆាប់រហ័សលើការអនុម័តកម្ចីទិញផ្ទះជូនដល់អតិថិជនរបស់យើងផ្ទាល់ ហើយក៏មានជាកម្មវិធីប្រូម៉ូសិនពិសេសសម្រាប់អតិថិជន​ ក៏ដូចជាបុគ្គលិកធនាគារពាណិជ្ជកម្មក្រៅប្រទេស នៃកម្ពុជាផងដែរ។ នេះគឺជាកាលានុវត្តភាពមួយដែលផ្តល់ជូនយ៉ាងពិសេសដល់អតិថិជនទាំងអស់ ក៏ដូចជាបុគ្គលិកធនាគារផ្ទាល់។

ក្រុមហ៊ុន អ័រគីដេ ឌីវែឡុបម៉ិន និង ធនាគារពាណិជ្ជកម្មក្រៅប្រទេស នៃកម្ពុជា នឹងបន្តកិច្ចសហការជាដៃគូសម្រាប់គម្រោងផ្សេងទៀតនៅថ្ងៃអនាគត សំដៅរួមចំណែកអភិវឌ្ឍវិស័យអចលនទ្រព្យ និងវិស័យធនាគារ និងហិរញ្ញវត្ថុឲ្យមានការរីកចម្រើនខ្លាំងក្លាជាលំដាប់ និងប្រកបដោយនិរន្តរភាព។”

លោក ឌិត សុចល ប្រធាននាយកប្រតិបត្តិ ធនាគារពាណិជ្ជកម្មក្រៅប្រទេស នៃកម្ពុជា មានប្រសាសន៍ថា៖ “ស្របតាមទិសដៅអភិវឌ្ឍន៍របស់ធនាគារពាណិជ្ជកម្មក្រៅប្រទេស នៃកម្ពុជា (FTB) យើងនឹងបន្តពង្រីកសកម្មភាពប្រតិបត្តិការរបស់ខ្លួន និងលើកកម្ពស់កម្រិតស្តង់ដារសេវាកម្ម និងផលិតផលថ្មីៗ ដែលជាដំណោះស្រាយហិរញ្ញវត្ថុដ៏សមស្របជូនដល់អតិថិជន និងទីផ្សារ។ ទន្ទឹមគ្នានេះកិច្ចសហការរវាងធនាគារFTB ជាមួយនិង​ក្រុមហ៊ុន អ័រគីដេ ឌីវែឡុបម៉ិន ពិតជាឆ្លុះបញ្ចាំងនូវការយកចិត្តទុកដាក់ក្នុងការចូលរួមអភិវឌ្ឍវិស័យអចលនទ្រព្យ និងវិស័យធនាគារ​​ ក៏ដូចជាការផ្តល់ទំនុកចិត្តបន្ថែមទៀតជូនដល់អតិថិជនដែលកំពុងស្វែងរកនូវសេវាកម្ចីទិញលំនៅឋានសម្រាប់ការស្នាក់នៅប្រកបដោយផាសុកភាព​​ និងសម្រាប់ការវិនិយោគដែលទទួលបានផលចំណេញកាន់តែច្រើន ។ ជាមួយកម្ចីទិញលំនៅឋានរបស់ធនាគារ អតិថិជនពិតជាទទួលបាននូវភាពងាយស្រួលក្នុងការដំណើរការ​ ទទួលបានការអនុម័ត​រហ័ស​ កម្ចីមានរយ:វែង​ និងជាមួយអត្រាការប្រាក់ប្រកួតប្រជែង ជាពិសេសនោះ គឺអតិថិជនអាចទទួលបានឥណទានក្នុងកំឡុងពេលមិនទាន់មានប្លង់កម្មសិទ្ធិ»។​​


ក្រុមហ៊ុនអ័រគីដេ ឌីវែឡុបម៉ិន ជាក្រុមហ៊ុនមួយក្នុងចំណោមក្រុមហ៊ុនអភិវឌ្ឍន៍អចលនទ្រព្យឈានមុខគេនៅក្នុងប្រទេសកម្ពុជា បាននិងកំពុងធ្វើការអភិវឌ្ឍន៍លើគម្រោងមួយចំនួនដូចជា៖ គម្រោងអ័រគីដេ​ ដឹប៊ូតានិចស៊ីធី គម្រោងអ័រគីដេ ដឹពោធិ៍ចិនតុង និង គម្រោងខុនដូអ័រគីដេ ដឹរ៉ូយ៉ាល់ខុនដូមីនីម ដែលគម្រោងនីមួយៗត្រូវបានអភិវឌ្ឍនៅលើទីតាំងដែលមានសក្តានុពលខ្ពស់ ចរន្តសេដ្ឋកិច្ចល្អ មានភាពងាយស្រួលក្នុងការរស់នៅ និងប្រកបអាជីវកម្មនានា ជាពិសេសរួមមានគ្រប់ប្រភេទនៃលំនៅឋានដែលសមស្របទៅតាមតម្រូវការរបស់អតិថិជនទៀតផង។


គ្រប់គម្រោងទាំងអស់របស់ អ័រគីដេ ការបង់ប្រាក់ គឺមានភាពងាយស្រួល និងមានភាពបត់បែនបំផុតទៅតាមតម្រូវការ និងលទ្ធភាពរបស់អតិថិជន គឺអតិថិជនអាចធ្វើការបង់ប្រាក់ត្រឹមតែ ០,៨៣% តែប៉ុណ្ណោះក្នុងមួយខែ រហូតដល់ ២៤ ខែដោយគ្មានការប្រាក់ និងគ្មានប្រាក់កក់។ ចំពោះទំហំទឹកប្រាក់ដែលនៅសល់ អតិថិជនអាចស្នើកម្ចីពី ធនាគារដៃគូអ័រគីដេ FTB បានដោយស្វ័យប្រវត្តិ។

សម្រាប់ព័ត៌មានលម្អិត អតិថិជនអាចអញ្ជើញ ទៅសាកសួរព័ត៌មាននៅគ្រប់ការិយាល័យលក់ទាំងបីទីតាំងរួមមាន៖

– គម្រោងអ័រគីដេ ដឹប៊ូតានិចស៊ីធី ខណ្ឌជ្រោយចង្វារ តាមបណ្តោយផ្លូវជាតិលេខ៦អា ហួសស្ពានជ្រោយចង្វារ៧គ.ម បត់ឆ្វេងតាមស្តុបអ័រគីដេ។

– គម្រោងខុនដូអ័រគីដេ ដឹរ៉ូយ៉ាល់ខុនដូមីនីម តាមបណ្តោយផ្លូវ២០០៤ ទល់មុខសាលាអន្តរជាតិស៊ី-អាយ-អេ និងជាប់សាលាអន្តរជាតិណតប្រ៊ីត។

– គម្រោងអ័រគីដេ ដឹពោធិ៍ចិនតុង តាមបណ្តោយផ្លូវវត្តតាំងកសាង (ផ្លូវ១០៥K) ទល់មុខ អាកាសយានដ្ឋានអន្តរជាតិភ្នំពេញ។

ឬ ទំនាក់ទំនងតាមរយៈលេខទូរស័ព្ទ 098 73 3333 – 076 879 9999 – 085​ 388 388 – 095 277 277 ឬ ហ្វេសប៊ុកផេច https://www.facebook.com/orkide.development ​



តើប្រជាពលរដ្ឋក្រុងភ្នំពេញត្រៀមខ្លួនដូចម្តេច នៅសម្រាប់ទីក្រុងនេះមានមនុស្សរស់នៅជាង៦លាននាក់នៅឆ្នាំ២០៣០

ដោយៈជេស៊ីកា

ភ្នំពេញៈ កំនើនប្រជាពលរដ្ឋ និងលំហូរចូលរបស់ប្រជាពលរដ្ឋពីជន​បទមកកាន់រាជធានីភ្នំពេញ ចន្លោះពី ២៥ទៅ៣០ម៉ឺននាក់ក្នុងមួយឆ្នាំ នឹងធ្វើឲ្យទីក្រុងនេះជន់ជោរដោយមនុស្ស ជាមួយកំណើនការកកស្ទះចរាចរណ៍ដ៏អាក្រក់បំផុត។

សេនារីយោនេះ ហាក់មិនត្រូវបានផ្តោតការយកចិត្តទុកដាក់ខ្លាំង ពីថ្នាក់ដឹកនាំទីក្រុងនេះនៅឡើយទេ ព្រោះបញ្ហាអប់រំច្បាប់ចរាចរណ៍នៅមានកំរិត ដោយសារការដាក់បន្ទុកគ្នាទៅវិញទៅមក ការសាងសង់ហេដ្ឋារចនាសម្ព័ន្ឋ ពិសេសស្ពានអាកាសមួយចំនួន ដែលមិនអាចជួយសម្រួលចរាចរណ៍បាន ការកសាងផែនការមេ និងប្លង់គោលប្រើប្រាស់ដីលំអិត និងផែនការហេដ្ឋារចនាសម្ព័ន្ឋលំអិត ការបែងចែកហ្សូនសំរាប់ការសាងសង់ នៅតែគ្មានភាពច្បាស់លាស់ នឹងជាបញ្ហាប្រឈមធំមួយនាពេលអនាគត។

ការបើកបរប្រជែងគ្នា ដោយមិនគោរពខ្សែផ្លូវឬគំនូសផ្លូវរបស់ខ្លួន បានធ្វើឲ្យការធ្វើដំណើរ និងស្ថានភាពចរាចរណ៍ឥតសណ្តាប់ធ្នាប់ មានសភាពអាក្រក់បំផុត បើធៀបនឹងទីក្រុងនានាក្នុងតំបន់អាស៊ាន។

យោងតាមការសិក្សារបស់វិទ្យាស្ថានស្ថិតិបានបង្ហាញថា ចំនួនប្រជាពលរដ្ឋកម្ពុជា នឹងអាចកើ់នដល់ប្រមាណ១៨លាននាក់ នៅឆ្នាំ២០៣០ ហើយក្នុងចំណោមប្រជាជនទាំងនេះ មានចំនួន៣៦,៣ភាគរយ នឹងរស់នៅទីក្រុងភ្នំពេញ។

អ្នកស្រីអាន សុធីតា អគ្គនាយិកាក្រុមហ៊ុន PropNex Cambodia ដែលបានសិក្សាស្រាវជ្រាវពីទីផ្សារ និងបទពិសោធន៍មួយចំនួននៅតាមទីក្រុងក្នុងតំបន់បានមានប្រសាសន៍ថា រដ្ឋាភិបាលគួររៀបចំហ្សូនីង ឲ្យបានឆាប់រហ័ស ដើម្បីជម្រុញឲ្យការរៀបចំសាងសង់ និងផែនការដាក់ចេញនូវតំបន់ណាគួរសាងសង់អ្វី តំបន់ណាមិនគួរសាងសង់អគារខ្ពស់ៗជាដើម ដើម្បីធានាថាទីក្រុងនេះ រីកចម្រើនប្រកបដោយនិរន្តរភាព និងធ្វើឲ្យមានសុខមាលភាពសំរាប់ប្រជាពលរដ្ឋ។

អ្្នកស្រីបានបន្តថា “”បើធៀបនឹងទីក្រុងនានាក្នុងតំបន់ ចំនួនប្រជាពល​រដ្ឋកម្ពុជាគិតជាគីឡូម៉ែត្រ គឺមានចំនួនតិចនៅឡើយ ប៉ុន្តែរបៀបរបប​នៃការធ្វើដំណើរមានសភាពរញ៉េរញ៉ៃ និងកកស្ទះខ្លាំង”។

ជាមួយនឹងការមិនអើពើពីបណ្តាញផ្សព្វផ្សាយនានា ក្នុងការចូលរួមលើកកំពស់គុណភាពជីវិត ចូលរួមអប់រំសាធារណៈជន លើរបៀបរបបនៃកាេរប្រើប្រាស់ផ្លូវ បានធ្វើឲ្យការធ្វើដំណើរលើដងផ្លូវនានា នៅទីក្រុងភ្នំពេញ មានសភាពអាណាធិបតេយ្យគួរឲ្យខ្មាស់អៀន។

សហស្ថាបនិក និងជាអគ្គនាយកគេហទំព័រ Propertyarea.asia ដែលបានសិក្សាតាមដានពីនិន្នាការអភិវឌ្ឍន៍ទីក្រុង និងការរីកចម្រើននៃវិស័យអ​ចលនវត្ថុកម្ពុជាបានមានប្រសាសន៍ថា ក្រសួងសាធារណ​ៈការ និងផ្នែកជំនាញនិមួយៗ ដែលពាក់ព័ន្ឋមានសារៈសំខាន់ណាស់ ដើម្បីអប់់រំប្រជាពលរដ្ឋពីរបៀបនៃការធ្វើដំណើរ និងការប្រើប្រាស់ផ្លូវឲ្យបានត្រឹមត្រូវ។

លោកបន្តថា “ប្រសិនជាស្ថានភាពនីបន្តអាក្រក់បែបនេះ កំណើននៃ​ការកកស្ទះចរាចរណ៍ នឹងកាន់តែអាក្រក់ឡើងពីមួយថ្ងៃទៅមួយថ្ងៃ ដែលនាំឲ្យប្រជាពលរដ្ឋខាតបង់ពេលវេលា ប្រាក់កាសកាន់តែច្រើននៅលើដងផ្លូវ”។​លោកបន្តថា “រដ្ឋបាលរាជធានីភ្នំពេញ គួរសិក្សាពីផែនការមេរបស់ខ្លួនឡើងវិញ និងមានចក្ខុវិស័យច្បាស់លាស់ ដើម្បីកសាងទីក្រុងនេះមានភាពស៊ីវិល័យ និងគួរមានផែនការសាងសង់ ហេដ្ឋារចនាសម្ព័ន្ឋជាក់លាក់ និងរយៈពេលវែង ជាជាងរង់ចាំអង្គុយដោះស្រាយបញ្ហាមិនចេះចប់ មិនចេះហើយ”។

លោកយិន លាងគង់ បានបន្តថា ដោយសារការរីកចម្រើនសេដ្ឋកិច្ចយ៉ាងលឿន ក្នុងរយៈពេលលពីរទសវត្សរ៍ចុងក្រោយនេះ បានធ្វើឲ្យវិស័យឯកជនដើរនាំមុខវិស័យសាធារណៈ ដែលនេះជាបញ្ហាមួយដែលបាននិងកំពុងកើតមានសព្វថ្ងៃនេះ ជាក់ស្តែងបុរីរីកកាន់តែទៅកាន់ជាយក្រុង ប៉ុន្តែកង្វះហេដ្ឋារចនាសម្ព័ន្ឋក្រោមដី កង្វះទឹកស្អាត និងកង្វះការរៀបចំបណ្តាញ និងថាមពលអគ្គិសនីឲ្យមានគុណភាព បានក្លាយជាបញ្ហាដដែលៗមួយ ដែលមិនអាចដោះស្រាយបានទាន់ពេលវេលា។

លោកបន្តថា “ការមានថ្នាក់ដឹកនាំរាជធានី ដោយមានជំនាញផ្នែកនគរូបនីយកម្មត្រឹមត្រូវ ជាមនុស្សដែលមានចក្ខុវិស័យច្បាស់លាស់ គួរត្រួវបានយកចិត្តទុកដាក់”។ លោកបន្តថា “ការពិតថ្នាក់ដឹកនាំរាជធានីភ្នំពេញ ពីមួយជំនាន់ទៅមួយជំនាន់បានធ្វើល្អច្រើនហើយ ប៉ុន្តែការមានផែនការ មានការគិតពីសុខមាលភាពសង្គម មានគំនិតអភិវឌ្ឍន៍ប្រកបដោយការទទួលខុសត្រូវ គួរតែត្រូវជ្រើសរើសជាអាទិភាព សម្រាប់ឋានៈនិងតួនាទីក្នុងការដឹកនាំ ទីក្រុងដែលជាបេះដូងរបស់ប្រទេសជាតិ”៕

ប្រទេស​កូរ៉េខាងត្បូងគ្រោង​ប្រែក្រុង​​មួយ​ជា​ក្រុង​រដ្ឋបាលថ្មីរបស់​ប្រទេស​

ដោយ៖ សុខុម

សេអ៊ូល: រដ្ឋាភិបាលដែលនឹងចូលកាន់តំណែងឆាប់ៗនេះរបស់លោក Yoon Suk-yeol ប្រធានាធិបតីទើបជាប់ឆ្នោតរបស់កូរ៉េខាងត្បូង នឹងប្រែក្លាយទីក្រុងសេជុង (Sejong) ដែលស្ថិតនៅភាគខាងត្បូងចម្ងាយ១៤៤គីឡូម៉ែត្រពីរដ្ឋធានីសេអ៊ូល ទៅជាទីក្រុងរដ្ឋបាល។ នេះបើយោងតាមសារព័ត៌មាន Korea Times ចុះផ្សាយកាលពីថ្ងៃសុក្រ ទី០១ ខែមេសា។

ក្រុមមន្ត្រីរដ្ឋាភិបាលបាននិយាយកាលពីថ្ងៃព្រហស្បតិ៍ ទី៣១ ខែមីនា ថា គណៈកម្មាធិការអន្តរកាល (Transition Committee) មានផែនការផ្ទេរផ្នែកសំខាន់ៗនៃរដ្ឋសភាទៅកាន់ក្រុង Sejong និងបង្កើតការិយាល័យប្រធានាធិបតីទី២ នៅទីនោះនៅឆ្នាំ២០២៧។

ការបង្កើតការិយាល័យប្រធានាធិបតីទី២ និងអគារនីតិប្បញ្ញត្តិមួយនៅក្នុងទីក្រុង Sejong គឺជាការសន្យាដ៏សំខាន់មួយនៅក្នុងយុទ្ធនាការឃោសនារកសំឡេងឆ្នោតរបស់លោក Yoon Suk-yeol ជាចក្ខុវិស័យមួយដែលលោកនិយាយថានឹងពង្រឹងឋានៈទីក្រុងដែលមានប្រជាជនតិចមួយនេះ ទៅជាក្រុងរដ្ឋបាលដែលមានក្រសួង និងស្ថាប័នរដ្ឋមួយចំនួននឹងផ្លាស់ទៅកាន់ទីនោះ។

ទីក្រុងនេះនឹងមានស្ថាប័នរដ្ឋបាលកណ្តាលចំនួន៤៧ ស្ថាប័នទីប្រឹក្សាចំនួន១៦ និងស្ថាប័នចំណុះឱ្យរដ្ឋាភិបាលចំនួន២៤។ ស្ថាប័នរដ្ឋាភិបាលសំខាន់ៗចំនួន២០គឺរក្សាទុកឱ្យនៅក្នុងរដ្ឋធានីសេអ៊ូល ដដែលរួមទាំងក្រសួងការបរទេស ក្រសួងការពារជាតិ ក្រសួងការបង្រួបបង្រួមជាតិ និងក្រសួងសមភាពយេនឌ័រផងដែរ។

គណៈកម្មាធិការអន្តរកាល និងទីភ្នាក់ងារជាតិទទួលបន្ទុកសាងសង់ទីក្រុងរដ្ឋបាល (National Agency for Administrative City Construction) បាននិយាយកាលពីថ្ងៃអង្គារ ទី២៩ ខែមីនា ថា ពួកគេកំពុងពិភាក្សារកវិធីពន្លឿនការសាងសង់អគារទាំងពីរខាងលើ គឺការិយាល័យប្រធានាធិបតីទី២ និងអគារនីតិប្បញ្ញត្តិ។

វិធានការដើម្បីទាក់ទាញអាជីវកម្មនានាចូលមកកាន់ទីក្រុងនេះ ព្រមទាំងបណ្ដាគ្រឹះស្ថានអប់រំ និងសកលវិទ្យាល័យដ៏មានកិត្យានុភាពថ្នាក់តំបន់ផងដែរនោះ នឹងត្រូវបង្ហាញនៅប៉ុន្មានខែខាងមុខនេះ៕

មហាយក្សចិន ព្រលយពាក្យទទួលស្គាល់ក្រុមសកម្មប្រយុទ្ធតាលីបង់ ជារដ្ឋាភិបាលស្របច្បាប់របស់អាហ្វហ្គានីស្ថាន

ដោយ សុខុម

អន្តរជាតិ: រដ្ឋាភិបាលក្រុងប៉េកាំង បានផ្តល់ការគាំទ្រពេញទំហឹងដល់ក្រុមសកម្មប្រយុទ្ធតាលីបង់ ក្នុងប្រទេសអាហ្វហ្គានីស្ថាន ដោយនិយាយថា ការទទួលស្គាល់ក្រុមនេះជារដ្ឋាភិបាលស្របច្បាប់នៃប្រទេសដែលហែកហួរដោយសង្រ្គាមមួយនេះនឹងធ្វើឡើង “នៅពេលស្ថានភាពទុំជោរ”។

រដ្ឋមន្ត្រីការបរទេសចិន លោក វ៉ាង អ៊ី (Wang Yi) បានសន្យាគាំទ្រក្រុមសកម្មប្រយុទ្ធនេះនៅចុងបញ្ចប់នៃប្រជុំរយៈពេល២ថ្ងៃស្តីពីកិច្ចការអាហ្វហ្គានីស្ថាន កាលពីថ្ងៃព្រហស្បតិ៍ ទី៣១ ខែមីនា ដែលអំឡុងពេលនោះរដ្ឋមន្ត្រីការបរទេសអាហ្វហ្គានីស្ថាន បានវាយប្រហារសហរដ្ឋអាមេរិក ថាជាអ្នកបំផ្លាញអធិបតេយ្យភាពនយោបាយ និងសេដ្ឋកិច្ចរបស់ប្រទេសលោក។ នេះបើយោងតាមសារព័ត៌មាន South China Morning Post ចុះផ្សាយនៅថ្ងៃសុក្រ ទី០១ ខែមេសា នេះ។

ក្នុងកិច្ចប្រជុំរយៈពេល២ថ្ងៃក្នុងខេត្តអានហួយ (Anhui) ប្រទេសចិន ដែលមានការចូលរួមពីសំណាក់ក្រុមមន្ត្រីមកពីប្រទេសរុស្ស៊ី សហរដ្ឋអាមេរិក និងប្រទេសក្បែរខាងចិន មួយចំនួនដែរនេះ លោក Wang Yi លើកឡើងថា អាហ្វហ្គានីស្ថាន មិនគួរត្រូវបានផាត់ចេញពីសហគមន៍អន្តរជាតិឡើយ ហើយក៏មិនគួរក្លាយជាប្រទេសបរាជ័យនោះដែរ។

លោក Wang Yi និយាយថា រដ្ឋាភិបាលបណ្តោះអាសន្ននៃប្រទេសអាហ្វហ្គានីស្ថាន បានបង្ហាញអាកប្បកិរិយាជាវិជ្ជមានចំពោះការចូលរួមជាមួយប្រជាជាតិដទៃទៀត ប៉ុន្តែបណ្ដាប្រទេសជិតខាងរបស់អាហ្វហ្គានីស្ថាន រំពឹងថានឹងមានការវឌ្ឍភាពបន្ថែមទៀតលើការប្រយុទ្ធប្រឆាំងអំពើភេរវកម្ម ការផ្សះផ្សាក្នុងចំណោមក្រុមជនជាតិភាគតិច ការបង្កើតនូវរដ្ឋាភិបាលមួយប្រកបដោយបរិយាបន្ន និងការការពារសិទ្ធិស្ត្រី និងកុមារ។

សហរដ្ឋអាមេរិក បានបង្កកទ្រព្យសកម្មរបស់ធនាគារកណ្តាលអាហ្វហ្គានីស្ថាន ចំនួន៩ពាន់លានដុល្លារអាមេរិក បន្ទាប់ពីក្រុមតាលីបង់ បានដណ្តើមអំណាចពីរដ្ឋាភិបាលក្រុងកាប៊ុល កាលពីឆ្នាំមុន ហើយក្រោយមកប្រធានាធិបតីសហរដ្ឋអាមេរិក លោក ចូ បៃឌិន បានបញ្ជាឱ្យរឹបអូសស៊ីដាច់ទ្រព្យសម្បត្តិទាំងនោះតែម្ដងដើម្បីយកមកបែងចែកក្នុងចំណោមជនរងគ្រោះនៃការវាយប្រហារភេរវកម្មថ្ងៃទី១១ ខែកញ្ញា ឆ្នាំ២០០១ និងសម្រាប់ជំនួយមនុស្សធម៌ ហើយចំណាត់ការនេះត្រូវបានរដ្ឋាភិបាលក្រុងប៉េកាំង រិះគន់។

ក្រោយកិច្ចប្រជុំរយៈពេល២ថ្ងៃនេះ រដ្ឋមន្ត្រីការបរទេសចិន អ៊ីរ៉ង់ ប៉ាគីស្ថាន រុស្ស៊ី តាហ្ស៊ីគីស្ថាន តួកម៉េនីស្ថាន និងអ៊ូបេគីស្ថាន បានចេញសេចក្ដីថ្លែងការណ៍រួមមួយថា ការផ្តល់ជំនួយមនុស្សធម៌មិនគួរយកមកពាក់ព័ន្ធរឿងនយោបាយឡើយ ប៉ុន្តែទន្ទឹមនេះបានអំពាវនាវឱ្យអាហ្វហ្គានីស្ថាន ចាត់វិធានការជាក់ស្ដែងបន្ថែមទៀតដើម្បីកាត់ផ្តាច់ទំនាក់ទំនងជាមួយកងកម្លាំងភេរវករគ្រប់ទម្រង់៕

ក្រុមហ៊ុន CBRE រំពឹងតម្រូវការលំនៅដ្ឋាននៅប្រទេសថៃនឹងហក់ឡើងខ្ពស់ក្នុងឆ្នាំនេះ

ដោយ៖ សុខុម

បាងកក: ក្រុមហ៊ុនប្រឹក្សាអចលនទ្រព្យ CBRE Thailand បានកំណត់គោលដៅលក់អចលនទ្រព្យប្រភេទលំនៅដ្ឋានឱ្យបានជាង៤១២លានដុល្លារអាមេរិក នៅឆ្នាំ២០២២ នេះជាមួយនឹងកំណើន១៥% ដោយផ្ទះប្រណីតប្រភេទទាបៗ និងផ្ទះលម្ហែកាយជាចលករដ៏សំខាន់នៅក្នុងការជំរុញកំណើន។

លោកស្រី Artitaya Kasemlawan ប្រធានគម្រោងលក់លំនៅដ្ឋានប្រចាំក្រុមហ៊ុន CBRE បានលើកឡើងថា តម្រូវការផ្ទះប្រណីតប្រភេទទាបៗ និងផ្ទះលម្ហែកាយបានចាប់ផ្តើមកើនឡើងក្នុងឆ្នាំ២០២០ ហើយនឹងបន្តកើនឡើងនៅឆ្នាំ២០២២ នេះទៀត បន្ទាប់ពីការលក់ក្នុងផ្នែកទាំងពីរនេះបានកើនឡើងអំឡុងពេលរីករាលដាលវីរុសកូវីដ-១៩។ នេះបើយោងតាមកាសែត Bangkok Post ចុះផ្សាយកាលពីថ្ងៃសុក្រ ទី០១ ខែមេសា។

លោកស្រីបានបន្តថា “វិបត្តិកូវីដ-១៩ បានផ្លាស់ប្តូរឥរិយាបថរបស់អ្នកទិញផ្ទះ។ អតិថិជនភាគច្រើនស្វែងរកទិញផ្ទះដែលមានផ្ទៃធំទូលាយជាមុន ព្រោះពួកគេត្រូវការចំណាយពេលនៅផ្ទះច្រើនជាងមុន ធ្វើសកម្មភាពផ្សេងៗជាមួយក្រុមគ្រួសារ និងធ្វើការងារផងដែរ”។

នៅក្នុងឆ្នាំ២០២១ ក្រុមហ៊ុន CBRE រកចំណូលបានជាង៣៥៨លានដុល្លារអាមេរិក ពីការលក់ ដោយកើនឡើងជាង៣០%ធៀបនឹងឆ្នាំ២០២០ ហើយក្នុងនោះ៥៨%ទទួលបានពីផ្ទះប្រភេទទាបៗ (៣៩%) និងផ្ទះលម្ហែកាយ (១៩%)។

ការលក់ផ្ទះប្រភេទទាបៗក្នុងឆ្នាំ២០២១ ក៏កើនឡើង៦៩%ដែរធៀបនឹងឆ្នាំ២០២០ ដោយទទួលបានកំណើន៣ឆ្នាំជាប់ៗគ្នា។

ការលក់រួមបញ្ចូលគ្នានូវផ្ទះប្រភេទទាបៗ និងផ្ទះលម្ហែកាយបានកើនឡើងពី១៤%ក្នុងឆ្នាំ២០១៩ ដល់៥៦%ក្នុងឆ្នាំ២០២០ និង៥៨%ក្នុងឆ្នាំ២០២២។

លោកស្រី Artitaya Kasemlawan បានលើកឡើងថា នៅមុនពេលផ្ទុះវិបត្តិកូវីដ-១៩ ទីផ្សារខុនដូមានសន្ទុះកើនឡើងខ្លាំង និងគ្របដណ្ដប់ដល់ទៅ៨៥,៩%នៃការលក់អចលនទ្រព្យសរុបរបស់ក្រុមហ៊ុន CBRE ក្នុងឆ្នាំ២០១៩ មុនពេលប្រឈមនឹងការធ្លាក់ចុះយ៉ាងខ្លាំងមកនៅត្រឹម៤៣,២%ក្នុងឆ្នាំ២០២០ និង៤២%ក្នុងឆ្នាំ២០២១៕

ប្រទេស​ជប៉ុនពិចារណា​ជួយ​រៀបចំ​ខេត្តសៀមរាបជាទីក្រុងឆ្លាតវៃអាស៊ាននាពេល​អនាគត

ដោយ៖ ម៉ាលីស

សៀមរាប: រដ្ឋាភិបាល​ជប៉ុន​ទាម​រយៈ​ JICA កំពុង​ពិចារណា​ជួយ​រៀបចំ​ក្រុងសៀមរាប ក្លាយជាក្រុងគំរូក្នុងតំបន់អាស៊ានជាក្រុងឆ្លាតវៃ ប្រកបទៅដោយបច្ចេកវិទ្យាទីក្រុងឆ្លាតវៃ ជាមួយប្រព័ន្ធបច្ចេកវិទ្យា និងការគ្រប់គ្រងបែបឆ្លាតវៃ​ នៅពេលខាងមុខ។

ក្នុង​ជំនួប​ជាមួយ​អគ្គកុងស៊ុលជប៉ុនលោក ហ្គា វ៉ាហ្គុជិ ប្រធានការិយាល័យកុងស៊ុលជប៉ុនប្រចាំខេត្តសៀមរាប នៅថ្ងៃទី០១ ខែមេសានេះ លោក លោក ប្រាក់ សោភ័ណ អភិបាលរងខេត្តសៀមរាបបាន​លើកឡើង​ថា ក្នុងរយៈពេលពីរឆ្នាំនេះខេត្តសៀមរាប ក៏ដូចជាប្រទេសកម្ពុជាបានជួបនូវការធ្លាក់ចុះនៃសេដ្ឋកិច្ច ជាពិសេស ខេត្តសៀមរាបយើងនេះមានវិស័យមួយចំនួន ដូចជាវិស័យទេសចរណ៍ និង វិស័យកសិកម្ម បានជួបការប៉ះពាល់យ៉ាងខ្លាំងពីការរីករាលដាលនៃជំងឺកូវីដ-១៩ ដែលជាហេតុធ្វើអោយប្រជាពលរដ្ឋក្នុងខេត្តសៀមរាបបាត់បង់ការងារស្ទើរតែទាំងស្រុង។

លោក​បន្តថា​ នៅក្នុងឱកាសចូលឆ្នាំថ្មី ប្រពៃណីជាតិខ្មែរខាងមុខនេះ ខេត្តសៀមរាប មានរៀបចំកម្មវិធីសៀមរាបសង្រ្កាន្ត ដើ​ម្បីទាក់ទាញភ្ញៀវទេសចរជាតិ អន្តរជាតិ មកលេងខេត្តសៀមរាប ព្រមទាំងអាចអោយបងប្អូនអាជីវករអាចរកចំណូលបានផងដែរ​។

លោក​ប្រាក់ សោភ័ណ បានបន្ថែម​ថា ទាំងនេះពិតជាចូលរួមចំណែកអភិវឌ្ឍន៍ខេត្តសៀមរាបទៀតផង ហើយទីក្រុងឆ្លាតវៃនេះគឺ ទីភ្នាក់ងារសហប្រតិបត្តិការអន្តរជាតិជប៉ុន(JICA) បានទទួលយកសំណើ (Proposal) របស់រដ្ឋបាលខេត្តសៀមរាប ដើម្បីជួយរៀបចំក្រុងសៀមរាបជាទីក្រុងឆ្លាតវៃអាស៊ាននាពេលខាងមុខនេះ។

កន្លងមក ខេត្តសៀមរាបបានចុះអនុស្សរណៈជាមួយ JICA ក្នុង​គម្រោងពង្រីកសមត្ថភាពប្រព័ន្ធផ្គត់ផ្គង់ទឹកស្អាតខេត្តសៀមរាប ដោយមានទឹកប្រាក់វិនិយោគសរុបប្រមាណ៩០លានដុល្លារអាមេរិក គ្របដណ្តប់លើការងារសាងសង់រោងចក្រប្រព្រឹត្តកម្ម ទឹកស្អាតថ្មីមួយទៀត ដែលមានសមត្ថភាពផលិតទឹកស្អាត៦០.០០០ម៉ែត្រគូប ក្នុងមួយថ្ងៃស្ថិតក្នុងសង្កាត់ជ្រាវ នៃក្រុងសៀមរាប រួមជាមួយនឹងការសាងសង់បំពង់មេនាំទឹក និងចែកចាយទឹកស្អាត ប្រវែងសរុប១៩៦គីឡូម៉ែត្រ។ ក្រៅពីនោះរដ្ឋាភិបាលជប៉ុនបានជួយជួសជុលប្រាង្គប្រាសាទនានា ជាពិសេស ប្រាសាទបាយ័ន និងប្រាសាទអង្គរវត្តផងដែរ៕

បរធនបាលកិច្ចជាផ្នែកមួយជួយបង្កើនទំនុកចិត្តសម្រាប់វិនិយោគគិនបរទេស

ដោយៈគង់ សូរិយា

ភ្នំពេញៈ លោកបានបន្តឱ្យដឹងថា៖ បរធនបាលកិច្ច មានបួនប្រភេទ រួមមាន បរធនបាលកិច្ចសាធារណៈ បរធនបាលកិច្ចពាណិជ្ជកម្ម បរធនបាលកិច្ចសង្គម និងបរធនបាលកិច្ចបុគ្គល។ បរធនបាលកិច្ច ដែលលើកឡើងនេះ សុទ្ធតែជាការចូលរួមចំណែកនៅក្នុងវិស័យសេដ្ឋកិច្ច តាមរយៈការទាក់ទាញលំហូរទុនវិនិយោគទាំងក្នុង និងក្រៅប្រទេស។

លោកបន្តដូច្នេះថា«ប្រសិនបើបង្កើតបរធនបាលបានច្រើននោះមានន័យថាសកម្មភាពសេដ្ឋកិច្ចក៏វាកើនទៅតាមនោះដែរអ៊ីចឹងនៅពេលដែលសកម្មភាពសេដ្ឋកិច្ចកើនឡើងតាមរយៈការវិនិយោគនៅក្នុងវិស័យបរធនបាលកិច្ចនេះ មានន័ថា វាក៏ចូលរួមចំណែកនៅក្នុងការបង្កើនចំណូលពន្ធដល់វិស័យសេដ្ឋកិច្ចជាតិផងដែរ»។

លោក ហាយ សុវណ្ណាមន្រ្តីដឹកនាំការងារនាយកដ្ឋានចុះបញ្ជីបរធនបាលកិច្ចបានលើកឡើងថាបរធនបាលកិច្ចជាផ្នែកមួយជួយបង្កើនទំនុកចិត្តសម្រាប់វិនិយោគគិនបរទេស ដែលមានបំណងចូលមកវិនិយោគនៅកម្ពុជា។ លោកថា ប្រទេសឡាវ ហ្វីលីពីន ឥណ្ឌូណេស៊ី គឺមិនទាន់មានច្បាប់បរធនបាលកិច្ចទេ ដែលចំណុចនេះ គឺនៅក្រោមកម្ពុជា ខណៈដែលយើងមានបរធនបាលកិច្ចតាំងពីឆ្នាំ ២០១៩ ហើយឥឡូវក៏មាននិយ័តករថែមទៀត។

លោក ហាយ សុវណ្ណា បានបន្តថា«នេះគឺជាទំនុកចិត្តមួយសម្រាប់វិនិយោគិនបរទេសដែលគាត់ចាំបាច់ប្រើប្រាស់សេវាកម្មរបស់បរធនបាលកិច្ចពីព្រោះច្បាប់កម្ពុជាយើង ចែងថា ជនបរទេសមិនអាចកាន់កាប់កម្មសិទ្ធិ ដីធ្លី ក៏ដូចជាអលនទ្រព្យបានទេ ប៉ុន្តែចាប់ពីជាន់ទី១ទៅ ទើបពួកគាត់មានសិទ្ធិក្នុងករណីដែលគាត់ចង់វិនិយោគលើដីធ្លី ឬអគារ គាត់ចាំបាច់ត្រូវតែរកបរធនបាល ដែលគាត់ជាអ្នកផ្តល់សេវាបរធនបាលកិច្ច»។

មន្រ្តីជាន់ខ្ពស់រូបនេះ ពន្យល់ពាក់ព័ន្ធនឹងការកើនឡើងនៃចំណូលពន្ធដារ បានមកពីបរធនបាលកិច្ចថា« យើងមាននិយ័តករ ក្នុងការផ្តល់អាជ្ញាបណ្ណ ..ដើម្បីបានអាជ្ញាបណ្ណ ប្រតិបត្តិការត្រូវបង្កើតក្រុមហ៊ុនអ៊ីចឹងនៅពេលបង្កើតក្រុមហ៊ុនប្រាកដជាត្រូវការបុគ្គលិកនៅពេលដែលក្រុមហ៊ុនត្រូវការបុគ្គលិកមានន័យថាជួយសេដ្ឋកិច្ចមួយក្នុងការបង្កើតការងារដល់ពលរដ្ឋ។នៅពេលបុគ្គលិកមានចំណូលលើសពី ៣០០ដុល្លារ ត្រូវជាប់ពន្ធ ដូច្នេះត្រូវបង់ពន្ធចូលរដ្ឋ ដែលនេះជាការបង្កើនចំណូលរដ្ឋផងដែរ»។

វាគ្មិននៅក្នុងវគ្គបណ្តុះបណ្តាលនេះដែរកញ្ញា ឈាន សុខារី ប្រធាននាយកដ្ឋានកិច្ចការគតិយុត្តិនិងអធិការកិច្ចក៏បានធ្វើបទបង្ហាញទាក់ទងនឹងការរៀបចំនិងការប្រព្រឹត្តិ ទៅនៃបរធនបាលកិច្ច៕

ទិញផ្ទះ ឈ្នះឡាន Lexus 600 និងបានទៅលេងអាមេរិក!

ដោយៈ សហការី

ភ្នំពេញៈ បុរីវិមានសំណាងបាន និងកំពុងផ្តល់នូវការលើកទឹកចិត្តជាពិសេស ដល់អ្នកទិញលំនៅដ្ឋាននៅក្នុងគំរោងនេះ ដែលអ្នកទិញនឹងទទូលបានរថយន្តម៉ាកLexus600 និងបានទៅលេងកំសាន្តនៅសហរដ្ឋអាមេរិកទៀតផង។

រាល់ការទិញផ្ទះវីឡានៅក្នុង បុរី វិមានសំណាង នៅក្នុងខែ មេសា ឆ្នាំ ២០២២ លោកអ្នកនឹងទទួលបានរង្វាន់ពិសេសៗជាច្រើនត្រលប់មកវិញ

⦁ ទទួលបានឆ្នោតផ្សងសំណាង ១សន្លឹកដើម្បីចាប់យករង្វាន់ ឡាន Lexus 600 ចំនួន១គ្រឿង
⦁ ទទួលបានការបញ្ចុះតម្លៃភ្លាមៗ ចាប់ពី $40,000 ដល់ $1០0,000
⦁ ទទួលបាន Iphone 13 មួយគ្រឿងភ្លាមៗ សម្រាប់ការកក់ទីតាំង ត្រឹម $2,000
⦁ ទទួលបានតម្លៃពិសេសក្នុងខែ មេសា ឆ្នាំ ២០២២ តែប៉ុណ្ណោះ
⦁ ទទូលបានការអញ្ជើញចូលរួមកម្មវិធី KW Mega Camp ឬ KW Family Reunion នៅសហរដ្ឋអាមេរិក ជាមួយឧកញ៉ាបណ្ឌិត គីម ហ៊ាង និងជំទាវឧកញ៉ា គង់ សំណាង ដែលមានមនុស្សចូលរួមមកពី ៥ទ្វិប និងជាង ៥២ប្រទេស!

បុរី វិមានសំណាង ជាលំនៅដ្ឋានបែបអភិជន ស្ថិតនៅលើមហាវិថីឈ្នះឈ្នះ និងផ្លូវឡុងឈិន ចំងាយ ២៥០០ម ពីក្រសួងដែនដី គឺមានផ្ទះអាជីវកម្មតែ២០ផ្ទះ (Shophouse) ក្រៅពីនោះសុទ្ធតែវីឡាព្រីន (Prince Villa) វីឡាឃ្វីន (Queen Villa) វីឡាឃីង (King Villa) និងវីឡារ៉ូយាល់ (Royal Villa) សម្រាប់ក្រុមគ្រួសារអភិជនកម្ពុជាស្នាក់នៅប្រចាំថ្ងៃ! ម្ចាស់ផ្ទះវីឡានិមួយៗនៅក្នុងបុរី វិមានសំណាង មានការងារ មុខរបរ និងអាជីវកម្មផ្សេងៗគ្នានៅខាងក្រៅ តែពេលត្រលប់មកដល់ផ្ទះវីឡារបស់ខ្លួន គឺដើម្បីស្នាក់នៅ ក្នុងបរិយាកាសស្ងៀមស្ងាត់ សុវត្ថិភាព និងផាសុខាភាពបែបអភិជន! លក្ខណះពិសេសៗរបស់ បុរី វិមានសំណាង បែបអភិជនមានដូចខាងក្រោមនេះ ៖

⦁ ម៉ូតផ្ទះវីឡា បែបក្លាសិក ឬបែបបារាំង ដែលស្អាតដាច់គេក្នុងតំបន់ជុំវិញ ដោយយើងសាងសង់តែដី ១៥ហិកតា ស្មើ ៦០% ក្នុងគំរោងដី ២៥ហិកតា ដោយទុកដី ១០ហិកតា ស្មើ ៤០% សម្រាប់ជាការប្រើប្រាស់រួមក្នុងបុរី!
⦁ តម្លៃលក់ក្នុងដំណាក់កាលដំបូងនេះ គឺពិសេសបំផុត សម្រាប់អតិថិរជនដំបូងៗរបស់យើង ហើយការបង់ប្រាក់មានភាពបត់បែប និងងាយស្រួល ដើម្បីជួយសម្រួលដល់អតិថិរជនរបស់យើង!

⦁ បុរីស្ថិតនៅក្នុងទីតាំងដែលកំពុងមានការរីកចំរើនខ្លាំងបំផុត ប្រជុំដោយគំរោងអភិវឌ្ឍន៌ធំៗរបស់រដ្ឋ ផ្សារធំៗ និងបុរីធំៗ ដែលធ្វើអោយតម្លៃអចលនទ្រព្យនៅតំបន់នេះមានការកើនឡើងជាលំដាប់!
⦁ ជាបុរីលំដាប់អភិជនតែមួយគត់ និងដំបូងគេនៅកម្ពុជា ដែលសាងសង់លើផ្ទៃដី ២៥ហិកតា ដោយសាងសង់តែផ្ទះវីឡាធំៗ ដើម្បីអោយគ្រួសារអភិជនកម្ពុជាស្នាក់នៅប្រចាំថ្ងៃ!

⦁ ជាបុរីលំដាប់អភិជន ដែលមាន ឧកញ៉ាបណ្ឌិត គីម ហ៊ាង ជាម្ចាស់គំរោង និងជាអ្នកអភិវឌ្ឍន៌ដោយផ្ទាល់!

ផ្ទះអាជីវកម្មបែបក្លាសិក (Classic​ Shophouse) ឬបែបបារាំង មានតែ ២០ផ្ទះប៉ុណ្ណោះលើដី ២៥ហិកតា ដែលចំណាយថ្លៃសាងសង់ច្រើនជាង និងប្រណិតជាងផ្ទះទូទៅ លើដីទំហំ 4.20m x 23m និងទំហំផ្ទះ 4.20m x 16m, កំពស់៤ជាន់ មាន៥បន្ទប់គេង ៦បន្ទប់ទឹក ដែលសាកសមបំផុតសម្រាប់ការបើកអាជីវកម្មនានា!

វីឡាព្រីន បែបក្លាសិក (Classic​ Prince Villa) ឬបែបបារាំង ដែលចំណាយថ្លៃសាងសង់ច្រើនជាង និងប្រណិតជាងការសាងសង់វីឡាបែបទំនើប លើដីទំហំ ១២ម គុណ ២២ម កំពស់៣ជាន់ មាន៦បន្ទប់គេង ៧បន្ទប់ទឹក សួនច្បារ និងមានកន្លែងចតឡានធំទូលាយ ដែលសាកសមបំផុតសម្រាប់គ្រួសារវ័យក្មេង បែបអភិជននៅកម្ពុជាស្នាក់នៅប្រចាំថ្ងៃ!

វីឡាឃ្វីន បែបក្លាសិក (Classic Queen Villa) ឬបែបបារាំង ដែលចំណាយថ្លៃសាងសង់ច្រើនជាង និងប្រណិតជាងការសាងសង់វីឡាបែបទំនើប លើដីទំហំ ១៨ម គុណ ២២ម កំពស់៣ជាន់ មាន៦បន្ទប់គេង ៧បន្ទប់ទឹក សួនច្បារធំ មានកន្លែងចតឡានធំទូលាយ ដែលសាកសមបំផុតសម្រាប់គ្រួសារវ័យកណ្តាល បែបអភិជននៅកម្ពុជាស្នាក់នៅប្រចាំថ្ងៃ!

វីឡាឃីង បែបក្លាសិក (Classic King Villa) ឬបែបបារាំង ដែលចំណាយថ្លៃសាងសង់ច្រើនជាង និងប្រណិតជាង ការសាងសង់វីឡាបែបទំនើប លើដីទំហំ លើផ្ទៃដី ២០ម គុណ ៣០ម កំពស់៣ជាន់ មាន៨បន្ទប់គេង ៨បន្ទប់ទឹក មានសួនច្បារធំ កន្លែងជប់លៀង និងមានកន្លែងចតឡានធំទូលាយ ដែលសាកសមបំផុតសម្រាប់គ្រួសារធំ បែបអភិជននៅកម្ពុជាស្នាក់នៅប្រចាំថ្ងៃ!

រ៉ូយាល់វីឡា បែបក្លាសិក (Classic Royal Villa) ឬបែបបារាំង ដែលមានមួយគត់នៅកម្ពុជា លើផ្ទៃដីពី ២៥០០ម៉ែត្រការ៉េ ដល់ ៣០០០ម៉ែត្រការ៉េ កំពស់៣ជាន់ មាន១០បន្ទប់គេង ១២បន្ទប់ទឹក មានសួនច្បារធំ កន្លែងជប់លៀង និងមានកន្លែងចតឡានធំទូលាយ ដែលសាកសមបំផុតសម្រាប់គ្រួសារធំ បែបអភិជនកំពូលៗនៅកម្ពុជាស្នាក់នៅប្រចាំថ្ងៃ!​

សម្រាប់ព័ត៌មានលម្អិតសូមអញ្ជើញទំនាក់ទំនងតាម Facebook: Borey Vimean Samnang បុរី វិមានសំណាង ឬទូរស័ព្ទទំនាក់ទំនង៖ 095 96 2000 និង 070 96 2000 លើមហាវិថីឈ្នះឈ្នះ ភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។
Facebook Page: https://www.facebook.com/Borey.VimeanSamnang.KH
Google Map: https://bit.ly/3rBzGAQ

ក្រុមប្រឹក្សាអភិវឌ្ឍន៍កម្ពុជា អនុម័តគម្រោងវិនិយោគចំនួន ២មានទឹកប្រាក់ជាង១០លាន

ដោយ៖​ សុផារី

ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (CDC) នៅ​ថ្ងៃ​ទី០១ ខែ​មេសា ឆ្នាំ​២០២២​នេះ​ បានអនុម័តគម្រោងវិនិយោគថ្មីៗចំនួន២បន្ថែមទៀត ដែលសរុបទុនវិនិយោគចំនួន១០លានដុល្លារ និងអាចបង្កើតការងារបានជាច្រើន​កន្លែង។

តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគ ជូនដល់ក្រុមហ៊ុនដូចខាងក្រោម៖

១- MALAGA GARMENT FACTORY CO., LTD: គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិព្រែកកំពឹស សង្កាត់ព្រែកកំពឹស ខណ្ឌដង្កោ រាជធានីភ្នំពេញ មានទុនវិនិយោគប្រមាណ៦,៤លានដុល្លារអាមេរិក និងអាចបង្កើតការងារបានចំនួន ៦១១កន្លែង។

២- YOUNG CLOTHING (CAMBODIA) CO., LTD: គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិរំលេច ឃុំរលាំងគ្រើល ស្រុកសំរោងទង ខេត្តកំពង់ស្ពឺ មានទុនវិនិយោគប្រមាណ៤លានដុល្លារអាមេរិក និងអាចបង្កើតការងារបានចំនួន ១.៦២០កន្លែង។

អ្នកជំនាញអចលនទ្រព្យជាច្រើនលើកឡើងថា តម្រូវការទីតាំងដីធ្លីសម្រាប់បម្រើដល់វិស័យឧស្សាហកម្មនៅតែបន្តមានកំណើន នៅក្នុងឆ្នាំ២០២២នេះ បើសូម្បីតែឆ្នាំ២០២០ និងឆ្នាំ២០២១កន្លងទៅក៏តម្រូវការដីសម្រាប់បម្រើដល់វិស័យឧស្សាហកម្មនៅតែមាន ដែលបញ្ជាក់ពីការរីកលូតលាស់នៃវិស័យឧស្សាហកម្មក្នុងប្រទេសកម្ពុជា និងរួមចំណែកដល់ការអភិវឌ្ឍសេដ្ឋកិច្ចជាតិផងដែរ៕

ដំណាច់ត្រីមាសទី១ កម្ពុជានាំចេញកសិផលជាង៣,៤លានតោនក្នុងទំហំជាង១,២ពាន់ដុល្លារអាមេរិក

ដោយៈ សុផារី

ភ្នំពេញៈ នៅក្នុងរយៈពេល៣ខែដើមឆ្នាំ២០២២នេះ ការនាំចេញកសិផលទៅក្រៅប្រទេស មានបរិមាណសរុប៣.៤៣៤.០៧០,៦៣តោន ទៅកាន់ទិសដៅ៥៧ប្រទេស គឺមានការកើនឡើងចំនួន ៣៤៤ ៨៦០,៧១តោន ស្មើនឹង ១១,១៦% គិតជាទឹកប្រាក់មានចំនួន១.២៦៨ ៥៩៣.៧៨០,៧៣ដុល្លារអាមេរិក។

នេះបើតាមទិន្នន័យរបស់អគ្គនាយកដ្ឋានកសិកម្ម ទទួលបានផ្អែកលើប្រព័ន្ធទិន្នន័យគ្រឹះភូតគាមអនាម័យជាតិ (National Phytosanitary Database) នៅចុងខែមីនានេះ។

ក្នុងនោះ ការនាំចេញអង្ករមានចំនួន១៧០.៥៣៩តោន កើនឡើងចំនួន១៦.៨៥១តោន (១០,៩៦%) បើធៀបនឹងបរិមាណនាំចេញក្នុងរយៈពេល៣ខែដើមឆ្នាំ២០២១ ដែលមានចំនួន១៥៣.៦៨៨តោន មានតម្លៃ១៤៥ ៨១០ ៨៤៥ដុល្លារអាមេរិក។

ចំណែកការនាំចេញស្រូវ មានចំនួន១.៣៩០.១៨១តោន ទៅកាន់ប្រទេសវៀតណាម (មានវិញ្ញាបនបត្រភូតគាមអនាម័យចំនួន ៩០៨.៦២៥តោន) ដែលមានការកើនឡើងចំនួន ១៦៨.៥៣៦តោន (១៣,៨០%) មានតម្លៃ២៤៨ ៨៤២ ៣៩៩ដុល្លារអាមេរិក។

ក្រៅពីនេះ ការនាំចេញកសិផលក្រៅពីស្រូវ-អង្ករ មានចំនួន ២.៣៥៤.៩០៦,៦៣តោន កើនឡើងចំនួន៧៧.៧៣៤,៧១តោន ស្មើនឹង៣,៤១% បើធៀបនឹងរយៈពេលដូចគ្នាក្នុងឆ្នាំ២០២១ ដែលមានចំនួន ២.២៧៧.១៧១,៩២តោន មានតម្លៃ៨៧៣ ៩៤០ ៥៣៦,៧៣ដុល្លារអាមេរិក៕