តើការកសាងផ្លូវក្រវាត់ក្រុងនានាកំពុងជួយជំរុញសក្ដានុពលក្នុងការវិនិយោគលើអចលនទ្រព្យ?

ដោយៈវឌ្ឈនៈ

ភ្នំពេញៈ ផ្លូវក្រវាត់ក្រុងជាផ្លូវដ៏សំខាន់សម្រាប់ដឹកជញ្ជូន និងការធ្វើចរាចរណ៍របស់ពលរដ្ឋវាងរាជធានីភ្នំពេញ ដើម្បីបញ្ជៀសគ្រោះថ្នាក់ចរាចរណ៍ និងការកកស្ទះ ហើយផ្លូវក្រវាត់ក្រុងនេះដែរ ក៏ជាកត្តាទាក់ទាញសម្រាប់វិស័យអចលនទ្រព្យផងដែរ ដូច្នេះហើយទើបរាជរដ្ឋាភិបាល បានខិតខំអភិវឌ្ឍន៍ផ្លូវក្រវាត់ក្រុងជាបន្តបន្ទាប់។

រហូតមកដល់ពេលនេះ ផ្លូវក្រវាត់ក្រុងនៅរាជធានីភ្នំពេញ ឈានដល់ការអភិវឌ្ឍផ្លូវក្រវាត់ក្រុងទី៣ហើយ និងកំពុងបង្ហាញពីភាពទាក់ទាញកាន់តែខ្លាំង ទៅលើការអភិវឌ្ឍអចលនទ្រព្យ ដែលធ្វើឱ្យវិនិយោគិនកាន់តែច្រើន ចាប់អារម្មណ៍ក្នុងការវិនិយោគនៅតាមបណ្ដោយផ្លូវក្រវាត់ក្រុង ។

បើក្រលេកទៅមើលផ្លូវក្រវាត់ក្រុងទី៣ ដែលរដ្ឋាភិបាលកកំពុងតែជំរុញការអភិវឌ្ឍជាបន្តបន្ទាប់ ឃើញថា កំពុងតែមានភាពទាក់ទាញកាន់តែខ្លាំង ទៅលើការអភិវឌ្ឍអចលនទ្រព្យ ជាក់សែ្ដងគម្រោងអភិវឌ្ឍន៍អចលនទ្រព្យជាច្រើបាន និងពង្រីកឱកាសវិនិយោគនៅតំបន់ផ្លូវក្រវាត់ ហើយក៏ធ្វើឱ្យតំបន់ដែលមានផ្លូវក្រវាត់ក្រុង រត់កាន់មានសន្ទុះដីធ្លីមួយកម្រិតផងដែរ។

បើតាមលោកសន សៀប ស្ថាបនិក និងជានាយកក្រុមហ៊ុនអចលនទ្រព្យឃី រៀលអ៊ីស្ទេតបានឱ្យដឹងថា សន្ទុះតម្លៃដីធ្លីនៅតំបន់ភាគខាងត្បូង ក្នុងពេលបច្ចុប្បន្ននេះ មានការកើនឡើងមួយកម្រិតទៀត ជាពិសេសនៅក្នុងខណ្ឌដង្កោក្នុងរាជធានីភ្នំពេញ។ កត្តាដែលជំរុញឱ្យសន្ទុះតម្លៃដីធ្លីនៅតំបន់ទាំងនេះ បានកម្រើកមួយកម្រិតទៀតនោះ យើងមើលឃើញថាផ្លូវក្រវាត់ក្រុងដ៏សំខាន់ បានរត់កាត់តំបន់ខណ្ឌដង្កោ និងបែកខាងត្បូងរាជធានីភ្នំពេញ ហើយគម្រោងជាច្រើនទៀតក៏បាន និងកំពុងអភិវឌ្ឍន៍យ៉ាងមមាញឹក នៅក្នុងវិបត្តិកូវីដ១៩នេះ ។

ម្យ៉ាងទៀតនៅប៉ែកខាងត្បូងរាជធានីភ្នំពេញនេះផងដែរ ក៏ឃើញថាមានការអភិវឌ្ឍនិងសាងសង់ហេដ្ឋារចនាសម្ព័ន្ធថ្មី ចាស់ជាច្រើន ដែលធ្វើឱ្យវិនិយោគិនក្នុងនិងក្រៅប្រ​ទេសចាប់អារម្មណ៍លើការអភិវឌ្ឍនមួយនេះ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានលើកឡើងផងដែរថា ការអភិវឌ្ឍហេដ្ឋារចនាសម្ព័ន្ធ ពិតជាមានសារសំខាន់ណាស់ក្នុងការទាក់ទាញ វិនិយោគិនក្នុងការបណ្ដាក់ទុនវិនិយោគ ហើយទីណាមានហេដ្ឋារចនាសម្ព័ន្ធខ្វាត់ខ្វែងនិងច្រើនតំបន់នោះ នឹងទទួលបានគម្រោងអភិវឌ្ឍន៍ច្រើន។

លោកបន្តថា “ដោយសារតែកត្តាទាំងនេះហើយ ទើបរាជរដ្ឋាភិបាលកម្ពុជាបានជំរុញការអភិវឌ្ឍហេដ្ឋារចនាសម្ព័ន្ធ ទាំងនៅភ្នំពេញ និងនៅតាមបណ្ដាខេត្ត ក៏ដូចជាហេ ដ្ឋារចនាសម្ព័ន្ធតភ្ជាប់ពីរាជធានីភ្នំពេញ ទៅកាន់បណ្ដាខេត្តជាច្រើនទៀតផងដែរ”៕

ស្ថាបត្យកម្មប៉មសសរនៅក្នុងគម្រោងស្ពានបេតុងខ្សែកាបកោះនរាហ៍បានលេចចេញជារូបរាងហើយ

ដោយៈ សុផារី

ភ្នំពេញៈ ប៉មនៃសសរស្ពាន ដែលប្រើប្រាស់ស្ថាបត្យកម្មបុរាណសម័យទំនើប នៅក្នុងគម្រោងស្ពានបេតុងខ្សែកាបតភ្ជាប់រវាងទីក្រុងកោះពេជ្រ និងទីក្រុងរនបកោះនរាហ៍ រាជធានីភ្នំពេញបានចេញជារូបរាងហើយ។

ស្ថាបត្យកម្មប៉មនៃសសរស្ពាននេះ ត្រូវបានរចនាឡើងដោយយកគំនិតពីក្នុងការរចនារបស់ម្កុដ នៃរូបសំណាក់ទេវតា ឬអប្សរាក្នុងរចនាបថប្រាសាទបាយ័ន ដែលរចនាលោក ជួន ពិសាល។

មូលហេតុដែលបានយកមកុដ នៃចម្លាក់ទេវតាជាអប្សរា នៅក្នុងរចនាបថបាយ័ន យកមកធ្វើជាគំនិតនៅក្នុងការរចនា ប៉មសសរស្ពានបេតុងខ្សែកាបកោះនរាហ៍ ព្រោះមកុដនេះ គឺជាការកែច្នៃប្រឌិតដ៏ប្រណិតមួយរបស់ខ្មែរនៅក្នុងសម័យកាលនោះ ហើយក៏ជាគ្រឿងប្រដាប់ដ៍មានតម្លៃ ដែលធ្វើអំពីមាសសុទ្ធ មានកំពូលរំលេចដោយក្បាច់ រចនាដ៏វិចិត្រដាក់ដាំត្បូង ហើយក៏មានក្នុងបន្ស៊ីគ្នា ជាមួយមុខកាត់សសរស្ពានផងដែរ។

រូបចម្លាក់បុរាណខ្មែរ ធ្វើមកពីសំរិទ្ធក្នុងរចនាបទបាយ័ន ជាអប្សរារីរូបសំណាកទេវតា ដោយអប្សរាគឺជាវិញាណស្ត្រីនៃពពក និងទឹកនៅក្នុងទេវកថា ហិណ្ឌូ និងពុទ្ធសាសនាដែលជា” ស្រីទេពអប្សរ ឬស្រីក្រមុំឋានសួគ៌” ដែលតំណាងឱ្យភាពវ័យក្មេង និងឆើតឆាយនិងពូកែសិល្បៈរាំ។

ក្បាច់នៅលើសរសរស្ពានរចនាឡើង ដោយបានស្រង់ចេញពីក្បាច់ផ្កាចន្ទន៍នៃសូរងអប្សរា ដែលមានប្រវត្តិទាក់ទងនឹង រឿងព្រេងបុរាណដ៏ល្បីល្បាញរបស់ខ្មែរយើងផងដែរ គឺរឿងព្រះថោងនាងនាគ។ផ្កាចន្ទន៍ជានិមិត្តរូបនៃនាងនាគ ដែលជាម្ចាស់ទឹកដីនៃដែនសុវណ្ណភូមិខ្មែរ។

យោងតាមរបាយការណ៍របស់ក្រុមហ៊ុន OCIC បានបង្ហាញអំពីលក្ខណៈបច្ចេកទេស នៃគម្រោងស្ថាបនាស្ពានបេតុងខ្សែកាប ឆ្លងកាត់ទន្លេបាសាក់តភ្ជាប់ពីកោះពេជ្រ ទៅគម្រោងអភិវឌ្ឍន៍កោះនរាហ៍ គឺតួស្ពានបេតុងខ្សែកាប និងផ្លូវតភ្ជាប់ក្បាលស្ពាន មានប្រវែងសរុប៨២៤ម៉ែត្រ ក្នុងនោះទទឹងស្ពានមានទំហំ២៤,៥ម៉ែត្រ និងបណ្តោយស្ពានបេតុងមានប្រវែង៤៨៣ម៉ែត្រ។

សសរសម្រាប់ព្យួរខ្សែកាប មានកម្ពស់៦០ម៉ែត្រ គិតចាប់ពីផ្ទៃតួស្ពានទៅលើអាកាស សសរស្ពានសម្រាប់ព្យួរខ្សែកាបសរុបចំនួន២ ក្នុងនោះស​ស​រស្ពាននីមួយៗ ប្រើប្រាស់គ្រិះខួងចំនួន១៨ដើម អង្កត់ផ្ចិតទំហំ២ម៉ែត្រ។

ស្ពានបេតុងខ្សែកាបនេះ ចំណាយក្នុងការសាងសង់ចំនួន៣៨លានដុល្លាអាមេរិក និងចំណាយរយៈពេលសាងសង់៣៥ខែ វិនិយោគដោយក្រុមហ៊ុន OCIC៕

មូលនិធិអាស៊ីជួយកម្ពុជាជាង៤០ឆ្នាំ សម្តេចតេជោស្នើឲ្យស្ថាប័ននេះបន្តជួយអភិវឌ្ឍន៍សេដ្ឋកិច្ចកម្ពុជា

ដោយៈម៉ាលីនណា

ភ្នំពេញៈ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានបង្ហាញក្តីរីករាយ និងពេញចិត្តជាខ្លាំង ចំពោះកិច្ចសហប្រតិបត្តិការ និងភាពជាដៃគូរវាងរាជរដ្ឋាភិបាលកម្ពុជា និងអង្គការមូលនិធិអាស៊ី (Asia Fundation) ក្នុងរយៈពេលជាង៤០ឆ្នាំកន្លងមកនេះ ដើម្បីការអភិវឌ្ឍផ្នែកសេដ្ឋកិច្ចនៅកម្ពុជា។

សម្តេចតេជោ ហ៊ុន សែន បានលើកទឹកចិត្តឱ្យបន្តលើកកម្ពស់នូវកិច្ចសហប្រតិបត្តិការ និងភាពជាដៃគូ ដើម្បីរួមចំណែកអភិវឌ្ឍសេដ្ឋកិច្ចទៅមុខបន្ថែមទៀត ជាពិសេសដំណាក់កាលវិបត្តិបង្កដោយជំងឺកូវីដ១៩។

ការលើកឡើងរបស់សម្តេចតេជោ ហ៊ុន សែន បានធ្វើឡើងក្នុងពេលលោក ដេវីដ អាណុល (David D. Arnold) ប្រធាន និងជានាយកប្រតិបត្តិមូលនិធិអាស៊ី ចូលជួបសម្តែងការគួរសម និងពិភាក្សាការងារ នៅវិមានសន្តិភាព នារសៀលថ្ងៃទី១៧ ខែមីនា ឆ្នាំ២០២២។

បើតាមលោក អ៊ាង សុផល្លែត ជំនួយការផ្ទាល់របស់សម្តេចតេជោ ហ៊ុន សែនបានឱ្យដឹងថា នៅក្នុងជំនួបនេះ សម្តេចតេជោ និងលោក ដេវីដ បានពិភាក្សាគ្នា យ៉ាងយកចិត្តទុកដាក់លើសកម្មភាព និងសមិទ្ធផលការងាររបស់អង្គការមូលនិធិអាស៊ី ដែលបានប្រតិបត្តិការក្នុងប្រទេសកម្ពុជារយៈពេលជាង ៤០ឆ្នាំកន្លងមកនេះ។

លោក ដេវីដ ក៏បានជម្រាបសម្តេចតេជោ អំពីសកម្មភាពការងាររបស់អង្គការនៅកម្ពុជានាពេលបច្ចុប្បន្ន ដោយផ្តោតយកចិត្តទុកដាក់លើបច្ចេកវិទ្យា ដើម្បីលើកកម្ពស់ស្ត្រី និងយុវជន ការពង្រឹងអភិបាលកិច្ចល្អ ការលើកកម្ពស់កិច្ចសហប្រតិបត្តិការអន្តរជាតិ ការកសាងភាពធន់ផ្នែកបរិស្ថាន ដែលរួមចំណែកដល់ការអភិវឌ្ឍប្រទេសកម្ពុជា ប្រកបដោយភាពសុខដុមរមនា។

លោក ដេវីដ បានគោរពថ្លែងអំណរគុណសម្តេចតេជោ និងរាជរដ្ឋាភិបាលកម្ពុជា ដែលបានផ្តល់នូវកិច្ចសហប្រតិបត្តិការ និងភាពជាដៃគូយ៉ាងល្អបំផុតជាមួយអង្គការ ធ្វើឱ្យអង្គការបំពេញបេសកកម្ម ទទួលបានជោគជ័យជាបន្តបន្ទាប់។

សម្តេចតេជោ ហ៊ុន សែន បានវាយតម្លៃខ្ពស់ចំពោះភាពជាដៃគូរយៈពេលជាង៤០ឆ្នាំមកនេះ និងបានថ្លែងអំណរគុណអង្គការមូលនិធិអាស៊ី ចំពោះសកម្មភាពការងាររបស់ខ្លួននៅកម្ពុជា។ សម្តេចតេជោ បានលើកទឹកចិត្តឱ្យអង្គការនេះ​ បន្តសកម្មភាពរបស់ខ្លួន និងស្វែងរកគន្លឹះថ្មីបន្ថែមទៀត ដើម្បីរួមចំណែកអភិវឌ្ឍសេដ្ឋកិច្ចកម្ពុជា។ ជាពិសេសក្នុងកាលៈទេសៈនៃការរាតត្បាតជំងឺកូវីដ១៩ និងពេលកម្ពុជា កំពុងបើកសេដ្ឋកិច្ចឡើងវិញនេះ។

រដ្ឋបាលខេត្តកោះកុងឱ្យក្រុមហ៊ុនធំមួយអភិវឌ្ឍតំបន់កោះទទឹងជារមណីយដ្ឋានអេកូទេសចរណ៍កម្សាន្តលំដាប់ពិភពលោក

ដោយ៖ សុផារី

កោះកុង៖ រដ្ឋបាលខេត្តកោះកុងបានអំពាវនាវប្រជាពលរដ្ឋ ដែលកាន់កាប់ដីនៅលើកោះទទឹង ភូមិកោះស្តេច ឃុំកោះស្តេច ស្រុកគីរីសាគរ ឱ្យរុះរើសំណង់និងចាកចេញពីទីតាំងដីនេះឱ្យបានឆាប់រហ័ស ដោយសាររាជរដ្ឋាភិបាលយល់ព្រមឱ្យក្រុមហ៊ុន ដែននគរ ឯ.ក. ធ្វើការវិនិយោគអភិវឌ្ឍន៍ជារម្មណីយ៍ដ្ឋានអេកូរទេសចរណ៍កម្សាន្តលំដាប់ពិភពលោក។

សេចក្តីជូនដំណឹងរបស់រដ្ឋបាលខេត្ត ចេញផ្សាយនៅថ្ងៃទី១៧ ខែមីនា ឆ្នាំ២០២២នេះ បានជូនដំណឹងដល់ប្រជាពលរដ្ឋ ដែលពាក់ព័ន្ធការកាន់កាប់ដីនៅលើកកោះទទឹង ភូមិកោះស្តេច ឃុំកោះស្តេច ស្រុកគីរីសាគរ ឱ្យរុះរើសំណង់និងចាកចេញពីទីតាំងដីនេះឱ្យបានឆាប់រហ័សបំផុតនិងឈប់ទន្រ្ទានកាន់កាប់ដីរដ្ឋ ឬទិញលក់ដីរដ្ឋតទៅទៀត បើមិនដូច្នោះទេនឹងត្រូវប្រឈមមុខចំពោះច្បាប់ជាមិនខាន។

រដ្ឋបាលខេត្តកោះកុងបានបញ្ជាក់ថា ទីតាំងដីនៅលើកោះទទឹង ភូមិកោះស្តេច ឃុំកោះស្តេច ស្រុកគីរីសាគរ គឺជាដីរបស់រដ្ឋហើយទីតាំងដីនៅលើកោះទទឹងនេះ ត្រូវបានរាជរដ្ឋាភិបាលយល់ព្រមឱ្យក្រុមហ៊ុន ដែននគរ ឯ.ក. ធ្វើការវិនិយោគអភិវឌ្ឍន៍ជារម្មណីយ៍ដ្ឋានអេកូរទេសចរណ៍កម្សាន្តលំដាប់ពិភពលោក។

រដ្ឋបាលខេត្តបានឱ្យដឹងថា តាមការពិនិត្យជាក់ស្តែងបច្ចុប្បន្នមានប្រជាពលរដ្ឋមួយចំនួនបានកាន់កាប់ដី និងរស់នៅលើកោះទទឹង ជាទីតាំងដែលរាជរដ្ឋាភិបាលអនុញ្ញាតឱ្យក្រុមហ៊ុនវិនិយោគ៕

អភិបាលខេត្តបាត់ដំបងនឹងរៀបចំPub Streetនៅក្នុងទីក្រុងនេះ ដូចក្រុងសៀមរាប

  ដោយៈគង់ សូរិយា

       បាត់ដំបងៈ អភិបាលននៃគណអភិបាលខេត្តបាត់ដំបង លោក សុខ លូ បានថ្លែងថា ខេត្តបាត់ដំបងនឹងមាន Pub Street មួយកន្លែងដើម្បីទាក់ទាញភ្ញៀវទេសចរជាតិនិងអន្តរជាតិដូចជា នៅខេត្តសៀមរាបនាពេលខាងមុខនេះ។

លោក សុខ លូ បានមានប្រសាសន៍បែបនេះ នៅពេលលោកបានជួបពិភាក្សាជាមួយនឹង លោកស្រី Aurelie Vincq អគ្គលេខាធិការសាលាសៀកអេសាក់តូ ដើម្បីរាយការណ៍អំពីសមាគមហ្វារពន្លឺសិល្បៈ ដែលកំពុងអនុវត្តន៍គម្រោងផ្លាស់ប្ដូរ គរុកោសល្យរវាងសមាគមហ្វារពន្លឺសិល្បៈ និងសាលាសៀកបារាំង អេសាក់តូ ។

លោក សុខ លូ បានមានប្រសាសន៍ថា នៅពេលខាងមុខនេះ រដ្ឋបាលខេត្តនឹងរៀបចំតំបន់មួយ ដែលស្រដៀងទៅនឹង Pub Street នៅខេត្តសៀមរាប គឺជាតំបន់ដែលភ្ញៀវទេសចរអាចធ្វើដំណើរកំសាន្ត មានភោជនីយដ្ឋាន ឬអាហារដ្ឋានជាដើម ហើយរដ្ឋបាលខេត្ត នឹងធ្វើការសហការជាមួយសមាគមន៍ហ្វារពន្លឺសិល្បៈ ដើម្បីរៀបចំការសម្ដែងសិល្បៈផ្សេងៗ នៅក្នុងថ្ងៃណាមួយ ដើម្បីឲ្យប្រជាពលរដ្ឋ ភ្ញៀវទេសចរបានយល់ដឹង និងបានទស្សនាការសម្ដែងសិល្បៈពីសិល្បករក្នុងខេត្តរបស់យើង។

ទោះជាយ៉ាងណា លោមិនទាន់បញ្ជាក់ឲ្យដឹងថា គម្រោងនេះនឹងចាប់ផ្តើមរៀបចំនៅពេលណានៅឡើយទេ៕

សម្តេចតេជោលុបចោលគោលការណ៍បីប្រការ ដើម្បីកម្ពុជាឈានទៅកាន់ដំណាក់កាលថ្មីមួយ

ដោយៈ សុផារី

ភ្នំពេញៈ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជានៅព្រឹកថ្ងៃព្រហស្បតិ៍នេះ បានលើកឡើងថា សម្តេចបានសម្រេចលុបចោលចំណុចចំនួនបីសម្រាប់អ្នកដំណើរអន្តរជាតិ ក្នុងគោលដៅបន្ធូរបន្ថយលក្ខខណ្ឌតម្រូវចូលមកកម្ពុជា ក្នុងការសម្រួលដល់ការទាក់ទាញវិនិយោគ ការធ្វើធុរកិច្ច និងទាក់ទាញទេសចរណ៍ ដែលចាប់អនុវត្តន៍ចាប់ពីថ្ងៃទី១៧ ខែមីនា ឆ្នាំ២០២២នេះតទៅ។

ក្រសួងសុខាភិបាលចេញសេចក្តីប្រកាសពិសេសមួយ ដោយប្រកាសកែសម្រួលលក្ខខណ្ឌមួយចំនួន ចំពោះអ្នកដំណើរមកពីបរទេស ពេលមកដល់ប្រទេសកម្ពុជា ដោយយោងតាមចំណារឯកភាព របស់សម្តេចតេជោ ហ៊ុន សែន គណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ-១៩ សម្រេ​ចដូចខាងក្រោម ទី១ លុបចោលលក្ខខណ្ឌតម្រូវឱ្យអ្នកដំណើរមកពីបរទេសត្រូវបង្ហាញលទ្ធផលតេស្ត PCR អវិជ្ជមាន ក្នុងរយៈពេល៧២ម៉ោង មុនពេលមកដល់កម្ពុជា។

ទី២ លុបចោលការតម្រូវឱ្យធ្វើតេស្តរហ័សនៅពេលមកដល់កម្ពុជា។  និងទី៣ អនុញ្ញាតឱ្យបើកដំណើរការឡើងវិញ នូវការផ្តល់ទិដ្ឋាការពេលមកដល់ (Visa on Arrival) សម្រាប់អ្នកដំណើរអន្តរជាតិទាំងអស់ ទាំងអ្នកដំណើរតាមផ្លូវអាកាស ផ្លូវគោក និងផ្លូវទឹក។

សម្តេចបានបញ្ជាក់ថា “នេះធ្វើឡើងតាមការស្នើសុំ របស់លោករដ្ឋមន្ត្រីក្រសួងទេសចរណ៍ ដើម្បីទាក់ទាញភ្ញៀវទេសចរមកកាន់កម្ពុជា កាន់តែច្រើនជាងមុន និងអាចឈានទៅកាន់ការស្តារវិស័យទេសចរ និងសេវាកម្មដែលទទួលរងនូវវផលប៉ះពាល់ច្រើនជាងគេ”។ សម្តេចតេជោបញ្ជាក់ថា “ការបន្ធូរបន្ថយលក្ខខណ្ឌតម្រូវ ចូលមកកម្ពុជានេះ ដើម្បីសម្រួលដល់ការទាក់ទាញវិនិយោគ ការធ្វើធុរកិច្ច និងទាក់ទាញទេសចរណ៍ រួមទាំងកាត់បន្ថយនូវការចំណាយធ្វើដំណើរ”។

សម្តេចតេជោបានបញ្ជាក់ថា ការលុបចោលលក្ខខណ្ឌតម្រូវធ្វើតេស្ត PCR និងតេស្តរហ័ស ក៏នឹងជួយសម្រួលដល់ការធ្វើដំណើរចេញចូល របស់បងប្អូនប្រជាជនខ្មែរ ទាំងការឈឺចាប់ដោយសាររុកច្រមុះ និងការចំណាយថវិកាសម្រាប់ធ្វើតេស្ត។

សម្តេចតេជោថ្លែងបន្តថា “យើងសម្រួលបញ្ហានេះ ដើម្បីទាក់ទាញការវិនិយោគ ការធ្វើធុរកិច្ច និងធ្វើទេសចរណ៍នៅកម្ពុជា។ ចំណុចអស់ទាំងនេះ គឺជាចំណុចដែលយើងនៅតែបន្ត ក្នុងការធ្វើសកម្មភាពឆ្ពោះទៅមុខ ដើម្បីគោលដៅនៃការអភិវឌ្ឍន៍រៀនរស់ ជាមួយនឹងកូវីដ១៩”។

សម្តេចតេជោបានបញ្ជាក់ថា តាមរយៈការធ្វើតេស្តនេះ ធ្វើរាជរដ្ឋាភិបាលចំណាយប្រាក់យ៉ាងច្រើន ក្នុង១ថ្ងៃៗ ទៅលើឧបករណ៍តេស្ត និងសម្លៀកបំពាក់គ្រូពេទ្យផងដែរ។

សម្តេចបានថ្លែងថា “ការខ្វេះចម្រុះធ្វើតេស្ត មិនមែនត្រឹមតែឈឺច្រមុះទេ វាអស់លុយ មួយថ្ងៃៗរាជរដ្ឋាភិបាលចាយលុយច្រើនណាស់ មានទាំងឧបករណ៍ធ្វើតេស្ត សម្លៀកបំពាក់ធ្វើតេស្ត”។

ចំពោះអ្នកដំណើរ ដែលពុំបានចាក់វ៉ាក់សាំងកូវីដ-១៩ពេញលេញ ត្រូវធ្វើចត្តាឡីស័ករយៈពេល១៤ថ្ងៃ នៅតាមទីតាំងដែលកំណត់ដោយ ក្រសួងសុខាភិបាលឬអាជ្ញាធរមានសមត្ថកិច្ច៕

សម្ដេចតេជោៈស្នើឲ្យប្រជាពលរដ្ឋកុំជេសម្តេចអី

 ដោយៈវឌ្ឍនៈ

ភ្នំពេញៈ ជុំវិញបញ្ហាសាំងឡើងថ្លៃ នៅក្នុងប្រទេសកម្ពុជាបានននិងកំពុងក្លាយជាប្រធានបទក្ដៅ និងកំពុងធ្វើឱ្យប៉ះពាល់ដល់ជីវភាពរស់នៅរបស់ប្រជាពលរដ្ឋ និងមានប្រជាពលរដ្ឋមួយចំនួន បានដាក់បញ្ហានេះទៅលើរដ្ឋាភិបាល។

សម្ដេចតេជោហ៊ុន សែន នាយករដ្ឋមន្ត្រីនៃកម្ពុជាបានថ្លែងថា “សាំងឡើងថ្លៃ កុំជេរហ៊ុនសែនអី”។ សម្ដេចថ្លែងបែបនេះ នៅក្នុងពិធីសម្ពោធ ជាផ្លូវការភូមិកុមារ អេស អូ អេស (SOS) ខេត្តព្រៃវែង នៅព្រឹកថ្ងៃទី១៧ ខែមីនា ឆ្នាំ ២០២២។

សម្ដេចមានប្រសាសន៍ថា សង្រ្គាមរវាងរុស្ស៊ីនិងអ៊ុយក្រែន វាបានបង្កើតជាបញ្ហាសម្រាប់សេដ្ឋកិច្ចសកលហើយ ។ អតិផរណានៅសហរដ្ឋអាមេរិក ដែលមិនធ្លាប់មានរយៈពេល៤០ឆ្នាំមកហើយនោះ ក៏បានកើតឡើងហើយ និងនៅអឺរ៉ុបក៏កំពុងរងផលប៉ះពាល់ ។ ពេលនេះប្រទេសជាច្រើននាំគ្នាឈប់ទិញប្រេងពីរុស្ស៊ី ដើម្បីជាការដាក់ទណ្ឌកម្មលើប្រទេសរុស្ស៊ី។

សម្ដេចតេជោហ៊ុន សែនបន្តថា ប្រេងនឹងឡើងបន្តទៀត វាមិនមែននៅត្រឹមនេះទេ តែយ៉ាងណាក្ដីយើងក៏មានដំណោះស្រាយ សម្រាប់បញ្ហានេះដែរ ដូចជា ការកាត់បន្ថយការធ្វើដំណើរ ការធ្វើដំណើរដោយរួមគ្នាឬកាត់បន្ថយការប្រើប្រាស់យានយន្តច្រើន ដែលទាំងនេះអាចកាត់បន្ថយការប្រើប្រាស់សាំងបានមួយកម្រិតផងដែរ។

សម្ដេចតេជោបន្ថែមថា“អ្នកខ្លះរអ៊ូនៅតែរអ៊ូ តែស្ថានភាពចរាចរណ៍នៅតែស្ទះខ្លាំង អ្នកប្រើប្រាស់យានយន្តនៅតែប្រើ ពីព្រោះវាជាកាតព្វកិច្ចដែលត្រូវប្រើនិងមិនអាចទៅរារាំងបានឡើយ”។

តម្លៃប្រេងឥន្ធនៈលក់រាយ នៅលើទីផ្សារក្នុងប្រទេសកម្ពុជា ដែលរដ្ឋាភិបាលកំណត់កាលពីថ្ងៃទី១៦ មីនា២០២២ ចំពោះសាំងធម្មតា និងប្រេងម៉ាស៊ូត មានតម្លៃ៥៣០០រៀលក្នុងមួយលីត្រ ខណៈសាំងស៊ុបពែរមានតម្លៃរហូតដល់៦០០០រៀលក្នុងមួយលីត្រ និងមានស្ថានីយ៍ប្រេងខ្លះទៀត មានតម្លៃខ្ពស់ជាងនេះ ពីព្រោះរដ្ឋាភិបាលមិនបានកំណត់តម្លៃ ប្រេងសាំងស៊ុបពែរនោះទេ ពោលគឺកំណត់តែសាំងធម្មតា និងប្រេងម៉ាស៊ូតប៉ុណ្ណោះ ដើម្បីសម្រួលដល់ជីវភាព ពលរដ្ឋមានប្រាក់ចំណូលទាបនិងមធ្យម៕

ធនាគារ ហត្ថា ម.កចុះMOUមជ្ឈមណ្ឌលបណ្តុះធុរកិច្ចថ្មី “តេជោ” តាមប្រព័ន្ធអ៊ីនធឺណិត​

ដោយៈ វិច្ឆិកា

ភ្នំពេញៈ ធនាគារហត្ថា ដែលជាស្ថាប័នហិរញ្ញវត្ថុឈានមុខគេមួយ ក្នុងចំណោមធនាគារឈានមុខគេនៅកម្ពុជា បានចុះអនុស្សរណៈនៃការយោគយល់គ្នា(MOU)ជាមួយមជ្ឈមណ្ឌលធុរកិច្ច “តេជោ”តាមប្រព័ន្ខអ៉ីនធើណេត។

គោលបំណងនៃកិច្ចសហការនេះ នឹងផ្តល់នូវដំណោះស្រាយដោយ ការបំប្លែងរូបភាពឯកសារទៅជាអក្សរកែប្រែ (OCR) និងសម្គាល់អត្តសញ្ញា​ណអតិថិជនតាមប្រព័ន្ធអេឡិចត្រូនិក (e-KYC) សម្រាប់ការកែលម្អបទពិសោធន៍របស់អតិថិជន សម្រាប់ការបើកគណនីតាមរយៈ Smart Teller Machine (STM) និង Mobile Banking។

ពិធីចុះហត្ថលេខានេះបានធ្វើឡើងកាលពី ថ្ងៃទី១៥ ខែមីនា ឆ្នាំ២០២២ ធនាគារ ហត្ថា ម.ក និង មជ្ឈមណ្ឌលបណ្តុះធុរកិច្ចថ្មី “តេជោ” បានចុះហត្ថលេខាលើអនុស្សរណៈ នៃការយោគយល់គ្នា តាមប្រព័ន្ធអ៊ីនធឺណិត​ ក្នុងគោលបំណងចូលរួមសកម្មភាពស្រាវជ្រាវ និងអភិវឌ្ឍបច្ចេកវិទ្យា ​OCR (Optical Character Recognition – ការបំប្លែងរូបភាពឯកសារទៅជាអក្សរកែប្រែ)  និង ​e-KYC (electronic Know Your Customer – សម្គាល់អត្តសញ្ញាណអតិថិជនតាមប្រព័ន្ធអេឡិចត្រូនិក) តាមរយៈការប្រើប្រាស់កម្មវិធី CamDigiKey (Cambodia Digital Key) ។

កិច្ចសហការនេះ នឹងផ្តល់នូវដំណោះស្រាយ ដោយការបំប្លែងរូបភាពឯកសារទៅជាអក្សរកែប្រែ (OCR) និងសម្គាល់អត្តសញ្ញាណអតិថិជនតាមប្រព័ន្ធអេឡិចត្រូនិក (e-KYC) ក្នុងការកែលម្អបទពិសោធន៍របស់អតិថិជន ដោយផ្តល់ដំណោះស្រាយ ផ្ទៀងផ្ទាត់ព័ត៌មានរបស់អ្នកប្រើប្រាស់ សម្រាប់ការបើកគណនីតាមរយៈ Smart Teller Machine (STM) និង Mobile Banking។

លោកបណ្ឌិត តាំង ងួនលី នាយកនៃមជ្ឈមណ្ឌលបណ្តុះធុរកិច្ចថ្មី “តេជោ” បានលើកឡើងថា ការស្រាវជ្រាវ និងអភិវឌ្ឍបច្ចេកវិទ្យា ​OCR និង ​e-KYC ពិតជាមានសារៈសំខាន់ ក្នុងការធ្វើទំនើបកម្មឌីជីថល និងគាំទ្រ បរិវត្តកម្មឌីជីថល ស្របទៅនឹងគោលនយោបាយ យុទ្ធសាស្ត្រចតុកោណរបស់រាជរដ្ឋាភិបាលកម្ពុជា។ មជ្ឈមណ្ឌលបណ្តុះធុរកិច្ចថ្មី “តេ​​​ជោ” ប្រមូលផ្តុំទៅដោយយុវជនឆ្នើមកម្ពុជា រួមគ្នាស្រាវជ្រាវ និងអភិវឌ្ឍ​ ហើយក៏ទទួលបានភាព​​ជោគជ័យជាបន្តបន្ទាប់ ជាក់ស្តែងទៅលើឌីជីថលូបនីយកម្មភាសាខ្មែរ​​ (Natural Language Processing)​​ ជាមួយនិងការផ្តល់​ដំណោះស្រាយដោយការបំប្លែងរូបភាពឯកសារ ទៅជាអក្សរកែប្រែ (OCR) និងសម្គាល់អត្តសញ្ញាណអតិថិជនតាមប្រព័ន្ធអេឡិចត្រូនិក (e-KYC) តាមរយៈការប្រើប្រាស់កម្មវិធី CamDigiKey។

លោកបន្តថា“ការប្រើប្រាស់ OCR និង e-KYC មានភាពទូលំទូលាយ ហើយពិតជាមានសារៈសំខាន់ ក្នុងការជួយគាំទ្រដល់វិស័យធនាគារ ក៏ដូចវិស័យផ្សេងៗទៀត ដើម្បីជំរុញបរិវត្តកម្មឌីជីថលប្រកបដោយចីរភាព”។

លោក នួន វីរៈដារ៉ា អគ្គនាយកឌីជីថលនៃធនាគារហត្ថា ម.ក តំណាង លោកឧញ៉ា ហួត អៀងតុង ប្រធានអគ្គនាយក នៃធនាគារ ហត្ថា ម.ក បានបង្ហាញការចាប់អារម្មណ៍ជាខ្លាំង ទៅលើសមិទ្ធផលរបស់មជ្ឈមណ្ឌលបណ្តុះធុរកិច្ចថ្មី “តេជោ” ជាពិសេសបច្ចេកវិទ្យា OCR និង e-KYC។​ លោកបន្តទៀតថា លោកមានភាពជឿជាក់យ៉ាងខ្លាំង និងបង្ហាញការគាំទ្រយ៉ាងពេញទំហឹងទៅលើផលិតផលឌីជីថល ដែលបង្កើតដោយស្នាដៃកូនខ្មែរ។

លោកបន្តថា ធនាគារហត្ថា បានវិវឌ្ឍខ្លួនពីគ្រឹះស្ថានមីក្រូហិរញ្ញវត្ថុ ទៅជាធនាគារពាណិជ្ជ នៅថ្ងៃទី ២៦ ខែសីហា ឆ្នាំ២០២០ ដែលបានអនុម័តជាផ្លូវការដោយធនាគារជាតិនៃកម្ពុជា។ ធនាគារហត្ថា បានក្លាយខ្លួនជាធនាគា​រមួយ ក្នុងចំណោមធនាគារឈានមុខគេនៅកម្ពុជា។ លោកសង្ឃឹមយ៉ាងមុតមាំថា តាមរយៈកិច្ចសហប្រតិបត្តិការនេះ​ ធនាគារហត្ថា និងមជ្ឈម​ណ្ឌ​លបណ្តុះធុរកិច្ចថ្មី “តេជោ” នឹងអាចគាំទ្រ និងរួមសហការគ្នា ដើម្បីបន្តកិច្ចការងារស្រាវជ្រាវ និងអភិវឌ្ឍបច្ចេកវិទ្យា ​OCR និង e-KYC ឱ្យកាន់តែប្រសើរ។

តាមរយៈវត្តមានដ៏រឹងមាំរបស់ស្ថាប័នទាំងពីរ កម្មវិធីនេះគឺជាព្រឹត្តិកា​រណ៍ដ៏សំខាន់មួយ ដែលអនុញ្ញាតឱ្យមជ្ឈមណ្ឌលបណ្តុះធុរកិច្ចថ្មី “តេជោ” និង ធនាគារ ហត្ថា ធ្វើកិច្ចសហប្រតិបត្តិការ តាមជំនាញរបស់ខ្លួនរួមគ្នា ក្នុងគោលបំណង ចូលរួមសកម្មភាពស្រាវជ្រាវនិងអភិវឌ្ឍន៍ និងផ្តល់ជូននូវផលិតផល និងសេវាកម្មថ្មី បែបឌីជីថល ដើម្បីធានាបាននូវប្រសិទ្ធភាពកាន់តែល្អប្រសើរ និងអត្ថប្រយោជន៍កាន់តែសម្បូរបែប សម្រាប់អតិថិជន ក៏ដូចជាសង្គមជាតិយើងទាំងមូល។

អំពីមជ្ឈមណ្ឌលបណ្តុះធុរកិច្ចថ្មី “តេជោ”

មជ្ឈមណ្ឌលបណ្តុះធុរកិច្ចថ្មី “តេជោ” គឺជាស្ថាប័នរដ្ឋមួយ ដែលទទួលបានការគាំទ្រពីរាជរដ្ឋាភិបាលកម្ពុជា និងវិស័យឯកជន សំដៅលើកកម្ពស់សមត្ថភាពយុវជនកម្ពុជា ក៏ដូចជា បណ្តុះធុរកិច្ចថ្មីផ្នែកបច្ចេកវិទ្យា និងកសាងប្រព័ន្ធអេកូឡូស៊ីឌីជីថល តាមរយៈកម្មវិធីគាំទ្រមួយចំនួន។ ស្ថាប័ននេះក៏ជាមជ្ឈមណ្ឌលស្រាវជ្រាវ និងអភិវឌ្ឍន៍ដ៏សំខាន់មួយរបស់កម្ពុជា។

អំពី ធនាគារ ហត្ថា ម.ក

ធនាគារហត្ថា គឺជាធនាគារមួយ ក្នុងចំណោមធនាគារឈានមុខគេផ្សេងទៀតនៅកម្ពុជា ដែលទទួលបានអាជ្ញាប័ណ្ណធ្វើប្រតិបត្តិការ ជាធនាគារពាណិជ្ជ ពីធនាគារជាតិនៃកម្ពុជា ចាប់ពីថ្ងៃទី ២៦ ខែ សីហា ឆ្នាំ ២០២០។

ជាមួយបទពិសោធន៍ ក្នុងការបម្រើសេវាហិរញ្ញវត្ថុទៅកាន់ប្រជាជនកម្ពុជាអស់រយៈពេលជិត៣០ឆ្នាំ និងក្រោយការផ្លាស់ប្តូរមុខមាត់ថ្មីរបស់ខ្លួន, ធនាគារ ហត្ថា បានកែលម្អ និងដាក់ឱ្យប្រើប្រាស់បន្ថែមនូវសេវាហិរញ្ញវត្ថុជាច្រើនដែលមានដូចជា សេវាធនាគារចល័ត (Hattha Mobile) សេវាផ្ទេរប្រាក់ឆ្លងធនាគារ សេវាឥណទាន សេវាប្រាក់បញ្ញើសន្សំ សេវាផ្ទេរប្រាក់ឆ្លងធនាគារ សេវាផ្ទេរប្រាក់ក្នុងស្រុក សេវាអេធីអឹម សេវាបើកប្រាក់បៀវត្ស ព្រមទាំងជាភ្នាក់ងារណែនាំលក់សេវាធានារ៉ាប់រង និងបានត្រៀមខ្លួនក្នុងការផ្តល់ជូននូវសេវាសេវាហិរញ្ញវត្ថុថ្មីៗជាច្រើនទៀត៕

 

អ្នកជំនាញព្រមានឱ្យរដ្ឋបាលក្រុងហូជីមិញពិចារណាឡើងវិញចំពោះផែនការពង្រីកក្រុង

ដោយៈសុខុម

ហូជីមិញ: ក្រុមអ្នកជំនាញព្រមានថា រដ្ឋបាលក្រុងហូជីមិញគួរតែពិចារណាឡើងវិញឱ្យបានល្អិតល្អន់ ចំពោះផែនការពង្រីកខ្លួនទៅសង្កាត់ដែលនៅជាយៗរបស់ខ្លូន ព្រោះវានឹងផ្ដល់តែផលចំណេញ ដល់បណ្ដាក្រុមហ៊ុនអភិវឌ្ឍន៍អចលនទ្រព្យប៉ុណ្ណោះ គឺមិនមែនពលរដ្ឋដែលរស់នៅទីនោះឡើយ។

លោក Ngô Viết Nam Sơn ស្ថាបត្យករជើងចាស់ដែលមានបទពិសោធន៍៣០ឆ្នាំនិយាយថា ផែនការពង្រីកក្រុងនេះ នឹងធ្វើឱ្យពលរដ្ឋកា​ន់តែគ្មានលទ្ធភាពទិញផ្ទះ ដែលមានតម្លៃផ្ទះបច្ចុប្បន្ន ថ្លៃលើសពីលទ្ធភាពរួចទៅហើយសម្រាប់ពលរដ្ឋភាគច្រើន។ នេះបើយោងតាមសារព័ត៌មាន Vietnam News ចុះផ្សាយកាលពីថ្ងៃពុធ ទី១៦ មីនា។

អ្នកជំនាញរូបនេះលើកឡើងទៀតថា “ការធ្វើនគរូបនីយកម្មយ៉ាងឆាប់រហ័ស មិនមែនជារឿងល្អឡើយសម្រាប់ហូជីមិញ ព្រោះទីក្រុងនេះចាំបាច់ត្រូវរក្សាទុកតំបន់កសិកម្ម និងអភិវឌ្ឍសង្កាត់ដែលនៅជាយៗ ដើម្បីទាក់ទាញភ្ញៀវទេសចរ”។

លោកបានគូសបញ្ជាក់ថា វាក៏អាចជះផលប៉ះពាល់ដល់បរិស្ថានផងដែរ។

ការជជែកដេញដោលជាសាធារណៈ បានចាប់ផ្តើមយ៉ាងផុសផុល បន្ទាប់ពីរដ្ឋបាល នៃសង្កាត់ជាយៗក្រុងហូជីមិញ ដូចជាសង្កាត់ Binh Chánh សង្កាត់ Cần Giờ និងសង្កាត់ Củ Chi ជាដើមនិយាយថា ពួកគេក៏ចង់អភិវឌ្ឍខ្លួនទៅជាទីក្រុងដែរ។

*ដីកសិកម្មនឹងត្រូវប្រែក្លាយទៅជាដីក្រុង
បណ្ឌិត Võ Kim Cương អតីតនាយករងស្ថាបត្យករ នៃទីក្រុងហូជីមិញ ធ្លាប់បានលើកឡើងថា “ប្រហែលជាផែនការធ្វើនគរូបនីយកម្ម សង្កាត់ជាយៗនៃក្រុងហូជីមិញ មានបំណងប្រែក្លាយដីកសិកម្ម ទៅជាដីក្រុងហើយមើលទៅ។ ការធ្វើនគរូបនីយកម្ម សង្កាត់ជាយៗត្រូវតែបំពេញបានតាមលក្ខខណ្ឌបរិស្ថាន និងអេកូឡូស៊ី”។

អ្នកជំនាញរូបនេះគូសបញ្ជាក់ថា ដោយមានប្រព័ន្ធអេកូឡូស៊ី ព្រៃកោងកាងដ៏ល្អល្អះ និងមានឋានៈជាដែនជីវចម្រុះរបស់ពិភពលោក សង្កាត់ Cần Giờ គួរតែផ្តោតលើការអភិវឌ្ឍទេសចរណ៍ធម្មជាតិតំបន់ក្រុង។

យោងតាមក្រុមអ្នកជំនាញឱ្យដឹងថា ដើម្បីសម្រេចបានគោលដៅក្លា​យជាក្រុង នៅក្នុងទីក្រុងដូចសង្កាត់ Thủ Đức ជាដើម សង្កាត់ដែលនៅជាយៗក្រុង ត្រូវតែធ្វើការកែលម្អការគ្រប់គ្រងលើគ្រប់វិស័យ រួមទាំងការប្រយុទ្ធប្រឆាំងអំពើពុករលួយ និងការចំណាយខ្ជះខ្ជាយផងដែរ។

ដោយមានផ្ទៃដីសរុបជាង២.០០០គីឡូម៉ែត្រការ៉េ ក្រុងហូជីមិញ នាពេលបច្ចុប្បន្ននេះ មានប្រជាជនរស់នៅរហូតដល់ទៅ១៣លាននាក់៕ Vietnam News៕

សឹង្ហបុរីជំរុញឱ្យមហាយក្សចិនប្រើឥទ្ធិពលដ៏មហិមាររបស់ខ្លួនដើម្បីបង្ខំឱ្យរុស្ស៊ី ឆាប់បញ្ចប់សង្គ្រាមនៅអ៊ុយក្រែន

ដោយៈសុខុម

អន្តរជាតិ: មន្ត្រីការទូតកំពូលរបស់សឹង្ហបុរី បានលើកឡើងថា លោកសង្ឃឹមថា ប្រទេសចិននឹងប្រើ “ឥទ្ធិពលដ៏មហិមារ” របស់ខ្លួនបង្ខំឱ្យរុស្ស៊ី ឆាប់បញ្ចប់សង្គ្រាមនៅអ៊ុយក្រែន ដើម្បីសង្គ្រោះសេដ្ឋកិច្ចពិភពលោក។ នេះបើយោងតាមសារព័ត៌មាន South China Morning Post ចុះផ្សាយកាលពីថ្ងៃពុធ ទី១៦ មីនា។

លោក Vivian Balakrishnan រដ្ឋមន្ត្រីការបរទេសសិង្ហបុរី ព្រមានថា សេចក្ដីសម្រេចរបស់រដ្ឋាភិបាលក្រុងប៉េកាំង នៅប៉ុន្មានសប្ដាហ៍ ឬប៉ុន្មានថ្ងៃខាងមុខនេះ ពិតជាសំខាន់ណាស់ ព្រោះវាអាចកំណត់មាគ៌ា សម្រាប់សេដ្ឋកិច្ចពិភពលោកនាថ្ងៃអនាគត។

ពេលផ្ដល់បទសម្ភាសន៍ដល់សារព័ត៌មាន Bloomberg រដ្ឋមន្ត្រីរូបនេះថ្លែងថា “បញ្ហាធំនៅពេលនេះគឺថា តើប្រទេសចិន នឹងធ្វើការសម្រេចបែបណា និងចាត់វិធានការបែបណា”។

សិង្ហបុរី កាលពីខែមុនបានក្លាយជាប្រទេសដំបូងគេ នៅតំបន់អាស៊ីអាគ្នេយ៍ ដែលហ៊ានប្រកាសថា ខ្លួននឹងដាក់ទណ្ឌកម្មជាឯកតភាគី លើប្រទេសរុស្ស៊ី ចំពោះការបញ្ឆេះសង្គ្រាមចូលឈ្លានពាន ប្រទេសអ៊ុយក្រែន ជាចំណាត់ការមួយ ដែលលោក Vivian Balakrishnan យល់ថាចាំបាច់ខ្លាំង។

រដ្ឋមន្ត្រីការបរទេសរូបនេះ បានធ្វើការកត់សម្គាល់ថា ប្រទេសចិន មានសេដ្ឋកិច្ចធំជាងរុស្ស៊ី និងមានឥទ្ធិពលលើរុស្ស៊ី។

លោកនិយាយអំពីរដ្ឋាភិបាលក្រុងប៉េកាំង ក្រោមការដឹកនាំរបស់ប្រ​ធានាធិបតី ស៊ី ជីនភីង យ៉ាងដូច្នេះថា “ខ្ញុំសង្ឃឹមថា ពួកគេនឹងប្រើប្រាស់ឥទ្ធិពលរបស់ខ្លួន ដែលមានចរិតលក្ខណៈចិន ពោលគឺធ្វើដោយស្ងាត់ៗ មិនសម្ញែង ប៉ុន្តែមានប្រសិទ្ធភាព”។

លោកបានបន្ថែមទៀតថា “ពេលនេះ គឺមានក្ដីសង្ឃឹម ហើយត្រង់ថានេះវាគ្រាន់តែជាអ្វីដែលខ្ញុំគិតតែឯង ឬយ៉ាងណា យើងនឹងមើលឃើញជាក់ស្ដែងនៅប៉ុន្មានសប្ដាហ៍ ឬ ប៉ុន្មានថ្ងៃខាងមុខ”៕ South China Morning Post៕