ដោយ សុខុម

ហូជីមិញ៖​ អាផាតម៉ិនប្រណីត និងអាផាតម៉ិនលំដាប់មធ្យមនឹងបន្តនាំមុខទីផ្សារនៅឆ្នាំ២០២២ នេះ ខណៈអាផាតម៉ិនតម្លៃធូរថ្លៃនឹងនៅតែក្សត់។ នេះបើយោងតាមសារព័ត៌មាន Vietnam News ចុះផ្សាយកាលពីថ្ងៃសៅរ៍ ទី១៥ មករា។

ផ្អែកតាមរបាយការណ៍របស់ក្រុមហ៊ុនផ្ដល់ប្រឹក្សាអចលនទ្រព្យ DKRA Vietnam Joint Stock Company ស្តីពីទីផ្សារលំនៅដ្ឋាននៅទីក្រុងហូជីមិញ និងបណ្ដាខេត្តជុំវិញក្នុងឆ្នាំ២០២១ បង្ហាញថា គម្រោងអាផាតម៉ិនដែលបានចូលក្នុងទីផ្សារមានចំនួន៤១គម្រោង ដែលគិតជាយូនីតសរុបប្រមាណ២១.១៣៨យូនីត ដោយភាគច្រើនស្ថិតនៅក្រុងហូជីមិញ និងខេត្ត Bình Dương។

យោងតាមទិន្នន័យបង្ហាញថា គម្រោងទាំងនោះលក់បានចំនួន១៧.១២២យូនីត។

នៅក្រុងហូជីមិញ ការផ្គត់ផ្គង់ និងតម្រូវការបានធ្លាក់ចុះយ៉ាងខ្លាំងចាប់តាំងពីឆ្នាំ២០២០ ហើយបានធ្លាក់ចុះដល់កម្រិតទាបបំផុតមិនធ្លាប់មានចាប់តាំងពីឆ្នាំ២០១៥ មក។

អាផាតម៉ិនប្រណីតនៅក្នុងទីក្រុងបាននេះបានហក់ឡើងថ្លៃមួយកម្រិតទៀត រហូតដល់ទៅជិត៤០០លានដុង (១៧.៥៥៥ដុល្លារអាមេរិក) ក្នុងមួយម៉ែត្រការ៉េ។

យោងតាមក្រុមហ៊ុនផ្តល់សេវាអចលនទ្រព្យមួយផ្សេងទៀតឈ្មោះ Cushman & Wakefield បង្ហាញថា តាមការរំពឹងទុក អាផាតម៉ិនថ្មីៗចន្លោះពី២៥.០០០យូនីតទៅ៣០.០០០យូនីតនឹងហក់ចូលក្នុងទីផ្សារក្រុងហូជីមិញ នៅឆ្នាំនេះ ដោយភាគច្រើនជាអាផាតម៉ិនលំដាប់ប្រណីត និងលំដាប់ខ្ពស់ ហើយការឆានែល ឬ បណ្ដាញលក់តាមប្រព័ន្ធអនឡាញនឹងនៅតែពេញនិយម។

តម្លៃជាមធ្យមនៃអាផាតម៉ិនប្រណីត និងលំដាប់ខ្ពស់បានកើនឡើងលើស១៤៣,៦លានដុង (៦.២៦៦ដុល្លារអាមេរិក) ក្នុងមួយម៉ែត្រការ៉េក្នុងត្រីមាសទី៤ ចុងឆ្នាំ២០២១ ដោយកើនឡើង២៣%។ ទន្ទឹមនេះអាផាតម៉ិនលំដាប់មធ្យមមានតម្លៃ៥៦,៧លានដុង (២.៤៧៤ដុល្លារអាមេរិក) ហើយយូនីតតម្លៃធូរថ្លៃមានតម្លៃ៤០,៩លានដុង (១,៧៨៥ដុល្លារអាមេរិក) ដោយកើនឡើង១៥%។

យោងតាមក្រុមហ៊ុន Cushman & Wakefield ឱ្យដឹងថា ចំនួនសរុបនៃអាផាតម៉ិនទាំងចាស់ទាំងថ្មីដែលលក់បានក្នុងត្រីមាសចុងក្រោយគឺមានចំនួនជិត៣.០០០យូនីត ដោយអាផាតម៉ិនលំដាប់មធ្យមមានចំណែក៨២% ហើយអាផាតម៉ិនលំដាប់ខ្ពស់មានចំណែក១១%។

ទោះជាយ៉ាងណា គ្មានគម្រោងអាផាតម៉ិនថ្មីៗត្រូវបានលក់ចេញទេ។

អាផាតម៉ិនលំដាប់ខ្ពស់គឺជាអាផាតម៉ិនដែលស្ថិតក្នុងទីតាំងល្អមានហាងឆេងខ្ពស់ ហើយមានតម្លៃលើសពី៣.០០០ដុល្លារអាមេរិក ចំណែកឯអាផាតម៉ិនលំដាប់មធ្យមស្ថិតនៅក្នុងទីតាំងងាយស្រួលចេញចូលដែលមានតម្លៃចន្លោះពី១.៨០០ដុល្លារអាមេរិក ដល់៣.០០០ដុល្លារអាមេរិក ហើយអាផាតម៉ិនតម្លៃធូរថ្លៃគឺលក់ក្រោម១.៨០០ដុល្លារអាមេរិក៕

ដោយ: វឌ្ឍនៈ

ភ្នំពេញ ៖ បច្ចុប្បន្ន មុខជំនួញដែល​កំពុងមានការពេញនិយមនិងមានការ​វិនិយោគច្រើននៅកម្ពុជា គឺជំនួញអចលនទ្រព្យ ព្រោះមាន​ផ្នត់​គំនិត​ថា​ការវិនិយោគលើអចលនទ្រព្យគឺជាឱកាសសាងភាពមានបានខ្ពស់។ អ្នកជំនួញអចលនទ្រព្យជាច្រើនបានផ្ដល់ជាទស្សននិងយោបល់ពាក់ព័ន្ធនឹងនឹងប្រឡូកវិស័យអចលនទ្រព្យ ដើម្បីក្លាយខ្លួនដែលមានភាពមានបាន បានឆាប់រហ័សនិងដល់គោលដៅ ខណៈបច្ចុប្បន្ននេះ អ្នកប្រឡូកក្នុងវិស័យអចលនទ្រព្យ មាន​ចំនួន​កាន់តែ​ច្រើន​។

លោកឧកញ៉ាចេង ខេង អគ្គនាយកក្រុមហ៊ុនអចលនទ្រព្យស៊ីភីអិល បានលើកឡើងថាលោកមើលឃើញថា វិស័យអចលនទ្រព្យជាវិស័យមួយដែលអាចសាងភាពមានបាន បានលឿនរហ័សបើសិនជាដើរត្រូវនិងនិងមានផែនការច្បាស់លាស់ ក្នុងការប្រឡូកក្នុងវិស័យអចលនទ្រព្យ។

លោកឧកញ៉ាបន្តថានៅក្នុងជំនួញអចលនទ្រព្យ បានធ្វើឱ្យមនុស្សជាច្រើនបានក្លាយជាអ្នកមាន ក្លាយជាសេដ្ឋី ដោយវាមិនមែនមានតែក្នុងប្រទេសកម្ពុជានោះទេ ជាក់ស្ដែងមហាសេដ្ឋីធំៗនៅលើពិភពលោកភាគច្រើនក៏ប្រឡូកនៅក្នុងវិស័យអចលនទ្រព្យដែរ។

លោកហ៊ិន រស់ ម្ចាស់គម្រោងអភិវឌ្ឍន៍ ភូមិចំការដូងរីសត នៅក្នុងភូមិ ស្ពានដែក ឃុំឆ្លកវៀន ស្រុកសាមគ្គីមានជ័យ ខេត្តកំពង់ឆ្នាំង ក៏បានឱ្យដឹងផងដែរថា មុននឹងលោកសម្រេចប្រឡូកនៅក្នុងវិស័យនេះ លោកបានមើលឃើញថាអ្នកប្រឡូកក្នុងវិស័យអចលនទ្រព្យភាគច្រើនជាអ្នកមាន និងរកលុយបាន ហើយលោកក៏បានប្រឡុកក្នុងវិស័យនេះ ត្រឹមតែរយៈពេលខ្លីប៉ុណ្ណោះលោកក៏រកចំណូលបានពីការប្រឡូកនៅក្នុងវិស័យអចលនទ្រព្យដែរ។

លោកបន្តថាផ្ដើមចេញពីការប្រឡូកក្នុងវិស័យនេះដំបូងលោកមានទុនត្រឹមតែដី២ឡូត៏ប៉ុណ្ណោះ ប៉ុន្តែដោយសារតែឃើញថាការទិញលក់ដីកាន់តែសកម្មនិងទទួលបានបានផល់ចំណេញ លោកក៏បានធ្វើបែបនេះជាបន្តបន្ទាប់ ហើយក៏ទទួលបានលទ្ធផលល្អប្រសើរ និងអាចរកដីសម្រាប់អភិវឌ្ឍន៍ជាដីឡូត៏លំហែមួយកន្លែងដែលមានការវិនិយោគធំមួយក្នុងតំបន់៕

ដោយ សុផារី

កោះកុង៖ រដ្ឋបាលខេត្តកោះកុង កាល​ពី​ថ្ងៃទី១៤ ខែមករា ឆ្នាំ២០២២ បាន​ចេញ​សេចក្តីសម្រេច ស្តីពីការដកហូតផ្ទៃដីទំហំ១០២ហិកតា ស្ថិតនៅភូមិទួលគគីរក្រោម ឃុំទួលគគីរ ស្រុកមណ្ឌលសីមា ខេត្តកោះកុង ទុកជាសម្បត្តិឯកជនរបស់រដ្ឋកាន់កាប់ដោយរដ្ឋបាលខេត្តកោះកុង។

តាម​រយៈ​សេច​ក្តី​សម្រេច​លេខ​ ០០៥/២២ ស.ស.រ ទុកជាមោឃៈនូវរាល់បណ្ណសម្គាល់សិទ្ធិកាន់កាប់ប្រើប្រាស់ដីធ្លី បណ្ណសម្គាល់សិទ្ធិកាន់កាប់ អចលនទ្រព្យ និងឯកសារផ្សេងៗទៀតដែលបញ្ជាក់ពីសិទ្ធិកាន់កាប់ដីមិនស្របច្បាប់ នៃដីក្នុងទីតាំងដីទំហំ១០២ហិកតា ស្ថិតនៅភូមិទួលគគីរក្រោម ឃុំទួលគគីរ ស្រុកមណ្ឌលសីមា ខេត្តកោះកុង ដែលមាន និយាមកាដូចខាងក្រោម៖

X. 287341 Y. 1278933; X. 287172 Y. 1278800; X. 287106 Y. 1278637; X. 287001 Y. 1278312; X. 287039 Y. 1278200; X. 286955 Y. 1278127; X. 286734 Y. 1278228; X. 286703 Y. 1278371; X. 286576 Y. 1278486; X. 286560 Y. 1278581; X. 286722 Y. 1278597; X. 286829 Y.1278749; X. 286683 Y. 1276926; X. 286459 Y. 1278960; X. 286366 Y. 1279166 X. 286326 Y. 1279384; X. 286415 Y. 1279607; X. 286836 Y.1279774 X. 287087 Y. 1279385

ផ្ទៃដីទំហំ១០២ហិកតាខាង​លើ​នេះ​នឹង​ស្ថិត​ក្រោម​អភិបាលកិច្ច​របស់​រដ្ឋបាលស្រុកមណ្ឌលសីមា រដ្ឋបាលឃុំទួលគគីរ ជាមួយមន្ទីរ អង្គភាពជំនាញជុំវិញខេត្ត ក្នុង​ការ​ថែរក្សា ការពារទីតាំងដីនេះឱ្យបានគង់វង្ស។

កន្លងមក​កាលពី​ថ្ងៃ​ទី​០២ ខែមី​នា ឆ្នាំ២០២១ រដ្ឋបាលខេត្តកោះកុងធ្លាប់បាន​ចេញ​អនុក្រឹត្យ​លេខ​០៣ អនក្រ.បក ស្តីពីការធ្វើអនុប្បយោគផ្ទៃដីទំហំ ១២៦ ៩២៨,៣៩ហិកតា ក្នុងតំបន់ការពារធម្មជាតិចំនួន៨តំបន់ក្នុងភូមិសាស្ត្រខេត្តកោះកុង ជាទ្រព្យសម្បត្តិឯកជនរបស់រដ្ឋ ដើម្បីធ្វើប្រទានកម្មជាកម្មសិទ្ធិជូន ប្រជាពលរដ្ឋ និងមួយចំណែកទុកជាទ្រព្យសម្បត្តិឯកជនរបស់រដ្ឋកាន់កាប់ដោយរដ្ឋបាលខេត្តកោះកុង រួច​មក​ហើយ​៕

ដោយ៖ សុធារី

ភ្នំពេញ៖ ក្រុមហ៊ុន សូណាត្រា គ្រុប ដែលបានបណ្តាក់ទុនវិនិយោគក្នុងទំហំទឹកប្រាក់ដ៏ច្រើនសន្ធឹកសន្ធាប់ បើកការដា្ឋនសាងសង់ និងបើកលក់ជាផ្លូវការនូវគម្រោងលំនៅឋាន របស់បុរីសូណាត្រា ដែលមានទីតាំង ស្ថិតនៅភូមិកោះក្របី សង្កាត់ព្រែកថ្មី ខណ្ឌច្បារអំពៅ នាថ្ងៃអាទិត្យ ទី១៦ ខែមករា ឆ្នាំ២០២២។

ក្រុមហ៊ុន សូណាត្រា គ្រុប ជា​ក្រុម​ហ៊ុន​វិនិយោគ​ក្នុងវិស័យអចលនទ្រព្យ សំណង់ ហិរញ្ញប្បទាន គណនេយ្យ-សវនកម្ម និង ភោជនីយដ្ឋានជប៉ុន ព្រមទាំងការវិនិយោគមួយចំនួនទៀតមាន​មួលដ្ឋាន​នៅ​ក្នុង​រាជធានី​ភ្នំពេញ​។

ក្នុង​ឱកាស​នោះ លោក​ឃួង ស្រេង អភិបាលរាជធានីភ្នំពេញ បានបញ្ជាក់ថា​​ នេះពិតជាបានឆ្លុះបញ្ចាំងឱ្យឃើញនូវភាពជោគជ័យថ្មីមួយទៀតរបស់កម្ពុជា ក្នុងការទាក់ទាញ ការវិនិយោគទាំងក្នុង និងក្រៅប្រទេស មកបណ្តាក់ទុន ធ្វើអាជីវកម្មនៅកម្ពុជា កាត់បន្ថយភាពក្រីក្រ និងអភិវឌ្ឍរាជធានីភ្នំពេញឱ្យកាន់តែរីកចម្រើនបន្ថែមទៀត។

លោក​បាន​​បញ្ជាក់ថា គម្រោងអភិវឌ្ឍន៍លំនៅឋាន របស់បុរីសូណាត្រា​ នឹងក្លាយជា ជម្រើសថ្មីបន្ថែមទៀតសម្រាប់បំពេញតម្រូវការទីផ្សារអចលនទ្រព្យ ជូនដល់ពាណិជ្ជករ ធុរជន វិនិយោគិន ជនបរទេស ភ្ញៀវទេសចរណ៍ជាតិ និងអន្តរជាតិ ព្រមទាំងបងប្អូនប្រជាពលរដ្ឋខ្មែរ ស្របពេលដែល ប្រទេសជាតិយើង បានបើកដំណើរការសកម្មភាពសេដ្ឋកិច្ច-សង្គម ពេញលេញឡើងវិញលើគ្រប់វិស័យ។

លោក​បន្ត​ថា “បច្ចុប្បន្ន វិស័យអចលនទ្រព្យ គឺជាជន្ទល់ដ៏សំខាន់មួយ នៃកំណើនសេដ្ឋកិច្ចរបស់កម្ពុជា ម្ល៉ោះហើយ ការសម្រេចចិត្តវិនិយោគក្នុងវិស័យសំណង់លំនៅឋាន និងពាណិជ្ជកម្ម ពិតជាមានតម្រូវការក្នុងអត្រាខ្ពស់ និងនៅមានភាពទូលំទូលាយដើម្បី គាំទ្រដល់ការលូតលាស់ផ្នែកអចលនទ្រព្យ និងដើម្បីបង្កើនភាពធន់ របស់វិស័យឯកជន ឱ្យកាន់តែរឹងមាំ និងប្រសើរឡើង”។

លោកឧកញ៉ាស៊ន សុខណា ប្រធានក្រុមប្រឹក្សាភិបាល ក្រុមហ៊ុនសូណាត្រា គ្រុប បានមានប្រសាសន៍លើកឡើងថា ការបើកការដា្ឋនសាងសង់ និងបើកលក់ជាផ្លូវការ គម្រោងលំនៅឋាននេះ ជាការបង្ហាញពីជ្រុងមួយនៃការរីកចំរើនរបស់កម្ពុជា។

លោកឧកញ៉ាបន្តថា អាជ្ញាធររាជធានីភ្នំពេញនិងរាជរដ្ឋាភិបាលបានខិតខំប្រឹងប្រែងណាស់ក្នុងការទប់ស្កាត់ជម្ងឺកូវីដ-១៩រហូតបានបិទបញ្ចប់ព្រឹត្តិការណ៍សហគមន៍២០កុម្ភៈដែលបានធ្វើអោយក្រុមហ៊ុនរបស់លោកអាចបើកការដា្ឋនសាងសង់ និងបើកលក់ជាផ្លូវការ៕

ដោយៈវឌ្ឈនៈ

ភ្នំពេញៈ វិនិយោគិនបរទេស បានចាប់ផ្ដើមបង្កើនល្បឿនក្នុងការអភិវឌ្ឍគម្រោងរបស់ខ្លួនឡើងវិញ ក្រោយពីរាជរដ្ឋាភិបាលកម្ពុជាបានសម្រេចបើកប្រទេសឡើងវិញ ក្នុងរយៈពេលជាង២ខែកន្លងមក។

ជាក់ស្ដែងគម្រោងអគារខ្ពស់ៗ ចំនួននៅក្នុងខណ្ឌចំការមន ដែលជាគម្រោងវិនិយោគរបស់វិនិយោគិនបរទេស បានចាប់ផ្ដើមធ្វើសកម្មភាពកាន់តែខ្លាំងជាងមុន។

គម្រោងអគារខុនដូ Mesong ដែលជាគម្រោងវិនិយោគរបស់វិនិយោគិនមកពីទីក្រុងហុងកុង នៅក្នុងទីក្រុងរណបកោះពេជ្រ បានបង្ហាញពីការបង្កើនល្បឿន ក្នុងការអភិវឌ្ឍគម្រោងនេះ កាន់តែលឿនបន្តទៀត ដោយបានសហការជាមួយក្រុមហ៊ុនអភិវឌ្ឍន៍ធំៗ នៅលើពិភពលោក ក៏ដូចជាក្រុមហ៊ុនផ្គត់ផ្គង់សម្ភារៈសំណង់ ដើម្បីឱ្យគម្រោងរបស់ខ្លួនបានដំណើរទៅមុខដោយរលូនជាមួយនឹងគុណភាពរឹងមាំ ។

យោងតាមសេចក្ដីប្រកាសព័ត៌មាន របស់ក្រុមហ៊ុនអភិវឌ្ឍន៍អគារខុនដូ Mesong ឱ្យដឹងនាថ្ងៃទី១៤ មករាកន្លងមកថា ការសហការរវាងក្រុមហ៊ុនធំៗ ដែលមានបទពិសោធន៍ ក្នុងការផ្គត់ផ្គង់សម្ភារៈបរិក្ខារ នៅក្នុងអគារនឹងជំរុញ ឱ្យការអភិវឌ្ឍរបស់ Mesong បានផ្ដល់ជូននូវប្រណីតភាព និងគុណភាពដល់ការអភិវឌ្ឍ សំណង់នៅក្នុងប្រទេសកម្ពុជា និងពន្លឿនដល់ការអភិវឌ្ឍរបស់ខ្លួនផងដែរ ។

ដោយឡែកគម្រោងមួយទៀត ក្រោមការវិនិយោគរបស់វិនិយោគិនបរទេសនៅតំបន់ទួលទំពូងក៏ឃើញថា បានចាប់ផ្ដើមយ៉ាងមមាញឹកឡើងវិញ ជាមួយនឹងស្វែងរកទីផ្សារលក់ និងការសាងសង់គម្រោងរបស់ខ្លួនផងដែរ ។

គម្រោង Royal skyland ក៏ត្រូវបានចាត់ទុកជាគម្រោងអគារខ្ពស់មួយនៅកម្ពុជា ត្រូវបានមើលឃើញថា បានបង្កើនល្បឿនអភិវឌ្ឍន៍ឡើងវិញក្រោយពីរាជរដ្ឋាភិបាលកម្ពុជា បានសម្រេចបើកប្រទេស ក្នុងនោះគម្រោងអគារខុនដូ រ៉ូយ៉ាល់ស្កាយលែន ក៏បានស្វះស្វែងរកដៃគូលក់គម្រោងរបស់ខ្លួនជាច្រើន ស្របពេលជាមួយនឹងការជំរុញការសាងសង់ ឱ្យបានបញ្ចប់ទៅតាមផែនការរបស់ខ្លួន ។

លោកប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ Advance បាន ឱ្យ​ដឹងថា ក្រោយបើកប្រទេសគឺស្ថានភាពបានល្អប្រសើរ ហើយវិនិយោគិនដែលមានវត្តមាន ក្នុងប្រទេសកម្ពុជា បានចាប់ផ្ដើមបញ្ចេញសកម្មភាពរបស់ខ្លួនភ្លាម តែសម្រាប់វិនិយោគបរទេសថ្មីៗ នៅតែមិនទាន់ឃើញមានចូលមកកម្ពុជាស្វែងការវិនិយោគច្រើននោះទេ៕

ដោយៈ សុធារី

ភ្នំពេញៈ ព្រឹត្តិការណ៍សហគមន៍ ២០កុម្ភៈ ក្នុងឆ្នាំ២០២១ បានធ្វើឱ្យចរន្តទិញ លក់ក្នុងវិស័យអចលនទ្រព្យ ក៏ទទួលរងផលប៉ះពាល់ផងដែរ ពិសេ​សការទិញលក់ដីឡូតិ៍។

ទោះយ៉ាងណាក្តី អ្នកជំនាញអចលនទ្រព្យមានសុទិដ្ឋិនិយមថា ទីផ្សារដីឡូតិ៍កម្ពុជា នឹងមានដំណើរការល្អជាងឆ្នាំ២០២១ ទោះប្រឈមនឹងវិបត្តិកូវីដ១៩បន្តក្តី​។

លោក ម៉ាន់ ច័ន្ទឌី អ្នកជំនាញមួយរូបថ្លែងថា ឆ្នាំ២០២២ វិស័យដីឡូតិ៍នៅតែមានដំណើរការ ល្អជាងឆ្នាំ២០២១ ជាក់ស្ដែងដើមឆ្នាំ២០២២ ចូលមកដល់ភ្លាម ទីផ្សារដីឡូតិ៍មានភ្លាមតែម្ដង និងមានតម្រូវការច្រើន ព្រមទាំងល្អប្រសើរទៀតផង ដោយអតិថិជននៅតែមានតម្រូវការ និងចាប់អារម្មណ៍លើការទិញ-លក់ដីឡូតិ៍។

លោកបន្តថា “បញ្ហាប្រឈមមិនមាននោះទេ ប្រសិនបើរាជរដ្ឋាភិបាលអាចគ្រប់គ្រងជំងឺកូវីដ១៩បំប្លែងថ្មី អូមីក្រុង។ ជាក់ស្ដែងថ្មីៗនេះ រាជរដ្ឋាភិបាលបានចេញ នូវយុទ្ធសាស្រ្ដមួយចំនួន ដូចជា ចាប់ផ្ដើមចាក់ដូសជំរុញចំពោះអ្នកជួរមុខ និងអ្នកនៅក្នុងក្រុងភ្នំពេញ ដូច្នេះមិនមានបញ្ហាប្រឈមចំពោះវិស័យដីឡូតិ៍ឡើយ”។

លោកម៉ាន់ ច័ន្ទឌីបានបន្ដថា ទីផ្សារដីឡូតិ៍នៅតែមានតម្រូវការ ទោះបីតម្លៃមានការប្រែប្រួលតិចតួចក្ដី ដោយសារតែបន្ទាប់ពីទទួលរងបញ្ហាកូវីដ១៩ ដីធំពិបាកលក់ ព្រោះមិនមានវិនិយោគិនបរទេសមកវិនិយោគ ដូច្នេះបើដីធំពុះជាដីឡូតិ៍លក់ គឺមានចរន្ដទិញ-លក់ច្រើន ចរន្ដនៃការទិញលក់ដីឡូតិ៍ នៅតែមានភាពល្អប្រសើរ ក្នុងឆ្នាំ២០២២៕