ដោយៈសុខុម
ក្រុងហ្ស៊ូរិច: សមាគមធនាគារស្វ៊ីស (SBA) បានបង្ខំចិត្តទម្លាយព័ត៌មានសម្ងាត់ យ៉ាងកម្រដ៏គួរឱ្យភ្ញាក់ផ្អើលថា បណ្ដាធនាគារនៃប្រទេសស្វ៊ីស រក្សាទុកទ្រព្យសម្បត្តិរុស្ស៊ី ជាសម្ងាត់រហូតដល់ទៅ២១៣ពាន់លានដុល្លារអាមេរិក ខណៈការដាក់ទណ្ឌកម្មលើប្រទេសរុស្ស៊ីកាន់តែធ្ងន់ទៅៗ។
សមាគមនេះប៉ាន់ប្រមាណថា ធនាគារទាំងនោះរក្សាទុកប្រាក់របស់រុស្ស៊ី រហូតដល់ទៅប្រមាណ២១៣ពាន់លានដុល្លារអាមេរិក ដែលដាក់ក្នុងគណនីធនាគារក្រៅប្រទេស។ នេះបើយោងតាមសារព័ត៌មាន CNA ចុះផ្សាយកាលពីថ្ងៃព្រហស្បតិ៍ ទី១៧ មីនា។
នេះសរបង្ហាញឱ្យឃើញថា ទំហំពាណិជ្ជកម្មរបស់ក្រុមមហាសេដ្ឋីរុស្ស៊ី ជាមួយធនាគារនានាក្នុងប្រទេសស្វ៊ីស ដែលជាមជ្ឈមណ្ឌលដ៏ធំបំផុតរបស់ពិភពលោក សម្រាប់រក្សាទុកទ្រព្យសម្បត្តិនៅក្រៅប្រទេស គឺធំជាងឆ្ងាយណាស់ បើធៀបនឹងទិន្នន័យដែលបានបង្ហាញលើតារាងតុល្យការ នៃក្រុមហ៊ុនហិរញ្ញវត្ថុមួយចំនួនរបស់ខ្លួន។
ការលាតត្រដាងព័ត៌មានដ៏រសើប និងដ៏សម្ងាត់បែបនេះពីសំណាក់សមាគមធនាគារស្វ៊ីស (SBA) គឺពិតជាកម្រខ្លាំងណាស់សម្រាប់ប្រទេសស្វ៊ីស ដែលកន្លងមកធ្លាប់បានច្រានចោលសំណើជាច្រើនដែលសុំឱ្យមានតម្លាភាព។
ការលាតត្រដាងនេះធ្វើឡើង នៅពេលប្រទេសស្វ៊ីសចាត់វិធានការដ៏គួរឱ្យភ្ញាក់ផ្អើល នៅក្នុងការអនុវត្តន៍ទណ្ឌកម្មរបស់សហភាពអឺរ៉ុប ដាក់លើសាច់ប្រាក់របស់រុស្ស៊ី បន្ទាប់ពីរដ្ឋាភិបាលក្រុងមូស្គូ ក្រោមការដឹកនាំរបស់បុរសខ្លាំង វ៉្លាឌីមៀ ពូទីន បានបញ្ឆេះសង្គ្រាមចូលឈ្លានពានប្រទេសអ៊ុយក្រែនកាលពីខែកុម្ភៈ។
មានការជជែកដេញដោលជាសាធារណៈ យ៉ាងក្ដៅគគុកនៅក្នុងប្រទេសស្វ៊ីស ជុំវិញតួនាទីរបស់ខ្លួន ដោយលោកស្រី Mattea Meyer សហប្រធានគណបក្សប្រជាធិបតេយ្យសង្គមស្វ៊ីស (Social Democratic Party of Switzerland) បានអំពាវនាវឱ្យប្រទេសស្វ៊ីស ដាក់ទណ្ឌកម្មលើសាច់ប្រាក់ ដែលជាកម្មសិទ្ធិរបស់ជនជាតិរុស្ស៊ី ណាដែលជិតស្និទ្ធនឹងប្រធានាធិបតី ពូទីន និងរដ្ឋាភិបាលរបស់គាត់៕ Reuters៕
