ដោយៈសុផារី

ត្បូងឃ្មុំៈ លោកវេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ប្រធានក្រុមការងាររាជរដ្ឋាភិបាល និងជាប្រធានក្រុមការងារគណបក្សចុះមូលដ្ឋាន ស្រុកតំបែរ ខេត្តត្បូងឃ្មុំ បានអញ្ជើញសម្ពោធដាក់ឲ្យប្រើប្រាស់ជាផ្លូវការអគារ “ពិនិត្យ ព្យាបាលជំងឺទូទៅតេជោសែន តំបែរ” នៅថ្ងៃទី២៧ ខែវិច្ឆិកា ឆ្នាំ២០២១។

ភ្ជាប់ទៅនឹងសមិទ្ធផលដែលស្រុកតំបែរ ទទួលបាននាពេលនេះ លោកជាម ច័ន្ទ​សោភ័ណអភិបាលខេត្តត្បូងឃ្មុំ បានចូលរួមអបអរសាទរ និងវាយតម្លៃខ្ពស់ចំពោះលោកប្រធានក្រុមការងារ និងសហការីដែលបានខិតខំពុះពារ យកអស់ស្មារតីទទួលខុសត្រូវក្នុងនាមជាប្រធានក្រុមការងារគណបក្សចុះមូលដ្ឋានស្រុកតំបែរ បានលះបង់កំលាំងកាយចិត្ត និងធនធានផ្ទាល់ខ្លួន កៀរគរសប្បុរសជន រៀបចំកសាងអគារនេះឡើងទុកបម្រើសុខភាពជូនប្រជាពលរដ្ឋតាមការចាំបាច់ និងស្របតាមស្ថានភាពនៃកំណើនសេចក្តី ត្រូវការបន្ទប់ពិនិត្យ និងព្យាបាលជំងឺទូទៅ ស្របតាមការវិវឌ្ឍន៍រីកចម្រើនរបស់ប្រទេសជាតិ។

ចំពោះអគារថ្មីនេះ លោកបានលើកទឹកចិត្ត ជំរុញនិងគាំទ្រគ្រប់រាល់សកម្មភាពទាំងអស់ដែលបម្រើសុខភាពសាធារណ: ចូលរួមដោះស្រាយទុក្ខលំបាក ដើម្បីចូលរួមកែលម្អកម្រិតជីវភាព និងអភិវឌ្ឍមូលដ្ឋានផ្ទាល់ឲ្យកាន់តែរីកចម្រើន ក្រោមម្លប់សុខសន្តិភាព ស្ថេ​រភាព និងការអភិវឌ្ឍរបស់ប្រទេសជាតិ ដែលមានសម្តេចតេជោហ៊ុន សែនជានាយករដ្ឋមន្ត្រី​។

លោកបានផ្តាំផ្ញើឲ្យអាជ្ញាធរស្រុក លោកប្រធានមន្ទីរពេទ្យបង្អែកឲ្យខិតខំយកចិត្តទុកដាក់មើលថែរក្សាសុខភាពជូនប្រជាពល រដ្ឋឲ្យបានទូលំទូលាយ ទាន់ពេលវេលា និងមានប្រសិទ្ធភាព ដោយមិនប្រកាន់វណ្ណ: និន្នាការ ជាតិសាសន៍ បក្សពួក។ល។

ដោយឡែកលោកគ្រូ អ្នកគ្រូពេទ្យត្រូវខិតខំសិក្សា ស្រាវជ្រាវបន្ថែម ដើម្បីបង្កើនសមត្ថភាពលើការងារបច្ចេកទេស ផ្តល់សេវាជូនប្រជសពលរដ្ឋមានប្រសិទ្ធភាពខ្ពស់ តាមវិជ្ជាជីវ:។ គ្រប់ភាគីពាក់ព័ន្ធ ពិសេសបងប្អូនប្រជាពលរដ្ឋ និងលោកគ្រូ អ្នកគ្រូពេទ្យ បុគ្គលិក កម្មករ ត្រូវរួមគ្នាថែរក្សាអគារនេះ ឲ្យបានគង់វង្សទុកប្រើប្រាស់ជាប្រយោជន៍រួបសម្រាប់បម្រើសុខភាព ជូនបងប្អូនស្រុកតំបែរតរៀងទៅ។ បើទោះបីយើងមានអគារថ្មី យើងក៏ត្រូវបង្កើនការថែរក្សាសុខភាព អនុវត្តឲ្យបានខ្ជាប់ខ្ជួនតាមការណែនាំរបស់រាជរដ្ឋាភិបាល ក្រសួងសុខាភិបាលដើម្បីបង្ការ និងទប់ស្កាត់ជំងឺឆ្លងកូវីដ-១៩ “មានសុខភាពល្អ គ្រួសារមានសុភមង្គល សង្គមជាតិមានការរីកចម្រើន និងការពារប្រសើរជាងព្យាបាល”។

មន្ទីរពេទ្យបង្អែកតំបែរជាមន្ទីរពេទ្យបង្អែកកម្រិត១ ស្ថិតនៅក្រោមការគ្របដណ្តប់របស់ការិយាល័យសុខាភិបាលស្រុកប្រតិបត្តិតំបែរ ដែលបានបំបែកពីការិយាល័យសុខាភិបាលស្រុកប្រតិបត្តិពញាក្រែក មានទីតាំងស្ថិតក្នុងបរិវេណមណ្ឌលសុខភាពតំបែរ ភូមិសញ្ជ័យសែន ឃុំតំបែរ ស្រុកតំបែរ ខេត្តត្បូងឃ្មុំ៕

ដោយៈវឌ្ឍនៈ

ភ្នំពេញៈ ក្នុងពេលផ្លូវក្រវាត់ក្រុងទី៣ កាន់តែជិតរួចរាល់និងដំណើរការប្រើប្រាស់ វិនិយោគិនជាច្រើន ក៏បានចាប់អារម្មណ៍លើការវិនិយោគ នៅតាមបណ្ដោយផ្លូវនេះលើការអភិវឌ្ឍជាលំនៅឋានផងដែរ។

ជាក់ស្ដែងនាពេលបច្ចុប្បន្នតំបន់នៅក្បែរៗផ្លូវក្រវាត់ឃើញថា មានការអភិវឌ្ឍលើគម្រោងលំនៅឋានជាច្រើន ជាពិសេសគម្រោងលំនៅឋាន ដែលមានតម្លៃខ្ពស់ៗពីអ្នកអភិវឌ្ឍន៍ក្នុងស្រុក ។

លោកប៉ូ អ៊ាវគង់ អគ្គនាយកក្រុមហ៊ុន Advance បានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី២៧ វិច្ឆិកានេះថា គម្រោងផ្លូវក្រវាត់ក្រុងទី៣ របស់រាជរដ្ឋាភិបាលកម្ពុជា បានបង្ហាញពីសក្ដានុពលកាន់តែខ្លាំង ទៅលើការអភិវឌ្ឍលំនៅឋាន ជាក់ស្ដែងដូចយើងបានឃើញស្រាប់ហើយ នៅក្រុងតាខ្មៅ តំបន់ប៉ែកខាងត្បូង រាជធានីភ្នំពេញ មានក្រុមហ៊ុនអភិវឌ្ឍន៍លំនៅឋានជាច្រើន បានចាប់ផ្ដើមអភិវឌ្ឍន៍គម្រោងរបស់ខ្លួន ជាបន្តបន្ទាប់។

លោកបន្តថា “ការអភិវឌ្ឍលំនៅឋាន នៅតាមបណ្ដោយនៃផ្លូវក្រវាត់ក្រុងមួយនេះក៏ត្រូវបែងចែកជាលំនៅឋានដែលមានតម្លៃថ្លៃៗ ដោយភាគច្រើនគឺនៅជិតៗក្រុង ហើយលំនៅឋានតម្លៃសមរម្យភាគច្រើន នៅឆ្ងាយពីក្រុងបន្តិច ដូចជាគម្រោងលំនៅឋានរបស់អ្នកឧកញ៉ាសៀ ឬទ្ធីជាដើម”។

ចំណែកលោកស្រីអាន សុធីតា អគ្គនាយិកាក្រុមហ៊ុន PropNex Cambodia បានមានប្រសាសន៍ឱ្យដឹងផងដែរថា តំបន់ដែលមានការទាក់ទាញខ្លាំងជាងគេ ក្នុងចំណោមតំបន់តាមបណ្ដោយផ្លូវក្រវាត់ក្រុងទី៣ គឺតំបន់ជិតព្រលានយន្តហោះអន្តរជាតិភ្នំពេញថ្មី ដែលតំបន់នេះធ្វើឱ្យតម្លៃដីធ្លីហក់ឡើងខ្ពស់មែនទែន ។

លោកស្រីនិយាយថា “ពីមុនដីធ្លីនៅតំបន់នោះ មានតម្លៃត្រឹម៥០ដុល្លារទៅ៦០ដុល្លារអាមេរិកប៉ុណ្ណោះ ក្នុងមួយម៉ែត្រការ៉េ ប៉ុន្តែពេលនេះ វាមានតម្លៃរហូតដល់រាប់រយដុល្លារអាមេរិកក្នុងមួយម៉ែត្រការ៉េ”។លោកស្រីបន្តថា “តំបន់តាមបណ្ដោយផ្លូវក្រវាត់ក្រុងទី៣នេះ កំពុងមានទាក់ទាញបន្ថែមទៀត ពិសេសការអភិវឌ្ឍគម្រោងលំនៅឋាន ហើយវានឹងមានការទាក់ទាញកាន់តែខ្លាំងថែមទៀត នៅពេលអនាគតខាងមុខនេះ”។

អ្នកអភិវឌ្ឍន៍លំនៅឋានជាច្រើន នៅក្បែរគម្រោងផ្លូវក្រវាត់ក្រុងទី៣ និងព្រលានយន្តហោះអន្តរជាតិភ្នំពេញថ្មី ក៏បានលើកយកពីហេតុផលនៃការអភិវឌ្ឍផ្លូវនេះ និងព្រលានយន្តហោះជាយុទ្ធសាស្ត្រទីផ្សារ សម្រាប់ការលក់លំនៅឋានរបស់ខ្លួនដែរ ។

បើតាមលោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាកន្លងមកក៏បានលើកឡើងផងដែរ ពីការអភិវឌ្ឍហេដ្ឋារចនាសម្ព័ន្ធនានារបស់រដ្ឋាភិបាល ដែលអាចជំរុញសក្ដានុពលអភិវឌ្ឍន៍ អចលនទ្រព្យមួយកម្រិតទៀតផងដែរ ហើយវិនិយោគិនតែងតែសម្លឹង ទៅមើលលើតំបន់ណា ដែលមានការអភិវឌ្ឍហេដ្ឋារចនាសម្ព័ន្ធច្រើនក្នុងការអភិវឌ្ឍគម្រោងរបស់ខ្លួន។

បុរី GB Residence បាននិងកំពុងបង្ហាញខ្លួននៅតំបន់នេះ លើទំហំផ្ទៃដី៩ហិកតា​ជាមួយនឹងផែនការវិនិយោគរាប់លានដុល្លារ ដែលបុរីថ្មីនេះផ្តោតលើលំនៅដ្ឋានបែបអាជីវកម្ម វីឡា និងរចនាប្លង់ដោយក្រុមហ៊ុនស្ថាបត្យកម្ម ដ៏ល្បីល្បាញលំដាប់ពិភពលោកបានបង្ហាញស្នាដៃរបស់ពួកគេជាលើកដំបូងនៅបុរីនេះ។

ជាមួយគ្នានេះ អ្នកវិនិយោគបុរី GB Residence លោកឧកញ៉ាតាំង គួងហាវបានមានប្រសាសន៍ឲ្យ ដឹងកាលពីពេលថ្មីៗនេះថា ដោយសារមើលឃើញសក្តានុពលតំបន់នេះ ស្ថិតនៅជាប់នឹងផ្លូវក្រវ៉ាត់ក្រុងទី៣ និងព្រលានយន្តហោះអន្តរជាតិភ្នំពេញថ្មី និងការកើនឡើងនូវជីវភាពរបស់ប្រជាពលរដ្ឋ។ កំណើនពលរដ្ឋចូលមករស់នៅកៀកទីក្រុងកាន់ តែច្រើន ទើបលោកសម្រេចចិត្តវិនិយោគបុរីនេះឡើង ដោយផ្តោតលើគុណភាពប្រណីត ភាព និងភាពស៊ីវិល័យ។

លោកឧកញ៉ាបានបន្តថា “ជាមួយនឹងការរចនាលំនៅដ្ឋាន ដោយអ្នកជំនាញអន្តរជាតិ ដែលបានឈ្នះពានរង្វាន់នៅទីក្រុងឌូបៃ បានធ្វើឲ្យគំរោងរបស់យើង មានម៉ូតផ្ទះស្អាត ប្លែក ប្រកបដោយស៊ីវិល័យ ពិសេសផ្តល់ជូនអ្នករស់នៅប្រកបដោយផាសុខភាព”។​ លោកបន្តថា “ផ្ទះក្នុងគំរោង GB Residence មានតម្លៃចាប់ពីជាង៨ម៉ឺនដុល្លារ ដល់ជាង១០ម៉ឺនដុល្លារអាមេរិក អាស្រ័យលើប្រភេទផ្ទះ ទំហំ និងទីតាំងរបស់ផ្ទះនិមួយៗ”។

បុរី GB Residence សាងសង់លើទំហំដីជិត៩ហិកតា ជាមួយនឹងលំនៅដ្ឋានសរុប៥៨៨ផ្ទះ ពិសេសក្នុងគំរោងនេះមានផ្សារទំនើប ហាងកាហ្វេ ភោជនីយដ្ឋាន ក្លឹបហាត់ប្រាណ ពិសេសផ្លូវចូលបុរីទំហំ៥០ម៉ែត្រ ជាមួយនឹងសួនច្បារនៅចំកណ្តាល ដែលសម្រួលដល់ការធ្វើដំណើររបស់ប្រជាពលរដ្ឋ និងអ្នករស់នៅតំបន់នេះ៕

ដោយៈសហការី

កណ្តាល៖ នៅថ្ងៃទី១០ ខែវិច្ឆិកា ឆ្នាំ២០២១នេះ ក្រុមហ៊ុន ខេអេច លែន បានចុះកិច្ចព្រមព្រៀងមួយ ស្តីអំពីការផ្គត់ផ្គង់អគ្គីសនីសម្រាប់គម្រោងក្រុងថ្មីដីមាសសំរោងលើ ស្ថិតនៅស្រុកអង្គស្នួល ខេត្តកណ្តាល ឲ្យបានរួចរាល់ជាស្ថាពរនាដើមខែធ្នូ ឆ្នាំ២០២១ខាងមុខនេះ ដើម្បីផ្តល់ភាពងាយស្រួលជូនដល់អតិថិជន ដែលបានទិញ និងមានបំណងចង់ទិញដីឡូតិ៍ពីក្រុមហ៊ុនផ្ទាល់។

ក្រុមហ៊ុន ខេអេច លែន ដែលជាក្រុមហ៊ុនវិនិយោគ និងអភិវឌ្ឍន៍លើគម្រោងក្រុងថ្មីដីមាសសំរោងលើ ដែលមានទីតាំងស្ថិតនៅស្រុកអង្គស្នួល ខេត្តកណ្តាល តាមបណ្តោយផ្លូវជាតិលេខ៥១ លើផ្ទៃដីសរុបប្រមាណ៥០ហិកតា និងជាគម្រោងទី៦របស់ខ្លួនផងដែរ ក្រោយពីទទួលបានជោគជ័យ និងមានការគាំទ្រយ៉ាងខ្លាំងពីអតិថិជន។

ដើម្បីឆ្លើយតបតាមតម្រូវការរបស់អតិថិជន ដែលបានវិនិយោគលើដីឡូតិ៏ និងលំនៅដ្ឋាននៅគម្រោង ក្រុងថ្មីដីមាសំរោងលើ ក្នុងទឹកដីខេត្តកណ្តាលនេះ ក្រុមហ៊ុនបានរៀបចំហេដ្ឋារចនាសម្ព័ន្ធជាច្រើនដែលរួមមានដូចជា៖ ផ្លូវបេតុងខ្វាត់ខ្វែងក្នុងគម្រោង ប្រព័ន្ធទឹកស្អាត និងប្រព័ន្ធអគ្គីសនីជាដើម។

គួរបញ្ជាក់ផងដែរថា អតិថិជនដែលបានវិនិយោគលើដីឡូតិ៍ និងលំនៅដ្ឋាននៅគម្រោងក្រុងថ្មីដីមាសសំរោងលើ នៅស្រុកអង្គស្នួល ខេត្តកណ្តាល នឹងទទួលបានការផ្គត់ផ្គង់អគ្គីសនី ពីអគ្គីសនីកម្ពុជា (EDC) ដោយផ្ទាល់តែម្តង៕

ដោយៈសុខុម

ហុងកុង: រដ្ឋាភិបាលប្រទេសចិន បានរឹបអូសកីឡដ្ឋានបាល់ទាត់របស់ក្រុមហ៊ុនអភិវឌ្ឍន៍អចលនទ្រព្យ China Evergrande Group យកមកលក់ឡាយឡុង ខណៈក្រុមហ៊ុននេះកំពុងដុនដាបខ្លាំង និងខ្វែងដៃខ្វែងជើងរកលុយមកសងបំណុលរុំកោះរបស់ខ្លួន។ នេះបើយោងតាមសារព័ត៌មាន CNA ចុះផ្សាយកាលពីថ្ងៃសុក្រ ទី២៦ វិច្ឆិកា។

ប្រភពច្បាស់ការណ៍ ដែលសុំមិនបញ្ចេញអត្តសញ្ញាណ បានទម្លាយប្រាប់ទីភ្នាក់ងារព័ត៌មាន Reuters ថា ក្រុមហ៊ុន Evergrande ដែលជំពាក់បំណុលរុំកោះ រហូតដល់ទៅជាង៣០០ពាន់លានដុល្លារអាមេរិក ក៏កំពុងពិចារណាលក់ក្លឹបបាល់ទាត់ Guangzhou Football Club របស់ខ្លួនផងដែរ។

ដំណើរការសាងសង់កីឡដ្ឋានបាល់ទាត់ Guangzhou Evergrande Football Stadium ដែលតាមការអះអាងថាធំជាងគេបំផុតក្នុងពិភពលោក ជាមួយនឹងទុនវិនិយោគរហូតដល់ទៅ១២ពាន់លានយ័ន (១,៨៦ពាន់លានដុល្លារអាមេរិក) នេះបានចាប់ផ្តើមក្នុងខែមេសា ឆ្នាំ២០២០ ហើយគ្រោងបញ្ចប់ជាស្ថាពរនៅត្រឹមដំណាច់ឆ្នាំ២០២២។

ទោះជាយ៉ាងណា ក្រុមហ៊ុន Evergrande បានផ្អាកការសាងសង់កណ្ដាលទីដោយ​សារខ្វះដើមទុន ហើយការគ្រប់គ្រងលើកីឡដ្ឋាននេះ ក៏ត្រូវធ្លាក់ទៅលើអាជ្ញាធរដែលគ្រោងលក់វាឡាយឡុង។

ទន្ទឹមនេះ ប្រភពមួយផ្សេងទៀតបានទម្លាយឱ្យដឹងដែរថា ការសាងសង់កីឡដ្ឋាននេះផ្អាកយ៉ាងហោចណាស់៣ខែមកហើយ។

ទោះជាយ៉ាងណា ក្រុមហ៊ុន Evergrande បានបដិសេធមិនធ្វើអត្ថាធិប្បាយឡើយជុំវិញរឿងនេះ។ កាលពីខែកញ្ញា ក្រុមហ៊ុននេះបានអះអាងថា ការងារសាងសង់កីឡដ្ឋាននេះកំពុងដំណើរការ “ជាធម្មតា”។

Evergrande ធ្លាប់ជាក្រុមហ៊ុនអភិវឌ្ឍន៍អចលនទ្រព្យ ដែលលក់ដាច់ជាងគេបំផុតរបស់ប្រទេសចិន ប៉ុន្តែឥឡូវនេះកំពុងតែដុនដាបខ្លាំង ក្នុងការរកលុយសងម្ចាស់បំណុល និងក្រុមហ៊ុនផ្គត់ផ្គង់។ ប្រភពដែលដឹងរឿងនេះ បានទម្លាយប្រាប់ទីភ្នាក់ងារព័ត៌មាន Reuters ថា រដ្ឋាភិបាលថ្នាក់តំបន់ទូទាំងប្រទេសចិន កំពុងរ៉ាប់រងមើលការខុសត្រូវលើការលក់ទ្រព្យសកម្មមួយចំនួនរបស់ក្រុមហ៊ុននេះដើម្បីដោះបំណុល៕ Reuters៕