ក្រុមហ៊ុនចិនធំមួយកំពុងស្នើសុំអាជ្ញាប័ណ្ណសាងសង់រោងចក្រស៊ីម៉ងត៍ថ្មីមួយទៀតនៅស្រុករតនៈមណ្ឌល

ដោយៈជេស៊ីកា

បាត់ដំបងៈ ក្រុមហ៊ុនចិនធំមួយ បានវិនិយោគលើដីទំហំ៨០ហិកតា ដើម្បីសាងសង់រោងចក្រស៊ីម៉ងត៍ថ្មីមួយ នៅស្រុករតនៈមណ្ឌលខេត្តបាត់ដំបងនាពេលខាងមុខនេះ។

លោកគុយ វណ្ណូអភិបាលស្រុករតនៈមណ្ឌល ខេត្តបាត់ដំបងបានមាន​ប្រសាសន៍ឲ្យដឹងតាមទូរស័ព្ទ កាលពីរសៀល ថ្ងៃទី២៦ មករាកន្លងមកថា ក្រុមហ៊ុនចិនបាន និងកំពុងស្នើសុំអជ្ញាប័ណ្ណ ទៅក្រុមប្រឹក្សាអភិវឌ្ឍន៍៍កម្ពុជា និងធ្វើប័ណ្ណកម្មសិទ្ឋដីធ្លី ដើម្បីបង្កើតមូលដ្ឋានច្បាប់រ៉ឹងមាំ មុននឹងឈានទៅ​វិនិយោគសាងសង់ រោងចក្រផលិតស៊ីម៉ងត៍ថ្មីមួយនៅស្រុកនេះ។

លោកបន្តថា “ក្រុមហ៊ុនបានស្នើសុំអនុប្រយោគដីធ្លី ពីដិគំរបព្រៃឈើ ពីរដ្ឋាភិបាល ដើម្បីរៀបចំជារោងចក្រ និងតំបន់ឧស្សាហកម្មដទៃទៀតនាពេលខាងមុខ”។ លោកបន្តថា “បច្ចុប្បន្នស្រុករតនៈមណ្ឌល មានរោងចក្រ សហគ្រាសចំនួន៩ និងអាចមានការកើនឡើងខ្ពស់ថែមទៀត នាពេលអនា​គត ដោយសារស្រុកមួយនេះមានផ្ទៃដី មានទីតាំងភូមិសាស្រ្តអំណោយផលច្រើន”។

លោកគុណ វណ្ណូបានបន្តទៀតថា មូលដ្ឋានដែលចិនគ្រោងវិនិយោគ​ខាងលើនេះ ស្ថិតនៅឃុំត្រែង និងឃុំផ្លូវមាស ដែលជាទីតាំងអំណោយផល​ដល់ការវិនិយោគ ខណៈស្រុកនេះ មានចម្ងាយត្រឹម៣៨គីឡូម៉ែត្រប៉ុណ្ណោះពីក្រុងបាត់ដំបង។

ស្រុករតនៈមណ្ឌល មានឃុំចំនួន៥ ភូមិចំនួន៣៨ និងមានប្រជាពលរដ្ឋរស់នៅជាង៤០,០០០នាក់៕

ការព្យាករណ៍ថ្មីៈ វិស័យសណ្ឋាគារនៅអាស៊ី-ប៉ាស៊ីហ្វិកនឹងទទួលបានកំណើនវិនិយោគខ្ពស់ក្នុងឆ្នាំនេះ

ដោយៈសុខុម

ហុងកុង: វិស័យសណ្ឋាគារ និងបដិសណ្ឋារកិច្ចក្នុងតំបន់អាស៊ី- ប៉ាស៊ីហ្វិក ទំនងជានឹងទទួលបានទុនវិនិយោគ រហូតដល់ទៅជាង៩ពាន់លានដុល្លារអាមេរិក ក្នុងឆ្នាំ២០២២នេះ ដោយកើនឡើង៣០%បើធៀបនឹងឆ្នាំ២០២១។

យោងតាមក្រុមហ៊ុនប្រឹក្សា អចលនទ្រព្យអន្តរជាតិដ៏ចំណាស់ JLL ដែលមានការិយាល័យកណ្ដាល នៅសហរដ្ឋអាមេរិកបានឱ្យដឹងថា កំណើនខាងលើនេះ នឹងទទួលបាន នៅពេលប្រទេសនានា ចាប់ផ្តើមបន្ធូរបន្ថយវិធានការរឹតបន្តឹង ដើម្បីទប់ស្កាត់ការរីករាលដាលវីរុសកូវីដ-១៩ និងនៅពេលបណ្ដាវិនិយោគិន ចាប់ផ្ដើមមានទំនុកចិត្តលើវិស័យនេះច្រើនជាងមុន។

ការវិនិយោគក្នុងផ្នែក និងផ្នែកផ្សេងៗទៀត នៃវិស័យសណ្ឋាគារ និងបដិសណ្ឋារកិច្ច ទំនងជាទទួលបានកំណើនលប់លើសគេ នៅក្នុងវិស័យអច​លនទ្រព្យក្នុងតំបន់។ ក្រុមហ៊ុនប្រឹក្សាអចលនទ្រព្យមួយនេះ បានចេញរបាយការណ៍ថា ផ្អែកតាមការព្យាករ ការបោះទុនវិនិយោគសរុបនឹងឈានដល់ប្រមាណ២០០ពាន់លានដុល្លារអាមេរិក ដោយកើនឡើង១៥%បើធៀបនឹងការប៉ាន់ប្រមាណ ក្នុងរយៈពេលពេញមួយឆ្នាំសម្រាប់ឆ្នាំ២០២១។

ការព្យាករនេះ ប្រកបដោយសុទិដ្ឋិនិយមនេះធ្វើឡើង ទោះបីជាភាពមិនប្រាកដប្រជា បានកើតមានជាថ្មី ជុំវិញផលប៉ះពាល់សង្គម និងសេដ្ឋកិច្ចបង្កឡើងដោយវីរុសបំប្លែងខ្លួនថ្មី “អូមីក្រុង” ដែលបានជះផលអាក្រក់ទូទាំងពិភពលោក នៅពេលវីរុសនេះធ្វើឱ្យករណីឆ្លងថ្មី កើនឡើងយ៉ាងឆាប់រហ័សយ៉ាងណាក្ដី។

លោក Anthony Couse នាយកប្រតិបត្តិក្រុមហ៊ុន JLL ប្រចាំតំបន់អាស៊ី-ប៉ាស៊ីហ្វិក បានចេញសេចក្តីថ្លែងការណ៍ ដាច់ដោយឡែកមួយផ្ញើទៅកាន់សារព័ត៌មាន South China Morning ថា “ទីផ្សារអចលនទ្រព្យនៅអាស៊ី-ប៉ាស៊ីហ្វិក នឹងកាន់តែរឹងមាំក្នុងឆ្នាំ២០២២នេះ នៅពេលបណ្ដាវិនិយោគនៅតែមានសុទិដ្ឋិនិយម ហើយសកម្មភាពជួលបន្តកើនឡើង”។

អ្នកជំនាញរូបនេះបានពន្យល់ថា “វាច្បាស់ណាស់ថា ផ្លូវឆ្ពោះទៅរកការងើបឡើងវិញ នៃសេដ្ឋកិច្ចគឺមិនរលូននោះឡើយ ប៉ុន្តែយើងបានឮពីអតិ​ថិជនរបស់យើងថា ពួកគេមានទំនុកចិត្តលើអនាគត នៃការងារក្នុងការិយា​ល័យ”។ លោកបន្តថា​ “បណ្ដាវិនិយោគិននៅតែមានសុទិដ្ឋិនិយម ទោះបីជាភាពមិនប្រាកដប្រជានៅតែកើតមាន ដែលទាមទារឱ្យធ្វើការសម្រេចចិត្តដោយប្រុងប្រយ័ត្ននៅឆ្នាំនេះយ៉ាងណាក្ដី”៕ Bangkok Post៕

ទីផ្សារអគារជួលនៅក្រុងប៉ោយប៉ែតបានហក់ឡើងខ្ពស់ ស្របពេលកាស៊ីណូ២២ដំណើរការល្អប្រសើរ

ដោយៈគង់ សូរិយា

ភ្នំពេញៈ ទីផ្សារជួលអគារ និងលំនៅដ្ឋាននៅក្រុងប៉ោយប៉ែត បានដំណើរការយ៉ាងល្អប្រសើរឡើងវិញ ស្របពេលកាស៊ីណូចំនួន២២បាននិងកំពុងដំណើរការយ៉ាងសកម្មឡើងវិញ។

លោកសួង សុខហ៊ាង ប្រធានក្រុមប្រឹក្សាភិបាលក្រុមហ៊ុន Bright HTL ដែលមានមូលដ្ឋាននៅទីក្រុងប៉ោយប៉ែត ខេត្តបន្ទាយមានជ័យ បានមានប្រសាសន៍ឲ្យដឹងតាមបណ្តាញសង្គម នាល្ងាចថ្ងៃទី២៦ មករានេះថា ដោយ​សារកាស៊ីណូនានា ដំណើរការល្អប្រសើរឡើងវិញ បានធ្វើឲ្យទីផ្សារអគារសម្រាប់ជួល និងលំនៅដ្ឋានប្រណីតៗ មានតម្រូវការខ្ពស់នាពេលបច្ចុប្ប​ន្ននេះ។

លោកបន្តថា “បច្ចុប្បន្នផ្ទះវីឡាមួយ អាចចជួលបានតម្លៃចន្លោះពី ៥,០០០ទៅ ១០,០០០ដុល្លារអាមេរិកក្នុងមួយខែ ហើយអគារសម្រាប់ជួល មានបន្ទប់សមល្មម ក៏អាចជួលបានតម្លៃចន្លោះពី ៤០,០០០ ទៅ ៦០,០០០ដុល្លារអាមេរិក្នុងមួយខែផងដែរ”។

លោកសួង សុខហ៊ាងបានបន្តថា ដោយសារតម្រូវការជួលកើនឡើងបានធ្វើឲ្យចំនួនអ្នកសាងសង់ អគារជួលកើនឡើងច្រើនឡើងវិញ ស្របពេ​លទីផ្សារជួលកំពុងវិវត្តន៍កាន់តែប្រសើរ។ ការជួលអគារកើនឡើង ដោយ​សារបុគ្គលិកកាស៊ីណូកើនឡើង ព្រោះកាស៊ីណូត្រូវបើកដំណើរការ ២៤ម៉ោង ហេតុនេះបុគ្គលិកត្រូវផ្លាស់វេនគ្នាជាប់ជាប្រចាំ។

លោកបានបន្តថា សេដ្ឋកិច្ចប្រជាពលរដ្ឋក្រុងប៉ោយប៉ែត មិនរងគ្រោះខ្លាំងដូចក្រុងព្រះសីហនុ និងខេត្តសៀមរាបទេ ដោយសារការលក់ទំនិញនៅផ្សារថៃដំណើការធម្មតា ទំនិញនៅតែចេញចូលបាន ទោះជារងវិបត្តិកូវីដ១៩ក្តី ហើយសកម្មភាពសេដ្ឋកិច្ច ក្នុងក្រុងមានភាពល្អប្រសើ់រ ព្រោះកាស៊ីណូនៅតែដំណើរការ៕

គំរោងកែលំអរអគារថ្មីនៃផ្សារទំនើប AEON Mall1 តម្លៃ ៦០លានដុល្លារបង្ហាញរូបរាងហើយ

ដោយៈជេស៊ីកា

ភ្នំពេញៈ ផ្សារទំនើប AEON Mall1 បាននិងកំពុងធ្វើការកែលំអរអគារផ្នែកខាងក្រោយរបស់ខ្លួន ដែលអាចអនុញ្ញាត្តឲ្យអ្នកនិយមដើរផ្សារ អាចចូលតាមខាងក្រោយដូចផ្នែកខាងមុខបាន បាននិងកំពុងធ្វើសកម្មភាពសាងសង់ហើយ។

ផ្សារទំនើបដែលទាក់ទាញ អ្នកនិយមដើរផ្សាររាប់លាននាក់ជារៀងរាល់ឆ្នាំនេះ បាននិងកំពុងលេចធ្លោ ក្នុងនាមជាផ្សារទំនើបជោគជ័យជាងគេនៅរាជធានីភ្នំពេញ ដោយក្រុមហ៊ុន AEON Mall Group បានពង្រីកការសាងសង់ផ្សារទំនើបនេះ រហូតដល់៣កន្លែងនៅរាជធានីភ្នំពេញ។

ក្រុមហ៊ុនជប៉ុនធំមួយ ដែលបានបោះទីតាំងឈរជើងធំ នៅប្រទេសវៀតណាមឈ្មោះ NOJIMA បានឈ្នះការដេញថ្លៃគំរោងកែលំអរ និងសាងសង់ អគារថ្មីមួយចំនួនរបស់ផ្សារទំនើបនេះ។

ប្រភពពីថ្នាក់ដឹកនាំក្រុមហ៊ុនសំណង់ធំក្នុងស្រុកមួយ បានមានប្រសា​សន៍ឲ្យដឹងថា ការជួសជុលនិងសាងសង់អគារមួយចំនួន នៅផ្សារទំនើបនេះ មិនមានផលប៉ះពាល់ដល់ដំណើរការ របស់ផ្សារនេះនោះទេ ដោយការជួសជុល និងកែលំអរធ្វើឡើងតាមផ្នែកៗ និងតាមដំណាក់កាលនិមួយៗ។

លោកបន្តថា “ការវងារកែលំអរនេះ គ្រោងនឹងបញ្ចប់ក្នុងរយៈពេលពីរឆ្នាំឬលើសពីនេះតិចតួច ខណៈក្រុមជាងបាន និងកំពុងធ្វើការងារយ៉ាងសកម្ម​តាមជំនាញរបស់ខ្លួន”៕

រដ្ឋាភិបាលព្រាងគោលនយោបាយប្រើប្រាស់ដីធ្លី៧ចំណុច​ដើម្បីប្រែក្លាយ​ខេត្តព្រះសីហនុជាតំបន់សេដ្ឋកិច្ចពហុបំណង

ដោយៈគង់ សូរិយា

ភ្នំពេញៈ រដ្ឋាភិបាលបាននិងកំពុងធ្វើ សេចក្តីព្រាងគោលនយោបាយការប្រើប្រាស់ដីធ្លី នៅខេត្តព្រះសីហនុ បានកំណត់ចំណុចគោលចំនួន៧ ដើម្បីអភិវឌ្ឍខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង។

គោលនយោបាយសំខាន់ៗទាំងនោះរួមមាន ទី១ គោលនយោបាយអភិវឌ្ឍន៍វិស័យឧស្សាហកម្មកម្ពុជា ប្រែក្លាយខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង។ ទី២ ចក្ខុវិស័យឆ្នាំ២០៣៨ ខេត្តព្រះសីហនុ ត្រូវបានគ្រប់គ្រងប្រើប្រាស់បែងចែក និងអភិវឌ្ឍប្រកបដោយសមធម៌ តម្លាភាព ប្រសិទ្ធភាព អភិវឌ្ឍន៍ខេត្តជាតំបន់សេដ្ឋកិច្ចពិសេសគំរូពហុបំណង ជាទីក្រុងអាស៊ាន នៃប៉ូលអភិវឌ្ឍន៍ជាតិប្រកបដោយចីរភាព ជាមជ្ឈមណ្ឌលកំណើនជាតិ មជ្ឈមណ្ឌលហិរញ្ញវត្ថុអន្តរជាតិ ច្រកចេញចូលអន្តរជាតិ មជ្ឈម​ណ្ឌលភស្តុភាជាតិ មានទំនាក់ទំនងជាមួយទីផ្សារអាស៊ាន និងសាកលលោក។

ទី៣​ គោលបំណង ប្រើប្រាស់ដីធ្លី ការបែងចែកដី ការអភិវឌ្ឍន៍ដែនដីនគរូបនីយកម្ម អភិវឌ្ឍន៍ខេត្តប្រកបដោយប្រសិទ្ធភាព និងបរិយាបន្នមានភាពទាក់ទាញ និងឧត្ដមភាពប្រកួតប្រជែងសំដៅរួមចំណែកប្រែក្លាយកម្ពុជា ជាប្រទេសមានចំណូលមធ្យមកម្រិតខ្ពស់។

ទី៤ យុទ្ធសាស្ត្រ អនុវិស័យរដ្ឋបាលដីធ្លី អនុវិស័យរៀបចំដែនដី ការគ្រប់គ្រង ការអភិវឌ្ឍតំបន់ឆ្នេរសមុទ្រកម្ពុជា អនុវិស័យបែងចែកដីធ្លី ការគ្រប់គ្រង និងអភិវឌ្ឍន៍វិស័យសំណង់ យុទ្ធសាស្ត្រសមាហរណកម្មវិស័យពាក់ព័ន្ធទៅនឹងដីធ្លី ការពង្រឹងការគ្រប់គ្រងអភិបាល កិច្ចល្អ និងស្ថាប័នយុទ្ធសាស្ត្រទាក់ទាញការវិនិយោគ និងធនធានការគ្រប់គ្រងហានិភ័យសំខាន់ៗនិងបង្ការគ្រោះមហន្តរាយធម្មជាតិ។

ទី៥ ផែនការសកម្មភាពអភិវឌ្ឍន៍ខេត្តព្រះសីហនុ រយៈពេលខ្លី (២០២១-២០២៥) រយៈពេលមធ្យម ( ២០២៥-២០៣០) រយៈពេលវែង (២០៣០-២០៣៨)។ ទី៦​​ ក្របខណ្ឌអនុវត្ត និងយន្តការដឹកនាំសម្របស ម្រួ​ល តាមដាន វាយតម្លៃ ធានាប្រសិទ្ធភាពនៃការអនុវត្តគោលនយោបាយគ្រប់គ្រង និងប្រើប្រាស់ដីធ្លី អង្គភាពថ្នាក់ជាតិ និងថ្នាក់ខេត្ត ក្រសួងស្ថាប័នពាក់ព័ន្ធត្រូវរៀបចំផែនការសកម្មភាព ដើម្បីអនុវត្តតាមដានវាយតម្លៃត្រួតពិនិត្យ ឆ្លើយតបទៅនឹងយុទ្ធសាស្ត្រតាមវិស័យក្នុងការគ្រប់គ្រងដីធ្លី និងធន ធានធម្មជាតិឱ្យមាននិរន្តរភាពស្របតាមចក្ខុវិស័យនៃគោលនយោបាយ ។

ទី៧ សេចក្តីសន្និដ្ឋាន សកម្មភាពទាំងនេះត្រូវប្រើប្រាស់ជាមូលដ្ឋានសម្រាប់រៀបចំសកម្មភាព របស់អង្គភាពថ្នាក់ជាតិ និងថ្នាក់ក្រោមជាតិ តាមដានត្រួតពិនិត្យធានាបាននូវ ការអនុវត្តប្រកបដោយការទទួលខុសត្រូវប្រ​សិទ្ធភាព ពីក្រសួងស្ថាប័នពាក់ព័ន្ធ វិស័យឯកជន និងប្រជាពលរដ្ឋសំដៅសម្រេចឱ្យបានចក្ខុវិស័យ ដើម្បីធានាការអភិវឌ្ឍសេដ្ឋកិច្ច សង្គមជាក់ស្ដែង។

លោកប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់បានមានប្រសាសន៍ ក្នុងពិធីបើកសិក្ខាសាលា ពិគ្រោះយោបល់អំពីសេចក្តីព្រាងគោលនយោបាយគ្រប់គ្រងប្រើប្រាស់ដីធ្លី ដើម្បីអភិវឌ្ឍខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង កាលពីដើមសប្តាហ៍នេះថា ផ្អែកលើក្របខ័ណ្ឌនៃការសិក្សាស្រាវជ្រា​វទិន្នន័យ​ តាមរយៈកំណែទម្រង់ និងយុទ្ធសាស្ត្រអភិវឌ្ឍន៍ជាតិ យុទ្ធសាស្ត្រចតុកោណដំណាក់កាលជាបន្តបន្ទាប់ ឆ្លើយតបការផ្លាស់ប្ដូរការរីកចម្រើនសេដ្ឋកិច្ច មានសក្តានុពលក្នុងការលើកកម្ពស់សេដ្ឋកិច្ចកម្ពុជា ស្របតាមនិន្នាការតំបន់ និងពិភពលោក។ រាជរដ្ឋាភិបាលដាក់ចេញ នូវគោលនយោបាយអភិវឌ្ឍន៍វិស័យឧស្សាហកម្ម ដោយកំណត់ប្រែក្លាយខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង។

លោកបន្តថា គោលនយោបាយគ្រប់គ្រង ប្រើប្រាស់ដី ដើម្បីអភិវឌ្ឍខេត្តព្រះសីហនុ មានគោលដៅរៀបចំ គោលនយោបាយគ្រប់គ្រងវិស័យដីធ្លី ក្នុងនេះមានអនុវិស័យរដ្ឋបាលដីធ្លី អនុវិស័យរៀបចំដែនដី អនុវិស័យបែងចែកដីធ្លី លំនៅឋាន ការគ្រប់គ្រង និងអភិវឌ្ឍវិស័យសំណង់ ការគ្រប់គ្រងអភិវឌ្ឍន៍តំបន់ឆ្នេរសមុទ្រកម្ពុជា ក្នុងខេត្តព្រះសីហនុ ទាមទារអោយមានការចូលរួមយ៉ាងសកម្មពីវិស័យពាក់ព័ន្ធ ការគ្រប់គ្រង ការប្រើប្រាស់ដីធ្លី និងធនធានធម្មជាតិ និងធ្វើសមាហរណកម្មវិស័យពាក់ព័ន្ធដីធ្លី ផ្អែកលើមូលដ្ឋានគោលនយោបាយដីធ្លី សៀវភៅដីធ្លី គោលនយោបាយជាតិ ស្តីពីការរៀបចំដែនដីនៃព្រះរាជាណាចក្រកម្ពុជា។

គោលនយោបាយអភិវឌ្ឍន៍ ប្រើប្រាស់ដីខេត្តព្រះសីហនុ មានគោលដៅតម្រង់ទិស កំណត់ការគ្រប់គ្រងប្រើប្រាស់តាមបែបគំរូថ្មី ផ្អែកលើកត្តាភូមិសាស្ត្រ នៃតំបន់ឆ្នេរសមុទ្រកម្ពុជា កត្តាធនធានធម្មជាតិ បរិស្ថាន វប្បធម៌ និងតម្រូវការវិវឌ្ឍន៍សេដ្ឋកិច្ច សង្គមស្របវតាមគោលនយោបាយ ច្បាប់ បទដ្ឋានគតិយុត្តិ ព្រមទាំងការសិក្សាស្រាវជ្រាវ ពីអន្តរជាតិរួមមាន ប្រទេសកូរ៉េខាងត្បូង ចក្រភពអង់គ្លេស ហូឡង់ ម៉ាឡេស៊ី ជប៉ុន ចិន ម៉ូណាកូជាដើម។

លោកប៉ែន សុផលបានបន្តថា សិក្ខាសាលានេះ មានសារៈសំខាន់ សម្រាប់ជាចក្ខុវិស័យ គោលនយោបាយកំណត់ឆ្នាំ២០៣៨ មានរយៈពេល១៥ឆ្នាំខាងមុខទៀត ដែលជាសរសរស្តម ដល់វិស័យពាក់ព័ន្ធអភិបាលកិច្ចល្អ ទាក់ទាញអ្នកវិនិយោគ និងការបង្ការគ្រោះមហន្តរាយ ព្រមទាំងផែនការសកម្មភាពទាំង៨១ ដែលជាវិធានការគោលនយោបាយ សម្រេចគោលដៅប្រែក្លាយខេត្តព្រះសីហនុ ទៅជាតំបន់សេដ្ឋកិច្ចពិសេសគំរូពហុបំណង។

ជាមួយគ្នានេះ លោកគួច ចំរើន អភិបាលខេត្តព្រះសីហនុ ក៏បានបង្ហាញការសាទរ និងគាំទ្ររាជរដ្ឋាភិបាល ចំពោះផែនការប្រែក្លាយខេត្តព្រះសីហនុជាតំបន់សេដ្ឋកិច្ចពិសេសគំរូពហុបំណង។

លោកអភិបាលក៏បានថ្លែងអំណរគុណយ៉ាងជ្រាលជ្រៅ ចំពោះសម្តេចតេជោហ៊ុន សែន ប្រមុខរាជរដ្ឋាភិបាលកម្ពុជា​ ដែលបានផ្តល់ការគាំទ្រក្នងការអភិវឌ្ឍពហុវិស័យនៅខេត្តព្រះសីហនុ ដើម្បីធ្វើអោយខេត្តព្រះសីហនុ ជាខេត្តនៃកំណើនសេដ្ឋកិច្ចរបស់ប្រទេសជាតិ៕

អាកាសយានដ្ឋានអន្តរជាតិសៀមរាប-អង្គរសម្រេចការសាងសង់បានប្រមាណ៧០ភាគរយ

ដោយ៖ សុផារី

សៀមរាប ៖ គម្រោងសាងសង់អាកាសយានដ្ឋានអន្តរជាតិសៀមរាប-អង្គរ នៅតែមានដំណើរការយ៉ាងរលូនទៅមុខបើទោះបីស្ថិតក្នុងអំឡុងពេលមានវិបត្តិជំងឺរាតត្បាតកូវីដ-១៩ក៏ដោយ ខណៈក្រុមហ៊ុនសាងសងរំពឹងថានឹងសម្រេចបានប្រមាណ៧០ភាគរយគិតត្រឹមដំណាច់ឆ្នាំ២០២២ខាងមុខនេះ។

នេះបើតាមការលើកឡើងរបស់លោក តឹករ៉េត សំរេច រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានគណៈកម្មការតម្រង់ទិសសម្រាប់ការសាងសង់អាកាសយានដ្ឋានអន្តរជាតិសៀមរាប-អង្គរ ក្នុងកិច្ចប្រជុំស្ដីពី វឌ្ឍនភាពនៃដំណើរការសាងសង់អាកាសយានដ្ឋានអន្តរជាតិសៀមរាប-អង្គរ នៅថ្ងៃទី២៤ ខែមករា ឆ្នាំ២០២២។

លោកបានមានប្រសាសន៍ថា “ឆ្នាំ២០២១ បើទោះបីជាមានបញ្ហាប្រឈមខ្លាំងជាមួយនឹងជំងឺរាតត្បាតកូវីដ១៩ក្តី ក៏គម្រោងសាងសង់អាកាសយានដ្ឋានអន្តរជាតិសៀមរាប-អង្គរ នៅតែមានដំណើរការវិវឌ្ឍទៅមុខគួរឱ្យកត់សម្គាល់ និងគ្រោងសម្រេចឱ្យបាន៧០% នៅដំណាច់ឆ្នាំ២០២២នេះ ដើម្បីឈានទៅបញ្ចប់គម្រោងទាំងស្រុងតាមផែនការដែលបានគ្រោងទុក នៅឆ្នាំ២០២៣”។

អាកាសយានដ្ឋានអន្តរជាតិសៀមរាប-អង្គរនេះមានទីតាំងនៅក្នុងឃុំពពេល ស្រុកសូទ្រនិគម ខេត្តសៀមរាប ដែលអនុវត្តដោយក្រុមហ៊ុនអង្គរអ៊ិនធើណេសិនណល អ៊ែរផត អ៊ិនវេសម៉ិន (ខេមបូឌា) ដែលបានចាប់ផ្ដើមសាងសង់កាលពីថ្ងៃទី១៥ ខែមីនា ឆ្នាំ២០២០ នៅលើផ្ទៃដីប្រមាណ៧០០ហិកតា ហើយគ្រោងនឹងបញ្ចប់នៅឆ្នាំ២០២៣ ដែលមានរយៈពេល៣៦ខែ ក្រោយពីអ្នកជំនាញបានសិក្សាប្លង់មេរួចរាល់កាលពីឆ្នាំ២០១៦៕

សារព៌តមានដ៏ល្បីលើពិភពលោកថា គ្មានពេលណាល្អជាងពេលមកទស្សនាប្រាង្គប្រាសាទអង្គរ

ដោយៈ គង់ សូរិយា

 ភ្នំពេញៈ សារព័ត៌មានដ៏ល្បីល្បាញ Bloomberg របស់សហរដ្ឋអាមេរិកបានចុះផ្សាយ អំពីគោលដៅទេសចរណ៍នៅកម្ពុជា ដែលស័ក្តិសមបំផុតសម្រាប់ការទស្សនារបស់ភ្ញៀវទេសចរ ក្នុងដំណាក់កាលកូវីដនេះ ដោយគេបានរំលេចចំណងជើងថា គ្មានពេលវេលាណាល្អជាង ពេលមកទស្សនាប្រាសាទអង្គរវត្តឡើយ There’s Never Been a Better Time to Visit Angkor Wat។

សារព័ត៌មានរបស់សហរដ្ឋអាមេរិកដ៏ល្បីមួយនេះ បានបញ្ជាក់អំពីចំណុចសំខាន់ៗ នៃការបើកទទួលទេសចរណ៍ឡើងវិញដូចជា ទី១ជោគ​ជ័យនៃការចាក់វ៉ាក់សាំង របស់រាជរដ្ឋាភិបាលកម្ពុជា ដែលប្រជាជនទូទាំងប្រទេសជាង៨៣ភាគរយ បានទទួលវ៉ាក់សាំងពេញលេញ ដែលកម្ពុជាបានឈរនៅលំដាប់លេខរៀងទី៨ លើពិភពលោកជាប្រទេស ដែលមានប្រជាជនចាក់វ៉ាក់សាំងច្រើនជាងគេបំផុត។នេះបើយោងតាមទិន្នន័យដែលទទួលបានពីសាកលវិទ្យាល័យ Johns Hopkins ហើយករណីឆ្លងថ្មីនៃជំងឺកូវីដ-១៩ បានធ្លាក់ចុះជាបន្តបន្ទាប់។

ទី២ បន្ទាប់ពីរាជរដ្ឋាភិបាលកម្ពុជា បានប្រកាសបើកទទួលភ្ញៀវទេសច​រអន្តរជាតិវ៉ាក់សាំង ឱ្យចូលមកទស្សនាកម្ពុជាឡើងវិញ ដោយមិនតម្រូវឱ្យធ្វើចត្តាឡីស័ក ចាប់ពីថ្ងៃទី១៥ ខែវិច្ឆិកា ឆ្នាំ២០២១នោះមក មានក្រុមហ៊ុនអាកាសចរណ៍ជាច្រើន ចាប់ផ្តើមបើកជើងហោះហើរឡើងវិញផងដែរ ក្នុងនោះ ក៏មានក្រុមហ៊ុនអាកាសចរណ៍សិង្ហបុរី (Singapore Airlines) បានចាប់ផ្តើមបើកការហោះហើរប្រចាំថ្ងៃ មកកាន់ខេត្តសៀមរាប ហើយការកក់បន្ទប់សណ្ឋាគារ និងភោជនីយដ្ឋាន ក៏ចាប់ផ្តើមមានសន្ទុះឡើងវិញគួរឱ្យកត់សម្គាល់។

ទី៣ ក្រៅពីប្រាសាទអង្គរវត្ត អ្នកទស្សនាគួរតែផ្តល់អាទិភាព ទៅទស្សនានៅប្រាសាទតាព្រហ្ម ដែលល្បីល្បាញនៅក្នុងឈុត “Lara Croft: Tomb Raider” ជាមួយ Angelina Jolie ដែលមានឫសឈើបុរាណរុំព័ទ្ធជុំវិញបដិមាថ្ម ដែលមានអាយុកាលរាប់សតវត្ស។ ប្រាសាទបាយ័ន ដែលជាចំណុចលេចធ្លោ នៃក្រុងអង្គរធំដែលមានមុខញញឹមចំនួន២១៦ ដែលគេជឿថា ជារូបចម្លាក់របស់ព្រះបាទជ័យវរ្ម័នទី៧ផ្ទាល់ ក្នុងសភាពស្ងប់ស្ងាត់យ៉ាងអស្ចារ្យផងដែរ។

ទន្ទឹមនឹងនេះ សួនច្បារ និងផ្លូវថ្មីៗជាច្រើនខ្សែបាន និងកំពុងសាងសង់​ពេញទីក្រុងសៀមរាប ដែលផ្តល់ភាពងាយស្រួល ក្នុងការធ្វើដំណើរកម្សាន្ត ទស្សនាប្រាសាទនានាជុំវិញបរិវេណតំបន់អង្គរ និងក្រៅតំបន់អង្គរ ប្រកបដោយភាពទាក់ទាញ។

ទី៤ ប្រព័ន្ធប្រព្រឹត្តកម្មទឹកដែលប្រសើរឡើង បានកាត់បន្ថយការជន់លិចនៅរដូវវស្សា។ Angkor Eye Ferris wheel – បញ្ចប់នៅឆ្នាំ២០២០ ប៉ុន្តែនៅតែស្រស់ស្អាត បានត្រៀមខ្លួនជាស្រេច ដើម្បីផ្តល់ជូននូវទិដ្ឋភាពចល័តនៃប្រាសាទដែលនៅឆ្ងាយ។ ការជិះប៉េងប៉ោងខ្យល់ ឥឡូវឱ្យភ្ញៀវទេសចរគយគន់ថ្ងៃលិច ពណ៌មាសនៅតំបន់រមណីយដ្ឋានអង្គរ ពីលើអាកាស។

ទី៦ ព្រលានយន្តហោះខ្នាតអន្តរជាតិថ្មីមួយកំពុងសាងសង់ ហើ​យអាចនឹងបញ្ចប់ការសាងសង់នៅដើមឆ្នាំ២០២៣។

សារព័ត៌មានខាងលើក៏បានសង្កត់ធ្ងន់ថា ការចាប់ផ្តើមបើកឡើងវិញនៃគោលដៅទេសចរណ៍ នឹងបង្កើតក្តីសង្ឃឹមដល់សហគមន៍ និងជាឱកាសសម្រាប់មួយជីវិតរបស់ភ្ញៀវទេសចរ។

Bloomberg ក៏បានបញ្ជាក់ដែរថា ការរៀបចំវេទិកាទេសចរណ៍អាស៊ានឆ្នាំ២០២២នេះ គឺដើម្បីឆ្ពោះទៅកាន់ការស្តារ និងបើកឡើងវិញនៃវិស័យទេសចរណ៍ ក្នុងតំបន់ប្រកបដោយភាពធន់ និរន្តរភាព និងការទទួលខុសត្រូវនាពេលអនាគត។ ឆ្លងកាត់បទពិសោធន៍ជោគជ័យ ពីការរៀបចំវេទិកាទេសចរណ៍អាស៊ានឆ្នាំ២០២២កន្លងទៅ បង្ហាញថា កម្ពុជាគឺជាគោលដៅទេសចរណ៍ប្រកបដោយសុវត្ថិភាពបំផុត។

សារព័ត៌មានអន្តរជាតិមួយនេះ ក៏បានអំពាវនាវដល់អ្នកទេសចរអន្តរជាតិមកទស្សនាកម្ពុជា ចាប់ពីឆ្នាំ២០២២នេះតទៅ កម្ពុជារង់ចាំស្វាគមន៍អ្នកទាំងអស់គ្នាដោយក្តីរីករាយ ភាពកក់ក្តៅ និងធានាជូននូវសុវត្ថិភាព ភាពស្អាត និងបៃតង (Safe Warm Clean Green)៕

 

Home Loan reaches more than 5 billion dollars

by: Sotheary

Phnom Penh: In the last 5 years, bank loan in real estate sector, especially personal loans for home purchase, has continued to increase, despite the crisis in Cambodia due to Covid-19 for 2 years.

Mr. Doeun Sopheap, Head of Personal Sales of J Trust Royal Bank, said on the morning of January 26 that that the financial institutions are still strong and continue to grow. In recent years, we have seen the growth of home loans provided by banks to customers as of now, according to the report of the Credit Bureau of Cambodia shows that home loans up to 5 billion US dollars.

He added that the increase of housing loans in Cambodia is due to the demand of customers who are looking for housing, so the banks provide loans in the housing sector more and more.

“Nowadays all age of people uses bank loans to buy a house, but lately, many young people are interested in getting a loan from the bank to buy a house,” he said.

“To buy a dream home, customers need to have some money first, with some banks requiring 30% of the house price and some banks require only 20 percent of the value of the house, so they have to have some savings first and then be able to get a loan from the bank to complete the purchase of a house,” he added.

According to a report by the National Bank of Cambodia, home equity loans accounted for 13.2 percent of the total consumer loans of more than $ 36.8 billion as of the end of 2021. Home loan grow by 37.7 percent in 2021.

According to annual report by CBRE, most of the construction projects in 2021 were housing projects, covering g more than 50% of the total construction projects, which means the supply of housing in Cambodia by 2021 is still active.

ទំហំឥណទានទិញលំនៅដ្ឋានបានកើនឡើងដល់ជាង៥ពាន់លានដុល្លារអាមេរិក

ដោយៈវឌ្ឈនៈ

ភ្នំពេញៈ ក្នុងរយៈពេលប្រមាណ៥ឆ្នាំចុងក្រោយនេះ ការផ្ដល់ឥណទានទៅលើវិស័យអចលនទ្រព្យ ជាពិសេសការផ្ដល់ឥណទានបុគ្គលសម្រា​ប់ទិញផ្ទះ បានបន្តកើនឡើងជាបន្តបន្ទាប់ ក្នុងនោះដែរទោះបីកម្ពុជាជួបវិបត្តិដោយសារតែកូវីដ១៩រយៈពេល២ឆ្នាំ ក៏ទំហំឥណទានលំនៅឋានក៏នៅតែបន្តកើនឡើងដដែល។

លោកឌឿន សុភាព នាយកគ្រប់គ្រង ផ្នែកលក់ឥណទានបុគ្គលនៃ ធនាគារJ Trust Royal បានឱ្យដឹងកាលពីព្រឹកថ្ងៃទី២៦ មករាថា ស្ថាប័នហិរញ្ញវត្ថុនៅក្នុងពេលនេះ នៅតែមានភាពរឹងមាំ និងបន្តរីកចម្រើនដូចដើម ។ ក្នុងរយៈពេលប៉ុន្មានឆ្នាំចុងក្រោយនេះ យើងសង្កេតឃើញថាឥណទានទិញផ្ទះដែលធនាគារ បានផ្ដល់ទៅអតិថិជនមានការរីកចម្រើនដដែល ដែលគិតមកដល់ពេលនេះ បើតាមរបាយការណ៍របស់ការិយាល័យ ឥណទានកម្ពុជាបានបង្ហាញថា ឥណទានទិញផ្ទះមានទំហំរហូត ដល់ជាង៥ពាន់លានដុល្លារអាមេរិក ។

លោកបន្តថា “ការកើនឡើងនៃទំហំឥណទាន សម្រាប់លំនៅឋាននៅក្នុងប្រទេសកម្ពុជា ដោយសារតែតម្រូវរបស់អតិថិជននៅតែមានច្រើន អ្នកស្វែងរកលំនៅឋានស្នាក់នៅច្រើនជាងមុន ធ្វើឱ្យបណ្ដាធនាគារផ្ដល់ឥណទានលើវិស័យលំនៅឋានក៏មានច្រើនជាងមុន”។

លោកបន្តថា នៅពេលបច្ចុប្បន្ននេះដែរ មិនថាតែយុវជនឬមនុស្សវ័យណានោះទេ ក៏មានប្រើប្រាស់កម្ចីពីធនាគារដើម្បីទិញផ្ទះដែរ ប៉ុន្តែមួយរយៈចុងក្រោយនេះ ឃើញយុវជនមានច្រើនបានចាប់អារម្មណ៍ លើការរកកម្ចីពីធនាគារដើម្បីទិញផ្ទះ។

លោកបន្តថា “ដើម្បីទិញផ្ទះនៅក្នុងក្ដីសុបិន្តបាន អតិថិជនត្រូវការមានប្រាក់មួយចំនួនជាមុនសិន ដោយធនាគារខ្លះតម្រូវ៣០ភាគរយនៃតម្លៃផ្ទះ ហើយធនាគារខ្លះ តម្រូវឱ្យមានត្រឹម២០ភាគរយនៃតម្លៃផ្ទះ។ ដូច្នេះពួកគាត់ត្រូវមានលុយសន្សំមួយចំនួនជាមុនសិន រួចហើយអាចរកកម្ចីពីធនាគារដើម្បីបង្គ្រប់ក្នុងការទិញផ្ទះមួយនោះ”។

របាយការណ៍របស់ធនាគារជាតិនៃកម្ពុជា បានឱ្យដឹងផងដែរថា ឥណទានសម្រាប់ទិញផ្ទះ ជាកម្មសិទ្ធិផ្ទាល់ខ្លួនមាន១៣,២ភាគរយ ក្នុងចំណោមឥណទានអតិថិជនសរុប មានជាង៣៦,៨ពាន់លានដុល្លារអាមេរិក គិតត្រឹមដំណាច់ឆ្នាំ២០២១កន្លងទៅ។

របាយការណ៍ដដែលបានបន្តថា កំណើនឥណទានអតិថិជនទិញផ្ទះជាកម្មសិទ្ធិផ្ទាល់ខ្លួន មានកំណើនរហូតដល់៣៧,៧ភាគរយក្នុងឆ្នាំ២០២១កន្លងទៅនេះ។ ដោយឡែកតាមរបាយការណ៍ និងការសិក្សារបស់ក្រុមហ៊ុនCBREក៏បានបង្ហាញថា គម្រោងសាងសង់ក្នុងឆ្នាំ២០២១ កន្លងទៅភាគច្រើន ជាគម្រោងលំនៅឋានដែលមានរហូតដល់ ទៅជាង៥០ភាគរយនៃគម្រោងសាងសង់សរុប ដែលមានន័យថាការផ្គត់ផ្គង់លំនៅឋាន ក្នុងប្រទេ​សកម្ពុជាក្នុងឆ្នាំ២០២១កន្លងទៅនៅតែមានសកម្មភាព៕

ប្រទេសវៀតណាមនៅតែជាគោលដៅទាក់ទាញសម្រាប់វិនិយោគិនសិង្ហបុរី

ដោយ៖ ស្រីលិះ

វៀតណាម៖ វៀតណាមនៅតែជាគោលដៅទាក់ទាញសម្រាប់វិនិយោគិនបរទេស រួមទាំងវិនិយោគិនមកពីប្រទេសសិង្ហបុរី ដោយសារកិច្ចខិតខំប្រឹងប្រែង និងវិធានការរួមរបស់រដ្ឋាភិបាលក្នុងការកែលម្អបរិយាកាសធុរកិច្ច និងការពង្រីកកិច្ចព្រមព្រៀងពាណិជ្ជកម្មសេរី។ នេះបើតាមការលើកឡើងរបស់ឯកអគ្គរដ្ឋទូតសិង្ហបុរីប្រចាំនៅវៀតណាម លោក Jaya Ratnam ក្នុងបទសម្ភាសន៍ក្នុងស្រុកមួយ។

តាមការចុះផ្សាយរបស់កាសែត Viet Nam Plus នៅក្នុងថ្ងៃទី២៦ ខែមករានេះ លោកឯកអគ្គរដ្ឋទូតបានគូសបញ្ជាក់ថា សិង្ហបុរីគឺជាប្រភពវិនិយោគនាំមុខគេនៃការវិនិយោគផ្ទាល់ពីបរទេស (FDI) ទៅកាន់ប្រទេសវៀតណាមរយៈពេលពីរឆ្នាំជាប់ៗគ្នា ដោយប្រាក់បានចាក់ចូលទៅក្នុងវិស័យជាច្រើនដូចជា សេវាកម្មហិរញ្ញវត្ថុ និងធានារ៉ាប់រង ការផលិត អចលនទ្រព្យនិងការលក់ និងការលក់រាយទាំងមូល។

សួនឧស្សាហកម្មវៀតណាម-សិង្ហបុរី (VSIP) គឺជាមូលដ្ឋានគ្រឹះនៃទំនាក់ទំនងសេដ្ឋកិច្ចរបស់សិង្ហបុរីជាមួយវៀតណាម ដោយបានទាក់ទាញប្រាក់ប្រមាណ១៤ពាន់លានដុល្លារអាមេរិក ហើយបានបង្កើតការងារជាង២៧០០០០កន្លែងនៅក្នុងប្រទេសវៀតណាមក្នុងរយៈពេល២៥ឆ្នាំចុងក្រោយនេះ។

លោកឯកអគ្គរដ្ឋទូតបានបន្តថា ការអភិវឌ្ឍន៍សេដ្ឋកិច្ចឌីជីថលនឹងក្លាយជាអាទិភាពសំខាន់សម្រាប់ប្រទេសទាំងពីរក្នុងទសវត្សរ៍ខាងមុខ។

ឯកអគ្គរដ្ឋទូតសិង្ហបុរីក៏បានសង្កត់ធ្ងន់ផងដែរអំពីសារៈសំខាន់នៃការចាប់ផ្តើមជើងហោះហើរពាណិជ្ជកម្មរវាងប្រទេសទាំងពីរឡើងវិញ ដោយពិពណ៌នាថាវាជាជំហានដ៏សំខាន់មួយដើម្បីស្តារការធ្វើដំណើរប្រកបដោយសុវត្ថិភាព គាំទ្រដល់កំណើនសេដ្ឋកិច្ច និងទំនាក់ទំនងរវាងប្រជាជននិងប្រជាជន។

ចំពោះទំនាក់ទំនងទ្វេភាគី អ្នកការទូតបាននិយាយថា ប្រទេសត្រូវបានបង្កើតឡើងនៅលើមូលដ្ឋានដ៏រឹងមាំនៃការជឿទុកចិត្ត និងការគាំទ្រទៅវិញទៅមក ត្រូវបានពង្រឹងបន្ថែមទៀតក្នុងរយៈពេលពីរឆ្នាំចុងក្រោយនេះ បើទោះបីជាមានការលំបាកជាច្រើនដែលបណ្តាលមកពីការរីករាលដាលនៃជំងឺកូវីដ-១៩ក៏ដោយ។

ការចូលរួមទ្វេភាគីកម្រិតខ្ពស់ត្រូវបានរក្សាដោយនិរន្តរភាព រួមទាំងជំនួបផ្ទាល់រវាងនាយករដ្ឋមន្ត្រី Pham Minh Chinh និងនាយករដ្ឋមន្ត្រីសិង្ហបុរី Lee Hsien Loong នៅទីក្រុង Jakarta ក្នុងខែមេសា ឆ្នាំ២០២១និងដំណើរទស្សនកិច្ចជាផ្លូវការទៅកាន់ប្រទេសវៀតណាមរបស់រដ្ឋមន្ត្រីការបរទេសសិង្ហបុរីលោក Vivian Balakrishnan ក្នុងខែមិថុនា ឆ្នាំមុនផងដែរ។

នៅទីក្រុងហាណូយ និងទីក្រុងហូជីមិញ សហគមន៍សិង្ហបូរីបានប្រមូលផ្តុំគ្នាដើម្បីប្រមូលថវិកាទិញ និងចែកចាយសម្ភារៈសំខាន់ៗសម្រាប់ជនខ្វះខាត ដោយគិតពីការជួយឧបត្ថម្ភទាន់ពេលរបស់វៀតណាមដល់សិង្ហបុរីនៅពេលស្ថានភាពលំបាកត្រឡប់ទៅប្រទេសរបស់ពួកគេ៕