ការសាងសង់ផ្លូវក្រវាត់ក្រុងទី៣សម្រេចបាន៧០ភាគរយហើយ

ដោយៈ សុធារី

ភ្នំពេញៈ គិតត្រឹមពាក់កណ្តាល ខែមករា ឆ្នាំ២០២២នេះ គម្រោងសាងសង់ផ្លូវក្រវាត់ក្រុងទី៣ ដែលភ្ជាប់ផ្លូវជាតិសំខាន់ៗរបស់កម្ពុជា ក្រោមហិរញ្ញប្បទានពីរដ្ឋាភិបាលចិន សម្រេចបានជិត៧០ភាគរយហើយ គ្រោងនឹងបញ្ចប់ការស្ថាបនា នៅបំណាច់ឆ្នាំ២០២២នេះ។

លោកហ៊ាង សុទ្ធាយុត្តិ ប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈ និងជាអ្នកនាំពាក្យក្រសួងសាធារណការ និងដឹកជញ្ជូន បានឱ្យដឹងថា គម្រោងសាងសង់ផ្លូវ ដែលមានប្រវែងប្រមាណ៥៣គីឡូម៉ែត្រនេះ ដើរតួនាទីយ៉ាងសំខាន់ ក្នុងកាត់បន្ថយការកកស្ទះចរាចរណ៍ និងគ្រោះថ្នាក់ចរាចរណ៍ នៅរាជធានីភ្នំពេញ ព្រមទាំងជួយជំរុញកំណើនសេដ្ឋកិច្ចជាតិ។

គម្រោងសាងសង់ផ្លូវក្រវាត់ក្រុងទី៣ គ្រោងចំណាយថវិកាសាងសង់ ប្រមាណជិត៣០០លានដុល្លារអាមេរិក ក្នុងនោះ២៧០លានដុល្លារអាមេរិក គឺជាហិរញ្ញប្បទានពីប្រទេសចិន។

ក្រសួងសាធារណការ និងដឹកជញ្ជូន បានចុះកិច្ចសន្យាសាងសង់ជាមួយនឹងក្រុមហ៊ុន សំណង់សៀងហៃចិន ក្នុងការអនុវត្តការងារសាងសង់ផ្លូវក្រវាត់ក្រុងទី៣នេះ ដែលមានការត្រួតពិនិត្យបច្ចេកទេស ដោយក្រុមហ៊ុន ក្វាងចូវវ៉ាន់អាន មកពីប្រទេសចិន។

ផ្លូវក្រវាត់ក្រុងទី៣ ត្រូវបានបើកការដ្ឋានសាងសង់ កាលពីនៅថ្ងៃទី១៤ ខែមករា ឆ្នាំ២០១៩ ក្រោមអធិបតីភាពសម្តេចតេជោ នាយករដ្ឋមន្រ្តីនៃកម្ពុជា និងឯកអគ្គរដ្ឋទូតចិនប្រចាំនៅកម្ពុជា៕

អ្នកជំនាញរំពឹងទីផ្សារជួលអាផាតម៉ិនមានការងើបឡើងវិញក្នុងឆមាសទី២ឆ្នាំនេះ

ដោយៈ សុផារី

ភ្នំពេញៈ អាផាតម៉ិនជាទីផ្សារសំខាន់មួយ នៃវិស័យអចលនទ្រព្យ ដែលទទួលរងផលប៉ះពាល់ធ្ងន់ធ្ងរ ដោយសារចំនួននៃភ្ញៀវបរទេសមានការធ្លាក់ចុះ។

ទោះយ៉ាងណាក្តី លោកប៉ូ អ៊ាវគង់ អគ្គនាយក ក្រុមហ៊ុនអចលនទ្រព្យ Advance រំពឹងថា ទីផ្សារមួយនេះនឹងមានភាពល្អប្រសើរ នៅក្នុងឆមាសទី២ ឆ្នាំ២០២២នេះ។

បើប្រៀបធៀបនឹងឆ្នាំ២០២០ លោកសង្គេតឃើញថា ជារួមទីផ្សារជួលអាផាតម៉ិនក្នុងទីក្រុងភ្នំពេញ មានការធ្លាក់ចុះប្រមាណ៥ ទៅ១០ភាគរយ តែបើប្រៀបធៀបនឹងមុនកូវីដ១៩ ក្នុងឆ្នាំ២០១៩ មានការធ្លាកចុះខ្លាំង ដោ​យ​សារតែភាគច្រើន អ្នកជួលអាផាតម៉ិនភាគច្រើន ជាជនជាតិបរទេស ហើយ ក្នុងសម័យកូវីដ១៩នេះ ក្រុមហ៊ុន អង្គការនានាបានកាត់បន្ថយការចំណាយ និងកាត់បន្ថយបុគ្គលិក។

លោកមានប្រសាសន៍ថា “និយាយរួម ទីផ្សារជួលក្នុងឆ្នាំ២០២១ មានលក្ខណៈរៀងធ្លាក់ចុះដែរ ចំនួនភ្ញៀវដែលជួលក៏ធ្លាក់ចុះ ហើយកម្រិតនៃការរកភ្ញៀវថ្មីក៏មិនសូវមាន”។ លោកបន្តថា “ប្រៀបធៀបនឹងឆ្នាំ២០១៩ មានការធ្លាក់ចុះច្រើន តែបើប្រៀបធៀបនឹងឆ្នាំ២០២០ មានការធ្លាក់ចុះប្រមាណ៥ទៅ១០ភាគរយ ទើបតែចុងឆ្នាំ២០២១ និងឆ្នាំ២០២២នេះទេ ដែលចាប់ផ្តើមមានចំណូលខ្លះ នៃភ្ញៀវបរទេសចូលមកក្នុងប្រទេស តែមិនមានចំនួនច្រើននោះទ”។

នៅក្នុងឆ្នាំ២០២២ នេះលោកមើលឃើញថា លោកសង្ឃឹមថា អាចមានកម្លាំងចលករមួយ ដែលអាចជម្រុញឱ្យទីផ្សារជួល មានលក្ខណៈល្អប្រសើរជាងឆ្នាំ២០២១បន្តិច តែក៏នៅមិនទាន់ធំដុំនៅឡើយទេ ព្រោះថាទីផ្សារជួលនេះ ពាក់ព័ន្ធនឹងការធ្វើដំណើរ និងការវិលត្រលប់មកវិញនៃការបើកអាជីវកម្មថ្មី នៃវិស័យដែលជាប្រភេទជនជាតិបរទេស ចូលមកកាន់ស្រុកខ្មែរ។

តែប្រសិនបើទាក់ទងនឹងការជួលប្រភេទផ្ទះល្វែង សបហោស៍ ដែលជាប្រភេទអាជិវកម្មក្នុងស្រុករបស់យើង ដែលបានចាប់ផ្តើមពង្រឹងឡើងវិញ លោកមើលឃើញថា មានកំណើនឡើងវិញគួរឱ្យកត់សម្គាល់ដែរ ក្នុងរយៈពេល២ ទៅ៣ខែចុងក្រោយនេះ។ តែបើម្ចាស់អាជីវកម្មជាប្រភេទជនជាតិ ចិន កូរ៉េ ជប៉ុន ម៉ាឡេស៊ី ជាដើមនោះ នៅខ្សត់ខ្សោយនៅឡើយទេក្នុងដើមឆ្នាំនេះ។

យ៉ាងណាក្តី លោករំពឹងថា នៅក្នុងឆមាសទី២ ក្នុងឆ្នាំ២០២២នេះ អាចនឹងមានកំណើនល្អប្រសើរជាងក្នុងឆមាសទី១នេះ។

ក្នុងរយៈពេល៣ ទៅ៤ឆ្នាំចុងក្រោយនេះ និន្នាការនៃជនជាតិចិន ដែលបានមកជួលមានកំណើនខ្ពស់ ខណៈជនជាតិអ៊ឺរ៉ុប និងជនជាតិជប៉ុនមានការស្ងប់ស្ងាត់ទៅវិញ ក្នុងរយៈពេល២ឆ្នាំចុងក្រោយនេះ៕

តើផ្នែកអ្វីខ្លះនៃវិស័យអចលនទ្រព្យនឹងមានភាពប្រែប្រួលខ្លាំងនៅពេលខាងមុខ

ដោយៈគង់ សូរិយា

ភ្នំពេញៈ ក្រុមអ្នកជំនាញជើងចាស់ក្នុងវិស័យអចលនទ្រព្យ បានប្រមើ​លមើលឃើញថា ទីផ្សារមួយចំនួននៃអចលនទ្រព្យ នឹងមានការប្រែប្រួលច្រើននៅរយៈពេល៥ឆ្នាំខាងមុខ។

លោកឧកញ៉ាបណ្ឌិតគីម ហ៊ាងប្រធានKW Cambodiaបានមានប្រសាសន៍ឲ្យដឹងតាមទូរស័ព្ទ កាលពីដើមសប្តាហ៍នេះថា នៅរយៈពេល៣ទៅ៥ឆ្នាំខាងមុខ ទីផ្សរអាផាតម៉ិននឹងមានការធ្លាក់ចុះ ដោយសារការផ្គត់ផ្គង់កើនឡើង ស្របពេលការប្រកួតប្រជែង កាន់តែតានតឹងជាងមុន។ ចំណែ​កការវិនិយោគបុរី នៅតែមានផលចំណេញខ្ពស់ ស្របពេលទីផ្សារខុនដូអ្នកវិនិយោគទទួល បានផលចំណេញតិចជាងមុន ប៉ុន្តែតម្រូវការកើនឡើងខ្ពស់។

លោកបន្តថា “ពីមុនអ្នកសាងសង់ខុនដូលក់ រកផលចំណេញបានមួយគុណនឹងពីរឬគុណនឹងបី ប៉ុន្តែដោយសារការប្រកួតប្រជែងកើនឡើង បានធ្វើឲ្យផលចំណេញធ្លាក់ចុះ”។ លោកបន្តថា “ជាមួយគ្នានេះ ការិយាល័​យជួលតូចៗប្រឈមនឹងបញ្ហាផងដែរ ដោយសារទីផ្សារនឹងវិវត្តន៍កាន់តែច្រើន”។

លោកឧកញ៉ាបានបន្តថា អ្នកវិនិយោគការិយាល័យជួល ត្រូវធ្វើជាមជ្ឈមណ្ឌលពាណិជ្ជកម្ម ដែលមានទាំងខុនដូ ផ្សារទំនើប ការិយាល័យជួលរួមបញ្ចួលគ្នា ពិសេសមានទីតាំងនៅកណ្តាលរាជធានី”។

ជាមួយគ្នានេះ លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានមើលឃើញផងដែរថា ទីផ្សារបុរីសម្រាប់តម្លៃខ្ពស់នឹងប្រឈមមុខនឹងការធ្លាក់ចុះ ដោយសារការផ្គត់ផ្គង់់កើនឡើងច្រើន ប៉ុន្តែសម្រាប់បុរីដែលមានតម្លៃមធ្យមចុះ មិនរងផលប៉ះពាល់នោះទេ។

លោកបន្តថា “ទីផ្សារដីធ្លីនៅតំបន់ជាយក្រុងនឹងបន្តកើនឡើង ហើយតំរូវការខុនដូនឹងកើនឡើង ហើយអ្វីដែលជាការលេចធ្លោ នឹងមានការទិញ វិនិយោគផ្សារហ៊ុននឹងកើនឡើង ប៉ុន្តែវាទាមទារបទពិសោធន៍ និងភាពច្បាស់លាស់នៃទីផ្សារ”៕

ក្រុមហ៊ុនអចលនទ្រព្យយក្សEvergrandeកំពុងស្វែងរកជំនួយដើម្បីរំដោះខ្លួនចេញពីបំណុល

ដោយៈស្រីលីស

ភ្នំពេញៈ ក្រុមហ៊ុនអចលនទ្រព្យលំដាប់យក្ស China Evergrande Group បាននិយាយនៅថ្ងៃសុក្រទី២១ ខែមករាថា ខ្លួនកំពុងជួលអ្នកប្រឹក្សាផ្នែកហិរញ្ញវត្ថុ និងផ្នែកច្បាប់បន្ថែមទៀតដើម្បីជួយ នឹងការទាមទារពីម្ចាស់បំណុល បន្ទាប់ពីក្រុមសំខាន់ៗ នៃម្ចាស់បំណុលអន្តរជាតិរបស់ខ្លួនបានគំរា​មចាត់វិធានការផ្លូវច្បាប់ ប្រសិនបើមិនបង្ហាញភាពបន្ទាន់បន្ថែមទៀត។

ក្រុមហ៊ុនបាននិយាយ នៅក្នុងសេចក្តីថ្លែងការណ៍ទីផ្សារភាគហ៊ុនថា ខ្លួនកំពុងស្នើសុំឱ្យចូលរួមជាមួយ China International Capital និង BOCI Asia ជាអ្នកផ្តល់ប្រឹក្សាហិរញ្ញវត្ថុ និងក្រុមហ៊ុនមេធាវី Zhong Lun ជាទីប្រឹក្សាផ្នែកច្បាប់។

កាលពីថ្ងៃព្រហស្បតិ៍ ក្រុមម្ចាស់បំណុល ដែលតំណាងដោយក្រុមហ៊ុនច្បាប់ Kirkland & Ellis និងធនាគារវិនិយោគ Moelis បាននិយាយថា ខ្លួនបានត្រៀមខ្លួនជាស្រេច ដើម្បីចាត់វិធានការចាំបាច់ទាំងអស់ ដើម្បីការពារសិទ្ធិរបស់សមាជិក បន្ទាប់ពីការខ្វះការចូលរួមពីក្រុមហ៊ុន ដែលជាបេះដូងនៃវិបត្តិអចលនទ្រព្យរបស់ប្រទេសចិន។

Evergrande គឺជាក្រុមហ៊ុនអចលនទ្រព្យ ដែលជំពាក់បំណុលគេច្រើនជាងគេបំផុតលើពិភពលោក ជាមួយនឹងបំណុលសរុប៣៥០ពាន់លានដុល្លារអាមេរិក ដែលរាប់បញ្ចូលទាំងមូលបត្របំណុល អន្តរជាតិជិត ២០ ពាន់លានដុល្លារអាមេរិក ដែលត្រូវបានចាត់ទុកថាមិនដំណើរការបន្ទាប់ពីការបង់ប្រាក់ខកខានកាលពីចុងឆ្នាំមុន៕

Study: Condo supply in 2021 has slow growth while market remains unclear

By: Sotheary

Phnom Penh: A new study by the international company CBRE Cambodia found that the supply of condominiums last year and this year is expected to grow slow due to of Covid-19.

A report by CBRE Cambodia, released on 20 January 2022, shows that in 2021, Cambodia received only 4 new condominium development projects due to the Covid-19 crisis, which has hampered the entry of foreigners into the Kingdom. In particular, for 2022, new condo projects are also expected to remain low.

Ms. Kim Kinkesa, Associate Director of CBRE Cambodia, said that last year there were only four new condominium development projects, and in 2022, condominium development in Cambodia is expected to remain low.

“The factors that drive development at such a low level are not entirely due to Covid-19, but to economy affected from Covid-19,” she said.

“The world is still affected by Covid-19, especially the newly radiant Covid-19 virus, which makes it impossible for foreigners to travel in and out of the country to seek foreign investment,” she continues.
Ms. Kesa states that restrictions on some countries’ measures are still a barrier to the arrival of foreigners in Cambodia, as foreigners are the major developers of condo projects in Cambodia, so local developers are still important in contributing to condominium development.

Mr. Po Eav Kong, CEO of Advance Real Estate, also said that the development of the condominium sector in Cambodia may not be able to recover more than in 2021. The development activities and sales this year’s condo are just projects left over from last year.

He added that the number of new projects starting to hit the ground and be built in 2022 will be small in amount because the influx of investors into and out of Cambodia is still a difficult problem, and as we already know, most condo developers in our country and buyers are also foreigners.

“Some projects are sold abroad, but foreigners who want to buy a condominium project also need to visit the actual location before deciding to buy from any project,” he said.

ក្រុមហ៊ុន ប៉េង ហួត គ្រុប បានសម្ពោធនិងប្រគល់ ​​“អគារសិក្សា០១ខ្នង” ជូនដល់អង្គការមូលនិធិទ្រទ្រង់កុមារកម្ពុជា (CCAFO)​ ដើម្បីការសិក្សារបស់កុមារក្រីក្រក្នុងតំបន់ដាច់ស្រយាល

 

កាលពីព្រឹកថ្ងៃទី២០ ខែមករា ឆ្នាំ២០២២ ក្រុមហ៊ុន ប៉េង ហួត គ្រុប មានកិត្តិយសបានចូលរួមសម្ពោធនិងប្រគល់អគារសិក្សា០១ខ្នង ដែលត្រូវបានសាងសង់ក្រោមការឧបត្ថម្ភរបស់ក្រុមហ៊ុន បុរី ប៉េង ហួត ដែលជាក្រុមហ៊ុនបុត្រសម្ព័ន្ធមួយរបស់ក្រុមហ៊ុន ប៉េង ហួត គ្រុប និងបាននាំយកនូវសម្ភារៈសិក្សា ម៉ាស និងអាល់កុលមួយចំនួនជូនដល់អង្គការមូលនិធិទ្រទ្រង់កុមារកម្ពុជា (CCAFO) និងមជ្ឈមណ្ឌលមាតុភូមិខ្មែរ ដែលមានទីតាំងស្ថិតនៅក្នុងភូមិត្រពាំងអណ្ដូង ឃុំពាំងល្វា ស្រុកឧដុង្គ ខេត្តកំពង់ស្ពឺ ដើម្បីចូលរួមក្នុងការបណ្តុះបណ្តាល និងអភិវឌ្ឍធនធានមនុស្ស ជាពិសេសផ្តល់ឳកាសឱ្យសិស្សានុសិ្ស និងកុមារក្រីក្រក្នុងតំបន់ដាច់ស្រយាលបានសិក្សា។

ទោះស្ថិតក្នុងស្ថានភាពប្រឈមនៃជំងឺកូវីដ-១៩ក៏ដោយ ក្រុមហ៊ុន ប៉េង ហួត គ្រុប នៅតែបន្តការងារទំនួលខុសត្រូវសង្គមរបស់ខ្លួនបានយ៉ាងច្រើន។ ក្នុងនោះ ក្រុមហ៊ុនបានចូលរួមដោះស្រាយនូវផលលំបាកនិងឆ្លើយតបទៅតម្រូវការសង្គម។​

ផ្សារភ្ជាប់ទៅនឹងការងារទំនួលខុសត្រូវសង្គមនៃផ្នែកអប់រំនេះ គេសង្កេតឃើញថាក្រុមហ៊ុន ប៉េង ហួត គ្រុប មានសកម្មភាពទៅលើវិស័យនេះជាច្រើន ខណៈវិស័យអប់រំ គឺជាមូលដ្ឋានគ្រឹះនៃការកសាង និងអភិវឌ្ឍប្រទេសជាតិ និងសេដ្ឋកិច្ច ទោះបីជាវិស័យណាមួយក៏មិនអាចចាកឆ្ងាយពីវិស័យអប់រំបានឡើយ។

ក្នុងបរិយាកាសដ៏រំភើបរីករាយក្នុងកម្មវិធីសម្ពោធប្រគល់ និងទទួលអគារសិក្សានេះ លោក រិទ្ធី ចាន់តារា ប្រធានមជ្ឈមណ្ឌលអប់រំមាតុភូមិខ្មែរ បានថ្លែងអំណរគុណដល់ក្រុមហ៊ុន ប៉េង ហួត គ្រុប ថា “ខ្ញុំសូមថ្លែងអំណរគុណយ៉ាងជ្រាលជ្រៅ និងកោតសរសើរដោយស្មោះ ជូនចំពោះក្រុមការងាររៀបចំ និងប្រឹក្សាយោបល់របស់ក្រុមហ៊ុន ប៉េង ហួត គ្រុប លោក លោកស្រី ដៃគូរពាក់ព័ន្ធទាំងអស់ ដែលយើងអាចសាងសង់ថ្នាក់រៀនបានយ៉ាងរលូន ដែលការឧបត្ថម្ភជាអគារសិក្សាមួយខ្នងនេះ គឺពិតជាបានរួមចំណែកជាមួយអង្គការមូលនិធិទ្រទ្រង់កុមារកម្ពុជាក្នុងការកសាង និងបំពេញសមត្ថភាពរបស់អ្នកជំនាន់ក្រោយរបស់យើង ដើម្បីអោយប្រទេសរបស់យើងអាចបោះជំហាន និងកាន់តែរីកចម្រើនទៅថ្ងៃអនាគត។ ម្យ៉ាងទៀត ចូលរួមបំពេញក្ដីស្រមៃរបស់សិស្សានុសិស្ស កុមារក្រីក្រអាចបន្តការរៀនសូត្រទៅមុខទៀតឱ្យបានចប់ចុងចប់ដើម ដើម្បីឈានទៅសម្រចគោលបំណងរបស់ពួកគេទៅថ្ងៃអនាគត និងជាពិសេសសិស្សានុសិស្ស កុមារក្រីក្រនៅទីនេះពិតជាសប្បាយចិត្តខ្លាំងជាមួយនិងថ្នាក់រៀនថ្មីនេះ”។

លោក ចាន់ រដ្ឋា ប្រធានផ្នែកកិច្ចការសាធារណៈជាន់ខ្ពស់ និងជាតំណាងអគ្គនាយិកា បុរី ប៉េង ហួត បានបង្ហាញនូវមតិសំណេះសំណាលប្រកបដោយស្នាមញញឹម និងមោទកភាពថា “ក្រុមហ៊ុនមានកិត្តិយស និងសេចក្តីសោមនស្សយ៉ាងខ្លាំង ដែលបានចូលរួមក្នុងកម្មវិធីសម្ពោធ និងប្រគល់អគារសិក្សាថ្មី ០១ខ្នង ដែលត្រូវបានសាងសង់រួចរាល់ និងដាក់ឱ្យប្រើប្រាស់ជាផ្លូវការក្រោមការឧបត្ថម្ភរបស់ក្រុមហ៊ុន បុរី ប៉េង ហួត ជូនដល់អង្គការមូលនិធិទ្រទ្រង់កុមារកម្ពុជា ដើម្បីជាការចូលរួមចែករំលែក និងបណ្តុះបណ្ដាលធនធានមនុស្ស។ ក្មួយៗសិស្សានុសិស្ស គឺជាទំពាំងស្នងឬស្សី ជាធនធានដ៏សំខាន់ ជាក្ដីសង្ឃឹមសម្រាប់ក្រុមគ្រួសារ និងប្រទេសជាតិ”។

លោក​បន្តថា “ការអប់រំ គឺជាប្រទីបបំភ្លឺផ្លូវដែលអាចនាំក្តីស្រមៃ និងបំណងប្រាថ្នារបស់ក្មួយៗសិស្សានុសិ្សឱ្យឈានទៅដល់គោលដៅ ដែលក្នុងនោះក្មួយៗអាចក្លាយខ្លួនជាអ្នកដឹកនាំប្រទេសជាតិ ជាអគ្គនាយក ឬអគ្គនាយិកាក្រុមហ៊ុនឯកជន ជាវេជ្ជបណ្ឌិត វិស្វករ ឬស្ថាបត្យករ និងជាពិសេស ជាសាស្ត្រាចារ្យ និងលោកគ្រូអ្នកគ្រូនាពេលអនាគត”។

លោកបានបញ្ជាក់ទៀតថា “ផឹកទឹកឱ្យនឹកដល់ប្រភព ជ្រកក្រោមម្លប់ឱ្យនឹកដល់អ្នកដាំ» គឺជាទស្សនទានរបស់ស្ថាបនិកក្រុមហ៊ុន ប៉េង ហួត គ្រុប ក្នុងការចូលរួមតបស្នងត្រឡប់ទៅសង្គមវិញ ខណៈក្រុមហ៊ុនមានការអភិវឌ្ឍ និងការរីកចម្រើន ក៏ដោយសារសង្គមមានស្ថេរភាព សន្ដិភាព មានធនធានមនុស្សល្អច្រើន និងកត្ដាអំណោយផលផ្សេងទៀតជាច្រើន។ល។”

លោក​បន្ថែម​ថា “ជាការលើកទឹកចិត្តចែករំលែកក្តីសង្ឃឹម និងចូលរួមជាមួយកិច្ចការសង្គមជារៀងរាល់ឆ្នាំ ក្រុមហ៊ុន ប៉េង ហួត គ្រុប តែងតែរៀបចំសកម្មភាពមនុស្សធម៌ផ្សេងៗដូចជា៖ ចូលរួមបរិច្ចាគថវិកាជូនកាកបាទក្រហម មន្ទីរពេទ្យគន្ធបុប្ផា កសាងសាលារៀន  កសាងព្រះវិហារ និងផ្លូវថ្នល់។ល។ ក្រុមហ៊ុនសង្ឃឹមថា អគារសិក្សាមួយខ្នងនេះនឹងផ្តល់នូវបរិយាកាសសិក្សាកាន់តែប្រសើរជូនដល់ក្មួយៗក្នុងភូមិត្រពាំងអណ្តូង ឃុំពាំងល្វា ស្រុកឧដុង្គ ខេត្តកំពង់ស្ពឺ និងជឿជាក់ថាពួកគេនឹងខិតខំក្នុងការសិក្សា ដើម្បីអនាគតគ្រួសារ និងសង្គមជាតិ។ អគារសិក្សានេះក៏ចូលរួមជួយសម្រួលដល់តម្រូវការខ្វះខាតរបស់អង្គការមូលនិធិទ្រទ្រង់កុមារកម្ពុជា និងមណ្ឌលអប់រំមាតុភូមិខ្មែរមួយចំណែកធំផងដែរ”។

លោក​បន្ថែម​ថា​​ “ជាចុងក្រោយក្រុមហ៊ុនសូមថ្លែងអំណរគុណយ៉ាងជ្រាលជ្រៅដល់ អង្គការមូលនិធិទ្រទ្រង់កុមារកម្ពុជា និងមជ្ឈមណ្ឌលមាតុភូមិខ្មែរ ព្រមទាំងក្រុមការងារដែលបានខិតខំប្រឹងប្រែងមិនគិតពីការនឿយហត់ក្នុងការចូលរួមបណ្ដុះបណ្ដាលអភិវឌ្ឍធនធានមនុស្សសម្រាប់សង្គមជាតិ ហើយនិងសូមជូនពរក្មួយៗទាំងអស់គ្នាទទួលបានសេចក្ដីស្រឡាញ់ ការយកចិត្តទុកដាក់ឱ្យបានច្រើនពីមជ្ឈដ្ឋានជុំវិញ និងសូមឱ្យក្មួយៗអត់ធ្មត់ចំពោះស្ថានភាពលំបានដែលក្មួយៗកំពុងប្រឈមបច្ចុប្បន្ន និងប្រឹងប្រែងបន្តការរៀនសូត្រឱ្យបានច្រើនទៀត ដើម្បីសម្រេចក្ដីស្រមៃរបស់ខ្លួនឯងទៅថ្ងៃមុខ សូមក្មួយៗទាំង ទទួលបានសុខភាពល្អ និងជោគជ័យគ្រប់ភារកិច្ច”។

ក្នុងកម្មវិធីសម្ពោធ និងប្រគល់អគារសិក្សានេះ ក្រុមហ៊ុនក៏បានឧបត្ថម្ភជាថវិកាបន្ថែមដើម្បីទុកសម្រាប់ប្រើប្រាស់លើតម្រូវការជាក់ស្ដែងរបស់អង្គការ ដូចជាតម្រវការធុងស្តុកទឹកសម្រាប់ប្រើប្រាស់ និង ជួសជុលបង្គន់អនាម័យ ថែទាំអគារ និង​សម្ភាៈការិយាល័យផ្សេងៗ។

សូមរំលឹកផងដែរ កាលពីពេលថ្មីៗកន្លងទៅនេះ គេសង្កេតឃើញថា ក្រុមហ៊ុន ប៉េង ហួត គ្រុប បានចូលរួមសម្មភាពសង្គម និងសប្បុរសធម៌ទៅលើការអប់រំ និងសកម្មភាពផ្សេងៗជាច្រើនទៀតរួមមាន កម្មវិធីអង្ករបានបន្តការសិក្សារបស់កុមារកំព្រា និងកុមារក្រីក្រនៅ ខេត្តកំពង់ចាម កម្មវិធីអង្គរប្តូរយកឳកាសសិក្សារបស់ក្មេងៗរើសសំរាមនៅសហគមន៍ក្រីក្រ ស្ទឹងមានជ័យ ភ្នំពេញ កម្មវិធីអង្ករប្ដូរយកសំរាមប្លាស្ទិកនៅក្នុងសហគមន៍តាមដងទន្លេសាប ខេត្ដសៀមរាប៕

ផែនការផ្លាស់ប្តូររោងចក្រចេញពីភ្នំពេញ ធ្វើឱ្យដីធ្លីនៅតំបន់ជាប់ភ្នំពេញកាន់តែមានតម្រូវការខ្ពស់

ដោយៈវឌ្ឍនៈ

ភ្នំពេញៈ រោងចក្រនៅរាជធានីភ្នំពេញជាច្រើន បានផ្លាស់ប្តូរទីតាំងទៅតាំងទីកន្លែងថ្មី ដែលនៅឆ្ងាយពីទីក្រុង ធ្វើឱ្យតម្រូវការដីធ្លីនៅតំបន់ជាប់រាជធានីភ្នំពេញ កាន់តែមានកំណើនខ្ពស់ ក្នុងនោះដែរខេត្តកណ្ដាលនិងខេត្តកំពង់ស្ពឺ នឹងទទួលបានគម្រោងអភិវឌ្ឍន៍រោងចក្រច្រើនជាងគេ។

លោក ប៊ូ សេងហ៊ួ ប្រធានសាខាក្រុមហ៊ុនអចលនទ្រព្យ Century 21 Zillion Holding ប្រចាំខេត្តកំពង់ស្ពឺបានឱ្យដឹង តាមទូរស័ព្ទនាព្រឹកថ្ងៃទី២១ មករានេះថា ក្នុងពេលបច្ចុប្បន្ននេះ លោកបានមើលឃើញថារោងចក្រមួយចំនួន ដែលបានផ្លាស់ប្តូរពីរាជធានីភ្នំពេញ ទៅបោះទីតាំងនៅផ្លូវជាតិលេខ៣និងលេខ៤ច្រើន ហើយក្នុងនោះ ក៏មានគម្រោងរោងចក្រថ្មីៗជាច្រើនទៀត ដែលក្រុមប្រឹក្សាអភិវឌ្ឍន៍កម្ពុជា បានចេញវិញ្ញាបនបត្រវិនិយោគក៏បោះទីតាំងនៅក្នុងខេត្តកំពង់ស្ពឺដែរ ដែលធ្វើឱ្យតម្រូវការដីធ្លីនៅក្នុងខេត្តកំពង់ស្ពឺ មានកំណើនខ្ពស់ ជាមួយនឹងតម្លៃដីធ្លី ក៏មានការកើនឡើងជាបន្តបន្ទាប់ដែរ ។

លោកបន្តថា ក្នុងឆ្នាំ២០២១កន្លងទៅគម្រោងរោងចក្រថ្មីៗ ជាច្រើននៅតែបន្តចូលមកក្នុងខេត្តកំពង់ស្ពឺ ដោយខ្លះបានបើកដំណើរការ និងខ្លះទៀតកំពុងសាងសង់ជាបណ្ដើរៗ នឹងអាចបើកដំណើរការនៅពេលអនាគតខាងមុខនេះ ក្នុងនោះដែរយើងបានឃើញថា នៅបណ្ដោយផ្លូវជាតិលេខ៥១ មានក្រុមហ៊ុនវិនិយោគជាច្រើន ចូលទៅបណ្ដាក់ទុនវិនិយោគ ហើយក្រុមហ៊ុនធំៗ ក៏ចាប់ផ្ដើមសង់រោងចក្រ ដើម្បីបើកទទួលក្រុមហ៊ុនវិនិយោគរោងចក្រពីបរទេសចូលទៅកាន់តំបន់នោះ ។ ក្រៅពីនោះតំបន់នៅផ្សេងទៀតក្នុងខេត្តកំពង់ស្ពឺ ដូចជា នៅផ្លូវលេខ៤១ ក្នុងស្រុកគងពិសី ក៏ឃើញថាមានសកម្មភាពផ្គត់ផ្គង់ដីធ្លីសម្រាប់សង់រោងចក្រច្រើនផងដែរ ។

លោកបន្ថែមថា តាមរយៈសកម្មភាពនេះ បានជំរុញឱ្យតម្លៃដីធ្លីនៅក្នុងខេត្តកំពង់ស្ពឺ បានកើនឡើងជាបន្តបន្ទាប់ ដោយចាប់តាំងពីឆ្នាំ២០១៩មកតម្លៃដីធ្លីក្នុងខេត្តនេះ នៅតែបន្តងើបឡើង ទោះបីជាស្ថិតនៅក្នុងវិបត្តិកូវីដ១៩ក៏ដោយ ក៏ឃើញថាម្ចាស់ដី អត់មានបញ្ចុះតម្លៃលក់របស់ខ្លួនទេ ពោលគឺមានតែកើន ។

ជាមួយគ្នានេះ លោកឌឹត ចណ្ណាប្រធានក្រុមហ៊ុនអចលនទ្រព្យឡាក់គីក៏បានឱ្យដឹងផងដែរថា នៅពេលដែលកំណើនប្រជាជន រស់នៅរាជធានីកាន់តែច្រើន ការរីកចម្រើនកាន់តែទៅមុខ រោងចក្រនឹងត្រូវផ្លាស់ប្តូរទៅកាន់តំបន់ជាយក្រុងជាស្វ័យប្រវតិ្ត ដើម្បីកាត់បន្ថយការកកស្ទះចរាចរណ៍នៅពេលកុងតឺន័រដឹកទំនិញចេញ និងចូលរោងចក្រ ឬនៅពេលកម្មករចេញពីធ្វើការ ។ ដោយឡែកដីនៅតំបន់ រោងចក្រនាពេលបច្ចុប្បន្ននេះ នឹងត្រូវអភិវឌ្ឍន៍ទៅជាផ្ទះល្វែង អគារការិយាល័យ ផ្សារទំនើបជាដើម ។

ជាការកត់សម្គាល់ តំបន់ឧស្សាហកម្មរោងចក្រ នៅតាមបណ្ដោយផ្លូវវេងស្រេង បានផ្លាស់ប្តូរបន្តិចម្ដងៗហើយ ដោយតំបន់នេះបានអភិវឌ្ឍន៍ទៅជាផ្សារទំនើប អគារពាណិជ្ជកម្ម និងផ្ទះពាណិជ្ជកម្មជាដើម។

ជាមួយគ្នានេះ ក្រុមហ៊ុនអភិវឌ្ឍន៍ឧស្សាហកម្មមួយចំនួន ដូចជាក្រុមហ៊ុនរបស់អ្នកឧកញ៉ាពុងឃាវ សែក៏បានត្រៀមទីតាំងថ្មី នៅតំបន់ផ្លូវ៥១ ដើម្បីត្រៀមទទួលរោងចក្រថ្មី និងចាស់ផ្លាស់ពីភ្នំពេញទៅកាន់ទីតាំងនោះ ៕

កត្តាអ្វីខ្លះដែលធ្វើឲ្យការអភិវឌ្ឍតំបន់លំហែកាយនៅកម្ពុជាមានសន្ទុះខ្លាំង?

ដោយៈវឌ្ឈនៈ

ភ្នំពេញៈ ការអភិវឌ្ឍតំបន់លំហែកាយដែលរួមមាន លំនៅឋានលំហែកាយ ដីឡូត៏លំហែកាយជាដើម បាននិងកំពុងមានការពេញនិយមកាន់តែខ្លាំងជាពិសេសនៅក្នុងរយៈពេល២ឆ្នាំចុងក្រោយនេះ។

ការអភិវឌ្ឍគំរោងបែបផ្ទះលំហែរកាយ ដីឡូត៍រីសត និងរមណីយដ្ឋាន​បែបកែច្នៃ កាន់តែមានសន្ទុះខ្លាំងឡើង ដូចជា នៅក្នុងខេត្តកំពង់ស្ពឺ កំពត កោះកុង មណ្ឌលគិរី និងខេត្តព្រះសីហនុជាដើម។

លោកប៉ូ អ៊ាវគង់ អគ្គនាយកក្រុមហ៊ុនអចលនទ្រប្យAdvance បានមានប្រសាសន៍ឲ្យដឹងនាព្រឹកថ្ងៃទី២១ មករានេះថា ដោយសារតែបញ្ហាកូវីដ១៩ ប្រជាពលរដ្ឋកម្ពុជា ដែលធ្លាប់ធ្វើដំណើរកម្សាន្តទៅកាន់បទេស ត្រូវបានរឹតបន្តឹង និងមិនអាចធ្វើដំណើរទៅកម្សាន្តបានទៀត ដូច្នេះពួកគេត្រូវផ្លាស់ប្តូរមកកម្សាន្តក្នុងស្រក ។

លោកបន្តថា “ការធ្វើដំណើរកម្សាន្តក្នុងស្រុកនេះដែរ មួយចំនួនក៏មានជាផ្ទះលំហែកាយផ្ទាល់ និងខ្លះទៀតត្រូវស្នាក់នៅរីសតរួម ជាមួយភ្ញៀវដទៃទៀត”។

លោកបន្តថា កត្តានេះបានជំរុញឱ្យការអភិវឌ្ឍ លំនៅឋានលំហែកាយនៅក្នុងប្រទេសកម្ពុជាឃើញថា មានសន្ទុះខ្លាំងជាពិសេសនៅក្នុងឆ្នាំ២០២០និងឆ្នាំ២០២១ ក្នុងនោះដែរប្រជាពលរដ្ឋមួយចំនួន បានទិញជាផ្ទះលំហែរស្រាប់ និងមួយចំនួនទៀត ទិញជាដីសម្រាប់សង់ជាផ្ទះហើយដាំដំណាំ បន្លែសម្រាប់ជាការកម្សាន្តជួបជុំគ្រួសារ ពេលទំនេរពីការងារឬថ្ងៃបុណ្យទានធំៗជាដើម ។

លោកបន្ថែមថា ដោយសារតែមានតម្រូវការលើ លំនៅឋានលំហែកាយ ធ្វើឱ្យអ្នកអភិវឌ្ឍន៍ជាច្រើន ក៏ងាកទៅរកការអភិវឌ្ឍបែបផែនលំហែវិញ ដោយបានទិញដីចំការធំៗ ហើយពុះជាឡូត៏សម្រាប់លក់ ទៅអតិថិជនដែលមានតម្រូវការ ក្នុងការអភិវឌ្ឍជាផ្ទះលំហែរ។ មួយវិញទៀតអ្នកដែលមានដីធំៗស្រាប់ ក៏លក់មិនចេញក្នុងវិបត្តិពីព្រោះតែទំហំដីធំ និងមានទឹកប្រាក់ច្រើន ដូច្នេះដើម្បីលក់ចេញ គេក៏ពុះជាចម្រៀកៗ លក់ជាឡូត៏ៗជំនួសវិញ។

លោកប៊ូ សេងហ៊ួ ប្រធានសាខាក្រុមហ៊ុន Century 21 Zillion Holding ប្រចាំខេត្តកំពង់ស្ពឺក៏បានឱ្យដឹងថា ក្នុងខេត្តកំពង់ស្ពឺ ក៏មានការអភិវឌ្ឍលើតំបន់លំហែកាយផងដែរ ដូចជា នៅផ្លូវ៥១ ផ្លូវជាតិលេខ៤ពីចំណុចត្រែងត្រយឹង ទៅពេជ្រនិល គីរីរម្យជាដើម ដោយក្នុងនោះអភិវឌ្ឍន៍ក៏បានបញ្ចេញសកម្មភាពរៀបចំដី សម្រាប់លក់ជូនទៅប្រជាពលរដ្ឋ ដែលមានប្រាក់ចំណូលមធ្យមឡើង ។

លោកបន្តថា “ម្ចាស់ដីដែលបានទិញដីហើយអភិវឌ្ឍន៍ដំណាំ ដោយមិនសូវបានផលខ្ពស់ ក៏ងាកទៅពុះជាដីឡូត៏ សម្រាប់លំហែកាន់តែច្រើន និងបានឃើញថា ទទួលបានផលចំណេញខ្ពស់ ជាងការដាំដុះដំណាំ ដោយទុកដំណាំនោះជូនដល់អតិថិជនអ្នកទិញដីរបស់ខ្លួន”។

លោកCooler Tanអគ្គនាយកគំរោងវិនិយោគដីលំហែរកាយបូកគោលែកបានមានប្រសាសន៍ឲ្យដឹងថា ទីផ្សារដីលំហែរ វាដល់ពេលវេលាសមស្រ​បសម្រាប់ការវិនិយោគហើយ ដោយសារប្រជាជនមានជីវភាពប្រសើរឡើង កម្រិតយល់ដឹងមានភាពទូលំទូលាយជាងមុន និងពួកគេកាន់តែរវល់កការងារ ហើយមានស្រ្តេសច្រើន ហេតុនេះការស្វែងរកកន្លែងលំហែរជារឿង មិនគាប់ជួនពេកនោះទេ។

លោកបន្តថា “មូលហេតុដដែលលោក ជ្រើសរើសយកខេត្តកំពត ជាទីតាំងវិនិយោ​គ​ ដោយសារកត្តាសំខាន់ៗជាច្រើន រួមមាន ទី១ មានហេដ្ឋារចនាសម្ព័ន្ឋ​ងាយស្រួល ក្នុងការតភ្ជាប់ជាមួយរាជធានីភ្នំពេញ ទី២ ខេត្តកំពតមានធនធា​នធម្មជាតិដ៏៏សម្បូរបែប ទី៣ ជាខេត្តមានប្រជាប្រិយភាព លើវិស័យទេស​ចរណ៍ ពិសេសភ្ញៀវទេសចរណ៍ក្នុងស្រុក និងទី៤ លោកចង់ផ្តល់ទស្សនទាននៃការអភភិវឌ្ឍន៍ថ្មី ដែលមានផាសុខភាព ចីរភាព និងការទទួលខុសត្រូវលើសង្គម៕

សេដ្ឋវិទូអាស៊ីប៉ាស៊ីហ្វិក: សេដ្ឋកិច្ចរបស់កម្ពុជានៅឆ្នាំ២០២២អាចនឹងហក់ឡើងខ្ពស់ជាងការព្យាករណ៍

ដោយ: ម៉ាលីស

ភ្នំពេញ: ប្រធានសេដ្ឋវិទូ APAC(អាស៊ីប៉ាស៊ីហ្វិក) លោក Steve Cochrane បានអោយដឹងថា សេដ្ឋកិច្ចរបស់កម្ពុជានៅឆ្នាំនេះ អាចនឹងខ្ពស់ជាងការព្យាករណ៍ ដែលមានចំនួនប្រមាណ៦%ភាគរយ ឆ្នាំ២០២២នេះ ធៀបនឹងកាលពីឆ្នាំមុន កម្ពុជាសម្រចបានកំណើនសេដ្ឋកិច្ចប្រមាណត្រឹម២,៩ភាគរយប៉ុណ្ណោះ។

បើតាមធនាគារពិភពលោកADB កាលពីឆ្នាំ២០២១កន្លងទៅបានព្យាករណ៍ផងដែរថា សេដ្ឋកិច្ចកម្ពុជា នឹងងើបឡើងវិញក្នុងរង្វង់៤.៨ ភាគរយប៉ុណ្ណោះនៅក្នុងឆ្នាំ២០២២។

ប្រធានសេដ្ឋវិទូAPAC លោកCochran បានមានប្រសាសន៍ថា ទស្ស​នវិស័យសេដ្ឋកិច្ចកម្ពុ ជាមានហាក់មានភាពវិជ្ជមាន ទោះស្ថិតនៅស្ថានភាពជំងឺរាតត្បាតនៅតែបន្តកើតមានក្តី។  អត្រានៃការឆ្លងថ្មីប្រចាំថ្ងៃនៅក្នុងប្រទេស នៅតែជាកម្រិតទាបបំផុតមួយនៅក្នុងតំបន់។  នេះជារឿងគួរឱ្យ សរសើរផងដែរ  ដែលអត្រាទទួលបានថ្នាំបង្ការ ពេញលេញរបស់កម្ពុជា មានកម្រិតខ្ពស់បំផុតក្នុងតំបន់អាស៊ីប៉ាស៊ីហ្វិក។

ដោយសារថា អត្រាកំណើន GDP ជាមធ្យមក្នុងទសវត្សរ៍មុនពេលជំងឺរាតត្បាតរាតត្បាត សេដ្ឋកិច្ចកម្ពុជាមានកំនើនក្នុងរង្វង់៧ភាគរយ ហើយអត្រាកំណើនGDPជិត៦ភាគរយនៅឆ្នាំនេះ គឺអាចសម្រេចបានដោយសារការចំណាយលើវិស័យទេសចរណ៍ មានភាពប្រសើរឡើងបន្តិចម្តងៗ។

លោក Cochrane បាននិយាយទៀតថា “កំណើននៃការនាំចេញរបស់កម្ពុជា ក៏នឹងស្ទុះងើបឡើងវិញយ៉ាងខ្លាំង ក្នុងរយៈពេលដ៏ខ្លីខាងមុខនេះ ដែលជួយដោយតម្រូវការប្រកបដោយនិរន្តរភាព ពីប្រទេសចិនសម្រាប់ការនាំចេញកសិកម្មរបស់ប្រទេសនេះ”។

គោលដៅនៃការ កើនឡើងក្នុងការនាំចេញ ក្នុងរយៈពេលពីរឆ្នាំបន្ទាប់ គឺ ជាការនាំចេញទំនិញជាប់លាប់ ទៅកាន់សហរដ្ឋអាមេរិក ដែលជាគោលដៅនាំចេញធំបំផុតរបស់កម្ពុជា ។

ទស្សនវិស័យពាណិជ្ជកម្មរបស់កម្ពុជា ក្នុងរយៈពេលវែងនៅតែរឹងមាំជាមួយនឹងការផ្តល់សច្ចាប័នលើRCEP “ភាពជាដៃគូសេដ្ឋកិច្ចទូលំទូលាយក្នុងតំបន់” និង FTA ចិន-កម្ពុជា “កិច្ចព្រមព្រៀងពាណិជ្ជកម្មសេរី” ដែលនឹងផ្តល់លទ្ធភាព ទទួលបានអនុគ្រោះទីផ្សារ និងការផ្ទេរបច្ចេកវិទ្យាផលិត​កម្មសម្រាប់សេដ្ឋកិច្ច។

RCEP គឺជាប្លុកពាណិជ្ជកម្មដ៏ធំបំផុតរបស់ពិភពលោក ដែលរួមទាំងសមាជិកអាស៊ានទាំង១០ រួមជាមួយនឹងប្រទេសចិន កូរ៉េខាងត្បូង ជប៉ុន អូស្ត្រាលី និងនូវែលសេឡង់។  វាស្មើនឹង៣០ភាគរយ នៃចំនួនប្រជាជនពិភពលោក GDP និងពាណិជ្ជកម្មលើពិភពលោក។

យោងតាមលោក អូន ពន្ធ័មុន្នីរត័្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុសេដ្ឋកិច្ច ក៏ធ្លាប់នព្យាករណ៍ផងដែរថា សេដ្ឋកិច្ចកម្ពុជា នឹងមានកំណើនដ៏រឹងមាំនៅឆ្នាំ២០២២នេះ ដោយសារការងើបឡើងវិញនៃសេដ្ឋកិច្ច ដែលកើតចេញពីកម្មវិធីចាក់វ៉ាក់សាំងCovid-19 របស់​រដ្ឋាភិបាលផងដែរ៕

ដំណឹងល្អៈរដ្ឋាភិបាលនឹងពន្យាពេលលើការបង់ពន្ឋមូលធនលើប្រាក់ចំណេញ២០ភាគរយ

ដោយៈជេស៊ីកា

 ភ្នំពេញៈ រដ្ឋាភិបាលតាមរយៈអគ្គនាយកដ្ឋានពន្ឋដា នឹងពន្យាលើការបង់ពន្ឋប្រាក់ចំណេញ មូលធនរហូតដល់ឆ្នាំ២០២៣ និងអាចពន្យាដល់ឆ្នាំ២០២៤ខាងមុខ។ នេះបើតាមប្រភពពីមន្រ្តីជាន់ខ្ពស់ នៃអគ្គនាយកដ្ឋានពន្ឋដា។

មន្រ្តីដដែលបានបង្ហើបឲ្យដឹងថា ពន្ឋលើប្រាក់ចំណេញមូលធន ដែលគ្រោងអនុវត្តន៍៍នៅដើមឆ្នាំ២០២២នេះ នឹងត្រូវពន្យាពេលរហូតដល់ដំណាច់ឆ្នាំ២០២៣ ឬដល់ឆ្នាំ២០២៤ ដើម្បីជាការលើកទឹកចិត្តដល់អ្នកវិនិយោគក្នុងវិស័យអចលនទ្រព្យ ដែលរងផលប៉ះពាល់ ដោយសារវិបត្តិសេដ្ឋកិច្ច ដែល​បណ្តាលមកពីការរីករាលដាលជំងឺកូវីដ១៩។

មន្រ្តីជាន់ខ្ពស់ដដែលបានបន្តថា ការចេញលិខិតផ្លូវការឬការប្រកាសពីការពន្យាពេល លើការបង់ពន្ឋលើប្រាក់ចំណេញមូលធន នឹងចាប់ផ្តើមនៅពេលខាងមុខនេះ ប៉ុន្តែលោកមិនបញ្ជាក់ពីពេលវេលាជាក់លាក់នោះទេ។

កាលពីចុងឆ្នាំ២០២១កន្លងមកនេះ រដ្ឋាភិបាលក៏បានពន្យាពេលលើការបង់ពន្ឋដល់អ្នកទិញលំនៅដ្ឋាន ដែលមានតម្លៃក្រោម៧ម៉ឺនដុល្លារអាមេរិកផងដែរ។

អ្នកឧកញ៉ាលី ហួរប្រធានសមាគមអ្នកអភិវឌ្ឍន៍លំនៅដ្ឋានកម្ពុជាបានមានប្រសាសន៍ស្វាគមន៍ព៌តមាននេះ ដោយលោកបានមានប្រសាសន៍ថា ការពន្យាពេលលើការយកពន្ឋ លើប្រាក់ចំណេញមូលធន ជារឿងល្អប្រសើរ ដែលមានន័យថា ប្រមុខរដ្ឋាភិបាលបានលើកទឹកចិត្ត ដល់វិស័យឯកជន ដែលជួបផលលំបាកក្នុងរយៈពេលពីរឆ្នាំកន្លងមកនេះ៕